Тропа́рь, гла́съ 4:
Дне́сь свѣ́тло красу́ется ца́рствующій гра́дъ Москва́, имѣ́ющи въ себѣ́, о Всеми́лостивѣйшая, всея́ тва́ри Честнѣ́йшая, Засту́пнице на́ша Дѣ́во Богоро́дице, честны́й о́бразъ Тво́й, и́мже подсо́лнечныя концы́ земли́ удивля́еши и ми́ръ мíрови да́руеши, во о́бразъ бо Святы́я Тро́ицы явля́еши тріе́ ру́цѣ: двѣма́ у́бо Сы́на Своего́, Христа́ Бо́га на́шего, но́сиши, тре́тіею отъ напа́стей и бѣ́дъ вѣ́рно къ Тебѣ́ прибѣга́ющихъ избавля́еши, и отъ потопле́нія изыма́еши, и всѣ́мъ поле́зная да́руеши, и преподо́бному Михаи́лу Малео́нскую го́ру показа́, и всѣ́хъ всегда́ ми́луеши, честно́ю ри́зою Свое́ю покрыва́еши жи́тельство сіе́ и вся́ гра́ды и страны́ на́ша, да зове́мъ Ти́: ра́дуйся, Обра́дованная. [Два́жды.]
[Слава, и нынѣ, тойже.]
Кано́нъ, гла́съ 4.[1]
Пѣ́снь 1.
Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.
Припѣ́въ осо́бый: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Умилосе́рдися о мнѣ́, грѣ́шнемъ, погиба́ющемъ, Пресвята́я Богоро́дице, и въ мѣ́сто печа́ли да́руй ми́ ра́дость — ра́дуйся — воспѣва́ти, Всесвята́я Влады́чице.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Утиши́ души́ моея́ свирѣ́пство, поне́же мно́гія ско́рби и печа́ли нападо́ша, и отъ си́хъ, Влады́чице, спаси́ мя, грѣ́шнаго, да не поги́бну, злѣ́ стра́ждущи.
Сла́ва. Ты́ моя́ крѣ́пость, и утвержде́ніе, и отъ враго́въ защище́ніе. Сего́ ра́ди не бою́ся вра́жія преще́нія, но при́сно пою́ Тя́ и сла́влю, Всесла́вная.
И ны́нѣ. Напа́сти, и бѣ́ды, и ско́рби мно́гія пріидо́ша на́мъ и отяготи́ша, изба́ви, Богороди́тельнице Влады́чице, и отъ си́хъ обдержа́щихъ мя́ зо́лъ и весе́лія испо́лни.
Пѣ́снь 3.
Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ты́ еси́ Те́плая Предста́тельница и Ми́лосердая Засту́пница, изба́ви мя́, Всепѣ́тая, отъ наше́дшихъ на мя́ напа́стей, Ты́ бо еси́, Влады́чице, па́дшихъ избавле́ніе.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Изба́ви мя́, Пречи́стая, отъ си́хъ напа́стей, и бѣ́дъ, и преще́нія діа́вольскаго, и уны́нія, и вся́ стра́сти отжени́ отъ мене́, Пречи́стая, да при́сно сла́влю Тя́.
Сла́ва. Се́ къ Тебѣ́, Пречи́стая, притека́ю, не пре́зри моея́ болѣ́зни и воздыха́нія, но при́зри на мя́, въ ско́рби су́щаго, и сію́ мою́ печа́ль на ра́дость преложи́, Богоневѣ́стная.
И ны́нѣ. Ви́ждь, Влады́чице, бѣду́ мою́ и ско́рбь, я́ко лука́вый вра́гъ поглоти́ти мя́ хо́щетъ, Пречи́стая Богоро́дице, прожени́ того́ злохи́трое кова́рство, да изба́влюся и сла́влю Тя́.
Катава́сія: Спаси́ отъ бѣ́дъ рабы́ Твоя́, Богоро́дице, я́ко вси́ по Бо́зѣ къ Тебѣ́ прибѣга́емъ, я́ко неруши́мѣй стѣнѣ́ и предста́тельству.
Сѣда́ленъ, гла́съ 2:
Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ изба́ви на́съ, Еди́на вско́рѣ предста́тельствующая.
[Слава, и нынѣ, тойже.]
Пѣ́снь 4.
Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ты́ еси́, Пречи́стая Влады́чице, наде́жда и утвержде́ніе мое́, и отъ лю́тыхъ ми́ бѣ́дъ свобожде́ніе, и въ печа́ли утѣше́ніе, души́ мое́й просвѣще́ніе и во упова́ніи мое́мъ непобѣди́мая Помо́щница. [Два́жды.]
Сла́ва. Ты́ во всѣ́хъ печа́лехъ бу́ди ми́ сла́дкое утѣше́ніе, и въ бѣда́хъ ско́рая Помо́щница, и въ моли́твахъ Предста́тельница, Ты́ бо еси́ Ма́ти Бо́жія, стяжа́вшая отъ вся́кихъ бѣ́дъ избавле́ніе.
И ны́нѣ. Преклони́ся къ мольба́мъ раба́ Своего́, Влады́чице, и не закосни́ изба́вити мя́ отъ си́хъ всѣ́хъ скорбе́й, и́же одержа́тъ мя́, ви́димыхъ и неви́димыхъ враго́въ отжени́ отъ мене́, да не злѣ́ поги́бну, окая́нный.
Пѣ́снь 5.
Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ору́жія супоста́та и отъ напра́снаго оскорбле́нія изба́ви мя́, осужде́нного, я́ко Ты́ еси́ Всенепоро́чная Ма́ти, Иже бу́детъ суди́ти кому́ждо по дѣло́мъ.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ты́ въ напа́стехъ и ско́рбехъ ми́лостивно защища́еши, и́же подъ кро́въ Тво́й прибѣга́емъ, пріими́, Всесвята́я, сіе́ моле́ніе отъ уны́нія се́рдца моего́, да злѣ́ во отча́яніи не поги́бну.
Сла́ва. Ми́лостивнымъ и кро́ткимъ о́комъ, Богороди́тельнице, воззри́ на мя́, недосто́йнаго, милосе́рдіемъ Свои́мъ при́зри на мя́, и обстоя́нія, и бѣды́, и напа́сти свободи́ призыва́юща Тя́, Всесвята́я.
И ны́нѣ. Первозда́нный Ада́мъ и Ева Тобо́ю, Пречи́стая, изба́вльшеся отъ злы́хъ, съ ни́ми же и а́зъ припа́даю Ти́ и молю́: ми́лостію Свое́ю отрѣши́ моя́ болѣ́зненныя сле́зы и да́ждь ми́ поле́зное утѣше́ніе.
Пѣ́снь 6.
Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Внуши́ печа́льный во́пль раба́ Твоего́, тре́бующаго по́мощи Твоея́, Богома́ти, Ты́ еси́ упова́ніе мое́, потщи́ся печа́ль мою́ на ра́дость преложи́ти.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Изба́ви мя́ отъ льсти́ вра́жія, отъ я́зыка льсти́ва и отъ человѣ́ка непра́веднаго изба́ви мя́ безъ па́кости, вся́ бо мо́жеши, я́ко Ма́ти Зижди́теля су́щи.
Сла́ва. Вѣ́мъ Тя́, Богоблагода́тная, многотру́дныхъ цѣле́бницу, и а́зъ немощны́мъ ду́хомъ и усты́ зову́: отъ напа́сти сея́ и печа́ли свободи́ и спаси́ мя, Влады́чице, прибѣга́ющаго.
И ны́нѣ. Изба́ви мя́ отъ ле́сти сея́ и бѣды́, Богоневѣ́сто, Тя́ бо устро́и Бо́гъ Хода́таицу на спасе́ніе и заступле́ніе на́ше, сего́ ра́ди и мнѣ́, недосто́йному, исхода́тайствуй отъ всея́ печа́ли свобожде́ніе.
[Катава́сія: Спаси́ отъ бѣ́дъ рабы́ Твоя́, Богоро́дице, я́ко вси́ по Бо́зѣ къ Тебѣ́ прибѣга́емъ, я́ко неруши́мѣй стѣнѣ́ и предста́тельству.]
Конда́къ, гла́съ 8:
Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная.
Икосъ:
Ангелъ предста́тель съ небесе́ по́сланъ бы́сть рещи́ Богоро́дицѣ: радуйся! И, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.
[Проки́менъ Богоро́дицы, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе… Ева́нгеліе Луки́, зача́ло 4.
Стихи́ра, гла́съ 6:
Не ввѣ́ри мя́ человѣ́ческому предста́тельству, Пресвята́я Влады́чице, но пріими́ моле́ніе раба́ Твоего́: ско́рбь бо обдержи́тъ мя́, терпѣ́ти не могу́ де́монскаго стрѣля́нія, покро́ва не и́мамъ, ниже́ гдѣ́ прибѣ́гну, окая́нный, всегда́ побѣжда́емь, и утѣше́нія не и́мамъ, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́ніе мое́, поле́зно сотвори́].
Пѣ́снь 7.
Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ты́ еси́, Пречи́стая Дѣ́во, Покрови́тельница моя́ и непреста́нное упова́ніе души́ мое́й, о Влады́чице, пріими́ мя, одержи́ма лю́тою бѣдо́ю, и утѣ́ши мою́ печа́ль. [Два́жды.]
Сла́ва. Ты́ еси́ крѣ́пость моя́, Пречи́стая Влады́чице, и наше́дшихъ на мя́ си́хъ неча́емыхъ скорбе́й утѣше́ніе. Сего́ ра́ди а́зъ, недосто́йный ра́бъ Тво́й, всенаде́жно вопію́ Ти: поми́луй мя́, па́дшаго.
И ны́нѣ. Исцѣли́ души́ моея́ я́звы, Влады́чице, и заступи́ мя, раба́ Твоего́, и изба́ви мя́ отъ вся́каго обава́нія непра́веднаго и отъ сопроти́внаго навѣ́та и развраще́нія изми́ мя, Всеблагослове́нная.
Пѣ́снь 8.
Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Сокруши́ совѣ́ты непра́ведныя, я́же на мя́ изощре́ны су́ть, а́зъ бо ины́я по́мощи не и́мамъ, ра́звѣ Тебе́, Чи́стая, къ Тебѣ́ прибѣга́ю, не попусти́ ми: вся́ бо Тебѣ́ возмо́жна су́ть.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Ду́шу мою́ сохрани́ кро́вомъ крилу́ Твое́ю, Преблагослове́нная Богоро́дице, отъ разли́чныхъ належа́щихъ бѣ́дъ и скорбе́й изба́ви мя́, да не пора́дуется вра́гъ мо́й о мое́й не́мощи, но да сла́вится Бо́жія Ма́терь во вѣ́ки.
Сла́ва. Азъ у́бо по́мощи человѣ́ческія иска́ти не прибѣго́хъ, но къ Тебѣ́, Пренепоро́чная: Ты́ еси́ всенаде́жная Храни́тельница христіа́номъ.
И ны́нѣ. Ты́ еси́, Богоро́дице, просвѣще́ніе и избавле́ніе, Ты́ еси́ Побо́рница моя́ Прера́дованная. Ты́ еси́ наде́жда неруши́мая, стѣна́ и сла́ва хвали́мая, Пренепоро́чная Дѣ́во. Тебѣ́ всеусе́рдно поклоня́юся и вопію́: спаси́ мя отъ печа́ли сея́ и напа́сти.
Пѣ́снь 9.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Изсше, я́ко скуде́ль, крѣ́пость моя́, и ко а́ду приложи́хся душепа́губныхъ зо́лъ. Предвари́ мя, Ма́ти Бо́жія, заступле́ніемъ Свои́мъ, исхи́ти мя́ отъ одержа́щихъ скорбе́й руко́ю ми́лости Твоея́.
Припѣ́въ: Пресвята́я Госпоже́ Богоро́дице, услы́ши моли́тву ра́бъ Свои́хъ, моля́щихся Тебѣ́.
Сѣ́ти лука́выхъ и злочести́выхъ сокруши́, Чи́стая Богороди́тельнице, исхи́ти мя́ неврежде́на, Тво́й бо е́смь ра́бъ: о, ра́дуйся, Обра́дованная!
Сла́ва. Всенепоро́чная Отрокови́це, всѣ́мъ вѣ́рнымъ христіа́номъ по́мощь, бу́ди и мнѣ́ неоску́дная Помо́щница къ Сы́ну Своему́ и Бо́гу, сла́вимому въ Тро́ицѣ, и свободи́ мя́ отъ сея́ наше́дшія ско́рби.
И ны́нѣ. Ты́ еси́ крѣ́пость моя́, Пречи́стая, и прибѣ́жище, и стѣна́ необори́мая, Ты́ еси́ къ Бо́гу моли́твенница, вся́кихъ мя́ напа́стей и бѣ́дъ свободи́, еди́на Благослове́нная.
Примѣчаніе:
[1] Древній канонъ (встрѣчается съ тѣмъ же надписаніемъ и у старообрядцевъ). Является одной изъ редакцій другого древняго канона Пресвятой Богородицѣ, «поемаго егда пріидетъ на кого бѣда, печаль или сѣтованіе». (Прим. — А. К.).
Источникъ: Мине́я Ию́нь. Ча́сть втора́я. — М.: Издательскій совѣтъ Русской Православной Церкви, 2002. — С. 424-429.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.