СЛУЖБА ВОСКРЕСНАЯ 2-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ… стихи́ры воскре́сны Осмогла́сника 3, повторя́юще пе́рвую, гла́съ 2.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Пре́жде вѣ́къ отъ Отца́ ро́ждшемуся Бо́жію Сло́ву, вопло́щшемуся отъ Дѣ́вы Марíи, пріиди́те, поклони́мся: крестъ бо претерпѣ́въ, погребе́нію предаде́ся, я́ко Са́мъ восхотѣ́, и воскре́съ изъ ме́ртвыхъ, спасе́ мя заблужда́ющаго человѣ́ка.

Христо́съ Спа́съ на́шъ, е́же на ны́ рукописа́ніе, пригвозди́въ на крестѣ́, загла́ди, и сме́рную держа́ву упраздни́; покланя́емся Его́ тридне́вному Воскресе́нію.

Со арха́нгелы воспои́мъ Христо́во Воскресе́ніе, То́й бо е́сть Изба́витель и Спа́съ ду́шъ на́шихъ, и въ сла́вѣ стра́шнѣй и крѣ́пцѣй си́лѣ па́ки гряде́тъ суди́ти мíру, его́же созда́.

Сла́ва, и ны́нѣ, богоро́диченъ догма́тикъ, гла́съ 2:
О, преве́лія та́инства! Зря́ чудеса́, проповѣ́дую Божество́: Емману́илъ бо естества́ у́бо врата́ отве́рзе, я́ко Человѣколю́бецъ, дѣ́вства же ключи́ не разруши́, я́ко Бо́гъ, но си́це отъ утро́бы про́йде, я́коже слу́хомъ вни́де; та́ко воплоти́ся, я́коже зача́тся. Безстра́стно вни́де, несказа́нно изы́де, по проро́ку глаго́лющему: сія́ врата́ заключе́на бу́дутъ, никто́же про́йдетъ и́ми, то́кмо еди́нъ Госпо́дь Бо́гъ Изра́илевъ, имѣ́яй ве́лію ми́лость.

Та́же: Свѣ́те Ти́хій… Посе́мъ проки́менъ: Госпо́дь воцари́ся, въ лѣ́поту облече́ся.., три́жды. Сти́хъ: Облече́ся Госпо́дь въ си́лу и препоя́сася. Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ

На стихо́внѣ стихи́ру воскре́сну, гла́съ 2:
Воскресе́ніе Твое́, Христе́ Спа́се, всю́ просвѣти́ вселе́нную, и призва́лъ еси́ Твое́ созда́ніе, Всеси́льне Го́споди, сла́ва Тебѣ́.

Ины стихи́ры, Пресвятѣ́й Богоро́дицѣ, гла́съ то́йже. Подо́бенъ: Егда́ отъ Дре́ва Тя́.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Всѣ́хъ скорбя́щихъ ра́досте, и оби́димыхъ предста́тельнице, и убо́гихъ пита́тельнице, стра́нныхъ же утѣше́ніе, и же́зле слѣпы́хъ, немощны́хъ посѣще́ніе, тружда́ющихся покро́ве и засту́пнице, и си́рыхъ помо́щнице, Ма́ти Бо́га Вы́шняго — Ты́ еси́, Пречи́стая; потщи́ся, мо́лимся, спасти́ся рабо́мъ Твои́мъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Вся́кое беззако́ніе неща́дно, вся́кій грѣ́хъ невозде́ржно окая́нный содѣ́лахъ, вся́каго осужде́нія досто́инъ е́смь. Вины́ покая́нія мнѣ́ пода́ждь, Дѣ́во, я́ко да не осужде́нъ та́мо явлю́ся. Тя́ бо напису́ю моли́твенницу, Тя́ призыва́ю предста́тельницу, не посрами́ мене́, Богоневѣ́стная.

Сти́хъ: Лицу́ Твоему́ помо́лятся бога́тіи лю́дстіи.

Ино́го прибѣ́жища, Чи́стая, къ Творцу́ и Влады́цѣ мы́ не и́мамы ра́звѣ Тебе́, Богоневѣ́сто, да не отри́неши на́съ те́плымъ Твои́мъ предста́тельствомъ, ниже́ посрами́ши любо́вію притека́ющихъ подъ кро́въ Тво́й, Ма́ти Бо́га на́шего, потщи́ся, и Твою́ по́мощь да́ждь, и ны́нѣшняго гнѣ́ва на́съ спаси́.

Сла́ва, и ны́нѣ, богоро́диченъ, гла́съ 2:
Кто́ Тя́ по достоя́нію похва́литъ и ублажи́тъ, Отрокови́це Богоневѣ́стная, о е́же Тобо́ю бы́вшемъ мíрови избавле́ніи? Благодаря́ще у́бо зове́мъ Ти́, глаго́люще: ра́дуйся, я́же Ада́ма обожи́вшая, и разстоя́щая совокупи́вшая, ра́дуйся, просвѣти́вшая ро́дъ на́шъ свѣто́носнымъ Воскресе́ніемъ Сы́на Твоего́ и Бо́га на́шего: Тя́ бо христіа́нскій ро́дъ непреста́нно ублажа́емъ.

Та́же: Ны́нѣ отпуща́еши… Трисвято́е, и по Отче на́шъ… Тропа́рь воскре́сенъ. Ектенія́ ма́лая и отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
На Го́споди воззва́хъ… поста́вимъ стихо́въ 10 и пое́мъ стихи́ры воскре́сны Осмогла́сника 3 и анато́ліевы 4, и Мине́и 3, или́ 4, или́ 6, а́ще пра́зднуется святы́й. Сла́ва, Мине́и. И ны́нѣ, богоро́диченъ пе́рвый, гла́са.

Стихи́ры воскре́сны, гла́съ 2.

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Пре́жде вѣ́къ отъ Отца́ ро́ждшемуся Бо́жію Сло́ву, вопло́щшемуся отъ Дѣ́вы Марíи, пріиди́те, поклони́мся: кре́стъ бо претерпѣ́въ, погребе́нію предаде́ся, я́ко Са́мъ восхотѣ́, и воскре́съ изъ ме́ртвыхъ, спасе́ мя́ заблужда́ющаго человѣ́ка.

Сти́хъ: Мене́ жду́тъ пра́ведницы, до́ндеже возда́си мнѣ́.

Христо́съ Спа́съ на́шъ, е́же на ны́ рукописа́ніе, пригвозди́въ на Крестѣ́, загла́ди, и сме́рную держа́ву упраздни́; покланя́емся Его́ тридне́вному Воскресе́нію.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Со арха́нгелы воспои́мъ Христо́во Воскресе́ніе: То́й бо е́сть Изба́витель и Спа́съ ду́шъ на́шихъ, и въ сла́вѣ стра́шнѣй и крѣ́пцѣй си́лѣ па́ки гряде́тъ суди́ти мíру, его́же созда́.

Ины стихи́ры, анато́ліевы, гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Тебе́, Распе́ншагося и Погребе́ннаго, а́нгелъ проповѣ́да Влады́ку, и глаго́лаше жена́мъ: пріиди́те, ви́дите, идѣ́же лежа́ше Госпо́дь; воскре́се бо, я́коже рече́, я́ко Всеси́ленъ. Тѣ́мже Тебѣ́ покланя́емся, Еди́ному Безсме́ртному: Жизнода́вче Христе́, поми́луй на́съ.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Кресто́мъ Твои́мъ упраздни́лъ еси́, ю́же отъ дре́ва кля́тву, погребе́ніемъ Твои́мъ умертви́лъ еси́ сме́рти держа́ву, Воста́ніемъ же Твои́мъ просвѣти́лъ еси́ ро́дъ человѣ́ческій. Сего́ ра́ди вопіе́мъ Ти́: Благодѣ́телю Христе́ Бо́же на́шъ, сла́ва Тебѣ́.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Отверзо́шася Тебѣ́, Го́споди, стра́хомъ врата́ сме́ртная, вра́тницы же а́довы, ви́дѣвше Тя́, убоя́шася; врата́ бо мѣ́дная сокруши́лъ еси́, и вереи́ желѣ́зныя сте́рлъ еси́, и изве́лъ еси́ на́съ отъ тмы́ и сѣ́ни сме́ртныя, и у́зы на́ша растерза́лъ еси́.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Спаси́тельную пѣ́снь пою́ще, отъ у́стъ возсле́мъ: пріиди́те вси́, въ дому́ Госпо́днемъ припаде́мъ, глаго́люще: на Дре́вѣ Распны́йся, и изъ ме́ртвыхъ Воскресы́й, и Сы́й въ нѣ́дрѣхъ Отчихъ, очи́сти грѣхи́ на́ша.

Ины стихи́ры, Пресвятѣ́й Богоро́дицѣ. Пое́мъ и́хъ, идѣ́же нѣ́сть Мине́и. Творе́ніе Па́вла Аморре́йскаго, гла́съ 6. Подо́бенъ: Отча́янная житія́ ра́ди.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Яже ненаде́жныхъ упова́ніе извѣ́стное и согрѣша́ющихъ спасе́ніе, Марíе Всепѣ́тая, Чи́стая Богоро́дице, пріими́ моле́ніе мое́ сіе́ и испроси́ ми́ разрѣше́нія всѣ́хъ, я́же согрѣши́хъ въ житіи́, ма́терними Твои́ми моли́твами, и спаси́ отъ бѣ́дъ и бу́дущаго суда́, Влады́чице, вели́кія ра́ди Твоея́ ми́лости.

Сти́хъ: Хвали́те Го́спода, вси́ язы́цы, похвали́те Его́, вси́ лю́діе.

Лука́во вре́мя живота́ моего́, лука́во и испо́лнь вся́кія зло́бы, сатанѣ́ лука́вому лю́тѣ мя́ смуща́ющу, Ты́ мя́, Богороди́тельнице, изба́ви того́ па́кости, Ты́ мя́ отъ у́стъ о́наго исто́ргни, Пресвята́я, на Тя́ бо все́ возложи́хъ ча́яніе мое́, спаси́ мя́ Твои́ми бо́дрыми моли́твами.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Ра́дуйся, непосты́дная Предста́тельнице; ра́дуйся, Преблага́я Богоро́дице; ра́дуйся, очисти́лище мíра; ра́дуйся, ра́досте скорбя́щихъ и приста́нище обурева́емымъ; ра́дуйся, я́же всѣ́мъ помога́ющая су́щимъ въ ну́ждахъ. Ты́ у́бо сохрани́ и мене́, Дѣ́во, всѣ́хъ ско́рбныхъ, Пренепоро́чная Влады́чице.

Сла́ва, и ны́нѣ, богоро́диченъ:
Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго Пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Та́же вхо́дъ съ кади́ломъ. Свѣ́те Ти́хій… Проки́менъ и ектеніи́.

На стихо́внѣ стихи́ры воскре́сны, гла́съ 2:
Воскресе́ніе Твое́, Христе́ Спа́се, всю́ просвѣти́ вселе́нную, и призва́лъ еси́ Твое́ созда́ніе, Всеси́льне Го́споди, сла́ва Тебѣ́.

Ины стихи́ры, по алфави́ту.

Сти́хъ: Госпо́дь воцари́ся, въ лѣ́поту облече́ся.

Дре́вомъ, Спа́се, упраздни́лъ еси́ ю́же отъ дре́ва кля́тву, держа́ву сме́рти погребе́ніемъ Твои́мъ умертви́лъ еси́, просвѣти́лъ же еси́ ро́дъ на́шъ Воста́ніемъ Твои́мъ. Тѣ́мже вопіе́мъ Тебѣ́: Животода́вче Христе́ Бо́же на́шъ, сла́ва Тебѣ́.

Сти́хъ: Ибо утверди́ вселе́нную, я́же не подви́жится.

На Крестѣ́ я́влься, Христе́, пригвожда́емь, измѣни́лъ еси́ добро́ту зда́ній; и безчеловѣ́чіе у́бо во́ини показу́юще, копіе́мъ ре́бра Твоя́ прободо́ша, евре́и же печа́тати гро́ба проси́ша, Твоея́ вла́сти не вѣ́дуще. Но за милосе́рдіе утро́бъ Твои́хъ пріе́мый погребе́ніе и тридне́венъ воскресы́й, Го́споди, сла́ва Тебѣ́.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Животода́вче Христе́, во́лею Стра́сть претерпѣ́вый сме́ртныхъ ра́ди, во а́дъ же снизше́дъ, я́ко Си́ленъ, та́мо Твоего́ прише́ствія ожида́ющія, исхи́тивъ я́ко отъ звѣ́ря [1]крѣ́пкаго, ра́й вмѣ́сто а́да жи́ти дарова́лъ еси́. Тѣ́мже и на́мъ, сла́вящимъ тридне́вное Твое́ Воста́ніе, да́руй очище́ніе грѣхо́въ и ве́лію ми́лость.

Сла́ва, и ны́нѣ, богоро́диченъ:
О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.

Та́же: Ны́нѣ отпуща́еши… Трисвято́е, по Отче на́шъ…

Тропа́рь воскре́сенъ, гла́съ 2:
Егда́ снизше́лъ еси́ къ сме́рти, Животе́ Безсме́ртный, тогда́ а́дъ умертви́лъ еси́ блиста́ніемъ Божества́; егда́ же и уме́ршія отъ преиспо́днихъ воскреси́лъ еси́, вся́ си́лы небе́сныя взыва́ху: Жизнода́вче, Христе́ Бо́же на́шъ, сла́ва Тебѣ́.

Богоро́диченъ:
Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му [2], Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.

ВЪ СУББОТУ НА ПОВЕЧЕРІИ,
Кано́нъ Пресвятѣ́й Богоро́дицѣ. [Его́же и отъ оклевета́нія, въ печа́лехъ и напа́стехъ су́щіи да пою́тъ.] Гла́съ 2.

Пѣ́снь 1.
Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

[Припѣ́въ: Пресвята́я Богоро́дице, спаси́ на́съ.]

Яже всѣ́мъ удо́бь послу́шная въ ско́рби и въ печа́ли помога́ющая, Богоро́дице Блага́я, благода́ть пода́ждь пѣ́ти Тя́ дерза́ющимъ, Влады́чице, скорбя́щихъ Ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою пресла́вно изми́ мя́ отъ напа́стей, убо́гаго раба́ Твоего́, скорбя́щихъ Ра́досте.

Сла́ва: Отъ вра́гъ ви́димыхъ и неви́димыхъ изба́ви, мо́лимся, къ Тебѣ́ прибѣга́ющихъ, Богоро́дице, и разори́ вся́къ совѣ́тъ борю́щихъ на́съ.

И ны́нѣ: Отыми́ поноше́ніе человѣ́ческое и клеветы́ навѣ́тникъ отъ мене́, Богоро́дице, молю́ Тя, да усе́рдно сла́влю Го́спода, Его́же пита́ла еси́.

Пѣ́снь 3.
Ирмо́съ: Утверди́ на́съ въ Тебѣ́, Го́споди, дре́вомъ умерщве́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Враго́въ навѣ́ты разори́ су́етныя, Всепѣ́тая Богоро́дице, не оскудѣ́й моли́твами Твои́ми, снабдя́щи на́съ, восхваля́ющихъ Тя́.

При́зри, Чи́стая, ми́лостивнымъ Твои́мъ о́комъ и изба́ви мя́ вся́каго навѣ́та ви́димыхъ и неви́димыхъ враго́въ, ослѣпи́вши зѣ́ницы оче́съ и́хъ.

Сла́ва: Зло́е нападе́ніе враго́въ, я́ко о́гнь паля́щее, и́щущихъ всегда́ погуби́ти на́съ, Дѣ́во, росо́ю моли́твъ Твои́хъ угаси́.

И ны́нѣ: Неугаси́мая лампа́до, заря́ присносія́тельная, но́щію мя́ скорбе́й одержи́ма, просвѣти́ моли́твами Твои́ми, ро́ждшая Со́лнце сла́вы Христа́.

Пѣ́снь 4.
Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Спасе́нія Тя́ мо́стъ, моли́тву неусы́пну, заступле́ніе тве́рдо мо́лимъ: умилосе́рдися и ви́ждь на́шу нестерпи́мую печа́ль, болѣ́зни, ско́рби, стра́сти и благопремѣ́нно посѣти́, Ма́ти Бо́жія, ра́дость ско́рую подаю́щи.

Не неприча́стни есмы́, Влады́чице, Твоего́ заступле́нія въ ско́рбехъ, тѣ́мже и ны́нѣ на́мъ помози́ вско́рѣ, лю́те обурева́емымъ ру́ку простира́ющи, Чи́стая, бу́ди ми́лостива болѣ́знемъ на́шимъ, Ма́ти Бо́жія, ра́дость ско́рую подаю́щи.

Сла́ва: Не упова́ша, Влады́чице, на Тя́ беззако́ннующіи, но упова́ша на язы́къ велере́чивъ, на язы́къ человѣ́чь, при́сно зави́стно излія́вшійся, непра́ведно пролія́ти кро́вь и́скренняго, рыка́юще. Ты́ же, Чи́стая, че́люсти и́хъ сокруши́.

И ны́нѣ: Смири́, Влады́чице, враго́въ вознесе́нную вы́ю велере́чующихъ, совѣ́ты, и злонра́вія, и сердца́, поуча́ющаяся злы́мъ на мя́ по вся́ дни́; крѣ́пость же и побѣ́ду пода́ждь призыва́ющимъ Тя́, Ма́ти Бо́жія, ра́дость ско́рую подаю́щи.

Пѣ́снь 5.
Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Моли́твеннице нело́жная, упова́ніе христіа́нъ, Обра́дованная, пріими́ мольбы́ отъ на́съ, прилѣ́жно призыва́ющихъ и моля́щихся Тебѣ́.

Исто́чникъ Тя́ жи́зни су́щи, Чи́стая, безсме́ртія источа́ющій во́ды, земноро́дніи позна́вше, ублажа́емъ.

Сла́ва: Вооружи́ся на ны́ лука́вно вра́гъ, язы́комъ, я́коже мече́мъ, погуби́ти хотя́, но Твое́ю, Богороди́тельнице, крѣ́постію предвари́.

И ны́нѣ: Пучи́ну, Чи́стая, заступле́ній кто́ изочте́тъ си́лы Твоея́? Тѣ́мже на́съ, су́щихъ въ ну́ждѣ, ско́ро предвари́.

Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Цѣлому́дрія су́щи хода́таица призыва́ющимъ Тя́ ны́нѣ яви́ся и отъ вся́кихъ изба́ви напа́стей и бѣ́дъ, Богоневѣ́сто.

Злодѣ́йства вра́жія разори́ и клеветы́ непра́ведныя уста́ви, Благослове́нная Пречи́стая, избавля́ющи непови́нныя отъ ско́рби.

Сла́ва: Лю́тыми грѣхи́ окруже́ни и напа́стными бѣда́ми потопля́еми, подъ боже́ственный покро́въ Тво́й прибѣга́емъ, Ма́ти Христа́ Бо́га.

И ны́нѣ: Неискусому́жно ро́ждши Го́спода, яви́ся по рождествѣ́ па́ки дѣ́вствующи. О, пресла́внаго чудесе́, въ Тебѣ́ содѣ́ланнаго, Богоневѣ́сто!

Та́же: Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 2:
Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ изба́ви на́съ, Еди́на вско́рѣ предста́тельствующая.

Пѣ́снь 7.
Ирмо́съ: Да пресла́вное рождество́ Твое́, Христе́, е́же отъ Дѣ́вы, прообрази́ши я́вѣ, неопали́мы въ пещи́ о́троки сохрани́лъ еси́, пѣ́сньми пою́щія Тебѣ́: отце́въ Бо́же, благослове́нъ еси́.

О, благоутро́бія Твоего́, Дѣ́во Чи́стая! Рѣши́ши бо безмѣ́рныя печа́ли и напа́сти призыва́ющимъ въ ну́ждѣ и обстоя́ніи, тѣ́мже и ны́нѣ помози́, Благослове́нная, Тя́ восхваля́ющимъ.

Покажи́ ско́рое Твое́ заступле́ніе, покажи́, я́ко мо́жеши, я́ко Ма́ти Бо́гу, призыва́емъ Тя́ отъ се́рдца со слеза́ми припа́дающе, ско́рбь укроти́ и болѣ́знь рабо́въ Твои́хъ вско́рѣ.

Сла́ва: Уста́ человѣ́комъ, я́ко льво́мъ лю́тымъ, гро́ба тяжча́йше отверзо́шася го́рько поглоти́ти мя́, но Ты́, Богоро́дице, яви́ся Наде́жда ненадѣ́ющимся, и низложи́ крѣ́пость и́хъ, Благослове́нная.

И ны́нѣ: Да у́зрятъ врази́ и постыдя́тся, да разумѣ́ютъ и ви́дятъ Твою́, е́же по на́мъ сопроти́въ борю́щую си́лу, и въ про́пасть преиспо́днюю низложи́ и́хъ, Благослове́нная, Наде́ждо ненадѣ́ющихся.

Пѣ́снь 8.
Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Прибѣ́жище на́ше и мíру ра́дованіе, Богороди́тельнице, умилосе́рдитися потщи́ся и спѣ́шно благода́ть Твою́ пода́ждь на́мъ, оскорбле́ннымъ, и заступи́, Блага́я, Твоя́ рабы́.

Совѣ́тъ су́етенъ совѣща́ша лю́тѣ на ны́ безбо́жныхъ со́нмища, я́коже пре́жде Ахитофе́лъ. Но вопіе́мъ: Твои́ми моли́твами се́й разори́, низло́жши си́хъ крѣ́пость, Богоро́дице.

Сла́ва: Призыва́ющихъ Тя́, Богоро́дице, отъ души́ нело́жно во вся́кой ско́рби, и въ болѣ́знехъ разли́чныхъ, и бѣда́хъ лю́тыхъ спѣ́шно услы́ши, Влады́чице, си́хъ избавля́ющи при́сно моли́твами Твои́ми.

И ны́нѣ: Да и́мя Твое́, Богоро́дице, на земли́ славосло́вится, Иже изъ Тебе́ возсія́въ, грѣ́шникомъ держа́вную наде́жду и стѣ́ну Тя́ дарова́, Тобо́ю бо вся́кое дыха́ніе къ Бо́гу притека́етъ.

Пѣ́снь 9.
Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Да загради́тся вся́къ язы́къ, лука́вымъ поуча́яйся, да молча́тъ устна́ льсти́вая и уста́ непра́ведно глаго́лющая на пра́веднаго беззако́ніе, горды́нею и за́вистію вражде́бною вку́пѣ, Богоро́дицы моли́твою и святы́хъ Христо́выхъ.

Иже въ моли́твахъ бо́друю, Чи́стую Богоро́дицу призыва́емъ вси́, болѣ́знію и ско́рбію одержи́ми, взыва́юще: Влады́чице Чи́стая, ско́ро изба́ви отъ одержа́щихъ болѣ́зней рабы́ Твоя́ при́сно, я́ко по Бо́зѣ засту́пницы ины́я не и́мамы.

Сла́ва: Отча́явшихся ве́ліе прибѣ́жище, обурева́емыхъ ти́хое приста́нище Ты́ еси́, Богоро́дице. Тѣ́мже и мы́ притека́емъ, взыва́юще: да не постыди́мся, Ма́ти Истиннаго Живота́, но да благодаря́ще усе́рдно, Тя́ велича́емъ.

И ны́нѣ: Пріими́, Отрокови́це Пречи́стая, Боже́ственную пѣ́снь, воздава́ющи благода́ть на Тя́ надѣ́ющимся, и ми́ръ испроси́ це́рквамъ при́сно посла́ти, и ИМПЕРАТОРУ на́шему одолѣ́ніе и побѣ́ды, да христіа́нскій вся́къ язы́къ Тя́ велича́етъ.

Та́же: Досто́йно е́сть… И про́чее обы́чно, и отпу́стъ.

ВЪ НЕДѢЛЮ НА ПОЛУНОЩНИЦѢ,
Кано́нъ Тро́ичный, творе́ніе Митрофа́ново, его́же краестро́чіе: Тригу́бый пою́ Богонача́лія Свѣ́тъ. Гла́съ 2.

[Припѣ́въ: Пресвята́я Тро́ице, Бо́же на́шъ, сла́ва Тебѣ́.]

Тро́ичное и единонача́льное естество́ Божества́, пѣ́сненно воспои́мъ, глаго́люще: ми́лости пучи́ну неизчерпа́емую, суще́ственную я́ко иму́щи, Тебѣ́ кла́няющихся соблюди́ и спаси́, я́ко Человѣколю́бецъ.

Иже исто́чникъ и ко́рень Оте́цъ сы́й, я́ко Вино́венъ, Иже въ Сы́нѣ и Святѣ́мъ Твое́мъ Ду́сѣ, сра́сленнаго Божества́ трисо́лнечный се́рдцу моему́ источи́ свѣ́тъ и прича́стіемъ осія́й Богодѣ́тельнаго сія́нія.

Сла́ва: Трисвѣ́тлая Еди́нице Богонача́льная, ве́сь разори́ грѣхо́въ и страсте́й мои́хъ мра́къ свѣ́тлыхъ луче́й Твои́хъ сладча́йшими причаще́ньми, и сотвори́ мя́ Твоея́ непристу́пныя сла́вы хра́мъ и сѣ́нь пречи́стую.

[И ны́нѣ,] богоро́диченъ: То́къ дре́вній естества́ на́шего, страда́вшій безмѣ́стно и къ тли́ попо́лзшійся, Пречи́стая, вопло́щься во утро́бѣ Твое́й Бо́гъ Сло́во, человѣколю́бнѣ осія́ и Богонача́лію Трисвѣ́тлому на́съ та́йно научи́.

Пѣ́снь 3.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Ра́венствомъ естества́ Богонача́ліе единоче́стное сла́влю Тя́ Ли́цы: Живо́тъ бо отъ Живота́ Ты́ произше́дъ нетлѣ́нно, Еди́нъ сы́й Бо́гъ на́шъ, и нѣ́сть свя́тъ, па́че Тебе́, Го́споди.

Ты́ чи́ны невеще́ственныя и небе́сныя соста́вилъ еси́, я́ко зерца́ла Твоея́ добро́ты, Тро́ице, Нераздѣ́льное Единонача́ліе, пѣ́ти непреста́нно Тебѣ́. Но и ны́нѣ на́ше отъ бре́нныхъ у́стъ пріими́ хвале́ніе.

Сла́ва: Утверди́ на ка́мени вѣ́ры и разшири́ любве́ Твоея́ пучи́ною сердца́ и мы́сль Твои́хъ ра́бъ, Еди́нице Трисо́лнечная, Ты́ бо Бо́гъ на́шъ, на Него́же упова́юще, да не посрами́мся.

[И ны́нѣ,] богоро́диченъ: Иже вся́къ пре́жде соста́въ осуществова́вый тва́ри, во утро́бѣ Твое́й осуществова́ся неизче́тною бла́гостію, Богоро́дице, и Свѣ́тъ Трисо́лнечный всѣ́мъ возсія́ Еди́наго Божества́ и Госпо́дьства.

[Го́споди, поми́луй, три́жды.]

Сѣда́ленъ, гла́съ 2. Подо́бенъ: Благоутро́бія.
Егда́ въ нача́лѣ Ада́ма созда́лъ еси́, Го́споди, тогда́ Сло́ву Твоему́ Ѵпоста́сному возопи́лъ еси́, Благоутро́бне: сотвори́мъ по На́шему подо́бію; Ду́хъ же Святы́й сопрису́тствоваше Содѣ́тель. Тѣ́мже вопіе́мъ Ти́: Тво́рче, Бо́же на́шъ, сла́ва Тебѣ́!

Сла́ва, и ны́нѣ, богоро́диченъ:
Егда́ къ на́мъ Бо́гъ пріити́ изво́ли, тогда́ въ Твою́, Пречи́стая, чистѣ́йшую утро́бу всели́ся и спасе́ Тобо́ю человѣ́ческое смѣше́ніе, дарова́вый всѣ́мъ Ца́рство небе́сное.Тѣ́мже вопіе́мъ Ти́, Богоро́дице Чи́стая: ра́дуйся, Влады́чице!

Пѣ́снь 4.
Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Разумѣ́ти Тя́ ниже́ чи́нове мо́гутъ невеще́ственніи а́нгельстіи, Еди́нице, Тро́ице Безнача́льная, но у́бо мы́ бре́ннымъ язы́комъ Твою́ су́щественную бла́гость воспѣва́емъ и вѣ́рою сла́вимъ.

Сы́й Созда́тель естества́ человѣ́ческаго, Вседержи́телю, все́ мое́ ви́диши ны́нѣ, я́ко Всеви́децъ, неможе́ніе, тѣ́мже уще́дри раба́ Твоего́ и къ жи́зни лу́чшей па́ки возведи́.

Сла́ва: Еди́ницы Нача́льныя несмѣ́сна Три́ Ли́ца воспѣва́емъ, я́ко сво́йственнѣ иму́щая и раздѣ́льнѣ ѵпоста́си, но у́бо соедине́на и нераздѣ́льна въ совѣ́тѣ же, и сла́вѣ, и Божествѣ́.

[И ны́нѣ,] богоро́диченъ: Хра́мъ Тя́ чи́стъ и пренепоро́ченъ, Приснодѣ́во Богоро́дице, Вседѣ́тель обрѣ́те Еди́ну я́вѣ отъ вѣ́ка, въ Ню́же все́лься, вообрази́ человѣ́ческое естество́, я́ко Человѣколю́бецъ.

Пѣ́снь 5.
Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Яко вся́чески на вся́ су́щія Твоего́ про́мысла, мирода́рныя простира́яй лучи́ и спаси́тельныя, Царю́ ми́ра, соблюди́ мя́ въ ми́рѣ Твое́мъ, Ты́ бо Живо́тъ и Ми́ръ вся́ческому.

Моисе́ю въ купинѣ́ я́ко яви́лся еси́ въ видѣ́ніи о́гненнѣ, Ангелъ наре́клся еси́, Отчее Сло́во, Еже къ на́мъ Твое́ предъявля́я прише́ствіе, и́мже всѣ́мъ я́вѣ возвѣсти́лъ еси́ держа́ву Богонача́лія Еди́наго, Тріѵпоста́сную.

Сла́ва: Яже есте́ственную, соприсносу́щную сла́ву предло́жиши, Единонача́льнейшая Тро́ице Свята́я, воспѣва́ющихъ Тя́ правосла́вною вѣ́рою, Твоея́ сла́вы ви́дѣти сподо́би, безнача́льную и еди́ну Зарю́ Трисо́лнечную.

[И ны́нѣ,] богоро́диченъ: Содержи́тельный по существу́ сы́й Бо́гъ Сло́во всѣ́мъ вѣко́мъ, Дѣ́во Ма́ти, во чре́вѣ Твое́мъ удержа́ся неизрече́нно, человѣ́ки призыва́я ко еди́нству еди́наго Госпо́дьства.

Воли́телю ми́лости, поми́луй въ Тя́ вѣ́рующихъ, Бо́же Трисо́лнечне, и прегрѣше́ній изба́ви, и страсте́й, и бѣ́дъ, рабы́ Твоя́. [Два́жды.]

Сла́ва: Неизрече́нною пучи́ною бла́гости необмы́слимую Твоего́ сія́нія и Трисія́ннаго Божества́ свѣтода́тельную зарю́ пода́ждь ми́.

[И ны́нѣ,] богоро́диченъ: Неизрече́ннѣ, Дѣ́во, Вы́шній — Человѣ́къ бы́сть изъ Тебе́, въ человѣ́ка по всему́ обо́лкся и Свѣ́томъ мя́ Трисо́лнечнымъ озари́.

[Го́споди, поми́луй, три́жды.]

Сѣда́ленъ, гла́съ 2. Подо́бенъ: Благоутро́бія.
Благоутро́бія пучи́ну на́мъ простры́й, пріими́ на́съ, Ми́лостиве, при́зри на лю́ди Тя́ сла́вящія, пріими́ пѣ́снь прося́щихъ Тя́, Тро́ице Еди́нице Безнача́льная, на Тя́ бо упова́емъ, всѣ́хъ Бо́га, прегрѣше́ній да́ти проще́ніе.

Сла́ва, и ны́нѣ, богоро́диченъ:
Благоутро́бія ро́ждши Исто́чникъ, ми́лостива Ты́ еси́, Блага́я Богоро́дице, Ты́ бо вѣ́рныхъ еди́но заступле́ніе, Ты́ скорбя́щихъ утѣше́ніе. Тѣ́мже Тебѣ́ ны́нѣ вси́ вѣ́рою припа́даемъ обрѣсти́ разрѣше́ніе лю́тыхъ, обогатѣ́ющеся еди́ною Тебе́ по́мощію.

Пѣ́снь 7.
Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Уставля́еши при́сно а́нгельская во́инства къ непреложе́нію, Еди́не сы́й Неизмѣ́нне и Тріѵпоста́сне Го́споди, покажи́ у́бо и мое́ се́рдце непрело́жно всегда́, во е́же сла́вити Тя́ те́плѣ и воспѣва́ти благоче́стно. [Два́жды.]

Сла́ва: Ли́цы у́мніи невеще́ственныхъ суще́ствъ Твои́ми луча́ми, Бо́же Единонача́льне и Трисо́лнечне, озаря́еми быва́ютъ, положе́ніемъ вторíи свѣ́тове, и́хже и мене́ сія́ньми и прича́стіемъ покажи́ свѣ́тъ, я́ко Свѣтодѣ́тель Трисія́ненъ.

[И ны́нѣ,] богоро́диченъ: Направля́ти на́съ и возвыша́ти къ небесе́мъ не оскудѣ́й, Тебе́ лю́бящихъ, Иже за неизрече́нное человѣколю́біе бы́въ Человѣ́къ во утро́бѣ Дѣ́вы, и обожи́въ человѣ́ка, и на престо́лѣ сла́вы со Отце́мъ Сѣдя́й.

Пѣ́снь 8.
Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Непристу́пная Тро́ице, Соприсносу́щная, Собезнача́льная, Богонача́льная, Неизмѣ́нная во всѣ́хъ, кромѣ́ свѣтоно́сныхъ сво́йствъ, вся́кій лука́вый упраздни́ сопротиволежа́щихъ совѣ́тъ и стуже́нія де́моновъ, невре́дна соблюда́яй мя́ при́сно, Го́споди всѣ́хъ. [Два́жды.]

Сла́ва: Прему́дрѣ и всемо́щнѣ, Неопи́санное, Трисо́лнечное Единонача́ліе, соста́вльшее мíръ и соблюда́ющее въ невреди́момъ чи́нѣ всесоверше́нномъ, всели́ся въ мое́ се́рдце, пѣ́ти и сла́вити Тя́ немо́лчно съ ли́ки а́нгельскими во вся́ вѣ́ки.

И ны́нѣ: Прему́дросте Отчая, Непостижи́ме, Неизрече́нне, Бо́жій Сло́ве, непрело́жное Твое́ естество́ не измѣни́въ, естество́ человѣ́ческое ми́лостивнѣ воспрія́лъ еси́ и Еди́нственную Тро́ицу чести́ всѣ́хъ научи́лъ еси́, я́ко Господонача́ліе всѣ́хъ вѣко́въ.

Пѣ́снь 9.
Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Отъ Свѣ́та Безнача́льна Собезнача́ленъ Сы́нъ, Свѣ́тъ, возсія́ и Соесте́ственный Свѣ́тъ, Ду́хъ, изы́де неизрече́нно боголѣ́пно: нетлѣ́нну рождеству́ увѣря́еми, вку́пѣ же и неизрече́нному исхожде́нію.

Возсія́й въ сердца́хъ, Трисо́лнечное Божество́, воспѣва́ющихъ Тя́, трисія́ннымъ свѣ́томъ Твои́мъ, и да́ждь ра́зумъ е́же во всѣ́хъ разумѣ́ти, и дѣ́яти Твое́ хотѣ́ніе благо́е и соверше́нное, и велича́ти и сла́вити Тя́.

Сла́ва: Неизче́тенъ естество́мъ сы́й, я́ко Бо́гъ, неизче́тную пучи́ну щедро́тъ я́ко имѣ́я, уще́дрила еси́, Тро́ице, пре́жде, та́ко и ны́нѣ уще́дри рабы́ Твоя́ и отъ прегрѣше́ній изба́ви, и напа́стей, и обстоя́ній.

[И ны́нѣ,] богоро́диченъ: Спаси́ мя, Бо́же мо́й, отъ вся́каго искуше́нія и озлобле́нія, Иже въ Тріе́хъ Ли́цѣхъ воспѣва́емый несказа́нно, еди́нственнѣ Бо́гъ и Всеси́льный, и Твое́ ста́до сохрани́ Богоро́дицы моли́твами.

Та́же тро́ичны Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

ВЪ НЕДѢЛЮ НА УТРЕНИ,
На Бо́гъ Госпо́дь… Тропа́рь: Егда́ снизше́лъ еси́… Сла́ва, и ны́нѣ: Вся́ па́че смы́сла…

По 1-мъ стихосло́віи сѣда́льны воскре́сны, гла́съ 2:
Благообра́зный Іо́сифъ съ дре́ва сне́мъ Пречи́стое Твое́ Тѣ́ло, плащани́цею чи́стою обви́въ, и благоуха́ньми во гро́бѣ но́вѣ закры́въ положи́; но тридне́венъ воскре́слъ еси́, Го́споди, подая́й мíрови ве́лію ми́лость.

Сти́хъ: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гихъ Твои́хъ до конца́.

Мѵроно́сицамъ жена́мъ при гро́бѣ предста́въ а́нгелъ, вопія́ше: мѵ́ра ме́ртвымъ су́ть прили́чна, Христо́съ же истлѣ́нія яви́ся чу́ждь. Но возопíйте: воскре́се Госпо́дь, подая́й мíрови ве́лію ми́лость.

Сла́ва, и ны́нѣ, богоро́диченъ:
Препросла́вленна еси́, Богоро́дице Дѣ́во, пое́мъ Тя́: Кресто́мъ бо Сы́на Твоего́ низложи́ся а́дъ и сме́рть умертви́ся, умерщвле́нніи воста́хомъ и живота́ сподо́бихомся, ра́й воспрія́хомъ, дре́внее наслажде́ніе. Тѣ́мъ, благодаря́ще славосло́вимъ, я́ко держа́внаго Христа́ Бо́га на́шего и еди́наго Многоми́лостиваго.

По 2-мъ стихосло́віи сѣда́льны, гла́съ 2:
Ка́мень гро́бный запеча́тати не возбрани́въ, ка́мень вѣ́ры воскре́съ по́далъ еси́ всѣ́мъ, Го́споди, сла́ва Тебѣ́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Ученико́въ Твои́хъ ли́къ съ мѵроно́сицами жена́ми ра́дуется согла́сно: о́бщій бо пра́здникъ съ ни́ми пра́зднуютъ [3] въ сла́ву и че́сть Твоего́ Воскресе́нія, и тѣ́ми вопіе́мъ Ти́: Человѣколю́бче Го́споди, лю́демъ Твои́мъ пода́ждь ве́лію ми́лость.

Сла́ва, и ны́нѣ, богоро́диченъ:
Преблагослове́нна еси́, Богоро́дице Дѣ́во, Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́.

По непоро́чнахъ ипакои́, гла́съ 2:
По стра́сти ше́дша во гро́бъ жены́, во е́же пома́зати тѣ́ло Твое́, Христе́ Бо́же, ви́дѣша а́нгелы во гро́бѣ и ужасо́шася: гла́съ бо слы́шаху отъ ни́хъ, я́ко воскре́се Госпо́дь, да́руя мíрови ве́лію ми́лость.

Степе́нна, гла́съ 2.

Антифо́нъ 1. Ихже стихи́ повторя́юще пое́мъ:
На не́бо о́чи пуща́ю моего́ се́рдца къ Тебѣ́, Спа́се, спаси́ мя́ Твои́мъ осія́ніемъ.

Поми́луй на́съ согрѣша́ющихъ Тебѣ́ мно́го на вся́кій ча́съ, о Христе́ мо́й, и да́ждь о́бразъ пре́жде конца́ пока́ятися Тебѣ́.

Сла́ва: Свято́му Ду́ху, Еже ца́рствовати подоба́етъ, освяща́ти, подвиза́ти тва́рь: Бо́гъ бо е́сть, Единосу́щенъ Отцу́ и Сло́ву.
И ны́нѣ, то́йже.

Антифо́нъ 2:
Аще не Госпо́дь бы бы́лъ въ на́съ, кто́ дово́ленъ цѣ́лъ сохране́нъ бы́ти отъ врага́, ку́пно и человѣкоуби́йцы?

Зубо́мъ и́хъ не преда́ждь, Спа́се, Твоего́ раба́, и́бо льво́вымъ о́бразомъ на мя́ подвиза́ются врази́ мои́.

Сла́ва: Свято́му Ду́ху живонача́ліе и че́сть: вся́ бо созда́нная, я́ко Бо́гъ Сы́й, си́лою [4] соблюда́етъ во Отцѣ́, Сы́номъ же.
И ны́нѣ, то́йже.

Антифо́нъ 3:
Надѣ́ющіися на Го́спода, уподо́бишася горе́ святѣ́й, и́же ника́коже дви́жутся прило́ги вра́жіими.

Въ беззако́ніи ру́къ свои́хъ да не про́струтъ боже́ственнѣ живу́щіи, не оставля́етъ бо Христо́съ жезла́ на жре́біи Свое́мъ.

Сла́ва: Святы́мъ Ду́хомъ то́чится вся́ка прему́дрость: отсю́ду благода́ть апо́столомъ, и страда́льчествы вѣнча́ются му́ченицы, и проро́цы зря́тъ.
И ны́нѣ, то́йже.

Проки́менъ, гла́съ 2: Воста́ни, Го́споди, Бо́же мо́й, повеле́ніемъ, и́мже заповѣ́далъ еси́,* и со́нмъ люде́й обы́детъ Тя́. Сти́хъ: Го́споди Бо́же мо́й, на Тя́ упова́хъ, спаси́ мя́. Вся́кое дыха́ніе… Ева́нгеліе воскре́сно, и про́чая по ря́ду. Воскре́сеніе Христо́во… Псало́мъ 50-й.

Кано́нъ воскре́снъ, гла́съ 2.

Пѣ́снь 1.
Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Припѣ́въ: Сла́ва, Го́споди, свято́му Воскресе́нію Твоему́.

Мірскíй кня́зь, Бла́же, ему́же написа́хомся, за́повѣди Твоея́ не послу́шавше, Кресто́мъ Твои́мъ осуди́ся, прирази́ся бо Ти́, я́ко сме́ртну, отпаде́ же вла́сти Твоея́ держа́вою, и немощны́й обличи́ся.

Изба́витель ро́да человѣ́ческаго и нетлѣ́нному животу́ Нача́льникъ въ мíръ прише́лъ еси́, Воскре́сеніемъ бо Твои́мъ раздра́лъ еси́ сме́ртныя пелены́, Еже славосло́вимъ вси́: сла́вно бо просла́вися.

Богоро́диченъ: Превы́шши яви́лася еси́, Чи́стая Приснодѣ́во, вся́кія неви́димыя же и ви́димыя тва́ри, Зижди́теля бо родила́ еси́, я́ко благоволи́ воплоти́тися во утро́бѣ Твое́й, Его́же со дерзнове́ніемъ моли́ спасти́ ду́ши на́ша.

Другíй кано́нъ, крестовоскре́сенъ, [его́же краестро́чіе: Пою́ хвалу́ живоно́сному Сло́ву.] Гла́съ 2.

Пѣ́снь 1.
Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Си́ла немощны́хъ, Воскре́сеніе па́дшихъ и Нетлѣ́ніе уме́ршихъ бы́лъ еси́, Христе́, пло́ти Твоея́ Стра́стію, я́ко просла́вися.

Уще́дри па́дшій о́бразъ и воскреси́ сокруше́нный, Содѣ́тель Бо́гъ и Обнови́тель умерщвле́нъ бы́въ, всѣ́хъ оживи́, я́ко просла́вися.

Инъ кано́нъ, Пресвятѣ́й Богоро́дицѣ, [его́же краестро́чіе: Пою́ хвалу́ живоно́снѣй Отрокови́цѣ.] Гла́съ 2.

Пѣ́снь 1.
Ирмо́съ то́йже. Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оледенѣ́вшій пу́ть мо́ря, Твое́ явля́ше Рождество́, Чи́стая, е́же пое́мъ вси́, я́ко просла́вися.

Си́ла Вы́шняго, Ѵпоста́сь Соверше́нная, Бо́жія Му́дрость, вопло́щшися, Пречи́стая, изъ Тебе́, къ человѣ́комъ бесѣ́дова [5], я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́, Пра́вды Со́лнце, Чи́стая, и мíрови возсія́, я́ко просла́вися.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.
Ирмо́съ: Процвѣла́ е́сть пусты́ня я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Тва́рь въ Стра́сти Твое́й измѣня́шеся, зря́щи Тя́ въ нище́тнѣ о́бразѣ отъ беззако́нныхъ поруга́ема, Основа́вшаго вся́ Боже́ственнымъ манове́ніемъ.

Отъ пе́рсти по Образу мя́ руко́ю Твое́ю созда́лъ еси́, и сокруше́нна па́ки въ пе́рсть сме́ртную за грѣ́хъ, Христе́, соше́дъ во а́дъ, совоскреси́лъ еси́.

Богоро́диченъ: Чи́ни удиви́шася а́нгельстіи, Пречи́стая, и человѣ́ческая устраши́шася сердца́ о Рождествѣ́ Твое́мъ, тѣ́мже Тя́, Богоро́дицу, вѣ́рою чти́мъ.

Инъ.
Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже всѣ́хъ вы́шши Христо́съ, ума́лися ма́лымъ чи́мъ, Стра́стію плотско́ю, а́нгельскаго естества́.

Ме́ртвъ со беззако́нными вмѣни́вся, сія́я жена́мъ вѣнце́мъ сла́вы, Христе́, яви́лся еси́ отъ Воскре́сенія.

Инъ.
Ирмо́съ то́йже. Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене превы́шшій вся́каго, я́ко вре́менемъ Творе́цъ, изъ Тебе́, Дѣ́во, во́лею Младе́нецъ созда́ся.

Чре́во простра́ннѣйшее небе́съ воспои́мъ, и́мже Ада́мъ на небесѣ́хъ ра́дуяся живе́тъ.

Пѣ́снь 4.
Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди[6] вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Предстои́ши суди́щу, я́ко Суди́мь, Бо́же мо́й, не вопія́, Влады́ко, су́дъ износя́ язы́комъ, и́мже Стра́стію Твое́ю, Христе́, вселе́ннѣй содѣ́лалъ еси́ спасе́ніе.

Стра́стію Твое́ю, Христе́, врагу́ оскудѣ́ша ору́жія, проти́внымъ же е́же во а́дъ схожде́ніемъ Твои́мъ, гра́ды разруши́шася и мучи́телева де́рзость низложе́на бы́сть.

Богоро́диченъ: Тя́, приста́нище спасе́нія и стѣ́ну недви́жиму, Богоро́дице Влады́чице, вси́ вѣ́рніи свѣ́мы, Ты́ бо моли́твами Твои́ми избавля́еши отъ бѣ́дъ ду́ши на́ша.

Инъ.
Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Ви́дѣвши на Дре́вѣ Тя́, Христе́, пригвожде́на, Дѣ́ва, Яже неболѣ́зненно Тя́ ро́ждшая, ма́терски болѣ́зни претерпѣ́.

Побѣжде́на бы́сть сме́рть, Ме́ртвъ плѣня́етъ а́дова врата́, всея́дцу бо разо́ршуся, я́же па́че естества́ вся́ ми́ дарова́шася.

Инъ.
Ирмо́съ то́йже. Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превознесе́ся Боже́ственная гора́ до́му Госпо́дня превы́шше си́лъ, Богома́терь, я́вственнѣйше.

Зако́новъ есте́ственныхъ кромѣ́, еди́на Дѣ́во ро́ждши Влады́чествующаго тва́рію, сподо́билася еси́ Боже́ственнаго зва́нія.

Пѣ́снь 5.
Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Яко ке́дры, Христе́, язы́ковъ шата́ніе сокруши́лъ еси́ во́лею, Влады́ко, я́ко изво́лилъ еси́ на кипари́сѣ, и на пе́вкѣ, и ке́дрѣ, пло́тію совозвыша́емь.

Въ ро́вѣ, Христе́, преиспо́днѣмъ положи́ша Тя́ бездыха́нна ме́ртва, но Твое́ю я́звою забве́нныя ме́ртвыя, и́же во гробѣ́хъ спя́щія, уя́звенъ съ Собо́ю воскреси́лъ еси́.

Богоро́диченъ: Моли́ Сы́на Твоего́ и Го́спода, Дѣ́во Чи́стая, на Тя́ упова́ющимъ ми́ръ дарова́ти, плѣне́ннымъ избавле́ніе отъ сопроти́вныхъ настоя́ній.

Инъ.
Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Пости́ти отвергíйся Ада́мъ, вкуша́етъ смертоно́снаго дре́ва пе́рвый, но сего́ грѣ́хъ потребля́етъ Распны́йся Вторы́й.

Естество́мъ человѣ́ческимъ стра́стенъ же и сме́ртенъ бы́лъ еси́, Иже безстра́стный невеще́ственнымъ Божество́мъ, обезтли́вый умерщвле́нныя, Христе́, отъ преиспо́днихъ а́довыхъ воскреси́лъ еси́.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Иже Сы́й пре́жде вѣ́къ, отъ Дѣ́вы вопло́щься Бо́гъ на́шъ.

Житію́ и пло́ти мое́й Свѣ́тъ возсія́ и дря́хлость грѣха́ разруши́, напослѣ́докъ отъ Дѣ́вы безъ сѣ́мене вопло́щься Вы́шній.

Яко злодѣ́й, Пра́ведникъ осуди́ся и со беззако́нными на Дре́вѣ пригвозди́ся, пови́ннымъ оставле́ніе Свое́ю да́руя Кро́вію.

Еди́немъ у́бо человѣ́комъ, пе́рвымъ Ада́момъ, дре́вле въ мíръ вни́де сме́рть, и Еди́нѣмъ Воскре́сеніе Сы́номъ Бо́жіимъ яви́ся.

Богоро́диченъ: Неискусому́жно, Дѣ́во, родила́ еси́ и вѣ́чнуеши Дѣ́ва, явля́ющи Истиннаго Божества́ Сы́на и Бо́га Твоего́ о́бразы.

Инъ.
Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Блюсти́тели положи́лъ еси́ па́дшему, херуви́мы дре́ва живо́тнаго, но ви́дѣвше Тя́, две́ри отверзо́шася, яви́лся бо еси́ путетворя́ разбо́йнику въ ра́й.

Пу́стъ а́дъ и испрове́рженъ бы́сть сме́ртію Еди́наго, е́же бо мно́гое бога́тство сокро́виществова, Еди́нъ о всѣ́хъ на́съ Христо́съ истощи́лъ е́сть.

Инъ.
Ирмо́съ то́йже. Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́, Тво́й бо Сы́нъ, я́ко Агнецъ, за всѣ́хъ закала́ется.

Вопіе́мъ Ти́ вси́, и́стиннѣй Богома́тери, прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Конда́къ, гла́съ 2:
Воскре́слъ еси́ отъ гро́ба, Всеси́льне Спа́се, и а́дъ, ви́дѣвъ чу́до, ужасе́ся, и ме́ртвіи воста́ша, тва́рь же, ви́дящи, сра́дуется Тебѣ́, и Ада́мъ свесели́тся, и мíръ, Спа́се мо́й, воспѣва́етъ Тя́ при́сно.

Икосъ:
Ты́ еси́ Свѣ́тъ омраче́ннымъ, Ты́ еси́ Воскресе́ніе всѣ́хъ и Живо́тъ человѣ́ковъ, и всѣ́хъ совоскреси́лъ еси́, сме́ртную держа́ву, Спа́се, разо́рь, и а́дова врата́ сокруши́вый, Сло́ве, и ме́ртвіи, ви́дѣвше чу́до, чудя́хуся, и вся́ка тва́рь сра́дуется о Воскресе́ніи Твое́мъ, Человѣколю́бче. Тѣ́мже и вси́ сла́вимъ и пое́мъ Твое́ снизхожде́ніе, и мíръ, Спа́се мо́й, воспѣва́етъ Тя́ при́сно.

Пѣ́снь 7.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Не терпѣ́лъ еси́, Влады́ко, за благоутро́біе сме́ртію человѣ́ка зрѣ́ти му́чима, но прише́лъ и спа́слъ еси́ Твое́ю Кро́вію, Человѣ́къ бы́въ, Сы́й Благослове́нъ и Препросла́вленъ Бо́гъ оте́цъ на́шихъ.

Ви́дѣвше Тя́, Христе́, оболче́на во оде́жду отмще́нія, ужасо́шася вра́тницы а́довы, безу́мнаго бо мучи́теля раба́, Влады́ко, прише́лъ еси́ уби́ти, Сы́й благослове́нъ и Препросла́венъ Бо́гъ оте́цъ на́шихъ.

Богоро́диченъ: Святы́хъ Святѣ́йшую Тя́ разумѣ́емъ, я́ко Еди́ну ро́ждшую Бо́га Непремѣ́ннаго, Дѣ́во Нескве́рная, Ма́ти Безневѣ́стная, всѣ́мъ бо вѣ́рнымъ источи́ла еси́ нетлѣ́ніе Боже́ственнымъ Рождество́мъ Твои́мъ.

Инъ.
Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Осуди́ пра́отца дре́вле во Еде́мѣ преслуша́ніе, но во́лею Суди́мь бы́сть, престу́пльшему разрѣша́я прегрѣше́нія, Пребоже́ственный отце́въ Бо́гъ и Препросла́вленъ.

Спа́слъ еси́ уя́звеннаго язы́комъ, за́вистію человѣкоубíйцы, во Еде́мѣ во́льнымъ угрызе́ніемъ; во́льною бо Стра́стію [7] исцѣли́лъ еси́, Пребоже́ственный отце́въ Бо́гъ и Препросла́вленъ.

Богоро́диченъ: Ходя́ща мя́ въ сѣ́ни сме́ртнѣй призва́лъ еси́ къ свѣ́ту, темнозра́чный а́дъ блиста́ніемъ обло́жь Божества́, Пребоже́ственный отце́въ Бо́гъ и Препросла́вленъ.

Инъ.
Ирмо́съ то́йже. Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ше въ нощи́ у́бо Іа́ковъ, я́ко въ гада́ніи, Бо́га воплоще́нна, изъ Тебе́ же свѣ́тлостію яви́ся пою́щимъ, Пребоже́ственный отце́въ Бо́гъ и Препросла́вленъ.

Зна́менія, я́же въ Тебѣ́, неизрече́ннаго проявля́я сня́тія, со Іа́ковомъ бо́рется, и́мже во́лею соедини́ся человѣ́комъ, Чи́стая, Пребоже́ственный отце́въ Бо́гъ и Препросла́вленъ.

Ме́рзокъ, и́же не проповѣ́дуетъ Тя́, Дѣ́вы Сы́на, Еди́наго отъ Препѣ́тыя Тро́ицы, несумне́нною вѣ́рою [8] и язы́комъ вопія́: Пребоже́ственный отце́въ Бо́гъ и Препросла́вленъ.

Кро́вію Твое́ю, Христе́, очервле́но пло́ти Твоея́ зря́ще одѣя́ніе, тре́петомъ ужаса́хуся мно́гому Твоему́ долготерпѣ́нію а́нгельстіи чи́ни, зову́ще: благослови́те, вся́ дѣла́ Госпо́дня, Го́спода.

Ты́ мое́ сме́ртное одѣ́ялъ еси́, Ще́дре, въ безсме́ртіе Воста́ніемъ Твои́мъ. Тѣ́мже веселя́щеся, благода́рственно воспѣва́ютъ Тя́ избра́нніи лю́діе, Христе́, зову́ще Тебѣ́: поже́рта бы́сть вои́стинну сме́рть побѣ́дою.

Богоро́диченъ: Ты́ Иже Отцу́ неразлу́чнаго, во утро́бѣ богому́жно пожи́вша, безсѣ́менно зачала́ еси́ и неизрече́нно родила́ еси́, Богороди́тельнице Пречи́стая. Тѣ́мже Тя́ спасе́ніе всѣ́хъ на́съ свѣ́мы.

Инъ.
Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́лъ еси́ на Крестѣ́ пригвожда́емь, Иже Бога́тый въ ми́лости, во́лею погре́блся еси́, и тридне́вно воскре́слъ еси́, и изба́вилъ еси́ вся́ человѣ́ки, Человѣколю́бче, вѣ́рою пою́щія: да пое́тъ Го́спода вся́ тва́рь и превозно́ситъ во вся́ вѣ́ки.

Изба́вити отъ истлѣ́нія, соше́дъ въ преиспо́дняя, Сло́ве Бо́жій, его́же созда́лъ еси́, Христе́, си́лою Твое́ю Боже́ственною, и безъ истлѣ́нія сотво́рь, сла́вы присносу́щныя Твоея́ прича́стника содѣ́лалъ еси́, да пое́тъ, зову́щи, вся́ тва́рь и превозно́ситъ Христа́ во вѣ́ки.

Инъ.
Ирмо́съ то́йже. О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ Тобо́ю и съ человѣ́ки поживе́, Иже бла́гостію Несравне́нный и си́лою, Ему́же пою́ще, вси́ вѣ́рніи, зове́мъ: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Вои́стинну Тя́, Чи́стую, проповѣ́дающе сла́вимъ Богоро́дицу, Ты́ бо еди́на родила́ еси́ отъ Тро́ицы Воплоще́нна, Ему́же со Отце́мъ и Ду́хомъ вси́ пое́мъ: да пое́тъ Го́спода вся́ тва́рь и превозно́ситъ во вся́ вѣ́ки.

Та́же пое́мъ пѣ́снь Богоро́дицы: Вели́читъ душа́ моя́ Го́спода.., съ припѣ́вомъ: Честнѣ́йшую херуви́мъ…

Пѣ́снь 9.
Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.

Яко въ раи́ насажде́но на Ло́бнѣмъ, Спа́се, требога́тое дре́во Твоего́ пречи́стаго Креста́, кро́вію и водо́ю Боже́ственною, я́ко отъ исто́чника Боже́ственнаго, ребра́ Твоего́, Христе́, напоя́емо, живо́тъ на́мъ прозябло́ е́сть.

Низложи́лъ еси́ си́льныя, распны́йся, Всеси́льне, и е́же ни́зу лежа́щее во а́довѣ тверды́ни естество́ человѣ́ческое возне́съ, на Отчемъ посади́лъ еси́ престо́лѣ. Съ ни́мже Тебѣ́ гряду́щу покланя́ющеся, велича́емъ.

Тро́иченъ: Еди́ницу Тричи́сленную, Тро́ицу Единосу́щную правосла́вно пою́ще, вѣ́рніи, сла́вимъ: непресѣко́мо пребоже́ственное естество́, — Трисвѣ́тлую, невече́рнюю Зарю́, Еди́ну нетлѣ́нную на́мъ свѣ́тъ Возсія́вшую.

Инъ.
Ирмо́съ: Отъ Бо́га Бо́га Сло́ва, [неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ].

Посредѣ́ осужде́нныхъ, я́ко Агнецъ, возвы́шенъ бы́лъ еси́, Христе́, на Крестѣ́, на Ло́бнѣмъ копіе́мъ въ ребро́ пробода́емь, живо́тъ дарова́лъ еси́ на́мъ, пе́рстнымъ, я́ко Бла́гъ, вѣ́рою чту́щимъ Боже́ственное Твое́ Воскре́сеніе.

Иже Свое́ю сме́ртію сме́рти держа́ву си́лою упраздни́вшему Бо́гу, вси́ вѣ́рніи, поклони́мся, я́ко и́же отъ вѣ́ка ме́ртвыя совоскреси́, и всѣ́мъ подае́тъ живо́тъ и воскре́сеніе.

Инъ.
Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе, во утро́бѣ Твое́й, Чи́стая, и сіе́ воскреси́ до а́да попо́лзшееся. Тѣ́мже Тя́, Всечи́стая, я́ко Богоро́дицу, велича́емъ.

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ.

По катава́сіи ектенія́ ма́лая. Та́же: Свя́тъ Госпо́дь Бо́гъ на́шъ… Посе́мъ ексапостила́рій у́тренній.

На хвали́техъ стихи́ры воскре́сны, гла́съ 2:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Вся́кое дыха́ніе и вся́ тва́рь Тя́ сла́витъ, Го́споди, я́ко Кресто́мъ сме́рть упраздни́лъ еси́, да пока́жеши лю́демъ е́же изъ ме́ртвыхъ Твое́ Воскресе́ніе, я́ко еди́нъ Человѣколю́бецъ.

Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́.

Да реку́тъ іуде́е, ка́ко во́ини погуби́ша стрегу́щіи Царя́? Почто́ бо ка́мень не сохрани́ Ка́мене жи́зни? Или́ Погребе́ннаго да дадя́тъ, или́ Воскре́сшему да покло́нятся, глаго́люще съ на́ми: сла́ва мно́жеству щедро́тъ Твои́хъ, Спа́се на́шъ, сла́ва Тебѣ́.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Ра́дуйтеся, лю́діе, и весели́теся, а́нгелъ сѣдя́й на ка́мени гро́бнѣмъ, то́й на́мъ благовѣсти́, ре́къ: Христо́съ воскре́се изъ ме́ртвыхъ, Спа́съ мíра, и испо́лни вся́ческая благоуха́нія. Ра́дуйтеся, лю́діе, и весели́теся!

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Ангелъ у́бо е́же — ра́дуйся! — пре́жде Твоего́ зача́тія, Го́споди, Благода́тнѣй принесе́; а́нгелъ же ка́мень сла́внаго Твоего́ гро́ба въ Твое́ Воскресе́ніе отвали́. Овъ у́бо въ печа́ли мѣ́сто весе́лія о́бразы возвѣща́я; се́й же въ сме́рти мѣ́сто Влады́ку Жизнода́вца проповѣ́дуя на́мъ. Тѣ́мже вопіе́мъ Ти́: Благодѣ́телю всѣ́хъ, Го́споди, сла́ва Тебѣ́.

Ины стихи́ры, анато́ліевы, гла́съ 2:

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Возлія́ша мѵ́ра со слеза́ми на гро́бъ Тво́й жены́, и испо́лнишася ра́дости уста́ и́хъ, внегда́ глаго́лати: воскре́се Госпо́дь!

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Да похва́лятъ язы́цы и лю́діе Христа́ Бо́га на́шего, во́лею на́съ ра́ди Кре́стъ претерпѣ́вшаго и во а́дѣ тридне́вновавшаго, и да покло́нятся Его́ изъ ме́ртвыхъ Воскресе́нію, и́мже просвѣти́шася всего́ мíра концы́.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Ра́спятъ и погребе́нъ бы́лъ еси́, Христе́, я́коже изво́лилъ еси́, испрове́рглъ еси́ сме́рть и воскре́слъ еси́ во сла́вѣ, я́ко Бо́гъ и Влады́ка, да́руя мíрови жи́знь вѣ́чную и ве́лію ми́лость.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

О, вои́стинну беззако́нніи печа́тавшіи ка́мень, бо́льшихъ на́съ чуде́съ сподо́бисте! Имутъ ра́зумъ стра́жіе, дне́сь про́йде изъ гро́ба, и глаго́лаху: рцы́те, я́ко на́мъ спя́щимъ пріидо́ша ученицы́ и украдо́ша Его́. И кто́ кра́детъ мертвеца́, па́че же и на́га? Са́мъ воскре́се самовла́стно, я́ко Бо́гъ, оста́вль во гро́бѣ и погреба́тельная Своя́. Пріиди́те, ви́дите, іуде́е, ка́ко не расто́рже печа́ти сме́рть Попра́вый и ро́ду человѣ́ческому безконе́чную жи́знь Да́руяй и ве́лію ми́лость.

Сла́ва, стихи́ра ева́нгельская. И ны́нѣ, богоро́диченъ: Преблагослове́нна еси́, Богоро́дице… Славосло́віе вели́кое.

По славосло́віи тропа́рь:
Воскре́съ изъ гро́ба и у́зы растерза́лъ еси́ а́да, разруши́лъ еси́ осужде́ніе сме́рти, Го́споди, вся́ отъ сѣте́й врага́ изба́вивый; яви́вый же Себе́ апо́столомъ Твои́мъ, посла́лъ еси́ я́ на про́повѣдь, и тѣ́ми ми́ръ Тво́й по́далъ еси́ все́й вселе́ннѣй, еди́не Многоми́лостиве.

НА ЛИТУРГІИ,
Блаженна, гласъ 2:
Гла́съ Ти́ прино́симъ разбо́йничь и мо́лимся: помяни́ на́съ, Спа́се, во Ца́рствіи Твое́мъ.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Кре́стъ Тебѣ́ прино́симъ въ проще́ніе прегрѣше́ній, его́же на́съ ра́ди прія́лъ еси́, Человѣколю́бче.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Покланя́емся Твоему́, Влады́ко, погребе́нію и воста́нію, и́миже отъ тлѣ́нія изба́вилъ еси́ мíръ, Человѣколю́бче.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Сме́ртію Твое́ю, Го́споди, поже́рта бы́сть сме́рть, и Воскре́сеніемъ Твои́мъ, Спа́се, мíръ спа́слъ еси́.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Мѵроно́сицы срѣ́тилъ еси́, Воскре́съ отъ гро́ба, и ученико́мъ возвѣсти́лъ еси́ рещи́ Твое́ Воста́ніе.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Иже во тмѣ́ спя́щіи Тя́, Свѣ́тъ, ви́дѣвше, въ преиспо́днѣйшихъ а́довыхъ, Христе́, воскресо́ша.

Сла́ва, [тро́иченъ]: Отца́ просла́вимъ, Сы́ну поклони́мся вси́ и Cвято́му Ду́ху вѣ́рно воспои́мъ.

И ны́нѣ, богоро́диченъ: Ра́дуйся, Престо́ле Огнезра́чный; ра́дуйся, Невѣ́ста Неневѣ́стная; ра́дуйся, Яже Бо́га человѣ́комъ, Дѣ́во, ро́ждшая.

Проки́менъ, гла́съ 2: Крѣ́пость моя́ и пѣ́ніе мое́ Госпо́дь,* и бы́сть мнѣ́ во спасе́ніе. Сти́хъ: Наказу́я, наказа́ мя́ Госпо́дь, сме́рти же не предаде́ мя́. Аллилу́ія, [гла́съ 2]: Услы́шитъ тя́ Госпо́дь въ де́нь печа́ли, защи́титъ тя́ и́мя Бо́га Іа́ковля. Сти́хъ: Го́споди, спаси́ царя́ и услы́ши ны́, въ о́ньже а́ще де́нь призове́мъ Тя́.

Примѣчанія:
[1] Изъ руки́.
[2] Чистото́ю запеча́тана и дѣ́вствомъ храни́ма.
[3] Пра́зднуемъ.
[4] Укрѣпляетъ.
[5] Прибли́жися.
[6] Господь.
[7] Во Еде́мѣ: во́льное бо угрызе́ніе во́льною Стра́стію.
[8] Мы́слію.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 99 об. – 113 об.

Свързани