Въ древнія времена, когда Іерусалимъ былъ подъ властію христіанскихъ государей, христіане Св. Града проводили ночь на Великую Пятницу въ общей молитвѣ. — Собравшись въ Сіонскую церковь, христіане отправлялись изъ нея крестнымъ ходомъ во главѣ съ патріархомъ и всѣмъ духовенствомъ въ церковь на горѣ Елеонской, построенную царицей Еленой на мѣстѣ, гдѣ Господь бесѣдовалъ съ апостолами предъ Своими страданіями. Эта бесѣда записана въ Евангеліи отъ Іоанна, 13 гл. 31 – 17 гл. 26 ст., каковое евангеліе, первое страстное, и прочитывалось. По прочтеніи его крестный ходъ отправлялся на мѣсто Геѳсиманской молитвы Спасителя и преданія Его Іудой и здѣсь прочитывалось евангеліе объ этомъ, — второе страстное. Затѣмъ крестный ходъ отправлялся на новыя мѣста священныхъ воспоминаній о страданіяхъ и смерти Спасителя и на каждомъ мѣстѣ прочитывалось соотвѣтствующее воспоминанію св. евангеліе. Такъ прочитывалось 11 евангелій, послѣ чего крестный ходъ возвращался въ Сіонскую церковь, гдѣ въ заключеніе прочитывалось 12-ое евангеліе о запечатаніи Гроба Господня и поставленіи стражи у него на три дня. Между евангеліями, во время крестнаго хода, христіане пѣли тѣ св. пѣснопѣнія, кои сохранились до насъ и кои поемъ и мы. Въ рукахъ у христіанъ были во время хода свѣтильники. По примѣру ихъ, и мы стоимъ во время чтенія страстныхъ евангелій съ свѣчами. Да будутъ наши молитвы къ Господу Спасителю пламенны, да горятъ наши сердца къ Нему чувствомъ благодарности и ревностью жить по Его завѣтамъ!
Слава Страстемъ Твоимъ, Господи, слава Тебѣ!
Первое евангеліе.
Отъ Іоанна гл. 13, ст. 31 – 18, ст. 1.
Рече Господь Своимъ ученикомъ: нынѣ прославися Сынъ Человѣческій, и Богъ прославися о Немъ. Аще [1] Богъ прославися о Немъ, и Богъ прославитъ Его въ Себѣ, и абіе [2] прославитъ Его. Чадца, еще съ вами мало есмь. — Взыщете Мене, и якоже рѣхъ [3] Іудеомъ: яко аможе [4] Азъ иду, вы не можете пріити: и вамъ глаголю нынѣ. Заповѣдь новую даю вамъ, да любите другъ друга: якоже возлюбихъ вы, да и вы любите себе. О семъ разумѣютъ вси, яко Мои ученицы есте, аще любовь имате между собою. Глагола Ему Симонъ Петръ: Господи, камо идеши? Отвѣща ему Іисусъ: аможе Азъ иду, не можеши нынѣ по Мнѣ ити: послѣди же по Мнѣ идеши. Глагола Ему Петръ: Господи, почто не могу нынѣ по Тебѣ ити? нынѣ душу мою за Тя положу. Отвѣща ему Іисусъ: душу ли твою за Мя положиши? аминь, аминь глаголю тебѣ: не возгласитъ алекторъ [5], дондеже [6] отвержешися Мене трищи [7]. Да не смущается сердце ваше: вѣруйте въ Бога, и въ Мя вѣруйте. Въ дому [8] Отца Моего обители многи суть: аще ли же ни, реклъ быхъ вамъ: иду уготовати мѣсто вамъ. И аще уготовлю мѣсто вамъ, паки пріиду и поиму вы къ Себѣ, да, идѣже есмь Азъ, и вы будете. И аможе Азъ иду, вѣсте, и путь вѣсте. Глагола Ему Ѳома: Господи, не вѣмы, камо идеши: и како можемъ путь вѣдѣти? Глагола ему Іисусъ: Азъ есмь путь и истина и животъ: никтоже пріидетъ ко Отцу, токмо Мною [9]. Аще Мя бысте знали и Отца Моего знали бысте убо: и отселѣ познасте Его, и видѣсте Его. Глагола Ему Филиппъ: Господи, покажи намъ Отца, и довлѣетъ [10] намъ. Глагола ему Іисусъ: толико время съ вами есмь, и не позналъ еси Мене, Филиппе? Видѣвый Мене видѣ Отца, и како ты глаголеши: покажи намъ Отца? Не вѣруеши ли, яко Азъ во Отцѣ, и Отецъ во Мнѣ есть? Глаголы, яже Азъ глаголю вамъ, о Себѣ не глаголю: Отецъ же во Мнѣ пребываяй, Той творитъ дѣла. Вѣруйте Мнѣ, яко Азъ во Отцѣ, и Отецъ во Мнѣ: аще ли же ни, за та дѣла вѣру имите Ми. Аминь, аминь глаголю вамъ: вѣруяй въ Мя, дѣла, яже Азъ творю, и той сотворитъ, и больша сихъ сотворитъ [11]: яко Азъ ко Отцу Моему гряду. И еже аще что просите отъ Отца о имени Моемъ, то сотворю, да прославится Отецъ въ Сынѣ. И аще чесо просите во имя Мое, Азъ сотворю. Аще любите Мя, заповѣди Моя соблюдите. И Азъ умолю Отца, и иного Утѣшителя [12] дастъ вамъ, да будетъ съ вами въ вѣкъ, Духъ истины, Егоже міръ [13] не можетъ пріяти, яко не видитъ Его, ниже знаетъ Его: вы же знаете Его, яко въ васъ пребываетъ и въ васъ будетъ. Не оставлю васъ сиры: пріиду къ вамъ. Еще мало, и міръ ктому не видитъ Мене: вы же видите Мя, яко Азъ живу, и вы живи будете. Въ той день разумѣете вы, яко Азъ во Отцѣ Моемъ, и вы во Мнѣ, и Азъ въ васъ. Имѣяй заповѣди Моя и соблюдаяй ихъ, той есть любяй Мя: а любяй Мя возлюбленъ будетъ Отцемъ Моимъ: и Азъ возлюблю его и явлюся ему Самъ. Глагола ему Іуда не Искаріотскій: Господи, и что бысть, яко намъ хощеши явитися, а не мірови? Отвѣща Іисусъ и рече ему: аще кто любитъ Мя, слово Мое соблюдетъ: и Отецъ Мой возлюбитъ его, и къ нему пріидема и обитель у него сотворима [14]. Не любяй Мя словесъ Моихъ не соблюдаетъ; и слово, еже слышасте, нѣсть Мое, но пославшаго Мя Отца. Сія глаголахъ вамъ, въ васъ сый. Утѣшитель же, Духъ Святый, Егоже послетъ Отецъ во имя Мое, Той вы научитъ всему [15] и воспомянетъ вамъ вся, яже рѣхъ вамъ. Миръ оставляю вамъ, миръ Мой даю вамъ: не якоже міръ даетъ, Азъ даю вамъ. Да не смущается сердце ваше, ни устрашаетъ. Слышасте, яко Азъ рѣхъ вамъ: иду и пріиду къ вамъ. Аще бысте любили Мя, возрадовалися бысте убо, яко рѣхъ: иду ко Отцу: яко Отецъ Мой болій [16] Мене есть. И нынѣ рѣхъ вамъ, прежде даже не будетъ: да егда будетъ, вѣру имете. Ктому не много глаголю съ вами: грядетъ бо сего міра князь [17], и во Мнѣ не имать ничесоже. Но да разумѣетъ міръ, яко люблю Отца, и якоже заповѣда Мнѣ Отецъ, тако творю: востаните, идемъ отсюду. Азъ есмь лоза истинная, и Отецъ Мой дѣлатель есть. Всяку розгу о Мнѣ, не творящую плода, изметъ [18] ю: и всяку, творящую плодъ, отребитъ [19] ю, да множайшій плодъ принесетъ. Уже вы чисти есте за слово, еже глаголахъ вамъ. Будите во Мнѣ, и Азъ въ васъ. Якоже розга не можетъ плода сотворити о себѣ, аще не будетъ на лозѣ: тако и вы, аще во Мнѣ не пребудете [20]. Азъ есмь лоза, вы же рождіе. И иже будетъ во Мнѣ, и Азъ въ немъ, той сотворитъ плодъ многъ: яко безъ Мене не можете творити ничесоже. Аще кто во Мнѣ не пребудетъ, извержется вонъ, якоже розга, и изсышетъ: и собираютъ ю и во огнь влагаютъ, и сгараетъ. Аще пребудете во Мнѣ, и глаголы Мои въ васъ пребудутъ: ему же аще хощете, просите, и будетъ вамъ. О семъ прославися Отецъ Мой, да плодъ многъ сотворите, и будете Мои ученицы. Якоже возлюби Мя Отецъ, и Азъ возлюбихъ васъ: будите въ любви Моей. Аще заповѣди Моя соблюдете, пребудете въ любви Моей: якоже Азъ заповѣди Отца Моего соблюдохъ, и пребываю въ Его любви. Сія глаголахъ вамъ, да радость Моя въ васъ будетъ, и радость ваша исполнится. Сія есть заповѣдь Моя, да любите другъ друга, якоже возлюбихъ вы. Больши сея любве никтоже имать, да кто душу свою положитъ за други своя. Вы друзи Мои есте, аще творите, елика Азъ заповѣдаю вамъ. Не ктому васъ глаголю рабы, яко рабъ не вѣсть, что творитъ господь его: васъ же рекохъ други, яко вся, яже слышахъ отъ Отца Моего, сказахъ вамъ. Не вы Мене избрасте, но Азъ избрахъ васъ, и положихъ, да вы идете и плодъ принесете, и плодъ вашъ пребудетъ, да, егоже аще просите отъ Отца во имя Мое, дастъ вамъ. Сія заповѣдаю вамъ, да любите другъ друга. Аще міръ васъ ненавидитъ, вѣдите, яко Мене прежде васъ возненавидѣ. Аще отъ міра бысте были, міръ убо свое любилъ бы: якоже отъ міра нѣсте, но Азъ избрахъ вы отъ міра, сего ради ненавидитъ васъ міръ. Поминайте слово, еже Азъ рѣхъ вамъ: нѣсть рабъ болій господа своего. Аще мене изгнаша, и васъ изженутъ [21]: аще слово Мое соблюдоша, и ваше соблюдутъ. Но сія вся творятъ вамъ за имя Мое, яко не вѣдятъ Пославшаго Мя. Аще не быхъ пришелъ и глаголалъ имъ, грѣха не быша имѣли: нынѣ же вины [22] не имутъ о грѣсѣ своемъ. Ненавидяй Мене, и Отца Моего ненавидитъ. Аще дѣлъ не быхъ сотворилъ въ нихъ, ихже инъ никтоже сотвори, грѣха не быша имѣли: нынѣ же и видѣша, и возненавидѣша Мене и Отца Моего. Но да сбудется слово, писанное въ законѣ ихъ [23], яко возненавидѣша Мя туне. Егда же пріидетъ Утѣшитель, Егоже Азъ послю вамъ отъ Отца, Духъ истины, Иже отъ Отца исходитъ, Той свидѣтельствуетъ о Мнѣ [24]: и вы же свидѣтельствуете, яко искони со Мною есте. Сія глаголахъ вамъ, да не соблазнитеся. Отъ сонмищъ ижденутъ вы: но пріидетъ часъ, да всякъ, иже убіетъ вы, мнится [25] службу приносити Богу. И сія сотворятъ, яко не познаша Отца, ни Мене. Но сія глаголахъ вамъ, да, егда пріидетъ часъ, поминайте се, яко Азъ рѣхъ вамъ: сихъ же вамъ исперва не рѣхъ, яко съ вами бѣхъ. Нынѣ же иду къ Пославшему Мя, и никтоже отъ васъ вопрошаетъ Мене: камо идеши? Но, яко сія глаголахъ вамъ, скорби исполнихъ сердца ваша. Но Азъ истину вамъ глаголю: уне [26] есть вамъ, да Азъ иду: аще бо не иду Азъ, Утѣшитель не пріидетъ къ вамъ: аще ли же иду, послю Его къ вамъ. И пришедъ Онъ обличитъ міръ о грѣсѣ, и о правдѣ, и о судѣ. О грѣсѣ убо, яко не вѣруютъ въ Мя: о правдѣ же, яко ко Отцу Моему иду, и ктому не видите Мене: о судѣ же, яко князь міра сего осужденъ бысть. Еще много имамъ глаголати вамъ, но не можете носити [27] нынѣ. Егда же пріидетъ Онъ, Духъ истины, наставитъ вы на всяку истину: не о Себе бо глаголати имать, но елика аще услышитъ, глаголати имать, и грядущая возвѣститъ вамъ. Онъ Мя прославитъ, яко отъ Моего пріиметъ и возвѣститъ вамъ. Вся, елика имать Отецъ, Моя суть: сего ради рѣхъ, яко отъ Моего пріиметъ и возвѣститъ вамъ. Вмалѣ, и ктому не видите Мене: и паки вмалѣ, и узрите Мя, яко иду ко Отцу. Рѣша же отъ ученикъ Его къ себѣ: что есть сіе, еже глаголетъ намъ: вмалѣ, и не видите Мене: и паки вмалѣ, и узрите Мя? и: яко Азъ иду ко Отцу? Глаголаху убо: что сіе есть, еже глаголетъ, вмалѣ? не вѣмы, что глаголетъ. Разумѣ же Іисусъ, яко хотяху Его вопрошати, и рече имъ: о семъ ли стязаетеся между собою, яко рѣхъ: вмалѣ, и не видите Мене: и паки вмалѣ, и узрите Мя? Аминь, аминь глаголю вамъ, яко восплачетеся и возрыдаете вы, а міръ возрадуется: вы же печальни будете, но печаль ваша въ радость будетъ. Жена, егда раждаетъ, скорбь имать, яко пріиде годъ ея: егда же родитъ отроча, ктому не помнитъ скорби за радость, яко родися человѣкъ въ міръ. И вы же печаль имате убо нынѣ: паки же узрю вы [28], и возрадуется сердце ваше, и радости вашея никтоже возметъ отъ васъ: и въ той день Мене не вопросите ничесоже. Аминь, аминь глаголю вамъ, яко елика аще чесо просите отъ Отца во имя Мое, дастъ вамъ. Доселѣ не просисте ничесоже во имя Мое: просите, и пріимете, да радость ваша исполнена будетъ. Сія въ притчахъ глаголахъ вамъ, но пріидетъ часъ, егда ктому въ притчахъ не глаголю вамъ, но явѣ о Отцѣ возвѣщу вамъ. Въ той день [29] во имя Мое вопросите: и не глаголю вамъ, яко Азъ умолю Отца о васъ: Самъ бо Отецъ любитъ вы, яко вы Мене возлюбисте, и вѣровасте, яко Азъ отъ Бога изыдохъ. Изыдохъ отъ Отца и пріидохъ въ міръ: и паки оставляю міръ, и иду ко Отцу. Глаголаша Ему ученицы Его: се, нынѣ не обинуяся глаголеши, а притчи никоеяже не глаголеши. Нынѣ вѣмы, яко вѣси вся, и не требуеши, да кто Тя вопрошаетъ: о семъ вѣруемъ, яко отъ Бога изшелъ еси. Отвѣща имъ Іисусъ: нынѣ ли вѣруете? Се, грядетъ часъ, и нынѣ пріиде, да разыдетеся кождо во своя, и Мене единаго оставите: и нѣсмь единъ, яко Отецъ со Мною есть. Сія глаголахъ вамъ, да во Мнѣ миръ имате. Въ мірѣ скорбни будете: но дерзайте, яко Азъ побѣдихъ міръ. Сія глагола Іисусъ, и возведе очи Свои на небо, и рече: Отче, пріиде часъ: прослави Сына Твоего, да и Сынъ Твой прославитъ Тя: яко же далъ еси Ему власть всякія плоти, да всяко, еже далъ еси Ему, дастъ имъ животъ вѣчный. Се же есть животъ вѣчный, да знаютъ Тебе единаго истиннаго Бога, и Егоже послалъ еси Іисусъ Христа. Азъ прославихъ Тя на земли, дѣло совершихъ, еже далъ еси мнѣ да сотворю. И нынѣ прослави Мя Ты, Отче, у Тебе Самаго славою, юже [30] имѣхъ у Тебе прежде міръ не бысть. Явихъ [31] имя Твое человѣкомъ, ихже далъ еси Мнѣ отъ міра: Твои бѣша, и Мнѣ ихъ далъ еси: и слово Твое сохраниша. Нынѣ разумѣша, яко вся, елика далъ еси Мнѣ, отъ Тебе суть: яко глаголы, ихже далъ еси Мнѣ, дахъ имъ: и тіи пріяша, и разумѣша воистинну, яко отъ Тебѣ изыдохъ, и вѣроваша, яко Ты Мя посла. Азъ о сихъ [32] молю, не о всемъ мірѣ молю, но о тѣхъ, ихже далъ еси Мнѣ, яко Твои суть. И Моя вся Твоя суть, и Твоя Моя: и прославихся въ нихъ. И ктому нѣсмь въ мірѣ, и сіи въ мірѣ суть, и Азъ къ Тебѣ гряду. Отче Святый, соблюди ихъ во имя Твое, ихже далъ еси Мнѣ, да будутъ едино, якоже и Мы. Егда бѣхъ съ ними въ мірѣ, Азъ соблюдахъ ихъ во имя Твое: ихже далъ еси Мнѣ сохранихъ, и никтоже отъ нихъ погибе, токмо сынъ погибельный [33], да сбудется Писаніе [34]. Нынѣ же къ Тебѣ гряду, и сія глаголю въ мірѣ, да имутъ радость Мою исполнену въ себѣ. Азъ дахъ имъ слово Твое, и міръ возненавидѣ ихъ, яко не суть отъ міра, якоже и Азъ отъ міра нѣсмь. Не молю, да возмеши ихъ отъ міра, но да соблюдеши ихъ отъ непріязни. Отъ міра не суть, якоже и Азъ отъ міра нѣсмь. Святи [35] ихъ во истину Твою: слово Твое истина есть. Якоже Мене послалъ еси въ міръ, и Азъ послахъ ихъ въ міръ: и за нихъ Азъ свящу Себе, да и тіи будутъ священи во истину. Не о сихъ же молю токмо, но и о вѣрующихъ словесе ихъ ради въ Мя: да вси едино суть: якоже Ты, Отче, во Мнѣ, и Азъ въ Тебѣ, да и тіи въ Насъ едино будутъ: да и міръ вѣру иметъ, яко Ты Мя послалъ еси. И Азъ славу, юже далъ еси Мнѣ, дахъ имъ: да будутъ едино, якоже Мы едино есма. Азъ въ нихъ, и Ты во Мнѣ: да будутъ совершени во едино, и да разумѣетъ міръ, яко Ты Мя посла, и возлюбилъ еси ихъ, якоже Мене возлюбилъ еси. Отче, ихже далъ еси Мнѣ, хощу, да идѣже есмь Азъ, и тіи будутъ со Мною: да видятъ славу Мою, юже далъ еси Мнѣ, яко возлюбилъ Мя еси прежде сложенія міра. Отче праведный, и міръ Тебе не позна, Азъ же Тя познахъ, и сіи познаша, яко Ты Мя послалъ еси: и сказахъ имъ имя Твое, и скажу: да любы, ею же Мя еси возлюбилъ, въ нихъ будетъ, и Азъ въ нихъ. И сія рекъ Іисусъ, изыде со ученики Своими на онъ полъ потока Кедрска, идѣже бѣ вертоградъ [36], въ онь же вниде Самъ и ученицы Его.
Второе евангеліе.
Отъ Іоанна гл. 18, ст. 1-28.
Во время оно, изыде Іисусъ со ученики Своими на онъ полъ потока Кедрска, идѣже бѣ вертоградъ, въ оньже вниде Самъ и ученицы Его. Вѣдяше же Іуда предаяй Его мѣсто, яко множицею собирашеся Іисусъ ту со ученики Своими. Іуда же пріемъ спиру [37], и отъ архіерей и фарисей слуги, пріиде тамо со свѣтилы и свѣщами и оружіи. Іисусъ же вѣдый вся грядущая на-Нь [38], изшедъ рече имъ: кого ищете? Отвѣщаша Ему: Іисуса Назорея. Глагола имъ Іисусъ: Азъ есмь. Стояше же и Іуда, иже предаяше Его, съ ними. Да якоже рече имъ: Азъ есмь, идоша вспять и падоша на земли. Паки же вопроси ихъ Іисусъ: кого ищете? Они же рѣша: Іисуса Назорея. Отвѣща Іисусъ: рѣхъ вамъ, яко Азъ есмь. Аще убо Мене ищете, оставите сихъ ити: да сбудется слово, еже рече: яко ихже далъ еси Мнѣ, не погубихъ отъ нихъ никогоже. Симонъ же Петръ имый ножъ, извлече его, и удари архіереова раба, и урѣза ему ухо десное. Бѣ же имя рабу Малхъ. Рече же Іисусъ Петрови: вонзи ножъ въ ножницу. Чашу, юже дастъ Мнѣ Отецъ не имамъ ли пити ея? Спира же и тысящникъ и слуги Іудейскія яша Іисуса и связаша Его, и ведоша Его ко Аннѣ первѣе: бѣ бо тесть Каіафѣ, иже бѣ архіерей лѣту тому. Бѣ же Каіафа давый совѣтъ Іудеомъ, яко уне есть единому человѣку умрети за люди. По Іисусѣ же идяше Симонъ Петръ, и другій ученикъ [39]: ученикъ же той бѣ знаемъ архіереови, и вниде со Іисусомъ во дворъ архіереовъ. Петръ же стояше при дверехъ внѣ. Изыде убо ученикъ той, иже бѣ знаемь архіереови, и рече дверницѣ, и введе Петра. Глагола же раба дверница Петрови: еда [40] и ты ученикъ еси Человѣка Сего? Глагола онъ: нѣсмь. Стояху же раби и слуги огнь сотворше, яко зима бѣ, и грѣяхуся: бѣ же съ ними Петръ стоя и грѣяся. Архіерей же вопроси Іисуса о ученицѣхъ Его и о ученіи Его. Отвѣща ему Іисусъ: Азъ не обинуяся [41] глаголахъ міру: Азъ всегда учахъ на сонмищахъ и въ церкви, идѣже всегда Іудее снемлются [42], и тай не глаголахъ ничесоже. Что Мя вопрошаеши? Вопроси слышавшихъ, что глаголахъ имъ: се [43], сіи вѣдятъ, яже рѣхъ Азъ. Сія же рекшу Ему, единъ отъ предстоящихъ слугъ удари въ ланиту Іисуса, рекъ: тако ли отвѣщаваеши архіереови? Отвѣща ему Іисусъ: аще злѣ глаголахъ, свидѣтельствуй о злѣ, аще ли добрѣ, что Мя біеши? Посла же Его Анна связана къ Каіафѣ архіереови. Бѣ же Симонъ Петръ стоя и грѣяся. Рѣша же ему [44]: еда и ты отъ ученикъ Его еси? Онъ же отвержеся и рече; нѣсмь. Глагола единъ отъ рабъ архіереовъ, южика [45] сый, емуже Петръ урѣза ухо: не азъ ли тя видѣхъ въ вертоградѣ съ нимъ? Паки убо Петръ отвержеся, и абіе пѣтелъ возгласи. Ведоша же Іисуса отъ Каіафы въ преторъ. Бѣ же утро: и тіи не внидоша въ преторъ [46], да не осквернятся, но да ядятъ пасху.
Третье евангеліе.
Отъ Матѳея гл. 26, ст. 57-75.
Во время оно, воини емше Іисуса ведоша къ Каіафѣ архіереови, идѣже книжницы и старцы собрашася. Петръ же идяше по Немъ издалеча, до двора архіереова: и вшедъ внутрь, сѣдяше со слугами, видѣти кончину. Архіерее же и старцы и сонмъ весь искаху лжесвидѣтельства на Іисуса, яко да убіютъ Его, и не обрѣтаху: и многимъ лжесвидѣтелемъ приступльшимъ, не обрѣтоша. — Послѣжде же приступиша два лжесвидѣтеля, рѣста: Сей рече: могу разорити церковь Божію и треми деньми создати ю. И воставъ архіерей рече Ему: ничесоже ли отвѣщаваеши, что сіи на Тя свидѣтельствуютъ? Іисусъ же молчаше. И отвѣщавъ архіерей, рече Ему: заклинаю Тя Богомъ Живымъ, да речеши намъ, аще Ты еси Христосъ, Сынъ Божій? Глагола ему Іисусъ: ты рече [47]. Обаче глаголю вамъ: отселѣ узрите Сына Человѣческаго, сѣдяща одесную силы и грядуща на облацѣхъ небесныхъ. Тогда архіерей растерза ризы своя, глаголя, яко хулу глагола: что еще требуемъ свидѣтелей? се, нынѣ слышасте хулу Его: что ся вамъ мнитъ? Они же отвѣщавше рѣша: повиненъ есть смерти. Тогда заплеваша лице Его и пакости Ему дѣяху: овіи же за ланиту удариша, глаголюще: прорцы намъ, Христе, кто есть ударей Тя? — Петръ же внѣ сѣдяше во дворѣ. И приступи къ нему едина рабыня, глаголющи: и ты бѣ со Іисусомъ Галилейскимъ. Онъ же отвержеся предъ всѣми, глаголя: не вѣмъ, что глаголеши. Изшедшу же ему ко вратомъ, узрѣ его другая, и глагола имъ ту: и сей бѣ со Іисусомъ Назореомъ. И паки отвержеся съ клятвою, яко не знаю Человѣка. Помалѣ же приступивше стоящіи, рѣша Петрови: воистинну и ты отъ нихъ еси, ибо бесѣда твоя явѣ тя творитъ. Тогда начатъ ротитися [48] и клятися, яко не знаю Человѣка. И абіе пѣтелъ возгласи. И помяну Петръ глаголъ Іисусовъ, реченный ему, яко прежде даже петелъ не возгласитъ, трикраты отвержешися Мене. И изшедъ вонъ, плакася горько.
Четвертое евангеліе.
Отъ Іоанна гл. 18, ст. 28 – гл. 19, ст. 16.
Во время оно, ведоша Іисуса отъ Каіафы въ преторъ. Бѣ же утро: и тіи не внидоша въ преторъ, да не осквернятся, но да ядятъ пасху. — Изыде же Пилатъ къ нимъ вонъ и рече: кую рѣчь приносите на Человѣка Сего? Отвѣщаша и рѣша ему: аще не бы былъ Сей злодѣй, не быхомъ предали Его тебѣ. Рече же имъ Пилатъ: поимите Его вы, и по закону вашему судите Ему. Рѣша же ему Іудее: намъ не достоитъ убити никогоже: да слово Іисусово сбудется, еже рече, назнаменуя, коею смертію хотяше умрети. Вниде же паки Пилатъ въ преторъ, и гласи Іисуса, и рече Ему: Ты ли еси Царь Іудейскъ? Отвѣща ему Іисусъ: о себѣ ли ты сіе глаголеши, или иніи тебѣ рекоша о Мнѣ? Отвѣща Пилатъ: еда азъ жидовинъ есмь? родъ Твой и архіерее предаша Тя мнѣ: что еси сотворилъ? Отвѣща Іисусъ: Царство Мое нѣсть отъ міра сего: аще отъ міра сего было бы Царство Мое, слуги Мои убо подвизалися быша, да не преданъ быхъ былъ Іудеомъ: нынѣ же Царство Мое нѣсть отсюду. Рече же Ему Пилатъ: убо [49] Царь ли еси Ты? Отвѣща Іисусъ: ты глаголеши, яко Царь есмь Азъ. Азъ на сіе родихся и на сіе пріидохъ въ міръ, да свидѣтельствую истину: и всякъ, иже есть отъ истины, послушаетъ гласа Моего. Глагола Ему Пилатъ: что есть истина? И сіе рекъ, паки изыде ко Іудеомъ и глагола имъ: азъ ни единыя вины обрѣтаю въ Немъ. Есть же обычай вамъ, да единаго вамъ отпущу на Пасху: хощете ли убо, да отпущу вамъ Царя Іудейска? Возопиша же паки вси, глаголюще: не Сего, но Варавву. Бѣ же Варавва разбойникъ. Тогда убо Пилатъ поятъ Іисуса и би Его. И воини, сплетше вѣнецъ отъ тернія, возложиша Ему на главу, и въ ризу багряну облекоша Его, и глаголаху: радуйся, Царю Іудейскій! и біяху Его по ланитома. Изыде же паки вонъ Пилатъ и глагола имъ: се, извожу Его вамъ вонъ, да разумѣете, яко въ Немъ ни единыя вины обрѣтаю. Изыде же вонъ Іисусъ, нося терновенъ вѣнецъ и багряну ризу. И глагола имъ: се, Человѣкъ. Егда же видѣша Его архіерее и слуги, возопиша, глаголюще: распни, распни Его. Глагола имъ Пилатъ: поимите Его вы и распните, азъ бо не обрѣтаю въ Немъ вины. Отвѣщаша ему Іудее: мы законъ имамы, и по закону нашему долженъ есть умрети, яко Себе Сына Божія сотвори. Егда же слыша Пилатъ сіе слово, паче убояся, и вниде въ преторъ паки, и глагола Іисусови: откуда еси Ты? Іисусъ же отвѣта не даде ему. Глагола же Ему Пилатъ: мнѣ ли не глаголеши? не вѣси ли, яко власть имамъ распяти Тя, и власть имамъ пустити Тя? Отвѣща Іисусъ: не имаши власти ни единыя на Мнѣ, аще не бы ти дано свыше: сего ради предавый Мя тебѣ болій грѣхъ имать. Отъ сего искаше Пилатъ пустити Его. Іудее же вопіяху, глаголюще: аще Сего пустиши, нѣси другъ кесаревъ: всякъ, иже царя себе творитъ, противится кесарю. Пилатъ же слышавъ сіе слово, изведе вонъ Іисуса, и сѣде на судищи, на мѣстѣ глаголемѣмъ лиѳостротонъ [50], еврейски же Гавваѳа. Бѣ же пятокъ пасцѣ, часъ же яко шестый. И глагола Іудеомъ: се, Царь вашъ. Они же вопіяху: возми, возми, распни Его. Глагола имъ Пилатъ: Царя ли вашего распну? Отвѣщаша архіерее: не имамы царя, токмо кесаря. Тогда же предаде Его имъ, да распнется.
Пятое евангеліе.
Отъ Матѳея гл. 27, ст. 3-32.
Во время оно, видѣвъ Іуда предавый Іисуса, яко осудиша Его, раскаявся возврати тридесять сребреники архіереемъ и старцемъ, глаголя: согрѣшихъ, предавъ Кровь неповинную. Они же рѣша: что есть намъ? ты узриши. И повергъ сребреники въ церкви, отыде, и шедъ удавися. Архіерее же пріемше сребреники, рѣша: недостойно есть вложити ихъ въ корвану [51], понеже цѣна крове есть. Совѣтъ же сотворше, купиша ими село скудельниче [52], въ погребаніе страннымъ [53]: тѣмже наречеся село то, село крове, до сего дне. Тогда сбыстся реченное Іереміемъ пророкомъ, глаголющимъ: и пріяша тридесять сребреникъ, цѣну Цѣненнаго, Егоже цѣниша отъ сыновъ Израилевъ, и даша я на селѣ скудельничи, якоже сказа мнѣ Господь [54]. Іисусъ же ста предъ игемономъ. И вопроси Его игемонъ [55], глаголя: Ты ли еси Царь Іудейскій? Іисусъ же рече ему: ты глаголеши. И егда на-Нь глаголаху архіерее и старцы, ничесоже отвѣщаваше. Тогда глагола Ему Пилатъ: не слышиши ли, колико на Тя свидѣтельствуютъ? И не отвѣща ему ни къ единому глаголу, яко дивитися игемону зѣло. На всякъ же праздникъ обычай бѣ игемону отпущати единаго народу связня, его же хотяху: имяху же тогда связана нарочита, глаголемаго Варавву. Собравшимся же имъ, рече имъ Пилатъ: кого хощете отъ обою отпущу вамъ: Варавву ли, или Іисуса, глаголемаго Христа? Вѣдяше бо, яко зависти ради предаша Его. Сѣдящу же ему на судищи, посла къ нему жена его, глаголющи: ничтоже тебѣ [56] и Праведному тому: много бо пострадахъ днесь во снѣ Его ради. Архіерее же и старцы наустиша народы, да испросятъ Варавву, Іисуса же погубятъ. Отвѣщавъ же игемонъ, рече имъ: кого хощете отъ обою отпущу вамъ? Они же рѣша: Варавву. Глагола имъ Пилатъ: что убо сотворю Іисусу, глаголемому Христу? Глаголаша ему вси: да распятъ будетъ. Игемонъ же рече: кое убо зло сотвори? Они же излиха вопіяху, глаголюще: да пропятъ будетъ. Видѣвъ же Пилатъ, яко ничтоже успѣваетъ, но паче молва бываетъ, пріемъ воду, умы руцѣ предъ народомъ, глаголя: неповиненъ есмь отъ крове Праведнаго Сего: вы узрите. И отвѣщавше вси людіе рѣша: Кровь Его на насъ и на чадѣхъ нашихъ. Тогда отпусти имъ Варавву: Іисуса же бивъ, предаде имъ, да Его пропнутъ. Тогда воини игемоновы, пріемше Іисуса на судище, собраша на-Нь все множество воинъ: и совлекше Его, одѣяша Его хламидою червленою: и сплетше вѣнецъ отъ тернія, возложиша на главу Его, и трость въ десницу Его: и поклоньшеся на колѣну предъ Нимъ, ругахуся Ему, глаголюще: радуйся, Царю Іудейскій. И плюнувше на-Нь, пріяша трость, и біяху по главѣ Его. И егда поругашася Ему, совлекоша съ Него багряницу и облекоша Его въ ризы Его: и ведоша Его на пропятіе. Исходяще же обрѣтоша человѣка Киринейска, именемъ Симона: и сему задѣша понести крестъ Его.
Шестое евангеліе.
Отъ Марка гл. 15, ст. 16-32.
Во время оно, воини ведоша Іисуса внутрь двора, еже есть преторъ: и созваша всю спиру. И облекоша Его въ препряду [57], и возложиша на Него сплетше терновъ вѣнецъ. И начаша цѣловати Его и глаголати: радуйся, Царю Іудейскій. И біяху Его по главѣ тростію и плюваху на Него: и прегибающе колѣна покланяхуся Ему. И егда поругашася Ему, совлекоша съ Него препряду и облекоша Его въ ризы Своя: и изведоша Его, да пропнутъ Его. И задѣша мимоходящу нѣкоему Симону Киринею, грядущу съ села, отцу Александрову и Руфову [58], да возметъ крестъ Его. И приведоша Его на Голгоѳу мѣсто, еже есть сказаемо, Лобное мѣсто. И даяху Ему пити есмѵрнисмено вино [59]. Онъ же не пріятъ. И распеншіи Его раздѣлиша ризы Его, метающе жребій о нихъ, кто что возметъ. Бѣ же часъ третій, и распяша Его. И бѣ написаніе вины Его написано: Царь Іудейскъ. И съ Нимъ распяша два разбойника: единаго одесную и единаго ошуюю Его. И сбыстся Писаніе, еже глаголетъ: и со беззаконными вмѣнися. И мимоходящіи хуляху Его, покивающе главами своими и глаголюще: уа [60], разоряяй церковь и треми деньми созидаяй: спасися Самъ и сниди со креста. Такожде и архіерее, ругающееся, другъ ко другу съ книжники, глаголаху: ины спасе, Себе ли не можетъ спасти? Христосъ, Царь Израилевъ, да снидетъ нынѣ со креста, да видимъ, и вѣру имемъ Ему.
Седьмое евангеліе.
Отъ Матѳея гл. 27, ст. 34-54.
Во время оно, пришедше воини на мѣсто нарицаемое Голгоѳа, еже есть Краніево мѣсто [61]: и даша Іисусу пити оцетъ съ желчію смѣшенъ: и вкушь не хотяше пити. Распеншіи же Его раздѣлиша ризы Его, вергше жребія: и сѣдяще стрежаху Его ту: и возложиша верху главы Его вину Его написану: Сей есть Іисусъ, Царь Іудейскій. Тогда распяша съ Нимъ два разбойника: единаго одесную и единаго ошуюю. Мимоходящіи же хуляху Его, покивающе главами своими и глаголюще: разоряяй церковь и треми деньми созидаяй, спасися Самъ: аще Сынъ еси Божій, сниди со креста. Такожде же и архіерее, ругающеся съ книжники и старцы и фарисеи глаголаху: иныя спасе, Себе ли не можетъ спасти? аще Царь Израилевъ есть, да снидетъ нынѣ со креста, и вѣруемъ въ Него. Упова на Бога: да избавитъ нынѣ Его, аще хощетъ Ему. Рече бо, яко Божій есмь Сынъ. Тожде же и разбойника распятая съ Нимъ поношаста Ему. Отъ шестаго же часа тма бысть по всей земли до часа девятаго. О девятомъ же часѣ возопи Іисусъ гласомъ веліимъ, глаголя: Или, Или, лима савахѳани? еже есть: Боже Мой, Боже Мой, вскую [62] Мя еси оставилъ? Нѣцыи же отъ ту стоящихъ, слышавше, глаголаху, яко Илію глашаетъ Сей: и абіе текъ единъ Отъ нихъ, и пріемь губу, исполнивъ же оцта, и вонзе на трость, напояше Его. Прочіи же глаголаху: остави, да видимъ, аще пріидетъ Илія спасти Его. Іисусъ же, паки возопивъ гласомъ веліимъ, испусти духъ. И се, завѣса церковная раздрася на двое съ вышняго края до нижняго: и земля потрясеся, и каменіе распадеся: и гроби отверзошася: и многа тѣлеса усопшихъ святыхъ восташа, и изшедше изъ гробъ, по воскресеніи Его, внидоша во святый градъ и явишася мнозѣмъ. Сотникъ же и иже съ нимъ стрегущіи Іисуса, видѣвше трусъ и бывшая, убояшася зѣло, глаголюще: воистинну Божій Сынъ бѣ Сей.
Восьмое евангеліе.
Отъ Луки гл. 23, ст. 32-49.
Во время оно, ведяху со Іисусомъ и ина два злодѣя съ Нимъ убити. И егда пріидоша на мѣсто, нарицаемое Лобное, ту распяша Его и злодѣя, оваго убо одесную, а другаго ошуюю, Іисусъ же глаголаше: Отче, отпусти имъ: не вѣдятъ бо, что творятъ. Раздѣляюще же ризы Его, метаху жребія. И стояху людіе зряще. Ругахуся же и князи съ ними, глаголюще: иныя спасе, да спасетъ и Себе, аще Той есть Христосъ Божій избранный. Ругахуся же Ему и воини, приступающе и оцетъ придѣюще Ему, и глаголаху: аще Ты еси Царь Іудейскъ, спасися Самъ. — Бѣ же и написаніе написано надъ Нимъ писмены Еллинскими и Римскими и Еврейскими: Сей есть Царь Іудейскъ. Единъ же отъ обѣшеною злодѣю хуляше Его, глаголя: аще Ты еси Христосъ, спаси Себе и наю. — Отвѣщавъ же другій, прещаше ему, глаголя: ни ли ты боишися Бога, яко въ томже осужденъ еси? И мы убо въ правду: достойная бо по дѣломъ наю [63] воспріемлева: Сей же ни единаго зла сотвори. — И глаголаше Іисусови: помяни мя, Господи, егда пріидеши во Царствіи си [64]. И рече ему Іисусъ: аминь глаголю тебѣ, днесь со Мною будеши въ раи. Бѣ же часъ яко шестый, и тма бысть по всей земли до часа девятаго: и померче солнце, и завѣса церковная раздрася посредѣ. И возглашь гласомъ веліимъ Іисусъ, рече: Отче, въ руцѣ Твои предаю духъ Мой. И сія рекъ, издше [65]. — Видѣвъ же сотникъ бывшее, прослави Бога, глаголя: воистинну Человѣкъ Сей праведенъ бѣ. — И вси пришедшіи наради на позоръ [66] сей, видяще бывающая, біюще перси своя, возвращахуся. — Стояху же вси знаеміи Его издалеча, и жены спослѣдствовавшія Ему отъ Галилеи, зряще сія.
Канонъ.
Пѣснь 5.
Къ Тебѣ утренюю, милосердія ради Себе истощившему [67] непреложно и до страстей безстрастно преклоншемуся, Слове Божій: миръ подаждь ми падшему, Человѣколюбче.
Припѣвъ: Слава Тебѣ, Боже нашъ, слава Тебѣ.
Умывше ноги и предочистившеся таинства причащеніемъ Божественнаго нынѣ, Христе, Твоего, служителіе отъ Сіона на Елеонскую гору великую съ Тобою взыдоша, поюще Тя, Человѣколюбче.
Зрите, реклъ еси, друзи, не бойтеся: нынѣ бо приближися часъ яту [68] Ми быти и убіену рукама беззаконныхъ: вси же расточитеся [69], Мене оставивше, ихже соберу проповѣдати Мя, Человѣколюбца.
Пѣснь 8.
Столбъ злобы богопротивныя Божественніи отроцы обличиша: на Христа же шатающееся беззаконныхъ соборище совѣтуетъ тщетная, убити поучается животъ Держащаго дланію, Егоже вся тварь благословитъ, славящи во вѣки [70].
Отъ вѣждей, ученикомъ, нынѣ сонъ, реклъ еси, Христе, оттрясите: въ молитвѣ же бдите, да не въ напасть внидете и наипаче Симоне: крѣпчайшему бо болій искусъ: разумѣй Мя, Петре, Егоже вся тварь благословитъ, славящи во вѣки.
Скверна слова устенъ никогда же изреку Тебѣ, Владыко: съ Тобою умру, яко благоразуменъ, аще и вси отвергутся, возопи Петръ: ни плоть, ниже кровь, но Отецъ Твой откры ми Тя, Егоже вся тварь благословитъ, славящи во вѣки.
Глубину премудрости Божественныя и разума не всю испыталъ еси, бездну же Моихъ судебъ не постиглъ еси, человѣче, Господь рече: плоть убо сый, не хвалися: трижды бо отвержешися Мене, Его же вся тварь благословитъ, славящи во вѣки.
Отрицаешися, Симоне Петре, еже сотвориши скоро, якоже речеся [71], и къ тебѣ отроковица едина пришедши устрашитъ тя, Господь рече: горцѣ [72] прослезивъ, обрящеши Мя обаче [73] милостива, Егоже вся тварь благословитъ, славящи во вѣки.
Пѣснь 9.
Честнѣйшую Херувимъ и славнѣйшую безъ сравненія Серафимъ, безъ истлѣнія Бога Слова рождшую, сущую Богородицу Тя величаемъ.
Пагубное соборище богомерзкихъ лукавнующихъ богоубійцъ сонмище предста, Христе, Тебѣ, и яко неправедника влечаше Зиждителя всѣхъ, Его же величаемъ.
Закона не разумѣюще нечестивіи, гласомъ пророческимъ поучающеся вотще [74], яко овча влечаху Тя, всѣхъ Владыку, неправедно заклати, Егоже величаемъ.
Языкомъ изданную Жизнь съ книжники убити священницы предаху [75], уязвлени самозавистною злобою, естествомъ Животодавца, Егоже величаемъ.
Обыдоша яко пси мнози, и удариша, Царю [76], ланиту Твою заушеніемъ: вопрошаху Тя, Тебе же ложна свидѣтельствоваху: и вся претерпѣвъ, всѣхъ спаслъ еси.
Ексапостиларій.
Разбойника благоразумнаго во единѣмъ часѣ раеви сподобилъ еси, Господи: и мене древомъ крестнымъ просвѣти и спаси мя.
Девятое евангеліе.
Отъ Іоанна гл. 19, ст. 25-37.
Во время оно, стояху при крестѣ Іисусовѣ Мати Его и сестра Матери Его, Марія Клеопова и Марія Магдалина. Іисусъ же видѣвъ Матерь и ученика стояща, егоже любляше, глагола Матери Своей: Жено, се, сынъ твой. Потомъ же глагола ученику: се, Мати твоя. И отъ того часа поятъ Ю ученикъ во своя си [77]. Посемъ вѣдый Іисусъ, яко вся уже совершишася, да сбудется Писаніе, глагола: жажду. Сосудъ же стояше полнъ оцта [78]. Они же исполнивше губу оцта и на трость вонзше, придѣша [79] ко устомъ Его. Егда же пріятъ оцетъ Іисусъ, рече: совершишася. И преклонь главу, предаде духъ. Іудее же, понеже пятокъ бѣ, да не останутъ на крестѣ тѣлеса въ субботу, бѣ, бо великъ день тоя субботы, молиша Пилата, да пребіютъ голени ихъ и возмутъ. Пріидоша же воини, и первому убо пребиша голени, и другому распятому съ Нимъ. На Іисуса же пришедше, яко видѣша Его уже умерша, не пребиша Ему голеній: но единъ отъ воинъ копіемъ ребра Ему прободе и абіе изыде кровъ и вода. И видѣвый свидѣтельствова, и истинно есть свидѣтельство его, и той вѣсть, яко истину глаголетъ, да вы вѣру имете. Быша бо сія, да сбудется Писаніе: кость не сокрушится отъ Него. И паки другое Писаніе глаголетъ: воззрятъ на-Нь, Егоже прободоша.
Десятое евангеліе.
Отъ Марка гл. 15, ст. 43-47.
Во время оно, пріиде Іосифъ, иже отъ Аримаѳея, благообразенъ совѣтникъ, иже и той бѣ чая Царствія Божія, дерзнувъ вниде къ Пилату и проси тѣло Іисусово. Пилатъ же дивися, аще уже умре: и призвавъ сотника, вопроси его: аще уже умре? И увѣдѣвъ отъ сотника, даде тѣло Іосифови. И купивъ плащаницу, и снемъ Его, обвитъ плащаницею: и положи Его во гробъ, иже бѣ изсѣченъ отъ камене: и привали камень надъ двери гроба. Марія же Магдалина и Марія Іосіева зрястѣ, гдѣ Его полагаху.
Одиннадцатое евангеліе.
Отъ Іоанна гл. 19, ст. 38-42.
Во время оно, моли Пилата Іосифъ, иже отъ Аримаѳеа, сый ученикъ Іисусовъ, потаенъ же страха ради Іудейска, да возметъ тѣло Іисусово: и повелѣ Пилатъ. Пріиде же и взятъ тѣло Іисусово. Пріиде же и Никодимъ, пришедый ко Іисусови нощію прежде, нося смѣшеніе смирнено и алойно, яко литръ сто. Пріяста же тѣло Іисусово и обвиста е ризами со ароматы, якоже обычай есть Іудеомъ погребати. Бѣ же на мѣстѣ, идѣже распятся, вертъ [80] и въ вертѣ гробъ новъ, въ немже николиже никтоже положенъ бѣ. Ту убо, пятка ради Іудейска, яко близъ бяше гробъ, положиста Іисуса.
Двѣнадцатое евангеліе.
Отъ Матѳея гл. 27, ст. 62-66.
Во утрій день, иже есть по пятцѣ, собрашася архіерее и фарисее къ Пилату, глаголюще: господи, помянухомъ, яко льстецъ Онъ рече, еще сый живъ: по тріехъ днехъ востану. Повели убо утвердити гробъ до третіяго дне, да не како пришедше ученицы Его нощію, украдутъ Его и рекутъ людемъ: воста отъ мертвыхъ. И будетъ послѣдняя лесть горша первыя. Рече же имъ Пилатъ: имате кустодію [81]: идите, утвердите, якоже вѣсте. Они же шедше утвердиша гробъ, знаменавше камень съ кустодіею [82].
Слава долготерпѣнію Твоему, Господи, слава Тебѣ!
Отпустъ.
Иже оплеванія, и біенія, и заушенія, и крестъ, и смерть претерпѣвый за спасеніе міра, Христосъ истинный Богъ нашъ, молитвами пречистыя Своея Матере, святыхъ славныхъ и всехвальныхъ Апостолъ, святыхъ праведныхъ Богоотецъ Іоакима и Анны, и всѣхъ святыхъ, помилуетъ и спасетъ насъ, яко благъ и человѣколюбецъ.
Примѣчанія:
[1] Если.
[2] Тотчасъ.
[3] Якоже рѣхъ — какъ сказалъ.
[4] Яко аможе — что куда; Азъ — я.
[5] Пѣтухъ.
[6] Какъ.
[7] Три раза.
[8] Разумѣется мѣсто славы Божіей, гдѣ Господь являетъ Свое присутствіе особеннымъ образомъ и гдѣ предназначено блаженствовать множеству праведниковъ.
[9] Только и можно спастись чрезъ Христа, — въ истинной Церкви Христовой.
[10] Довольно.
[11] Не своею силою, какъ Христосъ, а силою Божіею.
[12] Т. е. Духа Святаго.
[13] Разумѣются всѣ невѣрующіе во Христа. Во всѣхъ дѣйствіяхъ, чудесныхъ дѣлахъ силою Божіей, они не признаютъ этой силы.
[14] Указывается на внутреннее духовное общеніе и единеніе Бога въ Троицѣ съ вѣрующимъ христіаниномъ, который свою вѣру подтверждаетъ добрыми дѣлами въ жизни.
[15] Духъ Святый — Третье лице Святой Троицы продолжаетъ Христово дѣло спасенія нашего, пребывая въ Церкви и чрезъ нее научая насъ истинной вѣрѣ, а въ св. таинствахъ ея подавая намъ благодатныя силы для богоугодной жизни.
[16] По человѣчеству Христа. Спаситель здѣсь указываетъ, что Онъ и по человѣчеству прославится славою, какую имѣлъ отъ вѣчности по божеству. Поэтому ученики и должны были радоваться Его отшествію къ Отцу.
[17] Діаволъ.
[18] Отсѣкаетъ.
[19] Очищаетъ.
[20] Помни это православный христіанинъ: всякій отдѣлившійся отъ Церкви, которая есть Тѣло Христово и Глава которой Христосъ (Ефес. 1, 22-23), обрекаетъ себя на погибель.
[21] Изгонятъ.
[22] Извиненія.
[23] Псал. 68, 5.
[24] Въ этихъ словахъ Спасителя обличается заблужденіе католиковъ, которые учатъ, что Духъ Святый исходитъ отъ Отца и Сына.
[25] Будетъ думать.
[26] Лучше.
[27] Понять.
[28] Увижу васъ.
[29] Т. е., когда придетъ Утѣшитель Святый.
[30] Которую.
[31] Открылъ имя Твое, возвѣстивши въ совершенствѣ, что человѣкъ можетъ знать о Богѣ и о своемъ спасеніи.
[32] Объ этихъ (апостолахъ).
[33] Т. е. Іуда.
[34] Псал. 40, 10; 108, 17.
[35] Т. е. отдѣли ихъ на особенное служеніе Тебѣ въ словѣ истины, даруй имъ потребныя къ тому силы, пріими ихъ какъ посвященную Тебѣ жертву, приносимую ими самоотверженнымъ служеніемъ.
[36] Садъ (Геѳсиманскій).
[37] Отрядъ воиновъ.
[38] на Него.
[39] Разумѣется самъ св. евангелистъ Іоаннъ.
[40] Развѣ.
[41] Не обинуяся — явно.
[42] Сходятся.
[43] Вотъ.
[44] Сказали же ему (слуги).
[45] Родственникъ.
[46] Судебное мѣсто.
[47] Такимъ образомъ, Христосъ Самъ клялся, но въ клятвѣ говорилъ истину, а всякую клятву ложную Онъ запретилъ (Матѳ. 5, 34); примѣръ ложной клятвы явилъ ап. Петръ при отреченіи отъ Христа.
[48] Божиться.
[49] Итакъ.
[50] Каменный помостъ предъ домомъ Пилата.
[51] Сокровищницу церковную.
[52] Горшечника.
[53] Странниковъ.
[54] Іереміи 32, 9.
[55] Правитель, т. е. Пилатъ.
[56] Ничего не дѣлай.
[57] Багряницу.
[58] Александръ и Руфъ — христіане, жившіе въ Римѣ, гдѣ св. евангелистъ и писалъ Евангеліе.
[59] Кислое вино, смѣшанное съ одуряющимъ сокомъ отъ смирны.
[60] Эй!
[61] Лобное мѣсто. На немъ, по народному вѣрованію евреевъ, похороненъ былъ Адамъ. Отсюда обыкновеніе изображать черепъ человѣческій съ костями подъ крестомъ съ Распятымъ Христомъ. Кровь изъ язвъ Христовыхъ впервые, такимъ образомъ, пала на прахъ Адама.
[62] Зачѣмъ?
[63] Нашимъ.
[64] Твое.
[65] Испустилъ духъ.
[66] Зрѣлище.
[67] Уничижившему Себя. Непреложно — неизмѣно (въ Своемъ Божествѣ).
[68] Взяту.
[69] Разбѣжитесь.
[70] Божественные отроки (Ананія, Азарія и Мисаилъ) обличили крайнюю степень богопротивной злобы. И на Христа озлобленное собраніе беззаконниковъ замыслило тщетно (напрасно): ищетъ убить Того, въ чьей десницѣ (длань) жизнь.
[71] Отрицаешься ты того, что скоро сдѣлаешь, какъ сказано.
[72] Горько.
[73] Однако.
[74] Напрасно.
[75] Священники съ книжниками предали язычникамъ Жизнь (Христа), преданную на смерть.
[76] О, Царь!
[77] Съ этого времени ученикъ сей (св. еван. Іоаннъ Богословъ) взялъ Ее къ себѣ.
[78] Оцетъ — винный уксусъ.
[79] Поднесли они (воины).
[80] Садъ и въ саду мѣсто (гробъ) для умершаго.
[81] Имѣете стражу.
[82] Поставили у гроба стражу и приложили къ камню печать.
Источникъ: «Православная жизнь» (Orthodox life). Ежемѣсячное приложеніе къ журналу «Православная Русь». №4 (316). Апрѣль 1976 года. — Jordanville: Типографія преп. Іова Почаевскаго. Свято-Троицкій монастырь, 1976. — 33 с.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 