НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.
Небе́сныхъ чино́въ житіе́ возлюби́въ* и на земли́ мяте́жное житіе́ презрѣ́въ,*са́мъ себе́, я́ко да́ръ пречи́стъ и че́стенъ,* Тро́ицѣ прине́слъ еси́,* славосло́вити же Отца́ и Сы́на и Ду́ха Свята́го* всѣ́хъ научи́лъ еси́.
Оте́ческую любо́вь, и кра́сная мíра сего́,* и вла́сти высоту́ ни во что́же вмѣни́въ, Са́вво блаже́нне,* еди́наго Христа́ вожделѣ́въ, пресла́вне,* и кре́стъ Его́ на ра́мо взе́мъ,* ско́ро послѣ́довалъ еси́ Ему́,* вседу́шно моля́ся о душа́хъ на́шихъ.
Стра́нствію Влады́чню уподо́блься,* стра́нна себе́ сотвори́въ оте́честву твоему́,*блаже́нне Са́вво святи́телю,* тѣ́мже до́мъ на небесѣ́хъ угото́вилъ еси́ въ вы́шнемъ гра́дѣ Іерусали́мѣ* и мо́лишися о всѣ́хъ на́съ,* почита́ющихъ свято́е твое́ пренесе́ніе.
Блаже́нне святи́телю Са́вво,* честна́я твоя́ душа́ правовѣ́рнымъ смы́сломъ сія́ющи,* добродѣ́тельными свѣтлостьми́ озаря́етъ вѣ́рныхъ исполне́ніе,* бѣсо́вскую тму́ отгоня́ющи,* тѣ́мъ и многомоли́твенное тѣ́ло твое́ во гра́дѣ Ты́рновѣ нетлѣ́нно пребы́сть,* па́ки же ко своему́ оте́честву сла́вно пренесе́ся.
Сла́ва, гла́съ 5:
Боже́ственная и всечестна́я ра́ка твоя́, богоблаже́нне о́тче на́шъ Са́вво святи́телю, источа́етъ вѣ́рнымъ просвѣще́ніе, и боголюбе́зная твоя́ душа́ на небесѣ́хъ со а́нгелы ликовству́етъ, неконча́емое весе́ліе отъ Го́спода воспріе́мши, но у́бо, равноче́стне и апо́столомъ и святи́телемъ, сла́во ку́пно же и удобре́ніе, дерзнове́ніе имѣ́я ко Влады́цѣ, непреста́нно моли́ся о хва́лящихъ тя́, и сла́вящихъ твои́хъ моще́й пренесе́ніе, и твоя́ сла́вная, и пречу́дная, и богоуго́дная дѣя́нія почита́ющихъ, на́шему же Правосла́вію посо́бствуй и оте́чество свое́, тезоимени́тно ти́, сохраня́й, исхода́тайствуй ему́ ми́ръ и ве́лію ми́лость.
И ны́нѣ, пра́здника.
На стихо́внѣ стихи́ры, гла́съ 2:
Въ дому́ Бо́жіемъ* процвѣ́лъ еси́, я́ко фи́никсъ,* и, я́ко ке́дръ,* умно́жилъ еси́ ча́да своя́,* тѣ́мъ твое́ свято́е пренесе́ніе сла́вимъ.
Сти́хъ: Что́ возда́мъ Го́сподеви о всѣ́хъ,* я́же воздаде́ ми?
Пріиди́те, христолюби́вая ча́да,* и ви́дите тѣ́ло* отца́ своего́* невреди́мо и свя́то,* отъ гра́да Ты́рнова приноша́емо.
Сти́хъ: Честна́ предъ Го́сподемъ* сме́рть преподо́бныхъ Его́.
Блаже́нъ еси́, Са́вво, богому́дре о́тче на́шъ,* я́ко вруче́нный ти́ тала́нтъ* до́брѣ умно́жилъ еси́,* тѣ́мже твое́ свято́е пренесе́ніе* любо́вію прославля́емъ.
Сла́ва, гла́съ 6:
Дне́сь созыва́етъ на́съ всечестно́е торжество́ богоно́снаго святи́теля Са́ввы въ похвале́ніе и славосло́віе Бо́жія пѣ́нія, тѣ́мъ, веселя́щеся, ра́достными усты́ возопіе́мъ, глаго́люще: ра́дуйся, святы́мъ богодухнове́нная красото́ и преподо́бнымъ удобре́ніе; ра́дуйся, по́стниковъ пра́вило и му́чениковъ наслѣ́дниче; пло́ть свою́ Христо́ви распя́тъ и со Христо́мъ распя́тъ страстна́я помышле́нія, апо́стольскому сосло́вію ревни́телю и пра́ведниковъ побо́рниче, апо́стольски же подсо́лнечную проше́дъ, си́рымъ и убо́гимъ бы́сть пита́тель и плѣ́ннымъ свободи́тель, тѣ́мъ непреста́нно моли́ся о душа́хъ на́шихъ.
И ны́нѣ, пра́здника.
Тропа́рь свята́го. [Зри́ на вели́цѣй вече́рни.] Сла́ва, и ны́нѣ, пра́здника.
НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.
На Го́споди воззва́хъ: стихи́ры на 8, гла́съ 6:
Дне́сь благода́ть Свята́го Ду́ха* вся́ празднолю́бцы созыва́етъ* на торжество́ вели́каго святи́теля* въ пренесе́ніе честны́хъ его́ моще́й* отъ гра́да Ты́рнова во свое́ оте́чество,* тѣ́мже вси́ духо́вными пѣ́сньми* Са́вву богому́драго просла́вимъ,* моля́щагося прилѣ́жно спасти́ся душа́мъ на́шимъ.
Егда́ преставле́ніе пречи́стаго твоего́ тѣ́ла гото́вляшеся,* тогда́ а́нгельская во́инства, зря́ще тя́,*боже́ственными свѣтлостьми́ сія́юща,* пресвяты́й тво́й ду́хъ ра́достію воспріима́ху,* всегда́ въ вожделѣ́нная тобо́ю мѣ́ста го́рняго Іерусали́ма* дости́гше, моля́щеся, провожда́ху,* мы́ же, съ вы́шними тя́ лику́юща,* и со апо́столы водворя́ема,* и къ на́мъ отъ гра́да Ты́рнова* свѣ́тло приходя́ща, мо́лимъ:* пресвяты́й Са́вво святи́телю,* Христа́ Бо́га моли́ поми́ловатися душа́мъ на́шимъ.
На всечестно́е твое́ успе́ніе* чинонача́лія а́нгельская земны́хъ на торжество́ совокупля́юще,* е́же свята́го твоего́ ду́ха поко́ище прославля́юще,* хвала́ми всесвяще́нными тво́й ве́рхъ вѣнча́ютъ,* мы́ же, смиренному́дріи, пѣ́ніе тебѣ́ принося́ще* и свято́е твое́ пренесе́ніе честны́хъ моще́й почита́юще,* преподо́бне Са́вво святи́телю, мо́лимъ тя́:* моли́ спасти́ся душа́мъ на́шимъ.
Ины стихи́ры, гла́съ 1:
На торжество́ свѣ́тлое, свяще́нную трапе́зу,* пріиди́те, вѣ́рніи, причасти́мся,* Са́вва бо ны́ созыва́етъ, сотрапе́зники духо́вныя,* его́же трапе́за боже́ственная и сла́дкая,* но не заколе́ніе и пи́ща сме́ртная.* Того́ уподо́бимся кро́тости и незло́бію* и просто́му человѣколю́бію всему́дрому,* святи́телю, во святи́телехъ просія́вшему.
Отче свяще́нне,* твоего́ житія́ свѣтлостьми́ вселе́нная просвѣти́ся,* и омрачи́ся бѣсо́вская ле́сть,* и неду́зи душе́вніи отгоня́ются,* и Це́рковь, ра́дуяся, пра́зднуетъ тѣ́ла твоего́ прише́ствіе,* боже́ственныхъ и благода́тныхъ твои́хъ моще́й,* попира́ющихъ стра́сти и разруша́ющихъ мра́къ.
Отче досточу́дне,* це́рковь созда́лъ еси́ Присносу́щнаго Божества́* и це́ркви же возлюби́лъ еси́ святы́я* на боже́ственное Тро́ицы хвале́ніе,* оживи́лъ еси́ ны́ Бо́жіею благода́тію,* ми́лостивый стяжа́въ ра́зумъ.
Сла́ва, гла́съ 4:
Не подоба́ше ти́, святи́телю, оте́чество свое́ оста́вльшему, жи́ти въ Ты́рновѣ, отону́дуже по изволе́нію Бо́жію, твоя́ боголюбе́зная ча́да съ кра́лемъ Владисла́вомъ многомоле́бное пѣ́ніе тебѣ́ принесо́ша, е́же возврати́тися тебѣ́ во своя́, и, я́ко ми́лостивъ и человѣколюби́въ сы́й, прише́лъ еси́ ко свое́й па́ствѣ. Тѣ́мже слы́шавше се́, собо́ри Се́рбскія земли́ со архіере́и и свяще́нники и мно́жество наро́да съ кади́лы и благоуха́ніи пречестно́е тѣ́ло твое́ срѣта́ютъ и со слеза́ми и ра́достію любе́знѣ любыза́ютъ, кра́ль же Владисла́въ, я́коже иногда́ проро́къ Дави́дъ, предъ гро́бомъ свята́го скака́ше, игра́я и веселя́ся, ра́дости и весе́лія исполня́шеся, ви́дя стры́я своего́, во оби́тель свою́ прише́дша. Возвесели́ся же и Це́рковь, ви́дѣвши тя́, святи́телю, исповѣ́дающися, глаго́лющи: вели́читъ сла́ва моя́ Го́спода, дарова́вшаго мнѣ́ жениха́, и утвержде́ніе вѣ́ры, и бога́тство въ мое́й нищетѣ́, и долготу́ покая́нія. Тѣ́мже мо́лимтися, святи́телю, ми́ръ испроси́ душа́мъ на́шимъ и ве́лію ми́лость.
И ны́нѣ, догма́тикъ.
Вхо́дъ. Проки́менъ дне́. И чте́нія три́ святи́тельская.
При́тчей чте́ніе. [Главы́ 10 и 8.]
Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.
При́тчей чте́ніе. [Главы́ 10 и 11.]
Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.
Прему́дрости Соломо́ни чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На стихо́внѣ стихи́ры, гла́съ 5. Подо́бенъ: Ра́дуйся.
Ра́дуйся, святи́телей честно́е,* и богоно́сное, и доброгла́сное удобре́ніе,* добро́то цѣлому́дрія, правосла́вія степе́нь,* но́вый на́мъ Са́вво,* раздая́тель тѣле́сныя пи́щи а́лчущимъ* и духо́вныя пи́щи тре́бующимъ пода́тель,*убо́гимъ, я́ко оте́цъ ми́лостивъ,* сопросвѣти́тель оте́чества своего́ съ церко́вными учи́тели,* и́хже породи́лъ еси́ Ду́хомъ и Боже́ственными уче́ніи,* всѣ́хъ уча́ Боже́ственнаго человѣколю́бія вели́честву.* Христу́ ны́нѣ моли́ся*дарова́ти душа́мъ на́шимъ ве́лію ми́лость.
Сти́хъ: Честна́ предъ Го́сподемъ* сме́рть преподо́бныхъ Его́.
Ра́дуйся, просвѣще́нная главо́,* и́же тму́ злочести́вую отгна́вый ору́жіемъ благоче́стія,* и́же оте́честву своему́ утвержде́ніе и Це́ркви стѣна́.* Священнолю́бцы, пріиди́те,* почти́мъ па́мять просвѣ́щшаго на́съ,* и Бо́гу при́сныя рабы́ содѣ́лавша,* и грѣхо́вный мра́къ Бо́жіею благода́тію отгна́вша,* и къ на́мъ свѣ́тло дне́сь изъ Ты́рнова гра́да прише́дша,* тѣ́мже согла́сно возопіе́мъ ему́:* помина́й ча́да у Христа́,* чту́щія тя́ непреста́нно, блаже́нне,* и пра́зднующія вѣ́рно присночестну́ю па́мять твою́,* моли́ся пода́ти мíрови ве́лію ми́лость.
Сти́хъ: Что́ возда́мъ Го́сподеви о всѣ́хъ,* я́же воздаде́ ми?
Ра́дуйся, святи́телю Христо́въ Са́вво,* избра́нный же благоуха́нія ѳиміа́мъ,* цвѣ́те ра́йскій,* вѣ́рнымъ просвѣще́ніе,* Сло́ву проповѣ́дниче велегла́сенъ,* у́ме небе́сный ученико́мъ,* тве́рдый сто́лпе, святи́телю Бо́жій,*свѣти́ло незаходи́мое и Це́рквамъ украше́ніе,* свѣти́льниче многосвѣ́тлый,* и́же зако́номъ Боже́ственнымъ просвѣти́ оте́чество свое́,* Христу́ помоли́ся* дарова́ти душа́мъ на́шимъ ве́лію ми́лость.
Сла́ва, гла́съ 6:
Пріиди́те, собо́ри Се́рбскія земли́, ви́димъ пресла́вное чу́до: дне́сь учи́теля на́шего и отца́, отъ Ты́рнова гра́да къ на́мъ прише́дша, я́ко да спя́щія ны́ во грѣсѣ́хъ оживи́ти, пріиди́те дне́сь, неразу́міемъ усну́вшіи, подиви́мся и, сего́ сла́дости учи́тельскія насыща́яся непреста́нно, си́це рце́мъ: ра́дуйся, апо́столу Па́влу совсе́льниче, я́ко изъясни́лъ еси́ вѣ́рнымъ лю́демъ и́стинная проповѣ́данія; ра́дуйся, громогла́сная трубо́, провозвѣсти́вшая на́мъ пу́ть спасе́нія; ра́дуйся, святи́телемъ и́стинное пра́вило, и, я́ко дерзнове́ніе у Христа́ имѣ́я, моли́ спасти́ся душа́мъ на́шимъ.
И ны́нѣ, пра́здника.
Тропа́рь, гла́съ 3:
Пути́, вводя́щаго въ жи́знь, наста́вникъ, и первопресто́льникъ, и учи́тель бы́лъ еси́: пе́рвѣе бо прише́дъ, святи́телю Са́вво, оте́чество твое́ просвѣти́лъ еси́ и, породи́въ то́е Ду́хомъ Святы́мъ, я́ко древа́ ма́слинная, въ мы́сленнѣмъ раи́ насади́лъ еси́ всеосвяще́нная твоя́ ча́да. Тѣ́мъ, я́ко апо́столомъ и святи́телемъ сопресто́льна чту́ще тя́, мо́лимъ: моли́ Христа́ Бо́га дарова́ти на́мъ ве́лію ми́лость.
НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, тропа́рь свята́го. И ны́нѣ, пра́здника.
По 1-мъ стихосло́віи сѣда́ленъ, гла́съ 8:
Оте́ческія любве́ отлу́чся, ма́тернее же жела́ніе небре́гъ, еди́наго вожделѣ́въ Отца́ Небе́снаго и Тому́ ве́сь прилѣпи́лся еси́ по́ты же, и труды́, и моли́твами непреста́нными, тѣ́мъ и востече́ на Го́ру Святу́ю, мно́гія же, тебѣ́ послѣ́довавшія, Бо́гу приве́лъ еси́, Са́вво, преблаже́нне о́тче, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, пра́здника.
По 2-мъ стихосло́віи сѣда́ленъ, гла́съ 4:
Удиви́шася вся́ а́нгельская во́инства житію́ твоему́ честно́му, и́мже къ ни́мъ причте́ся, а́нгельски бо въ мíрѣ пожи́въ; устраши́шася же земнíи человѣ́цы, зря́ще пречестно́е тѣ́ло твое́, ви́дяще, я́ко тлѣ́нное въ нетлѣ́нное преложе́но, и съ ра́достію и любо́вію срѣта́ютъ, припа́дающе, любе́зно цѣлу́ютъ, Христа́ велича́юще, просла́вльшаго тя́, су́щаго во вся́ вѣ́ки. [Два́жды.]
Сла́ва, и ны́нѣ, пра́здника.
По поліеле́и сѣда́ленъ, гла́съ 5:
Яко святи́теля вси́ и боже́ственнаго проповѣ́дника хва́лимъ тя́, Са́вво преблаже́нне, уче́ніи бо боже́ственными оте́чество свое́ озари́лъ еси́, и, мра́къ неразу́мія отогна́въ, насади́лъ еси́ плоды́ богоразу́мія, и со а́нгелы ны́нѣ сла́виши Христа́, Его́же непреста́нно моли́ о душа́хъ на́шихъ. [Два́жды.]
Сла́ва, и ны́нѣ, пра́здника.
Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́ живу́щіи по вселе́ннѣй. Вся́кое дыха́ніе… Ева́нгеліе отъ Іоа́нна, зача́ло [35, отъ полу́].
По 50-мъ псалмѣ́ стихи́ра, гла́съ 6:
Дне́сь благода́ть Свята́го Ду́ха вся́ празднолю́бцы созыва́етъ на торжество́ вели́каго святи́теля въ пренесе́ніе честны́хъ его́ моще́й отъ гра́да Ты́рнова во свое́ оте́чество, тѣ́мже вси́ духо́вными пѣ́сньми Са́вву богому́драго просла́вимъ, моля́щагося прилѣ́жно спасти́ся душа́мъ на́шимъ.
Пе́рвый кано́нъ святи́телю Са́ввѣ, гла́съ 4.
Пѣ́снь 1.
Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.
Просвѣти́ мою́ ду́шу и се́рдце, молю́ Тя́, Свѣтода́вче и тва́ри Созда́телю, да́ръ пода́въ мнѣ́ пѣ́сньми воспѣ́ти Твоего́ уго́дника, честна́го святи́теля, и́мже оте́чество его́ отъ ско́рби изба́ви.
Къ ширинѣ́, блаже́нне, твои́хъ похва́лъ упра́ви ума́ моего́ тѣсноту́ и свѣ́тъ посли́ се́рдцу моему́, пою́щу свѣтоно́сную и сла́вную па́мять твою́, святи́телю прехва́льне.
Ра́достно повину́яся Бо́жіимъ повелѣ́ніемъ, мо́рю соше́ственникъ бы́сть, я́ко со́лнце къ за́паду, твои́ми мощми́ прише́лъ еси́, просвѣща́я оте́чество свое́, Са́вво блаже́нне.
Богоро́диченъ: Неусыпа́ющую, Чи́стая, иму́щи моли́тву, успи́ на́ша стра́сти душе́вныя свяще́нными хода́тайствы Твои́ми, боже́ственную и спаси́тельную даю́щи бо́дрость къ Бо́жіихъ хотѣ́ній исполне́нію.
Инъ кано́нъ святи́телю Са́ввѣ, гла́съ 6.
Пѣ́снь 1.
Ирмо́съ: Чу́вственный фарао́нъ потопле́нъ бы́сть со всево́инствомъ, Изра́иль же, проше́дъ посредѣ́ мо́ря, вопія́ше: Го́сподеви Бо́гу на́шему пои́мъ, я́ко просла́вися.
Земля́ лику́етъ и не́бо съ человѣ́ки ра́дуется боголѣ́пно въ тво́й, му́дре, святы́й пра́здникъ, въ о́ньже свяще́нное твое́ тѣ́ло отъ гра́да Ты́рнова къ твоему́ ста́ду до́йде, сла́вне святи́телю, Ду́ху честно́е жили́ще.
Распя́въ пло́ть свою́ стра́хомъ Влады́чнимъ, умертви́ся мíрови, прему́дре святи́телю Са́вво, и ны́нѣ пре́йде ве́село къ животу́ вѣ́чному, преблаже́нне.
Ме́ртвъ мíрови бы́сть, Са́вво, боже́ственнымъ вселе́ніемъ, и по святѣ́мъ преставле́ніи и по погребе́ніи твое́мъ въ оте́чество твое́ пренесе́нъ бы́сть свѣ́тло, его́же облагоуха́еши, чу́дне.
Богоро́диченъ: Иже Сы́й со Отце́мъ Соприсносу́щный Сы́нъ, напослѣ́докъ восхотѣ́въ, всели́ся въ ложесна́ Твоя́ на на́ше, Богоро́дице, вѣ́рныхъ отрожде́ніе: тѣ́мже воспѣва́емъ Тя́.
Пѣ́снь 3.
Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.
Сла́вне Са́вво, Бо́жія уста́ бы́въ, изъ у́стъ во́лка непрія́зненна лю́ди оте́чества своего́ изба́ви и преведи́ на ра́дость и весе́ліе, пою́щія пѣ́снь Свѣ́ту.
Загради́ я́звы стру́пъ на́шихъ, за на́съ, твои́хъ люде́й па́ствы, моли́ся и напра́ви ны́ ко Ще́дрому Го́споду, святи́телю сла́вне, заступле́ніе творя́, да не поги́бнемъ, я́ко неразу́мни.
Отъ вся́каго зла́ спаси́ оте́чество свое́ и правосла́вныя христіа́ны, и спобо́рствуй и́мъ, я́ко вели́кій архистрати́гъ Іису́су Нави́ну, потщи́ся и помози́, зѣло́ призыва́емъ тя́, свя́те, да не пости́гнетъ ны́ сме́рть и лю́тость.
Во Еги́птѣ дре́вле на руку́ Дѣви́чу носи́мь, бѣсо́вская тре́бища потреби́въ, въ Се́рбію па́ки Са́вву посла́лъ еси́ вразуми́ти Твое́ вочеловѣ́ченіе и Бо́жію, Христе́, Твою́ та́йну.
Богоро́диченъ: Тя́, Предста́тельницу, Пречи́стая Дѣ́во, стяжа́хомъ, претвори́ на́шу печа́ль на ра́дость и ско́рби изба́ви, ражда́ющія сме́рть.
Инъ.
Ирмо́съ: На тве́рдѣмъ вѣ́ры Твоея́ ка́мени помышле́ніе утверди́въ души́ моея́, утверди́, Го́споди, Тя́ бо и́мамъ, Бла́же, прибѣ́жище и утвержде́ніе.
Лю́діе оте́чества твоего́, ви́дѣвше тя́, преблаже́нне, приноси́ма, срѣто́ша со святи́тели, и́хже укра́си десни́ца твоя́, и́же и просте́ртыми рука́ми пріима́ху твое́ свято́е тѣ́ло, я́ко вели́каго граждани́на и засту́пника те́плаго.
Святи́телю блаже́нне Христо́въ Са́вво, иногда́ во Іерусали́мъ и въ Сина́й ше́ствовавъ, а ны́нѣ во оте́чество свое́ прише́лъ еси́, чудеса́ творя́ ди́вная на спасе́ніе мíру всему́.
Бы́лъ еси́ жили́ще чи́сто и уче́ніемъ испыта́лъ еси́ глубину́, святи́телю, зломы́слящихъ потопля́я умы́, вѣ́рныхъ же напая́я сердца́, тѣ́мже твое́ честно́е пра́зднуемъ пренесе́ніе.
Богоро́диченъ: Разрѣше́ніе на́мъ грѣхо́въ да́ти, Чи́стая, Изба́вителя умоли́, помраче́ніе все́ отъ ду́шъ на́шихъ при́сно Твои́ми моли́твами разгоня́ющи.
Сѣда́ленъ, гла́съ 4:
Удиви́ся, святи́тельство па́че есте́ственнаго пріе́мля, возше́дъ бо на высоту́, прія́лъ еси́ да́ръ дава́ти исцѣле́нія притека́ющимъ тебѣ́ съ вѣ́рою, сего́ ра́ди вопіе́мъ ти́, преподо́бне Са́вво: непреста́нно моли́ о творя́щихъ па́мять твою́. [Два́жды.]
Сла́ва, и ны́нѣ, пра́здника.
Пѣ́снь 4.
Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.
Всю́ зло́бу побѣди́въ змíеву, въ незло́біи души́ своея́ пожи́въ, Са́вво богому́дре, изъ зло́бы мя́ исто́ргни и страсте́й смертоно́сныхъ и благи́ми о́бразы украси́, я́ко да восхвалю́ до́брѣ подвиза́вшагося.
Отъ рожде́нія тя́, Са́вво, роди́тель, я́ко Саму́ила свяще́ннаго, Бо́гу принесе́ и преда́, отъ млады́хъ ногте́й воспита́тися въ дому́ свяще́ннѣмъ, служа́ Го́споду Вседержи́телю, просвѣща́ющу добродѣ́тельми твою́ ду́шу.
Твое́ пречи́стое тѣ́ло, во гро́бѣ лежа́, не истлѣ́ отню́дъ, но цѣ́ло обрѣ́теся, преблаже́нне святи́телю, его́же со тща́ніемъ прине́сше, ра́довахуся любе́зная твоя́ ча́да, тя́ богому́дро ублажа́юще, свя́те Са́вво святи́телю.
Богоро́диченъ: Во́инства а́нгельская ужаса́ются, Пречи́стая, воспѣва́юще вели́чество Боже́ственнаго рождества́ Твоего́, съ ни́ми же моли́, Дѣ́во, всѣ́мъ спасти́ся, вѣ́рою чи́стою Тебе́ блажа́щимъ.
Инъ.
Ирмо́съ: Услы́шахъ слу́хъ Тво́й и убоя́хся, разумѣ́хъ дѣла́ Твоя́ и ужасо́хся: сла́ва си́лѣ Твое́й, Го́споди.
Твои́ ученицы́, похва́льныя ти́ вѣнцы́ прино́симъ, свя́те Са́вво, пріими́ и заступи́ душе́вныя на́ша не́мощи, изле́й на ны́ ми́лостивное твое́, о́тче, изволе́ніе и твои́ми моли́твами отъ напа́сти спаси́.
На небесе́ Бо́гу и Влады́цѣ всѣ́хъ предстоя́, богому́дре, на земли́ въ боже́ственнѣй Того́ Це́ркви му́дро всели́ся, прему́дре святи́телю Са́вво, Ему́же помоли́ся отъ душе́вныхъ болѣ́зней и скорбе́й изба́витися пою́щимъ тя́.
Проповѣ́дникъ неизрече́ннаго, да возвели́чится ны́нѣ святи́тель, се́ бо по вре́меннѣй сме́рти до́брѣ Бо́жіимъ манове́ніемъ па́ки прихо́дитъ во свое́ оте́чество, того́ свяще́нно пѣ́сньми боже́ственными почти́мъ.
Богоро́диченъ: Безневѣ́стная Влады́чице, Благослове́нная Богороди́тельнице, пою́щія Тя́ спаса́й отъ вся́каго вре́да, еди́на человѣ́ковъ Помо́щнице.
Пѣ́снь 5.
Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.
Кра́снѣи но́зѣ твои́, преблаже́нне, по стези́ ше́ствовавши свѣдѣ́ній боже́ственныхъ, по тѣ́мъ до́бро ступа́ющи, на простра́нство ве́ліе небе́снаго Ца́рствія доше́дша, Са́вво пресла́вный.
Укрѣпи́ тя, на пути́ Бо́жіи ходя́ща, а́нгелъ глаго́лати пре́жде бу́дущая я́сно, Са́вво пребога́те, ра́вна а́нгеломъ су́ща и внѣ́ пло́ти ду́хомъ.
Тя́, преблаже́нне о́тче, приноси́ма, Се́рбская земля́ воспріе́млетъ, богатѣ́ющи боже́ственными твои́ми уче́ніи, жи́теля тя́ своего́ иму́щи, блаже́нне Са́вво, па́че багряни́цы украша́ется.
Богоро́диченъ: Умныма очи́ма, Дѣ́во, зря́ Тя́, Иса́ія вопіе́тъ: се́ хо́щетъ роди́тися отъ Дѣ́вы Богоотрокови́цы Іису́съ Госпо́дь, въ человѣ́ковъ па́ки возрожде́ніе.
Инъ.
Ирмо́съ: Свѣ́тъ возсія́й мíру, Христе́, просвѣти́ се́рдце мое́, отъ но́щи Тебѣ́ зову́ща, и спаси́ мя.
Со слеза́ми вопіе́мъ ти́, Са́вво преблаже́нне: изба́ви свою́ па́ству отъ огня́, и меча́, и иноплеме́нниковъ, и междоусо́бицы, и гла́да, и вся́каго зла́.
Твори́тъ ны́нѣ всебога́тно пра́здникъ Бо́жія Це́рковь твои́хъ моще́й, о́тче, пренесе́ніемъ, сла́вящи всѣ́хъ Творца́, возвели́чившаго тя́, Са́вво преблаже́нне.
Честна́, преблаже́нне, сме́рть твоя́ предъ Бо́гомъ на́шимъ яви́ся, ея́же ра́ди прославля́ешися прише́ствіемъ твои́мъ, о́тче, ко оте́честву твоему́, свя́те.
Богоро́диченъ: Еже бы́ти на́мъ подава́яй въ Твою́ утро́бу всели́ся, Богоро́дице, Его́же моли́ спасти́ на́съ.
Пѣ́снь 6.
Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.
Благоуха́ютъ, преподо́бне, твоего́ уче́нія словеса́ благода́тію Ду́ха Свята́го, Божество́ Еди́но въ Тре́хъ Ли́цѣхъ, Сло́ва же воплоще́ніе поя́, благоуха́еши на́съ, пребога́те.
Досто́йно ти́ дарова́ Христо́съ градожи́тельство на небесѣ́хъ, пребыва́ющаго бо здѣ́ гра́да не возлюби́лъ еси́, блаже́нне Са́вво, вѣ́ренъ служи́тель бы́въ и приста́вникъ та́йнамъ Его́ пребога́тъ.
Пресла́вніи страстоте́рпцы Се́ргій и Ва́кхъ ра́дуются, имѣ́юще боже́ственное твое́ тѣ́ло, святи́телю, въ це́ркви Христо́вой положе́но съ ни́ми, веселя́щее ду́ши и сердца́ вѣ́рою припа́дающихъ къ ра́цѣ твое́й, Са́вво пребога́те.
Богоро́диченъ: Лю́діе Твои́ и гра́дъ мо́лятъ Тя́, Ма́ти Бо́жія: изми́ на́съ вся́кія ну́жды и та́мошняго, Всесвята́я Влады́чице, вѣ́чнаго осужде́нія.
Инъ.
Ирмо́съ: Ки́томъ пожре́нъ грѣхо́внымъ, вопію́ Тебѣ́, Христе́: я́ко проро́ка, изъ истлѣ́нія мя́ свободи́.
Творе́цъ Бо́гъ тебе́ засту́пника на́мъ даде́, тѣ́мъ зове́мъ ти́: потщи́ся, Са́вво свя́те, и зло́бы изба́ви ны́, ско́рби бо вели́кія и ра́тныя, тѣле́сныя и душе́вныя, рабы́ твоя́ обдержа́тъ, отъ ни́хже изба́ви ны́, іера́рше Христо́въ.
Ме́ртвенное тѣ́ло твое́ Се́рбская земля́ воспрія́ла е́сть, живоно́сную свѣ́тлость испуща́ющее, преблаже́нне Са́вво, и умерщвле́нныхъ страстьми́ смертоно́сными исцѣля́ющее Ду́хомъ Боже́ственнымъ.
Преподо́бне возврати́вся въ свое́ оте́чество, неми́рная умири́лъ еси́, и положе́нъ бы́сть въ ра́цѣ въ дому́ Спа́сове, святи́телю, Его́же ра́ди обогати́лся еси́ вла́стію, прехва́льне.
Богоро́диченъ: Дѣ́во еди́на Чи́стая Обра́дованная, помози́ ми, при́сно обурева́ему жите́йскими напа́стьми.
Конда́къ, гла́съ 6:
Засту́пниче скорбя́щимъ, въ напа́стехъ помо́щниче, ко Влады́цѣ моле́бниче, не пре́зри на́съ, смире́нныхъ, обремене́нныхъ грѣхи́, но предвари́ и исхи́ти отъ му́къ вѣ́чныхъ съ вѣ́рою моля́щихтися, ускори́ на заступле́ніе и потщи́ся на по́мощь, заступи́, святи́телю Христо́въ Са́вво, пою́щія тя́.
Икосъ:
Пріими́ мольбы́ на́ша, іера́рше Госпо́день, и́миже недоумѣ́нно припа́даемъ ти́, недосто́йніи, мно́жествомъ заступле́ній твои́хъ при́зри на́съ всегда́, припа́дающихъ ти́, неусы́пною свое́ю моли́твою и неизрече́нною по́мощію не оста́ви на́съ и пода́ждь рабо́мъ твои́мъ избавле́ніе отъ всѣ́хъ нападе́ній лю́тыхъ, тебе́ бо засту́пника и́мамы, святи́телю, іера́рше Христо́въ Са́вво, отъ стужа́ющихъ на́съ бѣ́дъ лю́тыхъ, но я́ко имѣ́я дерзнове́ніе ко Влады́цѣ всѣ́хъ, лю́ди заступа́й, святи́телю Христо́въ Са́вво, при́сно пою́щія тя́.
Пѣ́снь 7.
Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.
Яко уя́звленъ Тро́ическимъ Бо́жіимъ раче́ніемъ, Тому́ созда́ боже́ственныя оби́тели, и въ ни́хъ насади́ богожела́нныя му́жи, и научи́ пѣ́ти: благослове́нъ Бо́гъ оте́цъ на́шихъ.
Пріи́де свѣти́льникъ отъ Ты́рнова на свѣ́щницѣ положи́тися, приспѣ́ украше́ніе Бо́жія Це́ркве, воспо́йте Го́сподеви, по́йте съ весе́ліемъ, и, срѣ́теніе творя́ще ему́, духо́вно возопіи́мъ: о́тче, моли́твами твои́ми спаси́ на́съ, пою́щихъ: благослове́нъ Бо́гъ оте́цъ на́шихъ.
Па́вловъ нело́жный, Са́вво, бы́сть свѣти́льникъ и того́ стопа́мъ послѣ́довалъ еси́, преподо́бне, и подви́жникъ нарече́ся, мона́хомъ, и святи́телемъ, и всѣ́мъ бы́въ пра́вило, и́хже научи́ пѣ́ти: благослове́нъ Бо́гъ оте́цъ на́шихъ.
Богоро́диченъ: Успи́ воста́нія страсте́й моея́ души́, бо́дренною моли́твою Твое́ю да́ждь ми́ бо́дрость, Отрокови́це, уны́нія дрема́ніе дале́че отгоня́ющи.
Инъ.
Ирмо́съ: Преподо́бныхъ Твои́хъ отроко́въ пѣ́снь услы́шавый и пе́щь горя́щую ороси́вый, благослове́нъ еси́, Го́споди, Бо́же оте́цъ на́шихъ.
Престо́лу Бо́жію предстоя́, святи́телю блаже́нне, о вѣ́рныхъ свои́хъ рабѣ́хъ моле́нія непреста́нно твори́, вѣ́рою вопію́щихъ Христу́: благослове́нъ Бо́гъ оте́цъ на́шихъ.
Ра́дуется дне́сь богоно́сныхъ святи́телей собо́ръ, и́хже ты́ породи́ Ду́хомъ, честны́мъ пренесе́ніемъ твои́хъ моще́й, и пра́зднуютъ лю́діе Се́рбскія земли́, священнотаи́нниче му́дре Са́вво, зову́ще: благослове́нъ Бо́гъ оте́цъ на́шихъ.
Обстои́мъ, лику́юще, богоно́сне о́тче, свяще́нную твою́ ра́ку и бога́тно отъ нея́ почерпа́емъ вѣ́рою, блаже́нне Са́вво, исцѣле́ній благода́ть, зову́ще: благослове́нъ Бо́гъ оте́цъ на́шихъ.
Богоро́диченъ: Влады́чице всѣ́хъ человѣ́къ, Свята́я Богоро́дице, рабо́ты мя́ страстны́я Твои́ми моли́твами до конца́ свободи́.
Пѣ́снь 8.
Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.
Па́че инѣ́хъ честнѣ́йши, Са́вво, бы́сть у́бо тебе́ ра́ди Се́рбская всесла́вная митропо́лія, Христу́ Бо́гу принесе́ нача́токъ свяще́ненъ, всѣ́хъ Царю́ пою́щи непреста́нно: Го́спода по́йте и превозноси́те Его́ во вѣ́ки.
Сотворя́юще ны́нѣ пра́зднственное весе́ліе, Са́вво, пренесе́ніемъ твои́хъ честны́хъ моще́й, лю́діе вѣ́рніи хвало́ю зову́тъ ти́: при́сный Христа́ Царя́ уго́дниче, исцѣли́ неду́ги ду́шъ и тѣле́съ на́шихъ, моля́ся всѣ́хъ бла́гъ Пода́телю: вся́ дѣла́, Го́спода по́йте и превозноси́те Его́ во вѣ́ки.
Къ ра́цѣ моще́й твои́хъ святы́хъ, лю́діе оте́чества твоего́, прихо́димъ и отъ се́рдца зове́мъ: поми́луй своя́ рабы́ и отъ печа́ли избавля́й, ви́диши бо вся́ печа́льны и уны́лы, но моли́ Ми́лостиваго Бо́га изба́вити на́съ вско́рѣ твои́ми моли́твами.
Богоро́диченъ: Ми́лости Твоея́ мя́ сподо́би, Ми́лостивѣйшаго Сло́ва ро́ждши, Благослове́нная Всечи́стая, въ ча́съ су́дный предста́ни и изба́ви та́мошняго мя́, Чи́стая, осужде́нія.
Инъ.
Ирмо́съ: Преподо́бніи Твои́ о́троцы въ пещи́ херуви́мы подража́ху, трисвяту́ю пѣ́снь воспѣва́юще: благослови́те, по́йте и превозноси́те во вся́ вѣ́ки.
Земля́ отъ свои́хъ нѣ́дръ предаде́ тя́ священнолѣ́пна, цѣ́ла же и неразруши́ма, благоуха́ніемъ чуде́съ удивля́юща гра́да жи́телей пе́рстію гро́ба твоего́, проро́чески вопію́щихъ: пра́ведницы во вѣ́ки живу́тъ.
Пе́рсть, облежа́щая многострада́льное твое́ тѣ́ло, о́тче, показа́ся дража́йши ка́мене сапфи́ра, цѣле́бна бо и чудотвори́ва, и па́че зла́та вѣ́рными цѣни́ма, пою́щими досто́йно: честна́ предъ Го́сподемъ сме́рть преподо́бныхъ Его́.
Царя́ благочести́ваго, держа́ща святы́ню и благослове́ніе, твое́ свято́е и честно́е тѣ́ло, со́ннымъ явле́ніемъ пренести́ убѣжда́еши, его́же ча́да твоя́ со святи́тели и свяще́нники, я́ко пребога́тое сокровище, во своя́ пренесо́ша.
Богоро́диченъ: Пое́мъ Тя́, Дѣ́во Богороди́тельнице, Ея́же ра́ди кля́тва непло́дна бы́сть и благослове́ніе всѣ́мъ пріи́де, вѣ́дущимъ Тя́ еди́ну Ма́терь Бо́га на́шего безму́жную.
Пѣ́снь 9.
Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.
Корабле́мъ, блаже́нне, кра́снымъ преплы́въ свирѣ́пѣющее мо́ре житія́, доше́лъ еси́ къ приста́нищу небу́рному, ра́дуяся, и ны́нѣ предстои́ши съ ли́комъ а́нгеловъ, моля́ за ны́ Милосе́рдаго.
Дне́сь боже́ственная митропо́лія, намѣ́стника до́бляго тебе́ стяжа́вши, пра́зднуетъ, боже́ственное творя́щи твое́ пра́зднество со всѣ́ми епа́рхіями и гра́ды, и́хже соблюда́еши свои́ми моли́твами.
Христолюби́вый Владисла́въ самоде́ржецъ, я́коже дре́вле Дави́дъ, предъ киво́томъ предстоя́ свята́го твоего́ тѣ́ла, ра́довашеся, поя́: вели́читъ душа́ моя́ Го́спода, я́ко даде́ ми отца́ и учи́теля, и во це́ркви Свое́й, ра́дуяся, положи́лъ е́сть.
Богоро́диченъ: Гла́съ Тебѣ́ боже́ственнаго Гавріи́ла прино́симъ ра́достно и взыва́емъ: ра́дуйся, раю́, Яже дре́во живо́тное посредѣ́ иму́щая всегда́, пресла́вная Сло́ва Пала́то, ра́дуйся, Дѣ́во Всенепоро́чная.
Инъ.
Ирмо́съ: Еже ра́дуйся отъ а́нгела пріи́мшая и ро́ждшая Созда́теля Своего́, Дѣ́во, спаси́ Тя́ велича́ющія.
Яви́ся чу́до стра́шное въ са́мый ча́съ успе́нія: па́че со́лнца твое́ лице́, о́тче, заблиста́, внегда́ пріидо́ша ли́цы святы́хъ, ду́хъ тво́й воспріе́млюще и Бо́гу Творцу́ принося́ще.
Стека́ются лю́діе па́ствы твоея́, кра́ль же благочести́вый и свяще́нныхъ служи́телей мно́жество и возложи́ша твое́ честно́е тѣ́ло на вы́и богопрія́тныя, я́ко киво́тъ, пресвяты́й да́ръ принося́ще, тебе́ велича́ху.
Дне́сь пра́зднственно лику́имъ вси́, созыва́етъ бо Са́вва святи́телей собо́ръ и честны́я чернори́зцы на ликова́ніе духо́вное и на трапе́зу безсме́ртныя жи́зни.
Богоро́диченъ: Всѣ́ми владѣ́ющи тва́рьми, лю́демъ Твои́мъ да́руй побѣ́ды на враго́въ моли́твами святи́теля, да Тя́ я́ко Богоро́дицу велича́емъ.
Свѣти́ленъ:
Святи́теля Христо́ва да восхва́лимъ, па́мять его́ че́стно торжеству́юще, то́й бо на́мъ подае́тъ трапе́зу духо́вную, ея́же ду́хомъ насыща́ющеся, наслажде́ніе боже́ственное получа́емъ, Свѣтода́вца прославя́юще.
Сла́ва:
Твое́ пречи́стое тѣ́ло, во гро́бѣ лежа́щее, не растлѣ́ся отню́дъ, но цѣ́ло обрѣ́теся, преблаже́нне святи́телю Са́вво, его́же со тща́ніемъ принесо́ша, ра́довахуся боже́ственная твоя́ ча́да, благовѣ́рна пита́теля богосла́вно тя́ и богому́дра ублажа́емъ, Христу́ моля́щагося о душа́хъ на́шихъ.
И ны́нѣ, пра́здника.
На хвали́техъ стихи́ры на 4, гла́съ 2:
Въ премíрная селе́нія ду́хъ тво́й, блаже́нне,* Христо́съ Бо́гъ пріе́млетъ* и, со а́нгелы всели́въ, у Себе́ упоко́илъ е́сть,* въ ли́цѣ святы́хъ веселя́ся* и со ду́хи пра́ведныхъ почива́я,* идѣ́же ду́си пра́ведныхъ веселя́тся,*во гла́сѣ ра́дованія шу́ма пра́зднующихъ,* идѣ́же всѣ́хъ веселя́щихся жили́ще,* на́мъ испроси́ очище́ніе* и водворе́ніе во свѣ́тлости святы́хъ.
Ра́достно ны́нѣ да воскли́кнемъ,* и ра́достію возопіе́мъ,* и рука́ми да воспле́щемъ свѣ́тло,* собра́ бо на́съ благода́ть духо́вная* въ па́мять пренесе́нія честны́хъ моще́й святи́теля Христо́ва,* богоно́снаго отца́ на́шего Са́ввы,* на́съ бо собира́етъ, пито́мцы церко́вныя,* на славосло́віе Бо́жія пѣ́нія,* возне́сшагося во сла́вѣ Христа́ Бо́га на́шего,* къ Нему́же возопіе́мъ:* просвѣще́ніе, и освяще́ніе, и ми́ръ на́шъ,* Го́споди, сла́ва Тебѣ́.
Кто не удиви́тся, кто́ не ублажи́тъ,* кто́ не просла́витъ пречи́стаго твоего́ житія́, свя́те?* На безсме́ртную бо жи́знь сме́ртію преложи́ся,* свѣ́томъ освѣща́яй всѣ́хъ,* призыва́ющихъ тя́ и сла́вящихъ свято́е твое́ пренесе́ніе,*отъ ско́рби, и бѣ́дъ, и напа́стей на́съ спаса́й* и освяща́й ста́до свое́ при́сно моли́твами свои́ми.
Кíими похва́льными вѣнцы́* вѣнча́емъ Са́вву святи́теля?* Апо́стольски подсо́лнечную проше́дшаго* и доше́дшаго до султа́на, ца́рствующаго Вавило́номъ,* и то́й, невѣ́ренъ сы́й, стра́хомъ нѣ́кимъ одержи́мь,*потре́бнымъ тебѣ́, Са́вво, послужи́въ,* да́ше ти́ проводи́теля до султа́на, ца́рствующаго Еги́птомъ,* и то́й, невѣ́ренъ сы́й,* потре́бнымъ тебѣ́, святи́телю, послужи́въ,* да́ше тебѣ́ проводи́теля до горы́ Сина́йскія,* и та́мо, Са́вво, съ преподо́бными водвори́ся,* сле́зныя исто́чники источа́я* и Христа́ Пречи́стѣй Ма́тери моля́ся*дарова́ти мíрови ве́лію ми́лость.
Сла́ва, гла́съ 4:
Истины исповѣ́дника, и благоче́стія рачи́теля, и те́мнымъ просвѣти́теля, пріиди́те, празднолю́бцы, Са́вву да ублажи́мъ, во святы́хъ святи́теля и по́стникомъ сожи́теля, и́нокомъ наста́вника, и мірсти́мъ учи́теля, и му́ченикомъ ревни́теля, апо́стольски труди́вшася, е́же бо по мѣсто́мъ, и по градо́мъ, и по зе́млямъ, Па́влу подо́бяся, труды́ и пути́ твоя́ кто́ исповѣ́сть? Того́ вѣне́цъ нося́, предстои́ши Тро́ицѣ, отъ Христа́ Мздовоздая́теля проси́ моли́твами сво́ими, свя́те, ми́ръ мíрови дарова́ти и душа́мъ на́шимъ ве́лію ми́лость.
И ны́нѣ, пра́здника.
Славосло́віе вели́кое. [Ектеніи́] и отпу́стъ.
НА ЛИТУРГІИ,
[Блаже́нна пра́здника, пѣ́снь рядова́я и отъ кано́на свята́го, пѣ́снь 3-я. Проки́менъ пра́здника и свята́го, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ дне́ и свята́го, ко Евре́омъ, зача́ло 318. Аллилу́ія пра́здника и свята́го, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе дне́ и свята́го, Іоа́нна, зача́ло 36. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]
Источникъ: Мине́я Ма́й. Ча́сть пе́рвая — М.: Издательскій совѣтъ Русской Православной Церкви, 2002. — С. 215-232.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 