Слу́жба преподо́бному отцу́ на́шему Арка́дію, ученику́ преподо́бнаго Ефре́ма, Новото́ржскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1:
Отче преподо́бне Арка́діе, отъ ю́ности своему́ Влады́цѣ подо́бяся, ди́вно житіе́ проше́лъ еси́, о́бразъ подви́жникомъ добродѣ́телію показа́лся еси́, дарова́ніе благода́ти отъ человѣколю́бія Бо́жія въ себѣ́ пріе́мъ. Тѣ́мже моли́ся дарова́ти душа́мъ на́шимъ ми́ръ и ве́лію ми́лость. [Два́жды.]

Отче преблаже́нне Арка́діе, кто́ по́двиги и исправле́нія твоя́ исповѣ́сть, я́же соверши́лъ еси́, Христу́ послѣ́дуя? не да́лъ бо еси́ сна́ очи́ма твои́ма, пребыва́я при́сно въ моли́твахъ и бдѣ́ніихъ, и́ми же ду́шу отъ страсте́й свободи́лъ еси́, слеза́ми непреста́нными ю́ очища́я, и ны́нѣ моли́ся дарова́ти душа́мъ на́шимъ ми́ръ и ве́лію ми́лость.

Отче преподо́бне Арка́діе, чистоту́ тѣле́сную и душе́вную добро́ту, я́же по о́бразу Бо́жію, отъ ю́ности своея́ сохрани́лъ еси́ и, о́комъ ума́ Бо́га зрѣ́ти обучи́вся, Тому́ служи́лъ еси́ стра́хомъ и любо́вію мно́гою, послѣ́дуя наста́внику своему́, преподо́бному Ефре́му, съ ни́мъ же моли́ся дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:
Пріиди́те, и́нокъ мно́жества, дне́сь, духо́вно возвесели́мся въ наро́читѣмъ пра́здницѣ се́мъ: пресвѣ́тлая бо па́мять отца́ на́шего наста́, въ ню́же соше́дшеся, того́ воспои́мъ, глаго́люще: ра́дуйся, Арка́діе пресла́вне, на земли́, я́ко а́нгелъ, исполня́я во́лю Бо́жію, пожи́вый; ра́дуйся, Ду́ха Свята́го прія́телище и жили́ще бы́вый; ра́дуйся, Держа́вы Благочести́вѣйшаго Импера́тора на́шего защище́ніе и утвержде́ніе, и всему́ гра́ду Торжку́ пресвѣ́тлый свѣти́льниче; ра́дуйся, те́плый со а́нгелы предста́тель о на́съ ко Го́споду. Его́же непреста́нно моли́ дарова́ти душа́мъ на́шимъ ми́ръ и ве́лію ми́лость.

И ны́нѣ, [богоро́диченъ]:
Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
До́мъ духо́вный бы́лъ еси́, преподо́бне, бдѣ́нными моли́твами и по́стными по́двигами, я́ко благово́нными арома́ты, благоукра́сивъ ду́шу свою́.

Сти́хъ: Честна́ предъ Го́сподемъ сме́рть [преподо́бныхъ Его́].

Дрема́нія не да́лъ еси́ очи́ма свои́ма, преподо́бне, до́ндеже ду́шу отъ страсте́й свободи́лъ еси́ и возме́здіе обрѣ́лъ еси́, со а́нгелы водворе́ніе.

Сти́хъ: Блаже́нъ му́жъ, боя́йся [Го́спода, въ за́повѣдехъ Его́ восхо́щетъ зѣ́ло].

Боже́ственнымъ жела́ніемъ уязви́вся, преподо́бне, житіе́ непоро́чно проходи́лъ еси́, до́ндеже унаслѣ́довалъ еси́ Ца́рствіе небе́сное.

Сла́ва, гла́съ 8:
Имя́ше блаже́нная твоя́ душа́ и непоро́чная Ду́ха Пресвята́го озаре́ніе, о́тче преподо́бне Арка́діе, отъ ю́ности бо нося́ соверше́нъ смы́слъ и любо́вію Христо́вою разгара́яся, держа́вно надъ страстьми́ воцари́лся еси́, и, ко́зни де́монскія кресто́мъ низложи́въ, та́ко по́двигъ тече́нія своего́ соверши́лъ еси́, и ны́нѣ во свѣ́тѣ невече́рнѣмъ водворя́ешися, Тро́ицѣ со а́нгелы предстоя́. Тѣ́мже моли́ изба́витися на́мъ ви́димыхъ и неви́димыхъ вра́гъ и спасти́ся душа́мъ на́шимъ.

И ны́нѣ, [богоро́диченъ]:
Влады́чице, пріими́ моли́твы ра́бъ [Твои́хъ и изба́ви на́съ отъ вся́кія ну́жды и печа́ли].

Тропа́рь, гла́съ 4:
Отъ духо́внаго наста́вника, отца́ преподо́бнаго Ефре́ма, наставля́емь, послуша́нія до́брый рачи́телю, о́тче Арка́діе, отъ мірска́го мяте́жа удали́лся еси́ и, и́нокъ бы́въ изря́дный, до́брымъ по́двигомъ ревну́яй, отъ Христа́ Бо́га прія́лъ еси́ вѣне́цъ сла́вы небе́сныя; и ны́нѣ вку́пѣ съ преподо́бнымъ отце́мъ Ефре́момъ у престо́ла Вы́шняго предстоя́, о на́съ моли́ся, изба́витися на́мъ отъ всѣ́хъ бѣ́дъ и скорбе́й и спасти́ся душа́мъ на́шимъ.

Сла́ва, и ны́нѣ, богоро́диченъ:
Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

И настоя́щій отпу́стъ.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] 

На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!Отче Арка́діе преподо́бне, окрили́въ у́мъ къ Бо́гу вѣ́рою, мíра и я́же въ не́мъ возгнуша́лся еси́ и, кре́стъ сво́й взе́мъ, Христу́ Бо́гу послѣ́довалъ еси́, тѣ́ло непокори́вое по́двиги воздержа́нія му́жественно порабо́тивъ ду́хови. [Два́жды.]

Якоже со́лнце многосвѣ́тло, добродѣ́телей свѣ́томъ и чуде́съ сія́ньми обрѣ́тъ Ефре́ма, Арка́діе, отъ того́ просвѣще́ніе прія́лъ еси́ и, те́мныя стра́сти отгна́въ, свѣ́телъ яви́лся еси́, тѣ́мже и къ Свѣ́ту Незаходи́мому премину́лъ еси́, о́тче преблаже́нне.

Все́ житіе́ препроводи́лъ еси́ въ безмо́лвіи мно́зѣ, и въ пла́че, и въ слеза́хъ, и́нокъ бы́въ и́стиненъ вѣ́рою, нестяжа́ніемъ укра́шенъ, и воздержа́ніемъ удо́бренъ, и, я́ко стра́ненъ и пришле́цъ на земли́, явля́я себе́. Тѣ́мже обрѣ́лъ еси́ небе́сныхъ благи́хъ наслажде́ніе, досточу́дне.

Ины стихи́ры, гла́съ 8. Подо́бенъ: Все́ упова́ніе.
Весь отъ ю́ности Го́сподеви возло́жся, Арка́діе преподо́бне, земну́ю красоту́ и сла́ву нивочто́же вмѣни́лъ еси́, да Христа́ еди́наго пріобря́щеши. Иго креста́ на ра́мо взе́мъ и во вся́ ору́жія Бо́жія обо́лкшися, оби́тели преподо́бнаго Ефре́ма дости́глъ еси́ и, отъ него́ о́браза и́ноческаго сподо́блься, мно́гимъ добродѣ́телемъ о́бразъ бы́лъ еси́. И ны́нѣ на небесѣ́хъ со а́нгелы Христо́ви предстоя́, Арка́діе о́тче на́шъ, моли́ спасти́ся душа́мъ на́шимъ. [Два́жды.]

Па́мять стра́шнаго Христо́ва прише́ствія въ се́рдцѣ свое́мъ нося́, Арка́діе преподо́бне, разу́мно мимотеку́щихъ житія́ премину́лъ еси́ и, сла́ву маловре́менную презрѣ́въ, равноа́нгельное житіе́ воспрія́лъ еси́: на земли́ бо му́жески подвиза́вся, потща́лся еси́ пло́ть покори́ти ду́хови. Ду́шу же и у́мъ отъ страсте́й очи́стилъ еси́, ревнова́въ житію́ преподо́бнаго Ефре́ма. Съ ни́мъ же на небесѣ́хъ престо́лу Влады́чню предстои́ши, со дерзнове́ніемъ моля́ся о душа́хъ на́шихъ.

Преподо́бне о́тче Арка́діе, измла́да возлюби́лъ еси́ добро́ту Влады́чню и, къ Тому́ жела́ніе невозвра́тно имѣ́я, оте́чество и ро́дъ оста́вилъ еси́, бога́тство же и сла́ву возненави́дѣвъ, Христу́ еди́ному послѣ́довалъ еси́, равноа́нгельно во оби́тели съ преподо́бнымъ Ефре́момъ пожи́лъ еси́. И ны́нѣ на небесѣ́хъ со а́нгелы Христу́ Бо́гу предстои́ши, Арка́діе преподо́бне, со дерзнове́ніемъ моля́ся о душа́хъ на́шихъ.

Сла́ва, гла́съ 2:
Жела́ніемъ бу́дущихъ бла́гъ, преподо́бне, утверди́вся, чистото́ю душе́вною спасе́нія пути́ проше́лъ еси́, душегуби́тельнаго и го́рдаго змíя смире́ніемъ и воздержа́ніемъ уби́лъ еси́. Небе́сная же во́инства удиви́лъ еси́ терпѣ́ніемъ свои́мъ, чи́стое прія́телище Пресвято́му Ду́ху, о́тче преподо́бне, бы́въ; сего́ ра́ди отъ Вседержи́тельныя десни́цы вѣнча́лся еси́ и чуде́съ дарова́ній отъ Него́ сподо́бился еси́. Тѣ́мже моли́ спасти́ся душа́мъ на́шимъ.

И ны́нѣ, богоро́диченъ:
Пре́йде сѣ́нь [зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ].

Вхо́дъ. Проки́менъ дне́. Чте́нія три́, преподо́бническія.

[Прему́дрости Соломо́ни чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5.]
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ].

На литíи стихи́ры, гла́съ 1:
Дне́сь ликовству́етъ ра́достно освяще́нная оби́тель и хва́лится твои́ми богоуго́дными дѣя́ніи, имѣ́ющи твоя́ святы́я мо́щи, блаже́нне Арка́діе, отъ ни́хже святы́ню почерпа́емъ оби́льно: подава́ютъ бо цѣльбы́ съ вѣ́рою притека́ющимъ къ честнѣ́й твое́й ра́цѣ, тѣ́мже, просвѣ́щшеся тобо́ю, зове́мъ: сохраня́й, преподо́бне, ста́до твое́ и моли́ спасти́ся душа́мъ на́шимъ.

Гла́съ 8:
Па́мять твоя́ во благослове́ніяхъ пребыва́етъ, преподо́бне о́тче Арка́діе, кро́тость бо се́рдца твоего́, уго́дниче Христо́въ блаже́нне, просія́ въ житіи́ твое́мъ изря́днѣе со́лнечнаго сія́нія. Честна́я ра́ка свяще́нныхъ моще́й твои́хъ, я́ко труба́, и дне́сь велегла́сно о добро́тахъ твои́хъ свидѣ́тельствуетъ, благоуха́ющи благода́тію Пресвята́го Ду́ха, и прогоня́ющи мра́къ грѣхо́вный, и на́съ науча́ющи благодари́ти Бо́га, тебе́ просла́вльшаго.

Гла́съ 3:
Ве́лія сла́ва житія́ твоего́, о́тче на́шъ Арка́діе, вся́ бо земна́я оста́вивъ, еди́наго Христа́ возлюби́лъ еси́ и, Тому́ служа́ чи́стою со́вѣстію, на земли́ а́нгельски пожи́лъ еси́. Бѣсо́вская же кова́рства разори́въ, возше́лъ еси́ на высоту́ добродѣ́телей и блаже́нъ еси́, та́ко Христу́ рабо́тавъ. Тѣ́мже и мы́, въ зерца́лѣ житія́ твоего́ пу́ть къ животу́ зря́ще, тя́ непреста́нно ублажа́емъ.

Сла́ва, гла́съ 2:
Преподо́бне и богоно́сне, блаже́нне о́тче на́шъ Арка́діе, бла́гъ нетлѣ́нныхъ воспрія́въ жела́ніе, а́нгельское на земли́ житіе́ соверши́лъ еси́. Испе́рва небоподо́бну добро́ту о́браза сохрани́въ, ны́нѣ на небесѣ́хъ водворя́ешися и, Бо́гу со дерзнове́ніемъ предстоя́, зерца́ломъ разу́мнымъ чи́сто зри́ши Святу́ю Тро́ицу. О чту́щихъ тя́ вѣ́рою и любо́вію моли́ся, о́тче на́шъ Арка́діе.

И ны́нѣ, богоро́диченъ:
О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
Отъ ю́ности святооте́ческому житію́ поревнова́въ во все́мъ, преподо́бне, оста́вилъ еси́ вся́, я́же въ мíрѣ, жите́йская мудрова́нія, моля́ о на́съ Человѣколю́бца.

Сти́хъ: Честна́ предъ Го́сподемъ [сме́рть преподо́бныхъ Его́].

Послуша́нія дѣя́ніе отъ се́рдца исправля́я, му́дре, превы́ше мíра и я́же въ не́мъ жите́йскихъ показа́лся еси́; и сего́ ра́ди въ вы́шнихъ со а́нгелы Христу́ предстои́ши, о всѣ́хъ моля́ся.

Сти́хъ: Что́ возда́мъ Го́сподеви [о всѣ́хъ, я́же воздаде́ ми?]

Аще и ю́нъ тѣ́ломъ, преподо́бне Арка́діе, но многолѣ́тныхъ житіе́мъ превозше́лъ еси́. Все́ плотско́е мудрова́ніе отри́нувъ, сво́й ра́зумъ въ послуша́ніе Христо́во плѣни́лъ еси́.

Сла́ва, гла́съ 8:
Помышля́я о́ное житіе́ и вѣ́къ бу́дущій несконча́емый, вѣ́къ се́й, я́ко маловре́мененъ, оста́вилъ еси́ и потща́лся еси́ тлѣ́нными нетлѣ́нная стяжа́ти, отню́дуже и тѣ́ло порабо́тилъ еси́ ду́хови, да Христа́ еди́наго пріобря́щеши. Его́ же моли́ спасти́ся всѣ́мъ, любо́вію свяще́нную па́мять твою́ почита́ющимъ.

И ны́нѣ, богоро́диченъ:
Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

[На благослове́ніи хлѣ́бовъ: Тропа́рь свято́му, два́жды [пи́санъ на ма́лѣй вече́рни]. И Богоро́дице Дѣ́во.., еди́ножды.]

НА УТРЕНИ,
На Бо́гъ Госпо́дь: Тропа́рь преподо́бному Арка́дію, два́жды. Сла́ва, и ны́нѣ, богоро́диченъ: Еже отъ вѣ́ка…

По 1-мъ стихосло́віи сѣда́ленъ, гла́съ 4:
Разумѣ́въ, я́ко вѣ́къ, и́же на земли́, преходя́щь е́сть, блаже́нне, вѣ́къ о́нъ, я́ко не преходя́щій, отъ се́рдца возлюби́лъ еси́, ему́же и наслѣ́дникъ яви́лся еси́. Тѣ́мже о всѣ́хъ на́съ Христа́ Бо́га моли́, въ пѣ́снѣхъ, преподо́бне, твою́ па́мять почита́ющихъ. [Два́жды.]

Сла́ва, и ны́нѣ, богоро́диченъ:
Обнови́ла еси́, Чи́стая, Боже́ственнымъ Рождество́мъ Свои́мъ истлѣ́вшее страстьми́ земноро́дныхъ естество́ и су́щимъ ме́ртвымъ прегрѣше́ньми жи́знь и нетлѣ́ніе породи́ла еси́. Тѣ́мже Тя́ по до́лгу, Дѣ́во Пречи́стая, вси́ ублажа́емъ.

По 2-мъ стихосло́віи сѣда́ленъ, гла́съ 2:
Иноческаго житія́ исправле́нія отъ се́рдца возлюби́въ, блаже́нне Арка́діе, духо́вному отцу́ послуша́ніемъ и́скреннимъ вда́лся еси́, съ ни́мже Го́сподеви моли́ся спасти́ся всѣ́мъ на́мъ. [Два́жды.]

Сла́ва, и ны́нѣ, богоро́диченъ:
Милосе́рдія исто́чниче, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́, на Тя́ бо упова́юще, ра́дуйся, вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

По поліеле́и сѣда́ленъ, гла́съ 8:
Прему́дрости Боже́ственнѣй измла́да навы́къ, вся́, въ мíрѣ су́етная, возненави́дѣлъ еси́, преподо́бне, Христа́ же еди́наго возлюби́лъ еси́; отсю́ду же духо́вному отцу́ всеконе́чнѣ въ послуша́ніе вда́лся еси́, и мно́гихъ добродѣ́телей сокро́вищемъ обогати́лся еси́ отъ того́. Съ ни́мже моли́ся Го́сподеви, Арка́діе преподо́бне, грѣхо́въ проще́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:
Богоро́дицу Дѣ́ву, еди́ну въ жена́хъ, Тя́, безсѣ́менѣ ро́ждшую Бо́га пло́тію, вси́ ублажа́емъ, ро́ди человѣ́честіи: Огнь бо въ Тя́ всели́ся Божества́ и я́ко Младе́нца пита́ла еси́ Зижди́теля и Го́спода Твоего́. Тѣ́мже, а́нгельскій собо́ръ и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га грѣхо́въ оставле́ніе дарова́ти, воспѣва́ющимъ досто́йно сла́ву Твою́.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* [сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми?] Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:
Егда́ Боже́ственное наи́тіе на́йде на тя́, преподо́бне, мірска́я возненави́дѣвъ, ко Христу́ прилѣпи́лся еси́ и, Того́ яре́мъ взе́мъ, по стопа́мъ блаже́ннаго Ефре́ма ходи́ти учи́лся еси́, отню́дуже о́бразъ мно́гимъ добродѣ́телію бы́въ, воздержа́ніемъ и моли́твами подо́бникъ своему́ отцу́ яви́лся еси́. Тѣ́мже мо́лимъ тя́: моли́ся, преподо́бне, спасти́ и просвѣти́ти ду́ши на́ша.

Кано́нъ [Богоро́дицѣ, со ирмосо́мъ на 6 и] преподо́бному Арка́дію, Новото́ржскому чудотво́рцу на 8, гла́съ 2.

Пѣ́снь 1.
Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Сло́ве Бо́жій, молю́тися: да́ждь ми́ сло́во и отве́рзи ми́ устнѣ́, недосто́йному рабу́, да восхвалю́ уго́дника Твоего́, преподо́бнаго отца́ Арка́дія, я́ко въ Тебѣ́ и Тобо́ю просла́вися.

Отче преподо́бне Арка́діе, пріими́ отъ недосто́йнаго, ю́же воспою́, пѣ́снь съ любо́вію и моли́ за мя́, грѣ́шнаго раба́ твоего́, отъ усе́рдія дерзну́вшаго восхвали́ти тя́, его́ же Христо́съ просла́ви.

Си́лою Христо́вою укрѣпля́емь, преподо́бне Арка́діе, вся́ кова́рства лука́ваго низве́рглъ еси́ сле́зными твои́ми моли́твами, богоблаже́нне Арка́діе преподо́бне.

Богоро́диченъ: О, па́че ума́ чуде́съ Твои́хъ, Ма́ти Дѣ́во! Бо́жіе бо Ѵпоста́сное Сло́во прія́вши во утро́бу Твою́, родила́ еси́ па́че естества́ Безлѣ́тнаго Сы́на, вся́ческая Боже́ственною Свое́ю си́лою прему́дрѣ содержа́ща и окормля́юща.

Катава́сія: Христо́съ ражда́ется…

Пѣ́снь 3.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Со́вѣсть имѣ́лъ еси́ бла́гу, преподо́бне о́тче, и о́ко серде́чное, взира́ющее къ Бо́гу, и въ послуша́ніи до́брѣ пребы́лъ еси́ отцу́ своему́, наста́внику преподо́бному Ефре́му, съ ни́мже ны́нѣ предстоя́ у престо́ла Вседержи́теля, о на́съ Христу́ Бо́гу моли́ся дарова́ти на́мъ ве́лію ми́лость.

Стягну́въ тѣ́ло свое́ воздержа́ніемъ и чистото́ю, въ вы́шняя селе́нія, о́тче, дости́глъ еси́ и на небесѣ́хъ со а́нгелы лику́еши. Тѣ́мже о на́съ Христу́ Бо́гу моли́ся, отъ Него́ же испроси́ на́мъ ве́лію ми́лость.

Нака́занъ боже́ственными уче́ньми, посту́, и воздержа́нію, и вся́кой добродѣ́тели отъ отца́ своего́, наста́вника духо́внаго, преподо́бнаго Ефре́ма, отъ млады́хъ ногте́й навы́клъ еси́ и тѣ́мъ Бо́гу угоди́лъ еси́. Отче преподо́бне Арка́діе, моли́ся о душа́хъ на́шихъ.

Богоро́диченъ: Просвѣти́, Чи́стая, сѣ́тующее се́рдце мое́, при́сно преступле́ньми и жите́йскими мно́гими молва́ми оскверня́емое, и не оста́ви мене́ враго́мъ бы́ти въ ра́дость, я́ко да просла́влю и любо́вію воспою́ Тя́, Всепѣ́тая.

Сѣда́ленъ, гла́съ 8:
Отре́кся мíра и духо́вному наста́внику, преподо́бному Ефре́му, покори́вся, а́ще и мла́дъ бы́лъ еси́, о́тче, еди́ны добродѣ́тели стяжа́въ, всѣ́мъ и́нокомъ о́бразъ бы́лъ еси́. Тѣ́мже моли́ся грѣхо́въ оставле́ніе пода́ти любо́вію чту́щимъ тя́. [Два́жды.]

Сла́ва, и ны́нѣ, богоро́диченъ:
Ле́гкій о́блаче, источи́вый вѣ́рнымъ Ро́су боже́ственную, свѣ́щниче златокова́нный, показа́вый всѣ́мъ Свѣ́тъ немерца́ющій, Нескве́рная, Непоро́чная, Пречи́стая Влады́чице, омраче́нную ду́шу мою́ слѣпото́ю страсте́й безстра́стія заре́ю просвѣти́, молю́ся, и у́мъ мо́й въ тишинѣ́ укрѣпи́, да по до́лгу сла́влю Тя́ и любо́вію пою́, Пречи́стая Всенепоро́чная.

Пѣ́снь 4.
Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Поще́ніемъ и бдѣ́ніемъ тѣ́ло свое́ изнури́лъ еси́, о́тче Арка́діе, а́нгеловъ сожи́тельниче, и по́стникомъ ревни́телю, и всѣ́мъ святы́мъ подража́телю, съ ни́ми же моли́ Христа́ Бо́га ве́лію и бога́тую ми́лость пода́ти на́мъ.

Чистото́ю и смире́ніемъ Бо́гу угоди́лъ еси́ и наста́внику своему́ во всѣ́мъ повину́лся еси́, съ ни́мже моли́ся, преподо́бне, пода́ти на́мъ ми́ръ и ве́лію ми́лость.

Да животу́ прича́стникъ нетлѣ́нному яви́шися, вре́менныхъ и тлѣ́нныхъ, о́тче прему́дре, небре́глъ еси́ и, къ Бо́гу присту́пль, со дерзнове́ніемъ мо́лишися спасти́ся на́мъ.

Богоро́диченъ: Ма́ти Бо́жія Чи́стая, страсте́й мои́хъ сою́зы грѣхо́вныя, молвы́ и неду́ги отжени́: и́маши бо къ Нему́ дерзнове́ніе и благода́ть ми́ловати ны́, Госпоже́ Милосе́рдая, Спа́са поро́ждши пло́тію, Его́же непреста́нно моли́ спасти́ся на́мъ.

Пѣ́снь 5.
Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Помоли́ся Христу́ Бо́гу, преподо́бне Арка́діе, о приходя́щихъ къ тебѣ́ съ вѣ́рою и любо́вію и ча́ющихъ въ предста́тельствѣ твое́мъ грѣхо́въ разрѣше́ніе и неду́говъ исцѣле́ніе получи́ти, е́же моли́твами твои́ми подае́ши всѣ́мъ незави́стно.

Измла́да Христу́ послѣ́довавъ, поще́ніемъ и моли́твами проти́ву ко́знемъ де́монскимъ вооружи́лся еси́, и сего́ ра́ди бы́лъ еси́ свѣти́льникъ, сія́я чудесы́, Арка́діе, испроси́ Царю́ на́шему ми́ръ, на враги́ побѣ́ду, и душа́мъ на́шимъ ве́лію ми́лость.

Сна́ очи́ма свои́ма не да́лъ еси́, о́тче Арка́діе, ни вѣ́ждома свои́ма дрема́нія, до́ндеже Бо́гу угоди́лъ еси́, въ тве́рдомъ пребыва́я послуша́ніи богому́дрому учи́телю твоему́, съ ни́мже моли́ся о хва́лящихъ тя́ Христу́ Бо́гу на́шему, пода́ти на́мъ ми́ръ и ве́лію ми́лость.

Богоро́диченъ: Пло́тію ро́ждши Безпло́тнаго, Богороди́тельнице Пречи́стая, тѣле́сныхъ на́съ и душе́вныхъ скве́рнъ омы́й окропле́ніемъ Боже́ственныя благода́ти Сы́на Твоего́.

Пѣ́снь 6.
Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Земна́я и мимотеку́щая, я́ко уме́ты, вмѣни́въ, Христа́ еди́наго вожделѣ́лъ еси́, къ Нему́же сою́зомъ любве́ прибли́зивъ ду́шу свою́, Того́ обрѣсти́ потща́лся еси́ ненасыща́емыя добро́ты.

Процвѣ́лъ въ пусты́нныхъ удо́ліяхъ, прехва́льне о́тче на́шъ, я́ко ши́покъ благово́ненъ, и, я́коже кри́нъ, облагоуха́лъ еси́ со́вѣсти вѣ́рныхъ добродѣ́тельми и чудесы́. Тѣ́мже, преподо́бне, отжени́ отъ на́съ стра́сти смердя́щія.

Жела́ніемъ зѣ́льнымъ, преблаже́нне, послѣ́довалъ еси́ богоно́снаго отца́ Ефре́ма житію́: того́ бо учени́къ изря́дный бы́лъ еси́, съ ни́мже моли́ся Го́сподеви поми́ловати ду́ши на́ша.

Богоро́диченъ: Христа́ на́мъ родила́ еси́, Пречи́стая Влады́чице, Богора́дованная Дѣ́во. Тѣ́мже спаси́ гра́дъ и лю́ди, на Тя́ упова́ющія.

Конда́къ, гла́съ 2:
Къ глубина́мъ боже́ственнаго ра́зума впери́въ у́мъ сво́й, въ небе́сныя оби́тели восте́клъ еси́ и равноа́нгельно житіе́, о́тче Арка́діе, на земли́ пожи́лъ еси́, и во все́мъ повину́лся еси́ духо́вному своему́ настоя́телю и наста́внику, преподо́бному отцу́ Ефре́му, и ны́нѣ, вку́пѣ предстоя́ще у престо́ла Влады́ки Христа́, моли́ся непреста́нно о всѣ́хъ на́съ.

[Икосъ:
Услы́шавъ Христо́въ ева́нгельскій гла́съ, оста́вивъ плотска́я мудрова́нія, бога́тство и сла́ву мíра сего́, я́ко пра́хъ, вмѣни́въ, отъ мла́дости послѣ́довавъ наста́внику и учи́телю своему́ духо́вному отцу́ Ефре́му и отъ того́ вся́кія добродѣ́тели навы́къ, и бы́сть ему́ учени́къ до́брымъ послуша́ніемъ, и надъ страстьми́, я́ко безпло́тенъ, подвиза́вся, и безпло́тныхъ ликостоя́нію сочета́вся, и́же пода́й ра́зумъ мнѣ́, недосто́йному рабу́ своему́, а́ще не ты́ ми́ пода́си и не просвѣти́ши ми́ у́мъ, ка́ко тя́ восхвалю́ и воспою́, окая́нный? Дерза́ю на твое́ незло́біе и вопію́ си́це: ра́дуйся, небе́сный человѣ́че и земны́й а́нгеле; ра́дуйся, я́ко послѣ́довалъ духо́вному наста́внику своему́ во все́мъ, посто́мъ и моли́твами, тѣ́мъ вку́пѣ съ ни́мъ угоди́въ Бо́гу, и бы́сте вели́кія свѣти́льники, сія́юще чудесы́. Ны́нѣ предстоя́ще у престо́ла Христа́, Бо́га на́шего, моли́теся непреста́нно о всѣ́хъ на́съ].

Пѣ́снь 7.
Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Яко вои́стинну тлѣ́нныхъ оста́вль и непостоя́нная мíра сего́ за уме́ты вмѣни́въ, наста́внику своему́ послѣ́довалъ еси́, тѣ́мже съ ни́мъ у престо́ла Бо́жія предстоя́щи, моли́ся спасти́ся всѣ́мъ на́мъ.

Яко добропло́дная ма́слина, въ дому́ Бо́жіи, преподо́бне, процвѣ́лъ еси́, еле́емъ у́бо ра́дованія духо́внаго умаща́й ду́ши любо́вію пою́щихъ тя́, преподо́бне о́тче Арка́діе.

Житіе́ твое́, о́тче Арка́діе преподо́бне, всече́стне, ди́вно на земли́ показа́лъ еси́: вели́кое бо поще́ніе и смире́ніе стяжа́лъ еси́. Сего́ ра́ди на небесѣ́хъ жи́знь вѣ́чную наслѣ́довалъ еси́. Тѣ́мже моли́ при́сно ко Го́споду, отъ бѣ́дъ изба́вити ны́, пою́щія тя́.

Богоро́диченъ: Тя́ Предста́тельницу и́мамы, грѣ́шніи, о Пресвята́я Дѣ́во! Ты́ бо благопремѣ́нна къ на́мъ твори́ши Сы́на Своего́ и Бо́га на́шего ма́терними Твои́ми моли́твами.

Пѣ́снь 8.
Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте, дѣла́, я́ко Го́спода, и превозноси́те во вся́ вѣ́ки.

Яко свѣти́льникъ свѣ́та, ду́шу свою́ сія́ньми добродѣ́телей укра́сивъ, нетлѣ́нный вѣне́цъ отъ Бо́га прія́лъ еси́, и ны́нѣ со а́нгелы престо́лу Его́ предстоя́щи, о на́съ моли́ся, воспѣва́ющихъ: благослове́нъ Бо́гъ оте́цъ на́шихъ.

Ве́сь отъ ю́ности Бо́гови освяти́лся еси́ и къ Нему́ добродѣ́телію прибли́жился еси́, тлѣ́нная бо, я́же на земли́, оста́вивъ, небе́сное обрѣ́лъ еси́ бога́тство.

Обрѣ́лъ еси́ возме́здіе отъ Христа́ Бо́га, преподо́бне Арка́діе, ны́нѣ со а́нгелы святы́ми ликовству́я и со всѣ́ми пра́ведными въ небе́сныхъ оби́телѣхъ водворя́яся. Моли́ся у́бо ко Го́споду, пода́ти на́мъ ве́лію ми́лость.

Богоро́диченъ: Ма́ти Бо́жія Всенепоро́чная, души́ моея́ я́звы исцѣли́ и стремле́ніе утоли́ стра́стныя пло́ти моея́, омраче́нное се́рдце просвѣти́, у́мъ мо́й умири́ и вра́жіихъ напа́стей изба́ви.

Пѣ́снь 9.
Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Яви́лся еси́, о́тче Арка́діе, гра́ду на́шему сто́лпъ непоколеби́мъ и прибѣ́жище всѣ́мъ, притека́ющимъ къ тебѣ́: исцѣле́нія бо благода́ть тобо́ю пріе́млемъ и отъ лю́тыхъ скорбе́й твои́ми моли́твами избавля́емся.

Пріими́, святы́й преблаже́нне, о́тче досточу́дне Арка́діе, пѣ́ніе сіе́ похва́льное и твое́ оте́ческое покажи́ о на́съ ми́лованіе: не мо́жемъ бо по досто́инству похвали́ти тя́, но ели́ко мо́жемъ, отъ усе́рдія дерзну́хомъ.

Еже прино́симъ ти́, о́тче препо́добне Арка́діе, пѣ́нія не пре́зри, но пріими́ сіе́ ми́лостивно и моли́ Творца́ на́шего, Влады́ку и Го́спода, изба́вити ны́ отъ вся́каго преще́нія и ми́лость обрѣсти́ въ де́нь стра́шнаго Его́ испыта́нія.

Богоро́диченъ: Богоро́дице Влады́чице, мене́, во глубину́ зла́ сластьми́ плотски́ми и страстьми́ житія́ впа́дша, возста́ви: на Тя́ бо, я́ко Ма́терь Бо́га на́шего, наде́жду и́мамъ, ра́бъ Тво́й. Не пре́зри упова́нія на́шего, но сотвори́ спасти́ся всѣ́мъ на́мъ.

Свѣти́ленъ:
Святы́ни хра́мъ бы́лъ еси́, преподо́бне, и по Боже́ственному прича́стію ра́йскій граждани́нъ, въ не́мже пита́ешися невозбра́нно дре́ва разу́мнаго и нетлѣ́нныя сла́вы. Тѣ́мже па́мять твою́, Арка́діе преподо́бне, творя́ще и вѣ́рою и любо́вію хва́ляще тя́, мо́лимся: моли́ся Го́сподеви спасти́ся всѣ́мъ на́мъ. [Два́жды.]

Сла́ва, и ны́нѣ, богоро́диченъ:
Ра́дуйся, кля́твы Евиной разрѣше́ніе; ра́дуйся, свѣ́те су́щимъ во тмѣ́; ра́дуйся, хра́ме живы́й жива́го Бо́га; ра́дуйся, вѣ́рнымъ похвало́; ра́дуйся, преподо́бнымъ утвержде́ніе; ра́дуйся, правосла́внымъ сла́во, Благослове́нная Марíе.

На хвали́техъ стихи́ры, гла́съ 6:
Вели́кая исправле́нія и по́стническій по́двигъ вели́каго отца́ и чудотво́рца Ефре́ма, Арка́діе блаже́нне, привлеко́ша тя́ жела́ніемъ къ по́стническому житію́. Тѣ́мже, со тща́ніемъ добродѣ́телей его́ подража́я, неукло́нно тому́ послѣ́довалъ еси́ и соо́бщникъ по́двигомъ до́блественный, я́ко учени́къ ему́ и́стиненъ, яви́лся еси́. И ны́нѣ моли́ся ко Го́споду, преподо́бне, поми́ловатися душа́мъ на́шимъ. [Два́жды.]

Дре́во добровѣ́твенно и благопло́дно, на вода́хъ живо́тныхъ вои́стинну насажде́нное пита́я приходя́щія и осѣня́я опаля́емыя, ты́ еси́, о́тче преподо́бне, напая́емь уче́ніи Ефре́ма, и́ми же то́й пита́лъ е́сть своя́ ученики́. Тѣ́мже мо́лимъ тя́: осѣни́ лю́ди христоимени́тыя, заступа́я отъ язы́ческихъ наше́ствій, низлага́я и́хъ возста́нія, на́съ же всѣ́хъ въ ми́рѣ упра́ви, Арка́діе, твои́ми моли́твами.

Возсія́ дне́сь пресвѣ́тлая и всепра́зднственная па́мять твоя́, пресла́вне Арка́діе, созыва́ющи многочи́сленное по́стникъ сосло́віе и преподо́бныхъ ликостоя́нія къ похвале́нію. Тѣ́мже, притека́юще къ свяще́ннѣй ра́цѣ моще́й твои́хъ, исцѣле́нія же да́ры оби́льно пріе́мля, тебе́ вѣнча́вшаго Христа́ прославля́емъ, Спа́са ду́шъ на́шихъ.

Сла́ва, гла́съ 2:
Па́мять пра́ведника — ра́дость боя́щимся Го́спода, хвала́ бо его́ сла́дость вѣ́рнымъ е́сть. Блаже́нъ бо вои́стинну, его́ же избра́лъ и прія́лъ Госпо́дь. Тѣ́мже мы́, веселя́щеся, почита́емъ преподо́бнаго, ему́ же ны́нѣ мо́лимся, я́ко иму́щу дерзнове́ніе, дарова́ти побѣ́ду Благочести́вому Самоде́ржцу на язы́ки проти́вныя, и низложи́ти возстаю́щія непра́ведно, пода́ти же ми́ръ мíрови, и це́рквамъ единомы́сліе, и душа́мъ на́шимъ ве́лію ми́лость.

И ны́нѣ, [богоро́диченъ]:
Все́ упова́ніе [мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

НА ЛИТУРГІИ,
[Блаже́нна отъ кано́на преподо́бнаго,] пѣ́снь 3 и 6. Проки́менъ, [гла́съ 7]: Честна́ предъ Го́сподемъ* [сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба преподо́бному отцу́ на́шему Арка́дію, ученику́ преподо́бнаго Ефре́ма, Новото́ржскаго чудотво́рца. — СПб.: Въ Сѵнода́льной Тѵпогра́фіи, 1860. — С. 1–41.