ВЕЧЕРЪ,
Пое́мъ: Блаже́нъ му́жъ.., 1-й антифо́нъ.
На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.
Да́лъ еси́, Человѣколю́бче, Твою́ Ма́терь,* по́мощь рабо́мъ Твои́мъ,* я́ко Благоутро́бенъ,* Еюже неизрече́нное и стра́шное содѣ́лалъ еси́ смотре́ніе Твое́* и первозда́нное на́ше испра́вилъ еси́ боже́ственное досто́инство.* Тѣ́мже, всечестно́е Тоя́ чту́ще торжество́,* воспѣва́емъ держа́ву Твою́,* Іису́се Всеси́льне,* Спа́се ду́шъ на́шихъ. [Два́жды.]
Гра́дъ, почита́ющій Тя́* и по до́лгу сла́вящій,* огражда́еши, Всепѣ́тая,* ри́зою Твое́ю честно́ю* отъ безбо́жныхъ, Чи́стая, иноплеме́нникъ,* отъ гла́да же, и тру́са,* и междоусо́бныя бра́ни всегда́,* Дѣ́во Неискусобра́чная,* и сего́ ра́ди сла́витъ Тя́, Пресвята́я Богоневѣ́сто,* человѣ́ковъ Помо́щнице. [Два́жды.]
Ри́зу честну́ю Твою́, Богоблагода́тная Влады́чице,* дарова́ла еси́ гра́ду Твоему́,* бога́тство неотъе́млемо;* покро́въ же, и сла́ву,* и необори́му стѣ́ну,* и исцѣле́ній сокро́вище,* и чуде́съ исто́чникъ приснотеку́щій,* приста́нище же спаси́тельное обурева́емымъ всегда́.* Сего́ ра́ди пое́мъ Тя́, Препѣ́тая Чи́стая.
Почерпи́те, человѣ́цы,* здра́віе души́ и тѣ́ла:* ра́ка бо всѣ́мъ предлежи́тъ,* въ не́йже положи́ся честна́я ри́за Приснодѣ́вы,* источа́ющая на́мъ чуде́съ струи́,* и омыва́ющая серде́цъ омраче́нія* и страсте́й оскверне́нія,* и ду́ши освяща́ющая вѣ́рныхъ* Боже́ственною благода́тію.
Сла́ва, и ны́нѣ, гла́съ 2:
Смы́слъ очи́стивше и у́мъ, со а́нгелы и мы́ торжеству́емъ, свѣ́тло начина́юще Дави́дскую пѣ́снь Отрокови́це, Невѣ́стѣ всѣ́хъ Царя́, Христа́ Бо́га на́шего: воскресни́, Го́споди, — глаго́люще, — въ поко́й Тво́й, Ты́ и Киво́тъ святы́ни Твоея́; я́ко бо пала́ту красну́, Сію́ украси́въ и причте́ Ю гра́ду Твоему́, Влады́ко, стро́ити и покрыва́ти отъ супоста́тныхъ пога́нъ держа́вною си́лою Твое́ю, моли́твами Ея́.
Вхо́дъ. Проки́менъ дне́. Чте́нія три́.
Бытія́ чте́ніе. [Глава́ 28.]
Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.
Прoро́чества Іезекíилева чте́ніе. [Глава́ 43 и 44.]
Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.
При́тчей чте́ніе. [Глава́ 9.]
Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.
На стихо́внѣ стихи́ры, гла́съ 1. Подо́бенъ: Всехва́льніи му́ченицы.
Пала́та одушевле́нная Бо́жія* еди́на была́ еси́* и честну́ю ри́зу Твою́,* въ дому́ святѣ́мъ Твое́мъ сокрове́ну,* вѣ́рнымъ освяще́ніе* и стѣ́ну дарова́ла еси́ необори́му,* ея́же ра́ди гра́дъ Тво́й,* Богома́ти, спаса́ется,* воспѣва́я боже́ственную держа́ву Твою́.
Сти́хъ: Воскресни́, Го́споди, въ поко́й Тво́й,* Ты́ и киво́тъ святы́ни Твоея́.
Ри́зу честну́ю Твою́,* Твое́ честно́е и свято́е тѣ́ло,* Чи́стая, покры́вшую,* оде́жду сла́вы дарова́ла еси́ всѣ́мъ* и исто́чникъ, источа́ющь* благода́ти присноживо́тныя во́ды.* Ея́же пра́зднуемъ положе́ніе,* почита́юще Тя́, Богоро́дице,* всѣ́хъ Честнѣ́йшую.
Сти́хъ: Лицу́ Твоему́ помо́лятся* бога́тіи лю́дстіи.
Хра́мъ Тво́й, Влады́чице,* Твою́ свяще́нную ри́зу,* я́ко сокро́вище свяще́нія нося́,* всегда́ освяща́етъ вся́,* вѣ́рою притека́ющія* и Тя́ по до́лгу блажа́щія* въ се́мъ вы́ну,* упова́ніе ду́шъ на́шихъ,* и тве́рдый покро́въ, и держа́ву.
Сла́ва, и ны́нѣ, гла́съ 2:
Яко вѣнце́мъ пресвѣ́тлымъ, Пречи́стая Богоро́дице, ри́зою Твое́ю честно́ю Це́рковь Бо́жія пріодѣ́яся, и свѣ́тится, ра́дующися дне́сь, и та́йно ликовству́етъ, Влады́чице, вопію́щи Тебѣ́: ра́дуйся, діади́мо честна́я и вѣ́нче боже́ственныя сла́вы; ра́дуйся, еди́на сла́вы соверше́ніе и вѣ́чное весе́ліе; ра́дуйся, къ Тебѣ́ притека́ющимъ приста́нище, и избавле́ніе, и спасе́ніе на́ше.
Тропа́рь, гла́съ 8:
Богоро́дице Приснодѣ́во, человѣ́ковъ покро́ве, ри́зу и по́ясъ пречи́стаго Твоего́ тѣлесе́, держа́вное гра́ду Твоему́ обложе́ніе дарова́ла еси́, безсѣ́меннымъ рождество́мъ Твои́мъ, нетлѣ́нна пребыва́ющи, о Тебѣ́ бо и естество́ обновля́ется и вре́мя. Тѣ́мже мо́лимъ Тя́, ми́ръ гра́ду Твоему́ дарова́ти, и душа́мъ на́шимъ ве́лію ми́лость.
НА УТРЕНИ,
На Бо́гъ Госпо́дь: тропа́рь Богоро́дицы, три́жды.
По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.
Красото́ю дѣ́вства Твоего́ Прекра́сное Сло́во ро́ждши и Сего́ ри́зою Твое́ю, Чи́стая, я́ко Младе́нца обвила́ еси́. Сего́ у́бо дарова́ла еси́ рабо́мъ Твои́мъ, Влады́чице, покро́въ, по́мощь и исто́чникъ свяще́нія. Ея́же честно́е положе́ніе, Пресвята́я Дѣ́во, вси́ вѣ́рно пра́зднуемъ.
Сла́ва, и ны́нѣ, то́йже.
По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.
Рождество́ нетлѣ́нно и дѣ́вство еди́на имѣ́ла еси́, Благослове́нная, одѣя́ніе же человѣ́комъ спаси́тельно, Твою́ святу́ю ри́зу дарова́ла еси́, да́же до ны́нѣ нетлѣ́нно пребыва́ющую, Богоневѣ́сто. Ея́же ра́ди отъ Бо́га пріе́млемъ, раби́ Твои́, Чи́стая, ве́лію ми́лость.
Сла́ва, и ны́нѣ, то́йже.
[Поліеле́й.
Велича́ніе: Велича́емъ Тя́, Пресвята́я Дѣ́во, Богоизбра́нная Отрокови́це, и чте́мъ святы́я ри́зы Твоея́ честно́е положе́ніе.
Псало́мъ избра́нный: Помяни́, Го́споди, Дави́да и всю́ кро́тость его́…]
По поліеле́и сѣда́ленъ, гла́съ 4. Подо́бенъ: Вознесы́йся.
Чуде́съ рѣ́ки, Богоро́дице, отъ всечестны́я Твоея́ ра́ки происходя́щія, я́ко изъ Еде́ма, напая́ютъ лице́ земли́, благода́ти пролива́ющія вѣ́рно Тя́ чту́щимъ, тѣ́мже Тя́ воспѣва́емъ, и вѣ́рно восхваля́емъ, и благода́рно всегда́ взыва́емъ: ра́дуйся, еди́на Наде́жде пою́щихъ Тя́.
Сла́ва, и ны́нѣ, то́йже.
Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́ во вся́комъ ро́дѣ и ро́дѣ. Сти́хъ: Слы́ши Дщи́ и ви́ждь, и приклони́ у́хо Твое́. Вся́кое дыха́ніе да хва́литъ Го́спода… Ева́нгеліе Луки́, зача́ло 4.
По 50-мъ псалмѣ́ стихи́ра, гла́съ 2:
Яко вѣнце́мъ пресвѣ́тлымъ, Пречи́стая Богоро́дице, ри́зою Твое́ю честно́ю Це́рковь Бо́жія пріодѣ́яся, и свѣ́тится, ра́дующися дне́сь, и та́йно ликовству́етъ, Влады́чице, вопію́щи Тебѣ́: ра́дуйся, діади́мо честна́я и вѣ́нче боже́ственныя сла́вы; ра́дуйся, еди́на сла́вы соверше́ніе и вѣ́чное весе́ліе; ра́дуйся, къ Тебѣ́ притека́ющимъ приста́нище, и избавле́ніе, и спасе́ніе на́ше.
Кано́ны два́: пе́рвый со ирмосо́мъ на 8, его́же краегране́сіе: Ри́зу почита́ю Пречи́стыя Дѣ́вы. Творе́ніе Іо́сифово, гла́съ 4.
Пѣ́снь 1.
Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.
Ри́зу Твою́ честну́ю, Богоро́дице Дѣ́во, чту́щимъ Тя́ лю́демъ дарова́ла еси́ при́сно, свяще́нное огражде́ніе, вся́кое сопроти́вныхъ обстоя́ніе всегда́ побѣжда́ющи си́лою духо́вною.
Пло́тію на́съ ра́ди отъ чи́стыхъ Твои́хъ крове́й я́вльшагося на земли́, ри́зу свяще́нную осяза́ніемъ освяти́ла еси́ и тѣлесе́ Твоего́ прикоснове́ніемъ, ея́же ра́ди вся́ рабы́ Твоя́ освяща́еши, Дѣ́во, пою́щія Тя́.
Сокро́вище честно́е вѣ́рно Тя́ чту́щимъ дарова́ла еси́, Блага́я Дѣ́во, вои́стинну честну́ю ри́зу Твою́, вся́ обогаща́ющи да́ры Боже́ственнаго Ду́ха и чуде́съ мно́гими дѣя́ніи.
Нескве́рная Агнице, Агнца ро́ждшая Бо́жія па́че естества́, дарова́ла еси́ на́мъ честну́ю ри́зу Твою́, скве́рны и́стинно и вра́ски очища́ющую всегда́ покланя́ющихся е́й, Всенепоро́чная.
Другíй кано́нъ на 4. Творе́ніе того́же, гла́съ то́йже.
Пѣ́снь 1.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.
Свѣща́ свѣтоявле́нная и незаходи́мая, Пречи́стыя хра́мъ, я́коже не́бо свѣ́тлое, обрѣ́тъ честну́ю ри́зу Ея́, вселе́нную дне́сь благода́тей просвѣща́етъ заря́ми.
Крѣ́пость и утвержде́нія сою́зъ, Твою́, Пречи́стая, ри́зу боже́ственную вои́стинну стяжа́въ, гра́дъ Тво́й держа́ву непобѣди́мую и́мать, тѣ́мъ и хва́лится о Тебѣ́.
Дре́вняго я́ко вои́стинну киво́та честнѣ́йшая Твоя́ ра́ка, Богороди́тельнице, яви́ся на земли́, его́же зна́менія нося́щи, но и вѣ́рныхъ во и́стинѣ позна́нія сохраня́ющи.
Катава́сія: Отве́рзу уста́ моя́…
Пѣ́снь 3.
Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.
Кра́сное освяще́ніе, небе́сную две́рь, Бо́жію Ма́терь воспое́мъ и Тоя́ ри́зу, Боже́ственная точа́щу дарова́нія, ю́же любо́вію цѣлу́емъ.
Нетлѣ́нія оде́ждею тлѣ́ніемъ обна́жшіяся, Твои́мъ нетлѣ́ннымъ Рождество́мъ всѣ́хъ одѣ́яла еси́, Чи́стая. Имже честну́ю ри́зу Твою́ дарова́ла еси́, бога́тство неотъе́млемо.
Иже о́блаки, Чи́стая, одѣва́ющаго все́ не́бо ри́зою Твое́ю обвила́ еси́, Пречи́стая. Ейже покланя́ющеся, вѣ́рно Тя́ сла́вимъ, покро́ве ду́шъ на́шихъ.
Врачева́ніе безме́здно боля́щимъ е́сть Боже́ственный се́й хра́мъ: ри́зу бо Твою́, Чи́стая, исто́чникъ, непреста́нно точа́щій исцѣле́нія, стяжа́, Пренепоро́чная.
Инъ.
Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.
Почита́емъ, вѣ́рніи, я́ко совокупле́нія къ Бо́гу сою́зъ, Чи́стыя дне́сь ри́зы, вѣ́рно говѣ́юще.
Исцѣле́нія вѣ́рнымъ многочестна́я на́мъ дне́сь прече́стно Чи́стыя ри́за источа́етъ благода́тію.
Яко роса́ у́тренняя, ра́дость Твоя́ приснотеку́щая пе́щь страсте́й Тя́ воспѣва́ющихъ уставля́етъ при́сно.
Сѣда́ленъ, гла́съ 4. Подо́бенъ: Вознесы́йся.
Чуде́съ рѣ́ки, Богоро́дице, отъ всечестны́я Твоея́ ра́ки происходя́щія, я́ко изъ Еде́ма, напая́ютъ лице́ земли́, благода́ти пролива́ющія вѣ́рно Тя́ чту́щимъ, тѣ́мже Тя́ воспѣва́емъ, и вѣ́рно восхваля́емъ, и благода́рно всегда́ взыва́емъ: ра́дуйся, еди́на Наде́жде пою́щихъ Тя́.
Сла́ва, и ны́нѣ, то́йже.
Пѣ́снь 4.
Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.
Возвели́чимъ еди́ну Благослове́нную и Тоя́ ри́зѣ прико́снемся вѣ́рою, я́ко да почерпе́мъ благода́ть духо́вную.
Яко многоцѣ́нное сокро́вище, стяжа́въ Тебе́ чту́щій гра́дъ ри́зу Твою́, Отрокови́це, вѣ́рою облобыза́етъ и благода́ть пріе́млетъ.
Ри́зу Твою́, я́ко точа́щую нетлѣ́ніе, оде́жду же сла́вы бы́вшую, всѣ́мъ пѣсносло́вящимъ Тя́, почита́емъ, Всенепоро́чная.
Всенепоро́чная и еди́на благослове́нная, херуви́мъ святѣ́йши я́вльшися, спаси́ отъ вся́каго обстоя́нія, вѣ́рою чту́щихъ Тя́.
Инъ.
Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.
Яко пречестну́ю тве́рдь, Богоро́дице, Творе́цъ и Зижди́тель Тя́ водрузи́вый, я́коже звѣзда́ми, украси́ Тя Боже́ственными сія́ніи, и́миже украша́еши концы́.
Отъ земли́ на́съ возвлачи́тъ къ небеси́, Богороди́тельнице, боже́ственная Твоя́ ри́за, Чи́стая, любо́вію сея́ распале́нныхъ те́плѣ, тѣ́мже Тя́ сла́вимъ, я́ко лу́чшаго вину́.
Се́ благода́ть неисчерпа́емая, пріиди́те вси́ сокруше́ннымъ се́рдцемъ, почерпи́те Боже́ственныя то́ки, источа́ющія незави́стно, о празднолю́бцы, отъ честны́я ра́ки Твоея́, Всепѣ́тая.
Пѣ́снь 5.
Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.
Ты́, Влады́чице Чи́стая, на́мъ, Твои́мъ рабо́мъ, дарова́ла еси́ утвержде́ніе ри́зу, и честны́й Тво́й по́ясъ, и боже́ственное огражде́ніе.
Ра́й красе́нъ, благово́ніе Ду́ха, Пречи́стая, испуща́яй, хра́мъ, держа́щій Твою́ ри́зу, показа́ся.
Освяти́ на́ша ду́ши и тѣлеса́, вѣ́рою святу́ю Твою́, Пресвята́я, ри́зу почита́ющихъ, я́ко прече́стну.
Хра́мы ны́ Бо́жія въ Тя́ Все́льшагося покажи́, Богоро́дице, въ Боже́ственнѣмъ хра́мѣ Твое́мъ вѣ́рно Тя́ блажа́щія.
Инъ.
Ирмо́съ то́йже. Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.
Ты́, Го́споди, Твою́ Ма́терь возвели́чилъ еси́, Ты́ возне́слъ еси́ надъ вся́ вла́сти мы́сленныя безъ сравне́нія сла́ву Ея́.
Благода́ть Бо́жію незави́стно точа́щая Ты́ еси́, Пречи́стая Богоро́дице, отъ честны́я ра́ки Твоея́ любо́вію покланя́ющимся.
Твое́ю си́лою вѣ́рніи ца́ріе опоясу́ются, Тя́ сою́зъ, Богоро́дице, Тво́й и́мать гра́дъ ри́зою Твое́ю почита́ется.
Пѣ́снь 6.
Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.
Показа́ла еси́ всѣ́ми Ца́рствующему гра́ду, ро́ждшая Царя́ всѣ́хъ и Го́спода, я́ко неруши́мую стѣ́ну, честну́ю и святу́ю ри́зу Твою́.
Ра́дующеся, Дѣ́вы благода́ть просла́вимъ, и Сея́ пресвяту́ю ри́зу почти́мъ: изъ нея́же вся́ко здра́віе немощны́мъ непреста́нно происхо́дитъ.
Во́дъ Тя́ животеку́щій исто́чникъ вѣ́мы, Богоро́дице, и почита́емъ боже́ственную ри́зу Твою́, отъ нея́же исцѣле́ніе всегда́, вѣ́рніи, почерпа́емъ.
Госпо́дь, съ Тобо́ю, Богоро́дице, бы́вый, человѣ́ческое Себѣ́ присво́илъ существо́ и вся́къ вре́дъ чужда́го отъ него́ изгна́лъ е́сть.
Инъ.
Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.
Всю́ Тя́ па́че естества́ просла́ви Госпо́дь, всю́ украси́въ, Отрокови́це, всю́ Тя почте́ па́че сло́ва, Богоро́дице, съ по́ясомъ, ри́зою и боже́ственною ра́кою.
Крѣ́пость Тя́ вѣ́рніи стяжа́вше и похвалу́, одѣва́ются сла́вою, честно́ю Твое́ю ри́зою, Богороди́тельнице, я́коже пресвѣ́тлое украше́ніе и честно́е Тя́ стяжа́вше.
Ви́дѣти Твою́, Богоро́дице, сла́ву неизрече́нную дре́вле болѣ́зноваху боже́ственнѣ проро́цы вси́, но въ послѣ́дняя дни́ на́мъ яви́ся и́же лѣ́тъ Превы́шшій.
Конда́къ, гла́съ 4. Подо́бенъ: Вознесы́йся.
Одѣя́ніе всѣ́мъ вѣ́рнымъ нетлѣ́нія, Богоблагода́тная Чи́стая, дарова́ла еси́, свяще́нную ри́зу Твою́, е́юже свяще́нное тѣ́ло Твое́ покрыва́ла еси́, покро́ве всѣ́хъ человѣ́ковъ, ея́же положе́ніе пра́зднуемъ любо́вію и вопіе́мъ со стра́хомъ Ти́, Чи́стая: ра́дуйся, Дѣ́во, христіа́новъ похвало́.
Икосъ:
Чи́стое одѣя́ніе и ски́нію Бо́жія Сло́ва, одушевле́нный о́блакъ и ста́мну ма́нны, Богоро́дицу Марíю вси́, спа́сшіися Рождество́мъ Ея́, вѣ́рою ублажи́мъ и честнѣ́й ри́зѣ прико́снемся, е́юже Влады́ку объе́мши, я́ко Отроча́ носи́ла е́сть, въ пло́ть обо́лкшагося, Его́же ра́ди человѣ́ческое естество́ взя́тся къ превысоча́йшей жи́зни и Ца́рствію. Тѣ́мже съ ра́достію вопіе́мъ велегла́сно: ра́дуйся, Дѣ́во, христіа́новъ похвало́.
Пѣ́снь 7.
Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.
Высо́кимъ ра́зумомъ и смире́ннымъ се́рдцемъ Царе́въ превысо́кій престо́лъ просла́вимъ, Всесвяту́ю Отрокови́цу обра́дованную.
Черто́гъ Бо́жій избра́нный, въ честнѣ́мъ Твое́мъ се́мъ черто́зѣ лежа́щую ри́зу Твою́ вѣ́рою почита́емъ, я́ко киво́тъ свя́тъ и благочести́выхъ покро́въ.
Обновля́ется вся́къ, приступа́яй вѣ́рою и святы́й облобыза́яй ковче́гъ, держа́щій Твою́, Чи́стая Дѣ́во, свѣтови́дную ри́зу.
Богороди́тельнице Чи́стая, чту́щій Тя́ гра́дъ гла́да, тру́са же и озлобле́нія вся́каго спаса́й, и язы́ческаго нахожде́нія, и сопроти́внаго вре́да.
Инъ.
Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.
Ты́, я́коже Со́лнце Пра́вды еди́нъ сы́й, Бла́же, Боже́ственно украси́лъ еси́ хра́мъ Чи́стыя разли́чными Твои́ми дарова́ніи, въ не́мже возсія́вшія лучи́ испуща́етъ отъ сея́ ри́зы.
Излива́ютъ чудеса́, Пречи́стая, боже́ственныя ча́ши Твоя́ благода́ть вои́стинну вѣ́рнымъ, и незави́стно чту́щимъ Тя́ отъ Твоея́ ра́ки пролива́ются, я́ко изъ друга́го Еде́ма, мы́сленныя рѣ́ки.
Отъ скве́рны вся́кія душе́вныя, чисти́тельна е́сть Тво́я, Всенепоро́чная Дѣ́во, ра́ка, покрыва́ющая честно́е Твое́ тѣ́ло покры́вшею ри́зою.
Ны́нѣ приступи́те съ весе́ліемъ вси́, и́же на земли́, пріиди́те, ра́ка призыва́етъ та́йнѣ, объя́ти Госпожи́ пресла́вную во мнѣ́ сокро́виществованную ри́зу Ея́.
Пѣ́снь 8.
Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.
Благода́рными гла́сы воспѣва́емъ Тя́, всѣ́хъ до́брыхъ на́мъ Хода́таицу, и честну́ю ри́зу Твою́ облобыза́юще, Отрокови́це, взыва́емъ: благослови́те, вся́ дѣла́ Госпо́дня, Го́спода.
Яко мы́сленную свѣщу́ иму́ще, на свѣ́щницѣ трапе́зы предлежа́щую, свяще́нную оде́жду Пречи́стыя Дѣ́вы, серде́чныя просвѣща́емъ зѣ́ницы всегда́.
Ника́коже безча́стны оста́вила еси́ свяще́ннаго Твоего́, Дѣ́во, прикоснове́нія недосто́йныя рабы́ Твоя́: вмѣ́сто бо тѣ́ла Твоего́ живоно́снаго ри́зу Твою́ всѣ́мъ дарова́ла еси́.
Пѣ́сньми боже́ственными почти́мъ Бо́жіе селе́ніе простра́нное, въ ма́терехъ Пречи́стую, небе́сную две́рь, е́юже заключи́ся къ сме́рти две́рь веду́щая.
Инъ.
Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.
Ангели, Пречи́стая, ны́нѣ сликовству́ютъ въ честнѣ́мъ хра́мѣ Твое́мъ, Чи́стая, и окружа́ютъ, Влады́чице, честну́ю и святу́ю Твою́ ри́зу любо́вію и ра́достію, мы́ же весе́ліемъ мно́гимъ покланя́емся, воспѣва́юще Тя́, сла́ву ро́да на́шего.
Же́злъ, я́же цвѣ́тъ жи́зни прозя́бшій, Ты́ еси́ всѣ́хъ ра́дость многочестна́я, Пречи́стая, мѵрополо́жница Ду́ха, сокро́вище, благи́хъ, арома́тъ исто́чникъ, изъ него́же мѵ́ра исцѣле́ній источа́етъ боже́ственная ра́ка.
Воспѣва́ютъ, Пречи́стая, вели́чія Твоя́, Чи́стая, мы́сленная во́инства, проповѣ́даютъ вси́ патріа́рси и проро́цы я́сно, и апо́столи сія́, и му́чениковъ ли́къ, и преподо́бныхъ все́ исполне́ніе, съ ни́миже покланя́емъ Ти ся.
Пѣ́снь 9.
Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.
Се́ Тя́, о́дръ Соломо́новъ, почита́емъ ра́достными пѣ́сньми, и честну́ю Твою́ ри́зу, я́ко другíй киво́тъ свяще́нія, окружи́вше, исцѣле́нія пріе́млемъ спаси́тельная, Приснодѣ́во.
Яви́ся ны́нѣ боже́ственная Твоя́ ра́ка, содержа́щая ри́зу Твою́ честну́ю, я́коже исто́чникъ свѣ́та, Дѣ́во, лучи́ исцѣле́ній испуща́ющи и тму́ неду́говъ отгоня́щи, ю́же съ любо́вію цѣлу́емъ.
Дне́сь сра́дуются на́мъ, Всенепоро́чная, покланя́ніемъ ри́зы Твоея́ вся́ небе́сныя си́лы, апо́столи, проро́цы и му́ченицы, преподо́бніи и пра́ведніи вси́, Влады́чице еди́на Приснодѣ́во.
Освяти́ся вся́ земля́, всесвята́го Влады́чня поко́ища, положе́ніемъ ри́зы Твоея́, и Дави́дъ ра́дуется дре́вле положе́ніемъ киво́та, прообразу́ющая Тя́, Приснодѣ́во.
Свѣ́тло одѣя́ніе Твою́ ри́зу дарова́ла еси́ и огражде́ніе Тя́ чту́щему Ца́рствующему гра́ду всѣ́хъ градо́въ, я́ко Цари́ца всѣ́хъ тва́рей су́щи, Богороди́тельнице Ма́ти Дѣ́во.
Инъ.
Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.
Черто́гъ пречестны́й се́й, Богороди́тельнице, яви́ся ра́ка Твоя́, честну́ю Твою́ ри́зу, дѣ́вственное же одѣя́ніе и невѣ́стническое я́ко иму́щи и я́ко жи́зни сокро́вище соблюда́ющи.
Хра́мъ, изобража́ющій вся́ко небе́сное благоукраше́ніе Дѣ́вы, дне́сь, вѣ́рніи, дости́гше, чуде́съ заря́ми, я́коже звѣзда́ми, сія́емъ, и озаря́емся благода́тію.
Имать святы́й Тво́й по́ясъ и честну́ю Твою́ ри́зу, Богороди́тельнице, Тво́й гра́дъ, я́ко стѣ́ну, и уче́ній боже́ственныхъ соедине́ніе, и правосла́вныхъ похвалу́, и царе́й побѣди́тельная.
Пое́мъ неизрече́нную сла́ву и безчи́сленную Твою́ благода́ть: Ты́ бо еси́ исто́чникъ прему́дрости, изъ него́же Сло́во всѣ́мъ происхо́дитъ, чту́щимъ Тя́, Пречи́стая, и велича́ющимъ Рождество́ Твое́.
Свѣти́ленъ. Подо́бенъ: Свѣ́те неизмѣ́нне.
Окрили́вшую Христа́ ри́зу Богоотрокови́цы и Богоро́дицы Марíи, дне́сь пріиди́те, земноро́дніи, почти́мъ пѣ́сньми, я́ко да благода́тію Сея́ при́сно ублажа́емся.
Сла́ва, и ны́нѣ:
Еди́на и естество́ и вре́мя обнови́ла еси́, Богома́ти: нетлѣ́нно бо Твое́ Рождество́, нетлѣ́нная и ри́за, е́юже гра́дъ Тво́й покрыва́еши и е́юже ски́петры благоче́стія содержи́ши.
На хвали́техъ стихи́ры на 4, гла́съ 4. Подо́бенъ: Яко до́бля.
Ра́ка, содержа́щая ри́зу Твою́, Пречи́стая,* киво́тъ освяще́нія рабо́мъ Твои́мъ,* и свяще́нное огражде́ніе,* и сла́ва, и похвала́,* и исцѣле́ній исто́чникъ* на вся́къ де́нь познава́ется.* Идѣ́же дне́сь свяще́нно собра́вшеся,* воспѣва́емъ мно́гая Твоя́ вели́чія* и чуде́съ пучи́ну. [Два́жды.]
Се мѣ́сто пресла́вно,* се до́мъ присносвѣ́телъ,* въ не́мже сокро́вище положи́ся —* честна́я ри́за Богоотрокови́цы — благода́тію,* приступи́те, человѣ́цы,* просвѣще́ніе и очище́ніе изъ нея́ проявле́ннѣ почерпи́те* и возопíйте благода́рнымъ се́рдцемъ:* Пресвята́я Дѣ́во, благослови́мъ Тя́,* спаса́еми Рождество́мъ Твои́мъ.
Свято́е положе́ніе ри́зы Твоея́, Влады́чице,* пра́здникъ стяжа́хомъ, веселя́щеся,* я́ко гра́ду Твоему́ дне́сь да́тися сподо́била еси́* свяще́нное одѣя́ніе,* храни́лище некра́домо,* да́ръ че́стенъ,* неотъе́млемо бога́тство,* исцѣле́ній рѣка́,* испо́лнена дарова́ній духо́вныхъ.
Сла́ва, и ны́нѣ, гла́съ 2:
Смы́слъ очи́стивше и у́мъ, со а́нгелы и мы́ торжеству́емъ, свѣ́тло начина́юще Дави́дскую пѣ́снь Отрокови́це, Невѣ́стѣ всѣ́хъ Царя́, Христа́ Бо́га на́шего: воскресни́, Го́споди, — глаго́люще, — въ поко́й Тво́й, Ты́ и Киво́тъ святы́ни Твоея́; я́ко бо пала́ту красну́, Сію́ украси́въ и причте́ Ю гра́ду Твоему́, Влады́ко, стро́ити и покрыва́ти отъ супоста́тныхъ пога́нъ держа́вною си́лою Твое́ю, моли́твами Ея́.
Славосло́віе вели́кое. [Ектеніи́] и отпу́стъ.
НА ЛИТУРГІИ,
Блаже́нна, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, [и возра́довася ду́хъ Мо́й о Бо́зѣ, Спа́сѣ Мое́мъ]. Сти́хъ: Яко призрѣ́ на смире́ніе рабы́ Своея́, [се́ бо отъ ны́нѣ ублажа́тъ Мя́ вси́ ро́ди]. Апо́столъ ко Евре́емъ, зача́ло 320. Аллилу́ія, гла́съ 8: Воскресни́, Го́споди, въ поко́й Тво́й, [Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́]. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, [и и́мя Госпо́дне призову́].
Источникъ: Анѳоло́гіонъ, сíесть Цвѣтосло́віе, или́ Трефоло́гіонъ, сíесть Словопита́ніе. — Кíевъ: Въ Тѵпогра́фіи Кіевопече́рской Ла́ѵры, 1745. — Л. 577 – 581.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.