СЛУЖБА ВОСКРЕСНАЯ 4-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ… стихи́ры воскре́сны 3, повторя́юще пе́рвую, гла́съ 4:

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Животворя́щему Твоему́ Кресту́ непреста́нно кла́няющеся, Христе́ Бо́же, тридне́вное Воскресе́ніе Твое́ сла́вимъ, тѣ́мъ бо обнови́лъ еси́ истлѣ́вшее человѣ́ческое естество́, Всеси́льне, и и́же на небеса́ восхо́дъ обнови́лъ еси́ на́мъ, я́ко еди́нъ Бла́гъ и Человѣколю́бецъ. [Два́жды.]

Дре́ва преслуша́нія запреще́ніе разрѣши́лъ еси́, Спа́се, на дре́вѣ Кре́стнѣмъ во́лею пригвозди́вся и, во а́дъ соше́дъ, Си́льне, сме́ртныя у́зы, я́ко Бо́гъ, растерза́лъ еси́. Тѣ́мже кла́няемся е́же изъ ме́ртвыхъ Твоему́ Воскресе́нію, ра́достію вопію́ще: Всеси́льне Го́споди, сла́ва Тебѣ́.

Врата́ а́дова сокруши́лъ еси́, Го́споди, и Твое́ю сме́ртію сме́ртное ца́рство разруши́лъ еси́, ро́дъ же человѣ́ческій отъ тлѣ́нія свободи́лъ еси́, живо́тъ и нетлѣ́ніе мíру дарова́въ и ве́лію ми́лость.

Сла́ва, и ны́нѣ, богоро́диченъ догма́тикъ, гла́съ 4:
Безъ сѣ́мене зачала́ еси́ и родила́ еси́ неизрече́нно Низложи́вшаго си́льныя отъ престо́лъ, и Возне́сшаго смире́нныя, и Воздви́гшаго ро́гъ вѣ́рныхъ Свои́хъ, сла́вящихъ Христо́въ Кре́стъ, и погребе́ніе, и сла́вное Воскресе́ніе. Тѣ́мже Тя́, Богоро́дице, Хода́таицу толи́кихъ бла́гъ немо́лчными пѣ́сньми ублажа́емъ, я́ко моля́щуюся при́сно е́же спасти́ся душа́мъ на́шимъ.

Та́же: Свѣ́те Ти́хій… Посе́мъ проки́менъ: Госпо́дь воцари́ся.., три́жды. Сти́хъ: Облече́ся Госпо́дь въ си́лу и препоя́сася… Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ

На стихо́внѣ стихи́ру воскре́сну, гла́съ 4:
Го́споди, возше́дъ на Кре́стъ, пра́дѣднюю на́шу кля́тву потреби́лъ еси́ и, соше́дъ во а́дъ, вѣ́чныя у́зники свободи́лъ еси́, нетлѣ́ніе да́руя человѣ́ческому ро́ду. Сего́ ра́ди пою́ще, сла́вимъ животворя́щее и спаси́тельное Твое́ Воста́ніе.

Та́же стихи́ры подо́бны, Пресвяты́я Богоро́дицы. Подо́бенъ: Зва́нный свы́ше.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Изъ Безнача́льна Отца́ Сы́нъ безлѣ́тно, снизхожде́нія ра́ди и спасе́нія человѣ́ковъ, Бо́гъ Человѣ́къ бы́сть, да пода́стъ первозда́нному ны́нѣ ра́й, тогда́ и все́ естество́ изба́вится отъ пре́лести змíевы, и о́бразъ па́дшій спасе́тъ я́ко Благопремѣни́тель. Отону́дуже Ма́терь содѣ́ла Невѣсторо́дицу чи́сту, я́ко нескве́рну, Юже, я́ко анки́ру вси́ и приста́нище, ублажа́емъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Воплоще́нна Созда́теля всѣ́хъ имѣ́ла еси́ во утро́бѣ Твое́й, Богоблаже́нная, вообрази́вшаго человѣ́ка, пре́жде па́дшаго преступле́ніемъ зміи́нымъ, Бо́га бо родила́ еси́ пло́тію несказа́нно на́мъ и изъ тлѣ́нія свободи́ла еси́ естество́ все́ обветша́вшее Рождество́мъ Твои́мъ. Тѣ́мже пое́мъ и сла́вимъ Твою́ благода́ть, Дѣ́во Безневѣ́стная, моли́тися не преста́й спасти́ся душа́мъ на́шимъ.

Сти́хъ: Лицу́ Твоему́ помо́лятся бога́тіи лю́дстіи.

Да Твоея́ всѣ́мъ мно́жество ми́лости и бла́гости откры́еши на́мъ неопредѣли́мую пучи́ну, грѣхи́ рабо́въ Твои́хъ вся́ загла́ди, и́маши бо, Всенепоро́чная, я́ко Ма́ти су́щи Бо́жія, вла́сть созда́нія и во́диши вся́, я́ко хо́щеши, си́лою Твое́ю, и́бо благода́ть Ду́ха Свята́го, я́вѣ все́льшаяся въ Тя́, содѣ́йствуетъ Ти́ во все́мъ при́сно, Всеблаже́ннѣйшая.

Сла́ва, и ны́нѣ, [богородиченъ]:
Иже со Отце́мъ и Ду́хомъ славосло́вимый Сы́нъ въ вы́шнихъ отъ серафи́мовъ, первозда́ннаго па́ки обнови́ти хотя́, всего́ Себе́ истощи́ неизрече́нно во утро́бѣ Твое́й, Богоро́дице Всепѣ́тая, и, изъ Тебе́ возсія́вый, просвѣти́ всего́ мíра Божество́мъ, изба́вивый отъ идолонеи́стовства и Собо́ю обожи́вый, на небеса́ возведе́ человѣ́чество, Христо́съ Бо́гъ и Спа́съ ду́шъ на́шихъ.

Та́же: Ны́нѣ отпуща́еши… Трисвято́е, [по Отче нашъ…] Тропа́рь: Свѣ́тлую Воскре́сенія про́повѣдь… Богоро́диченъ: Еже отъ вѣ́ка утае́ное… Ектенія́ и отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
На Го́споди воззва́хъ… стихи́ры воскре́сны, гла́съ 4:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Сти́хъ: Мене́ жду́тъ пра́ведницы, до́ндеже возда́си мнѣ́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Ины стихи́ры, творе́ніе Анато́ліево.

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Пріиди́те воспои́мъ, лю́діе, Спа́сово тридне́вное Воста́ніе, и́мже изба́вихомся а́довыхъ нерѣши́мыхъ у́зъ, и нетлѣ́ніе и жи́знь вси́ воспрія́хомъ, зову́ще: Распны́йся, и Погребы́йся, и Воскресы́й, спаси́ ны́ Воскресе́ніемъ Твои́мъ, еди́не Человѣколю́бче.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Ангели и человѣ́цы, Спа́се, Твое́ пою́тъ тридне́вное Воста́ніе, и́мже озари́шася вселе́нныя концы́, и рабо́ты вра́жія вси́ изба́вихомся, зову́ще: Животво́рче Всеси́льне Спа́се, спаси́ ны́ Воскресе́ніемъ Твои́мъ, еди́не Человѣколю́бче.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Врата́ мѣ́дная сте́рлъ еси́, и вереи́ сокруши́лъ еси́, Христе́ Бо́же, и ро́дъ человѣ́ческій па́дшій воскреси́лъ еси́. Сего́ ра́ди согла́сно вопіе́мъ: Воскресы́й изъ ме́ртвыхъ, Го́споди, сла́ва Тебѣ́.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Го́споди, е́же отъ Отца́ Твое́ Рождество́ безлѣ́тное е́сть и присносу́щно; е́же отъ Дѣ́вы воплоще́ніе — неизрече́нно человѣ́комъ и несказа́нно; и е́же во а́дъ соше́ствіе — стра́шно діа́волу и а́нгеломъ его́. Сме́рть бо попра́въ, тридне́венъ воскре́слъ еси́, нетлѣ́ніе подава́я человѣ́комъ и ве́лію ми́лость.

Ины стихи́ры Богоро́дицѣ, Па́вла Аморре́йскаго, гла́съ 8. Подо́бенъ: О, пресла́внаго чудесе́!

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Тебе́ вѣ́рнымъ покро́въ показа́ Иже вся́ческихъ Бо́гъ, вопло́щься отъ крове́й Твои́хъ, Пречи́стая, и предста́тельницу и побо́рницу су́щимъ въ ну́ждахъ и обстоя́ніихъ, и въ бу́ри приста́нище благоути́шное. Ты́ у́бо спаси́ отъ вся́кія ско́рби и туги́ вся́ притека́ющихъ къ боже́ственному покро́ву Твоему́.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Да прославля́ю и почита́ю, да чту́ и пою́, да воспѣва́ю всегда́ Твое́ Боже́ственное и́мя, Преблаже́нная Влады́чице, да мя́ не оста́виши враго́мъ ра́дованіе бы́ти, покро́ву Твоему́ притека́ющаго, но крилы́ честны́хъ моли́твъ Твои́хъ всегда́ цѣ́ла мя́ сохрани́ отъ всѣ́хъ искуше́ній.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Ра́дуйся, Богома́ти Пречи́стая; ра́дуйся, вѣ́рнымъ наде́жда; ра́дуйся, мíру очище́ніе; ра́дуйся, избавля́ющая вся́кихъ скорбе́й рабы́ Твоя́, Яже сме́рти разруши́тельница; ра́дуйся, животоно́сная; ра́дуйся, утѣ́шительнице; ра́дуйся, засту́пнице; ра́дуйся, прибѣ́жище.

Сла́ва, и ны́нѣ, богоро́диченъ:
Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Та́же: Свѣ́те Ти́хій… Проки́менъ: Госпо́дь воцари́ся… и про́чее по обы́чаю.

На стихо́внѣ стихи́ры воскре́сны, гла́съ 4:
Го́споди, возше́дъ на Кре́стъ, пра́дѣднюю на́шу кля́тву потреби́лъ еси́ и, соше́дъ во а́дъ, вѣ́чныя у́зники свободи́лъ еси́, нетлѣ́ніе да́руя человѣ́ческому ро́ду. Сего́ ра́ди пою́ще, сла́вимъ животворя́щее и спаси́тельное Твое́ Воста́ніе.

Ины стихи́ры, по алфави́ту.

Сти́хъ: Госпо́дь воцари́ся, въ лѣ́поту облече́ся.

Повѣ́шенъ на Дре́вѣ, еди́не Си́льне, всю́ тва́рь поколеба́лъ еси́; положе́нъ же во гро́бѣ, живу́щія во гробѣ́хъ воскреси́лъ еси́, нетлѣ́ніе и жи́знь да́руя человѣ́ческому ро́ду. Тѣ́мже пою́ще, сла́вимъ тридне́вное Твое́ Воста́ніе.

Сти́хъ: Ибо утверди́ вселе́нную, я́же не подви́жится.

Лю́діе беззако́нніи, Христе́, Тебе́ преда́вше Пила́ту, распя́ти осуди́ша, неблагода́рни о Благодѣ́тели яви́вшеся. Но во́лею претерпѣ́лъ еси́ погребе́ніе, самовла́стно воскре́слъ еси́ тридне́вно, я́ко Бо́гъ, да́руя на́мъ безконе́чный живо́тъ и ве́лію ми́лость.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Со слеза́ми жены́, доше́дша гро́ба, Тебе́ иска́ху; не обрѣ́тша же, рыда́юща съ пла́чемъ вопію́ща, глаго́лаху: увы́ на́мъ, Спа́се на́шъ, Царю́ всѣ́хъ, ка́ко укра́денъ бы́лъ еси́? ко́е же мѣ́сто держи́тъ Живоно́сное Тѣ́ло Твое́? Ангелъ же къ ни́мъ отвѣщава́ше, — не пла́чите, — глаго́летъ, — но ше́дша проповѣ́дите, я́ко воскре́се Госпо́дь, подая́ на́мъ ра́дость, я́ко Еди́нъ Благоутро́бенъ.

Сла́ва, и ны́нѣ, богоро́диченъ:
При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

Та́же: Ны́нѣ отпуща́еши… И Трисвято́е, по Отче на́шъ…

Тропа́рь, гла́съ 4:
Свѣ́тлую Воскресе́нія про́повѣдь отъ а́нгела увѣ́дѣвша Госпо́дни учени́цы, и пра́дѣднее осужде́ніе отве́ргша, апо́столомъ хва́лящеся, глаго́лаху: испрове́ржеся сме́рть, воскре́се Христо́съ Бо́гъ, да́руяй мíрови ве́лію ми́лость.

Сла́ва, и ны́нѣ, богоро́диченъ:
Еже отъ вѣ́ка утае́ное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся Бо́гъ, въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

ВЪ СУББОТУ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 4:

Пѣ́снь 1.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Припѣ́въ: Пресвята́я Богоро́дице, спаси́ на́съ.

Яже Еди́на въ напа́стехъ и ско́рбехъ защища́ющая, подъ кро́въ Тво́й, Пречи́стая, прибѣга́ющихъ те́плѣ, пріими́, я́ко Преблага́я, я́же отъ се́рдца моле́нія.

Приста́нище невла́емое обрѣ́тъ Тя́, неразу́мный, напа́стныя же и ну́ждныя прило́ги отрѣва́я, благода́рное пою́ Ти воспѣва́ніе, Богому́жная Роди́тельнице.

Сла́ва: Ми́лостивнымъ и кро́ткимъ Твои́мъ о́комъ, Богороди́тельнице, зря́щи мя́ во обстоя́ніи и ско́рби одержи́ма, вско́рѣ свободи́, Тя́ бо призыва́ю на по́мощь.

И ны́нѣ: Преклоне́на мя́, Влады́чице, скорбьми́ ну́ждными лю́тѣ, я́ко Ми́лостива, еди́на Блага́я Предста́тельница рабо́въ Твои́хъ, ру́ку мольбы́ простри́ и лю́тыхъ бѣ́дъ изба́ви мя́.

Пѣ́снь 3.
Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Ору́жіе крѣ́пко и стѣ́ну Тя́ стяжа́въ а́зъ, побѣжда́ю сопроти́вныхъ полки́ и пою́ вели́чія Твоя́, Богоро́дице Неискусобра́чная.

Пе́щь разоря́еши печа́лей и погаша́еши отча́янія зно́й, кто́ бо та́ко, я́коже Ты́, Дѣ́во Богоро́дице, упова́ніе на́ше?

Сла́ва: Внуши́ гла́съ раба́ Твоего́, Твоея́ тре́бующаго по́мощи, Богома́ти, Упова́ніе мое́, услы́ши мя́ и напа́стей исхити́.

И ны́нѣ: Пріи́де отъ прегрѣше́ній мно́жества мучи́тельство на́мъ, нося́ сме́рть па́губную, но спаси́ Твоя́ рабы́, Богоро́дице, Ты́ бо мо́жеши.

Пѣ́снь 4.
Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Побѣ́ждши вражду́ющихъ мнѣ́ всу́е, я́ко ду́шу мою́ тща́щихся лю́тѣ прія́ти, сохрани́ мя, Влады́чице, поми́луй и спаси́, къ Тебѣ́ бо прибѣга́ю, ра́бъ Тво́й.

Избавля́ющи мя́ отъ язы́ка льстивоглаго́лива, Блага́я Засту́пнице моя́, безпа́костна покажи́ и жите́йскихъ дея́ній, мно́го бо мо́жеши, я́ко Зижди́теля Ма́ти су́щи.

Сла́ва: Безболѣ́зненну вѣ́дый Тя́, Цѣле́бницу, немощны́й, ду́хомъ и усты́ зову́: исцѣли́ мя, Влады́чице, поми́луй и спаси́, къ Тебѣ́ бо прибѣга́ю, ра́бъ Тво́й.

И ны́нѣ: Не оста́ви мене́ напа́стемъ пре́дану бы́ти, Ма́ти Бо́га на́шего, но отъ вся́кія ско́рби и зло́бы человѣ́чи сохрани́ неврежде́на, Ты́ бо еси́ Помо́щница всѣ́мъ на́мъ.

Пѣ́снь 5.
Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Испра́ви, Чи́стая, моли́тву раба́ Твоего́ ко Го́споду, Сы́ну Твоему́, да обря́щу разрѣше́ніе мно́гихъ мои́хъ прегрѣше́ній.

Изба́ви мя́ страсте́й и бѣ́дъ, Богоневѣ́сто, Тя́ бо положи́ Бо́гъ очище́ніе вои́стинну моему́ смире́нію.

Сла́ва: Покро́въ мо́й Ты́ еси́ и при́сное хвале́ніе, о Влады́чице Богоро́дице! Ника́коже бо презира́еши къ Тебѣ́ прибѣга́ющихъ.

И ны́нѣ: Поми́луй, Чи́стая, чту́щихъ Рождество́ Твое́ и изба́ви мучи́тельства и го́рести человѣ́ческія, и́бо и́маши е́же мощи́.

Пѣ́снь 6.
Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею Кро́вію.

Крѣ́пость ми́ Сама́ еси́, Пречи́стая Влады́чице, во обрѣ́тшихъ мя́ зѣло́ ненача́янныхъ ско́рбехъ, и вопію́ Ти, я́ко ве́лія еси́ Покрови́тельница рабу́ Твоему́.

Исцѣли́ душе́вныя моя́ я́звы, Пречи́стая, заступи́ мя, Дѣ́во, и изба́ви раба́ Твоего́ отъ оклевета́нія, навѣ́та же и развраще́нія непра́ведна.

Сла́ва: Сокруши́ на мя́, при́сно прибѣга́ющаго къ Тебѣ́, навѣ́тники непра́ведныя и не оста́ви мя́ поги́бнути, я́ко вся́ Тебѣ́ возмо́жна, Чи́стая, я́ко Богоотрокови́цѣ.

И ны́нѣ: Побѣди́ души́ моея́ свирѣ́пую во́лну, я́ко мно́жество прегрѣше́ній, напа́стей и скорбе́й, Влады́чице, воста́ша на мя́, но Сама́ мя́ спаси́.

Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 4:
Мно́гими прегрѣше́ніи а́зъ, блу́дный, у́мъ помрачи́въ, вопію́ Твоему́ крѣ́пкому заступле́нію, Богоро́дице: просвѣти́ души́ моея́ зѣ́ницы, возсія́й ми покая́нія свѣ́тлую зарю́ и облецы́ мя́ во ору́жіе свѣ́та, Богороди́тельнице Чи́стая.

Пѣ́снь 7.
Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Иже отъ ага́рянъ наси́лованіе ско́ро потре́бльши мече́мъ моли́твъ Твои́хъ, Марíе, лю́ди и ста́до Твое́ сохрани́, Сы́ну Твоему́ зову́щія: Бо́же оте́цъ на́шихъ, благослове́нъ еси́.

Равнолѣ́пная Ски́нія, пріими́ мя́ къ Тебѣ́ прибѣга́ющаго, да не пріи́метъ мя́ вра́гъ погуби́ти хотя́, зову́щаго: Превозноси́мый оте́цъ на́шихъ Бо́же, благослове́нъ еси́.

Сла́ва: Богороди́тельнице Марíе, предвари́ раба́ Твоего́ вско́рѣ, въ треволне́ніихъ напа́стей потопля́емаго, не иму́щаго по́мощи, къ Тебѣ́ же зову́ща: Упова́ніе конце́въ, поми́луй мя́.

И ны́нѣ: Человѣ́ческія по́мыслы, я́ко грѣхо́мъ вино́вны, ны́нѣ, Богоро́дице Блага́я, разори́ боже́ственными Твои́ми моли́твами, и рабы́ Твоя́ изба́ви болѣ́зненныя напа́сти и вся́каго вре́да.

Пѣ́снь 8.
Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

На́йде на ны́ язы́къ беззако́ненъ, хваля́ся погуби́ти служи́тели Твоя́, его́же потре́бльши, Пречи́стая, покры́й взыва́ющія: вся́ дѣла́, благослови́те, Госпо́дня, Го́спода.

Мно́гія Твоя́ щедро́ты ми́лостивно на́съ спаса́ютъ, еди́на Богома́ти, отъ грѣхо́внаго суда́ и разли́чныхъ напа́стей, Ты́ бо, ро́ждши Бо́га, ми́луеши мíръ Его́.

Сла́ва: Яко Ты́ еси́ крѣ́пость и по́мощь, не бою́ся враго́въ негодова́нія, но пою́ Тя, Влады́чице, и вопію́ Сы́ну Твоему́: благослови́те, вся́ дѣла́ Госпо́дня, Го́спода.

И ны́нѣ: На мольбу́ мою́ ны́нѣ умилосе́рдися и ра́дость въ печа́ли мѣ́сто да́руй ми́, да пою́ Тя, Влады́чице, и вопію́ Сы́ну Твоему́: благослови́те, вся́ дѣла́ Госпо́дня, Го́спода.

Пѣ́снь 9.
Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ору́жіе у́бо на ны́ обостри́въ, совѣщава́етъ льсти́вый ара́влянинъ беззако́нный, Ты́ же, Дѣ́во Богоро́дице, си́лою Креста́ и моли́твъ Твои́хъ вооружа́еши на него́ рабы́ Твоя́. Тѣ́мже проповѣ́даемъ сла́ву Твою́.

Крѣ́пость Тебѣ́ на враги́ даде́ся, Влады́чице, и избавле́ніе ми́ отъ бѣ́дъ. Что́ же а́зъ Тебѣ́ принесу́? Не довѣ́мъ! Оба́че, е́же и́мамъ, благодаре́ніе приношу́ Ти, пріими́ сіе́ ны́нѣ и спаси́ мя́.

Сла́ва: О, Ма́ти вся́ческихъ Творца́ Всесвѣ́тлая, печа́льныхъ Утѣ́ха, потопля́емыхъ Предста́тельница и пренемога́ющихся Засту́пница! До живота́ моего́ Ты́ мя́ сохрани́.

И ны́нѣ: Утѣсня́ема мя́ грѣхи́ мно́гими и бѣда́ми, не пре́зри мене́, Всепѣ́тая, ны́нѣ, Тебѣ́ хвале́нія же́ртву приношу́, прилѣ́жно взыва́я Ти́: Свята́я Богоро́дице, помози́ ми, Тя́ бо сла́вя, пѣ́снь скончава́ю.

Та́же: Досто́йно е́сть… Трисвято́е.., и про́чее обы́чно, и отпу́стъ.

ВЪ НЕДѢЛЮ УТРА НА ПОЛУНОЩНИЦѢ,
Кано́нъ Тро́иченъ, [его́же краестро́чіе: Четве́ртое пѣ́ніе Бо́гу. Творе́ніе Митрофа́ново.] Гла́съ 4.

Пѣ́снь 1.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Тро́ицу Богонача́льную да просла́вимъ Ѵпоста́сьми, Еди́нственное же Естество́ Тріе́хъ, Соприсносу́щную, Сопресто́льную, Юже моля́ще, глаго́лемъ: спаси́, и́же вѣ́рою Тебе́ сла́вящихъ.

Пома́зася отъ Отца́ Ду́хомъ ра́дованія, Богодѣ́тельнымъ еле́емъ, Сы́нъ, и Человѣ́къ бы́сть, и Еди́наго Божества́ Тріѵпоста́сное научи́лъ е́сть.

Сла́ва: Добро́ту непристу́пныя сла́вы Твоея́, Еди́нице Трисо́лнечная, серафи́ми, не терпя́ще зрѣ́ти, спокрыва́ются кри́лы и трисвяты́ми пѣ́сньми непреста́нно Тебе́ сла́вятъ.

[И ны́нѣ,] богоро́диченъ: Неизрече́нно Творца́ родила́ еси́ всѣ́хъ, Пречи́стая, избавля́ющаго дре́внія кля́твы человѣ́ки и сме́ртныя тли́, и Тобо́ю позна́хомъ Еди́наго Бо́га Тріѵпоста́снаго.

Пѣ́снь 3.
Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Си́лу свы́ше святы́мъ Твои́мъ пре́жде апо́столомъ, я́ко посла́лъ еси́, Христе́, отъ Отца́ Утѣ́шителя, Еди́но яви́лъ еси́ Естество́ Трисо́лнечное.

Патріа́рху Авраа́му егда́ яви́лася еси́ во о́бразѣ му́жестѣ, Тро́ична Еди́нице, непремѣ́нное показа́ла еси́ Твоея́ бла́гости и госпо́дьства.

Сла́ва: Иже во Образѣхъ Тріе́хъ Еди́нъ Бо́гъ вѣ́руемый, Неопи́санный я́вѣ, Недомы́слимый всѣ́ми, изба́ви ду́ши на́ша отъ вся́кія ско́рби.

[И ны́нѣ,] богоро́диченъ: Наста́вльшеся Сы́на Твоего́ прему́дрыми приведе́ньми, Еди́нственное и Трисвѣ́тлое Богонача́ліе сла́вимъ, и Тебе́ блажи́мъ, Приснодѣ́ву.

[Го́споди, поми́луй, три́жды.]

Та́же сѣда́ленъ, гла́съ 4. Подо́бенъ: Ско́ро предвари́.
Трисо́лнечная, Несозда́нная и Единосу́щная Eди́нице, Тріѵпоста́сная и Непостижи́мая, рабы́ Твоя́ уще́дри, спаси́ отъ бѣ́дъ, я́ко Бо́гъ ми́лостивъ, Тя́ бо, Го́споди, Еди́наго Изба́вителя и Влады́ку и́мамы, вопію́ще: бу́ди на́мъ ми́лостивъ.

Сла́ва, и ны́нѣ, богоро́диченъ:
Мно́гими обстоя́ньми и напа́стьми лю́тыхъ, Дѣ́во, окружа́еми, и ко отча́янію при́сно впа́дающе, еди́ну Тя́ спасе́ніе, и наде́жду, и стѣ́ну и́мамы, Богоро́дице, и Тебе́ по до́лгу вѣ́рою и ны́нѣ мо́лимъ: спаси́ рабы́ Твоя́.

Пѣ́снь 4.
Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Пресу́щную Тро́ицу во Еди́ницѣ Божества́ и Господонача́ліе, съ серафи́мы Тебе́ сла́вимъ, я́ко нераздѣ́льно естество́, я́ко непристу́пное, я́ко равноста́тно сла́вою, Бо́же Непостижи́мый.

Раздѣле́нну су́щу неизрече́нно Ли́цы Божества́ и соединя́ему держа́вою вку́пѣ Еди́немъ Госпо́дствомъ, Безпредѣ́льну Еди́ну, Неопи́санну, воспѣва́емъ Тя́, Творца́ всея́ тва́ри.

Сла́ва: Умъ безнача́льный Сло́во неизглаго́ланнѣ роди́ и Боже́ственнаго Ду́ха равномо́щна испусти́, и сего́ ра́ди Тро́ицу Единосу́щную, Влады́ку всѣ́хъ, Бо́га проповѣ́даемъ.

[И ны́нѣ,] богоро́диченъ: Ви́димь быва́я дре́вними обра́знѣ, предвозвѣсти́ло е́сть, е́же отъ Тебе́ воплоще́ніе, Сло́во, но по́слѣжде я́влься человѣ́комъ, пои́стиннѣ Тріѵпоста́сное Единонача́ліе яви́.

Пѣ́снь 5.
Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Разумѣ́вше отъ вѣ́ры Вседѣ́тельнаго Божества́ Еди́но у́бо непристу́пно Существо́, Три́ же Ѵпоста́си живонача́льны, сра́слены, чте́мъ Отца́ и Сы́на и Ду́ха Свята́го, — соприсносу́щное бытіе́.

Свѣ́те Трисо́лнечне, су́щественнаго свѣ́та Твоего́ возсія́й ми́ еди́нственное Божество́, несозда́нное Естество́ и свѣтодѣ́йственный Исто́чниче вся́кія свѣтода́тельныя зари́, да созерца́ю Твою́ добро́ту неизрече́нную.

Сла́ва: Яко Еди́ному су́щу Содѣ́телю вся́ческихъ, и Содержи́телю, и Ко́рмчію всепрему́дру, вои́стинну и жи́зни Пода́телю, сего́ ра́ди и вопіе́мъ Ти́ вѣ́рно: Влады́ко Трисо́лнечне, пою́щія Тя́ соблюди́.

[И ны́нѣ,] богоро́диченъ: Обожи́ти хотя́ дре́вле истлѣ́вшаго человѣ́ка, за бла́гость, Дѣ́во, Созда́вый и Показа́вый о́браза Боже́ственный зра́къ, Человѣ́къ бы́сть изъ Тебе́, Еди́но Тричи́сленное Богонача́ліе проповѣ́да.

Пѣ́снь 6.
Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Яви́ Оте́цъ изглаго́луя Сыновство́, и Ду́хъ, Христу́ кре́щшуся, ви́димъ бы́въ, сего́ ра́ди Еди́но и Тро́ическое Богонача́ліе сла́вимъ.

Яко ви́дѣ Тя́, трисвяты́ми гла́сы воспѣва́емаго, Иса́ія, на высо́цѣ престо́лѣ сѣдя́ща, Тро́ическую позна́ Еди́наго Богонача́лія Ѵпоста́сь.

Сла́ва: Возвыше́но се́рдце покажи́ и на́съ, ра́бъ Твои́хъ, Высо́кій Царю́ Тріѵпоста́сне, да Твоея́ сла́вы зри́мъ я́сно свѣ́тлость.

[И ны́нѣ,] богоро́диченъ: Восхотѣ́ вообрази́тися я́вѣ въ на́ше, отъ Дѣ́вы Сы́нъ Бо́жій, я́ко Человѣколю́бецъ, и Боже́ственныя сла́вы о́бщники человѣ́ки сотвори́.

[Го́споди, поми́луй, три́жды.]

Сѣда́ленъ, гла́съ 4. Подо́бенъ: Ско́ро предвари́.
Отца́ нерожде́нна, Сы́на же рожде́нна и Ду́ха Свята́го исхо́дна отъ Отца́ му́дрствующе, проповѣ́даемъ Безнача́льное Ца́рство и Божество́ еди́но, Еже славосло́вяще, единому́дренно вопіе́мъ: Тро́ице Единосу́щная, спаси́ на́съ, Бо́же.

Сла́ва, и ны́нѣ, богоро́диченъ:
Лѣ́тъ превы́шше и пре́жде вѣ́къ Бо́га, въ лѣ́то родила́ еси́ преесте́ственнѣ пло́тію Бо́га-Человѣ́ка, Пречи́стая. Тѣ́мже Тя́, Богоро́дицу, и́стинно и госпо́дьственнѣ вси́ исповѣ́дающе, прилѣ́жно Ти́ вопіе́мъ: сла́вы вѣ́чныя вся́ сподо́би.

Пѣ́снь 7.
Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Учине́ная небе́сная естества́ и у́мныя чи́ны правосла́вно, вси́ земноро́дніи, подража́юще, сла́вимъ Еди́но Божество́ въ Тріе́хъ Равнодѣ́тельныхъ Ѵпоста́сехъ. [Два́жды.]

Сла́ва: Рѣ́чи святы́хъ проро́къ Тя́ дре́вле обра́зно, Еди́наго вѣко́въ всѣ́хъ Содѣ́теля, прояви́ша, Неизрече́ннаго Бо́га и Го́спода, Богонача́льными Треми́ Ѵпоста́сьми.

[И ны́нѣ,] богоро́диченъ: Иже по существу́ Неви́димое Сло́во и Вседѣ́тельное, яви́лся еси́ человѣ́комъ, Человѣ́къ отъ Чи́стыя Богома́тере, человѣ́ка призыва́я ко прича́стію Твоего́ Божества́.

Пѣ́снь 8.
Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Свѣ́те Единонача́льный и Трисія́нный, Существо́ Безнача́льное, Добро́то Недовѣ́домая, въ се́рдцы мое́мъ всели́ся и хра́мъ Твоего́ Божества́, свѣтови́денъ и чи́стъ, покажи́ мя, зову́ща: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки. [Два́жды.]

Сла́ва: Отъ разли́чныхъ мя́ страсте́й, Тро́ице Нераздѣ́льная, Еди́нице Несли́тная, и омраче́нія прегрѣше́ній изба́ви, и озари́ луча́ми Твои́ми Боже́ственными, да вообразу́ю Твою́ сла́ву и воспѣва́ю Тя́, сла́вы Го́спода.

[И ны́нѣ,] богоро́диченъ: Умъ у́бо Нерожде́нный Оте́цъ, и Сло́во Сообра́зно, и Ду́хъ Сопресто́ленъ, — Существо́, Си́ла, Бытіе́, — Пресу́щная, Неизрече́нная, Великодѣ́йственная Тро́ице, Еди́нице, соблюда́й ста́до Твое́ моли́твами Богоро́дицы, я́ко естество́мъ Человѣколю́бецъ.

Пѣ́снь 9.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Все́ къ Тебѣ́ ны́нѣ дви́жу се́рдце мое́ и мы́сль, и предложе́нія же всея́ души́ и тѣ́ла, Содѣ́телю и Изба́вителю моему́, Единонача́льне и Трисвѣ́тле, и вопію́ Ти: спаси́ мя, раба́ Твоего́, отъ вся́кихъ искуше́ній и скорбе́й. [Два́жды.]

Сла́ва: Возвы́си на́шъ у́мъ и мы́сль къ Тебѣ́, Вы́шнему, просвѣти́ Твои́ми сія́ньми Пречи́стыми, Отче, Сло́ве, Утѣ́шителю, во свѣ́тѣ Живы́й непристу́пнѣмъ, Сла́вы Со́лнце, Свѣтоде́ржче, всегда́ сла́вити Тя́, Единонача́льнаго Бо́га Тріѵпоста́снаго.

[И ны́нѣ,] богоро́диченъ: Спаси́ и́же въ Тя́ вѣ́рующія, Го́споди, и проповѣ́дающія Безнача́льное, Присносу́щное Существо́ Еди́но, Три́ же Ли́ца Богонача́льна и Сообра́зна Твоего́ Госпо́дьствія, и Боже́ственныя Сла́вы Твоея́ сподо́би, мольба́ми Чи́стыя Богома́тере.

Посе́мъ припѣ́вы Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

ВЪ НЕДѢЛЮ УТРА,
По шестопса́лміи: Бо́гъ Госпо́дь, и яви́ся на́мъ.., на гла́съ 4. Та́же тропа́рь: Свѣ́тлую воскре́сенія про́повѣдь.., два́жды. Сла́ва, и ны́нѣ, богоро́диченъ: Еже отъ вѣ́ка утае́ное… Та́же обы́чная стихосло́вія псалти́ра.

По 1-мъ стихосло́віи сѣда́льны воскре́сны, гла́съ 4:
Воззрѣ́вша на гро́бный вхо́дъ, и пла́мене а́нгельскаго не терпя́ща мѵроно́сицы, съ тре́петомъ дивля́хуся, глаго́люща: егда́ укра́деся Отве́рзый разбо́йнику ра́й? еда́ ли воста́ Иже и пре́жде стра́сти Проповѣ́давый воста́ніе? Вои́стинну воскре́се Христо́съ, сущи́мъ во а́дѣ подая́ живо́тъ и воскресе́ніе!

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Во́льнымъ Твои́мъ совѣ́томъ Кре́стъ претерпѣ́лъ еси́, Спа́се, и во гро́бѣ но́вѣ человѣ́цы положи́ша Тя́ сме́ртніи, сло́вомъ концы́ Соста́вльшаго. Тѣ́мже свя́занъ бы́сть чу́ждій, сме́рть лю́то плѣня́шеся, и су́щіи во а́дѣ вси́ взыва́ху живоно́сному воста́нію Твоему́: Христо́съ воскре́се, Жизнода́вецъ, Пребыва́яй во вѣ́ки.

Сла́ва, и ны́нѣ, богоро́диченъ:
Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́меннѣмъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

По 2-мъ стихосло́віи сѣда́льны воскре́сны, гла́съ 4. Подобенъ: Скоро предвари.
Воскре́слъ еси́, я́ко Безсме́ртный, отъ гро́ба, Спа́се, совоздви́глъ еси́ мíръ Тво́й си́лою Твое́ю, Христе́ Бо́же на́шъ, сокруши́лъ еси́ въ крѣ́пости сме́рти держа́ву, показа́лъ еси́, Ми́лостиве, воскресе́ніе всѣ́мъ. Тѣ́мже Тя́ и сла́вимъ, еди́не Человѣколю́бче.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Съ го́рнихъ высо́тъ соше́дъ Гавріи́лъ и къ ка́меню присту́пль, идѣ́же Ка́мень жи́зни, бѣлонося́й взыва́ше ко пла́чущимъ: преста́ните вы́ отъ рыда́нія во́пля, имѣ́ющія и ны́нѣ ми́лостивное, Его́же бо и́щете, пла́чуща, дерза́йте, я́ко вои́стинну воста́лъ е́сть. Тѣ́мже возопíйте апо́столомъ: я́ко воскре́се Госпо́дь! Воста́вшему поклони́теся, ра́дость пріе́мша. Дерза́йте у́бо, да дерза́етъ у́бо и Ева.

Сла́ва, и ны́нѣ, богоро́диченъ:
Удиви́шася, Чи́стая, вси́ а́нгеловъ ли́цы та́инству Твоего́ рожде́нія стра́шному: ка́ко, Иже вся́ содержа́й ма́ніемъ еди́нѣмъ, объя́тіи Твои́ми, я́ко Человѣ́къ, содержи́тся, и пріе́млетъ нача́ло Превѣ́чный, и млеко́мъ пита́ется, Иже вся́кое дыха́ніе пита́яй неизрече́нною бла́гостію? И Тя́, я́ко вои́стинну Бо́жію Ма́терь, хва́ляще, сла́вятъ.

По непоро́чныхъ ипакои́, гла́съ 4:
Яже Твоего́ пресла́внаго воста́нія, предте́кша мѵроно́сицы, апо́столомъ проповѣ́даху, Христе́, я́ко воскре́слъ еси́, я́ко Бо́гъ, подая́ мíрови ве́лію ми́лость.

Степе́нна, гла́съ 4.

Антифо́нъ 1. Ихже стихи́ повторя́юще пое́мъ:
Отъ ю́ности моея́ мно́зи бо́рютъ мя́ стра́сти, но Са́мъ мя́ заступи́ и спаси́, Спа́се мо́й.

Ненави́дящіи Сіо́на, посрами́теся отъ Го́спода, я́ко трава́ бо огне́мъ, бу́дете изсо́хше.

Сла́ва: Святы́мъ Ду́хомъ вся́ка душа́ живи́тся и чистото́ю возвыша́ется, свѣтлѣ́ется Тро́ическимъ Еди́нствомъ священнота́йнѣ.

И ны́нѣ, то́йже.

Антифо́нъ 2:
Воззва́хъ Тебѣ́, Го́споди, те́плѣ изъ глубины́ души́ моея́, и мнѣ́ да бу́дутъ на послуша́ніе Боже́ственная Твоя́ ушеса́.

На Го́спода наде́жду вся́къ кто́ стяжа́въ, вы́шшій е́сть всѣ́хъ скорбя́щихъ.

Сла́ва: Святы́мъ Ду́хомъ то́чатся благода́тныя струи́, напая́юща вся́ку тва́рь ко оживле́нію.

И ны́нѣ, то́йже.

Антифо́нъ 3:
Се́рдце мое́ къ Тебѣ́, Сло́ве, да возвы́сится, и да ничто́же услади́тъ мя́ отъ мірски́хъ красо́тъ на сла́бость.

Къ ма́тери свое́й я́коже и́мать кто́ любо́вь, ко Го́споду те́пльше любле́ніемъ до́лжни есмы́.

Сла́ва: Святы́мъ Ду́хомъ — боговѣ́денія бога́тство, зрѣ́нія и прему́дрости: вся́ бо въ Се́мъ Оте́ческая велѣ́нія Сло́во открыва́етъ.

И ны́нѣ, то́йже.

Проки́менъ, гла́съ 4: Воскресни́, Го́споди, помози́ на́мъ,* и изба́ви на́съ и́мене Твоего́ ра́ди. Сти́хъ: Бо́же, уши́ма на́шима услы́шахомъ… Вся́кое дыха́ніе… Ева́нгеліе воскре́сно. Воскресе́ніе Христо́во… Псало́мъ 50-й. И про́чая, по обы́чаю.

Кано́нъ воскре́сeнъ, творе́ніе Іоа́нна Дамаскина́:

Пѣ́снь 1.
Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Припѣ́въ: Сла́ва, Го́споди, Свято́му Воскре́сeнію Твоему́.

Возне́слся еси́ на пречи́стѣмъ Дре́вѣ Кре́стнѣмъ, на́ше отпаде́ніе исправля́я, е́же на дре́вѣ исцѣля́я всегуби́тельство, Влады́ко, я́ко Бла́гъ и Всеси́ленъ.

Во гро́бѣ пло́тски, во а́дѣ же съ душе́ю, я́ко Бо́гъ, въ раи́ же съ разбо́йникомъ, и на престо́лѣ бы́лъ еси́, Христе́, со Отце́мъ и Ду́хомъ, вся́ исполня́я, Неопи́санный.

Богоро́диченъ: Безъ сѣ́мене Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію родила́ еси́, Иже изъ Отца́ безъ ма́тере, на́съ же ра́ди изъ Тебе́ безъ отца́.

Другíй кано́нъ, крестовоскре́сенъ, гла́съ 4:

Пѣ́снь 1.
Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Исцѣли́лъ еси́ сокруше́ніе человѣ́чества, Го́споди, Боже́ственною Твое́ю Кро́вію обнови́вый то́, и сокруши́лъ еси́ си́льнаго въ крѣ́пости, и́же дре́вле сокруши́вшаго Твое́ созда́ніе.

Ме́ртвыхъ воста́ніе умерщвле́ніемъ бы́лъ еси́, крѣ́пость бо отъя́тся умерщвле́нія бра́вшися съ Жи́знію вѣ́чною, Иже всѣ́ми влады́чествующу воплоще́нному Бо́гу.

Богоро́диченъ: Красе́нъ превы́шши небе́сныхъ си́лъ, Боже́ственный Тво́й бы́сть Хра́мъ Одушевле́нный, во утро́бѣ Ты́ носи́вши Дѣ́во, Горо́ свята́я [1], Бо́га на́шего.

Инъ кано́нъ Пресвятѣ́й Богоро́дицѣ, [его́же краестро́чіе: Четве́ртая пѣ́снь Всесла́внѣй Отрокови́цѣ]. Гла́съ 4:

Пѣ́снь 1.
Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Сотрясо́шася лю́діе, смято́шася язы́цы, Ца́рствія же держа́вная уклони́шася, Чи́стая, отъ стра́ха рождества́ Твоего́, пріи́де бо Ца́рь мо́й, и низложи́ мучи́теля, и мíръ отъ тли́ изба́ви.

Жили́ще Свое́, Живы́й въ вы́шнихъ, къ человѣ́комъ соше́дъ, освяти́, Христе́, и непоколеби́мо яви́, Еди́на бо по рождествѣ́ дѣ́вства сокро́вище, Зижди́теля ро́ждши, пребыла́ еси́.

Пѣ́снь 3.
Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Дре́во живо́тное, мы́сленный и́стинный Виногра́дъ, на Крестѣ́ ви́ситъ, все́мъ источа́я нетлѣ́ніе.

Яко вели́къ, я́ко стра́шенъ, я́ко а́дово низло́жь шата́ніе, и я́ко Бо́гъ нетлѣ́ненъ, ны́нѣ пло́тски воскре́се.

Богоро́диченъ: Ты́ еди́на, су́щимъ на земли́, я́же па́че естества́, благи́хъ Хода́таица, Ма́ти Бо́жія была́ еси́. тѣ́мже Ти́, — ра́дуйся! — прино́симъ.

Инъ.
Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ядомъ испо́лненный мнѣ́[2] змíй зу́бы вонзе́, Спа́се, я́же, Вседержи́телю Влады́ко, гвоздьми́ ру́къ Твои́хъ сокруши́лъ еси́, я́ко нѣ́сть свя́тъ во святы́хъ, па́че Тебе́, Человѣколю́бче.

Ви́дѣнъ бы́лъ еси́, Человѣколю́бче, во́лею во гро́бѣ ме́ртвъ, Животво́рче, и врата́ разве́рглъ еси́ а́дова, я́же отъ вѣко́въ душа́мъ, я́ко нѣ́сть свя́тъ во святы́хъ, ра́зве Тебе́, Человѣколю́бче.

Богоро́диченъ: Неора́на бразда́ яви́лася еси́, Кла́съ живо́тный ро́ждши, всѣ́мъ причаща́ющимся безсме́ртію Хода́тая, во святы́хъ Свята́го свя́то почива́ющаго.

Инъ.
Ирмо́съ: Съ высоты́ снизше́лъ еси́ во́лею на зе́млю, превы́ше вся́каго нача́ла, и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ па́че Тебе́, Человѣколю́бче.

Очища́ется человѣ́ковъ существо́, Тобо́ю присовоку́пльшееся нестерпи́мому Боже́ственному Огню́, я́ко сокрове́нный, Пречи́стая Дѣ́во, въ Тебѣ́ Хлѣ́бъ испе́кшееся, Иже и Тебе́ неврежде́нну сохра́ншему.

Ка́я Сія́, Яже вои́стинну бли́зъ Бо́га, яко превозше́дши вся́ а́нгельскія чи́ны? Еди́на добро́тою дѣ́вства, я́ко Ма́ти сія́ющи Вседержи́теля.

Пѣ́снь 4.
Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Возше́лъ еси́, стра́сти моя́ исцеля́я, на Кре́стъ Стра́стію пречи́стыя пло́ти Твоея́, въ ню́же во́лею обле́клся еси́. Тѣ́мже Ти́ взыва́емъ: сла́ва си́лѣ твое́й, Го́споди.

Безгрѣ́шнаго сме́рть вкуси́вши Животворя́щаго Тѣ́ла Твоего́, досто́йно, Влады́ко, умертви́ся. Мы́ же вопіе́мъ Ти́: сла́ва си́лѣ Твое́й, Го́споди.

Богоро́диченъ: Неискусобра́чно родила́ еси́, Дѣ́во, и по рождествѣ́ яви́лася еси́ дѣ́вствующи па́ки. Тѣ́мже немо́лчными гла́сы, — е́же ра́дуйся! — Тебѣ́, Влады́чице, вѣ́рою несумне́нною взыва́емъ.

Инъ.
Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Взако́ненъ сы́й Изра́иль, Тебе́, Христе́, взако́нившаго Бо́га не позна́, но я́ко беззако́нника, законопреступа́я, на Крестѣ́ пригвозди́, и́же законоположе́нію недосто́йный.

Обоже́на Твоя́, Спа́се, Душа́, а́дова сокро́вища плѣни́вши, я́же отъ вѣ́ка совоскреси́ ду́ши; живоно́сное же Тѣ́ло всѣ́мъ нетлѣ́ніе источи́.

Богоро́диченъ: Тебе́, Приснодѣ́ву и и́стинную Богоро́дицу, вси́ сла́вимъ, Юже прообразова́ше богови́дцу Моисе́ю неопа́льно, Пречи́стая, купина́, огню́ примѣси́вшися.

Инъ.
Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Поживе́ съ человѣ́ки, ви́димь бы́въ Неви́димый во зра́цѣ сы́й непостижи́маго Божества́, и вообра́жься изъ Тебе́, Отрокови́це, въ чужде́е, вѣ́дущихъ Тя́, Чи́стую Богома́терь, спаса́етъ.

Прія́тъ въ веще́ственнѣ Дѣ́ва Невеще́ственнаго въ прича́стіи вещества́, Младе́нца отъ Нея́ бы́вша. Тѣ́мже во дву́ существу́ еди́нъ познава́ется Плотоно́сецъ Бо́гъ и Человѣ́къ Пресу́щественный.

По рождествѣ́ Тя́ Дѣ́ву, Иже въ Дѣ́ву Тя́ всели́ся и ро́ждься безъ сѣ́мене, Сло́во и Бо́гъ пребы́сть, и въ рождествѣ́ Дѣ́ву сохрани́, я́ко Влады́ка и Зижди́тель всея́ тва́ри.

Ты́, Го́споди, къ земли́ ми́лостивно соше́лъ еси́, Ты́ возне́слъ еси́ па́дшее человѣ́ческое существо́, на Дре́вѣ воздвиза́емъ.

Ты́ взя́лъ ми́ еси́, Христе́, прегрѣше́ній осужде́ніе, Ты́ разруши́лъ еси́ болѣ́зни сме́ртныя, Ще́дре, Боже́ственнымъ Воскресе́ніемъ Твои́мъ.

Богоро́диченъ: Тя́ ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Инъ.
Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Прія́тъ Тя́ всего́ усты́ а́дъ безу́мный, на Кресте́ бо пригвожде́на Тя́ ви́дѣвъ, копіе́мъ прободе́на, бездыха́нна, Жива́го Бо́га, про́ста вмѣня́ше человѣ́ка. Разумѣ́ же искуси́вый крѣ́пость Твоего́ Божества́.

Разруше́ный, Человѣколю́бче, Хра́мъ Твоего́ Тѣлесе́, гро́бъ раздѣли́вый и а́дъ нево́лею, о́ба суда́ истязу́еми су́ть [3]: о́въ у́бо святы́хъ Твои́хъ ду́ши, тѣлеса́ же другíй соотсыла́юще, Безсме́ртне.

Богоро́диченъ: Се́ ны́нѣ испо́лнися проро́ческое прорече́ніе: Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́, ми́ръ подава́юща.

Инъ.
Ирмо́съ: Ны́нѣ воста́ну, — проро́чески рече́ Бо́гъ, — ны́нѣ просла́влюся, ны́нѣ вознесу́ся, па́дшаго пріе́мъ отъ Дѣ́вы и къ свѣ́ту у́мному вознося́й Моего́ Божества́.

До́мъ Тя́ сла́вы, го́ру Бо́жію святу́ю, Чи́стая, невѣ́сту, черто́гъ, хра́мъ освяще́нія, Сы́нъ Бо́жій, въ Тя́ всели́вся, и ра́й сла́дости присносу́щныя на́мъ содѣ́ла.

Пло́ть отъ кро́ве Дѣ́вственныя прія́лъ еси́, Христе́, безсѣ́менну, пречи́сту, ѵпоста́сну, и слове́сну, и у́мну, одушевле́нну, дѣ́йственну, хотѣ́тельну, самовлады́чну и самовла́стну.

Мучи́телей ра́зумъ Дѣ́вственное посрами́ чре́во, Младе́нецъ бо я́зву а́спидную душегу́бную испыта́ руко́ю, и отсту́пника го́рдаго низло́жь, вѣ́рныхъ подъ но́зѣ покори́.

Возше́лъ еси́ на Кре́стъ, си́лою препоя́сався, и сопле́тся съ мучи́телемъ, я́ко Бо́гъ, съ высоты́ све́рглъ еси́, Ада́ма же непобѣди́мою си́лою воскреси́лъ еси́.

Воскре́слъ еси́ блиста́яйся Кра́сный изъ гро́ба, Христе́, и разгна́лъ еси́ вся́ враги́ Боже́ственною си́лою Твое́ю, и вся́, я́ко Бо́гъ, весе́лія испо́лнилъ еси́.

Богоро́диченъ: О, чу́до, всѣ́хъ чуде́съ новѣ́йшее! Яко Дѣ́ва, во утро́бѣ вся́ческая Обдержа́щаго неискусому́жно заче́нши, не тѣсновмѣсти́.

Инъ.
Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Отве́рзе горта́нь сво́й а́дъ, и пожре́ мя, и ду́шу разшири́ безу́мный, но Христо́съ соше́дъ, возведе́ жи́знь мою́, я́ко Человѣколю́бецъ.

Поги́бе сме́ртію сме́рть, Уме́рый бо воскре́се, нетлѣ́ніе мнѣ́ да́руя, я́влься же жена́мъ, провѣща́ ра́дость Безсме́ртный.

Богоро́диченъ: Нестерпи́маго Божества́ вмѣсти́лище чи́стое, утро́ба Твоя́ яви́ся, о Богоро́дице, Еже безъ стра́ха небе́сніи чи́нове воззрѣ́ти не возмого́ша.

Инъ.
Ирмо́съ то́йже. Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Дре́вле у́бо прельсти́ мя́ змíй и умори́ мя прама́терію мое́ю Евою, ны́нѣ же, Чи́стая, Тобо́ю Созда́вый мя́ изъ истлѣ́нія воззва́.

Бе́здна Тя́ бе́здну неизрече́нно благоутро́бія, Отрокови́це, избра́нную показа́ чуде́съ, и́бо изъ Тебе́ мо́лніею Божества́, Би́сѣръ, Христо́съ, возсія́.

Конда́къ, гла́съ 4. Подо́бенъ: Яви́лся еси́ дне́сь.
Спа́съ и Изба́витель мо́й, изъ гро́ба, я́ко Бо́гъ, воскреси́ отъ у́зъ земноро́дныя, и врата́ а́дова сокруши́, и я́ко Влады́ка, воскре́се тридне́венъ.

Икосъ:
Воскре́сшаго изъ ме́ртвыхъ, Христа́ Жизнода́вца, тридне́вна изъ гро́ба, и врата́ сме́ртная дне́сь сокру́шшаго си́лою Свое́ю, и а́да умертви́вшаго, и жа́ло сме́ртное сте́ршаго, и Ада́ма со Евою свободи́вшаго, воспои́мъ вси́, земноро́дніи, вопію́ще хвалу́ прилѣ́жно, То́й бо, я́ко еди́нъ Крѣ́пкій, Бо́гъ и Влады́ка, воскре́се тридне́венъ.

Къ нетлѣ́нію человѣ́чество призва́ся, Боже́ственною измове́но Кро́вію Христо́вою, благода́рно воспѣва́ющее: благослове́нъ еси́ въ хра́мѣ сла́вы Твоея́, Го́споди.

Яко живоно́сецъ, я́ко рая́ краснѣ́йшій, вои́стинну, и черто́га вся́каго ца́рскаго показа́ся свѣтлѣ́йшій, Христе́, гро́бъ Тво́й, исто́чникъ на́шего воскре́сенія.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Инъ.
Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Смири́лъ еси́, на Дре́во Воздвиза́емь, о́ко высо́кое, и превознесе́нную бро́вь на зе́млю низложи́лъ еси́, спасы́й человѣ́ка, препѣ́тый отце́въ Госпо́дь и Бо́гъ благослове́нъ еси́.

Си́лою Твое́ю ро́гъ на́шъ возвы́си, служа́щихъ Ти́, воскресы́й изъ ме́ртвыхъ и а́дово истощи́вый пре́жде многочеловѣ́чное бога́тство, Влады́ко, препе́тый отце́въ Госпо́дь и Бо́гъ благослове́нъ еси́.

Тро́иченъ: Рече́ніемъ Боже́ственнымъ послѣ́дующе, сла́вимъ Еди́но Божество́, я́ко въ Тріе́хъ Свѣ́тѣхъ неслія́нно, непресѣко́мо, Пла́мень вѣ́чный, просвѣща́ющій всю́ тва́рь, зову́щую: Бо́же, благослове́нъ еси́.

Инъ.
Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Привлачи́тъ мя́ къ пѣ́нію любо́вь дѣ́вственная, о́гнь [4], и́же въ се́рдцы, вопи́ти Ма́тери и Дѣ́вѣ: Благослове́нная, Госпо́дь си́ламъ съ Тобо́ю.

Превы́шши тва́ри яви́лася еси́, я́ко Творца́ ро́ждши и Го́спода. Тѣ́мже Ти́ вопію́, Богоро́дице: Благослове́нная, Госпо́дь си́ламъ съ Тобо́ю.

Тро́иченъ: Госпо́дьство Тя́ Еди́но чты́й въ тріе́хъ свяще́ніихъ нераздѣ́льно, воспѣва́ю Тріѵпоста́сное Естество́, Благослове́нная, взыва́я Тебѣ́, Яже вся́ управля́ющая.

Ру́цѣ распросте́ръ на Крестѣ́, язы́ки вся́ собра́лъ еси́ и еди́ну яви́лъ еси́, Влады́ко, Це́рковь, воспѣва́ющую Тя́, земну́ю и небе́сную [5], согла́сно пою́щимъ: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Бѣлообра́зенъ яви́ся жена́мъ, непристу́пнымъ свѣ́томъ Воскре́сенія блиста́яйся, а́нгелъ, — что́ Жива́го во гро́бѣ, — вопія́, — и́щете я́ко ме́ртва? Вои́стинну воста́ Христо́съ! Ему́же вопіе́мъ: вся́ дѣла́, по́йте Го́спода и превозноси́те во вся́ вѣ́ки.

Богоро́диченъ: Ты́ еди́на во всѣ́хъ ро́дѣхъ, Дѣ́во Пречи́стая, Ма́ти яви́лася еси́ Бо́жія, Ты́ Божества́ была́ еси́ жили́ще, Всенепоро́чная, не опа́льшися огне́мъ непристу́пнаго Свѣ́та. Тѣ́мже вси́ Тя́ благослови́мъ, Марíе Богоневѣ́сто.

Инъ.
Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Непра́ведное ви́дящи заколе́ніе Твое́ тва́рь, омрача́ющися рыда́ше: земли́ бо смуща́ющейся, во мра́къ, я́ко въ ри́зу че́рну, со́лнце облече́ся. Мы́ же Тя́ непреста́нно пое́мъ и превозно́симъ, Христе́, во вѣ́ки.

Сше́дый ко мнѣ́ да́же до а́да и всѣ́мъ путесотвори́вый Воскре́сеніе, па́ки возше́лъ еси́, взе́мъ мя́ на ра́му Твое́ю, и Отцу́ приве́лъ еси́. Тѣ́мже зову́ Ти: Го́спода по́йте, дѣла́, и превозноси́те во вся́ вѣ́ки.

Тро́иченъ: Ума́ пе́рваго и вино́внаго всѣ́хъ, Отца́ Еди́наго Безвино́внаго сла́вимъ, Сло́ва же Безнача́льнаго и Ду́ха Утѣ́шителя, — Еди́наго Бо́га всѣ́хъ, Тро́ицѣ сра́сленнѣй покланя́ющеся и превознося́ще во вся́ вѣ́ки.

Инъ.
Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Отъ ребра́ Ада́мова созда́вый Тя́, отъ Твоего́ дѣ́вства воплоти́ся, Иже всѣ́хъ Госпо́дь, Его́же пою́ще, вопіе́мъ: вся́ дѣла́, благослови́те, по́йте Го́спода и превозноси́те Его́ во вѣ́ки.

Въ сѣ́ни Авраа́мъ узрѣ́, е́же въ Тебѣ́, Богоро́дице, та́инство, Сы́на бо Твоего́ Безпло́тнаго прія́тъ, поя́: вся́ дѣла́, благослови́те, по́йте Го́спода и превозноси́те Его́ во вѣ́ки.

Равночи́сленныя Тро́ицы спасло́ е́сть Твоего́ Дѣ́вства проображе́ніе, въ дѣ́вственныхъ бо тѣлесѣ́хъ попира́ху пла́мень, Отрокови́це, вопію́ще: благослови́те, по́йте Го́спода и превозноси́те Его́ во вѣ́ки.

Пѣ́снь 9.
Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Всего́ мя́ воспрія́лъ еси́ ве́сь въ совокупле́ніи несли́тно, всему́ ми́ дая́, Бо́же мо́й, спасе́ніе Стра́стію Твое́ю, ю́же на Крестѣ́ претерпѣ́лъ еси́ тѣле́снѣ благоутро́бія ра́ди мно́гаго.

Твои́ ученицы́, зря́ще отве́рзенъ гро́бъ Тво́й и богоно́сныя плащани́цы испражне́ны Воскре́сеніемъ Твои́мъ, со а́нгеломъ глаго́лаху: вои́стинну воста́ Госпо́дь!

Тро́иченъ: Еди́ницѣ у́бо Боже́ственнаго существа́, но ѵпоста́сьми Тро́ице, вси́, вѣ́рніи, покланя́ющеся, въ неслія́нныхъ ѵпоста́сехъ Равноси́льную Единоче́стную ны́нѣ благочту́ще велича́емъ.

Инъ.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Льсти́вно попо́лзъ змíй, изъ Еде́ма поя́тъ мя́ плѣне́на, на Кра́ніевѣмъ же тве́рдѣмъ ка́мени разби́ сего́ Вседержи́тель Госпо́дь, я́коже младе́нца, и сла́дости па́ки мнѣ́ вхо́дъ Дре́вомъ Кре́стнымъ отве́рзе.

Положи́лъ еси́ крѣ́пкія вра́жія тверды́ни ны́нѣ въ запустѣ́ніе, всеси́льнѣйшею же руко́ю бога́тство его́ расхи́тилъ еси́, изъ истоща́ній а́довыхъ совоскреси́вый мя́, Христе́, и дре́вле безмѣ́рно хва́лящагося, я́ко смѣ́хъ, руга́ема яви́лъ еси́.

Пріиди́, ни́щихъ люде́й Твои́хъ озлобле́ніе посѣща́я, ми́лостивною же и держа́вною Твое́ю руко́ю укрѣпи́ Крестоно́снаго ИМПЕРАТОРА на ху́льныя враги́, изыма́ти Твое́ изря́дное достоя́ніе, Христе́, я́ко Человѣколю́бецъ.

Инъ.
Ирмо́съ: Сокрове́нное Бо́жіе неизрече́нное въ Тебѣ́ соверша́ется я́вственное та́инство, Дѣ́во Пречи́стая, и́бо Бо́гъ изъ Тебѣ́ воплоти́ся за милосе́рдіе, Тѣ́мже Тя́ я́ко Богоро́дицу велича́емъ.

Зри́мъ, я́ко кри́нъ, Тя́, ри́зою обагре́ною укра́шену, Пречи́стая, Боже́ственнаго Ду́ха, посредѣ́ те́рнія сія́ющу и благоуха́нія исполня́ющу, и́же Тебе́ и́скренно велича́ющихъ.

Тлѣ́нное пріи́мъ человѣ́ческое естество́ изъ Твоего́, Всенепоро́чная, чре́ва Нетлѣ́нный. Въ Себѣ́ показа́ нетлѣ́нно за благоутро́біе, тѣ́мже Тя́, я́ко Богоро́дицу, велича́емъ.

Яже всѣ́ми влады́чествующи тва́рьми, лю́демъ Твои́мъ да́руй побѣ́дное одолѣ́ніе, врага́ полага́ющи примири́тельна Це́ркви, да Тя́, я́ко Богоро́дицу, велича́емъ.

По катава́сіи ектенія́ и Свя́тъ Госпо́дь Бо́гъ на́шъ… Посе́мъ свѣти́ленъ. Сла́ва, и ны́нѣ, богоро́диченъ.

На хвали́техъ стихи́ры воскре́сны, гла́съ 4:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Кре́стъ претерпѣ́вый и сме́рть, и воскресы́й изъ ме́ртвыхъ, Всеси́льне Го́споди, сла́вимъ Твое́ Воскресе́ніе.

Сти́хъ: Хвали́те Бо́га во святы́хъ Его́, хвали́те Его́ во утверже́ніи си́лы Его́.

Кресто́мъ Твои́мъ, Христе́, отъ дре́внія кля́твы свободи́лъ еси́ на́съ, и сме́ртію Твое́ю естество́ на́ше му́чащаго діа́вола упраздни́лъ еси́, воста́ніемъ же Твои́мъ ра́дости вся́ испо́лнилъ еси́. Тѣ́мже вопіе́мъ Ти́: воскресы́й изъ ме́ртвыхъ, Го́споди, сла́ва Тебѣ́.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Твои́мъ Кресто́мъ, Христе́ Спа́се, наста́ви на́съ на и́стину Твою́ и изба́ви на́съ отъ сѣ́тей вра́жіихъ, Воскресы́й изъ ме́ртвыхъ, возста́ви ны́, па́дшіяся грѣхо́мъ, просте́ръ ру́ку Твою́, Человѣколю́бче Го́споди, моли́твами святы́хъ Твои́хъ.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Оте́ческихъ Твои́хъ нѣ́дръ не разлучи́вся, Единоро́дный Сло́ве Бо́жій, прише́лъ еси́ на зе́млю за человѣколю́біе, Человѣ́къ бы́въ непрело́женъ, и Кре́стъ, и сме́рть претерпѣ́лъ еси́ пло́тію, безстра́стный Божество́мъ; воскре́съ же изъ ме́ртвыхъ, безсме́ртіе по́далъ еси́ ро́ду человѣ́ческому, я́ко еди́нъ Всеси́ленъ.

Ины стихи́ры анато́ліевы, гла́съ то́йже:

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Сме́рть прія́лъ еси́ пло́тію, на́мъ безсме́ртіе хода́тайствуя, Спа́се, и во гро́бъ всели́лся еси́, да на́съ отъ а́да свободи́ши, воскреси́въ съ Собо́ю: пострада́ у́бо, я́ко Человѣ́къ, но воскре́съ, я́ко Бо́гъ. Сего́ ра́ди вопіе́мъ: сла́ва Тебѣ́, Жизнода́вче Го́споди, еди́не Человѣколю́бче.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Ка́меніе распада́шеся, Спа́се, егда́ на Ло́бнѣмъ Кре́стъ Тво́й водрузи́ся, устраши́шася а́довы вра́тницы, егда́ во гро́бѣ, я́ко ме́ртвъ, положе́нъ бы́лъ еси́: и́бо сме́ртную упраздни́вый крѣ́пость, уме́ршимъ всѣ́мъ нетлѣ́ніе по́далъ еси́ Воскресе́ніемъ Твои́мъ, Спа́се. Жизнода́вче Го́споди, сла́ва Тебѣ́.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Возжелѣ́ша жены́ ви́дѣти Твое́ Воскре́сеніе, Христе́ Бо́же, пріи́де предва́рши Марíя Магдали́на, обрѣ́те ка́мень, отвале́нъ отъ гро́ба, и а́нгела сѣдя́ща и глаго́люща: что́ и́щете Жива́го съ ме́ртвыми? Воскре́се, я́ко Бо́гъ, да спасе́тъ вся́ческая.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Гдѣ́ е́сть Іису́съ, Его́же вмѣни́сте стрещи́, рцы́те іуде́и? Гдѣ́ е́сть, Его́же положи́сте во гро́бѣ, ка́мень запечатлѣ́вше? Дади́те ме́ртва, и́же Живота́ отве́ргшіися; дади́те погребе́ннаго или́ вѣ́руйте Воскре́сшему. Аще и вы́ умолчите́ Госпо́дне воста́ніе, ка́меніе возопіе́тъ, па́че же отвале́нный отъ гро́ба. Вели́кая Твоя́ ми́лость, ве́ліе та́инство смотре́нія Твоего́, Спа́се на́шъ, сла́ва Тебѣ́.

Сла́ва, стихи́ра у́тренняя ева́нгельская. И ны́нѣ, богоро́диченъ: Преблагослове́нна еси́… Славосло́віе вели́кое.

По славосло́віи тропа́рь воскре́сенъ:
Воскре́съ изъ гро́ба и у́зы растерза́лъ еси́ а́да, разруши́лъ еси́ осужде́ніе сме́рти, Го́споди, вся́ отъ сѣте́й врага́ изба́вивый; яви́вый же Себе́ апо́столомъ Твои́мъ, посла́лъ еси́ я́ на про́повѣдь, и тѣ́ми ми́ръ Тво́й по́далъ еси́ все́й вселе́ннѣй, еди́не Многоми́лостиве.

Та́же ектеніи́ и отпу́стъ. Посе́мъ ча́съ пе́рвый, и про́чее обы́чное, и коне́чный отпу́стъ.

НА ЛИТУРГІИ,
Блаже́нна, гла́съ 4:
Дре́вомъ Ада́мъ рая́ бы́сть изселе́нъ, дре́вомъ же Кре́стнымъ разбо́йникъ въ ра́й всели́ся: овъ у́бо вку́шъ, за́повѣдь отве́рже Сотво́ршаго; о́въ же сраспина́емь, Бо́га исповѣ́да тая́щагося, — помяни́ мя́, — вопія́, — во Ца́рствіи Твое́мъ.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Вознесы́йся на Кре́стъ, сме́ртную разруши́вый си́лу и загла́дивый, я́ко Бо́гъ, е́же на ны́ рукописа́ніе, Го́споди, разбо́йниче покая́ніе и на́мъ пода́ждь, еди́не Человѣколю́бче, вѣ́рою служа́щимъ, Христе́ Бо́же на́шъ, и вопію́щимъ Ти́: помяни́ и на́съ во Ца́рствіи Твое́мъ.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Рукописа́ніе на́ше на Крестѣ́ копіе́мъ раздра́лъ еси́, и вмѣни́вся въ ме́ртвыхъ, та́мошняго мучи́теля связа́лъ еси́, изба́вивый всѣ́хъ отъ у́зъ а́довыхъ Воскре́сеніемъ Твои́мъ, и́мже просвѣти́хомся, Человѣколю́бче Го́споди, и вопіе́мъ Ти́: помяни́ и на́съ во Ца́рствіи Твое́мъ.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Распны́йся и воскресы́й, я́ко Си́ленъ, изъ гро́ба тридне́венъ, и первозда́ннаго Ада́ма воскреси́вый, еди́не Безсме́ртне, и мене́ на покая́ніе обрати́тися, Го́споди, сподо́би отъ всего́ се́рдца моего́ и те́плою вѣ́рою при́сно взыва́ти Ти́: помяни́ мя́, Спа́се, во Ца́рствіи Твое́мъ.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

На́съ ра́ди Иже безстра́стенъ стра́стный бы́сть Человѣ́къ, и во́лею на Крестѣ́ пригвожде́йся, на́съ совоскреси́, тѣ́мже и сла́вимъ со Кресто́мъ Стра́сть и Воскре́сеніе, и́миже возсозда́хомся, и́миже и спаса́емся, взыва́юще: помяни́ и на́съ во Ца́рствіи Твое́мъ.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Воскре́сшаго изъ ме́ртвыхъ, и а́дову держа́ву Плѣни́вшаго, и Ви́дима жена́ми мѵроно́сицами, — ра́дуйтеся! — Глаго́лющаго, вѣ́рніи, умо́лимъ отъ истлѣ́нія изба́вити ду́ши на́ша, зову́ще всегда́ разбо́йника благоразу́мнаго гла́сомъ къ Нему́: помяни́ и на́съ во Ца́рствіи Твое́мъ.

Сла́ва, тро́иченъ: Отца́ и Сы́на и Свята́го Ду́ха вси́ единому́дренно, вѣ́рніи, славосло́вити досто́йно помо́лимся, Еди́нство Божества́, въ Тріе́хъ су́щее Ѵпоста́сехъ, неслія́нно пребыва́ющее, про́сто, нераздѣ́льно и непристу́пно, Имже избавля́емся о́гненнаго муче́нія.

И ны́нѣ, богоро́диченъ: Ма́терь Твою́, Христе́, пло́тію безъ сѣ́мене ро́ждшую Тя́, и Дѣ́ву вои́стинну, и по рождествѣ́ пребы́вшу нетлѣ́нну, Сію́ Ти́ приво́димъ въ моли́тву, Влады́ко Многоми́лостиве, прегрѣше́ній проще́ніе да́руй всегда́ вопію́щимъ Ти́: помяни́ и на́съ во Ца́рствіи Твое́мъ.

Проки́менъ, гла́съ 4: Яко возвели́чишася дѣла́ Твоя́, Го́споди,* вся́ прему́дростію сотвори́лъ еси́. Сти́хъ: Благослови́, душе́ моя́, Го́спода. Го́споди Бо́же мо́й, возвели́чился еси́ зѣло́. Аллилу́ія, [гласъ 4]: Наляцы́, и успѣва́й, и ца́рствуй, и́стины ра́ди и кро́тости, и пра́вды. Сти́хъ: Возлюби́лъ еси́ пра́вду и возненави́дѣлъ еси́ беззако́ніе.

Примѣчанія:
[1] Яже во утро́бѣ Тя́ носи́вшая Дѣ́во, Гора́ свята́я Твоя́.
[2] Ядомъ испо́лнены въ мя́.
[3] Оба истязу́етася.
[4] Любве́ дѣ́вственныя о́гнь.
[5] Земны́мъ и небе́снымъ.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 250 – 266.

Свързани