НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Всехва́льніи му́ченицы.
Отъ благочести́ваго ко́рене Не́мани,* святопома́занная розга́, произше́дъ,* пло́дъ принесе́ себе́ преподо́бія и пра́вды,* премíрно благоуха́я вѣ́рно чту́щія тя́,* о ни́хже со а́нгелы Христу́ моли́ся, блаже́нне Стефа́не,* дарова́ти на́мъ ми́ръ и ве́лію ми́лость. [Два́жды.]
Земны́хъ всѣ́хъ возгнуша́вся,* къ небе́снымъ ду́хомъ прилѣпи́лъ еси́ себе́,* тѣ́мъ безпло́тныхъ подража́въ житіе́,* ца́рскаго ко́рене и по́стничества,* со святы́ми всѣ́ми водвори́лся еси́,* съ ни́миже, великому́чениче Се́рбскій Стефа́не,* Христу́ моли́ся,* па́мять твою́ творя́щимъ о пренесе́ніи моще́й* пода́ти ми́ръ и ве́лію ми́лость.
Благоче́стіемъ и вѣ́рою пресвѣ́тло укра́шенъ,* я́ко благочести́въ скиптроно́сецъ* и преизря́денъ и непремѣне́нъ* Пресвяты́я Тро́ицы побо́рникъ вели́къ бы́въ,* не бы́лъ еси́ ме́ньшій вѣ́рою и жела́ніемъ*прароди́телей твои́хъ, Симео́на и Са́ввы,* отъ ни́хже просвѣти́вся чудесы́,* свѣ́тъ мíру провозсія́лъ еси́* и моли́твенникъ яви́лся еси́ о душа́хъ на́шихъ.
Сла́ва, гла́съ 4:
Страстоте́рпче, великому́чениче сла́вный Стефа́не, изъ мла́да возлюби́въ Христа́, богоимени́тъ вѣнцено́сецъ бы́лъ еси́, преподо́біемъ и пра́вдою свѣ́тло укра́шенъ, ми́лостынями же и чистото́ю простра́нное селе́ніе бы́лъ еси́ Ду́ха Свята́го, Ему́же непреста́нно моли́ся, о е́же сохрани́ти оте́чество твое́ и оби́тель твою́ со и́ноки отъ пога́нъ вражду́ющихъ и сыново́мъ Се́рбскимъ необори́мымъ бы́ти и спасти́ся.
И ны́нѣ, богоро́диченъ:
Иму́ще Тя́, Богоро́дице, упова́ніе и предста́тельство, вра́жіихъ навѣ́тъ не убои́мся, я́ко спаса́еши ду́ши на́ша.
На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
До́мъ Вседержи́теля,* це́рковь Деча́нскую воздви́глъ еси́,* и твое́ ста́до со́бранное* со и́ноками сохрани́,* и на́съ не забу́ди, моля́щихся тебѣ́.
Сти́хъ: Пра́ведникъ, я́ко фи́никсъ, процвѣте́тъ,* [и я́ко ке́дръ, и́же въ Лива́нѣ, умно́жится].
Совокупи́лся еси́* со безпло́тными ликостоя́ніи,* Бо́гови угоди́въ, Стефа́не,* царю́ Се́рбскій, блаже́нне,* добродѣ́тельми твои́хъ дѣя́ній.
Сти́хъ: Насажде́ни въ дому́ Госпо́дни* [во дво́рехъ Бо́га на́шего процвѣту́тъ].
Оби́тель Деча́нская,* дне́сь благолѣ́пно торжеству́й,* въ тебѣ́ во и́мя Христо́во* тѣле́сная хра́мина,* на пренесе́ніе честны́хъ моще́й* преди́внаго Стефа́на,* кра́ля, страда́льца.
Сла́ва, и ны́нѣ, богоро́диченъ:
Пою́ Тя́,* Пречи́стая Дѣ́во,* покры́й на́съ* и заступи́* отъ вся́каго навѣ́та вра́жія.
Тропа́рь свято́му кра́лю Стефа́ну въ Деча́нѣхъ, гла́съ 8:
Ца́рскую діади́му обагри́лъ еси́ кро́вію твое́ю, богому́дре великому́чениче, за ски́птръ кре́стъ въ ру́ку пріи́мъ, яви́лся еси́ побѣдоно́сецъ и я́ко же́ртву непоро́чну прине́слъ еси́ себе́. Отъ роди́телей твои́хъ о́чію зѣ́ницы лише́нъ бы́лъ еси́, и въ заточе́ніи пребы́лъ еси́, и отъ свои́хъ уда́вленъ еси́. И ны́нѣ, ра́дуяся, предстои́ши Святѣ́й Тро́ицѣ. Пра́зднуемъ ти́ дне́сь пренесе́ніе честны́хъ моще́й твои́хъ и обновле́ніе честна́го киво́та, блаже́нне Стефа́не, моли́ся о держа́вѣ сро́дникъ твои́хъ, благоуго́днѣй бы́ти и́мъ и сыново́мъ Се́рбскимъ спасти́ся.
Сла́ва, и ны́нѣ, богоро́диченъ, гла́съ то́йже:
Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].
НА ВЕЛИЦѢЙ ВЕЧЕРНИ,
Стихосло́вимъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 5, самогла́сенъ:
Богопрія́тне держа́вне Стефа́не,* отъ ложе́снъ поро́дъ свя́тъ Бо́гу нарече́нъ еси́,* благи́ми дѣ́лы свѣ́тло украси́лся еси́,*ми́лостынями и чистото́ю* сосу́дъ Свята́го Ду́ха бы́лъ еси́,* Имже дѣ́йствуеши пресла́вная чудеса́,* похваля́емъ пренесе́ніе моще́й твои́хъ,* кра́лю Стефа́не,* съ вѣ́рою приходя́ще* къ свято́му твоему́ киво́ту. [Два́жды.]
Боговѣнча́нне Стефа́не,* Се́рбская сла́во,* ди́вная похвало́,* царе́й держа́во,* свѣтоно́сная кра́лей похвала́,* велехва́льная мона́хомъ звѣздо́ пресвѣ́тлая,* христіа́нъ побо́рниче непобѣди́мый,* за ни́хже, жи́въ сы́й,* ду́шу твою́ полага́лъ еси́.* Си́це и по сме́рти неотсту́пно* оте́чество твое́ сохраня́й* и оби́тель твою́ отъ ага́рянъ* моли́твами твои́ми изба́ви. [Два́жды.]
Ца́ріе и кня́зи,* и́ноцы, свяще́нницы,* вку́пѣ бога́тіи и убо́зіи,* ра́дуйтеся, свѣ́тлое дне́сь торжество́ пра́зднующе* о́бщаго засту́пника:* пренесе́ніе честны́хъ моще́й* кра́ля Стефа́на, страда́льца;* воспѣва́йте у́бо, и́стинніи безмо́лвницы и про́стіи лю́діе,*о́бщаго предста́теля, и помо́щника,* и моле́бника о душа́хъ на́шихъ. [Два́жды.]
Земля́ на́ша и страна́, блаже́нне,* въ Се́рбстѣй оби́тели чудеса́ твоя́ возвѣща́ютъ* и воспѣва́ютъ у́бо всю́ду,* Христо́съ бо тя́ на́мъ свѣти́льника показа́,* просвѣща́юща ду́ши на́ша. [Два́жды.]
Сла́ва, гла́съ 6:
Вся́къ гра́дъ и страна́, и о́крестни Се́рбски гра́дове, и да́льни Се́рбски собо́ри, сра́дуйтеся и псало́мски восплещи́те рука́ми: вку́пѣ духо́вно торжество́ дне́сь пра́зднуемъ — пренесе́ніе честны́хъ моще́й свята́го страда́льца Стефа́на. Обступи́мъ о́крестъ киво́та но́ваго, пѣ́сньми воспои́мъ похва́льными благоговѣ́йно, устна́ми мольбу́ смѣси́вше, къ нему́ возопіи́мъ: ра́дуйся, Тро́ицы побо́рниче великоимени́тый; ра́дуйся, крестоно́сныхъ царе́й похвало́, Бо́гомъ вѣнча́нная; ра́дуйся, христіа́нъ ро́гъ богоно́сный, о ни́хже, Христе́, не оскуде́й дарова́ти ми́ръ и ве́лію ми́лость.
И ны́нѣ, богоро́диченъ, гла́съ то́йже:
Кто́ Тебѣ́ не ублажи́тъ, Пресвята́я Дѣ́во? [Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].
Та́же вхо́дъ. Проки́менъ дне́ и чте́нія три́.
Проро́чества Иса́іина чте́ніе. [Глава́ 43.]
Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.
Прему́дрости Соломо́новы чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́новы чте́ніе. [Глава́ 5.]
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
На литíи стихи́ры самогла́сны, гла́съ 8:
Па́че плотска́го благоро́дія духо́вное получи́лъ еси́, Христу́ бо отъ младе́нства душе́ю прилѣпи́вся, вся́кое наслажде́ніе мірско́е, я́ко не су́щее, оста́вль, дости́глъ еси́ на небесѣ́хъ перворо́дныхъ мно́жество, идѣ́же съ ни́ми предстои́ши Святѣ́й Тро́ицѣ, со а́нгелы веселя́ся, и со проро́ки, и апо́столы, и преподо́бными, и му́ченики, я́ко му́ченикъ непобѣди́мь, нетлѣ́нными вѣнцы́ вѣнча́лся еси́ отъ Бо́га, Его́же моли́ о на́съ, еди́наго Человѣколю́бца, блаже́нне страда́льче, свѣ́тлая му́чениковъ добро́то, царю́ Стефа́не, я́ко ору́жіе, кре́стъ держа́вно нося́, вѣ́ру, я́ко щи́тъ, наде́жду, я́ко броня́, вооружи́лся еси́ на пре́лесть, и ны́нѣ въ ми́рѣ глубо́цѣ правосла́вныхъ житіе́ утверди́, и твою́ оби́тель христіа́номъ возвы́си, и вся́ поле́зная да́руй всегда́ лю́демъ твои́мъ моли́твами твои́ми.
Сопресто́льное Сло́во Отчее, да́ждь утѣше́ніе лю́демъ Твои́мъ, и вся́ правосла́вныя христіа́ны возвы́си, и печа́ль на́шу въ ра́дость претвори́, и отъ наси́лія враго́въ на́шихъ сохрани́, и вся́ поле́зная да́руй лю́демъ Твои́мъ, Твоея́ бо всегда́ тре́буемъ вси́ по́мощи, да спасе́ши отъ всѣ́хъ зо́лъ рабы́ Твоя́ моли́твами Твоего́ Се́рбскаго кра́ля Стефа́на, страда́льца.
Гла́съ 4:
Земны́й а́нгелъ, и небе́сный человѣ́къ, и тве́рдый страда́лецъ яви́лся еси́, великому́чениче, исто́чникъ умиле́нія, ми́лости тече́ніе, пучи́на чуде́съ, струя́ исцѣле́ній, Стефа́не страстоте́рпче досточу́дне, ма́слина Бо́жія вои́стинну плодови́та. Вои́стинну рече́ Соломо́нъ, — па́мять пра́веднаго съ похвала́ми, — се́ бо ны́нѣ разли́чныхъ язы́къ ро́дове хвала́ми вѣнчава́юще, просвѣща́еши вѣ́рно хва́лящихъ тя́, и моля́ Человѣколю́бца отъ бѣ́дъ изба́вити любо́вію чту́щія всечестну́ю па́мять твою́.
Сла́ва, гла́съ 8:
Пріиди́те, празднолю́бцы, ли́къ соста́вимъ, пріиди́те, и́ночестіи собо́ри, духо́вно возвесели́мся, на пренесе́ніе честны́хъ моще́й и обновле́ніе но́ваго прекра́снаго киво́та, о́крестъ обсту́пимъ, пѣ́сньми воспои́мъ похва́льными, благоговѣ́йно устна́ми святы́мъ прикаса́ющеся моще́мъ. Пріиди́те, восхва́лимъ чудотво́рца Стефа́на, въ Се́рбской оби́тели, въ Деча́нѣхъ, стеце́мся вѣ́рою и любо́вію въ настоя́щее торжество́ тве́рдаго побо́рника блаже́ннаго. Се́й бо мо́литъ о на́съ Христа́ Бо́га на́шего и подае́тъ на́мъ моли́твами свои́ми отпуще́ніе грѣхо́въ и душа́мъ спасе́ніе.
И ны́нѣ, богоро́диченъ, гла́съ то́йже:
Кро́въ Тво́й, Богоро́дице Дѣ́во, врачевство́ е́сть духо́вное, въ о́нь бо прибѣга́юще, отъ душе́вныхъ неду́гъ избавля́емся.
На стихо́внѣ стихи́ры, гла́съ 1. Подо́бенъ: Небе́сныхъ чино́въ.
Яко ве́ліе со́лнце,* яви́лся еси́, блаже́нне, вселе́ннѣй,* чудесы́ стра́шными* просвѣща́я ве́сь мíръ;* тѣ́мъ вси́, соше́дшеся,* Христа́ воспои́мъ,* спаса́ющаго ны́ отъ бѣ́дъ* моли́твами твои́ми.
Сти́хъ: Честна́ предъ Го́сподемъ* сме́рть преподо́бныхъ Его́.
Свѣ́томъ сія́я* Боже́ственныя благода́ти,* чудодѣ́йствуеши непреста́нно,* и ны́нѣ моли́ Христа́ Бо́га,* блаже́нне Стефа́не,*изба́вити отъ бѣ́дъ ду́ши на́ша.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Не отъ Ри́ма возсія́лъ еси́,* ни отъ Сіо́на, богому́дре,* но въ Се́рбстѣй къ за́паду* земли́ яви́лся еси́,* свое́й оби́тели* тве́рдый сто́лпъ показа́лся еси́,* вои́стинну вели́къ чудотво́рецъ,* пресла́вно исцѣле́ніе* подава́я неоску́дно* всѣ́мъ, приходя́щимъ съ вѣ́рою.
Сла́ва, гла́съ 6:
Весна́ на́мъ дне́сь въ зи́мныя го́ды возсія́, пріиди́те, бра́тіе мучениколю́бцы, обере́мъ цвѣ́ты добродѣ́телей, я́же изнесе́ на́мъ Стефа́нъ, Христо́въ учени́къ нело́жный, и́же да́нный ему́ тала́нтъ до́брѣ умно́живый, и святу́ю оби́тель мона́хомъ до́брѣ устро́ивый, и вѣ́ренъ яви́вся своему́ Влады́цѣ, и и́же, я́ко дре́во при исхо́дищихъ во́дъ, пло́дъ сво́й дае́тъ во вре́мя свое́, и на́мъ про́ситъ отъ Христа́ Бо́га ве́лію ми́лость.
И ны́нѣ, богоро́диченъ, гла́съ то́йже:
Творе́цъ и Изба́витель мо́й, Пречи́стая, [Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].
[На благослове́ніи хлѣ́бовъ: Тропа́рь свята́го, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.]
НА УТРЕНИ,
На Бо́гъ Госпо́дь: Тропа́рь: Ца́рскую діади́му обагри́лъ еси́.., два́жды. Сла́ва, и ны́нѣ, богоро́диченъ: Иже на́съ ра́ди…
По 1-мъ стихосло́віи сѣда́ленъ, гла́съ 4:
Наста́, празднолю́бцы, свѣ́тлое торжество́ оби́тели се́й, сла́вная ра́дость мона́хомъ и весе́ліе, въ пренесе́ніе честны́хъ моще́й свята́го великому́ченика кра́ля Стефа́на, страстоно́сца Христо́ва, веселя́ща вся́ческая, сія́юща въ мíрѣ заря́ми чуде́съ. Тѣ́мже непреста́нную благода́ть твои́ми моли́твами у Христа́ испроси́ душа́мъ на́шимъ. [Два́жды.]
Сла́ва, и ны́нѣ, богоро́диченъ:
Дѣ́во Всенепоро́чная, Яже Пресу́щнаго Бо́га ро́ждшая, съ му́ченикомъ Стефа́номъ Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.
По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.
Благода́рно зове́мъ вси́ твоему́ пра́зднику въ пренесе́ніе моще́й и обновле́ніе свята́го киво́та, Христо́въ уго́дниче: ми́лостивъ, незло́бивъ, кро́токъ яви́лся еси́, Стефа́не; прилѣ́жно моля́щимся любо́вію отжени́ де́монская мечта́нія, блаже́нне, и моли́ Христа́ Бо́га дарова́ти на́мъ ве́лію ми́лость. [Два́жды.]
Сла́ва, и ны́нѣ, богоро́диченъ:
Упова́ніе христіа́нъ, Пречи́стая Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ и исправле́ніе житія́ вѣ́рою и любо́вію при́сно Тя́ сла́вящимъ.
По поліеле́и сѣда́ленъ, гла́съ 8. Подо́бенъ: Прему́дрости.
Ду́хъ Святы́й тя́, блаже́нне, наста́ви оте́чество твое́ па́ствити на па́житѣхъ спаси́тельныхъ, и Христо́съ свѣти́льника тя́ показа́ я́вѣ въ Се́рбстѣй земли́, во оби́тели Деча́нстѣй. Сего́ ра́ди лику́й и весели́ся со дерзнове́ніемъ, я́ко двосугу́быя вѣнцы́ отъ Вѣнцеда́вца пріи́мъ, я́ко двосугу́бый пра́здникъ преставле́нія и пренесе́нія моще́й отъ Зве́чана, сокро́вище благо́е, во свое́й це́ркви славосло́вится и хва́лится, я́ко да пода́стъ на́мъ ве́лію ми́лость. [Два́жды.]
Сла́ва, и ны́нѣ, богоро́диченъ:
О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся и Младе́нецъ бы́сть пре́жде вѣ́къ сы́й Бо́гъ на́шъ, ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.
Степе́нна, 1-й антифо́нъ, 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Вся́кое дыха́ніе… Ева́нгеліе отъ Луки́, зача́ло 106.
По 50-мъ псалмѣ́ стихи́ра, гла́съ 6:
Пріиди́те, вси́ лю́діе: и Се́рбсти наро́ди, Се́рбски собо́ри, хвалу́ принесе́мъ блаже́нному Стефа́ну въ обновле́ніе прекра́снаго киво́та, вопію́ще си́це: ра́дуйся, пресвѣ́тлый сто́лпе, просвѣща́я на́съ чуде́съ свѣтлостьми́; ра́дуйся, ро́сный о́блаче, пла́мень погаша́яй стра́сти и ороша́яй вѣ́рныхъ мы́сли, боже́ственный великому́чениче, уго́дниче Христо́въ и засту́пниче те́плый, не преста́й моля́ся за рабы́ твоя́.
Кано́нъ хра́ма святы́я оби́тели Деча́нскія на 6 со ирмосо́мъ. Другíй кано́нъ свято́му Стефа́ну, основа́телю оби́тели, въ не́йже мо́щи его́ и почива́ютъ. Гласъ 8.
Пѣ́снь 1.
Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.
Досто́йными похвала́ми воспѣ́ти пресла́внаго чудотво́рца у́мъ и смы́слъ да́руй ми́, Христе́ Бо́же, я́ко да воспою́, ра́дуяся, па́мять пренесе́нія моще́й и обновле́ніе киво́та его́.
Пѣ́сньми и пѣ́ньми духо́вными восхва́лимъ блаже́ннаго и честну́ю его́ и многоцѣле́бную ра́ку, киво́тъ обстоя́ще, любе́зно облобыза́емъ и си́це вопіе́мъ: ра́дуйся, оби́тели твое́й пресвѣ́тлый свѣти́льниче, сла́вящимъ твое́ пренесе́ніе.
Богому́дре Стефа́не, а́ще тя́ и напослѣ́докъ лѣ́тъ новопросвѣще́нная Се́рбская страна́ возрасти́, но дре́внихъ че́сти сподо́бился еси́, дарова́ніе чуде́съ досто́йно пріе́мъ.
Богоро́диченъ: Зако́на кромѣ́ есте́ственнаго, Дѣ́во, родила́ еси́ Законода́вца Бо́га, Человѣ́ка бы́вша, Того́, я́ко Бла́га, моли́, Всенепоро́чная, на́ша беззако́нія презрѣ́ти.
Катава́сія.
Пѣ́снь 3.
Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.
Во ве́сь мíръ про́йде сла́ва чуде́съ твои́хъ, блаже́нне, и́миже просвѣти́лъ еси́ вселе́нную, отъ всѣ́хъ напа́стей избавля́я при́сно.
Благочести́ваго и вѣнцено́снаго Стефа́на, соше́дшеся, по достоя́нію восхва́лимъ, я́ко чуде́съ пода́теля оби́льнаго и Го́споду моля́щася о всѣ́хъ на́съ.
Исто́чникъ чуде́съ гро́бъ и киво́тъ тво́й яви́ся неисчерпа́емый, отъ него́же рѣ́ки исцѣле́ній излива́еши вѣ́рно пренесе́нія твоего́ пра́здникъ творя́щимъ, блаже́нне.
Богоро́диченъ: Ты́ еди́на на земли́ преесте́ственныхъ благи́хъ Хода́таица, Ма́ти Бо́жія, была́ еси́, тѣ́мъ Ти́ — ра́дуйся — зове́мъ.
Сѣда́ленъ, гла́съ 1. Подо́бенъ: Гро́бъ Тво́й, Спа́се.
Пренесе́ніе отъ Звеча́на гра́да во святу́ю свою́ оби́тель въ Деча́нѣхъ, твои́хъ честны́хъ моще́й, и обновле́ніе прекра́снаго киво́та, положе́ніе на́мъ бы́сть пра́зднества свѣ́тла, великому́чениче Христо́въ, Стефа́не прехва́льне, е́же хва́лимъ благоче́стно и ра́достно чту́ще тя́, свѣ́та незаходи́маго Со́лнца, вѣ́рнымъ добро́то, звѣзда́ многосвѣ́тлая. [Два́жды.]
Сла́ва, и ны́нѣ, богоро́диченъ:
Непоро́чная Агница и нескве́рный черто́гъ, въ до́мъ Бо́жій Богоро́дица Маріа́мъ съ весе́ліемъ вво́дится пресла́вно, Юже а́нгели Бо́жіи дорино́сятъ вѣ́рно и вси́ вѣ́рніи блажа́тъ при́сно и благода́рственно пою́тъ Ей непреста́нно ве́ліимъ гла́сомъ: на́ша сла́ва и спасе́ніе, Ты́ еси́, Всенепоро́чная.
Пѣ́снь 4.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.
Заре́ю трисо́лнечныя благода́ти сія́я, свѣ́тлѣ тво́й пра́здникъ творя́щихъ озари́, стра́шнаго омраче́нія де́монскаго изба́ви, Стефа́не, царю́ пресла́вне.
Источи́лъ еси́ рѣ́ки чуде́съ, блаже́нне, вѣ́рныхъ напая́ющія сердца́ и му́тныя во́ды многобо́жія изсуша́ющія.
Ца́ріе, и кня́зи, и свяще́нницы, и́ноцы, и вельмо́жи, и ста́рцы, и младе́нцы, и ве́сь во́зрастъ, свѣ́тло предыгра́йте, торжество́ пренесе́нія блаже́ннаго въ пѣ́снехъ возвели́чите.
Богоро́диченъ: Чи́ны а́нгельскія удивля́етъ, Богоро́дице, та́йны Твоея́ глубина́, бѣ́сы же смуща́етъ Твоя́ ико́на, е́йже мы́ кла́няемся, чту́ще Тя́, Бо́жію Ма́терь.
Пѣ́снь 5.
Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.
Свѣ́томъ Вы́шняго озаря́емь, му́чениче, мое́ се́рдце просвѣти́ и тму́ грѣхо́вную отжени́, да, ра́дуяся, пою́ твое́ свято́е пренесе́ніе и обновле́ніе киво́та.
Возсту́пль на лѣ́ствицу добродѣ́телей, блаже́нне, чудотво́рецъ яви́лся еси́ по все́й земли́, Стефа́не, и сего́ ра́ди отъ Зве́чана, отъ твоея́ оби́тели Деча́нскія и́ноцы, и вси́ собо́ри Се́рбски, лю́діе твои́ пріе́млютъ святы́я мо́щи твоя́.
Досточу́дне великому́чениче, торжество́ твое́ возсія́ въ Се́рбстѣй земли́, блаже́нне, и ра́достно вѣ́рныхъ весели́тъ собо́ры.
Богоро́диченъ: Сы́й въ зра́цѣ Бо́жіи Пребоже́ственнѣмъ, всели́ся во чре́во Твое́ и въ зра́къ Тво́й облече́ся Госпо́дь, Пренепоро́чная.
Пѣ́снь 6.
Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.
Отверзо́шася тебѣ́ две́ри Еде́мскія, и несказа́ненъ свѣ́тъ и трисія́ненъ возсія́, блаже́нне, въ неподви́жимѣмъ Ца́рствіи небе́снѣмъ, и пра́ведныхъ весе́ліе прія́лъ еси́, ра́дуяся.
Дне́сь собо́ръ Се́рбскій торжество́мъ, великому́чениче Стефа́не кра́лю, вселе́нную весели́тъ, созыва́юще вѣ́рныхъ въ честну́ю оби́тель твою́, въ не́йже ны́нѣ ра́достію совоку́пльшеся, тя́ мо́лимъ: ага́рянскаго наше́ствія изба́ви лю́ди твоя́, пресла́вне.
Сиро́тъ и вдо́въ засту́пника и въ бѣда́хъ непобори́маго помо́щника, пѣ́сньми Стефа́на въ Деча́нѣхъ ублажи́мъ: пра́зднующихъ бо пренесе́ніе моще́й его́ ве́село отъ бѣ́дъ избавля́етъ и скорбе́й.
Богоро́диченъ: Святы́й Іису́съ всели́ся во утро́бу Твою́, во святы́хъ, Дѣ́во, почива́яй и прославля́яй вѣ́рою и и́стиною Сего́, Отрокови́це, сла́вящія.
Конда́къ, гла́съ 8. Подо́бенъ: Яко нача́тки естества́.
Яко звѣзду́ тя пресвѣ́тлу, Це́рковь похваля́етъ и почита́етъ, отъ восто́ка возсія́вшую и на за́падъ прише́дшую, всю́ бо страну́ сію́ чудесы́ и добро́тою обогаща́еши и просвѣща́еши, вѣ́рою чту́щія пренесе́ніе моще́й и обновле́ніе честна́го киво́та, великому́чениче, царю́ Се́рбскій Стефа́не. Моли́ спасти́ оте́чество твое́ и вся́ правосла́вныя христіа́ны, притека́ющія къ ра́цѣ моще́й твои́хъ и вѣ́рно вопію́щія ти́: ра́дуйся, Стефа́не, му́чениковъ украше́ніе.
Икосъ:
Вели́кій чудотво́рецъ яви́лся еси́ Се́рбскія земли́, царю́ Се́рбскій, блаже́нне Стефа́не, неви́димо Христо́вы лю́ди посѣща́я и исцѣле́нія подава́я бога́тно. И мы́ дне́сь, Се́рбскій собо́ръ, въ твое́й оби́тели, бога́тіи и убо́зіи, мона́си, свяще́нницы, свѣ́тло торжество́ сотворя́емъ, о́крестъ обступи́вше на прекра́снаго киво́та обновле́ніе. И, къ ра́цѣ моще́й твои́хъ прикаса́ющеся, устна́мъ и сле́замъ мольбу́ смѣси́вше: Христо́въ уго́дниче, ра́дуйся, лику́еши бо со а́нгелы; ра́дуйся, о́блаче ро́сный, вѣ́рныхъ мы́сли ороша́яй; ра́дуйся, те́мныхъ страсте́й прогони́телю; ра́дуйся, земли́ засту́пниче; ра́дуйся, въ бѣда́хъ ско́рый помо́щниче; ра́дуйся, Стефа́не, му́ченикомъ украше́ніе.
Пѣ́снь 7.
Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.
Яко звѣзда́, сія́я кра́сно, блаже́нне, заре́ю добродѣ́телей мно́гимъ бы́сть просвѣще́ніе, тѣ́мъ и на́съ просвѣти́, вопію́щихъ ти́: ра́дуйся, Стефа́не благоче́стне.
Ны́нѣ сте́кшеся отъ всѣ́хъ стра́нъ и градо́въ, и́ноцы, свяще́нницы, и кня́зи, и вельмо́жи, бога́тіи и убо́зіи, и вку́пѣ вси́, ра́дующеся, хвалу́ воздади́мъ Христу́ и уго́днику Его́, Стефа́ну пресла́вному.
Чудесы́ у́бо твои́ми, я́ко цвѣ́тъ, процвѣ́лъ еси́, блаже́нне, исцѣле́нія подава́еши притека́ющимъ въ кро́въ тво́й, му́дре и досточу́дне.
Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ Ти́: благослове́нна Ты́ въ жена́хъ еси́, Всенепоро́чная Влады́чице.
Пѣ́снь 8.
Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.
Яко у́тро, я́ко де́нь свѣ́тлый, тво́й пра́здникъ яви́ся — пренесе́ніе моще́й му́ченика отъ Зве́чана во свою́ оби́тель, просвѣща́я на́ша сердца́ и всѣ́хъ, съ вѣ́рою восхваля́ющихъ тя́, Стефа́не пресла́вне.
Де́нь спасе́нія и пра́здникъ весе́лія наста́, стеце́мся, вѣ́рніи, очи́стивше вку́пѣ ду́ши и тѣлеса́, се́ бо на́съ призыва́етъ Стефа́нъ боже́ственный.
Струя́ происхо́дитъ отъ ра́ки твоея́, Стефа́не, исцѣле́ній вся́ческихъ, и омыва́етъ скве́рны страсте́й, и гное́ній лю́тыхъ очища́етъ, и всѣ́хъ вѣ́рныхъ напая́етъ сердца́ любо́вію, чту́щихъ тя́, пресла́вне.
Богоро́диченъ: Свѣ́томъ мя́ Твоего́ милосе́рдія, во тмѣ́ неразу́мія лежа́щаго, озари́, еди́на Свѣтода́вца ро́ждшая, Изба́вителя и Бо́га, святы́хъ вѣнча́вшаго.
Пѣ́снь 9.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.
Яко свѣтоза́рное, блаже́нне, со́лнце возсія́въ отъ за́пада, всю́ заря́ми благоче́стія Се́рбскую зе́млю просвѣти́лъ еси́ и отгна́лъ еси́ тму́ глубо́кую ерети́чествующихъ, Стефа́не пресла́вне.
Святы́й тво́й пра́здникъ пренесе́нія и обновле́нія прекра́снаго киво́та, прикаса́ющеся моще́мъ, свѣ́тло пра́зднуемъ, испо́лни ра́дости и весе́лія восхваля́ющія тя́, Стефа́не великоимени́те.
Незаходи́маго свѣ́та луча́ми во тмѣ́ су́щимъ сія́я, сла́вне, къ просвѣще́нію весе́лія наста́ви ны́, пою́щія тя́.
Блаже́нне Стефа́не, ка́ко тя́ возмо́жемъ воспѣ́ти досто́йно? Не мо́жетъ бо язы́къ человѣ́ческій глаго́лати твоя́ разли́чная исцѣле́нія и мно́гая дарова́нія всѣ́мъ человѣ́комъ.
Богоро́диченъ: Яко у́тро те́мнымъ и блудя́щимъ, Дѣ́во, возсія́ пра́вды Со́лнце — Христо́съ, Его́же на рука́хъ Твои́хъ носи́ла еси́, Чи́стая.
Свѣти́ленъ:
Свѣти́ло, на́мъ просія́вшее въ послѣ́днее вре́мя, просвѣти́ ны́, твоя́ пѣвцы́, за пренесе́ніе честны́хъ моще́й твои́хъ и обновле́ніе прекра́снаго киво́та, святы́й великому́чениче Стефа́не, и моли́ за ны́ Го́спода, чту́щія торжество́ пра́здника твоего́. [Два́жды.]
[Сла́ва, и ны́нѣ,] богоро́диченъ:
Еди́на Чи́стая и Нескве́рная, оскверне́на мя́ вся́кими паде́ньми лю́тыми, изба́ви лю́тыя му́ки и тмы́ кромѣ́шныя.
На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!
О, пресла́внаго чудесе́!* Сія́ніемъ Ду́ха Свята́го просвѣ́щся,* Стефа́не, кра́лю Деча́нскій, богому́дре,* уче́нія лати́нская презрѣ́лъ еси́,* и въ Царегра́дѣ устыдѣ́ся твои́хъ слове́съ* боговѣща́нныхъ и прему́дрыхъ* самоде́ржецъ гре́ческій,* и пре́лесть и́хъ обличи́въ и самѣ́хъ укори́въ,* и де́рзость и́хъ въ ничто́же вмѣни́въ,* сего́ ра́ди отъ Христа́ Бо́га прія́лъ еси́* воздая́ніе во Ца́рствіи небе́снѣмъ,* со а́нгелы ликовствова́ніе* и со пра́ведными ра́дованіе,* и ны́нѣ моли́ спасти́ся душа́мъ на́шимъ. [Два́жды.]
О, ка́ко возмогу́ досто́йно похвали́ти* или́ я́сно изглаго́лати* пресла́вная чудеса́ блаже́ннаго и сла́внаго Стефа́на?* Подае́тъ бо разли́чная исцѣле́нія* не то́кмо приходя́щимъ къ ра́цѣ моще́й его́,* но и въ да́льнихъ страна́хъ призыва́ющихъ его́* никогда́ же оставля́етъ,* тѣ́мъ и повсю́ду хва́льно и́мя его́.* И ны́нѣ мо́литъ Христа́* умири́ти мíръ и спасти́ ду́ши на́ша.
О, ка́ко возмо́жемъ воспѣ́ти блаже́ннаго Стефа́на?* Яко апо́стола, я́ко по́стника,* я́ко тве́рдаго му́ченика,* я́ко проповѣ́дника,*вся́ко бо ерети́ческое нече́стіе попра́лъ е́сть,* свое́ же оте́чество упра́вивъ, соблюде́,* хра́мы разоре́нныя, воздви́гнувъ, пѣ́нія испо́лни,*и распу́женныя лю́ди собра́ въ до́мы своя́,* и ни́щимъ, и сирота́мъ, и вдо́вамъ бы́сть печа́льникъ* и въ бѣда́хъ засту́пникъ,* и ны́нѣ мо́литъ о спасе́ніи ду́шъ на́шихъ.
Сла́ва, гла́съ 5:
Пріиди́те, вси́ концы́ земле́ни, соше́дшеся, духо́вно торжеству́имъ въ пренесе́ніе честны́хъ моще́й Стефа́на великому́ченика, и рука́ми псало́мски воспле́щимъ, и цвѣ́ты слове́сными главу́ его́ увязе́мъ! Сы́й у́бо, я́ко до́бръ во́инъ, во́инствова на веліа́ра мы́сленнаго, и сего́ зако́нъ низложи́, и, вѣне́цъ тлѣ́нный ни вочто́же вмѣни́въ, вмѣ́нша нетлѣ́нный наслѣ́дова. Иже въ неду́зѣхъ врача́, Се́рбской земли́ помо́щника, и́же всю́ вселе́нную назира́юща, и́же въ бѣда́хъ изба́вителя, сопроти́вящимся казни́теля стра́шнаго, и́же путеше́ствующимъ спу́тника, и́же всѣ́мъ ско́рое избавле́ніе, и́же всѣ́мъ вездѣ́ предста́теля. Тѣ́мже, похваля́юще его́, си́це рце́мъ: вѣнчено́сче Стефа́не, предвари́, я́ко предстоя́ престо́лу всѣ́хъ Царя́, моли́ся къ Нему́ вы́ну изба́витися на́мъ отъ настоя́щія ну́жды и спасти́ся ста́ду твоему́ неприкоснове́нну.
И ны́нѣ, богоро́диченъ:
Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую предста́тельницу и прибѣ́жище ду́шъ на́шихъ.
Славосло́віе вели́кое, [ектеніи́] и отпу́стъ.
НА ЛИТУРГІИ,
Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. [Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рехъ Бо́га на́шего процвѣту́тъ.] Ева́нгеліе отъ Матѳе́я, зача́ло 36, или́ отъ Луки́, зача́ло 106. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].
Источникъ: Пра́вило на обновле́ніе киво́та и пренесе́ніе святы́хъ моще́й свята́го великому́ченика, и́же во царѣ́хъ Се́рбскихъ, Стефа́на Уроша Тре́тіяго, отъ гра́да Зве́чана во свою́ оби́тель, я́же въ Деча́нѣхъ, соверша́емо 29-го дне́, мѣ́сяца Іу́нія. // Моле́бное пѣ́ніе въ па́мять свята́го великому́ченика, Кра́ля Се́рбскаго, Стефа́на Деча́нскаго. — Изда́ное попече́ніемъ преподо́бнаго отца́ Серафи́ма Хри́стича, іеромона́ха и скевофи́лакса оби́тели Деча́нскія. Кти́торомъ бы́сть Благовѣ́рный Кня́зь Се́рбскій, Алекса́ндръ Карагео́ргіевичь. — Бѣлгра́дъ: Въ Кня́жеско-Се́рбской Книгопеча́тни, 1850. — С. 35-58.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 