СЛУЖБА ВОСКРЕСНАЯ 3-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ… стихи́ры воскре́сны 3, повторя́юще еди́ну, гла́съ 3:

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Твои́мъ Кресто́мъ, Христе́ Спа́се, сме́рти держа́ва разруши́ся и діа́воля пре́лесть упраздни́ся, ро́дъ же человѣ́ческій, вѣ́рою спаса́емый, пѣ́снь Тебѣ́ всегда́ прино́ситъ.

Просвѣти́шася вся́ческая Воскресе́ніемъ Твои́мъ, Го́споди, и ра́й па́ки отве́рзеся, вся́ же тва́рь, восхваля́ющи Тя́, пѣ́снь Тебѣ́ всегда́ прино́ситъ.

Сла́влю Отца́ и Сы́на си́лу, и Свята́го Ду́ха пою́ вла́сть, нераздѣ́льное, несозда́нное Божество́, Тро́ицу Единосу́щную, ца́рствующую въ вѣ́къ вѣ́ка.

Сла́ва, и ны́нѣ, богоро́диченъ догма́тикъ, гла́съ 3:
Преве́ліе чу́до: Дѣ́ва ро́ждшая, и рожде́нное Бо́гъ, пре́жде вѣ́къ предъявле́нное рожде́ніе и соверше́нное па́че естества́. О, та́инства стра́шнаго! Еже и мы́слимое неизрече́нно пребыва́етъ, и зри́мое не пое́млется! Блаже́нна Ты́ еси́, Пречи́стая Отрокови́це, Ада́ма земноро́днаго Дщи́ и Бо́га Вы́шняго я́вльшаяся Ма́ти. Того́ моли́ спасти́ся душа́мъ на́шимъ.

Та́же: Свѣ́те Ти́хій… Посе́мъ проки́менъ: Госпо́дь воцари́ся.., три́жды. Сти́хъ: Облече́ся Госпо́дь въ си́лу и препоя́сася… Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ

На стихо́внѣ стихи́ру воскре́сну, гла́съ 3:
Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

Та́же три́ богоро́дичны, подо́бны, гла́съ 3:

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ковче́гъ Тя́ у́мный, Чи́стая, вѣ́мы, нося́щій скрижа́ли богопи́санныя, на́мъ же Законоположи́теля и Созда́теля, Ему́же моли́ся спасти́ся душа́мъ на́шимъ.

Сти́хъ: Слы́ши, Дщи́, и ви́ждь, и приклони́ у́хо Твое́.

На земли́ Тя́ не́бо, Чи́стая, показа́, Иже во утро́бѣ Твое́й всели́выйся Бо́гъ Сло́во, пло́ть пріи́мъ, Иже естество́мъ незри́мый, и дожди́ши всѣ́мъ безсме́ртную ро́су, Неискусобра́чная.

Сти́хъ: Лицу́ Твоему́ помо́лятся бога́тіи лю́дстіи.

Спасе́ніе моли́твами Твои́ми и́мамы, и́же тѣ́ми, Дѣ́во, отъ бѣ́дъ при́сно и искуше́ній бу́ри избѣга́емъ, и сего́ ра́ди про́симъ непреста́нно о на́съ е́же моли́ти спасти́ся душа́мъ на́шимъ.

Сла́ва, и ны́нѣ, богоро́диченъ, гла́съ 3:
Па́ки назда́ніе и живо́тъ Тобо́ю вторы́й вѣ́мы, Пречи́стая Марíе, человѣ́ческаго естества́, во чре́вѣ Твое́мъ смѣси́вшагося Созда́теля тва́ри, и воскреси́вшаго на́съ отъ а́да и сме́рти, и жи́знь вѣ́чную пода́вшаго на́мъ, е́же вопи́ти Тебѣ́, Приснодѣ́во: ра́дуйся, совокупи́вшая до́льная небе́снымъ; ра́дуйся, наде́ждо всѣ́хъ конце́й земли́, и предста́тельство, и заступле́ніе; ра́дуйся, я́же Воскре́сеніемъ Сы́на Твоего́ просвѣти́вши вся́ческая и подаю́щи мíрови ве́лію ми́лость.

Та́же: Ны́нѣ отпуща́еши… Трисвято́е, и по Отче на́шъ… Тропа́рь воскре́сенъ. Сла́ва, и ны́нѣ, богоро́диченъ его́. И отпу́стъ.

ВЪ СУББОТУ, НА ВЕЛИЦѢЙ ВЕЧЕРНИ,
На Го́споди воззва́хъ… поста́вимъ стихо́въ 10 и пое́мъ стихи́ры воскре́сны, гла́съ 3:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Сти́хъ: Мене́ жду́тъ пра́ведницы, до́ндеже возда́си мнѣ́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Ины стихи́ры анато́ліевы, гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Кресту́ Твоему́ Честно́му покланя́емся, Христе́, и Воскресе́ніе Твое́ пое́мъ и сла́вимъ, ра́ною бо Твое́ю мы́ вси́ исцѣлѣ́хомъ.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Пое́мъ Спа́са, отъ Дѣ́вы вопло́щшагося, на́съ бо ра́ди распя́тся и въ тре́тій де́нь воскре́се, да́руяй на́мъ ве́лію ми́лость.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Су́щимъ во а́дѣ соше́дъ, Христо́съ благовѣсти́: дерза́йте, глаго́ля, ны́нѣ побѣди́хъ, Азъ е́смь Воскресе́ніе, Азъ вы́ возведу́, разруши́въ сме́ртная врата́.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Недосто́йно стоя́ще въ пречи́стомъ дому́ Твое́мъ, вече́рнюю пѣ́снь возсыла́емъ, изъ глубины́ взыва́юще, Христе́ Бо́же: просвѣти́вый мíръ тридне́внымъ Воскресе́ніемъ Твои́мъ, изми́ лю́ди Твоя́ отъ руки́ враго́въ Твои́хъ, Человѣколю́бче.

Ины стихи́ры Пресвятѣ́й Богоро́дицѣ, творе́ніе Па́вла Аморре́йскаго. Пое́мъ и́хъ, идѣ́же нѣ́сть Мине́и. Гла́съ 7. Подо́бенъ: Дне́сь бди́тъ Іу́да…

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Ми́лостива, благопребы́тна мнѣ́, Дѣ́во, и благопослу́шна яви́ся, призыва́ющу боже́ственную Твою́ благода́ть во всѣ́хъ, вои́стинну случа́ющихъ ми ся: всю́ бо наде́жду души́ моея́ возложи́хъ къ Тебѣ́, и во всѣ́хъ упова́ю на боже́ственный про́мыслъ Тво́й, Ты́ и бу́дущія мя́ сла́вы и живота́ боже́ственнаго сподо́би.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Угліе во мнѣ́, Богоро́дице, страсте́й мои́хъ возгорѣ́шася, отъ гнѣ́ва же и я́рости, отъ пія́нства и блуда́, отъ сребролю́бія и же́стости се́рдца, умерщвле́нія лю́таго, отъ уны́нія и смуще́нія, отъ тщесла́вія же и попра́нія со́вѣстнаго, отъ ни́хже изба́ви ду́шу мою́, молю́ся, Влады́чице, и спаси́ мя́.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Вси́ чи́стою со́вѣстію Богоро́дицѣ припаде́мъ, вопію́ще непреста́нно отъ среды́ серде́чныя: Влады́чице Свята́я, спаси́ всѣ́хъ отъ гнѣ́ва и озлобле́нія, бѣ́дъ и паде́жей, я́ко Тебе́ стяжа́хомъ стѣ́ну и утвержде́ніе, Тобо́ю спаса́еми, подъ кро́въ Тво́й притека́юще.

Сла́ва, и ны́нѣ, богоро́диченъ:
Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ правосла́вно Богоро́дицу исповѣ́дающихъ Тя́.

Та́же вхо́дъ съ кади́ломъ. Свѣ́те Ти́хій… Проки́менъ и ектеніи́.

На стихо́внѣ стихи́ры воскре́сны, гла́съ 3:
Стра́стію Твое́ю, Христе́, омрачи́вый со́лнце и свѣ́томъ Твоего́ Воскресе́нія просвѣти́вый вся́ческая, пріими́ на́шу вече́рнюю пѣ́снь, Человѣколю́бче.

По алфави́ту.

Сти́хъ: Госпо́дь воцари́ся, въ лѣ́поту облече́ся.

Живопріе́мное Твое́ воста́ніе, Го́споди, вселе́нную всю́ просвѣти́ и Твое́ созда́ніе истлѣ́вшее призва́. Тѣ́мже кля́твы Ада́мовы измѣ́ншеся, вопіе́мъ: Всеси́льне Го́споди, сла́ва Тебѣ́.

Сти́хъ: Ибо утверди́ вселе́нную, я́же не подви́жится.

Бо́гъ сы́й неизмѣ́ненъ, пло́тію стражда́ измѣни́лся еси́, Его́же тва́рь не терпя́щи ви́сяща зрѣ́ти, стра́хомъ прекланя́шеся и стеня́щи пое́тъ Твое́ долготерпѣ́ніе; соше́дъ же во а́дъ, тридне́венъ воскре́слъ еси́, жи́знь да́руя мíрови и ве́лію ми́лость.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Да ро́дъ на́шъ отъ сме́рти, Христе́, изба́виши, сме́рть претепѣ́лъ еси́, и тридне́венъ изъ ме́ртвыхъ воскре́съ, съ Собо́ю воскреси́лъ еси́, и́же Тя́ Бо́га позна́вшихъ, и мíръ просвѣти́лъ еси́, Го́споди, сла́ва Тебѣ́.

Сла́ва, и ны́нѣ, богоро́диченъ:
Безъ сѣ́мене отъ Боже́ственнаго Ду́ха, во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.

Та́же: Ны́нѣ отпуща́еши… Трисвято́е, по Отче на́шъ…

Тропа́рь воскре́сенъ, гла́съ 3:
Да веселя́тся небе́сная, да ра́дуются земна́я, я́ко сотвори́ держа́ву мы́шцею Свое́ю Госпо́дь, попра́ сме́ртію сме́рть, Пе́рвенецъ ме́ртвыхъ бы́сть, изъ чре́ва а́дова изба́ви на́съ и подаде́ мíрови ве́лію ми́лость.

Сла́ва, и ны́нѣ, богоро́диченъ:
Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во, пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ Стра́сть, изба́ви на́съ отъ тли́, я́ко Человѣколю́бецъ.

ВЪ СУББОТУ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 3:

Пѣ́снь 1.
Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Яко Ма́терь Бо́жію Тя́ Ду́хомъ Боже́ственнымъ, Отца́ же благоволе́ніемъ я́вльшуюся, вѣ́рніи пѣ́сньми чи́стыми вѣнча́имъ, Пречи́стая Богоневѣ́сто, и цѣлу́емъ Тя́ пѣ́ньми со арха́нгеломъ, во спасе́ніе на́ше.

Отъ ре́бръ у́бо Ада́мовыхъ созида́ется Ева дре́внимъ богозда́ніемъ; отъ утро́бы же Богоро́дицы яви́ся Христо́съ, сы́й Бо́гъ на́шъ, вочеловѣ́чся непрело́жно, вре́мененъ бы́сть Превѣ́чный.

Сла́ва: Иже Евину утро́бу осу́ждь въ печа́лехъ роди́ти плоды́ въ болѣ́зни, во чре́во Твое́ всели́ся, Дѣ́во Чи́стая, сы́й Бо́гъ на́шъ, пло́тію яви́ся па́че сло́ва и прама́терній разрѣши́ до́лгъ.

И ны́нѣ: Въ неча́янія глубину́ впа́дше тягота́ми, прилѣ́жно зове́мъ, Богороди́тельнице, къ Тебѣ́: Влады́чице, помози́ потопля́емымъ дѣ́лы лука́выхъ прегрѣше́ній, Тя́ бо Еди́ну и́мамы наде́жду по Бо́зѣ.

Пѣ́снь 3.
Ирмо́съ: Иже отъ не су́щихъ вся́ приведы́й, Сло́вомъ созида́емая, соверша́емая Ду́хомъ, Вседержи́телю Вы́шній, въ любви́ Твое́й утверди́ мене́.

Тя́ проявля́ше же́злъ Ааро́новъ, безъ напое́нія процвѣ́тшій, Богоро́дице Пречи́стая, безъ сѣ́мене ро́ждши вопло́щшагося Бо́га непремѣ́нно.

Боже́ственный Огнь Тя́ нося́щу, я́ко свѣти́льникъ, Пречи́стая, прови́дѣ проро́къ Ду́хомъ, благоуха́ніе нося́щую су́щимъ въ мíрѣ и жи́знь вѣ́чную.

Сла́ва: Ко арха́нгелу присту́пимъ Гавріи́лу, — ра́дуйся! — вѣща́юще Дѣ́вѣ пѣ́сньми, — Тобо́ю бо разрѣши́тся осужде́нія пра́дѣдняя кля́тва.

И ны́нѣ: Тя́, Пресвята́я Богоро́дице, я́ко стѣ́ну спасе́нія иму́ще, грѣ́шніи, спаса́емся, не пре́зри, Влады́чице, и не посрами́ на́ша моле́нія.

Пѣ́снь 4.
Ирмо́съ: Положи́лъ еси́ къ на́мъ тве́рдую любо́вь, Го́споди: Единоро́днаго бо Твоего́ Сы́на за ны́ на сме́рть да́лъ еси́. Тѣ́мже Ти́ зове́мъ, благодаря́ще: сла́ва си́лѣ Твое́й, Го́споди.

Го́ру мы́сленную, добродѣ́телей сѣ́нь, Ду́хомъ дре́вле Авваку́мъ богови́дно Тя́ ви́дѣвъ, проповѣ́даше, Пречи́стая, я́ко отъ ю́га прише́дша отъ Тебе́ Сло́во, пло́ть пріе́мша.

Го́ру Тя́ ве́лію несѣко́мую Даніи́лъ Ду́хомъ ви́дѣ, не новосѣко́му явля́я чистоту́ дѣ́вства Твоего́, Влады́чице, отъ нея́же Ка́мень усѣче́ся, Христо́съ Сло́во, ле́сти низлага́я и́дольскія.

Сла́ва: Го́ру Тя́ Дави́дъ чу́дну и ту́чну прорече́, Единоро́дный бо отъ Отца́ Сы́нъ въ Тя́ благоволи́, Чи́стая, всели́тися воплоща́емь. Тѣ́мъ Ти́, — ра́дуйся! — ду́хомъ зове́мъ.

И ны́нѣ: Вся́ блага́я и те́плая Засту́пница су́щи грѣ́шникомъ и смире́ннымъ, Богороди́тельнице Пречи́стая Влады́чице, отъ бѣ́дъ, и скорбе́й, и грѣхо́въ спаса́й рабы́ Твоя́.

Пѣ́снь 5.
Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Израсти́ же́злъ Іессе́евъ цвѣ́тъ неувяда́емый, Дѣ́ва Марíя Бо́га Безнача́льнаго, безъ сѣ́мене, отъ Ду́ха Боже́ственнаго и Отча, ца́рства держа́вная язы́ческая облада́вшаго, на Него́же язы́цы упова́ша.

Кня́зь ми́рный пріи́де на престо́лъ Дави́довъ, ца́рствуя изъ Тебе́, Богоро́дице, Бо́гъ воплоща́емь: О чу́до! и бра́нь разрѣ́шъ, потче́ кня́зи моави́тскія, и Тебе́ ро́ждшую Цари́цу показа́.

Сла́ва: Непоро́чную Твою́ добро́ту, отъ Нея́же Христо́съ въ пло́ть облече́ся безъ сѣ́мене, Дѣ́во, Иса́ія явля́я, зове́тъ вопія́: Госпо́дь сла́вы гряде́тъ на о́блацѣ ле́гцѣ, и пре́лести тму́ отгоня́я, просвѣти́тъ на́съ.

И ны́нѣ: Отъ Ду́ха Свя́та заче́нши Сло́во Единосу́щное Отцу́, Дѣ́во, Сіе́ родила́ еси́ во дву́ естеству́ су́ща: Бо́га соверше́нна и соверше́нна Человѣ́ка. Его́же вѣ́рою почита́емъ плотско́е явле́ніе.

Пѣ́снь 6.
Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Одръ Тя́ пѣ́сньми прему́дрый преднапису́етъ, Всепѣ́тая, на Не́мже почи́ Бо́гъ воплоща́емь во Ѵпоста́си изъ Тебе́, и просла́ви Тя́ несмѣ́сно ражда́емь.

Бы́сть Сло́ву я́ко избра́нная, Дѣ́во Всепѣ́тая, избра́нная оде́жда: я́ко порфи́ру Боже́ственную изъ Тебе́ пло́ть пріе́мь воцари́ся, боголѣ́пно одѣ́явся.

Сла́ва: Бы́сть соедине́нія Боже́ственнаго вмѣсти́лище, Богоневѣ́сто, зла́та свѣтлѣ́йши: Тобо́ю бо бы́сть Бо́гъ, я́ко человѣ́къ, и бесѣ́дова человѣ́комъ Бо́гъ, я́ко человѣ́къ.

И ны́нѣ: Умертви́ нече́ствующихъ въ Тя́, Дѣ́во Всепѣ́тая, зло́бы е́ресь, я́ко за́вистію та́ютъ, пресла́вное Твоего́ Образа ви́дяще подо́біе.

Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 3:
Отъ теплоты́ вѣ́ры вопію́ Ти, Богоро́дице, недосто́йными усты́ и скве́рнымъ се́рдцемъ: спаси́ мя, погруже́ннаго грѣха́ми, уще́дри умерщвле́ннаго отча́яніемъ, да зову́ Ти спаса́емь: ра́дуйся, Дѣ́во, христіа́номъ Помо́щнице!

Пѣ́снь 7.
Ирмо́съ: Пре́жде о́бразу злато́му, перси́дскому чти́лищу, о́троки не поклони́шася тріе́, пою́ще посредѣ́ пе́щи: отце́въ Бо́же, благослове́нъ еси́.

Купина́ и пла́мень сообра́знѣ совоку́пльшеся и нетлѣ́нна обоя́ я́вльшеся, Тя́, Дѣ́во, я́сно проявля́ютъ, и́бо родила́ еси́ Бо́га и дѣ́вствуеши.

Руно́ и роса́ Гедео́ну во измѣне́ніи образу́ема, рождество́ Твое́ предпи́шутъ: Ты́ бо Еди́на Боже́ственное Сло́во но́сиши во чре́вѣ, я́ко до́ждь, Дѣ́во Ма́ти.

Сла́ва: Грѣха́ моего́ о́гнь, па́че гее́нскаго, пла́мень мнѣ́ содѣва́етъ, сíй угаси́, Чи́стая, Твое́ю ми́лостію, покая́ніемъ мя́ ко свѣ́ту наставля́ющи.

И ны́нѣ: Твоего́ зра́ка явле́ніе, Богоро́дице Пречи́стая, чту́ще, я́ко пе́рвый о́бразъ Тя́, Засту́пницу при́сно и Покро́въ благопремѣ́ненъ къ Бо́гу и́мамы вси́.

Пѣ́снь 8.
Ирмо́съ: Вавило́нская пе́щь о́троки не опали́, ниже́ Божества́ о́гнь Дѣ́ву растли́. Тѣ́мъ со о́троки, вѣ́рніи, возопіе́мъ: благослови́те, дѣла́ Госпо́дня, Го́спода.

Тя́ Оте́цъ изво́ли Невѣ́сту Неискусобра́чную, я́ко кри́нъ пресвѣ́тлый посредѣ́ те́рнія обрѣ́тъ, свѣ́тлостію добро́ты блиста́ющую Ду́хомъ Боже́ственнымъ Сы́ну въ жили́ще.

Святѣ́йшую вы́шнихъ си́лъ, Дѣ́ву Пренепоро́чную, безъ разсужде́нія сла́влю я́вѣ: Творца́ бо си́хъ во чре́вѣ понесе́, несмѣ́снымъ соедине́ніемъ пло́ть пріе́мша отъ Тебе́.

Сла́ва: Дѣ́вство некра́домо, Дѣ́во, сохра́нши, Ма́ти яви́лася еси́ Сы́на Бо́жія вои́стинну, Отца́ благоволе́ніемъ Невѣ́ста бы́вши и Прія́телище сла́вы Ду́ха нетлѣ́нно.

И ны́нѣ: Иже естество́мъ Невеще́ственный Бо́гъ и Неви́димый, про́сто и неизрече́нно па́че естества́ ражда́ется Человѣ́къ отъ Святы́я Дѣ́вы, сугу́бъ зри́мь во Еди́ной Ѵпоста́си, въ Не́йже ви́димь е́сть писа́нми.

Пѣ́снь 9.
Ирмо́съ: Но́вое чу́до и боголѣ́пное, дѣви́ческую бо две́рь затворе́нную я́вѣ прохо́дитъ Госпо́дь, на́гъ во вхо́дѣ, и плотоно́сецъ яви́ся во исхо́дѣ Бо́гъ, и пребыва́етъ две́рь затворе́на; Сію́ неизрече́нно, я́ко Богома́терь велича́емъ.

Свята́го ко́рене Свя́тъ Пло́дъ: непло́дныя бо, освяще́нныя зако́номъ Бо́жіимъ Отчіимъ, неувяда́емую жи́знь соверша́ющую Богоро́дица Отрокови́ца процвѣте́, и ра́дуется Анна, пріе́мши Отроча́ въ ста́рости, Бо́жію Ма́терь, Юже сла́вимъ.

Но́во Рождество́ и богови́дно Свята́го Твоего́ и Богоно́снаго чре́ва, Чи́стая: въ не́мъ бо написа́ся о́бразъ въ человѣ́ка Отчіимъ пе́рстомъ, Сы́нъ вопло́щся Свя́тъ Ду́хомъ Святы́мъ. Его́же несмѣ́сно, я́ко Бо́га и Человѣ́ка, велича́емъ.

Сла́ва: Вопіе́тъ вся́къ су́дъ на мя́, дѣла́ бо грѣхо́вныхъ дѣя́ній во́пль содѣва́ютъ мнѣ́ претя́ще, и душа́ вся́ вѣ́сть, и́миже препрѣ́на бу́детъ, и трепе́щетъ пла́мене гее́нскаго. Отъ него́же пре́жде конца́ моли́твами Твои́ми изба́ви мя́, Влады́чице.

И ны́нѣ: По Рождествѣ́ яви́ся нетлѣ́нна, Чи́стая, неизмѣ́нно бо Зижди́теля всѣ́хъ пло́тію, Богоро́дице, родила́ еси́ Человѣ́ка па́че естества́, Отча Существа́ не отсту́пльша, и а́біе пребы́сть Дѣ́ва Ду́хомъ Боже́ственнымъ. Тѣ́мже сла́вяще Тя́, пѣ́снь соверша́емъ.

Та́же: Досто́йно е́сть… Трисвято́е, [по Отче на́шъ…] Конда́къ воскре́сенъ… И отпу́стъ.

ВЪ НЕДѢЛЮ УТРА, НА ПОЛУНОЩНИЦѢ,
Кано́нъ Тро́иченъ, [его́же краестро́чіе: Хвалю́, Тро́ице, Тя́, еди́но Богонача́ліе. Митрофа́ново]. Гла́съ 3.

Непостижи́мое Еди́но Господонача́ліе и Еди́но Тро́ическое Богонача́ліе, Трисія́ннаго Свѣ́та Твоего́ мя́ сподо́би, я́ко да воспою́ Тя́, пѣва́емое непреста́нно трисвяты́ми пѣ́сньми а́нгельскими усты́.

Свяще́нно невеще́ственніи вси́ чи́нове пою́тъ, я́ко твори́тельную вину́, Еди́нственную, Трисвѣ́тлую, Нача́льнѣйшую я́вѣ, Юже согла́сно пое́мъ, и человѣ́ческая мно́жества, и вѣ́рно сла́вимъ бре́нными усты́.

Сла́ва: Умъ и Сло́во и Ду́хъ богосло́вцы прили́чнѣ и знамени́тельнѣ Тебе́ нари́чутъ: безстра́стно Рождество́ отъ Нерожде́ннаго Отца́ Сы́ну зна́менающу [1], Бо́же единонача́льне всѣ́хъ, вку́пѣ и Ду́ха Боже́ственнаго исхожде́ніе.

И ны́нѣ: Яко Человѣколю́бецъ естество́мъ, человѣ́ческое существо́ пріе́мъ, Бо́жій Сло́ве, Тро́ичный возсія́лъ еси́ Единонача́льнѣйшій свѣ́тъ Еди́наго Божества́, Препросла́вленную всѣ́мъ показа́вый ро́ждшую Тя́ Дѣ́ву Пречи́стую.

Утро́ити дре́вле во́ду повелѣ́въ Илія́ на полѣ́нахъ, обра́зно прояви́ Тро́ичную Ѵпоста́сь Еди́нственнаго Бо́жія Господонача́лія.

Тлѣ́нное естество́ пое́тъ Тя́ земноро́дныхъ, Еди́наго и Трисвѣ́тлаго Созда́теля Неизмѣ́ннаго, и вопіе́тъ Ти́, Влады́ко: всеразли́чнаго мя́ премѣне́нія изба́ви и спаси́ мя.

Сла́ва: Ра́вно вѣща́юще словесе́мъ проро́ческимъ, сла́вныхъ апо́столъ же и проповѣ́дникъ вѣ́ры, равнодѣ́тельную Тя́ Тро́ицу славосло́вимъ вѣ́рніи, Бо́же всѣ́хъ.

И ны́нѣ: Съ престо́ла высо́каго сни́де Христо́съ, человѣ́ка возвыша́я, я́ко Человѣколю́бецъ, Тобо́ю, Пречи́стая, и Трисо́лнечный Свѣ́тъ всѣ́мъ возсія́.

Го́споди, поми́луй, три́жды.

По 3-й пѣ́сни сѣда́ленъ, гла́съ 3. Подо́бенъ: Красотѣ́ дѣ́вства.
Пресу́щественный и Еди́не Го́споди Христе́, и рожде́ніе Пребезнача́льнаго Отца́, и Ду́ше Боже́ственнѣйшій, поми́луй рабы́ Твоя́; вси́ бо согрѣши́хомъ, но отъ Тебе́ не отступи́хомъ. Тѣ́мже мо́лимъ Тя́, Тріѵпоста́сне Го́споди, я́ко имѣ́яй вла́сть, созда́ніе Твое́ спаси́ отъ вся́каго обстоя́нія.

Сла́ва, и ны́нѣ, богоро́диченъ:
Пресу́щественный Бо́гъ и Госпо́дь изъ Тебе́ воплоти́ся за бла́гость, Еже по на́мъ осуществова́выйся, и пребы́въ е́же бѣ́. Тѣ́мже и Богочеловѣ́ка Сего́ почита́юще, Всечи́стая, Тя́ Неискусобра́чную Богоро́дицу проповѣ́дуемъ, сла́вяще преве́ліе чу́до Твоего́ безсѣ́меннаго Рожде́нія.

Отрасль сугу́бъ отъ Отца́, я́ко отъ ко́рене, прозябе́ Сы́нъ и Ду́хъ Пра́вый, соесте́ственна прозябе́нія и богосажде́нна, и цвѣ́ти Собезнача́льніи, я́ко Тріе́мь бы́ти Свѣ́томъ Божества́. [Два́жды.]

Сла́ва: Мно́жества у́мныхъ суще́ствъ непреста́нно пою́тъ Тя́, недомы́слимаго Бо́га, съ ни́миже мы́ сла́вимъ, глаго́люще: Тро́ице Пресу́щная, Твоя́ рабы́ спаси́, я́ко Человѣколю́бецъ.

И ны́нѣ: Распали́лъ еси́ на́съ въ любо́вь Твою́, Многоми́лостиве Сло́ве Бо́жій, Иже на́съ ра́ди вопло́щся непрело́жнѣ и Трисвѣ́тлое Еди́но Божество́ та́йно научи́въ. Тѣ́мже Тя́ сла́вимъ.

Еди́наго Господонача́льника обра́зно я́ко ви́дѣ Иса́ія Бо́га, въ Тріе́хъ Ли́цѣхъ славосло́вима пречи́стыми гла́сы серафи́мъ, по́сланъ бы́сть проповѣ́дати а́біе Трисвѣ́тлое Существо́ и Еди́ницу Трисо́лнечную [Два́жды.]

Сла́ва: Яже всѣ́хъ неви́димыхъ и ви́димыхъ естество́ отъ не су́щихъ пре́жде соста́вльшая, Еди́нице Трисо́лнечная, Иже Еди́наго Тя́ Бо́га вѣ́рно воспѣва́ющихъ отъ вся́кихъ искуше́ній изба́вльши, Твоея́ сла́вы сподо́би.

И ны́нѣ: Невѣ́стникъ свѣтоно́сенъ и чи́стъ, Дѣ́во, бы́вшій Бо́жій, воспѣва́емъ Тя́ любо́вію и блажи́мъ: изъ Тебе́ бо роди́ся Христо́съ въ существа́хъ и хотѣ́ніихъ сугу́быхъ, Иже Еди́нъ отъ Тро́ицы и сла́вы сы́й Госпо́дь.

Пресе́льникъ сы́й Авраа́мъ, сподо́бися обра́зно воспрія́ти Еди́нственнаго у́бо Го́спода въ Тріе́хъ Ѵпоста́сѣхъ, пресу́щественна му́жескими же зра́ки. [Два́жды.]

Сла́ва: Напра́ви сердца́ Твои́хъ рабо́въ къ Свѣ́ту Непристу́пному, о Трисо́лнечне Го́споди, и Твоея́ сла́вы сія́ніе пода́ждь душа́мъ на́шимъ, во е́же облиста́емымъ бы́ти Твое́ю добро́тою неизрече́нною.

И ны́нѣ: Отве́рзи мнѣ́ две́ри Свѣ́та ро́ждшагося отъ утро́бы Твоея́, Пречи́стая, да зрю́ Трисвѣ́тлую лучу́ Божества́ и сла́влю Тя́, Всесвѣ́тлую Влады́чицу.

Го́споди, поми́луй, три́жды.

По 6-й пѣ́сни сѣда́ленъ, гла́съ 3. Подо́бенъ: Боже́ственныя вѣ́ры.
Боже́ственнаго Естества́ Единосу́щнаго Трисо́лнечную пое́мъ держа́ву и трисвяты́ми гла́сы возопіи́мъ: Свя́тъ еси́, Отче Пребезнача́льный, Свя́тъ еси́, Сы́не Собезнача́льный, и Ду́ше Святы́й, Еди́не Нераздѣ́льный Бо́же на́шъ и всѣ́хъ Тво́рче Человѣколю́бче.

Сла́ва, и ны́нѣ, богоро́диченъ. Подо́бенъ:
Чу́до преве́ліе! Ка́ко содержа́ся Невмѣсти́мый во чре́вѣ Твое́мъ, и воплоти́ся, и яви́ся, я́ко Человѣ́къ, не претерпѣ́вый смѣше́нія или́ раздѣле́нія Боже́ственнаго и Непрело́жнаго Божества́, Отрокови́це Всечи́стая?! Тѣ́мже Богоро́дицу Тя́ вѣ́рно проповѣ́дуемъ при́сно и сла́вимъ.

Пѣ́снь 7.
Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.

Хра́мъ мя́ покажи́ Твоего́ Божества́, Влады́ко, Трисія́ннаго, ве́сь свѣ́телъ, грѣхо́внаго омраче́нія лю́таго и страсте́й вы́шша, свѣтода́тельными Твои́ми сія́ніи, Бо́же оте́цъ на́шихъ, благослове́нъ еси́.

Божества́ зра́къ Еди́нъ возвѣща́емъ въ Тріе́хъ ѵпоста́сныхъ и раздѣ́льныхъ сво́йствахъ, Отца́, и Сы́на, и Ду́ха: благослове́нъ еси́, зову́ще, Бо́же оте́цъ на́шихъ.

Сла́ва: Яви́ся Авраа́му Бо́гъ Тріѵпоста́сный у ду́ба дре́вле Мамврíйскаго, о страннолю́біи мзду́, Исаа́ка, воздая́ за ми́лость. Его́же и ны́нѣ сла́вимъ, я́ко Бо́га оте́цъ на́шихъ.

И ны́нѣ: Яви́ся на земли́, бы́въ Человѣ́къ Вседѣ́тель, боголѣ́пно отъ дѣ́вственнаго и пречи́стаго Твоего́ чре́ва, и на́съ обожи́, Благослове́нная Всечи́стая, Богоро́дице Пречи́стая.

Пѣ́снь 8.
Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Безнача́льна Отца́, я́ко отъ ко́рене, Сло́во и Ду́хъ Собезнача́льнѣ су́ща, я́ко о́трасли Пресу́щественнаго Богонача́лія, показа́ша Тро́ицы сла́ву еди́ную и си́лу, Юже пое́мъ вси́, вѣ́рніи, во вѣ́ки. [Два́жды.]

Сла́ва: Управля́еши Твои́ми свѣтлостьми́ чи́ны небе́сныя воспѣва́ти немо́лчно трисвяты́ми пѣ́сньми Боже́ственными, Отче, Сло́ве сообра́зне, и Ду́ше, Трисвѣ́тлую Держа́ву и Равномо́щную. Тѣ́мже Тя́ пое́мъ во вся́ вѣ́ки.

И ны́нѣ: Прорече́нія проро́ческая Твое́ Рождество́ издале́ча ви́дѣвше, Богоро́дице, восхваля́ху, я́ко безъ сѣ́мене и па́че естества́ Ро́ждшагося, Влады́чице, и согла́сно Сего́ пое́мъ, я́ко Го́спода, и превозно́симъ во вся́ вѣ́ки.

Ви́дѣти сла́ву Трисія́нную богови́дніи безпло́тныхъ чи́нове я́вѣ, восходи́ти крилы́ жела́ютъ горѣ́, но говѣ́ютъ зѣло́ Непристу́пнаго Свѣ́та и пѣ́сни непреста́нно вопію́тъ. Съ ни́ми согла́сно, Еди́нственная Тро́ице, Тя́ сла́вимъ. [Два́жды.]

Сла́ва: Несы́тною любо́вію и и́же на земли́, у́мную ду́шу отъ Тебе́ пріе́мше и слове́сную, Тебе́ пои́мъ, Влады́ко, Бо́же всѣ́хъ, Еди́нственное Естество́ вои́стинну и Тро́ичное Ли́цы, отъ всего́ се́рдца. Тѣ́мже, Ще́дре, я́ко многоми́лостивъ, на́съ уще́дри.

И ны́нѣ: Хра́мъ мя́ покажи́ Единонача́льнаго и Трисвѣ́тлаго Твоего́ Богонача́лія свѣтови́денъ, чи́стѣ служи́ти Тебѣ́, Зижди́телю всѣ́хъ, и неизрече́нную Твою́ сла́ву у́мно зрѣ́ти, моли́твами Еди́ныя Богоро́дицы, Юже досто́йно, я́ко Пресла́вную, велича́емъ.

Та́же Тро́ичны Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

ВЪ НЕДѢЛЮ НА УТРЕНИ,
По шестопсалміи: Бо́гъ Госпо́дь, и яви́ся на́мъ.., на гла́съ 3. Тропа́рь воскре́сенъ: Да веселя́тся небе́сная… Сла́ва, и ны́нѣ, богоро́диченъ: Тя́, хода́тайствовавшую спасе́ніе ро́да на́шего… Та́же обы́чное стихосло́віе.

По 1-мъ стихосло́віи сѣда́ленъ, гла́съ 3:
Христо́съ отъ ме́ртвыхъ воста́, Нача́токъ усо́пшихъ, Перворожде́нъ тва́ри и Содѣ́тель всѣ́хъ бы́вшихъ, истлѣ́вшее естество́ ро́да на́шего въ Себѣ́ Само́мъ обнови́. Не ктому́, сме́рте, облада́еши, и́бо всѣ́хъ Влады́ка держа́ву твою́ разруши́.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Пло́тію сме́рти вкуси́вый, Го́споди, го́ресть сме́рти пресѣ́клъ еси́ Воста́ніемъ Твои́мъ, и человѣ́ка на ню́ укрѣпи́вый, пе́рвыя кля́твы одолѣ́ніе призыва́я. Защи́тниче жи́зни на́шея, Го́споди, сла́ва Тебѣ́.

Сла́ва, и ны́нѣ, богоро́диченъ:
Красотѣ́ дѣ́вства Твоего́ и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная!

По 2-мъ стихосло́віи сѣда́льны воскре́сны, гла́съ 3. Подо́бенъ: Красотѣ́ дѣ́вства.
Неизмѣ́ннаго Божества́ и во́льныя Стра́сти Твоея́, Го́споди, ужа́сся а́дъ, въ себѣ́ рыда́ше: трепе́щу пло́ти Нетлѣ́нныя Ѵпоста́си [2], ви́жду Неви́димаго, та́йно борю́ща мя́. Тѣ́мже и и́хже держу́, зову́тъ: сла́ва, Христе́, Воскре́сенію Твоему́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Непостижи́мое распя́тія и несказа́нное воста́нія богосло́вствуемъ, вѣ́рніи, та́инство неизрече́нное: дне́сь бо сме́рть и а́дъ плѣни́ся, ро́дъ же человѣ́ческій въ нетлѣ́ніе облече́ся. Тѣ́мъ благодаря́ще вопіе́мъ Ти́: сла́ва, Христе́, Воста́нію Твоему́.

Сла́ва, и ны́нѣ, богоро́диченъ:
Непостижи́маго и Неопи́саннаго, Единосу́щнаго Отцу́ и Ду́хови, во утро́бу Твою́ та́йно вмѣсти́ла еси́, Богоро́дице, Еди́но и Несмѣ́сно отъ Тро́ицы Божество́, позна́хомъ рождество́ Твое [3] въ мíрѣ сла́вити. Тѣ́мже и благода́рственно вопіе́мъ Ти́: ра́дуйся, Благода́тная!

По непоро́чнахъ ипакои́, гла́съ 3:
Удивля́я видѣ́ніемъ, ороша́я глаго́ланіи, блиста́яйся а́нгелъ мѵроно́сицамъ глаго́лаше: что́ Жива́го и́щете во гро́бѣ? Воста́ Истощи́вый гро́бы! Тли́ премѣни́теля разумѣ́йте Непремѣ́ннаго, рцы́те Бо́гови: ко́ль стра́шна дѣла́ Твоя́, я́ко ро́дъ спа́слъ еси́ человѣ́ческій!

Степе́нна, гла́съ 3.

Антифо́нъ 1-й, повторя́юще пое́мъ:
Плѣ́нъ Сіо́нь Ты́ изъя́лъ еси́ отъ Вавило́на, и мене́ отъ страсте́й къ животу́ привлецы́, Сло́ве.

Въ ю́гъ сѣ́ющіи слеза́ми боже́ственными, жну́тъ кла́сы ра́достію присноживо́тія.

Сла́ва: Свято́му Ду́ху вся́кое благода́ріе, я́коже Отцу́ и Сы́ну сооблиста́етъ, въ Не́мже вся́ живу́тъ и дви́жутся.
И ны́нѣ, то́йже.

Антифо́нъ 2-й:
Аще не Госпо́дь сози́ждетъ до́мъ добродѣ́телей, всу́е тружда́емся; ду́шу же покрыва́ющу, никто́же на́шъ разори́тъ гра́дъ.

Плода́ чре́вна Ду́хомъ, сынотворе́ное Тебѣ́, Христу́, я́коже и Отцу́, святíи всегда́ су́ть.

Сла́ва: Святы́мъ Ду́хомъ прозри́тся вся́кая святы́ня, прему́дрость, осуществу́етъ бо вся́кую тва́рь: Тому́ послу́жимъ, Бо́гъ бо, я́ко Отцу́ же и Сло́ву.
И ны́нѣ, то́йже.

Антифо́нъ 3-й:
Боя́щіися Го́спода блаже́ни, въ пути́ ходя́ще за́повѣдей, снѣдя́тъ бо живо́тное всепло́діе.

Окрестъ трапе́зы Твоея́ возвесели́ся, зря́ Твоя́, Пастыренача́льниче, исча́дія, нося́ща вѣ́тви благодѣ́ланія.

Сла́ва: Святы́мъ Ду́хомъ вся́кое бога́тство сла́вы, отъ Него́же благода́ть и живо́тъ вся́кой тва́ри: со Отце́мъ бо воспѣва́емь е́сть и съ Сло́вомъ.
И ны́нѣ, то́йже.

Проки́менъ, гла́съ 3: Рцы́те во язы́цѣхъ, я́ко Госпо́дь воцари́ся,* и́бо испра́ви вселе́нную, я́же не подви́жится. Сти́хъ: Воспо́йте Го́сподеви пѣ́снь но́ву… Вся́кое дыха́ніе… Сти́хъ: Хвали́те Бо́га во святы́хъ Его́… Ева́нгеліе воскре́сно, и про́чее по ря́ду. Воскре́сеніе Христо́во… Псало́мъ 50-й.

Кано́нъ воскре́сенъ, гла́съ 3:

Пѣ́снь 1.
Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Припѣ́въ: Сла́ва, Го́споди, свято́му Воскре́сенію Твоему́!

Иже зе́млю осуди́въ престу́пльшему по́томъ изнести́ плода́ те́рніе [4], отъ те́рнія вѣне́цъ изъ руки́ законопресту́пныя, Се́й Бо́гъ на́шъ, пло́тски пріе́мый, кля́тву разруши́лъ е́сть, я́ко просла́вися.

Побѣди́тель и Одолѣ́тель сме́рти, и́же сме́рти убоя́вся, яви́ся, стра́стную бо пло́ть одушевле́нную пріе́мъ, Се́й Бо́гъ на́шъ, и бра́вся съ мучи́телемъ, вся́ совоскреси́, я́ко просла́вися.

Богоро́диченъ: Истинную Богоро́дицу вси́ язы́цы сла́вятъ Тя́, безъ сѣ́мене Ро́ждшую, соше́дъ бо во утро́бу освяще́нную Твою́, Се́й Бо́гъ на́шъ, Еже по на́мъ осуществова́ся, Бо́гъ же и Человѣ́къ изъ Тебе́ роди́ся.

Другíй кано́нъ, крестовоскре́сенъ, гла́съ 3.

Пѣ́снь 1.
Ирмо́съ: Пѣ́снь но́вую пои́мъ, лю́діе, отъ Дѣ́вы Ро́ждшемуся во спасе́ніе на́ше и еди́но Сотво́ршему съ небе́сными земна́я, я́ко просла́вися.

Ро́дъ человѣ́чь, порабоще́нъ мучи́телемъ грѣхолю́бнымъ, Кро́вію Боже́ственною Христо́съ искупи́ и обоготвори́въ, обнови́лъ е́сть, я́ко просла́вися.

Яко у́бо сме́ртенъ, сме́рти хотя́й, Иже животу́ сокро́вищникъ, Христо́съ вкуси́, а я́ко безсме́ртенъ сы́й естество́мъ, ме́ртвыя оживотвори́лъ е́сть, я́ко просла́вися.

Инъ кано́нъ, Пресвятѣ́й Богоро́дицѣ, его́же краестро́чіе: Пою́ тре́тіе пѣ́ніе Тебѣ́, Богоро́дице. Гла́съ 3.

Пѣ́снь 1.
Ирмо́съ то́йже. Пѣ́снь но́вую пои́мъ, лю́діе, отъ Дѣ́вы Ро́ждшемуся во спасе́ніе на́ше и еди́но Сотво́ршему съ небе́сными земна́я, я́ко просла́вися.

Колѣ́но приклоня́етъ вся́ко естество́ небе́сныхъ, Дѣ́во, Вопло́щшемуся изъ Тебе́, со земны́ми же достолѣ́пно преиспо́дняя, я́ко просла́вися.

О, примире́ній, яже въ Тебѣ́! Благи́хъ бо незави́стно Пода́тель, я́ко Бо́гъ, Ду́ха Боже́ственнаго пода́вый на́мъ, пло́ть отъ Тебе́, Отрокови́це, прія́тъ, я́ко просла́вися.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Кресто́мъ Твои́мъ постыдѣ́ся нечести́вый, содѣ́ла бо я́му, ю́же ископа́, впаде́; смире́нныхъ же вознесе́ся, Христе́, ро́гъ во Твое́мъ Воскре́сеніи.

Благоче́стія проповѣ́даніе язы́комъ, я́ко вода́ покры́ моря́, Человѣколю́бче, воскре́съ бо отъ гро́ба, Тро́ическій откры́лъ еси́ Свѣ́тъ.

Богоро́диченъ: Пресла́вная глаго́лана бы́ша о Тебѣ́, Гра́де Одушевле́нный при́сно Ца́рствующаго, Тобо́ю бо, Влады́чице, су́щимъ на земли́ Бо́гъ спожи́лъ е́сть.

Инъ.
Ирмо́съ: Лу́къ сокруши́лъ еси́ вра́жій и щиты́ сте́рлъ еси́ крѣ́постію, Влады́ко Христе́, утвержде́ніе на́ше; Свя́тъ еси́, Го́споди.

Очище́ніе, Пречи́стый Кре́сте, и́дольскихъ яви́лся еси́ ты́ нечисто́тъ, я́ко Іису́съ Пребоже́ственный на тебѣ́ ру́цѣ распросте́рлъ е́сть.

Да вси́ вѣ́рніи, Живопріе́мный Гро́бе, тебѣ́ покланя́емся, погребе́ся бо въ тебѣ́ и воста́ Христо́съ, вои́стинну Бо́гъ на́шъ.

Инъ.
Ирмо́съ то́йже. Лу́къ сокруши́лъ еси́ вра́жій и щиты́ сте́рлъ еси́ крѣ́постію, Влады́ко Христе́, утвержде́ніе на́ше; Свя́тъ еси́, Го́споди.

Же́злъ изъ ко́рене Іессе́ова проро́чески прозя́бши, Дѣ́ва, Цвѣ́тъ Тя́, Христе́, возсія́ на́мъ. Свя́тъ еси́, Го́споди.

Да Боже́ственному прича́стію [5] земноро́дныя содѣ́лаеши, отъ Дѣ́вы пло́ть на́шу, Ты́ обнища́лъ еси́, пріе́мь. Свя́тъ еси́, Го́споди.

Язвы, Христе́, и ра́ны ми́лостивно подъя́лъ еси́, доса́ду по лани́тома ударе́ній терпя́ и долготерпѣли́внѣ оплева́нія нося́, и́миже содѣ́лалъ еси́ мнѣ́ спасе́ніе. Сла́ва си́лѣ Твое́й, Го́споди.

Тѣ́ломъ сме́ртнымъ, Животе́, сме́рти причасти́лся еси́, стра́сти ра́ди ни́щихъ и воздыха́нія убо́гихъ Твои́хъ; и растли́въ тлѣ́ющаго [6], Препросла́вленне, всѣ́хъ совоскреси́лъ еси́, я́ко просла́вися.

Богоро́диченъ: Помяни́, Христе́, е́же стяжа́лъ еси́ ста́до Стра́стію Твое́ю, Препросла́вленныя Твоея́ Ма́тере ми́лостивныя мольбы́ пріе́мь, и посѣти́въ озло́бленное, изба́ви си́лою Твое́ю, Го́споди.

Инъ.
Ирмо́съ: Стра́нна и неизрече́нна Рождества́ Твоего́ та́йна; услы́шахъ слу́хъ Тво́й и убоя́хся, и, веселя́ся, вопію́ Ти́: си́лѣ Твое́й сла́ва, Человѣколю́бче.

Созда́вый по о́бразу Твоему́, Человѣколю́бче, человѣ́ка, и умерщвле́на грѣхо́мъ преступле́нія ра́ди, распе́нся на Ло́бнѣмъ, спа́слъ еси́.

Ме́ртвыя у́бо, и́хже пожре́ сме́рть, отдаде́, разори́ся же и а́дово тлетво́рное ца́рство, воскре́сшу Ти́ изъ гро́ба, Го́споди.

Богоро́диченъ: Марíе Чи́стая, злата́я кади́льнице, неслія́нно, я́ко Еди́нъ отъ Тро́ицы, въ Тя́ соше́дъ, вопло́щься Бо́гъ Сло́во, мíръ облагоуха́лъ е́сть.

Инъ.
Ирмо́съ то́йже. Стра́нна и неизрече́нна Рождества́ Твоего́ та́йна; услы́шахъ слу́хъ Тво́й и убоя́хся, и, веселя́ся, вопію́ Ти́: си́лѣ Твое́й сла́ва, Человѣколю́бче.

Иже поста́вивый го́ры, Влады́ко, мѣ́риломъ Боже́ственнаго ра́зума, отсѣче́нъ еси́ отъ Дѣ́вы Ка́мень, кромѣ́ ру́къ. Си́лѣ Твое́й сла́ва, Человѣколю́бче.

Неду́гующее исцѣли́лъ еси́ на́ше естество́, Влады́ко, скорѣ́йшую изъ Дѣ́вы сію́[7] соедини́въ цѣльбу́, Твое́ Пречи́стое, Сло́ве, Божество́.

Ча́сть моя́ еси́, Го́споди, и наслѣ́діе жела́нное, соедини́вый мя́ изъ Дѣ́вы, Сло́ве, ѵпоста́си Твое́й, пло́тію бы́въ ѵпоста́сь.

Пѣ́снь 5.
Ирмо́съ: Къ Тебѣ́ у́тренюю, всѣ́хъ Творцу́, преиму́щему вся́къ у́мъ мíрови: зане́ свѣ́тъ повелѣ́нія Твоя́, въ ни́хже наста́ви мя́.

Судіи́ непра́ведному евре́йскою за́вистію пре́данъ бы́въ, Всеви́дче, и все́й пра́веднѣ Судя́й земли́, Ада́ма дре́вняго изба́вилъ еси́ осужде́нія.

Тво́й ми́ръ це́рквамъ Твои́мъ, Христе́, непобѣди́мою си́лою Креста́ Твоего́, изъ ме́ртвыхъ Воскресы́й, пода́ждь и спаси́ ду́ши на́ша.

Богоро́диченъ: Ски́нія свята́я и простра́ннѣйшая небе́съ, я́ко Иже во все́й тва́ри, Невмѣсти́маго Сло́ва Бо́жія пріе́мши, Еди́на яви́лася еси́, Приснодѣ́во.

Инъ.
Ирмо́съ: На земли́ Неви́димый яви́лся еси́ и человѣ́комъ во́лею сожи́лъ еси́, Непостижи́мый, и, къ Тебѣ́ у́тренююще, воспѣва́емъ Тя́, Человѣколю́бче.

Копіе́мъ въ ребро́ Твое́, о Христе́ мо́й, прободе́нъ бы́въ, отъ ребра́ человѣ́ча созда́нную, губи́тельства всѣ́мъ человѣ́комъ бы́вшую хода́таицу, кля́твы свободи́лъ еси́.

Ра́венъ Отцу́ по существу́ сы́й, свяще́нный хра́мъ пречи́стаго Твоего́ и всечестна́го Тѣлесе́ изъ ме́ртвыхъ воскреси́лъ еси́, Христе́ Спа́се на́шъ.

Инъ.
Ирмо́съ то́йже. На земли́ Неви́димый яви́лся еси́ и человѣ́комъ во́лею сожи́лъ еси́, Непостижи́мый, и, къ Тебѣ́ у́тренююще, воспѣва́емъ Тя́, Человѣколю́бче.

Сло́во Бо́жіе, Сы́нъ Тво́й, Дѣ́во, Содѣ́тель Ада́ма первозда́ннаго, не созда́ніе, а́ще и пло́ть одушевле́ную Себѣ́ изъ Тебе́ созда́лъ е́сть.

Ра́венъ Отцу́ Сы́нъ Тво́й, Дѣ́во, Сло́во Бо́жіе, ѵпоста́сь соверше́нна во двою́ естеству́, Іису́съ Госпо́дь, Бо́гъ соверше́нъ и Человѣ́къ.

Бе́здна ми́лости и щедро́тъ обы́де мя́ благоутро́бнымъ сни́тіемъ Твои́мъ, вопло́щься бо, Влады́ко, и бы́въ въ ра́біи зра́цѣ, обожи́лъ еси́, съ Собо́ю сопросла́вивъ.

Умерщвле́ніе подъя́тъ умертви́тель, Умерщвле́наго оживле́нна ви́дя. Твоего́ Воскре́сенія сíи су́ть, Христе́, о́бразы, и Стра́сти Твоея́ Пречи́стыя побѣди́тельная.

Богоро́диченъ: Пречи́стая, Яже еди́на Созда́телю и человѣ́комъ, па́че ума́ исхода́таившая! Сы́на Твоего́ ми́лостива прегрѣ́шшимъ рабо́мъ Твои́мъ и побо́рника бы́ти, помоли́ся.

Инъ.
Ирмо́съ: Селе́нія Іо́на, е́же въ преиспо́днемъ а́дѣ, есте́ственный о́бразъ бы́въ, вопія́ше: возведи́ отъ тли́ живо́тъ мо́й, Человѣколю́бче.

Ра́нами Ты́ искуси́вся, отъ а́да ура́неныхъ Стра́стію Креста́ совоскреси́лъ еси́. Тѣ́мже Ти́ зову́: возведи́ отъ тли́ живо́тъ мо́й, Человѣколю́бче.

Отверза́ются Ти́, Христе́, стра́хомъ врата́ а́дова, сосу́ды же вра́жія восхища́ются. Тѣ́мже Тя́ жены́ срѣто́ша, вмѣ́сто печа́ли ра́дость пріи́мше.

Инъ.
Ирмо́съ то́йже. Селе́нія Іо́на, е́же въ преиспо́днемъ а́дѣ, есте́ственный о́бразъ бы́въ, вопія́ше: возведи́ отъ тли́ живо́тъ мо́й, Человѣколю́бче.

Вообража́ется е́же по на́мъ отъ нетлѣ́нныя Дѣ́вы Иже о́бразомъ Неразлу́чный [8], о́бразомъ бы́въ и ве́щію, не прело́жся Божество́мъ Человѣ́къ.

Бе́здны грѣхо́въ и бу́ри страсте́й, Пречи́стая, изба́ви мя́, еси́ бо приста́нище и бе́здна чуде́съ, вѣ́рою притека́ющимъ къ Тебѣ́.

Конда́къ, гла́съ 3. Подо́бенъ: Дѣ́ва дне́сь.
Воскре́слъ еси́ дне́сь изъ гро́ба, Ще́дре, и на́съ возве́лъ еси́ отъ вра́тъ сме́ртныхъ. Дне́сь Ада́мъ лику́етъ и ра́дуется Ева, вку́пѣ же и проро́цы съ патріа́рхи воспѣва́ютъ непреста́нно Боже́ственную держа́ву вла́сти Твоея́.

Икосъ:
Не́бо и земля́ дне́сь да ликовству́ютъ и Христа́ Бо́га единому́дренно да воспѣва́ютъ, я́ко у́зники отъ гробо́въ воскреси́. Сра́дуется вся́ тва́рь, принося́щи досто́йныя пѣ́сни Созда́телю всѣ́хъ и Изба́вителю на́шему, я́ко человѣ́ки изъ а́да дне́сь, я́ко Жизнода́тель, совозве́дъ, на небеса́ совозвыша́етъ, и низлага́етъ вра́жія возноше́нія, и врата́ а́дова сокруша́етъ Боже́ственною держа́вою вла́сти Своея́.

Раздра́ся церко́вная свѣ́тлая катапета́сма [9] въ распя́тіи Содѣ́теля, сокрове́нную въ Писа́ніи явля́ющи вѣ́рнымъ и́стину, благослове́нъ еси́, зову́щимъ, Бо́же оте́цъ на́шихъ.

Прободе́ннымъ Твои́мъ ре́бромъ, ка́плями Богото́чныя Животворя́щія Кро́ве, Христе́, смотри́тельно ка́плющія на зе́млю, су́щихъ отъ земли́ возсозда́лъ еси́, благослове́нъ еси́, зову́щихъ, Бо́же оте́цъ на́шихъ.

Тро́иченъ: Ду́ха Блага́го со Отце́мъ просла́вимъ и съ Сы́номъ Единоро́днымъ, Еди́но въ Тріе́хъ, вѣ́рніи, чту́ще Нача́ло и Еди́но Божество́, благослове́нъ еси́, зову́ще, Бо́же оте́цъ на́шихъ.

Инъ.
Ирмо́съ: Го́рдый мучи́тель, но дѣте́й бы́сть игра́лище. Якоже бо пе́рсть, попра́вше седмери́чный пла́мень, поя́ху: благослове́нъ еси́, Го́споди Бо́же оте́цъ на́шихъ.

Не про́ста со́лнце на Крестѣ́ ви́сяща человѣ́ка, но Бо́га воплоще́нна зря́, помрача́ется. Ему́же и пое́мъ: благослове́нъ еси́, Го́споди, Бо́же оте́цъ на́шихъ.

Крѣ́пкаго Божество́мъ пріе́мъ а́дъ страшли́вый, нетлѣ́нія Пода́теля, ду́ши пра́ведныхъ вопію́щія изблева́, благослове́нъ еси́, Го́споди, Бо́же оте́цъ на́шихъ.

Богоро́диченъ: Сокро́вище многоцѣ́нное благослове́нія яви́лася еси́, Пречи́стая, чи́стымъ се́рдцемъ Тебе́ исповѣ́дающимъ Богороди́тельницу, и́бо изъ Тебе́ воплоти́ся Бо́гъ оте́цъ на́шихъ.

Инъ.
Ирмо́съ то́йже. Го́рдый мучи́тель, но дѣте́й бы́сть игра́лище. Якоже бо пе́рсть, попра́вше седмери́чный пла́мень, поя́ху: благослове́нъ еси́, Го́споди Бо́же оте́цъ на́шихъ.

Иже сла́вы Госпо́дь и держа́й го́рнія си́лы, Иже со Отце́мъ сѣдя́й, дѣ́вственныма рука́ма носи́мь, благослове́нъ еси́, Го́споди, Бо́же оте́цъ на́шихъ.

Яра сме́рть, но сію́ Тебѣ́ бесѣ́довавшую [10] погуби́лъ еси́, отъ Дѣ́вы Богоѵпоста́сная пло́ть бы́въ, благослове́нъ еси́, Го́споди, Бо́же оте́цъ на́шихъ.

Богоро́дицу вси́ Тя́, Бо́га ро́ждшую, увѣ́дѣхомъ, Еди́наго бо отъ Тро́ицы воплоти́вшагося изъ Тебе́ родила́ еси́. Благослове́нъ, Пречи́стая, Пло́дъ Твоего́ чре́ва!

Раздра́ся церко́вная свѣ́тлость, егда́ Кре́стъ Тво́й водрузи́ся на Ло́бнѣмъ, и тва́рь преклоня́шеся стра́хомъ, воспѣва́ющи: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Воскре́слъ еси́, Христе́, изъ гро́ба и па́дшаго прельще́ніемъ Дре́вомъ испра́вилъ еси́ Боже́ственною си́лою, зову́ща и глаго́люща: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Богоро́диченъ: Хра́мъ Бо́жій яви́лася еси́, вмѣсти́лище одушевле́нное и ковче́гъ, Творца́ бо человѣ́комъ, Богороди́тельнице Пречи́стая, примири́ла еси́, и досто́йно вся́ дѣла́ пое́мъ Тя́ и превозно́симъ во вся́ вѣ́ки.

Инъ.
Ирмо́съ: Веще́ственнаго огня́ пла́мень невеще́ственнымъ увяди́ша богозри́міи о́троцы и поя́ху: благослови́те вся́ дѣла́ Госпо́дня Го́спода.

Сло́во нестра́стное, безстра́стно у́бо Божество́мъ, стра́ждетъ же пло́тію Бо́гъ, Ему́же и пое́мъ: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Усну́вый у́бо, я́ко сме́ртенъ, воскре́слъ еси́, я́ко безсме́ртенъ, Спа́се, и спаса́еши отъ сме́рти пою́щихъ: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Тро́иченъ: Слу́жимъ благоче́стно Тріѵпоста́сному Божеству́, соединя́ему неизрече́нно, и пое́мъ: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Инъ.
Ирмо́съ то́йже. Веще́ственнаго огня́ пла́мень невеще́ственнымъ увяди́ша богозри́міи о́троцы и поя́ху: благослови́те вся́ дѣла́ Госпо́дня Го́спода.

Чи́ны у́мныя, я́ко Ма́ти, превозшла́ еси́, и бли́зъ Бо́га бы́вши. Благослови́мъ, Благослове́нная Дѣ́во, Рождество́ Твое́ и превозно́симъ во вся́ вѣ́ки.

Добро́ту есте́ственную краснѣ́йшу показа́ла еси́, облистава́ющую пло́ть Божества́. Благослови́мъ, Благослове́нная Дѣ́во, Рождество́ Твое́ и превозно́симъ во вся́ вѣ́ки.

Та́же, пѣ́снь Богоро́дицы: Вели́читъ душа́ моя́ Го́спода.., съ припѣ́вомъ: Честнѣ́йшую херуви́мъ…

Стра́шно е́сть зрѣ́ти Тебе́, Творца́, на Дре́вѣ воздви́жена, Сло́ве Бо́жій, пло́тски же стра́ждуща Бо́га за рабы́ и во гро́бѣ бездыха́нна лежа́ща, ме́ртвыя же изъ а́да разрѣши́вша. Тѣ́мже Тя́, Христе́, я́ко Всеси́льна, велича́емъ.

Изъ тли́ сме́ртныя спа́слъ еси́, Христе́, пра́отцы, положе́нъ бы́въ во гро́бѣ ме́ртвъ, и живо́тъ процвѣ́лъ еси́, ме́ртвыя воскреси́въ, руководи́въ естество́ человѣ́ческое ко свѣ́ту и въ Боже́ственное обле́къ нетлѣ́ніе. Тѣ́мже Исто́чника Тя́ свѣ́та при́сно жива́го велича́емъ.

Богоро́диченъ: Хра́мъ и престо́лъ яви́лася еси́ Бо́жій, въ о́ньже всели́ся Иже въ вы́шнихъ Сы́й; рожде́йся неискусому́жно, Всечи́стая, пло́ти Твоея́ не отве́рзъ вся́чески врата́. Тѣ́мже непреста́нными, Чи́стая, моли́твами Твои́ми язы́ки ва́рварскія ско́ро до конца́ ИМПЕРАТОРУ на́шему покори́.

Инъ.
Ирмо́съ: Сла́дкою пречи́стаго Твоего́ Рождества́ стрѣло́ю уязвле́ни, Чи́стая, Твое́й достожела́ннѣй добро́тѣ дивя́щеся, пѣ́сньми а́нгельскими досто́йно Тя́, я́ко Ма́терь Бо́жію, велича́емъ.

Че́сть человѣ́комъ отъ безче́стныя сме́рти всѣ́мъ источи́лъ еси́, ея́же распя́тіемъ Твои́мъ, Спа́се, вкуси́въ, существо́мъ сме́ртнымъ нетлѣ́ніе мнѣ́ дарова́лъ еси́, Христе́, я́ко Человѣколю́бецъ.

Спа́слъ мя́ еси́, воскре́съ изъ гро́ба, Христе́; воскре́слъ же [11] еси́ и Отцу́ приве́лъ еси́, Твоему́ Роди́телю, одесну́ю же Его́ спосади́лъ еси́ за благоутро́біе ми́лости Твоея́, Го́споди.

Инъ.
Ирмо́съ то́йже. Сла́дкою пречи́стаго Твоего́ Рождества́ стрѣло́ю уязвле́ни, Чи́стая, Твое́й достожела́ннѣй добро́тѣ дивя́щеся, пѣ́сньми а́нгельскими досто́йно Тя́, я́ко Ма́терь Бо́жію, велича́емъ.

Сы́тость Твои́хъ похва́лъ, Дѣ́во, благочести́вымъ вѣ́рнымъ отню́дъ не быва́етъ; жела́ніемъ бо жела́ніе при́сно боже́ственное и духо́вное пріе́млюще, я́ко Ма́терь Бо́жію велича́емъ.

Положи́лъ еси́ на́мъ непосты́дную Моли́твенницу, Тебе́ Ро́ждшую, Христе́. Тоя́ мольба́ми Ми́лостива подае́ши на́мъ Ду́ха, Пода́теля бла́гости, отъ Отца́ Тобо́ю происходя́ща.

По катава́сіи ектенія́. Та́же: Свя́тъ Госпо́дь Бо́гъ на́шъ… И свѣти́ленъ.

На хвали́техъ стихи́ры воскре́сны, гла́съ 3:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Пріиди́те, вси́ язы́цы, уразумѣ́йте стра́шныя та́йны си́лу: Христо́съ бо, Спа́съ на́шъ, Еже въ нача́лѣ Сло́во, распя́тся на́съ ра́ди, и во́лею погребе́ся, и воскре́се изъ ме́ртвыхъ, е́же спасти́ вся́ческая. Тому́ поклони́мся!

Сти́хъ: Хвали́те Бо́га во святы́хъ Его́, хвали́те Его́ во утверже́ніи си́лы Его́.

Повѣ́даша вся́ чудеса́ стра́жіе Твои́, Го́споди; но собо́ръ суеты́ испо́лни мздо́ю десни́цу и́хъ, скры́ти мня́ше Воскресе́ніе Твое́, е́же мíръ сла́витъ. Поми́луй на́съ!

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Ра́дости вся́ испо́лнишася, Воскресе́нія иску́съ пріи́мша. Марíя бо Магдали́на ко гро́бу пріи́де, обрѣ́те а́нгела на ка́мени сѣдя́ща, ри́зами блиста́ющася и глаго́люща: Что́ и́щете Жива́го съ ме́ртвыми? Нѣ́сть здѣ́, но воста́, я́коже рече́, предваря́я вы́ въ Галиле́и.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Во свѣ́тѣ Твое́мъ, Влады́ко, у́зримъ свѣ́тъ, Человѣколю́бче, воскре́слъ бо еси́ изъ ме́ртвыхъ, спасе́ніе ро́ду человѣ́ческому да́руяй, да Тя́ вся́ тва́рь славосло́витъ еди́наго Безгрѣ́шнаго. Поми́луй на́съ!

Ины стихи́ры анато́ліевы, гла́съ то́йже:

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Пѣ́снь у́треннюю мѵроно́сицы жены́ со слеза́ми приноша́ху Тебѣ́, Го́споди, благоуха́нія бо арома́ты иму́ща, гро́ба Твоего́ достиго́ша, Пречи́стое Тѣ́ло Твое́ пома́зати тща́щася. Ангелъ, сѣ́дяй на ка́мени, тѣ́мъ благовѣсти́: что́ и́щете Жива́го съ ме́ртвыми? Сме́рть бо попра́вый, воскре́се я́ко Бо́гъ, подая́ всѣ́мъ ве́лію ми́лость.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Блиста́яйся а́нгелъ на гро́бѣ Твое́мъ животво́рномъ, мѵроно́сицамъ глаго́лаше: истощи́вый гро́бы Изба́витель плѣни́ а́да, и воскре́се тридне́венъ, я́ко еди́нъ Бо́гъ и Всеси́ленъ.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Во гро́бѣ Тя́ иска́ше, прише́дши во еди́ну отъ суббо́тъ, Марíя Магдали́на, не обрѣ́тши же рыда́ше, съ пла́чемъ вопію́щи: увы́ мнѣ́, Спа́се мо́й, укра́денъ бы́лъ еси́, всѣ́хъ Царю́! Супру́гъ же живоно́сныхъ а́нгелъ вну́трь гро́ба вопія́ше: Что́ пла́чеши, о же́но? Пла́чу, глаго́летъ, я́ко взя́ша Го́спода моего́ отъ гро́ба, и не вѣ́мъ, гдѣ́ положи́ша Его́. Сія́ же обрати́вшися вспя́ть, я́ко ви́дѣ Тя́, а́біе возопи́: Госпо́дь мо́й и Бо́гъ мо́й, сла́ва Тебѣ́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Евре́и затвори́ша во гро́бѣ Живо́тъ, разбо́йникъ же отве́рзе язы́комъ наслажде́ніе, зовы́й и глаго́ля: Иже со мно́ю мене́ ра́ди Распны́йся сообѣ́сися ми́ на Дре́вѣ, и яви́ся мнѣ́ на престо́лѣ со Отце́мъ сѣдя́; То́й бо е́сть Христо́съ Бо́гъ на́шъ, имѣ́яй ве́лію ми́лость.

Сла́ва, стихи́ра ева́нгельская. И ны́нѣ, богоро́диченъ: Преблагослове́нна еси́, Богоро́дице Дѣ́во… Славосло́віе вели́кое.

По славосло́віи тропа́рь:
Дне́сь спасе́ніе мíру бы́сть, пое́мъ Воскре́сшему изъ гро́ба и Нача́льнику жи́зни на́шея, разруши́въ бо сме́ртію сме́рть, побѣ́ду даде́ на́мъ и ве́лію ми́лость.

И ектеніи́, и отпу́стъ.

НА ЛИТУРГІИ,
Блаже́нна, гла́съ 3:
Отве́ргшаго, Христе́, за́повѣдь Твою́ пра́отца Ада́ма изъ рая́ изгна́лъ еси́; разбо́йника же, Ще́дре, исповѣ́давша Тя́ на крестѣ́, въ о́нь всели́лъ еси́, зову́ща: помяни́ мя́, Спа́се, во Ца́рствіи Твое́мъ.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Согрѣ́шшихъ на́съ сме́ртною осуди́лъ еси́ кля́твою, Жизнода́вче и Го́споди, тѣ́ломъ же Твои́мъ безгрѣ́шне, Влады́ко, пострада́въ, сме́ртныя оживи́лъ еси́, зову́щія: помяни́ и на́съ во Ца́рствіи Твое́мъ.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Воскре́съ изъ ме́ртвыхъ, совоскреси́лъ еси́ на́съ отъ страсте́й Воскресе́ніемъ Твои́мъ, Го́споди, сме́ртную же всю́ си́лу погуби́лъ еси́, Спа́се. Сего́ ра́ди вѣ́рою Ти́ зове́мъ: помяни́ и на́съ во Ца́рствіи Твое́мъ.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Тридне́внымъ Твои́мъ погребе́ніемъ, и́же во а́дѣ умерщвле́нныя, я́ко Бо́гъ оживотвори́вый, совоздви́глъ еси́, и нетлѣ́ніе всѣ́мъ, я́ко Бла́гъ, источи́лъ еси́ на́мъ, вѣ́рою зову́щимъ всегда́: помяни́ и на́съ во Ца́рствіи Твое́мъ.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Мѵроно́сицамъ жена́мъ пе́рвѣе яви́лся еси́, воскре́съ изъ ме́ртвыхъ, Спа́се, возопи́въ: е́же ра́дуйтеся! И тѣ́ми друго́мъ Твои́мъ возвѣща́еши Воста́ніе Твое́, Христе́. Сего́ ра́ди вѣ́рою Ти́ зове́мъ: помяни́ и на́съ во Ца́рствіи Твое́мъ.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

На горѣ́ Моисе́й ру́цѣ распросте́ръ, прообразова́ше кре́стъ, Амали́ка побѣди́вый. Мы́ же, вѣ́рою того́ на бѣ́сы ору́жіе крѣ́пкое пріе́мше, вси́ зове́мъ: помяни́ и на́съ во Ца́рствіи Твое́мъ.

Сла́ва, [тро́иченъ]: Отца́ и Сы́на и Ду́ха Свята́го воспои́мъ, вѣ́рніи, Еди́наго Бо́га, Еди́наго Го́спода, я́ко отъ Еди́наго бо Со́лнца Трисія́ннаго е́сть Тро́ица *[12], и просвѣща́етъ вся́ зову́щія: помяни́ и на́съ во Ца́рствіи Твое́мъ.

И ны́нѣ, богоро́диченъ: Ра́дуйся, две́ре Бо́жія, Еюже про́йде вопло́щся Созда́тель, запеча́тану сохрани́въ Тя́; ра́дуйся, о́блаче ле́гкій, Боже́ственный До́ждь нося́й, Христа́; ра́дуйся, лѣ́ствице и престо́ле небе́сный; ра́дуйся, горо́ Бо́жія честна́я, ту́чная, несѣко́мая.

Проки́менъ, гла́съ 3: По́йте Бо́гу на́шему, по́йте,* по́йте Царе́ви на́шему, по́йте. Сти́хъ: Вси́ язы́цы, восплещи́те рука́ми, воскли́кните Бо́гу гла́сомъ ра́дованія. Аллилу́ія, [гласъ 3]: На Тя́, Го́споди, упова́хъ, да не постыжу́ся во вѣ́къ. Сти́хъ: Бу́ди ми́ въ Бо́га Защи́тителя и въ до́мъ прибѣ́жища, е́же спасти́ мя́.

Примѣчанія:
[1] Отъ нерожде́ннаго Отца́, Сы́на зна́менающе.
[2] Плотска́го неистлѣ́вша соста́ва.
[3] Еди́ну и неслія́нну Тро́ицы си́лу позна́вше Рождество́мъ Твои́мъ.
[4] По́та изнести́ пло́дъ те́рнія.
[5] Прича́стны.
[6] Растли́вшаго.
[7] Въ Дѣ́вѣ тому́.
[8] Образу Неприча́стный.
[9] Завѣ́са.
[10] Соедини́вшуся.
[11] И возне́слъ.
[12] Яко отъ Еди́наго Со́лнца, Трисія́тельна бо е́сть Тро́ица.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 174 – 189.

Свързани