СЛУЖБА ВО ВТОРНИКЪ СВѢТЛЫЯ СЕДМИЦЫ.

ВЪ ПОНЕДѢЛЬНИКЪ СВѢТЛЫЯ СЕДМИЦЫ ВЕЧЕРА, 
Во свѣти́льничномъ, по Христосъ воскресе… и прочихъ, Го́споди воззвахъ.., на гла́съ 3. Поста́вимъ стихо́въ 6 и пое́мъ стихи́ры воскре́сны 3, гла́съ 3:
Твои́мъ Кресто́мъ, Христе́ Спа́се, сме́рти держа́ва разруши́ся, и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Просвѣти́шася вся́ческая Воскресе́ніемъ Твои́мъ, Го́споди, и ра́й па́ки отве́рзеся, вся́ же тва́рь, восхваля́ющи Тя́, пѣ́снь Тебѣ́ всегда́ прино́ситъ.

Сла́влю Отца́ и Сы́на си́лу, и Свята́го Ду́ха пою́ вла́сть, нераздѣ́льное, несозда́нное Божество́, Тро́ицу Единосу́щную, ца́рствующую въ вѣ́къ вѣ́ка.

И восто́чны [анато́ліевы] три́, гла́съ то́йже:
Кресту́ Твоему́ честно́му покланя́емся, Христе́, и Воскресе́ніе Твое́ пое́мъ и сла́вимъ: ра́ною бо Твое́ю мы́ вси́ исцѣлѣ́хомъ.

Пое́мъ Спа́са, отъ Дѣ́вы вопло́щшагося: на́съ бо ра́ди распя́тся и въ тре́тій де́нь воскре́се, да́руя на́мъ ве́лію ми́лость.

Су́щимъ во а́дѣ соше́дъ, Христо́съ благовѣсти́: дерза́йте, — глаго́ля, — ны́нѣ побѣди́хъ, Азъ е́смь Воскресе́ніе, Азъ вы́ возведу́, разруши́въ сме́ртная врата́.

Сла́ва:
Недосто́йно стоя́ще въ пречи́стомъ дому́ Твое́мъ, вече́рнюю пѣ́снь возсыла́емъ, изъ глубины́ взыва́юще, Христе́ Бо́же: просвѣти́вый мíръ тридне́внымъ Воскресе́ніемъ Твои́мъ, изми́ лю́ди Твоя́ отъ руки́ враго́въ Твои́хъ, Человѣколю́бче.

И ны́нѣ, богоро́диченъ:
Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́.

Вхо́дъ съ кади́льницею. Свѣ́те ти́хій…

Проки́менъ, гласъ 7: Бо́гъ на́шъ на небеси́ и на земли́, вся́, ели́ка восхотѣ́, сотвори́. Сти́хъ: Во исхо́дѣ Изра́илевѣ отъ Еги́пта, до́му Іа́ковля изъ люде́й ва́рваръ, бы́сть Іуде́я святы́ня его́. Сти́хъ: Мо́ре ви́дѣ и побѣже́, Іорда́нъ возврати́ся вспя́ть. Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть? И па́ки: Бо́гъ на́шъ на небеси́ и на земли́. [И мы́:] Вся, елика восхотѣ, сотвори.

Іере́й: Рце́мъ вси́… и про́чее ектеніи́. Сподо́би, Го́споди… Та́же: Испо́лнимъ вече́рнюю… И по возгла́сѣ,

На стихо́внѣ стихи́ра воскре́сна, гла́съ 3:
Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

И стихи́ры Па́схи съ припѣ́вы ихъ. Христо́съ воскре́се.., три́жды. И отпу́стъ.

ВО ВТОРНИКЪ СВѢТЛЫЯ СЕДМИЦЫ НА УТРЕНИ, 
Быва́етъ все́ послѣ́дованіе непремѣ́нно, я́коже предписа́ся.

На хвали́техъ поста́вимъ стихи́ 4 и пое́мъ стихи́ры воскре́сны, гла́съ 3:
Пріиди́те вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся!

Повѣ́даша вся́ чудеса́ стра́жіе Твои́, Го́споди; но собо́ръ суеты́ испо́лни мздо́ю десни́цу и́хъ, скры́ти мня́ше воскресе́ніе Твое́, е́же мíръ сла́витъ. Поми́луй на́съ!

Ра́дости вся́ испо́лнишася, воскресе́нія иску́съ пріи́мша. Марíя бо Магдали́на ко гро́бу пріи́де, обрѣ́те а́нгела на ка́мени сѣдя́ща, ри́зами блиста́ющася и глаго́люща: Что́ и́щете Жива́го съ ме́ртвыми? Нѣ́сть здѣ́, но воста́, я́коже рече́, предваря́я вы́ въ Галиле́и!

Во свѣ́тѣ Твое́мъ, Влады́ко, у́зримъ свѣ́тъ, Человѣколю́бче: воскре́слъ бо еси́ изъ ме́ртвыхъ, спасе́ніе ро́ду человѣ́ческому да́руяй, да Тя́ вся́ тва́рь славосло́витъ, еди́наго Безгрѣ́шнаго, поми́луй на́съ.

И пра́зднику стихи́ры: Па́сха свяще́нная.., съ припѣ́вы и́хъ. 
Та́же: Христо́съ воскре́се.., три́жды. Ектеніи́ и отпу́стъ. И ча́съ пе́рвый.

НА ЛИТУРГІИ,
Антифо́ны Па́сцѣ. Проки́менъ Апо́стола, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ въ Дѣя́ніихъ, зача́ло 4: Ста́въ Пе́тръ… Аллилу́ія, гла́съ 8: Воскресни́, Го́споди, въ поко́й Тво́й, Ты́ и Киво́тъ святы́ни Твоея́. Сти́хъ: Кля́тся Госпо́дь Дави́ду и́стиною, и не отве́ржется ея́. Ева́нгеліе отъ Луки́, зача́ло 113: Пе́тръ, воста́въ… Прича́стенъ: Тѣ́ло Христо́во пріими́те…

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 14 об. – 16.