Кѵрь Еѵѳїмїа патрїарха молитва на которыѫѧжде литїѧ ѡ цари

Кѵрь Еѵѳїмїа патрїарха молитва на
которыѫѧжде литїѧ ѡ цари.
Владыко господи, боже нашъ, въсѣкоѫ видимыѫ и
невидимыѫ твари съдѣтелю, источниче жизни, сѣдѧй на
Херꙋвїмѣх, видѧй бездны, съблюдаѫй въсѧ тварь и
промышлѣѫ своеѫ прѣмѫдростїѫ и сыны свѣта и д(ь)не нас
показавы и призвавь нас въ небесное свое царство, иже
прѣнеизчьтенноѫ своеѫ прѣмѫдростїѫ и несказаноѫ
благостынеѫ избравый нас въ свѧтый и прѣнебесный жрѣбїй
съй, пославый прѣсвѧтый свой доухь на свѧтыѫ своѫ
апостолы и оученикы и тѣхь ѡгньными ѡбѡстривь ѧзыкы,
емꙋже ѡбещникы и нас, грѣшных и недѡстойныих рабь
своих, показаль еси тебѣ молѧ сѧ, царю вѣкѡмъ и
въсѣкогѡ блага подателю, оуслыши мѧ, молѧща сѧ тебѣ въ
час съй, и благовѣрнаго царѣ нашего, имѧ рек, благослови.
Покори емоу врагы, борѫщѫѧ его, дарꙋй емоу глѫбѡкый
и неѡтемлемый мирь, глаголи въ ср(ъ)дци его благаа
ѡ цр(ъ)кви твоей и ѡ людех твоих. Осѣни над главоѫ

354
его въ д(ь)нь брани, ꙋкроти въстаѫщѫѧ ѫзыкы, огради
его силоѫ своеѫ, сътвори его ѡт въсѣкоѫ къзни
съпротивнаго ненавѣтна. Дльготѫ житїоу и д(ь)ни мирны дарꙋй
емꙋ и сътвори его ѡбещника небесномоу ти царствїоу.
Ꙗко благословень еси и прославень съ безначѧлныим ти
отцемъ и прѣсвѧтыимь и благымь и животворѧщїим ти
доухомъ н(ы)нѣ и присно и въ вѣкы вѣкѡм, аминꙿ.

---

Патриарх Евтимий
Дата на ръкописа: XIV
Правопис: Среднобългарски
Хранилище на ръкописа: Зографски манастир
Издание: Werke des Patriarchen von Bulgarien Euthymius (1375-1393) nach den besten Handschriften herausgegeben von Emil Kałužniacki. Wien 1901, c. 5-26.
Страници: с. 353-354