НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1. Подо́бенъ: Всехва́льніи му́ченицы.
Жела́я улучи́ти, Анто́ніе блаже́нне, небе́сную добро́ту,* земна́я вся́ премину́лъ еси́* и, я́ко безпло́тенъ, по́двизався въ маловре́меннѣй жи́зни се́й,* мы́сленныя враги́ крѣ́пко побѣди́лъ еси́ и му́жески,* имѣ́я посо́біе ору́жіе непобѣди́мое,* ра́дуяся, восте́клъ еси́ къ присножела́емому тебѣ́ блаже́нству.* Тѣ́мже моли́ся* дарова́ти душа́мъ на́шимъ* ми́ръ и ве́лію ми́лость. [Два́жды.]
Мірска́го пристра́стія возгнуша́вся,* су́щая мíра, я́ко не су́щая, вмѣни́лъ еси́* и, сего́ ра́ди отъ всѣ́хъ упраздни́вся,* безмо́лвно жи́ти избра́лъ еси́,* несму́тнымъ умо́мъ и немяте́жнымъ се́рдцемъ вы́ну служа́ Бо́гу,* отону́дуже и сосу́дъ Свята́го Ду́ха обрѣ́лся еси́* чистоты́ ра́ди души́ твоея́,* Ему́же моли́ся* поми́ловати ду́ши на́ша.
Боже́ственныя ра́дости и весе́лія духо́внаго* испо́лнена яви́ся свѣтоно́сная твоя́ па́мять, о́тче Анто́ніе,* отону́дуже духо́вная твоя́ ча́да,* ра́достнѣ соше́дшеся, свѣ́тло пра́зднуемъ,* боголѣ́пну сла́ву воздаю́ще* прославля́ющему тя́ Бо́гу,* вѣ́дущему прославля́ти святы́я Своя́ уго́дники,* Ему́же моли́ся* спасти́ ду́ши на́ша.
Сла́ва, гла́съ 8:
Пріиди́те, отцы и бра́тія, честно́е мона́шеское собра́ніе, дне́сь, обстоя́ще, всечестну́ю ра́ку любе́знаго отца́ благоче́стнѣ лобза́емъ и, ра́достно пою́ще псало́мская пѣ́нія, во устѣ́хъ иму́ще духо́вная словеса́, любо́вію принесе́мъ ему́, я́ко вои́стинну мона́шескому удобре́нію и преподо́бныхъ сожи́телю. И свѣ́тло всепра́зднственная сотворя́юще, си́це рце́мъ: ра́дуйся, свѣти́льниче многосвѣ́тлый, возводя́ ко Христу́ мона́ховъ мно́жество; ра́дуйся, похвало́ на́ша и утвержде́ніе и всѣ́мъ вѣ́рнымъ благоути́шное приста́нище спасе́нія, боля́щихъ цѣли́телю, Анто́ніе, всечестны́й о́тче на́шъ, не оста́ви на́съ си́рыхъ, но пребу́ди съ на́ми, ча́ды твои́ми, я́коже обѣща́лся еси́, и не преста́й моля́ся Пресвятѣ́й Тро́ицѣ, я́ко да ми́лостива бу́детъ на́мъ о грѣсѣ́хъ на́шихъ и спасе́тъ ду́ши на́ша.
И ны́нѣ, богоро́диченъ:
Влады́чице, пріими́ моли́твы ра́бъ Твои́хъ [и изба́ви на́съ отъ вся́кія ну́жды и печа́ли.]
На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
Пи́щи ра́йскія наслади́тися возжелѣ́лъ еси́,* гла́домъ и жа́ждею иста́илъ еси́ пло́ть твою́* и, сла́вою отъ Бо́га вѣнча́нъ бы́ти восхотѣ́въ,* земну́ю сла́ву преоби́дѣлъ еси́;* отъ Него́же и просла́вился еси́, всеблаже́нне.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Любо́вію Бо́жіею укрѣ́плься, блаже́нне Анто́ніе,* жела́ніе пло́ти умертви́лъ еси́;* душе́вное же о́ко отъ помы́сленныхъ прило́гъ* свобо́дно къ Бо́гу возве́лъ еси́* и всего́ себе́ чи́ста* предста́вилъ еси́ Бо́гу.
Сти́хъ: Честна́ предъ Го́сподемъ* сме́рть преподо́бныхъ Его́.
Свѣти́ло вели́кое яви́ся на́мъ дне́сь* свята́я твоя́ па́мять, преподо́бне Анто́ніе,* мíръ ве́сь просвѣща́ющи заря́ми* изря́дныхъ чуде́съ твои́хъ,* любо́вію пра́зднующимъ исцѣле́нія неоску́дно подава́ющи.
Сла́ва, и ны́нѣ, богоро́диченъ, гла́съ и подо́бенъ то́йже:
Го́рніи Тя́ ли́цы,* Богоро́дице Дѣ́во,* пою́тъ съ до́льными,* славосло́вяще непреста́нно* Рождество́ Твое́ Пречи́стое.
Тропа́рь, гла́съ 1:
Жела́ніемъ духо́внымъ распали́вся и мяте́жи мірскíя отри́нувъ, ко еди́ному же Бо́гу любо́вію прилѣпи́лся еси́ и, Того́ вседу́шнѣ взыску́я, во вну́треннюю пусты́ню отше́лъ еси́, при вода́хъ всели́вся, идѣ́же во слеза́хъ и трудѣ́хъ пребыва́я многолѣ́тное вре́мя, въ терпѣ́ніи мно́зѣмъ житіе́ а́нгельское проходи́лъ еси́ въ наста́вленіи боже́ственнаго ра́зума, и мно́жество мона́ховъ собра́лъ еси́, му́дре, и́хже посѣща́я, не оста́ви, Анто́ніе преподо́бне, о́тче на́шъ, Пресвятѣ́й Тро́ицѣ моля́ся отъ золъ вся́ческихъ изба́вити и спасти́ ду́ши на́ша.
Сла́ва, и ны́нѣ, богоро́диченъ:
Гавріи́лу вѣща́вшу [Тебѣ́, Дѣ́во, — ра́дуйся! — со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́. Сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Твои́мъ].
НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ.
На Го́споди воззва́хъ: стихи́ры [на 8], гла́съ 6. Подо́бенъ: Все́ отло́жше.
Вся оста́вилъ еси́,* къ небе́снымъ возложи́въ у́мъ тво́й,* Христа́ еди́наго въ слѣ́дъ ходи́ти возлюби́лъ еси́.* Сего́ ра́ди безмо́лвно жи́ти взыска́лъ еси́,* уклони́вся въ пусты́ню,* въ не́йже по́двиза́вся,* житіе́ а́нгельское притяжа́лъ еси́,* къ боре́нію льсти́ваго посто́мъ и моли́твами вооружи́въ себе́,* искуше́нія мно́га́ претерпѣ́лъ еси́,* и вѣнцы́ нетлѣ́нными обогати́лся еси́.* Благода́ть пріе́мъ отъ Бо́га,* исцѣля́еши неду́ги разли́чныя,* тѣ́мъ Пресвято́му Ду́ху, Анто́ніе преподо́бне, моли́ся* поми́ловатися душа́мъ на́шимъ. [Два́жды.]
Ве́сь освяще́нъ,* богоно́сецъ показа́лся еси́,* дре́вняго человѣ́ка совле́кся съ по́хотьми́,* и во Христа́ вои́стинну обле́къ себе́,* духо́вную хра́мину нерукотворе́нную назда́лъ еси́,* положи́въ основа́ніе добродѣ́телей,* къ высотѣ́ безстра́стія дости́глъ еси́,* ума́ высо́кое смире́ніемъ возве́лъ еси́ Бо́гу,* отъ Него́же зна́нія глубо́кое воспрія́лъ еси́* проразумѣва́ти бу́дущая, я́ко настоя́щая,* и ума́ сокрове́нная человѣ́комъ предглаго́лати.* И ны́нѣ Пресвятѣ́й Тро́ицѣ, блаже́нне, моли́ся* о душа́хъ на́шихъ.
Зрѣ́ти жела́я мы́сленную добро́ту,* чу́вственная вся́ премину́лъ еси́,* въ слеза́хъ и воздыха́ніихъ живя́ дни́ своя́,* огорчева́лъ еси́ плоть твою́ всено́щными бдѣ́ніи и ча́стыми колѣнопреклоне́ніи.* И сего́ ра́ди вся́къ ви́дъ добродѣ́телей проходи́лъ еси́,* немощна́я ополче́нія вра́жія обличи́въ,* крѣпкоду́шнымъ терпѣ́ніемъ,* многоболѣ́зненнымъ страда́ніемъ къ неболѣ́зненнымъ дости́глъ еси́,* идѣ́же свѣ́тъ невече́рній и а́нгелъ ликостоя́ніе.* Съ ни́миже, преподо́бне, Христу́ со дерзнове́ніемъ моли́ся* о спасе́ніи ду́шъ на́шихъ.
Ины стихи́ры, гла́съ 4. Подо́бенъ: Зва́нный свы́ше.
Егда́ Боже́ственное раче́ніе* на́йде на тя́, пребога́те,* тогда́ тяжесть мíра отъ души́ твоея́ отри́нувъ,* вѣ́трило ума́ я́ко легко́ къ Бо́гу впери́лъ еси́,* кора́бль тво́й направля́я въ ти́хое приста́нище,* идѣ́же и сподо́бился еси́ свята́го о́браза мона́шескаго благоукраше́нія,* и та́мо учи́телемъ твои́мъ наставля́емь,* о́бразы благоче́стія сія́я,* благи́ми нра́вы украша́яся,* свяще́нства, я́ко сосу́дъ избра́нъ, сподо́бился еси́.* Тѣ́мъ Христу́ Бо́гу моли́ся* спасти́ и просвѣти́ти ду́ши на́ша. [Два́жды.]
Егда́ любо́вь Бо́жія* двиза́шеся въ се́рдцы твое́мъ, преблаже́нне,* тогда́ мíра сего́ суету́* и пре́лестное мудрова́ніе въ ничто́же вмѣни́лъ еси́;* въ пусты́ню пресели́вся,* и въ не́й, я́ко безпло́тенъ,* до́брымъ по́двигомъ подвиза́вся,* неви́димыхъ враго́въ ополче́нія* терпѣ́ніемъ твои́мъ вся́ побѣди́лъ еси́.* Но, Ему́же отъ ю́ности твоея́ послужи́лъ еси́,* Христу́ Бо́гу моли́ся* спасти́ и просвѣти́ти ду́ши на́ша.
Егда́ Боже́ственнымъ манове́ніемъ* пока́заннаго тебѣ́ въ видѣ́ніи узрѣ́въ,* кре́стнымъ зна́меніемъ вооружа́юща тебе́,* тогда́, преподо́бне Анто́ніе,* и ты́, кресто́мъ вооружи́въ себе́,* вседу́шно Христу́ послѣ́довалъ еси́* и, Того́ любо́вію прости́раяся,* кро́тость и незло́біе стяжа́лъ еси́.* Тѣ́мъ и кро́ткихъ зе́млю наслѣ́довалъ еси́,* отону́дуже исто́чникъ цѣле́ній пролива́еши приходя́щимъ ти́ съ вѣ́рою,* Пресвятѣ́й Тро́ицѣ моля́ся,* Юже моли́* спасти́ и просвѣти́ти ду́ши́ на́ша.
Сла́ва, гла́съ 8:
Преподо́бне о́тче богоблаже́нне Анто́ніе, жесто́кое твое́ житіе́ и труды́, я́же по Бо́гу, въ безмо́лвнѣмъ се́мъ уеди́неніи, я́ко прія́то бы́сть Бо́гу; тогда́ вседѣ́йствіемъ Пресвята́го Ду́ха стезя́ми пра́выми исправля́лъ еси́ жи́знь твою́, и́миже дости́глъ еси́ обрѣсти́ богода́ненъ да́ръ свѣтолѣ́пный, свяще́нную мзду́ трудо́въ твои́хъ прему́дрое сниска́ніе, пречу́дный о́бразъ Еди́носущныя Тро́ицы, къ Не́йже хода́тайствы твои́ми моли́твенными, душе́внымъ о́комъ взира́я къ Бо́жеству Трисвѣ́тлому, заря́ми чуде́съ, па́че со́лнца, ве́сь мíръ озари́лъ еси́, тму́ де́моновъ дале́че прогоня́я. Дне́сь же и по твое́мъ преста́вленіи Бо́гу хотя́щу наипа́че просла́вити тя́, оби́льна исцѣле́нія источа́етъ съ вѣ́рою приходя́щимъ къ цѣльбоно́сному твоему́ гро́бу, благоуха́ніе подая́ Пресвята́го Ду́ха. Тѣ́мже, я́ко имѣ́я дерзнове́ніе, прилѣ́жно моли́ся Пресвятѣ́й Тро́ицѣ Це́рквамъ единомышле́ніе и правосла́вному Импера́тору на́шему здра́віе неоску́дное дарова́ти и на враги́ крѣ́пкое одолѣ́ніе и спасе́ніе испроси́ти душа́мъ на́шимъ.
И ны́нѣ, богоро́диченъ:
Ца́рь Небе́сный за человѣколю́біе [на земли́ яви́ся и съ человѣ́ки поживе́. Отъ Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего. Его́же моли́, Ма́ти Безневѣ́стная, поми́ловатися душа́мъ на́шимъ].
Вхо́дъ, проки́менъ дне́, чте́нія 3. [Пи́саны сего́ мѣ́сяца въ 5-й де́нь].
[Прему́дрости Соломо́ни чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе. [Глава́ 5.]
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
Прему́дрости Соломо́ни чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.]
На литíи стихи́ры, самогла́сны, гла́съ 2:
Стезе́ю при́сноживо́тною при́сно ходи́ти возжелѣ́лъ еси́ бу́дущія ра́ди о́ныя присноблаже́нныя сла́вы; того́ ра́ди, въ пусты́няхъ пребыва́я, служи́лъ еси́ Бо́гу, подо́бяся свѣти́лу о́ному, вели́кому Анто́нію; я́коже бо о́нъ, вели́кій, въ пусты́няхъ Еги́петскихъ безмо́лвія ра́ди всели́ся, та́коже и ты́, всеблаже́нне, душе́внаго ра́ди безмо́лвія тѣле́сная чу́вства во вну́треннихъ пусты́няхъ си́хъ неисхо́днѣ затвори́лъ еси́. Но о́нъ у́бо дре́внихъ святы́хъ отце́въ, въ постѣ́ просія́вшихъ, оте́цъ и нача́льникъ бы́сть; ты́ же, преподо́бне, въ послѣ́днія ро́ды сія́ возсія́лъ еси́ богоуго́днымъ житіе́мъ твои́мъ, оте́цъ и нача́льникъ бы́въ мона́хомъ. Ему́же бо въ житіи́ се́мъ наслѣ́дникъ и ревни́тель былъ еси́, си́це того́ и именова́ніе отъ дѣ́лъ пріе́мъ, съ ни́мже Пресвятѣ́й Тро́ицѣ моли́ся спасти́ся душа́мъ на́шимъ.
Пріиди́те, боголюбе́зное ста́до, мона́шеское собра́ніе, съ празднолюбе́зными чи́нми христіа́нскаго мно́жества богоимени́тыхъ люде́й Бо́жіихъ дне́сь восхва́лимъ Христо́ва рачи́теля, граждани́на пусты́ннаго, мона́хомъ прему́драго наста́вника, пусты́нниковъ похвалу́ святолѣ́пную, боже́ственныя пѣ́сни принесе́мъ ему́. Сей бо, ре́вность боже́ственную въ се́рдцы пріе́мъ, мірску́ю пре́лесть всю́ оста́вивъ, Христу́ послѣ́дова, труды́ по́стническими простира́яся, де́монскія па́губы побѣди́ му́жески Ду́ха Свята́го ору́жіи непобѣди́мыми. Тѣ́мже, возше́дъ на лѣ́ствицу добродѣ́телей, дости́же круго́въ о́ныхъ небе́сныхъ, идѣ́же богонача́льнымъ свѣ́томъ со а́нгельскими ли́ки просвѣща́яся, моли́твенникъ непреста́ненъ быва́етъ за ду́ши на́ша.
Въ ти́хое и небу́рное приста́нище безмо́лвія вше́дъ, во отхо́дную пусты́ню боголюбе́зную, идѣ́же съ Бо́гомъ еди́нъ безмо́лвствовалъ еси́, тѣ́снымъ путе́мъ и приско́рбнымъ присноше́ствовавъ, та́мо житіе́ а́нгельско проходи́лъ еси́, неудобьпокори́вое пло́ти возрази́въ воздержа́ніемъ, научи́въ сего́ повинова́тися благо́му по́мыслу въ хотѣ́нія Бо́жія. Тѣ́мже свѣ́тъ безстра́стія возсія́ тебѣ́, въ не́мже узрѣ́лъ еси́ Присносу́щнаго Свѣ́та — Христа́, Бо́га на́шего. Его́же непреста́нно моли́ти мо́лимся отъ вся́кихъ зо́лъ на́съ изба́вити, всечестно́е твое́ успе́ніе пра́зднующія, и спасти́ ду́ши́ на́ша.
Сла́ва, гла́съ 6:
Ра́дуйтеся и весели́теся о Го́сподѣ, богоизбра́нное ста́до блаже́нное, духо́вная ча́да преподо́бнаго, я́ко такова́го свѣти́льника отца́ себѣ́ иму́ще, и ча́да нареко́стеся, пресвѣ́тлымъ житіе́мъ свои́мъ ве́сь мíръ озари́вшаго; его́же просла́ви Бо́гъ зна́меніи же и чудесы́ Свои́ми пресла́вными, оби́льна исцѣле́нія неоску́дно да́рующа приходя́щимъ къ нему́ съ вѣ́рою. Тѣ́мже, обстоя́ще всечестну́ю ра́ку его́, мо́лимся ему́, глаго́люще: о всеблаже́нне Анто́ніе, о́тче на́шъ, непреста́нно моли́ Всесвяту́ю Тро́ицу ста́до твое́ спасти́ и вѣ́рно чту́щихъ пресвяту́ю па́мять твою́, и труды́ твоя́, и терпѣ́нія любоче́стнѣ имѣ́ющихъ, я́же за Христа́ подъя́лъ еси́, я́ко да То́й ми́лостивъ бу́детъ на́мъ о грѣсѣ́хъ на́шихъ въ де́нь Су́дный и спасе́тъ ду́ши на́ша.
И ны́нѣ, богоро́диченъ:
Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].
На стихо́внѣ стихи́ры, гла́съ 5. Подо́бенъ: Ра́дуйся.
Ра́дуйся, всесвяще́нная главо́, преподо́бне о́тче на́шъ Анто́ніе, уго́дниче Христо́въ присножела́нный, вы́шнихъ си́лъ ревни́телю и собесѣ́дниче а́нгеловъ. На земли́ бо, въ пло́ти сы́й, безпло́тныхъ житіе́ проходи́лъ еси́, подо́бяся тѣ́хъ житію́ же и нра́ву; съ ни́миже ны́нѣ въ присноблаже́ннѣмъ свѣ́тѣ пребыва́я, наслажда́яся зрѣ́ній Боже́ственныхъ, Христу́ Бо́гу моли́ся ми́ръ вселе́ннѣй дарова́ти и душа́мъ на́шимъ ве́лію ми́лость.
Сти́хъ: Честна́ предъ Го́сподемъ сме́рть преподо́бныхъ Его́.
Ра́дуйся, свяще́нный ве́рше предо́брый, преподо́бнымъ и пра́веднымъ совсе́льниче единонра́вный; тѣ́хъ бо житію́ послѣ́дствовавъ, страсте́й игра́нія, я́ко сѣ́чивомъ, креста́ зна́меніемъ посѣ́клъ еси́, Свѣ́томъ Пресвѣ́тлымъ, Ду́хомъ Святы́мъ озаря́емь, на свѣ́щницѣ добродѣ́телей вся́ освѣща́еши, благоче́стія ве́рше преизя́щный, укра́шенный дарова́ніи Боже́ственными. Тѣ́мже Христу́ Бо́гу моли́ся дарова́ти душа́мъ на́шимъ ми́ръ и ве́лію ми́лость.
Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.
Ра́дуйся, свяще́нный на́шъ наста́вниче, главо́ предо́брая, учени́къ твои́хъ ста́до избра́нное, и́хже боголю́бнѣ въ пусты́ни се́й собра́лъ еси́ му́дрѣ, о ни́хже труды́ и по́ты прости́рая, ду́шу твою́ положи́лъ еси́, не оста́ви, посѣща́я, и о и́же вѣ́рою соверша́ющихъ па́мять твою́ святу́ю и любоче́стнѣ почита́ющихъ всечестны́я твоя́ мо́щи святы́я, Христу́ моли́ся изба́вити всѣ́хъ на́съ вся́каго гнѣ́ва и томле́нія и спасе́ніе дарова́ти душа́мъ на́шимъ.
Сла́ва, гла́съ 8:
Пусты́ня, пре́жде непло́дствующи, ны́нѣ же весели́тся, зря́щи въ себѣ́ ста́до мона́ховъ, обстоя́щихъ всечестны́й гро́бъ пречу́днаго отца́ сего́ и духо́вно веселя́щихся, и́же пра́зднственная торжеству́ютъ, глаго́лющи: ра́дуйся, свѣти́льниче пресвѣ́тлый, и́же, чудесы́ сія́я, озаря́еши ду́ши́ вѣ́рныхъ; ра́дуйся, о́тче всеблагíй, умно́живый ча́да въ пусты́ни духо́вныхъ жела́ній, о ни́хже труды́ и по́ты полага́я, ду́шу твою́ пре́далъ еси́ Бо́гу. Ему́же моли́ся, свя́те Анто́ніе, о на́съ, ча́дахъ твои́хъ, благоче́стнѣ па́мять твою́ пра́зднующихъ, изба́вити отъ навѣ́тъ вра́жіихъ, я́ко да, до́брѣ сконча́вше жи́знь свою́, дерзнове́ніе получи́мъ въ де́нь стра́шнаго испыта́нія.
И ны́нѣ, [богоро́диченъ]:
Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній; ны́нѣ на́ша моле́нія пріе́млющи, моли́ спасти́ся всѣ́мъ на́мъ].
Тропа́рь и богоро́диченъ пи́саны на ма́лѣй вече́рни.
НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.
По 1-мъ стихосло́віи, сѣда́ленъ, гла́съ 8:Мно́гимъ воздержа́ніемъ, преподо́бне, жи́знь твою́ украси́въ, пу́ть показа́лъ еси́, веду́щій въ жи́знь добродѣ́тели смире́ніемъ: мíра бо отве́ргся, и вся́, я́же въ мíрѣ кра́сная, преоби́дѣвъ, ева́нгельскимъ уче́ніемъ послѣ́довалъ еси́; жесто́кимъ же житіе́мъ пло́ть твою́ изнуря́я, го́рдаго змíя воздержа́ніемъ уби́лъ еси́. Тѣ́мже, на небесѣ́хъ водворя́яся, Трисо́лнечному Бо́жеству предстои́ши, преподо́бне Анто́ніе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.
По 2-мъ стихосло́віи, сѣда́ленъ, гла́съ 4:
Отъ ю́ности взе́мъ тво́й кре́стъ, благоче́стно Христу́ послѣ́довалъ еси́, увяди́въ плотско́е мудрова́ніе воздержа́ніемъ и побѣ́ду взе́мъ на діа́вола, надъ страстьми́ тѣле́сными воцари́лся еси́. Тѣ́мже и по кончи́нѣ источа́еши исцѣле́нія вѣ́рою приходя́щимъ къ чудотво́рному о́бразу Всесвяты́я Тро́ицы и къ твоему́ цѣльбоно́сному гро́бу, Анто́ніе всече́стне, испроси́ на́мъ ве́лію ми́лость. [Два́жды.]
Сла́ва, и ны́нѣ, богоро́диченъ:
Безневѣ́стная Чи́стая Богоро́дице Дѣ́во, еди́на предста́тельнице вѣ́рныхъ и покро́въ, бѣ́дъ, и скорбе́й, и лю́тыхъ обстоя́ній вся́ изба́ви, и́же на Тя́ упова́ніе иму́щія, Отрокови́це, и ду́ши на́ша спаси́ боже́ственными мольба́ми Твои́ми.
По поліеле́и сѣда́ленъ, гла́съ 8:
Въ пусты́ню, преблаже́нне, всели́лся еси́, и въ не́й проходя́ жесто́кое жи́тельство, я́коже безпло́тенъ, жи́знь исправля́я, пло́ть твою́ умертви́лъ еси́ и, поревнова́въ Анто́нія Вели́каго изря́дному жи́тельству, Тро́ицы служи́тель показа́лся еси́ преизя́щный. Тѣ́мже къ ре́вности Тоя́ боже́ственнѣй ли́къ мона́шествующихъ, сла́вне, совокупи́лъ еси́, богоно́се о́тче на́шъ Анто́ніе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.
Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Вся́кое дыха́ніе… Сти́хъ: Хвали́те Бо́га во святы́хъ Его́… Ева́нгеліе отъ Матѳе́я, зача́ло 43.
По 50-мъ псалмѣ́ стихи́ра, гла́съ 6:
Преблаже́нне о́тче на́шъ Анто́ніе, егда́ къ Бо́гу во отше́ствіи твое́мъ отсю́ду боголюбе́зное собра́ніе учени́къ твои́хъ нака́зовалъ еси́, я́ко оте́цъ чадолюби́въ, вели́кую глави́зну соблюда́ти и испо́лнити боже́ственныхъ проро́къ и зако́на, глаго́ля: пребыва́йте, ча́да, въ соверше́ніи духо́внаго ва́шего исполне́нія, любо́вь имѣ́ти и́мъ къ Бо́гу и бли́жнему и, ели́ка си́ла, подвиза́тися на о́бщаго врага́, внима́ющимъ своему́ спасе́нію, да получа́тъ бу́дущее присноблаже́нствіе. Но у́бо, всеблаже́нне, не преста́й моля́ся Пресвя́тѣй Тро́ицѣ и на́съ, чту́щихъ тя́, сохрани́ти въ любви́ Тоя́, я́ко да получи́мъ отъ Нея́ вели́кую ми́лость.
Кано́нъ Богоро́дицы, со ирмосо́мъ на 6, и свята́го два́ кано́на, на 8.
Пе́рвый кано́нъ, гла́съ 2.
Пѣ́снь 1.
Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.
О, Тро́ице Всемилосе́рдая, Бо́же Преблагíй — Отче, и Сы́не, и Святы́й Ду́ше — Трисвято́е Естество́, нему́дрыхъ Наказа́телю! Пода́ждь просвѣще́ніе моему́ неразу́мію, пѣ́снь воспѣ́ти Твоему́ служи́телю въ наставле́ніи Боже́ственнаго Твоего́ просвѣще́нія.
Отъ ма́терня чре́ва прилѣпи́лся еси́ къ Бо́гу, преподо́бне, сего́ ра́ди жи́знь сію́ въ ничто́же вмѣни́въ, кре́стъ Госпо́день изъ ю́ности твоея́ возжелѣ́лъ еси́ носи́ти и, вся́ земна́я возненави́дѣвъ, въ небе́сная присноблаже́нствія взира́лъ еси́.
Ди́вно житіе́ твое́, блаже́нне, ку́пно же и смире́ніе, е́же отъ ю́ности стяжа́лъ еси́. И сего́ ра́ди отъ всего́ мíра отлучи́въ себе́ и а́нгельскимъ о́бразомъ обле́кся, бы́лъ еси́ мона́хъ преди́венъ, цвѣтя́ въ добродѣ́телехъ.
Богоро́диченъ: Вопло́щся изъ Пречи́стыхъ ложе́снъ Твои́хъ, Дѣ́во Всечи́стая, Бо́жіе Сло́во всѣмъ изъясни́ богоразу́мія любо́вь: человѣ́ческое торжество́ ли́ку а́нгельскому совокупи́въ, въ небе́сная возведе́.
Другíй кано́нъ преподо́бному, гла́съ 8.
[Пѣ́снь 1.]
Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.
Весь Вседержи́телю Бо́гу возложи́въ себе́, богому́дре, и, къ Тому́ жела́ніемъ и любо́вію у́мъ тво́й впери́въ, Того́ ра́ди безмо́лвная и уедине́нная мѣ́ста возлюби́лъ еси́, да, со Христо́мъ пребыва́я, жи́знь вѣ́чную наслѣ́диши.
Упова́ніемъ на Бо́га всеблага́го укрѣпля́емь, блаже́нне Анто́ніе, къ бу́дущимъ благи́мъ прости́рался еси́ и твое́й пло́ти неми́лостивъ, о́тче, бы́лъ еси́.
Лука́вый вра́гъ, опа́сно вѣ́дый, я́ко хо́щетъ тобо́ю изгна́нъ бы́ти отъ мѣ́ста сего́ свята́го, се́го ра́ди непра́ведныя человѣ́ки воздвиза́етъ на тя́; но сíи у́бо, ничто́же сотво́рше, вспя́ть бѣжа́ша, лука́вый же побѣжде́нъ бы́сть ору́жіемъ моли́твъ твои́хъ: Богъ бо снабдѣва́ше тя́.
Богоро́диченъ: Неискусому́жно Христа́ родила́ еси́, су́ща по на́мъ на́съ ра́ди, непремѣ́нна естество́мъ, Пречи́стая, и невра́щна во обои́хъ пребы́вша. Его́же моли́ непреста́нно грѣхо́въ мои́хъ дарова́ти и напа́стей избавле́ніе.
Катава́сія: Христо́съ ражда́ется…
Пѣ́снь 3.
Ирмо́съ: Процвѣла́ е́сть пусты́ня я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.
Вели́ко къ Бо́гу дерзнове́ніе стяжа́лъ еси́, преподо́бне, Присносу́щныя Тро́ицы свято́му о́бразу, стяжа́ніи трудо́въ твои́хъ благода́ть испроси́ Пресвята́го Ду́ха, его́же изъ пла́мене пресла́вно изы́ти сотвори́лъ еси́ моли́твами твои́ми.
Въ нача́лѣ основа́ніе добродѣ́телей, блаже́нне, положи́лъ еси́ въ души́ твое́й стра́хъ Бо́жій и на се́мъ основа́ніи назда́лъ еси́ чи́стыя добродѣ́тели сохра́неніемъ Бо́жіихъ за́повѣдей. И сего́ ра́ди всели́лся еси́ въ вѣ́чная бла́гая, я́же угото́ва Бо́гъ боя́щимся Его́.
Вре́менныхъ и до́льныхъ возгнуша́вся, высо́кая при́сно пребыва́ющая возлюби́лъ еси́, боже́ственнымъ раче́ніемъ распала́я благолюби́вую твою́ ду́шу, и, Того́ сотвори́въ живу́щаго Бо́га во́лю, воспрія́лъ еси́ бла́гая небе́сная.
Богоро́диченъ: Сказу́я иногда́ сокрове́нное та́инство, Отрокови́це, Тебѣ́ дре́вле Гавріи́лъ зовя́ше: ра́дуйся, Бо́жія пала́то, въ Ню́же всели́вся, обожи́ вся́ человѣ́ки я́ко Милосе́рдъ.
Инъ.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.
Утверди́въ твоя́ помышле́нія, блаже́нне, упова́ніемъ на Бо́га, вра́жіихъ навѣ́товъ ника́коже убоя́ся, но мы́сленныхъ рѣ́къ стремле́нія, къ душе́внѣй твое́й хра́минѣ приража́ющаяся, возрази́лъ еси́ о ка́мень терпѣ́нія.
Жела́я, преподо́бне, насыща́тися приснопребы́вающія сла́дости, бы́ліи самора́сленными трилѣ́тное вре́мя проводи́лъ еси́ жи́зни твоея́; тѣ́мже и ны́нѣ получи́лъ еси́ трапе́зу о́ну неги́бнущія я́ди, но при́сно пребыва́ющія въ жи́зни вѣ́чнѣй.
Во у́мъ пріе́мъ Ца́рствія небе́снаго вѣ́чное наслажде́ніе, земна́я вся́ пренебре́глъ еси́ и сего́ ра́ди ско́рбная наше́ствія мно́га и изгна́нія въ жи́зни се́й претерпѣ́лъ еси́, но отъ всѣ́хъ си́хъ свободи́ тя́ тебѣ́ жи́знь вѣ́чную Дарова́вый.
Богоро́диченъ: Твою́ по́мощь пода́ждь ми́, рабу́ Твоему́ недосто́йному, Дѣ́во Влады́чице, и, вразуми́вши боже́ственное сіе́ начина́ніе, сотвори́ отъ недосто́йнаго досто́йная и изба́ви бѣ́дъ, и скорбе́й, и прегрѣше́ній мно́гихъ, я́ко ро́ждши всѣ́хъ Избавле́ніе.
Сѣда́ленъ, гла́съ 3:
Мно́гомяте́жіе мíра и непостоя́нную суету́, я́ко пра́хъ, вмѣни́въ, къ премíрнымъ возве́лъ еси́ у́мъ тво́й, затво́ромъ безмо́лвія воздержа́въ тѣле́сная чу́вства, и, стяжа́въ жи́знь а́нгельску, Бо́гу угоди́лъ еси́, де́моновъ па́губникъ, страсте́й искорени́тель, человѣ́ковъ спаси́тель нело́женъ бы́лъ еси́. Тѣ́мже и на́съ отъ тлетво́рныхъ страсте́й изба́ви, мо́лимся, твою́ па́мять при́сно въ пѣ́снехъ почита́ющихъ, блаже́нне Анто́ніе, о́тче на́шъ. [Два́жды.]
Сла́ва, и ны́нѣ, богоро́диченъ:
Яко невоздѣ́ланная, Дѣ́во, лоза́, краснѣ́йшій гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Обра́дованная.
Пѣ́снь 4.
Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.
Ко́ль бла́го положи́лъ еси́ во умѣ́ твое́мъ, е́же прилѣпля́тися Бо́гу на́шему; сего́ ра́ди оста́вивъ вся́, на земли́ су́щая, у́мъ тво́й вседу́шно возложи́лъ еси́ къ небе́снымъ оби́телемъ, въ безмо́лвіи мно́зѣ препровожда́лъ жи́знь твою́, да никогда́же отто́ргнешися Сладча́йшаго твоего́ Іису́са.
Сме́рть па́че всего́ житія́ сего́ избра́лъ еси́, да Христу́ жи́ти бу́деши, сего́ ра́ди въ ме́ртвость повседне́вную вдая́лся еси́, труды́ по́стническими умерщвля́лъ еси́ вся́ у́ды своя́, истни́въ пло́ть свою́ посты́ мно́гими.
Помина́я, преподо́бне, послѣ́дній де́нь жи́зни сея́, прише́льца вмѣня́лъ еси́ себе́ въ мíрѣ се́мъ бы́ти, на вся́къ де́нь гото́вился еси́ ко исхожде́нію, благи́ми дѣ́лы украша́я ду́шу твою́, ожида́я прише́ствія Влады́ки твоего́.
Богоро́диченъ: Боговидѣ́ніемъ просвѣ́щся проро́къ, явле́нно зри́тъ го́ру Бо́жію благослове́нную, земны́мъ украше́ніе, небе́снымъ славосло́віе боголѣ́пное, еди́ну Всепѣ́тую.
Инъ.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.
Пото́ки сле́зными пусты́ни напои́лъ еси́, блаже́нне, сѣ́мя трудо́въ твои́хъ сѣ́я въ ни́хъ. Тѣ́мже и стори́чный пло́дъ ра́достнѣ пожа́лъ еси́, вопія́: сла́ва си́лѣ Твое́й, Го́споди.
Стена́ніемъ се́рдца и умиле́ніемъ мно́зѣмъ житія́ по́прище преше́дъ, му́дре, и въ страну́ безстра́стія пресели́ себе́, въ не́йже свѣ́тъ пріе́мъ въ се́рдцы твое́мъ, непреста́нно весели́шися, неизрече́ннаго Свѣ́та, Христа́, наслажда́яся.
Моля́ся не преста́й, о́тче, о ста́дѣ твое́мъ, его́же мно́гими труды́ и по́ты стяжа́лъ еси́, избавле́нія прося́ злыхъ обстоя́ній и скорбе́й вся́ческихъ, да тя́ вси́, я́ко отца́ чадолюби́ва, непреста́нно воспѣва́емъ.
Богоро́диченъ: Ко́рень изъ чре́слъ ца́рскихъ, Ца́рь всѣ́хъ, я́ко су́щу возлюби́въ, и вы́шшу херуви́мъ и серафи́мъ показа́, ве́сь, Богоро́дице, всели́ся въ Тя́.
Пѣ́снь 5.
Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.
Яко дре́во благора́сленно, при исхо́дищахъ мно́гихъ во́дъ насажде́нъ бы́въ, о́тче, вѣ́тви добродѣ́телей мно́ги израсти́лъ еси́, подъ сѣ́нь твою́ вся́ пріе́мля, хотя́щія спасе́нія.
Пучи́ною сле́зъ твои́хъ мо́ре грѣхо́вное потопи́лъ еси́, погружа́я у́мъ сво́й во глубину́ видѣ́ній Боже́ственныхъ, идѣ́же сокро́венныхъ та́инъ я́сно зри́тель бы́въ, проре́клъ еси́ кому́ждо напослѣ́докъ хотя́щая бы́ти и́мъ.
Моли́твенникъ я́ко те́плъ въ жи́зни се́й Пресвятѣ́й Тро́ицѣ бы́лъ еси́, блаже́нне, хода́тайствы твои́ми здра́віе всѣ́мъ подава́я неску́дное. Тѣ́мъ и ны́нѣ па́че въ моли́тву предлага́емъ тя́, прося́ще тобо́ю прія́ти ми́лости и грѣхо́въ оставле́нія.
Богоро́диченъ: Мои́хъ прегрѣше́ній плени́цу, Влады́чице, расто́ргни, Твоего́ Сы́на и Бо́га моля́щи, и томя́щій грѣ́хъ, Приснодѣ́во, низложи́, я́ко да пою́ Тя́ всегда́, Всенепоро́чная, Тобо́ю спа́саемь.
Инъ.
Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.
Пи́щи малопрія́тіемъ ску́днымъ зѣло́ жела́ніе пло́ти обузда́лъ еси́, во всено́щныхъ же славосло́віихъ Бо́жественныхъ сло́весъ души́ слове́сное непоро́чно Бо́гу соблю́лъ еси́.
Ца́рство небе́сное стяжа́въ нището́ю самово́льною, отону́дуже источа́еши оби́льная дарова́нія духо́вныхъ исцѣле́ній вѣ́рно почита́ющимъ всесвятую́ твою́ па́мять.
Свѣщу́ твою́ духо́вную, чистоты́ свѣти́ло вже́глъ еси́, блаже́нне, еле́емъ ми́лости напоя́я непреста́нно. Тѣ́мъ дости́глъ еси́ Черто́га небе́снаго, идѣ́же е́сть Жени́хъ Онъ, Его́же измла́да возжелѣ́лъ еси́.
Богоро́диченъ: Хра́мъ яви́лася еси́ че́стенъ, Дѣ́во Ма́ти Марíе, вся́ческая всеси́льно и прему́дро соста́вльшаго Христа́, и очи́стивша, и нося́ща, Его́же на́мъ ми́лостива сотвори́ Ма́терними Твои́ми мольба́ми.
Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.
Честно́е тѣ́ло твое́, преподо́бне, мно́га исцѣле́нія, я́ко исто́чникъ при́сно кипя́щь, источа́етъ вѣ́рою приходя́щимъ къ чудотво́рному о́бразу Всесвяты́я Тро́ицы и къ цѣльбоно́сному твоему́ гро́бу.
Непреста́нными твои́ми къ Бо́гу, о́тче, моли́твами круго́въ небе́сныхъ дости́глъ еси́, идѣ́же е́сть свѣ́тъ неизрече́нный и наслажде́ніе пра́ведныхъ, съ ни́миже предстои́ши Тро́ицѣ, всѣ́хъ Бо́гу, отону́дными свѣтлостьми́ просвѣща́яся.
Анто́ніе преподо́бне, а́ще и напослѣ́докъ лѣ́тъ отъ земли́, я́ко со́лнце, возсія́лъ еси́, но дре́внихъ оте́цъ, пре́жде тебе́ бы́вшихъ, че́сти и да́ра отъ Бо́га сподо́бился еси́: бу́дутъ бо, — рече́ Госпо́дь, — послѣ́дни пе́рвіи.
Богоро́диченъ: Возсія́ изъ Тебе́ мы́сленное Со́лнце и свѣ́тлыя лучи́ Своего́ Божества́ всѣ́мъ простре́, Богоро́дице Влады́чице, тѣ́мъ Тя́ вси́ непреста́нными пѣ́ніи велича́емъ.
Инъ.
Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.
Въ пусты́няхъ, я́ко пти́чищь, возгнѣзди́лся еси́, преподо́бне, отъ всѣ́хъ хотя́ еди́ному Бо́гу еди́нствовати; но, я́ко на свѣ́щницѣ, я́вѣ бы́ша всѣ́мъ твоя́ исправле́нія, Бо́гу тя́ прославля́ющу.
Но́щь тебѣ́, я́ко де́нь, блаже́нне, вмѣня́шеся и де́нь, я́ко но́щь. Не да́лъ еси́ покоя́ тѣлеси́ твоему́, ни сна́ очесе́мъ, ни вѣ́ждомъ дрема́нія, до́ндеже дости́глъ еси́ поко́я небе́снаго.
Со́нъ и сѣ́нь житіе́ сіе́, преподо́бне, вмѣни́лъ еси́, тѣ́мъ, и на ничто́же обраща́лся еси́ су́щихъ въ не́мъ, но все́ твое́ помышле́ніе и ду́шу къ бу́дущимъ просте́рлъ еси́, идѣ́же съ преподо́бными всѣ́ми ны́нѣ весели́шися.
Богоро́диченъ: Расто́ргни мои́хъ прегрѣше́ній рукопи́саніе, одержа́щихъ мя́ печа́лей и страсте́й разрѣше́ніе да́рующи и соблюда́ющи вы́ну неврежде́на, Влады́чице.
Конда́къ, гла́съ 8. Подо́бенъ: Взбра́нной.
Отъ ю́ности, преподо́бне, пло́ть твою́ въ постѣ́хъ и моли́твахъ истончи́лъ еси́ и, кре́стъ тво́й взе́мъ, Христу́ послѣ́довалъ еси́. Тѣ́мже и къ вы́шнимъ тече́ніе ра́достно соверши́лъ еси́, идѣ́же со всѣ́ми святы́ми Свя́тѣй Тро́ицѣ предстои́ши; и ны́нѣ, ста́до твое́ посѣща́я, помина́й чту́щихъ пресвяту́ю па́мять твою́, да вси́ благода́рнѣ вопіе́мъ ти́: ра́дуйся, богому́дре Анто́ніе, наста́вниче пусты́нный.
Икосъ:
Ева́нгельскаго гла́са ревни́тель блаже́нне, обрѣ́лся еси́, вся́ бо земна́я вмѣни́въ уме́ты, Христо́въ послѣ́дователь въ жи́зни се́й изя́щенъ былъ еси́, отъ Него́же и ра́зумомъ обогати́вся дарова́ній Боже́ственныхъ, вразуми́ ны́ вѣща́ти тебѣ́ си́цевая: ра́дуйся, богоно́се, небе́сный человѣ́че, земны́й а́нгеле; ра́дуйся, чи́стый до́ме Пресвята́го Ду́ха; ра́дуйся, я́ко въ жи́зни се́й служи́тель Пресвяты́я Тро́ицы бы́лъ еси́; ра́дуйся, я́ко моли́твами твои́ми оби́тель твою́ изба́вилъ еси́ невре́дну отъ о́гненнаго возгорѣ́нія; ра́дуйся, я́ко пусты́ню слеза́ми напои́въ, многопло́дну сотвори́лъ еси́; ра́дуйся, я́ко всено́щными боже́ственными пѣснопѣ́ніи сію́ просвѣти́лъ еси́; ра́дуйся, я́ко въ не́й сѣ́мя боже́ственное мно́готру́дно всѣ́ялъ еси́, его́же уплоди́ Бо́гъ во мно́го; ра́дуйся, я́ко въ то́й учени́къ стада́ собра́въ, стра́ху Бо́жію наказа́лъ еси́; ра́дуйся, я́ко моли́твами твои́ми нечи́стіи ду́си отъ человѣ́къ отгони́ми быва́ютъ; ра́дуйся, я́ко непреста́нно мо́лишися Пресвятѣ́й Тро́ицѣ о соверша́ющихъ благоче́стно па́мять твою́, е́же соблюсти́ся отъ вра́гъ ненавѣ́тнымъ, да зове́мъ ти́: ра́дуйся, богому́дре Анто́ніе, пусты́нный наста́вниче.
Пѣ́снь 7.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.
Смире́нъ нра́въ и обы́чай кро́токъ имѣ́въ, блаже́нне, кро́ткому Па́стырю, Христу́, я́ко овча́ незло́биво, усе́рдно послѣ́довалъ еси́. Ему́же непреста́нно пое́ши со избра́нными всѣ́ми: оте́цъ на́шихъ Бо́же, благослове́нъ еси́.
Жела́я наслади́тися небе́снаго Хлѣба, Христа́, Его́же я́дый никогда́же у́мретъ, а́лчбою и жа́ждею томи́лъ еси́ пло́ть твою́; Его́же ны́нѣ, о́тче Анто́ніе, насыща́яся, и на́мъ прича́стникомъ бы́ти Онаго моли́ся.
Свѣти́ло мíра въ послѣ́днемъ ро́дѣ се́мъ Госпо́дь сотвори́ тя́, о́тче, чу́вственнымъ очесе́мъ и душе́внымъ тобо́ю да́руетъ прозрѣ́ніе. Того́ моли́ просвѣти́ти ны́ свѣ́томъ за́повѣдей Боже́ственныхъ, пою́щія: оте́цъ на́шихъ Бо́же, благослове́нъ еси́.
Богоро́диченъ: Обветша́вшія ны́ го́рькимъ дре́вле дре́ва вкуше́ніемъ и па́дшія преступле́ніемъ, Пречи́стая, обнови́ла еси́, Зижди́теля ро́ждши, Сло́во Ѵпоста́сное, Дѣ́во Ма́ти, Влады́чице.
Инъ.
Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.
Яко высо́къ у́мъ, преподо́бне, отъ земны́хъ всѣ́хъ къ Бо́гу имѣ́я, высо́къ въ добродѣ́телехъ обрѣ́лся еси́ и, къ вы́шнимъ тече́ніе твое́ испра́вивъ, сла́виши съ ни́ми непреста́нными гла́сы Пресвяту́ю Тро́ицу: оте́цъ на́шихъ Бо́же, благослове́нъ еси́.
Ни́щія ми́луя, а́лчущія пита́лъ еси́, жа́ждущія напая́лъ еси́. Тѣ́мъ прія́ тебе́ въ вѣ́чныя кровы тебе́ ра́ди въ ни́щихъ Бы́вый. Ему́же пое́ши: оте́цъ на́шихъ Бо́же, благослове́нъ еси́.
Не устраши́ тебе́, блаже́нне, долгота́ лѣ́тняя, ни пусты́нное озлобле́ніе, ни въ потре́бныхъ ску́дость, ни разбо́йникъ на́шествіе, но еди́но предъ очи́ма имѣ́я, е́же Христа́ ра́ди сме́рть прія́ти въ пусты́ни се́й, да Христу́ жи́ти бу́деши.
Богоро́диченъ: Украси́лася еси́ дѣ́вства добро́тами и Евы покры́ла еси́ сту́дъ злообра́зный, Христа́ Ро́ждшая, одѣя́ніе безсме́ртія да́рующаго Тебе́ чту́щимъ.
Пѣ́снь 8.
Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.
Свѣтоно́сная благода́ть и исцѣле́ній дарова́нія да́шася отъ Бо́га все́й странѣ́ на́шей, преподо́бне, чудотво́рный о́бразъ Еди́носу́щныя Тро́ицы и твоя́ мо́щи святы́я. Ему́же покланя́ющеся, тя́ почита́емъ.
Яко ши́покъ сладкоуха́нный, о́тче Анто́ніе, гро́бъ тво́й мíру обрѣ́теся. Къ нему́же вси́ приходя́щіи духо́вное благово́ніе въ сердца́хъ свои́хъ отъ него́ объе́млютъ бла́гопотре́бное зѣло́.
Всѣ́мъ вся́къ, блаже́нне, благоче́стнѣ предложи́лъ еси́ себе́: о́вѣмъ у́бо избавле́ніе подая́ отъ вся́кихъ злы́хъ обстоя́ній, о́вѣмъ же отъ неду́гъ здра́віе неоску́дное, о́вѣмъ же спасе́ніе предлага́я, хотя́щимъ мона́шеское пребыва́ніе.
Богоро́диченъ: Умертви́, Богоро́дице, многоко́зненнаго врага́, всю́ тва́рь пре́жде тле́ю умертви́вшаго, ны́нѣ же Тобо́ю ме́ртвіи на жи́знь взыдо́хомъ: родила́ бо еси́ вои́стинну Жи́знь — Бо́га всѣ́хъ.
Инъ.
Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.
Аще и за́йде подъ зе́млю тѣ́ло твое́, но, я́ко со́лнце, дне́сь возсія́, вся́ освѣща́ющее, хваля́щія Христа́ во вѣ́ки.
Мно́госвѣтлое житія́ твоего́, богоблаже́нне Анто́ніе, просвѣща́етъ душе́вныя о́чи и исправля́етъ стопы́ къ добродѣ́тели хваля́щихъ Христа́ во вѣ́ки.
По сме́рти явле́ніемъ твои́мъ, я́ко прокаже́ннаго, очи́стилъ еси́, та́ко, блаже́нне, и мене́, уя́звленна грѣхо́мъ, моли́твъ твои́хъ иссо́помъ очи́сти, пою́ща Христа́ во вѣ́ки.
Богоро́диченъ: На Тя́ наде́жду возложи́хъ, Ма́ти Приснодѣ́во, спасе́нія моего́ и Тя́ Предста́тельницу имѣ́ю жи́зни моея́, поя́ Христа́ во вѣ́ки.
Пѣ́снь 9.
Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.
Тѣ́снымъ и приско́рбнымъ на земли́ ше́ствовавъ путе́мъ, простра́нства небе́снаго ра́достнѣ дости́глъ еси́, идѣ́же зри́ши я́снѣ Пресвяту́ю Тро́ицу со а́нгельскими ли́ки.
Яко зла́то, искуше́но въ горни́лѣ терпѣ́нія, яви́лся еси́, блаже́нне, безъ вся́каго зло́бы примѣ́са; и того́ ра́ди высоту́ дости́гъ добродѣ́телей, воспрія́лъ еси́ Пресвята́го Ду́ха озаре́ніе.
Честна́ вои́стинну сме́рть твоя́, преподо́бне: а́ще бо и преста́вился еси́ отъ на́съ, но ду́хомъ неотсту́пно съ на́ми пребыва́еши, вѣ́рно почита́ющими тя́.
Богоро́диченъ: Вся́ Сотво́ршаго матеролѣ́пно въ Твои́хъ нѣ́дрѣхъ носи́вши, Марíе Дѣ́во, отъ руки́ мя́ изба́ви борца́, я́ко да, спа́саемь Тобо́ю, Твоя́ хвалю́ вели́чія.
Инъ.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.
Еди́наго лѣ́та ко осми́десятимъ въ тече́ніи твое́мъ не досконча́въ, блаже́нне, вы́шнее Ца́рствіе воспрія́лъ еси́, со Христо́мъ ца́рствуя во вѣ́ки.
Оста́вивъ земну́ю сла́ву, къ небе́снѣй взя́лся еси́ любо́вію и, я́ко а́нгелъ, въ жи́зни се́й Бо́гу послужи́въ, къ премíрнымъ духово́мъ преста́вился еси́, Боже́ственнымъ та́мо Свѣ́томъ просвѣща́яся.
Ру́ки, Анто́ніе свя́те, къ Пресвятѣ́й Тро́ицѣ на мольбу́ простри́, ми́лостивное прося́, и́же съ любо́вію пѣ́ніе Ти́ сіе́ прине́сшимъ, и изба́ви всѣ́хъ напа́стей и бѣ́дъ вѣ́рою соверша́ющихъ па́мять твою́ святу́ю.
Богоро́диченъ: Пѣ́ніе съ пѣ́снію и хвале́ніе, исплете́нное отъ болѣ́зненны души́, принесо́хъ со стра́хомъ Тебѣ́, Ро́ждшей Христа́, естество́мъ су́ща Бо́га, Его́же моля́щи, Богоро́дице, благопрія́тна сотвори́ моле́нія на́ша и моли́твами Твои́ми соблюди́ Благовѣ́рнаго Импера́тора и лю́ди.
Свѣти́ленъ:
Твое́ успе́ніе въ пѣ́снехъ пра́зднующихъ посѣща́й моли́твами твои́ми, оставле́ніе прося́ грѣхо́вныхъ собла́знъ и изба́вити всѣ́хъ отъ разли́чныхъ напа́стей, да вси́ тя́ прославля́емъ, блаже́нне Анто́ніе. [Два́жды.]
Сла́ва, и ны́нѣ, богоро́диченъ:
Съ Бо́гомъ упова́ніе на Тя́, Пречи́стая, возложи́хомъ, изъ Тебе́ проше́дшему распя́тому Христу́, Твои́ми къ Нему́ мольба́ми невре́дны да́же до конца́ сохрани́ ны́.
На хвали́техъ стихи́ры на 4, гла́съ 8. Подо́бенъ: О, пресла́внаго чудесе́.
Преподо́бне о́тче Анто́ніе,* ты́, отъ ю́ности Христу́ послѣ́довати возлюби́въ,* вся́, я́же на земли́, мудрова́нія отри́нувъ,* по́стническими труды́ Бо́гу угоди́лъ еси́,* сла́бое по́мысла пови́нуя ду́ху.* И ны́нѣ на небесѣ́хъ со святы́ми всѣ́ми Тро́ицѣ предстои́ши,* Боже́ственныя да́ры отъ Нея́ пріе́мля.* Юже моли́, блаже́нне,* о и́же вѣ́рою пресвяту́ю твою́ па́мять почита́ющихъ. [Два́жды.]
Преподо́бне о́тче Анто́ніе,* ты́ струя́ми сле́зъ твои́хъ пусты́ню безпло́дную напои́лъ еси́,* и въ не́й плоды́ преподо́бія и пра́вды израсти́лъ еси́,* и сего́ ра́ди всыновле́нія да́ръ прія́ти отъ Бо́га сподо́бился еси́,* Святы́мъ Ду́хомъ просвѣща́емь,* сокрове́нныхъ та́инъ я́сно зри́тель обрѣ́лся еси́, сбытія́ послѣ́днихъ време́нъ* сказа́тель нело́женъ бы́въ.* Тѣ́мже моли́ся спасти́ ду́ши на́ша.
Преподо́бне о́тче, блаже́нне Анто́ніе,* и́го Христо́во на ра́мо твое́ взе́мъ,* добродѣ́тели ве́рхъ усе́рдно дости́глъ еси́,* на не́мже утвержде́на любо́вію Го́спода узрѣ́лъ еси́,* восхо́дъ тебѣ́ къ небе́снымъ оби́телемъ исправля́юща.* Ему́же предстои́ши съ преподо́бными всѣ́ми,* моля́ся спасти́ благоче́стнѣ вѣ́рующія въ Пресвяту́ю Тро́ицу* и любоче́стнѣ почита́ющія* честны́я мо́щи твоя́ трудолюбе́зныя.
Сла́ва, гла́съ 6:
Ра́дуйся, пусты́не свята́я и боголюбе́зная, израсти́вшая отца́ сего́ досточу́днаго и воспита́вшая самора́сленными свои́ми бы́ліи, его́же житіе́мъ освяти́вши ложесна́ своя́, небу́рное приста́нище всѣ́мъ вѣ́рнымъ обрѣ́теся: то́й бо просла́ви Бо́га добродѣ́тельнымъ житіе́мъ свои́мъ, въ жи́зни се́й вѣ́рно послужи́въ Ему́. Сего́ ра́ди и Бо́гъ просла́ви того́ чудесы́ Свои́ми богодарова́нными, оби́льна исцѣле́нія подава́етъ приходя́щимъ съ вѣ́рою къ цѣльбоно́сному свято́му его́ гро́бу. Тѣ́мже и мы́, обстоя́ще всечестну́ю ра́ку его́, со стра́хомъ покланя́ющеся, благоче́стнѣ цѣлу́емъ святы́й о́бразъ священнолѣ́пнаго его́ подо́бія и любе́зно вопіе́мъ къ нему́: о всеблаже́нне о́тче на́шъ Анто́ніе! моли́ся неотсту́пно Пресвятѣ́й Тро́ицѣ, Импера́тору благочести́вому дарова́ти на враги́ посо́біе и крѣ́пкое одолѣ́ніе и христоимени́тыя лю́ди отъ зо́лъ спасти́ вся́ческихъ и душа́мъ на́шимъ испроси́ ми́ръ и ве́лію ми́лость.
И ны́нѣ, [богоро́диченъ]:
Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]
Славосло́віе вели́кое, [ектеніи́] и отпу́стъ.
НА ЛИТУРГІИ,Блаже́нна, пѣ́снь 3-я и 6-я. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ Его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ къ Гала́томъ, зача́ло 213. [Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся.] Ева́нгеліе отъ Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].
Источникъ: Минíа, мѣ́сяцъ Деке́мврій. — Кíевъ: Въ Тѵпогра́фіи Кíево-Пече́рской Ла́ѵры, 1894. — Л. 51 об. – 63 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 