[ВЕЧЕРЪ,]
На Го́споди воззва́хъ: стихи́ры окто́иха 3 и святы́я 3, гла́съ 1. Подо́бенъ: Небе́сныхъ чино́въ.
Претво́ршися пе́рвѣе любве́, честна́я,* и утве́рждши дѣ́ломъ лу́чшимъ тебѣ́ по́мысломъ,* изшла́ еси́ отъ суеты́ сласте́й, блаже́нная, стропо́тства* и добродѣ́телей жесто́кимъ пра́во ше́ствуеши* восхожде́ніемъ, стра́нствовавши.
Въ приста́нище Боже́ственное устреми́вшися,* ти́хо прешла́ еси́ во́лнъ мірски́хъ мяте́жъ,* души́ же твоея́ кора́бль ве́сь, всечестна́я,* недогрузи́мь везу́щи* отъ сласте́й го́рести,* та́инственныхъ имѣ́ній по́лнъ су́щій.
Боголѣ́пнымъ подража́ніемъ* ты́, стра́нствовавши,*на́съ ра́ди свы́ше къ на́мъ Низше́дшаго возвы́сити па́дшія*пребыва́еши, му́драя, сро́дникомъ у́бо невѣ́дома,*благочести́вымъ же па́че,* и Бо́гу, Ксе́ніе, всегда́ моля́щися.
Сла́ва, и ны́нѣ, богоро́диченъ:
Препросла́вленна еси́ въ ро́дѣхъ родо́въ,* Дѣ́во Ма́ти Отрокови́це, Богоро́дице Марíе,* мíра предста́тельство,* ро́ждши пло́тію Сы́на Безнача́льнаго Отца́,*Соприсносу́щна же Ду́ху вои́стинну,* Его́же моли́ спасти́ся на́мъ.
Крестобогоро́диченъ:
Воздви́жена я́ко ви́дѣ на Крестѣ́ Агнца* Непоро́чная Дѣ́ва,* пла́чущи, вопія́ше:*сладча́йшее Мое́ Ча́до,* что́ но́вое и пресла́вное видѣ́ніе?* Ка́ко, содержа́й вся́ческая го́рстію,* на дре́вѣ пригвозди́лся еси́ пло́тію?
Тропа́рь, гла́съ 8:
Въ тебѣ́, ма́ти, извѣ́стно спасе́ся, е́же по о́бразу: пріи́мши бо кре́стъ, послѣ́довала еси́ Христу́, и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Ксе́ніе, ду́хъ тво́й.
НА УТРЕНИ,
Оба кано́на окто́иха и святы́я на 4, гла́съ 8.
Пѣ́снь 1.
Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.
Стра́ннаго су́ща вся́кія добродѣ́тели и удали́вшагося отъ Бо́га дѣя́ньми безмѣ́стными, присво́й мя́ Сему́ моли́твами твои́ми благопрія́тными, Ксе́ніе честна́я, преподо́бная, твое́ стра́нное житіе́ благохва́лящаго.
Огнь тя́ разжже́ мы́сленный, я́ко ве́щь удобопа́льну, мірску́ю пре́лесть и плотска́го обру́чника отврещи́ся увѣща́ ра́зумомъ му́жественнѣйшимъ и Го́споду чи́стѣ уневѣ́стися.
Стра́нную уразумѣ́вши жи́знь, на небесѣ́хъ пребыва́ющую и непреходя́щую, зва́ніе я́ко дѣя́ніе премѣни́ла еси́ и потекла́ еси́, я́коже еле́нь жа́ждущій, Безсме́ртнаго въ слѣ́дъ Обру́чника.
Богоро́диченъ: Пѣ́сньми Всечи́стую, вѣ́рніи, Марíю да восхва́лимъ, Богома́терь обра́дованную, покро́въ боже́ственный, благоти́шное приста́нище, всѣ́хъ вѣ́рныхъ спасе́ніе.
Пѣ́снь 3.
Ирмо́съ: Утвержде́й Сло́вомъ небеса́ и зе́млю основа́вый на вода́хъ мно́гихъ, утверди́ мя къ пѣ́нію славосло́вія Твоего́, Го́споди.
Удержа́ла еси́ раче́ніе боже́ственное чи́стыя души́ твоея́, забве́ніе прія́ти тя́ поще́нія болѣ́зней увѣща́, честна́я, и естества́.
Безсме́ртнаго Обру́чника добро́тами наслажда́ема, добро́ту пло́ти увяди́ла еси́ и яви́лася еси́ краснѣ́йша, въ Боже́ственный черто́гъ всели́вшися.
Позлаще́нная кри́ла добродѣ́телей стяжа́вши, къ высотѣ́ небе́снѣй возлетѣ́ла еси́, блаже́нная, я́ко голуби́ца нетлѣ́нна.
Богоро́диченъ: Свѣ́тлый о́блаче мы́сленнаго и пресвѣ́тлаго Со́лнца, возсія́вшаго изъ чре́ва Твоего́, Дѣ́во, просвѣти́ ду́ши пою́щихъ Тя́.
Сѣда́ленъ, гла́съ 8. Подо́бенъ: Прему́дрости.
За милосе́рдіе я́вльшееся на земли́ возлюби́вши Сло́во Бо́га Отца́, Тому́ послѣ́довала еси́, я́ко Жениху́, всеблаже́нная, и тлѣ́ннаго жениха́ усе́рдно оста́вила еси́, оста́вльши же тлѣ́нное бога́тство. Тѣ́мже, во стра́нствѣ тезоимени́тно живу́щи, стра́сти умертви́ла еси́ и живы́хъ воспрія́ла еси́ наслѣ́діе, богодухнове́нная. Моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́.
Сла́ва, и ны́нѣ, богоро́диченъ:
Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Всечи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.
Крестобогоро́диченъ:
Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегрѣше́ній оставле́ніе вѣ́рою пою́щимъ Боже́ственныя Стра́сти Твоя́.
Пѣ́снь 4.
Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.
Вѣ́но Христу́ принесла́ еси́ чистоту́, умерщвле́ніе уде́съ и болѣ́зни воздержа́нія, и воспрія́ла еси́ небе́сное Ца́рство и вѣ́чнующее наслажде́ніе.
Образъ тебе́ до́брымъ подаю́щи, привлекла́ еси́ мно́гая ду́ши на спасе́ніе, отто́ргшися мірска́го пристра́стія, Ксе́ніе богому́драя и досточу́дная.
Моча́щи посте́лю слеза́ми, преподо́бная, и съ пе́пеломъ яду́щи хлѣ́бъ, утѣше́ніе получи́ла еси́ нестарѣ́ющееся и рая́ наслажде́ніе.
Богоро́диченъ: Ра́дуйся, отъ на́съ, Свята́я Богоро́дице; ра́дуйся, Ра́дость ро́ждшая мíру; ра́дуйся, еди́на защище́ніе человѣ́ковъ, Благослове́нная Богоро́дице Чи́стая.
Пѣ́снь 5.
Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.
Яко ю́ница, жела́ющи Па́стыря Боже́ственную добро́ту, взыва́ла еси́: гдѣ́ ны́нѣ пасе́ши, Женише́? Гдѣ́ почива́еши, рцы́ ми? Жела́ю Твое́ ви́дѣти преизя́щное видѣ́ніе и распаля́юся всю́ду.
Рачи́тельныя добро́ты Моея́, — вопіе́тъ Жени́хъ, — и́щущи, честна́я, добродѣ́тельми облиста́вшися, въ небесѣ́хъ Мя́ смотри́: та́мо пасу́ Азъ и Моя́ призыва́ю всегда́ о́вцы.
Го́рлица краснѣ́йшая, ла́стовица свѣтлѣ́йшая и мы́сленный славíй, ловле́нія прете́кши мы́сленныхъ сѣ́тей, яви́лася еси́, Ксе́ніе честна́я, и въ пожела́ннѣй добро́тѣ Христо́вѣ, досточу́дная.
Богоро́диченъ: Безма́терня горѣ́, въ послѣ́дняя су́щимъ до́лѣ, ражда́еши безъ отца́, Осуществова́вшаго, Дѣ́во, на́ше все́ за благоутро́біе мно́гое, Его́же моли́ спасти́ отъ тли́ пою́щія Тя́.
Пѣ́снь 6.
Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.
Стра́нное твое́ житіе́ и па́че человѣ́ка поще́ніе прославля́я, тебе́ ра́ди Стра́нствовавый, сла́вная, зна́меньми и чудесы́ пресла́вными и́стинно тя́, преподо́бная, украси́.
Кру́гомъ добродѣ́телей вѣнча́вшися, востекла́ еси́, къ Нему́же жела́ла еси́, Христу́, кру́гомъ звѣ́зднымъ тя́ па́че ума́ возвѣща́ющу бли́жнимъ и да́льнымъ страннообра́зно, Ксе́ніе сла́вная.
Устрани́вшагося дале́че отъ за́повѣдей Бо́га на́шего, присво́й мя́ твои́ми, преподо́бная, мольба́ми и стра́нна мя́ сотвори́ лю́тыя гее́нны и страсте́й, содержа́щихъ мя́.
Богоро́диченъ: На ра́мѣхъ херуви́мскихъ неопи́санно Сѣдя́й, опи́санъ въ Твое́мъ чре́вѣ всели́ся пло́тію, а не Божество́мъ, и изъ Тебе́ про́йде Спаса́яй человѣ́чество.
Конда́къ, гла́съ 2. Подо́бенъ: Крове́й твои́хъ.
Твою́ страннонра́вную, Ксе́ніе, па́мять соверша́юще, любо́вію почита́ющіи тя́, пое́мъ Христа́, во всѣ́хъ тебѣ́ подаю́щаго крѣ́пость исцѣле́ній, Ему́же всегда́ моли́ся о всѣ́хъ на́съ.
Пѣ́снь 7.
Ирмо́съ: Отроки ороси́вый въ пещи́ и Дѣ́ву сохрани́вый, ро́ждшую Тя́, по рождествѣ́, благослове́нъ еси́, Бо́же оте́цъ на́шихъ.
Пелена́ми Ри́мъ хва́лится, Ми́ласса же мно́жае, твоя́ мо́щи стяжа́вши, изъ ни́хже то́чатся чудеса́ вѣ́рнымъ, богоневѣ́сто.
Рѣка́ яви́лася еси́ врачева́ній, страсте́й мо́ре потопля́я пѣснопою́щихъ: благослове́нъ еси́, Го́споди, Бо́же оте́цъ на́шихъ.
Успи́ла еси́ стра́сти душетлѣ́нныя во мно́гихъ бдѣ́ніихъ, блаже́нная, и пра́веднымъ подо́бнымъ сно́мъ усну́ла еси́, о мíрѣ моля́щися.
Богоро́диченъ: Изъ Тебе́ Воплоти́вшагося па́че сло́ва моля́щи не преста́й, Препѣ́тая Богоро́дице, отъ сѣ́тей изба́вится вра́жіихъ душа́мъ на́шимъ.
Пѣ́снь 8.
Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.
Обручи́вшися, я́ко писа́ся, еди́ному му́жу, Христу́, кра́сному добро́тою, вся́къ ви́дъ добродѣ́телей благоче́стно навы́кла еси́, сла́вная, и въ черто́гъ Боже́ственный всели́ся, вѣ́но пріи́мши благода́ть врачева́ній во вся́ вѣ́ки.
Душа́ моя́ въ слѣ́дъ Тебе́ прилѣпи́ся, Христе́, — вопія́ла еси́ любо́вію, — я́ко земля́ жа́ждущая, Тя́, во́ду жи́ву, ищу́, Го́споди, Тебѣ́ ту́чи приноша́ю сле́зъ, Твоея́ любве́ струе́ю напо́й мя́, Спа́се, во вся́ вѣ́ки.
Украси́лася еси́, возлю́бльши и́стинно Су́щее Жела́ніе, просла́вилася еси́, отрокови́це, Препросла́вленному прилѣпи́вшися Бо́гу, ты́ ли́къ святы́й привела́ еси́ дѣ́въ Спа́су, тя́ подража́вшихъ, съ ни́миже въ го́рнихъ лику́еши селе́ніихъ.
Богоро́диченъ: Еди́ну Тя́ избра́, добро́ту Іа́ковлю, Отчее Сло́во, и посредѣ́ Тебе́ всели́ся, и, я́ко благоволи́, па́че всѣ́хъ кра́сный человѣ́ковъ, Всечи́стая, про́йде, омрачи́вшееся на́ше очища́я естество́.
Пѣ́снь 9.
Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.
Не́мощію, сла́вная, некрѣ́пкаго врага́ побѣди́ла еси́, стра́нну проходя́щи жи́знь и стра́сти плотскíя умертви́вши, и ны́нѣ на небесѣ́хъ живе́ши, идѣ́же твое́ и́маши и́стинно жи́тельство, я́ко чи́стая дѣ́ва.
Благослове́нъ Госпо́дь, приста́нище ти́хое врачева́ній показа́въ честну́ю твою́ ра́ку, на́мъ, при́сно бѣ́дствующимъ пучи́ною и бу́рею страсте́й, мона́шествующихъ сла́во и дѣ́въ похвало́, богоно́сная Ксе́ніе.
Яко дѣ́вства хра́мъ, я́ко чи́стую голуби́цу, я́ко го́рлицу непоро́чную, я́ко невѣ́сту Христо́ву, кра́сную добро́тою тя́ и непоро́чную, я́ко о́бразъ Боже́ственныхъ добродѣ́телей, я́ко ве́ртъ заключе́нъ, вѣ́рніи, почита́емъ, богоно́сная Ксе́ніе.
Богоро́диченъ: Глаго́ломъ Твои́мъ послѣ́дующе, ро́ди родо́въ, Блаже́нная, Тя́ ублажа́ютъ при́сно: Бо́га бо, и́стинно Блаже́ннаго, родила́ еси́, Чи́стая Дѣ́во, вся́ блаже́нны Тому́ рабо́тающія нело́жно творя́щаго.
Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 266 – 269.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.