НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1:
Приспѣ́ де́нь свѣ́тлаго торжества́,* мона́шествующіи, собери́теся, собо́ри:* дне́сь увѣнча́емъ пѣ́сньми похва́льными блаже́ннаго Паи́сія,* преподо́бныхъ верхо́вника, мона́шествующихъ красоту́* и по́стниковъ тве́рдое основа́ніе.
Преподо́бне о́тче Паи́сіе,* отъ пеле́нъ освяще́нъ Бо́гу бы́лъ еси́,* и, благода́ти я́влься испо́лненъ,*чудесы́ мíръ озари́лъ еси́,* и мона́шествующимъ началово́ждь бы́лъ еси́,* и ны́нѣ моли́ся Христу́* спасти́ся душа́мъ на́шимъ.
Преподо́бне о́тче Паи́сіе,* твоя́ всечестна́я па́мять* весели́тъ мона́шествующихъ ли́ки* и къ ре́вности твои́хъ боже́ственныхъ подвиго́въ* воздвиза́етъ вся́ человѣ́ки,* тѣ́мже моли́ся Христу́ о душа́хъ на́шихъ.
Преподо́бне о́тче на́шъ Паи́сіе,* ты́ на земли́, я́ко безпло́тенъ, пожи́лъ еси́,* мно́гимъ воздержа́ніемъ пло́ть умертви́лъ еси́,* и де́моновъ полки́ погуби́лъ еси́,* и ны́нѣ прише́лъ еси́ къ Свѣ́ту невече́рнему,*идѣ́же со а́нгелы лику́я,* Христа́ непреста́нно моли́ о душа́хъ на́шихъ.
Сла́ва, гла́съ 8:
Мона́ховъ мно́жества наста́вника тя́ почита́емъ, о́тче на́шъ Паи́сіе, твое́ю бо стезе́ю вои́стинну пра́во ходи́ти позна́хомъ: блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.
И ны́нѣ, богоро́диченъ, гла́съ то́йже:
Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.
На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
Отъ Еги́пта возсія́лъ еси́,* боже́ственная заря́,* вселе́нную просвѣти́лъ еси́,* блаже́нне Паи́сіе* уго́дниче Христо́въ всеизря́дне.
Сти́хъ: Честна́ предъ Го́сподемъ* сме́рть преподо́бныхъ Его́.
Весели́ся, пусты́не,* красу́йся, горо́ Нитрíйская,* я́ко въ тебѣ́ процвѣте́* небе́сный граждани́нъ,* богоблаже́нный Паи́сій.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Ра́дуйся и лику́й,* мона́шествующихъ мно́жество,* я́ко предпосла́вшее Христу́* въ по́стницѣхъ вели́каго Паи́сія,* моли́твенника о душа́хъ на́шихъ.
Сла́ва, гла́съ 3:
Пріиди́те, вси́ вѣ́рніи, поревну́имъ добродѣ́телемъ преподо́бнаго Паи́сія и уви́димъ, ка́ко се́й подвиза́ся: еди́ною въ седми́цѣ ядя́ше, и по гора́мъ, я́ко еле́нь, скача́, ра́йскія добро́ты иска́ше, ю́же ны́нѣ обрѣ́тъ, на́съ къ себѣ́ призыва́етъ. Ему́же усе́рдно послѣ́дующе, бра́тіе, вся́ земна́я оста́вимъ, и пло́ти пристра́стіе возненави́димъ, да моли́твами его́ пріи́мемъ отъ Христа́ Бо́га ве́лію ми́лость.
И ны́нѣ, богоро́диченъ, гла́съ то́йже:
Пріиди́те, вси́ вѣ́рніи, у́зримъ пресла́вное чу́до: ка́ко Бо́гъ Неви́димый воплоти́ся и яви́ся я́ко Человѣ́къ, ка́ко же, Ма́терію Дѣ́вою носи́мь, во Еги́петъ пріи́де, и крѣ́постію Свое́ю и́долы низложи́, и свѣти́льники преподо́бныя сотвори́, Его́же пою́тъ а́нгели непреста́нными гла́сы, Жизнода́вца Го́спода, спаса́ющаго ро́дъ на́шъ.
Тропа́рь пи́санъ на вели́цѣй вече́рни.
НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8:
Пріиди́те, вси́ вѣ́рніи,* пріиди́те, по́стниковъ честно́е сосло́віе,* дне́сь соста́вимъ благолѣ́пное торжество́,* дне́сь ликовству́имъ та́инственно,* въ боже́ственнѣй па́мяти отца́ на́шего Паи́сія,* и пѣ́сненно его́ воспои́мъ,* похваля́юще по́стника Христо́ва,*пусты́ннаго граждани́на:* се́й бо, ре́вность боже́ственную въ се́рдцѣ пріе́мъ,* тлѣ́нная и привре́менная и́стинно презрѣ́* и, а́ки паучи́ну и уме́ты, сія́ вмѣни́,* да пріобря́щетъ Христа́, и Ца́рствіе Его́,* и боже́ственная о́ная,* и́хже о́ко не ви́дѣ, ниже́ у́хо когда́ слы́ша.* Его́же моли́твами, Христе́ Бо́же,* спаси́ ду́ши на́ша, я́ко Человѣколю́бецъ. [Три́жды.]
Ра́дуйся, Еги́пте вѣ́рный,* ра́дуйся, Нитрíйская горо́ богоизбра́нная,* воспита́вши граждани́на небе́снаго,* Паи́сія богоно́снаго.*Се́й бо прему́дростію Свята́го Ду́ха украси́вся,* вся́ко поще́ніе въ добродѣ́тельномъ житіи́ свое́мъ показа́,* се́й свѣти́ло ду́шъ на́шихъ яви́ся,* чуде́съ заре́ю и дѣ́лъ зна́меньми* просія́въ мы́сленно во вся́ концы́.* Тѣ́мже и мы́ того́ хода́тая приводя́ще,* про́симъ умоли́ти Христа́* спасти́ся душа́мъ на́шимъ. [Три́жды.]
Кто́ изрече́тъ отъ земноро́дныхъ* чу́дное твое́ житіе́,* преподо́бне о́тче Паи́сіе,* или́ кíй язы́къ изочте́тъ болѣ́зни трудо́въ твои́хъ?* ты́ бо Сама́го Го́спода подража́я,* на Крестѣ́ пригвожде́ннаго и во гро́бѣ положе́ннаго,* заключи́лся еси́ въ пеще́рѣ, а́ки во гро́бѣ,* и, а́ки ко кресту́ пригвожда́я себе́,* тѣ́сный и приско́рбный пу́ть на земли́ ше́ствовалъ еси́.* Ны́нѣ же дости́гъ къ широтѣ́ небе́снѣй и весе́лію вѣ́чному,* со Христо́мъ ца́рствуеши,* Его́же прилѣ́жно моли́,* е́же и на́мъ прича́стникомъ бы́ти* Ца́рствія небе́снаго. [Два́жды.]
Сла́ва, гла́съ то́йже:
Преподо́бне о́тче Паи́сіе, позо́ръ бы́лъ еси́ а́нгеломъ и человѣ́комъ: а́нгелы бо терпѣ́ніемъ твои́мъ удиви́лъ еси́, человѣ́ки же ужаси́лъ еси́, я́ко вели́ко вре́мя безъ пи́щи пребы́лъ еси́. Тѣ́мже и видѣ́нія сподо́бился еси́ Самаго́ Іису́са, отъ Него́же ве́лію благода́ть чуде́съ пріе́мъ, показа́лся еси́ преподо́бныхъ ве́рхъ и по́стниковъ основа́ніе и, до́мъ Единосу́щныя Тро́ицы бы́въ, Сію́ я́сно проповѣ́далъ еси́, всѣ́хъ научи́въ въ Тріе́хъ Ли́цахъ нераздѣ́льно сла́вити Еди́наго Бо́га, Его́же моли́, преподо́бне, е́же просвѣти́ти и спасти́ ду́ши на́ша.
И ны́нѣ, богоро́диченъ: Ца́рь Небе́сный…
Вхо́дъ. Проки́менъ дне́ и чте́нія три́.
Прему́дрости Соломо́новы чте́ніе.
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́новы чте́ніе.
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́новы чте́ніе.
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
На литíи стихи́ры, гла́съ 1:
Наста́, богоно́се Паи́сіе, свѣтоно́сный тво́й пра́здникъ, и озаря́етъ мона́шествующихъ ли́ки, и безсме́ртіемъ облагоуха́етъ; тѣ́мже дне́сь, вѣ́рніи, соше́дшеся, воспѣва́емъ и ублажа́емъ любо́вію по́двиги твоя́ и моли́твенника тя́ ко Христу́ предлага́емъ о душа́хъ на́шихъ.
Гла́съ 3:
Пріиди́те, вси́ вѣ́рніи, да пра́зднуемъ свѣ́тло всечестну́ю па́мять отца́ на́шего Паи́сія: дне́сь бо раздае́тъ на́мъ да́ры безсме́ртныя, и исполня́етъ весе́лія духо́внаго, и облагоуха́етъ всѣ́хъ воне́ю Свята́го Ду́ха. Дне́сь а́нгели игра́ютъ, воспріе́мше всесвяту́ю его́ ду́шу, и апо́столи съ му́ченики и преподо́бными ликовству́ютъ, и вселе́нная вся́ свѣ́тло торжеству́етъ. Тѣ́мже и мы́, вѣ́рою соше́дшеся, псало́мски рука́ми воспле́щимъ и пѣ́сньми похва́льными увѣнча́имъ всеблаже́ннаго, моля́ще его́ прилѣ́жно моли́тися о душа́хъ на́шихъ.
Сла́ва, гла́съ 8:
На хвалу́ поте́клъ еси́ Госпо́дню, блаже́нне Паи́сіе, посто́мъ и моли́твами на вся́къ де́нь а́ки умира́я, но́выя по́двиги изобрѣта́я, ра́вное страда́льцемъ терпѣ́ніе показу́я. Сего́ ра́ди распали́лъ еси́ вѣ́рныхъ сердца́ любо́вію Христо́вою: кто́ бо, слы́шавъ безмѣ́рное твое́ поще́ніе, душе́ю не умили́ся, или́ кто́ не удиви́ся, е́же къ ни́щимъ твоему́ милосе́рдію, къ скорбя́щимъ утѣше́нію, къ грѣ́шникомъ попече́нію? Всѣ́хъ боголѣ́пно покая́нію научи́лъ еси́ и вселе́нную всю́ добродѣ́тельми озари́лъ еси́. Тѣ́мже дне́сь всечестну́ю твою́ па́мять соверша́ющимъ пода́ждь на́мъ да́ры невеще́ственныя, да вси́ тя любо́вію почита́емъ и ублажа́емъ.
И ны́нѣ, богоро́диченъ, гла́съ то́йже:
О, Ма́ти Блага́я, Госпоже́ Богоро́дице Дѣ́во! Не отри́ни на́съ, смире́нныхъ рабо́въ Твои́хъ, принося́щихъ недосто́йныя моли́твы предъ пречи́стою Твое́ю ико́ною, бу́ди те́плая Хода́таица о на́съ, грѣ́шныхъ, къ Сы́ну Твоему́, изба́ви на́съ отъ всѣ́хъ бѣ́дъ и искуше́ній, да, спаса́еми Тобо́ю, вы́ну вопіе́мъ Ти́: ра́дуйся, Блага́я Врата́рнице, две́ри ра́йскія на́мъ отверза́ющая.
На стихо́внѣ стихи́ры, гла́съ 5. Подо́бенъ: Ра́дуйся.
Ра́дуйся, свяще́ннѣйшій у́ме,* боже́ственнаго видѣ́нія при́сно наслажда́яйся* и ра́йскія добро́ты смотря́яй,* а́нгельскимъ собесѣ́дуяй ликостоя́ніемъ,* Паи́сіе преподо́бне:* житіе́ бо сіе́ на земли́ вои́стинну пра́ведно пожи́въ,* показа́лся еси́ чистоты́ нескве́рное зерца́ло,* отъ Ду́ха Свята́го просвѣща́емь,* отъ боже́ственнаго свѣтоявле́нія Христо́ва науча́емь.* Тѣ́мже моли́ся дарова́ти душа́мъ на́шимъ* ми́ръ и ве́лію ми́лость.
Сти́хъ: Честна́ предъ Го́сподемъ* сме́рть преподо́бныхъ Его́.
Ра́дуйся, чистоты́ боже́ственное сокро́вище,* сосу́де Бо́жій избра́нный,* отъ чре́ва ма́терня освяще́нный:* ты́ бо бы́лъ еси́ сто́лпъ свѣтови́денъ,* добродѣ́телію утвержде́нъ,* и о́блакъ, осѣня́ющь и предводя́й* и́же во Еги́птѣ но́ваго Изра́иля, по́стниковъ собо́ръ.* И ны́нѣ со а́нгелы лику́я,* Христа́ моли́, преподо́бне,* дарова́ти душа́мъ на́шимъ* ми́ръ и ве́лію ми́лость.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Ра́дуйся, по́стниковъ боже́ственная похвало́,* преподо́бныхъ верхо́вниче,* скорбя́щихъ боже́ственное утѣше́ніе,* Нитрíйскія горы́ украше́ніе* и всея́ вселе́нныя вели́кій свѣти́льниче,* просвѣща́я мірскíя концы́ добродѣ́тельми и чудесы́* и вся́ преводя́ къ высотѣ́ Боже́ственнаго видѣ́нія;* ра́дуйся, и́же, по Па́влу вели́кому,* на небеса́ восхище́нъ бы́лъ еси́ въ ра́й* и, неизрече́нная о́ная узрѣ́въ,* къ жела́нію тѣ́хъ мно́гія привле́клъ еси́.* Тѣ́мже ны́нѣ Христа́ моли́,* Христу́ помоли́ся, преподо́бне,* дарова́ти душа́мъ на́шимъ* ми́ръ и ве́лію ми́лость.
Сла́ва, гла́съ 8:
Кто́ изглаго́летъ боже́ственную теплоту́ души́ твоея́, блаже́нне Паи́сіе, или́ кто́ изочте́тъ болѣ́зни трудо́въ твои́хъ? Вельми́ бо Христо́вою любо́вію уязви́лся еси́, тѣ́сный и приско́рбный ра́достно ше́ствовалъ еси́ пу́ть, въ гора́хъ и пеще́рахъ живы́й во бдѣ́ніихъ, моли́твахъ и слеза́хъ, ты́ а́нгельское житіе́ на земли́ вои́стинну показа́лъ еси́ и мно́жество мона́шествующихъ ко Христу́ приве́лъ еси́, съ ни́миже ны́нѣ и со а́нгелы лику́еши, со апо́столы и проро́ки водворя́ешися, съ му́ченики и по́стники весели́шися и со всѣ́ми пра́ведными предстои́ши Христу́ Бо́гу, Его́же моли́, преподо́бне, е́же просвѣти́ти и освяти́ти ду́ши на́ша.
И ны́нѣ, богоро́диченъ, гла́съ то́йже:
Ра́дуйся, чистоты́ сокро́вище; ра́дуйся, Невеще́ственнаго Свѣ́та чи́стое жили́ще; ра́дуйся, глави́зно спасе́нія на́шего; ра́дуйся, проро́ковъ исполне́ніе; ра́дуйся, апо́столовъ проповѣ́даніе; ра́дуйся, му́чениковъ похвало́, Всенепоро́чная; ра́дуйся, подви́жниковъ и мона́ховъ украше́ніе и спасе́ніе вѣ́рныхъ.
На благослове́ніи хлѣ́бовъ: тропа́рь преподо́бнаго, два́жды, и Богоро́дице Дѣ́во.., еди́ножды.
А идѣ́же нѣ́сть всено́щнаго бдѣ́нія, на вели́цѣй вече́рни по Ны́нѣ отпуща́еши.., глаго́лемъ тропа́рь еди́ножды. Сла́ва, и ны́нѣ, богоро́диченъ воскре́сенъ.
Тропа́рь преподо́бнаго, гла́съ 1:
Пусты́нный жи́тель, и въ тѣлеси́ а́нгелъ, и чудотво́рецъ показа́лся еси́, богоно́се о́тче на́шъ Паи́сіе: посто́мъ, бдѣ́ніемъ и моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.
НА УТРЕНИ,
На Бо́гъ Госпо́дь: Тропа́рь [свята́го] два́жды. Сла́ва, и ны́нѣ, богоро́диченъ: Гавріи́лу вѣща́вшу…
По 1-мъ стихосло́віи сѣда́ленъ, гла́съ 4:
Зва́нію Го́спода твоего́ послѣ́довалъ еси́, мíръ отве́ргъ и вся́, я́же въ мíрѣ кра́сная, всеблаже́нне Паи́сіе, претерпѣ́лъ еси́ пусты́нное озлобле́ніе усе́рдно, полки́ же отрази́лъ еси́ де́моновъ му́жественнѣ. Тѣ́мже твою́ и па́мять при́сно пѣ́сньми восхваля́емъ вѣ́рно. [Два́жды.]
Сла́ва, и ны́нѣ, богоро́диченъ:
Зва́нію Сы́на Твоего́, Влады́чице, послѣ́дующе преподо́бныхъ мно́жество и Твое́ю си́лою укрѣпля́еми, Пречи́стая, побѣди́ша крѣ́пко вра́жія полки́ и мо́лятся при́сно о душа́хъ на́шихъ.
По 2-мъ стихосло́віи сѣда́ленъ, гла́съ 5:
По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ и тве́рдымъ терпѣ́ніемъ вои́стинну, и посрами́вша зѣло́ противобо́рца врага́ и всю́ его́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]
Сла́ва, и ны́нѣ, богоро́диченъ:
По́стники Твое́й чистотѣ́, Госпоже́, подража́юще, посто́мъ и моли́твами отъ страсте́й очища́ются, и, дѣ́вство держа́ще, отъ Тебе́, Богоро́дице, освяща́ются, ку́пно же съ Тобо́ю и мо́лятся, Пречи́стая, о душа́хъ на́шихъ.
По поліеле́и сѣда́ленъ, гла́съ 8:
Отъ утро́бы Бо́гу освяти́лся еси́, преподо́бне, и, на ра́мена кре́стъ тво́й взе́мъ, Христу́ усе́рдно послѣ́довалъ еси́, посто́мъ и моли́твами разсѣ́клъ еси́ мо́ре страсте́й, побѣди́въ вра́жія полки́. Тѣ́мже и къ ре́вности люде́й воздвиза́я, собра́въ мона́шествующихъ мно́жества, па́стырь и́мъ бы́лъ еси́ и пусты́ню Нитрíйскую гра́ды сотвори́лъ еси́, Паи́сіе преподо́бне. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Яко еди́ну въ жена́хъ Благослове́нную и дѣ́вамъ похвалу́ и украше́ніе, въ бра́нехъ непребори́мую по́мощь, немощны́мъ утвержде́ніе и ско́рое посѣще́ніе въ печа́ли су́щимъ иму́ще Тя́, Богоневѣ́стная Дѣ́во, дне́сь въ пречестно́мъ Твое́мъ хра́мѣ припа́даемъ и мольбы́ на́ша къ Тебѣ́ прино́симъ, я́ко да мо́лиши Христа́ Бо́га, согрѣше́ній оставле́ніе дарова́ти, благоче́стно покланя́ющимся пресвято́му Рождеству́ Твоему́.
Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе… Ева́нгеліе Матѳе́я, зача́ло 43.
По 50-мъ псалмѣ стихира, гласъ 8:
Преподо́бне о́тче Паи́сіе, [позо́ръ бы́лъ еси́ а́нгеломъ и человѣ́комъ: а́нгелы бо терпѣ́ніемъ твои́мъ удиви́лъ еси́, человѣ́ки же ужаси́лъ еси́, я́ко вели́ко вре́мя безъ пи́щи пребы́лъ еси́. Тѣ́мже и видѣ́нія сподо́бился еси́ Самаго́ Іису́са, отъ Него́же ве́лію благода́ть чуде́съ пріе́мъ, показа́лся еси́ преподо́бныхъ ве́рхъ и по́стниковъ основа́ніе и, до́мъ Единосу́щныя Тро́ицы бы́въ, Сію́ я́сно проповѣ́далъ еси́, всѣ́хъ научи́въ въ Тріе́хъ Ли́цахъ нераздѣ́льно сла́вити Еди́наго Бо́га, Его́же моли́, преподо́бне, е́же просвѣти́ти и спасти́ ду́ши на́ша].
Кано́нъ Богоро́дицы со ирмосо́мъ на 6 и преподо́бнаго на 8, его́же краегране́сіе безъ богоро́дичныхъ: Пою́ по́двиги Паи́сія Вели́каго. Гла́съ 4.
Пѣ́снь 1.
Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.
Пріиди́те, воспои́мъ вси́ богому́дрого Пои́сія, отце́въ верхо́вника, преподо́бныхъ красоту́, по́стниковъ основа́ніе, покая́нія проповѣ́дника, и душа́мъ на́шимъ засту́пника и храни́теля необори́ма, и всѣ́хъ вѣ́рныхъ утвержде́ніе.
Отъ блага́го ко́рене до́бръ пло́дъ позна́лся еси́, блаже́нне, отъ христолюби́выхъ роди́телей прозя́блъ еси́ боже́ственная вѣ́твь, нося́щая кра́сныя плоды́ добродѣ́телей, и́миже вѣ́рныхъ сердца́ благоуха́лъ еси́ и пѣ́ти научи́лъ еси́ Бо́жія чудеса́.
Юну ти́ су́щу о́троку и осиротѣ́вшу отъ отца́, ма́ти твоя́, блаже́нне, ору́жіемъ печа́ли пробода́шеся; а́біе же а́нгелъ Госпо́день во снѣ́ предста́ е́й и сѣ́тованіе разрѣши́ и тебе́, я́ко свяще́нное приноше́ніе, да́ти Бо́гу благовѣсти́, ку́пно же и научи́ пѣ́ти Бо́жія чудеса́.
Богоро́диченъ: Юна Отроча́ ражда́ется на́мъ изъ Дѣ́вы Ма́тере, Ада́ма древнѣ́йшее, Бо́гъ Сы́й Превѣ́чный и Содѣ́тель вся́ческихъ. Восхотѣ́въ вообрази́тися въ чужде́е, мíръ отъ тли́ изба́ви, и собо́ръ по́стниковъ совокупи́ небе́снымъ си́ламъ, и пѣ́ти научи́ всѣ́хъ боже́ственная Его́ чудеса́.
Пѣ́снь 3.
Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.
Позна́нъ бы́лъ еси́ отъ пеле́нъ освяще́нъ Бо́гу, Паи́сіе преподо́бне, и, взе́мъ тво́й кре́стъ, къ Нему́ поте́клъ еси́ те́плѣ жи́тельствомъ непоро́чнымъ, и воздержа́ніемъ, и житія́ свѣ́тлостію. Сего́ ра́ди всели́лся еси́ во оби́тели небе́сныя, помяни́ у́бо и на́съ, тя́ помина́ющихъ и пою́щихъ: вѣнце́въ сла́вы сподо́би.
Оте́чество твое́, сла́вне, Еги́петъ просвѣти́ся честны́мъ рождество́мъ твои́мъ, Нитрíйская гора́ освяти́ся сла́внымъ житіе́мъ твои́мъ, вся́ же вселе́нная, чудя́щися, хва́литъ па́че есте́ственныя по́двиги твоя́, вси́ же тя́ ку́пно моли́твенника ко Христу́ предлага́емъ, блаже́нне Паи́сіе.
Ди́вно показа́лъ еси́ твое́ поще́ніе, Паи́сіе, еди́нощи въ седми́цѣ яды́й, си́мъ тѣ́ло твое́ смиря́я и по́мыслы души́ укроща́я; къ сему́ же и нищету́ самово́льную Христа́ ра́ди стяжа́въ, отъ всѣ́хъ жите́йскихъ свобо́денъ пребы́лъ еси́, добродѣ́тельми же обогати́лся еси́. Тѣ́мже и на́съ, обнища́вшихъ до́брыми дѣ́лы, моли́твами твои́ми обогати́ и вѣнце́въ сла́вы сподо́би.
Богоро́диченъ: Ди́вная вели́чія на Тебѣ́ Госпо́дь сотвори́, Дѣ́во Чи́стая. Сего́ ра́ди пое́мъ Твое́ рождество́ и сла́вимъ изъ Тебе́ рожде́ннаго я́ко Бо́га же и Человѣ́ка, Его́же моли́ прилѣ́жно съ преподо́бными отцы́ и со всѣ́ми святы́ми поми́ловати ду́ши на́ша.
Сѣда́ленъ, гла́съ 8:
Красоты́ мірскíя измла́да, преподо́бне, возненави́дѣвъ, еди́наго Христа́ отъ се́рдца возлюби́лъ еси́ и, Тому́ все́ю душе́ю прилѣпи́вся, я́ко безпло́тенъ, на земли́ пожи́лъ еси́ съ пло́тію, сла́ву же мимотеку́щую и бога́тство нивочто́же вмѣни́въ, небе́сное бога́тство воспрія́лъ еси́ и сла́ву вѣ́чную. Тѣ́мже и ублажа́емъ свято́е твое́ успе́ніе и, сіе́ торжеству́юще, вопіе́мъ ти́: богоблаже́нне о́тче на́шъ Паи́сіе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.
Пѣ́снь 4.
Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.
Въ крѣ́пости свое́й вра́гъ преве́тхій, твоея́ души́ не могíй крѣ́пости поколеба́ти, ухищря́етъ любоимѣ́ніемъ тебе́ улови́ти: а́біе явля́ется христолюби́вому кня́зю во о́бразѣ а́нгела прелука́вый, мно́жество зла́та и сребра́ тебѣ́ да́ти повелѣва́яй. Ты́ же, сіе́ отри́нувъ, врага́ посрами́лъ еси́, при́сно поя́: сла́ва, Христе́, си́лѣ Твое́й.
И я́ко побѣжде́нъ бы́сть вра́гъ и ктому́ уже́ не могíй прибли́житися къ тебѣ́, оба́че, я́ко ле́въ сы́й, рыка́яй и искíй кого́ поглоти́ти, похи́ти два́ твоя́ ученика́ во іуде́йское нече́стіе: о́ваго у́бо, я́ко про́ста, сло́вомъ улови́ — еще́ не пріити́ Мессíи-Христу́; о́ваго же, увы́, и обрѣ́затися, и единому́дрствовати со іуде́и сотвори́ скверна́выя ра́ди жены́, невѣ́дущія пѣ́ти: сла́ва, Христе́, си́лѣ Твое́й.
Го́спода Бо́га милосе́рдію подража́я, преподо́бне, прише́дшаго въ мíръ грѣ́шныя спасти́, прилѣ́жно взыска́вый а́гнцы твоя́ и обрѣты́й, а́біе исхи́тилъ еси́ я́ отъ па́губнаго во́лка и Христо́ву ста́ду сочета́лъ еси́, всѣ́мъ подая́ о́бразъ покая́нія и всѣ́мъ повелѣва́я при́сно пѣ́ти: сла́ва, Христе́, си́лѣ Твое́й.
Богоро́диченъ: Господороди́тельнице, Госпоже́ Цари́це, Блага́го Бо́га ро́ждши и Сама́ Блага́я су́щи, Ты́ мнѣ́ предста́ни въ ча́съ сме́ртный, и изба́ви мя́ отъ руки́ бѣсо́вскія, и отъ го́рькихъ мыта́рствъ, и вся́каго ина́го муче́нія и сподо́би мя́ одесну́ю ста́ти Сы́на Твоего́, со всѣ́ми избра́нными Его́, въ де́нь Су́дный, моли́твами Твои́ми, Чи́стая.
Пѣ́снь 5.
Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.
Имѣ́я наставля́ющую тя́ Бо́жія Ду́ха си́лу, въ непроходи́мѣй пусты́ни живы́й, скача́, я́коже еле́нь, по гора́мъ, жела́лъ еси́, о́тче, ра́йскія добро́ты. Сего́ ра́ди не да́лъ еси́ сна́ твои́ма очи́ма, блаже́нне Паи́сіе, ни вѣ́ждома дрема́нія, до́ндеже сподо́бился еси́ пра́ведныхъ селе́нія, е́же угото́ва Бо́гъ лю́бящимъ Его́.
Посто́мъ предочи́стився и ума́ чистото́ю просвѣти́вся, восхище́нъ бы́лъ еси́ въ ра́й, узрѣ́лъ еси́ селе́нія пра́ведныхъ и оби́тели святы́хъ и пи́щи небе́сныя вкуси́лъ еси́. Тѣ́мже и на́мъ, сла́вящимъ па́мять твою́, прича́стникомъ бы́ти о́ныя моли́ся.
Ангеловъ мно́жество ви́дѣно бы́сть, сохраня́ющихъ ученики́ твоя́, и́же, тобо́ю наставля́еми, а́нгельское на земли́ подража́ху житіе́ и попира́ху си́лу вра́жію, съ ни́миже ны́нѣ почива́я во Ца́рствіи небе́снѣмъ, блаже́нне Паи́сіе, моли́ся Христу́ спасти́ся душа́мъ на́шимъ.
Богоро́диченъ: Ангеловъ святѣ́йшая вои́стинну яви́лася еси́, Влады́чице, я́ко на Него́же они́ зрѣ́ти не мо́гутъ, Ты́ Сего́ родила́ еси́ и я́ко Младе́нца на руку́ Твое́ю носи́ла еси́. Тѣ́мже моли́ Его́, я́ко Сы́на Твоего́ и Бо́га на́шего, о чту́щихъ Тя́ при́сно, съ Паи́сіемъ блаже́ннымъ.
Пѣ́снь 6.
Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.
Иже во отцѣ́хъ вели́кій Ефре́мъ, слы́шавъ боже́ственный свы́ше гла́съ, повѣ́дающь пресла́вная о тебѣ́, блаже́нне, а́біе вожделѣ́ ви́дѣти тя́. Ско́ро у́бо потече́ ко Еги́пту и, я́ко пріи́де и обрѣ́те тя́, вельми́ удиви́ся боже́ственнѣй твое́й свѣ́тлости и Ду́ха благода́ти, тѣ́мже благодаря́ще и сла́вяще Бо́га, ку́пно же и моля́шеся съ тобо́ю о душа́хъ на́шихъ.
Смире́нъ, незло́бивъ, про́стъ, кро́токъ и молчали́въ бы́лъ еси́, о́тче, па́че человѣ́ка вои́стинну. Сего́ ра́ди Кро́ткому Па́стырю — Христу́, я́ко овча́ незло́биво, усе́рдно послѣ́довалъ еси́ и, я́ко а́нгелъ, Тому́ послужи́въ, ны́нѣ со а́нгелы весели́шися на земли́ кро́ткихъ. Помина́й на́съ, чту́щихъ тя́, Паи́сіе блаже́нне.
Іису́са сла́дкаго жела́я при́сно насыща́тися кра́сныя добро́ты, въ гора́хъ и въ пеще́рахъ заключи́лся еси́, во мно́гихъ по́двизѣхъ и нищетѣ́ живы́й. Пріи́де же я́вѣ къ тебѣ́ Госпо́дь, и ума́лена тя́ зѣло́ возвели́чи, и, обнища́вша во́льнѣ Его́ ра́ди, вельми́ тя́ обогати́ небе́снымъ Ца́рствомъ, идѣ́же ны́нѣ съ Ни́мъ ца́рствуеши. Моли́ся прилѣ́жно и на́мъ въ Ца́рствіе небе́сное вни́ти.
Богоро́диченъ: Іису́са Сла́дкаго ро́ждшая, Отрокови́це Богороди́тельнице, Іису́са Всеще́драго и Человѣколюби́ваго, Іису́са еди́наго Благоутро́бнаго, Того́ моли́, Влады́чице мíра, съ по́стники и преподо́бными, поми́ловати ду́ши на́ша.
Конда́къ, гла́съ 8:
Отъ мла́да зва́нію Го́спода твоего́ послѣ́довалъ еси́ усе́рдно, блаже́нне, вся́, я́же въ мíрѣ кра́сная, Его́ ра́ди оста́вивъ. Кре́стъ тво́й на ра́мена взе́мъ, всели́лся еси́ въ пусты́ню, и, та́мо а́нгельски пожи́въ, тѣ́ло твое́ посто́мъ и моли́твами изнури́лъ еси́, и мно́гимъ пу́ть бы́лъ еси́ ко спасе́нію, вся́ возводя́ къ боже́ственнѣй высотѣ́, Паи́сіе преподо́бне, отце́въ и по́стниковъ тве́рдое основа́ніе.
Икосъ:
Пріиди́те, богоизбра́нніи мона́шествующихъ собо́ри, похва́лимъ ны́нѣ и пѣ́сньми почти́мъ свяще́нную па́мять пречу́днаго отца́, блаже́ннаго Паи́сія, взыва́юще ему́ такова́я: ра́дуйся, боголюби́выхъ роди́телей рожде́ніе; ра́дуйся, отъ самы́хъ пеле́нъ свяще́нное Бо́гу приноше́ніе; ра́дуйся, я́ко мíра сего́ вся́ кра́сная оста́вилъ еси́; ра́дуйся, я́ко къ жесто́кому житію́ себе́ напра́вилъ еси́; ра́дуйся, я́ко вся́ уме́ты бы́ти вмѣни́лъ еси́; ра́дуйся, я́ко еди́наго то́кмо Христа́ возлюби́лъ еси́; ра́дуйся, вся́ сѣ́ти вра́жія до конца́ разруши́вый; ра́дуйся, терпѣ́ніемъ по́двиговъ твои́хъ а́нгелы удиви́вый; ра́дуйся, я́ко тѣ́ло твое́ посто́мъ и бдѣ́ніемъ удручи́лъ еси́; ра́дуйся, я́ко ду́шу твою́ моли́твою и ума́ чистото́ю просвѣти́лъ еси́; ра́дуйся, безмо́лвія и пусты́ни люби́телю; ра́дуйся, по́стниковъ и мона́ховъ богому́дрый учи́телю. Ра́дуйся, Паи́сіе преподо́бне, отце́въ и по́стниковъ тве́рдое основа́ніе.
Пѣ́снь 7.
Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.
Язы́къ человѣ́чь не мо́жетъ изрещи́ по́двиги твоя́, блаже́нне, па́че бо естества́ подвиза́лся еси́, мно́гажды и надо́лзѣ безъ пи́щи пребыва́я. Сего́ ра́ди, я́ко вели́кое со́лнце, просія́лъ еси́ во вся́ мíра концы́, и ны́нѣ со а́нгелы лику́я на небесѣ́хъ, помина́й на́съ, чту́щихъ пречестну́ю па́мять твою́.
Вели́къ по́стникъ вои́стинну показа́лся еси́, преподо́бне: а́лчбою бо и жа́ждою томи́лъ еси́ пло́ть твою́, жела́я наслади́тися Небе́снаго Хлѣ́ба — Христа́, Его́же ны́нѣ, о́тче Паи́сіе, насыща́яся, и на́мъ прича́стникомъ бы́ти Онаго моли́ся.
Еди́ницу Трисвяту́ю пѣсносло́вилъ еси́, Отца́ и Сы́на и Ду́ха Всесвята́го, Тро́ицу Нераздѣ́льную, отъ Нея́же дѣ́йство чуде́съ прія́лъ еси́, е́же исцѣля́ти неду́ги разли́чныя и прогоня́ти ду́хи лука́выя, тѣ́мже па́мять твою́ почита́емъ, досточу́дне.
Богоро́диченъ: Еди́наго отъ Тро́ицы Христа́ родила́ еси́ на́мъ, Всесвята́я Дѣ́во Богороди́тельнице, и Того́ млеко́мъ пита́ла еси́, всѣ́мъ пи́щу даю́щаго, и на руку́ Твое́ю носи́ла еси́, вся́ нося́щаго, и на святы́хъ и преподо́бныхъ почива́ющаго, и вся́ Тебе́ ра́ди, Чи́стая, освяща́ющаго.
Пѣ́снь 8.
Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.
Лю́ди, невѣ́дущія Святы́я Тро́ицы, науча́емы же отъ нѣ́коего ста́рца почита́ти дво́ицу, ты́, блаже́нне, воображе́ніемъ ко́шницъ съ тремя́ ушесы́ научи́лъ еси́ та́инству Святы́я Тро́ицы, сказу́я и я́сно проповѣ́дуя всѣ́мъ, я́ко Еди́нъ Бо́гъ въ Тріе́хъ Ли́цѣхъ нераздѣ́льно сла́вится во вѣ́ки.
Иже мона́хомъ бы́лъ еси́ наста́вникъ и па́стырь овца́мъ на па́жити Бо́жія сло́ва, сугу́бу благода́ть отъ Го́спода прія́лъ еси́, Паи́сіе, и вѣнцы́ нетлѣ́нны и вѣ́чную ра́дость; и ны́нѣ лику́я, въ весе́ліи пое́ши Го́спода во вся́ вѣ́ки.
Кто́ изрече́тъ по́двиги твоя́, о всеблаже́нне Паи́сіе! Ты́ бо, я́коже безпло́тенъ, пожи́лъ еси́ на земли́ и ны́нѣ преше́лъ еси́ къ небе́снымъ во гла́сѣ ра́дованія, къ Трисо́лнечному Свѣ́ту, идѣ́же во Отцѣ́ зри́ши Сы́на и Ду́ха Всесвята́го, Тро́ицу во Еди́ницѣ, Ейже покланя́ющеся, вси́ пое́мъ во вся́ вѣ́ки.
Богоро́диченъ: Кто́ изрече́тъ на Тебѣ́ бы́вшее стра́шное та́инство, о Богороди́тельнице! Ты́ бо еди́на яви́лася еси́ во всѣ́хъ ро́дѣхъ Дѣ́ва и Ма́ти, Бо́га Сло́ва ро́ждши, дѣ́вствуеши па́ки. Тѣ́мже вси́ преподо́бніи къ Тебѣ́ прибѣга́ютъ и, дѣ́вство держа́ще, отъ Тебе́, Влады́чице, усыновле́нія ча́ютъ.
Пѣ́снь 9.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.
Ангельскому житію́ поревнова́лъ еси́, всеблаже́нне: равноа́нгельно въ Нитрíйстѣй горѣ́ пожи́лъ еси́ и Святѣ́й Тро́ицѣ въ коне́цъ угоди́лъ еси́. Тѣ́мъ и равноа́нгельну по́честь отъ Бо́га сподо́бился еси́ прія́ти: ны́нѣ со апо́столы, му́ченики, преподо́бными и со всѣ́ми пра́ведными лику́я, помина́й на́съ, чту́щихъ пречестну́ю па́мять твою́.
Го́ры и хо́лмы да взыгра́ютъ, и все́ мно́жество мона́шествующихъ да воспле́щетъ дне́сь, я́ко наста́ на́мъ свѣтоно́сный тво́й пра́здникъ, всеблаже́нне Паи́сіе, испо́лнь ра́дости и весе́лія духо́вного, испо́лнь благоуха́нія и просвѣще́нія. И ны́нѣ, иму́ще тя́ поще́нія пра́вило и законополо́жника, ра́дуемся.
Отъ ра́бъ недосто́йныхъ пріими́ хвалу́, преподо́бне Паи́сіе, и житія́ сего́ непостоя́нную пучи́ну да́руй на́мъ немяте́жно преити́, и моли́тву о на́съ къ Бо́гу сотвори́, че́стно почита́ющихъ твою́ па́мять, и одержа́щихъ и жду́щихъ на́съ зо́лъ изба́ви, да во вѣ́ки тебе́ велича́емъ.
Богоро́диченъ: Окрестъ Тебе́ предстоя́тъ преподо́бныхъ ли́ки, Пресвята́я Богоро́дице, я́ко сы́нове дне́, отъ Тебе́, и́стинныя Ма́тере Свѣ́та, усыновле́ни и, Твое́ю сла́вою крася́щеся, хва́лятъ Тя́ немо́лчными гла́сы. Ихже моли́твами и уго́дника Твоего́ Паи́сія, поми́луй на́съ, недосто́йныхъ ра́бъ Твои́хъ, и отъ всѣ́хъ злы́хъ свободи́, и Ца́рствія небе́снаго сподо́би, да во вѣ́ки Тебе́ велича́емъ, Чи́стая.
Свѣти́ленъ:
Отъ Нитрíйскія пусты́ни возсія́въ, вселе́нную просвѣща́еши, мона́ховъ мно́жества ра́дуются о твое́й па́мяти и Еги́петъ торжеству́етъ, о Паи́сіе богоно́се, не преста́й у́бо моли́тися о душа́хъ на́шихъ. [Два́жды.]
Сла́ва, и ны́нѣ, богоро́диченъ:
Облакъ ле́гкій еси́, Чи́стая, на не́мже сѣдя́, пріи́де во Еги́петъ Вседержи́тель Госпо́дь и свѣти́льники преподо́бныя содѣ́ла, съ ни́миже моли́ся, Влады́чице, спасти́ся на́мъ.
На хвали́техъ стихи́ры на 4, гла́съ 8:
Пріиди́те, празднолю́бцы и по́стниковъ сосло́віе,* дне́сь похва́льными пѣ́сньми увѣнча́имъ богоно́снаго Паи́сія,* и́стиннаго по́стника Христо́ва,* мона́шествующихъ звѣзду́, па́стырей похвалу́,* наста́вника заблу́ждшихъ,* грѣ́шниковъ вели́кое прибѣ́жище, и къ Бо́гу спору́чника,* и всѣ́хъ скорбя́щихъ боже́ственное утѣше́ніе,* къ нему́же вѣ́рою возопіи́мъ:* о всеблаже́нне, преподо́бныхъ верхо́вниче и по́стниковъ похвало́!* Ны́нѣ, со а́нгелы лику́я,* Христа́ Бо́га моли́* поми́ловати и спасти́ ду́ши на́ша. [Два́жды.]
Что́ тя нарече́мъ, Паи́сіе досточу́дне?* Ангела ли, во пло́ти су́ща,* я́ко а́нгельски на земли́ пожи́лъ еси́;* по́стника, я́ко се́дмьдесятъ дне́й безъ пи́щи пребы́лъ еси́;* страда́льца, я́ко па́че естества́ подвиза́лся еси́;* апо́стола, я́ко мно́жество мона́шествующихъ Христу́ приве́лъ еси́;* богови́дца, я́ко Сама́го Го́спода я́вѣ ви́дѣлъ еси́;* граждани́на небе́снаго, я́ко, еще́ въ тѣ́лѣ живы́й,* на небеса́ восхище́нъ бы́лъ еси́ въ ра́й.* Мно́га твоя́ имена́ и бо́льшая дарова́нія,* моли́ спасти́ся душа́мъ на́шимъ.
Ка́ко тя́ ублажи́мъ, Паи́сіе преподо́бне,* или́ кíя пѣ́сни тебѣ́ принесе́мъ?* Яко отъ Сама́го Христа́ ублажи́лся еси́,* разу́мно же и красно́ всѣ́хъ вѣ́рныхъ научи́лъ еси́,* я́ко Па́велъ, вопія́:* ны́нѣ вре́мя благопрія́тное къ подвиго́мъ духо́внымъ,* ны́нѣ де́нь спасе́нія,* да никто́же яви́тся лѣни́въ,* да никто́же яви́тся лука́въ,* да не внѣ́ пребу́детъ черто́га небе́снаго.* Но, о всеблаже́нне о́тче,* пре́жде да́же не затворя́тся две́ри о́наго,* моли́ся прилѣ́жно Христу́,* е́же всѣ́мъ на́мъ вни́ти покая́ніемъ* въ Ца́рство небе́сное.
Сла́ва, гла́съ 8:
Ра́дуйся и весели́ся, Еги́пте вѣ́рный, въ тебѣ́ бо процвѣте́ преподо́бныхъ мно́жество. Красу́йся и лику́й, Це́рковь Бо́жія, уясни́вшися свяще́нными по́двиги Паи́сія ди́внаго. Се́й у́бо человѣ́къ естество́мъ, а́нгелъ же житіе́мъ бы́сть, имя́ше у́бо я́же по естеству́, па́че же естества́ подвиза́ся. Тому́, вси́ вѣ́рніи, припа́дающе, про́симъ умоли́ти Христа́, е́же спасти́ ду́ши на́ша.
И ны́нѣ, гла́съ то́йже:
Иже на херуви́мѣхъ носи́мый и пѣва́емый отъ серафи́мъ, дне́сь въ боже́ственное святи́лище по зако́ну приноси́мь, на ста́рческихъ, я́ко на престо́лѣ, сѣди́тъ рука́хъ и отъ Іо́сифа пріе́млетъ да́ры боголѣ́пно: я́ко супру́гъ го́рличищъ — нескве́рную Це́рковь и отъ язы́къ новоизбра́нныя лю́ди; голуби́на же два́ птенца́ — я́ко Нача́льникъ Ве́тхаго же и Но́ваго. Еже къ Нему́ обѣща́нія Симео́нъ коне́цъ пріе́мъ, благословя́ Дѣ́ву Марíю Богоро́дицу, страсте́й о́бразы, Иже изъ Нея́, провозгласи́ и отъ Него́ проша́ше отпуще́нія, вопія́: ны́нѣ отпусти́ мя, Влады́ко, я́коже пре́жде возвѣсти́ ми, я́ко ви́дѣхъ Тя́, Первовѣ́чнаго Свѣ́та и Спа́са Го́спода христоимени́тымъ лю́демъ.
[Славосло́віе вели́кое. Ектеніи́ и отпу́стъ.]
НА ЛИТУРГІИ,
Слу́жба вся́ преподо́бническая: [Блаже́нна отъ кано́на свята́го, пѣ́снь 3 и 6. Проки́менъ, гла́съ 7: Честна́ предъ Го́сподемъ*сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]
Источникъ: Мине́я Ию́нь. Ча́сть втора́я. — М.: Издательскій совѣтъ Русской Православной Церкви, 2002. — С. 97-113.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.