СЛУЖБА ВОСКРЕСНАЯ 7-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ.., поста́вимъ стихо́въ 4 и пое́мъ 3 воскре́сны, повторя́юще 1-й.

Стихи́ры воскре́сны, гла́съ 7:

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Пріиди́те, возра́дуемся Го́сподеви, сокруши́вшему сме́рти держа́ву и просвѣти́вшему человѣ́ческій ро́дъ, со безпло́тными зову́ще: Содѣ́телю и Cпа́се на́шъ, сла́ва Тебѣ́.

Кре́стъ претерпѣ́лъ еси́, Спа́се, и погребе́ніе на́съ ра́ди, сме́ртію же, я́ко Бо́гъ, сме́рть умертви́лъ еси́. Тѣ́мже покланя́емся тридне́вному Воскре́сенію Твоему́, Го́споди, сла́ва Тебѣ́.

Апо́столи, ви́дѣвше Воскре́сеніе Содѣ́теля, чудя́хуся, пою́ще хвалу́ а́нгельскую: сія́ сла́ва е́сть церко́вная, сіе́ бога́тство Ца́рствія. Пострада́вый на́съ ра́ди, Го́споди, сла́ва Тебѣ́.

Сла́ва, и ны́нѣ, богоро́диченъ догма́тикъ, гла́съ 7:
Стра́шно и неизрече́нно вои́стинну е́же о Тебѣ́ содѣ́янное та́инство, Нескве́рная, Сло́во бо всѣ́хъ вино́вное, па́че вины́ и сло́ва, Святы́мъ Ду́хомъ вопло́щшееся родила́ еси́, изъ Тебе́ пло́ть пріи́мша, Своего́ естества́ непрело́жно пребы́вша. Соше́дшимся бо обои́мъ самобы́тнѣ, по ѵпоста́си еди́нственнѣй, сугу́бъ естество́мъ происхо́дитъ, ве́сь Бо́гъ и ве́сь Человѣ́къ, во обои́хъ соверше́нствіихъ дѣйстви́тельными сво́йствы изъявля́я: пострада́въ бо на Крестѣ́ пло́тію, безстра́стный То́йже пребы́сть Боже́ственнѣ; я́ко человѣ́къ, умры́й, па́ки оживе́, я́ко Бо́гъ, тридне́венъ, держа́ву сме́ртную низложи́въ, изъ истлѣ́нія изба́вль человѣ́чество. Того́, я́ко Изба́вителя и Спа́са ро́да на́шего, Богома́ти, моли́ низпосла́ти на́мъ щедро́тъ Его́ ве́лію ми́лость.

Та́же: Свѣ́те Ти́хій… Посе́мъ проки́менъ: Госпо́дь воцари́ся.., три́жды. Сти́хъ: Облече́ся Госпо́дь въ си́лу и препоя́сася… Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ

На стихо́внѣ стихи́ру воскре́сну, гла́съ 7:
Воскре́слъ еси́ изъ гро́ба, Спа́се мíра, и совоздви́глъ еси́ человѣ́ки съ пло́тію Твое́ю. Го́споди, сла́ва Тебѣ́.

Ины стихи́ры, Пресвятѣ́й Богоро́дицѣ, гла́съ 7. Подо́бенъ: Неради́вше о вре́менныхъ.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Восто́къ Со́лнца мы́сленнаго, Дѣ́во, была́ еси́, на за́падѣхъ е́же по на́мъ бы́вшаго естества́. Но я́ко иму́щи дерзнове́ніе, Того́ моли́, Богоро́дице Всепѣ́тая, отъ безмѣ́рныхъ прегрѣше́ній свободи́ти ду́ши на́ша.

Сти́хъ: Слы́ши, Дщи́, и ви́ждь, и приклони́ у́хо Твое́.

Же́злъ изъ ко́рене Іессе́ева, Дѣ́во, я́вѣ прозябла́ еси́, насажде́нія пре́лести изъ ко́рене Потре́бльшаго. Но я́ко иму́щи дерзнове́ніе, непреста́нно моли́ искорени́ти, Всепѣ́тая, се́рдца моего́ стра́сти и Того́ всади́ти стра́хъ и спасти́ мя́.

Сти́хъ: Лицу́ Твоему́ помо́лятся бога́тіи лю́дстіи.

Врата́ Бо́жія, Пресвята́я, отъ вра́тъ а́довыхъ изба́ви мя́ и пу́ть покая́нія покажи́ ми, и́мже обря́щу врата́, къ жи́зни вводя́щая. Заблу́ждшихъ Наста́внице, ро́дъ вѣ́рныхъ человѣ́къ соблюда́й и спаса́й ду́ши на́ша.

Сла́ва, и ны́нѣ, богоро́диченъ:
Изъ Тебе́, Всесвята́я Богоро́дице Дѣ́во, неизрече́нно роди́ся Христо́съ Бо́гъ на́шъ, вои́стинну сы́й Бо́гъ превѣ́чный и Человѣ́къ но́въ, ово у́бо сы́й присносу́щенъ, о́во же на́съ ра́ди бы́въ; спаса́етъ бо Собо́ю коего́ждо естества́ сво́йство, о́вѣмъ у́бо сія́я чудесы́, о́вѣмъ же увѣря́я Страстьми́. Тѣ́мже Еди́нъ и То́йже и умира́етъ, я́ко Человѣ́къ, и я́ко Бо́гъ, востае́тъ. Его́же моли́, Чи́стая, Неискусобра́чная, спасти́ся душа́мъ на́шимъ.

Та́же: Ны́нѣ отпуща́еши… Трисвято́е, и по Отче на́шъ… Тропа́рь воскре́сенъ. Сла́ва, и ны́нѣ, богоро́диченъ его́. И отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
На Го́споди, воззва́хъ.., поста́вимъ стихо́въ 10 и пое́мъ стихи́ры воскре́сны, гла́съ 7. Творе́ніе Іоа́нна Дамаскина́.

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Сти́хъ: Мене́ жду́тъ пра́ведницы, до́ндеже возда́си мнѣ́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Ины стихи́ры, восто́чны [анато́ліевы], гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Аще и я́тъ бы́лъ еси́, Христе́, отъ беззако́нныхъ муже́й, но Ты́ ми еси́ Бо́гъ, и не постыжду́ся; біе́нъ бы́лъ еси́ по плеще́ма, не отмета́юся; на Крестѣ́ пригвожде́нъ бы́лъ еси́, и не таю́; Воста́ніемъ Твои́мъ хвалю́ся, сме́рть бо Твоя́ — живо́тъ мо́й. Всеси́льне и Человѣколю́бче Го́споди, сла́ва Тебѣ́.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Дави́дское проро́чество исполня́я Христо́съ, вели́чествіе въ Сіо́нѣ Свое́ ученико́мъ откры́лъ е́сть, хвали́ма показу́я Себе́ и сла́вима при́сно со Отце́мъ же и Ду́хомъ Святы́мъ, пе́рвѣе у́бо безпло́тна, я́ко Сло́ва, послѣди́ же на́съ ра́ди воплоще́на и умерщвле́на, я́ко человѣ́ка, и воскре́сша со вла́стію, я́ко Человѣколю́бца.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Соше́лъ еси́ во а́дъ, Христе́, я́коже восхотѣ́лъ еси́, испрове́рглъ еси́ сме́рть, я́ко Бо́гъ и Влады́ка, и воскре́слъ еси́ тридне́венъ, совоскреси́въ Ада́ма отъ а́довыхъ у́зъ и тлѣ́нія, зову́ща и глаго́люща: сла́ва Воскре́сенію Твоему́, еди́не Человѣколю́бче.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Во гро́бѣ положе́нъ бы́лъ еси́, я́ко спя́, Го́споди, и воскре́слъ еси́ тридне́венъ, я́ко Си́ленъ въ крѣ́пости, совоскреси́въ Ада́ма отъ тли́ сме́ртныя, я́ко Всеси́ленъ.

Ины стихи́ры, Богоро́дицѣ, Па́вла Аморре́йскаго, гла́съ 2. Подо́бенъ: Егда́ отъ Дре́ва.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Ты́ еси́ а́нгеловъ ра́дость, Ты́ еси́ человѣ́ковъ сла́ва, Ты́ вѣ́рныхъ наде́жда, Влады́чице Всепѣ́тая, предста́тельница на́ша, и къ Тебѣ́ прибѣга́емъ во вся́кой ну́жди, я́ко да мольба́ми Твои́ми отъ стрѣ́лъ вра́жіихъ па́губы душетлѣ́нныя и вся́кихъ скорбе́й изба́вимся вси́, воспѣва́ющіи Тя́, Богоневѣ́стная.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Ты́ ми, Богоро́дице, упова́ніе, Ты́ ми предста́тельница, и стѣна́, и прибѣ́жище, Влады́чице Препѣ́тая, Яже Бо́га пло́тію неискусому́жно ро́ждши мíру Спаси́теля. Ты́ мольба́ми Твои́ми отъ одержа́щихъ на́съ изба́ви искуше́ній, и бѣ́дъ, и обстоя́ній, еди́на христіа́нъ прибѣ́жище.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Укроти́ пло́ти моея́ стремле́нія, угаси́ пла́мень страсте́й мои́хъ, отыми́ отъ мене́, Богоро́дице, зно́й лука́вый жела́нія моего́ и непрекло́нный мо́й обы́чай возврати́, Дѣ́во, отъ вся́каго бѣсо́вскаго стремле́нія, я́ко да въ тишинѣ́ се́рдца и въ безстра́стіи души́ моея́ пѣсносло́влю Тя́, Всепѣ́тую.

Сла́ва, и ны́нѣ, богоро́диченъ:
Ма́ти у́бо позна́лася еси́ па́че естества́, Богоро́дице, пребыла́ же еси́ Дѣ́ва, па́че сло́ва и ра́зума, и чудесе́ рождества́ Твоего́ сказа́ти язы́къ не мо́жетъ. Пресла́вну бо су́щу зача́тію, Чи́стая, непости́женъ е́сть о́бразъ рожде́нія, идѣ́же бо хо́щетъ Бо́гъ, побѣжда́ется естества́ чи́нъ. Тѣ́мже Тя́ вси́ Ма́терь Бо́жію вѣ́дуще, мо́лимъ Ти ся прилѣ́жно: моли́ спасти́ся душа́мъ на́шимъ.

Та́же: Свѣ́те Ти́хій… Проки́менъ дне́: Госпо́дь воцари́ся… И про́чее по обы́чаю.

На стихо́внѣ стихи́ры воскре́сны, гла́съ 7:
Воскре́слъ еси́ изъ гро́ба, Спа́се мíра, и совоздви́глъ еси́ человѣ́ки съ пло́тію Твое́ю. Го́споди, сла́ва Тебѣ́.

Ины стихи́ры, по алфави́ту.

Сти́хъ: Госпо́дь воцари́ся, въ лѣ́поту облече́ся.

Воскре́сшему изъ ме́ртвыхъ и Просвѣти́вшему вся́, пріиди́те, поклони́мся, отъ а́дова бо мучи́тельства на́съ свободи́лъ е́сть, Свои́мъ тридне́внымъ Воскре́сеніемъ живо́тъ на́мъ дарова́вый и ве́лію ми́лость.

Сти́хъ: Ибо утверди́ вселе́нную, я́же не подви́жится.

Во а́дъ соше́дъ, Христе́, сме́рть плѣни́лъ еси́, и тридне́венъ воскре́съ, на́съ совоскреси́лъ еси́, сла́вящихъ Твое́ всеси́льное Воста́ніе, Го́споди Человѣколю́бче.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Стра́шенъ яви́лся еси́, Го́споди, во гро́бѣ лежа́, я́ко спя́; воскре́съ же тридне́венъ, я́ко Си́ленъ, Ада́ма совоскреси́лъ еси́ зову́ща: сла́ва Воскре́сенію Твоему́, еди́не Человѣколю́бче.

Сла́ва, и ны́нѣ, богоро́диченъ:
Подъ кро́въ Тво́й, Влады́чице, вси́ земноро́дніи, прибѣга́юще, вопіе́мъ Ти́: Богоро́дице, упова́ніе на́ше, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

Та́же: Ны́нѣ отпуща́еши… Трисвято́е, и по Отче на́шъ…

Глаго́лемъ тропа́рь воскре́сенъ, гла́съ 7:
Разруши́лъ еси́ Кресто́мъ Твои́мъ сме́рть, отве́рзлъ еси́ разбо́йнику ра́й, мѵроно́сицамъ пла́чь преложи́лъ еси́ и апо́столомъ проповѣ́дати повелѣ́лъ еси́, я́ко воскре́слъ еси́, Христе́ Бо́же, да́руяй мíрови ве́лію ми́лость.

Сла́ва, и ны́нѣ, богоро́диченъ:
Яко на́шего воскресе́нія сокро́вище, на Тя́ надѣ́ющіяся, Всепѣ́тая, отъ ро́ва и глубины́ прегрѣше́ній возведи́, Ты́ бо пови́нныя грѣху́ спасла́ еси́, ро́ждшая Спасе́ніе на́ше, Яже пре́жде рождества́ Дѣ́ва, и въ рождествѣ́ Дѣ́ва, и по рождествѣ́ па́ки пребыва́еши Дѣ́ва.

Та́же и отпу́стъ.

ВЪ СУББОТУ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 7:

Пѣ́снь 1.
Ирмо́съ: Сокруши́вшему бра́ни мы́шцею Свое́ю и вса́дники триста́ты погрузи́вшему, пои́мъ Ему́, я́ко Изба́вителю на́шему Бо́гу, я́ко просла́вися.

Припѣ́въ: Пресвята́я Богоро́дице, спаси́ на́съ.

Яко украше́ніе пѣ́ніемъ и пѣ́снь богоподо́бну благодаре́нія Ти́ да́ры прино́симъ, — е́же ра́дуйся! — ны́нѣ, Чи́стая, я́ко отъ печа́ли ра́дость на́мъ подала́ еси́.

Ми́лости Твоея́ благода́ть и покро́ва крѣ́пость не премолчи́мъ, Дѣ́во Пречи́стая, я́ко отъ бѣ́дъ лю́тыхъ на́съ спасла́ еси́.

Сла́ва: Отъ разли́чныхъ изба́вльшеся искуше́ній и скорбе́й ма́терними Твои́ми моли́твами, Пречи́стая, согла́сно и те́плѣ благодаре́нія Тебѣ́ вси́ гла́сы пои́мъ.

И ны́нѣ: Ря́снами испещре́на, я́ко златы́ми, добродѣ́тельми, и Ду́ха благода́тьми, Пречи́стая, я́ко Невѣ́ста Отча украси́вшися, вои́стинну яви́лася еси́ Ма́ти Бо́гу.

Пѣ́снь 3.
Ирмо́съ: Въ нача́лѣ небеса́ всеси́льнымъ Сло́вомъ Твои́мъ утверже́й, Го́споди Спа́се, и Вседѣ́тельнымъ и Бо́жіимъ Ду́хомъ всю́ си́лу и́хъ, на недви́жимѣмъ мя́ ка́мени исповѣ́данія Твоего́ утверди́.

Ра́дости Боже́ственныя вели́чіе, я́ко отъ нача́ла на́мъ весе́лію, благодаре́нія гла́сы прино́симъ прилѣ́жно, почита́юще Ю, я́ко Предста́тельницу на́шу.

Иже Тобо́ю изба́вльшеся отъ бѣ́дъ и Тебе́ ра́ди ра́дость получи́вше, Ма́ти Безневѣ́стная, я́ко Пода́тельницу благу́ю и Засту́пницу благохва́льну вси́ прославля́емъ.

Сла́ва: Измѣне́ніе прегрѣше́ній и напа́стей боже́ственною Твое́ю моли́твою пріе́млюще, Ма́ти Христа́ Бо́га, я́ко вину́ благи́хъ воспѣва́емъ Тя́ вѣ́рно благода́рными гла́сы.

И ны́нѣ: Яже ра́дости исто́чникъ безсме́ртныя то́читъ струи́ при́сно и спаса́етъ всѣ́хъ Сама́, я́ко присножи́зненное на́мъ благодая́ніе, Ма́ти Христа́ Бо́га.

Пѣ́снь 4.
Ирмо́съ: Покры́ла е́сть небеса́, Христе́ Бо́же, смотре́ніемъ Твои́мъ добродѣ́тель неизрече́нныя му́дрости Твоея́, Человѣколю́бче.

Досто́йну Ти́ пѣ́снь ра́дованія, Чи́стая Дѣ́во, веселя́щеся прино́симъ, изба́вльшеся отъ бѣ́дъ Твои́ми моли́твами.

Благода́рственно Тебѣ́, Дѣ́во Чи́стая, душе́вныма рука́ма вно́симъ пѣ́ніе, боже́ственными пѣ́сньми игра́юще, отъ печа́ли изба́вльшеся мно́гія.

Сла́ва: Воздвиго́ша на ны́ бѣды́ мно́ги страстнíи грѣси́, но боже́ственнымъ Твои́мъ покро́вомъ, Чи́стая, на́съ изба́ви.

И ны́нѣ: Блаже́ни вои́стинну чту́щіи Тя́, Богоро́дице Пречи́стая, я́ко Тобо́ю грѣха́ и печа́ли изба́вихомся.

Пѣ́снь 5.
Ирмо́съ: Но́щь не свѣтла́ невѣ́рнымъ, Христе́, вѣ́рнымъ же просвѣще́ніе въ сла́дости слове́съ Твои́хъ. Сего́ ра́ди къ Тебѣ́ у́тренюю и воспѣва́ю Твое́ Божество́.

Грѣха́ Потреби́теля, Христа́, Дѣ́во, родила́ еси́, Имже отъ напа́стей и болѣ́зней спасе́ся мíръ, тѣ́мже, — ра́дуйся! — и мы́ вопіе́мъ Ти́, изба́вльшіися печа́лей.

Объе́мшеся разли́чными напа́стьми, Чи́стая Влады́чице, и печа́лію, и ско́рбію, и лю́тымъ обстоя́ніемъ, отча́явшеся мы́ весе́лія, наде́жду Тя́ обрѣто́хомъ.

Сла́ва: Яко спасе́нія храни́лище на́мъ, рабо́мъ Твои́мъ, Чи́стая, отгоня́еши напа́сти и соблюда́еши невреди́мы. Тѣ́мже, прича́стницы мно́гихъ Твои́хъ бла́гъ, благодари́мъ Тя́ пѣ́сньми.

И ны́нѣ: Благодари́мъ Тя́, изба́вльшеся Тобо́ю грѣхо́въ мно́гихъ, и не́мощей, и болѣ́зней, и неду́гъ лю́тыхъ, Пречи́стая Влады́чице, наде́жда бо еси́ тверда́ Твои́мъ вѣ́рнымъ рабо́мъ.

Пѣ́снь 6.
Ирмо́съ: Во глубину́ грѣхо́вную впа́дся, Бла́же, я́ко Іо́на отъ ки́та, вопію́ Ти: возведи́ отъ тли́ живо́тъ мо́й и спаси́ мя, Человѣколю́бче.

Ангельстіи язы́цы досто́йно Твоя́ хвалы́ воспѣ́ти не мо́гутъ, Чи́стая; мы́ же ны́нѣ, ра́бски взе́мшеся, ра́дованіе Гавріи́лово прино́симъ Ти́.

Во глубину́ печа́ли и обстоя́нія грѣхи́ на́шими впа́дше, изба́вихомся Тобо́ю отъ ну́жды и напа́стей, Дѣ́во Богоро́дице Чи́стая.

Сла́ва: Подъ до́лгомъ содѣ́лася ве́сь мíръ, Чи́стая, благодари́ти, и хвали́ти, и сла́вити благода́ть Твою́ благоче́стно, Тобо́ю бо бѣ́дъ и печа́лей изба́влени бы́хомъ.

И ны́нѣ: Въ нощи́ и во дни́, я́вѣ и вта́й, подъ Тво́й прибѣга́емъ покро́въ, Пречи́стая Дѣ́во, и́же Тя́ вѣ́рно славосло́вящіи.

Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 7.
Го́споди, мы́ есмы́ лю́діе Твои́ и о́вцы па́жити Твоея́, заблу́ждшихъ, я́ко Па́стырь, обрати́ на́съ, тле́ю расточе́ныхъ собери́ на́съ, поми́луй ста́до Твое́, умилосе́рдися на лю́ди Твоя́ моли́твами Богоро́дицы, еди́не Безгрѣ́шный.

Пѣ́снь 7.
Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди, Бо́же оте́цъ на́шихъ.

Ра́дованіе благода́рственное Тебѣ́ прино́симъ, Ма́ти Бо́жія, я́ко вои́стинну Тобо́ю изба́влени вся́каго зла́го начина́нія, и согла́сно Тебѣ́ пое́мъ: Благослове́нна еси́!

Водвори́хомся въ ве́черъ въ пла́чи печа́лей и ча́яніи злы́хъ, но Твои́мъ боголѣ́пнымъ кро́вомъ, Дѣ́во, обоже́ни бы́вше, обрѣто́хомъ ра́дость зау́тра, Ты́ бо спасла́ еси́ на́съ.

Сла́ва: Яко Боже́ственное прибѣ́жище мы́ покро́въ Тво́й вси́ стяжа́вше къ Бо́гу, въ напа́стехъ, и гоне́ніихъ, и грѣсѣ́хъ, къ Тебѣ́ прибѣга́емъ и Тобо́ю измѣне́ніе пріе́млемъ, Пречи́стая.

И ны́нѣ: Благода́ть моли́твы Твоея́, Чи́стая, проповѣ́дуемъ усты́ и ду́хомъ, Сла́вная, я́ко Тебе́ ра́ди напа́сти, и бу́ри, и тя́жкихъ печа́лей, и грѣха́ страсте́й вси́ избавля́емся.

Пѣ́снь 8.
Ирмо́съ: Стра́шнаго херуви́момъ, и чу́днаго серафи́момъ, и мíру Творца́, свяще́нницы, и раби́, и ду́си пра́ведныхъ, по́йте, благослови́те и превозноси́те Его́ во вѣ́ки.

Яко изба́вльшеся бу́ри грѣхо́вныя, и страсте́й, и напа́стей Твои́ми моли́твами, Богоро́дице Блага́я, благода́рственнымъ гла́сомъ, — ра́дуйся! — вопіе́мъ Ти́, я́ко Тобо́ю отъ печа́ли въ ра́дость преше́дше.

Въ болѣ́знехъ и напа́стехъ одержи́мыя не пре́зри, Блага́я, но мольбу́ худу́ю услы́шавши, свободи́ на́съ отъ скорбе́й вели́кихъ, да вѣ́рно Твою́ моли́тву, Чи́стая, воспѣва́емъ.

Сла́ва: Прегрѣше́ній разруше́нію вина́, ны́нѣ возста́ви на́съ отъ печа́лей, напа́стей, и страсте́й человѣ́къ, и искуше́нія неподо́бна; Твои́ми же, Богоро́дице, боже́ственными мольба́ми, изба́ви на́съ отъ ни́хъ пресла́вно.

И ны́нѣ: Щедро́ты Твоя́ на всѣ́хъ всегда́ низпосыла́ются, Христе́, благода́тію вои́стинну и мольба́ми ро́ждшія Тя́, отъ Тебе́ бо пріе́млемъ христіа́не ми́лость Твою́, Спа́се Ми́лостиве.

Пѣ́снь 9.
Ирмо́съ: Па́че естества́ Ма́терь и по естеству́ Дѣ́ву, еди́ну въ жена́хъ Благослове́нную, пѣ́сньми, вѣ́рніи, Богоро́дицу велича́емъ.

Ра́дованіе по достоя́нію со гла́сомъ восклица́нія Тебѣ́, Дѣ́во, ны́нѣ прино́симъ со а́нгеломъ Гавріи́ломъ, изба́вльшеся отъ разли́чныхъ искуше́ній, Богоро́дице, моли́твами Твои́ми.

Ра́дость, и весе́ліе, и ра́дованіе Боже́ственное, Дѣ́во неискусому́жная, на́мъ умно́жися Бо́жіе; се́ бо пла́чущіися лю́тѣ, ра́дуемся моли́твами Твои́ми.

Сла́ва: Же́ртву хвале́нія пожру́ и язы́комъ, и гла́сомъ, пѣ́снь благода́рственную воздаю́ Ти прилѣ́жно, Дѣ́во, я́ко да Тебѣ́ моля́ся, въ де́нь печа́ли Тобо́ю изба́влюся.

И ны́нѣ: Сра́дуемся, Пречи́стая, Боже́ственному Твоему́ Рождеству́ благоче́стно, ра́дость бо на́мъ источи́ла еси́ отъ напа́стей и печа́лей. Тѣ́мже Ти́ благода́рно и мы́ пѣ́снь соверша́емъ, вѣ́рно воспѣва́юще Тя́.

Та́же, Досто́йно е́сть… Трисвято́е.., по Отче на́шъ… Тропари́, и про́чее по обы́чаю, и отпу́стъ.

ВЪ НЕДѢЛЮ УТРА, НА ПОЛУНОЩНИЦѢ,
Кано́нъ Пресвятѣ́й и Живонача́льнѣй Тро́ицѣ, его́же краестро́чіе: Хвалю́, Тро́ице, Тя́, Единонача́льное Естество́. Творе́ніе Митрофа́ново, гла́съ 7:

Пѣ́снь 1.
Ирмо́съ: Ма́ніемъ Твои́мъ на земны́й о́бразъ преложи́ся пре́жде удоборазлива́емое водно́е естество́, Го́споди. Тѣ́мже немо́кренно пѣшеше́ствовавъ Изра́иль, пое́тъ Тебѣ́ пѣ́снь побѣ́дную.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Отве́рзи ми́ уста́ у́мная се́рдца и устнѣ́ веще́ственныя ко хвалѣ́ Твое́й, Трисвѣ́тлое Еди́но Божество́ всѣ́хъ, пѣ́ти Тебѣ́ пѣ́снь, Свѣтодѣ́телю, благода́рственную.

Да преизли́шнее Твоея́ бла́гости пока́жеши, создала́ еси́ человѣ́ка, Тро́ице безмѣрноси́льная, то́кмо о́бразъ бре́нный Твоего́ нача́льнаго, Содѣ́телю, Госпо́дьства.

Умъ безнача́льный, Сло́во соприсносу́щное роди́вый и Ду́ха собезнача́льнаго просія́вый, сподо́би Еди́ному Бо́гу по существу́ сообра́зну на́съ покланя́тися Тріѵпоста́сному.

[И ны́нѣ,] богоро́диченъ: Яви́лся еси́ при купинѣ́ Моисе́ю, Бо́жій Сло́ве, я́ко о́гнь чисти́тельный, не опаля́я же отню́дъ, е́же отъ Дѣ́вы прообразу́я Твое́ воплоще́ніе, и́мже человѣ́ки вообрази́лъ еси́.

Иже еди́нственнаго, и трисія́ннаго, и вседѣ́тельнаго Тя́ Влады́ку воспѣва́юще, грѣхо́въ и искуше́ній про́симъ избавле́нія, безмѣрноси́льный Бо́же, да не у́бо пре́зриши вѣ́рою Твою́ бла́гость сла́вящихъ.

Отрасль яви́ся отъ Отца́, я́ко отъ Ко́рене безнача́льна, Бо́гъ Сло́во, и равномо́щенъ со сра́сленымъ и Боже́ственнымъ Ду́хомъ; и сего́ ра́ди вѣ́рніи, Тро́ичное Ли́цы Еди́но Госпо́дьство сла́вимъ.

Равносла́вно и сра́слено, Тріѵпоста́сное естество́ нераздѣ́льнѣ и раздѣ́льнѣ, и Единонача́льную Тро́ицу вси́ Тя́ славосло́вимъ вѣ́рніи, и покланя́ющеся про́симъ согрѣше́ній проще́нія.

[И ны́нѣ,] богоро́диченъ: Неизмѣ́нно человѣ́комъ уподо́блься по всему́, Бо́жій Сло́ве, отъ Чи́стыя Отрокови́цы проше́лъ еси́ я́вѣ и всѣ́мъ показа́лъ еси́ Богонача́ліе трисія́нное и еди́нственное существо́мъ неизмѣ́нныхъ ѵпоста́сей.

Го́споди, поми́луй, три́жды.

Сѣда́ленъ, гла́съ 7. Подо́бенъ: Иже мене́ ра́ди.
Согрѣши́вшія поми́луй, Тро́ице Свята́я, рабы́ Твоя́, и пріими́ ка́ющіяся Тебѣ́, Благоутро́бне, и проще́нія сподо́би.

Сла́ва, и ны́нѣ, богоро́диченъ:
Озло́бленныя ду́ши на́ша грѣхми́, ублажи́, Всечи́стая Богоро́дице, и изба́ви отъ прегрѣше́ній Тебе́ пою́щія, Богоневѣ́сто.

Пѣ́снь 4.
Ирмо́съ: Отча нѣ́дра не оста́вль и соше́дъ на зе́млю, Христе́ Бо́же, та́йну услы́шахъ смотре́нія Твоего́ и просла́вихъ Тя́, еди́не Человѣколю́бче.

Содержи́тельная трисвѣ́тлая Еди́нице, Богонача́льная и спаси́тельная всѣ́хъ, Твоя́ пѣвцы́ ны́нѣ огради́ и спаси́ отъ ско́рби, и страсте́й, и вся́каго озлобле́нія.

Назна́менательныхъ рече́ній Твоего́ непостижи́маго трисвѣ́тлаго Божества́ недоумѣва́юще, воспѣва́емъ Тя́, Человѣколю́бче Го́споди, и прославля́емъ Твою́ си́лу.

На земли́, я́ко на небесѣ́хъ, со безпло́тными ли́ки, Еди́нице и Тро́ице, нераздѣ́льно Тя́ раздѣля́емъ, и любо́вію сла́вимъ, я́ко су́щими всѣ́ми Влады́чествующую.

[И ны́нѣ,] богоро́диченъ: Оте́ческія сла́вы не отсту́пль, къ на́шей ху́дости снизше́лъ еси́ во́лею вопло́щься, Пресу́щественный, и возне́слъ еси́ къ Боже́ственнѣй сла́вѣ, я́ко Благоутро́бенъ.

Свѣтонача́льное естество́, Тро́ице начерта́ньми и Еди́нице въ совѣ́тѣ, и сла́вѣ, и че́сти, утверди́ на́съ въ Твое́й любви́. [Два́жды.]

Умъ и Сло́во и Ду́хъ, — еди́но Богонача́льное и трисо́лнечное естество́ сла́вяще, про́симъ изба́витися искуше́ній и вся́кихъ скорбе́й.

[И ны́нѣ,] богоро́диченъ: Вообра́жся, Бо́жій Сло́ве, въ естество́ человѣ́ческое отъ Святы́я Дѣ́вы, Тро́ицу во Еди́ницѣ научи́лъ еси́ пѣ́ти, сообра́зну и сопресто́льну.

Пѣ́снь 6.
Ирмо́съ: Пла́вающаго въ молвѣ́ жите́йскихъ попече́ній, съ корабле́мъ потопля́ема грѣхи́ и душетлѣ́нному звѣ́рю примета́ема, я́ко Іо́на, Христе́, вопію́ Ти́: изъ смертоно́сныя глубины́ возведи́ мя.

Единосла́вную Держа́ву и единонача́льное Богонача́ліе, Треми́ Ѵпоста́сьми су́щее, непремѣ́ннѣ съ Дру́гъ Дру́гомъ сла́вимъ, разли́чіе иму́ще то́кмо бытіе́мъ Ко́йждо сво́йства. [Два́жды.]

Умніи Тя́ чи́нове а́нгельскихъ красо́тъ хва́лятъ, трисо́лнечное Богонача́ліе; съ ни́миже и мы́ бре́нными усты́, я́ко твори́тельну всѣ́хъ, Еди́ну пѣсносло́вимъ и вѣ́рно сла́вимъ.

[И ны́нѣ,] богоро́диченъ: Недоумѣ́ннымъ сло́вомъ, Сло́во ро́ждшееся отъ Со́лнца, Отца́, и́но Со́лнце, пре́жде вѣ́къ, отъ Дѣ́вы напослѣ́докъ возсія́ и Еди́нственнаго Треми́ Ли́цы, недомы́слимаго Бо́га проповѣ́да.

[Го́споди, поми́луй, три́жды.]

Сѣда́ленъ, гла́съ 7. Подо́бенъ: Огня́ свѣтлѣ́йши.
Тро́ице Единосу́щная, Еди́нице всѣ́хъ Тріѵпоста́сная, поми́луй, я́же создала́ еси́, Безсме́ртная, попаля́ющи зло́бы прегрѣша́ющихъ и просвѣща́ющи сердца́ пою́щихъ благоутро́біе Твое́, Бо́же на́шъ, сла́ва Тебѣ́.

Сла́ва, и ны́нѣ, богоро́диченъ:
Огня́ свѣтлѣ́йши, свѣ́та дѣ́йственнѣйши ми́лость благода́ти Твоея́, Влады́чице, попаля́ющи грѣхи́ человѣ́ковъ и ороша́ющи мы́сли хва́лящихъ вели́чія Твоя́, Богоро́дице Пренепоро́чная.

Свѣтолу́чными блиста́ніи при́сно сія́я, Трисвѣ́те Бо́же, Еди́нице Непристу́пная и Пресу́щная, спаси́, и́же въ Тя́, Влады́ко, вѣ́рующія благоче́стно и покланя́ющіяся Тебѣ́.

Рече́ніемъ Боже́ственныхъ проро́къ повину́ющеся, Еди́наго Тя́ то́чію Бо́га всѣ́хъ сла́вимъ въ Тріе́хъ Начерта́ніихъ, си́це вопію́ще: благослове́нъ еси́, Го́споди, Бо́же оте́цъ на́шихъ.

Пе́рстными устна́ми мы́ съ невеще́ственными чи́нми пѣ́сньми, Тро́ице Свята́я, Тя́ пое́мъ во еди́нствѣ существа́, вопію́ще: благослове́нъ еси́, Го́споди, Бо́же оте́цъ на́шихъ.

[И ны́нѣ,] богоро́диченъ: Да Иже созда́вый Ада́ма, возсози́ждетъ па́ки, Всечи́стая, изъ Тебе́ я́вѣ вочеловѣ́чися, человѣ́ки обожи́въ, си́це вопію́щія: благослове́нъ, Пречи́стая, Пло́дъ Твоего́ чре́ва.

Пѣ́снь 8.
Ирмо́съ: Неопа́льная огню́ въ Сина́и прича́щшаяся купина́ Бо́га яви́ медленноязы́чному и гугни́вому Моисе́ови, и о́троки ре́вность Бо́жія три́ непреобори́мыя во огни́ пѣвцы́ показа́: вся́ дѣла́ Госпо́дня, Го́спода по́йте и превозноси́те Его́ во вся́ вѣ́ки.

Со́лнца луча́ми трисія́ннаго озари́тися свѣтодѣ́тельными сподо́би сердца́мъ пѣвце́въ Твои́хъ; и ны́нѣ зрѣ́ти добро́ту Твою́, Тро́ице-Еди́нице, я́ко мо́щно, да́руй всегда́ всѣ́мъ, вѣ́рою подо́бною Твое́ вели́чіе пѣсносло́вящимъ во вся́ вѣ́ки.

Держи́ши вся́ческая, Тро́ичное и Еди́нственное Господонача́ліе безнача́льное, и управля́еши не́бо и зе́млю. Тѣ́мже мя́, любо́вію Твое́ю привлачи́ма при́сно, сохрани́ пѣ́ти Тебѣ́: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Хра́мъ мя́ Твоея́ трисвѣ́тныя сотвори́ зари́, Благодѣ́телю Человѣколю́бче, и прича́стія и пріобще́нія непристу́пна враго́мъ неви́димымъ и плотски́мъ страсте́мъ, Влады́ко, покажи́, единонача́льный Бо́же мо́й и Го́споди сла́вы, пѣсносло́вити Тя́ во вся́ вѣ́ки.

[И ны́нѣ,] богоро́диченъ: Свѣ́тъ Богонача́льный отъ чре́ва Твоего́ возсія́вый, Богома́ти Пречи́стая, ве́сь мíръ Трисо́лнечнымъ Свѣ́томъ озари́ и зе́млю я́коже друго́е не́бо показа́, пою́щу: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пѣ́снь 9.
Ирмо́съ: Ма́ти Бо́жія и Дѣ́ва, ро́ждшая и дѣ́вствующая па́ки, не естества́ дѣ́ло, но Бо́жія снизхожде́нія, тѣ́мъ, я́ко Еди́ну, Бо́жіихъ чуде́съ сподо́бльшуюся, Тя́ при́сно велича́емъ.

Высокосло́вити и пѣ́ти Тя́ досто́йно, Его́же въ вы́шнихъ непреста́нно серафи́ми воспѣва́ютъ, не возмога́емъ бре́нніи, оба́че я́ко Влады́ку всѣ́хъ дерза́юще и человѣколю́бнѣйшаго Бо́га велича́емъ.

Тѣле́сныя болѣ́зни изба́ви и душе́внаго пристра́стія пѣвцы́ Твоя́, Еди́нственная Тро́ице Нераздѣ́льная, и сохрани́тися неврежде́ннымъ отъ всѣ́хъ жите́йскихъ искуше́ній сподо́би.

Равноси́льная, Богонача́льная, трисвѣ́тная, всеси́льная держа́во, неизмѣ́нная добро́то су́щественныя бла́гости, да́ждь прегрѣше́ній разрѣше́ніе Твои́мъ рабо́мъ, и искуше́ній, и страсте́й изба́ви.

[И ны́нѣ,] богоро́диченъ: Умъ, и ду́шу, и плотско́е смѣше́ніе пріе́мь, Богоро́дице, отъ Твои́хъ ложе́снъ пречи́стыхъ, Бо́гъ Сло́во пои́стиннѣ человѣ́къ яви́ся и Боже́ственнаго существа́ о́бщника человѣ́ка я́вѣ показа́лъ е́сть.

Посе́мъ припѣ́вы Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

НА УТРЕНИ,
По шестопса́лміи, Бо́гъ Госпо́дь, и яви́ся на́мъ.., на гла́съ 7. И глаго́лемъ тропа́рь воскре́сенъ: Разруши́лъ еси́ Кресто́мъ Твои́мъ сме́рть.., два́жды. Сла́ва, и ны́нѣ, богоро́диченъ: Яко на́шего воскре́сенія сокро́вище… Та́же, обы́чное стихосло́віе Псалти́ра.

По 1-мъ стихосло́віи сѣда́льны воскре́сны, гла́съ 7:
Жи́знь во гро́бѣ возлежа́ше и печа́ть на ка́мени надлежа́ше, я́ко Царя́, спя́ща во́ини стрежа́ху Христа́; и а́нгели сла́вляху, я́ко Бо́га безсме́ртна, жены́ же взыва́ху: воскре́се Госпо́дь, подая́ мíрови ве́лію ми́лость.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Тридне́внымъ погребе́ніемъ Твои́мъ плѣни́вый сме́рть и истлѣ́вша человѣ́ка живоно́снымъ Воста́ніемъ Твои́мъ воскреси́вый, Христе́ Бо́же, я́ко Человѣколю́бецъ. Сла́ва Тебѣ́.

Сла́ва, и ны́нѣ, богоро́диченъ:
Распе́ншагося на́съ ра́ди и воскре́сшаго Христа́ Бо́га на́шего и низложи́вшаго сме́рти держа́ву непреста́нно моли́, Богоро́дице Дѣ́во, да спасе́тъ ду́ши на́ша.

По 2-мъ стихосло́віи сѣда́льны воскре́сны, гла́съ 7:
Запеча́тану гро́бу, Живо́тъ отъ гро́ба возсія́лъ еси́, Христе́ Бо́же, и две́ремъ заключе́ннымъ, ученико́мъ предста́лъ еси́, всѣ́хъ Воскре́сеніе, Ду́хъ Пра́вый тѣ́ми обновля́я на́мъ, по вели́цѣй Твое́й ми́лости.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

На гро́бъ теча́ху жены́, со слеза́ми мѵ́ра нося́ща, и во́иномъ стрегу́щимъ Тя́, всѣ́хъ Царя́, глаго́лаху къ себѣ́: кто́ отвали́тъ на́мъ ка́мень? Воскре́се вели́ка Совѣ́та Ангелъ, попра́вый сме́рть. Всеси́льне Го́споди, сла́ва Тебѣ́.

Сла́ва, и ны́нѣ, богоро́диченъ:
Ра́дуйся, благода́тная Богоро́дице Дѣ́во, приста́нище и предста́тельство ро́да человѣ́ческаго, изъ Тебе́ бо воплоти́ся Изба́витель мíра, еди́на бо еси́ Ма́ти и Дѣ́ва, при́сно благослове́на и препросла́влена. Моли́ Христа́ Бо́га ми́ръ дарова́ти все́й вселе́ннѣй.

Ипакои́, гла́съ 7:
Иже на́шъ зра́къ воспріе́мый и претерпѣ́вый Кре́стъ пло́тски, спаси́ мя́ Воскре́сеніемъ Твои́мъ, Христе́ Бо́же, я́ко Человѣколю́бецъ.

Степе́нна, гла́съ 7.

Антифо́нъ 1. Ихже стихи́ повторя́юще пое́мъ:
Плѣ́нъ Сіо́нь отъ ле́сти обрати́въ, и мене́, Спа́се, оживи́, изыма́я рабо́тныя стра́сти.

Въ ю́гъ сѣ́яй ско́рби по́стныя со сле́зами, се́й ра́достныя по́жнетъ рукоя́ти присноживопита́нія.

Сла́ва: Святы́мъ Ду́хомъ — исто́чникъ Боже́ственныхъ сокро́вищъ, отъ Него́же прему́дрость, ра́зумъ, стра́хъ; Тому́ хвала́ и сла́ва, че́сть и держа́ва.
И ны́нѣ, то́йже.

Антифо́нъ 2:
Аще не Госпо́дь сози́ждетъ до́мъ душе́вный, всу́е тружда́емся, ра́звѣ бо Того́ ни дѣя́ніе, ни сло́во соверша́ется.

Плода́ чре́вна, святíи духодви́жно прозяба́ютъ оте́ческая преда́нія, Сыноположе́нія.

Сла́ва: Святы́мъ Ду́хомъ, вся́ческая е́же бы́ти и́мутъ, пре́жде бо всѣ́хъ Бо́гъ, всѣ́хъ Госпо́дьство, Свѣ́тъ непристу́пенъ, Живо́тъ всѣ́хъ.
И ны́нѣ, то́йже.

Антифо́нъ 3:
Боя́щіися Го́спода, пути́ живота́ обрѣ́тше, ны́нѣ и при́сно ублажа́ются сла́вою нетлѣ́нною.

Окрестъ трапе́зы Твоея́, я́ко сте́бліе, ви́дя исча́дія Твоя́, ра́дуйся и весели́ся, приводя́ сія́ Христо́ви Пастыренача́льнику [1].

Сла́ва: Святы́мъ Ду́хомъ глубина́ дарова́ній, бога́тство сла́вы, суде́бъ глубина́ ве́лія; единосла́венъ Отцу́ и Сы́ну, служи́мь бо.
И ны́нѣ, то́йже.

Проки́менъ, гла́съ 7: Воскресни́, Го́споди Бо́же мо́й, да вознесе́тся рука́ Твоя́,* не забу́ди убо́гихъ Твои́хъ до конца́. Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, [повѣ́мъ вся́ чудеса́ Твоя́]. Та́же: Вся́кое дыха́ніе… Сти́хъ: Хвали́те Бо́га во святы́хъ Его́… Ева́нгеліе воскре́сно. Воскре́сеніе Христо́во… Псало́мъ 50-й. И про́чая поря́ду.

Кано́нъ воскре́сенъ, гла́съ 7:

Припѣ́въ: Сла́ва, Го́споди, свято́му Воскре́сенію Твоему́.

Осуди́ся сме́ртное мучи́тельство Дре́вомъ, непра́ведною сме́ртію осужде́ну Ти́, Го́споди; отню́дуже кня́зь тмы́, Тебѣ́ не одолѣ́въ, пра́ведно изгна́нъ бы́сть.

Адъ Тебѣ́ прибли́жися, и зубы́ не возмо́гъ сте́рти Тѣ́ло Твое́, челюстьми́ сокруши́ся. Отню́дуже, Спа́се, болѣ́зни разру́шь сме́ртныя, воскре́слъ еси́ тридне́венъ.

Богоро́диченъ: Разрѣши́шася болѣ́зни прама́тере Евы, болѣ́зни бо избѣжа́вше, неискусому́жно родила́ еси́. Отню́дуже я́вѣ Богоро́дицу, Пречи́стая, вѣ́дуще Тя́, вси́ сла́вимъ.

Инъ кано́нъ, кре́стовоскре́сенъ, гла́съ 7.

Пѣ́снь 1.
Ирмо́съ: По́нтомъ покры́ фарао́на съ колесни́цами Сокруша́яй бра́ни мы́шцею высо́кою, пои́мъ Ему́, я́ко просла́вися.

Два́ исто́чника на́мъ на Крестѣ́ источи́ Спа́съ живоно́сная отъ Своего́ прободе́ннаго ребра́. Пои́мъ Ему́, я́ко просла́вися.

Во гро́бъ всели́вся и воскре́съ тридне́венъ, нетлѣ́ніе подаде́, ча́яніе Христо́съ сме́ртнымъ. Пои́мъ Ему́, я́ко просла́вися.

Богоро́диченъ: Еди́на Дѣ́ва и по рождествѣ́ показа́лася еси́, Зижди́теля бо мíрови воплоще́нна родила́ еси́. Тѣ́мже, — ра́дуйся! — Тебѣ́ вси́ зове́мъ.

Инъ кано́нъ, Пресвятѣ́й Богоро́дицѣ, его́же краегране́сіе по алфави́ту, гла́съ 7.

Ирмо́съ: Ма́ніемъ Твои́мъ на земны́й о́бразъ преложи́ся пре́жде удоборазлива́емое водно́е естество́, Го́споди. Тѣ́мже немо́кренно пѣшеше́ствовавъ Изра́иль, пое́тъ Тебѣ́ пѣ́снь побѣ́дную.

Бе́здну ро́ждшая благоутро́бія, Дѣ́во, ду́шу мою́ озари́ свѣтоно́снымъ Твои́мъ сія́ніемъ, я́ко да досто́йно воспою́ Твои́хъ чуде́съ бе́здну.

Стрѣло́ю грѣхо́вною уя́звлены на́съ Сло́во ви́дѣвъ, я́ко Благодѣ́тель уще́дри; отню́дуже несказа́нно соедини́ся, Всечи́стая, пло́тію, Иже изъ Тебе́[2] Пребоже́ственный.

Бы́сть сме́ртію я́то естество́ тлѣ́нное же и ме́ртвенное человѣ́ческое, Влады́чице; Ты́ же, Жи́знь заче́нши, сіе́ отъ истлѣ́нія къ животу́ возвела́ еси́.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ты́, возше́дъ на Дре́во, о на́съ болѣ́знуеши во́лею, Благоутро́бне Спа́се, и терпи́ши я́зву, примире́нія хода́тайственну и спасе́нія вѣ́рнымъ, е́юже Твоему́, Ми́лостиве, вси́ примири́хомся Роди́телю.

Ты́ мя́ очи́стивъ отъ я́звы, душе́ю уя́звленнаго змíевымъ угрызе́ніемъ, Христе́, и показа́лъ еси́ свѣ́тъ, во тмѣ́ дре́вле мнѣ́ слежа́щу и во тлѣ́ніи, Кресто́мъ бо во а́дъ соше́дъ, мене́ совоскреси́лъ еси́.

Богоро́диченъ: Неискусому́жныя Твоея́ Ма́тере мольба́ми ми́ръ мíрови пода́ждь, Спа́се, и ИМПЕРАТОРУ побѣ́ду да́руй на ва́рвары враги́, и несказа́нныя Твоея́ сла́вы славосло́вящія Тя́ сподо́би.

Инъ.
Ирмо́съ: Небеса́ утверди́вый сло́вомъ и земное основание укрепивый на водах многих, утверди мой ум в вблю Твою, Человеколюбие.

Иже на Крестѣ́ стра́сти претерпѣ́вый и разбо́йнику ра́й отве́рзый, я́ко Благодѣ́тель и Бо́гъ, утверди́ мо́й у́мъ въ во́лю Твою́, еди́не Человѣколю́бче.

Воскресы́й тридне́венъ изъ гро́ба и живо́тъ мíрови возсія́вый, я́ко Жизнода́вецъ и Бо́гъ, утверди́ мо́й у́мъ въ во́лю Твою́, еди́не Человѣколю́бче.

Богоро́диченъ: Яко Бо́га безсѣ́менно заче́нши и отъ кля́твы Еву изба́вльши, Дѣ́во Ма́ти Маріа́мъ, моли́ отъ Тебе́ вопло́щшагося Бо́га спасти́ ста́до Твое́.

Инъ.
Ирмо́съ: Въ нача́лѣ небеса́ всесильнымъ Словомъ утверждей, Господи, Спасе, и вседѣтельнымъ и Божіимъ Духомъ всю силу ихъ.

Змíй, поползы́й изъ Еде́ма, мене́ обоже́нія жела́ніемъ прельсти́въ, ве́рже въ зе́млю; но Иже ми́лостивъ и естество́мъ благоутро́бенъ, уще́дривъ богосодѣ́ла, во чре́во Твое́ все́лься и подо́бенъ мнѣ́ бы́въ, Ма́ти Дѣ́во.

Благослове́нъ Пло́дъ Твоего́ чре́ва, Дѣ́во Богоро́дице, всѣ́хъ ра́досте, Ра́дость бо всему́ мíру родила́ еси́ и Весе́ліе вои́стинну, разгоня́ющее печа́ль грѣхо́вную, Богоневѣ́сто.

Жи́знь вѣ́чную и Свѣ́тъ, Богороди́тельнице Дѣ́во, и Ми́ръ родила́ еси́ на́мъ, дре́внихъ человѣ́къ бра́нь, я́же ко Отцу́ и Бо́гу, укротѣва́ющій, вѣ́рою и исповѣ́даніемъ благода́ти.

Своя́ плещи́ да́въ, Иже отъ Дѣ́вы вопло́щься, на ра́ны, рабу́ прегрѣши́вшу, біе́нъ быва́етъ Влады́ка непови́ненъ, разрѣша́я моя́ согрѣше́нія.

Предстоя́въ суди́щу судíй законопресту́пныхъ, я́ко осуди́мый пови́ненъ быва́етъ [3] и зауша́ется бре́нною руко́ю, Созда́вый человѣ́ка я́ко Бо́гъ и Судя́й пра́ведно земли́.

Богоро́диченъ: Яко вои́стинну Ма́ти Бо́жія, Творца́ Твоего́ и Сы́на моли́ къ спаси́тельному напра́вити мя́ приста́нищу, Всенепоро́чная, сла́внаго Его́ хотѣ́нія.

Инъ.
Ирмо́съ: Смотря́яй проро́къ в последняя Твое Христе пришествие, вопияше: Твою услышах Господи силу, яко вся спасти помазанныя Твоя пришел еси.

Не вѣ́дый грѣха́ и его́ ра́ди бы́въ, Го́споди, е́же не бы́лъ еси́ вообража́ешися, пріе́мь чу́ждее, да спасе́ши мíръ и убіе́ши, прельсти́въ, мучи́теля.

На Крестѣ́ воздви́женъ бы́лъ еси́ и пра́отца Ада́ма разрѣши́лъ еси́ грѣ́хъ, (его́же ра́ди Твою́ услы́шахъ си́лу,) я́ко вся́ спасти́ пома́занныя Твоя́ прише́лъ еси́.

Богоро́диченъ: Ты́, Рожде́йся отъ Дѣ́вы, умира́еши, оживля́еши же Ада́ма мы́слію заблу́ждшаго, и́бо убоя́ся сме́рть крѣ́пости Твоея́, я́ко вся́ спасти́ растлѣ́вшіяся прише́лъ еси́.

Инъ.
Ирмо́съ: Отча нѣдра не оставль, и сошедъ на землю, Христе Боже.

Избра́нная вся́ и до́брая, я́вльшися Бо́гу пре́жде созда́нія свѣ́тлостію, Всепѣ́тая, свѣтоли́тіемъ Твои́мъ [4] пою́щія Тя́ просвѣти́.

Бо́га человѣ́комъ родила́ еси́, Чи́стая, воплоще́нна отъ чи́стыхъ крове́й Твои́хъ, избавля́юща согрѣше́ній мно́гихъ, любо́вію сла́вящія и почита́ющія Тя́, Ма́ти Дѣ́во.

Священнодѣ́йствуетъ естество́ слове́сное Возсія́вшему изъ Тебе́, Всепѣ́тая, та́инству неизрече́нному Рождества́ Твоего́ научи́вшееся ны́нѣ, Преблаже́нная.

За Твоя́ рабы́ продае́шися, Христе́, и по лани́тѣ ударе́ніе терпи́ши, свобо́дѣ хода́тайственно пою́щимъ: къ Тебѣ́ у́тренюю и воспѣва́ю Твое́ Божество́.

Боже́ственною Твое́ю си́лою, Христе́, не́мощію плотско́ю крѣ́пкаго низложи́лъ еси́ и побѣди́теля мя́ сме́рти, Спа́се, Воскре́сеніемъ показа́лъ еси́.

Богоро́диченъ: Бо́га родила́ еси́, Ма́ти Чи́стая, воплоще́ннаго изъ Тебе́ боголѣ́пно, Всепѣ́тая, поне́же не позна́ла еси́ му́жеска по́ла, но отъ Свята́го ражда́еши Ду́ха.

Инъ.
Ирмо́съ: Го́споди Бо́же мо́й, отъ но́щи у́треневавъ, Тебѣ́ молю́ся: пода́ждь ми́ оставле́ніе прегрѣше́ній мои́хъ и къ свѣ́ту Твои́хъ повелѣ́ній пути́ моя́ напра́ви, молю́ся.

Егда́ со беззако́нными вмѣни́вся, возне́слся еси́ на Ло́бнѣмъ, свѣти́ла сокрыва́хуся, и земля́ колеба́шеся, и церко́вная свѣ́тлость раздра́ся, евре́йское явля́ющи отпаде́ніе.

Тебе́, разруши́вшаго мучи́телеву всю́ си́лу крѣ́постію непостижи́маго Твоего́ Божества́ и ме́ртвыя Твои́мъ Воскре́сеніемъ воздви́гшаго, пѣ́сньми сла́вимъ.

Богоро́диченъ: Ма́ти Царя́ и Бо́га, Всепѣ́тая Богоро́дице, вѣ́рою и любо́вію Тя́ пѣ́сньми восхваля́ющимъ при́сно очище́ніе прегрѣше́ній Твои́ми мольба́ми низпосли́.

Инъ.
Ирмо́съ: Но́щь не свѣтла́ невѣ́рнымъ Христе, вѣрнымъ же просвѣщеніе въ сладости словесъ твоихъ.

Лѣ́ствицу узрѣ́въ Іа́ковъ, къ высотѣ́ утвержде́ну, о́бразу научи́ся, Неискусобра́чная, Тебе́, Тобо́ю бо Бо́гъ человѣ́комъ пріобщи́ся, Всечи́стая Влады́чице.

Избавле́ніе вѣ́чное Тобо́ю, Дѣ́во, ны́нѣ обрѣ́тше, усе́рдно зове́мъ Ти́, — е́же ра́дуйся! — Богоневѣ́стная, и Твои́мъ свѣ́томъ возра́довавшеся, Всепѣ́тая, пѣ́сньми Тя́ пое́мъ.

Еди́ну Тя́ Жени́хъ посредѣ́ те́рнія кри́нъ, Дѣ́во, обрѣ́тъ, чистоты́ блиста́ніемъ свѣтя́щуся и свѣ́томъ дѣ́вства, Всенепоро́чная, Невѣ́сту воспрія́тъ.

Воспомина́ху Тя́ заключе́нныя во а́дѣ ду́ши и оста́вльшіяся пра́ведныхъ и отъ Тебе́ спасе́нія моля́хуся, е́же Кресто́мъ, Христе́, по́далъ еси́, преиспо́днимъ прише́дъ, я́ко Благоутро́бенъ.

Ко одушевле́нному Твоему́ и нерукотворе́нному хра́му, разруше́ну бы́вшу страда́ньми, воззрѣ́ти па́ки ли́къ апо́стольскій отча́яся, но па́че наде́жды покло́нься, Воскре́сша повсю́ду проповѣ́да.

Богоро́диченъ: Неизрече́ннаго рождества́ Твоего́ всенепоро́чнаго о́бразъ, Дѣ́во Богоневѣ́стная, и́же на́съ ра́ди, кто́ отъ человѣ́къ сказа́ти возмо́жетъ? Яко Бо́гъ неопи́саннѣ, Сло́во соедини́вся Тебѣ́, пло́ть изъ Тебе́ бы́сть.

Инъ.
Ирмо́съ: Іо́на изъ чре́ва а́ дова вопія́ше: возведи́ отъ тли́ живо́тъ мо́й.

На Крестѣ́ возне́сся, Спа́се, во́лею, вра́жію плѣни́лъ еси́ держа́ву, на се́мъ пригвозди́въ грѣхо́вное, Бла́же, рукописа́ніе.

Изъ ме́ртвыхъ воскре́съ, Спа́се, вла́стію, совоздви́глъ еси́ человѣ́ческій ро́дъ, живо́тъ и нетлѣ́ніе дарова́вый на́мъ, я́ко Человѣколю́бецъ.

Богоро́диченъ: Его́же родила́ еси́, Богоро́дице, несказа́нно Бо́га на́шего, моля́щи не преста́й изба́витися отъ бѣ́дъ пою́щимъ Тя́, чи́стая Приснодѣ́во.

Инъ.
Ирмо́съ: Пла́вающаго въ молвѣ́ жите́йскихъ попече́ній, съ корабле́мъ потопля́ема грѣхи́ и душетлѣ́нному звѣ́рю примета́ема, я́ко Іо́на, Христе́, вопію́ Ти́: изъ смертоно́сныя глубины́ возведи́ мя.

Зако́нніи Тя́ о́бразы и проро́ческая прорече́нія я́вѣ предвозвѣща́ху, хотя́щую роди́ти Благодѣ́теля, Чи́стая, всея́ тва́ри, многоча́стнѣ и многообра́знѣ благодѣ́йствовавшаго вѣ́рно воспѣва́ющихъ Тя́.

Устра́ншагося дре́вле, навѣ́томъ человѣкоубíйцы, Ада́ма первозда́ннаго ра́йскія Боже́ственныя сла́дости, Неискусобра́чная, па́ки возвела́ еси́, ро́ждши Иже отъ преступле́нія на́съ Изба́вившаго.

Иже хотѣ́ніемъ Боже́ственнымъ, содѣ́тельною же си́лою все́ составле́й отъ не су́щихъ, изъ чре́ва Твоего́, Чи́стая, произы́де и су́щія во тмѣ́ сме́ртнѣй Богонача́льнѣйшими мо́лніями осія́.

Конда́къ, гла́съ 7:
Не ктому́ держа́ва сме́ртная возмо́жетъ держа́ти человѣ́ки, Христо́съ бо сни́де, сокруша́я и разоря́я си́лы ея́. Связу́емь быва́етъ а́дъ, проро́цы согла́сно ра́дуются, — предста́, — глаго́люще, — Спа́съ су́щимъ въ вѣ́рѣ, изыди́те, вѣ́рніи, въ воскре́сеніе.

Икосъ:
Вострепета́ша до́лѣ преиспо́дняя дне́сь, а́дъ и сме́рть Еди́наго отъ Тро́ицы; земля́ поколеба́ся, вра́тницы же а́довы, ви́дѣвше Тя́, ужасо́шася; вся́ же тва́рь со проро́ки ра́дующися, пое́тъ Тебѣ́ побѣ́дную пѣ́снь, Изба́вителю Бо́гу на́шему, разруши́вшему ны́нѣ сме́ртную си́лу. Да воскли́кнемъ и возопіи́мъ ко Ада́му и къ су́щимъ изъ Ада́ма: дре́во сего́ па́ки введе́, изыди́те, вѣ́рніи, въ воскре́сеніе.

Пѣ́снь 7.
Ирмо́съ: Пе́щь о́троцы огнепа́льну дре́вле росоточа́щу показа́ша, еди́наго Бо́га воспѣва́юще и глаго́люще: превозноси́мый отце́въ Бо́гъ и препросла́вленъ.

Дре́вомъ умерщвля́ется Ада́мъ, во́лею преслуша́ніе содѣ́лавъ, послуша́ніемъ же Христо́вымъ па́ки обновля́емь е́сть, мене́ бо ра́ди распина́ется Сы́нъ Бо́жій препросла́вленный.

Тебе́ воскре́сшаго, Христе́, изъ гро́ба, тва́рь вся́ воспѣ́, Ты́ бо жи́знь су́щимъ во а́дѣ процвѣ́лъ еси́, ме́ртвымъ — Воскре́сеніе, и́же во тмѣ́ — Свѣ́тъ препросла́вленный.

Богоро́диченъ: Ра́дуйся, Дщи́ Ада́ма тлѣ́ннаго; ра́дуйся, еди́на Богоневѣ́сто; ра́дуйся, Еюже тля́ изгна́на бы́сть, Яже Бо́га ро́ждши, Его́же моли́, Чи́стая, спасти́ся всѣ́мъ на́мъ.

Инъ.
Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди, Бо́же оте́цъ на́шихъ.

Иже на Дре́вѣ Кре́стнѣмъ грѣхо́вное жа́ло притупи́въ и Ада́мова преступле́нія рукописа́ніе разруши́въ копіе́мъ ребра́ Твоего́, благослове́нъ еси́, Го́споди, Бо́же оте́цъ на́шихъ.

Иже въ ребро́ прободе́нъ бы́въ и кропле́ньми Кро́ве Боже́ственныя зе́млю очи́стивъ, кровьми́ идолобѣ́сія оскверне́нную, благослове́нъ еси́, Го́споди, Бо́же оте́цъ на́шихъ.

Богоро́диченъ: Еже пре́жде со́лнца просвѣще́нія возсія́вши мíрови, Богороди́тельнице, Христа́, отъ тмы́ изба́вльшаго и просвѣща́юща вся́ боговѣ́дѣніемъ, — благослове́нъ еси́, — зову́щія, — Бо́же оте́цъ на́шихъ.

Инъ.
Ирмо́съ: Пе́щь о́троцы огнепа́льну дре́вле росоточа́щу показа́ша, еди́наго Бо́га воспѣва́юще и глаго́люще: превозноси́мый отце́въ Бо́гъ и препросла́вленъ.

Преиспещре́ну, позлаще́ну у́тварь Тя́ иму́щу, возлюби́ Созда́тель Тво́й, Дѣ́во, и Госпо́дь, превозноси́мый отце́въ Бо́гъ и препросла́вленъ.

Очища́ется, Отрокови́це, у́гль дре́вле Иса́ія пріе́мь, знамена́тельнѣ Твое́ Рождество́ ви́дѣвъ, превозноси́маго отце́въ Бо́га и препросла́влена.

Образы знамена́тельная дре́вле Боже́ственнаго Твоего́ Рождества́, Боже́ственніи проро́цы зря́ще, ра́достно воспѣва́юще взыва́ху: превозноси́мый отце́въ Бо́гъ и препросла́вленъ.

Пречи́стый Агнецъ слове́сный за мíръ закла́нъ бы́въ, преста́ви я́же по зако́ну приноси́мая, очи́стивъ сего́ кромѣ́ прегрѣше́ній, я́ко Бо́гъ, при́сно зову́ща: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Нетлѣ́нна не су́щи пре́жде Стра́сти, воспрія́тая отъ Созда́теля пло́ть на́ша, по Стра́сти и Воскре́сеніи неприкоснове́нна тлѣ́нію устро́ися и сме́ртныя обновля́етъ, зову́щія: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Богоро́диченъ: Твое́ чисто́тное и всенепоро́чное, Дѣ́во, скве́рное и ме́рзское вселе́нныя очи́сти, и была́ еси́ на́шего примире́нія къ Бо́гу вина́, Пречи́стая. Тѣ́мже Тя́, Дѣ́во, вся́ дѣла́ благослови́мъ и превозно́симъ во вся́ вѣ́ки.

Инъ.
Ирмо́съ: Еди́наго Безнача́льнаго Царя́ Сла́вы, Его́же благосло́вят небе́сныя си́лы и трепе́щут чи́ни а́нгельстии, по́йте, свяще́нницы, лю́дие, превозноси́те Его́ во ве́ки.

Претерпѣ́вшаго Стра́сти во́лею, и на Крестѣ́ Пригвожде́на хотѣ́ніемъ, и Разру́шшаго си́лы а́довы, по́йте, свяще́нницы, лю́діе, превозноси́те во вся́ вѣ́ки.

Упраздни́вшаго сме́рти держа́ву, и отъ гро́ба Воскре́сшаго со сла́вою, и Спа́сшаго человѣ́ческій ро́дъ, по́йте, свяще́нницы, лю́діе, превозноси́те во вся́ вѣ́ки.

Богоро́диченъ: Еди́наго Благоутро́бнаго, Превѣ́чнаго Сло́ва, напослѣ́докъ отъ Дѣ́вы рожде́на и разрѣ́шшаго дре́внюю кля́тву, по́йте, свяще́нницы, лю́діе, превозноси́те во вся́ вѣ́ки.

Инъ.
Ирмо́съ: Неопа́льная огню́ въ Сина́и прича́щшаяся купина́ Бо́га яви́ медленноязы́чному и гугни́вому Моисе́ови, и о́троки ре́вность Бо́жія три́ непреобори́мыя во огни́ пѣвцы́ показа́: вся́ дѣла́ Госпо́дня, Го́спода по́йте и превозноси́те Его́ во вся́ вѣ́ки.

Свѣ́томъ Рождества́ Твоего́ страннолѣ́пно вселе́нную просвѣти́ла еси́, Богороди́тельнице, су́ща бо вои́стинну Бо́га на объя́тіяхъ но́сиши Твои́хъ, просвѣща́юща вѣ́рныя, при́сно зову́щія: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пое́мъ, Чи́стая, благоче́стно Твое́ чре́во, Бо́га вмѣсти́вшее, несказа́нно воплоща́ема, да́вшаго всѣ́мъ вѣ́рнымъ богоразу́мія просвѣще́ніе, при́сно зову́щимъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Свѣ́та Твоего́ блиста́ньми Тебе́ пою́щія свѣтови́дны содѣ́лала еси́, Свѣтороди́тельнице, Богоро́дице Чи́стая, Свѣ́та бо яви́лася еси́ селе́ніе, уясня́ющи свѣ́томъ зову́щія: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Та́же пое́мъ пѣ́снь Богоро́дицы: Вели́читъ душа́ Моя́ Го́спода.., съ припѣ́вомъ: Честнѣ́йшую херуви́мъ…

Пѣ́снь 9.
Ирмо́съ: Нетлѣ́нія искуше́ніемъ ро́ждшая и Всехитрецу́ Сло́ву пло́ть взаимода́вшая, Ма́ти Неискусому́жная, Дѣ́во Богоро́дице, прія́телище Нестерпи́маго, село́ Невмѣсти́маго Зижди́теля Твоего́, Тя́ велича́емъ.

Иже Божеству́ Стра́сть прилага́ющіи, заусти́теся, вси́ чуждему́дренніи, Го́спода бо сла́вы пло́тію распя́та, не распя́та же естество́мъ Боже́ственнымъ, я́ко во двою́ естеству́ Еди́наго велича́емъ.

Иже тѣлесе́мъ воста́нію невѣ́рующіи, ко Христо́ву ше́дше гро́бу, научи́теся, я́ко умерщвле́на бы́сть и воскре́се па́ки пло́ть Жизнода́вца, во увѣре́ніе послѣ́дняго воскре́сенія, на не́же упова́емъ.

Тро́иченъ: Не Боже́ствъ Тро́ицу, но Ѵпоста́сей, ниже́ Еди́ницу Ли́цъ, но Божества́ чту́ще, ссѣца́емъ же Сію́ дѣля́щихъ, слива́емъ же па́ки слія́ніе дерза́ющихъ на Сію́, Юже велича́емъ.

Инъ.
Ирмо́съ: Ма́ти Бо́жія и Дѣ́ва, ро́ждшая и дѣ́вствующая па́ки, не естества́ дѣ́ло, но Бо́жія снизхожде́нія, тѣ́мъ, я́ко Еди́ну, Бо́жіихъ чуде́съ сподо́бльшуюся, Тя́ при́сно велича́емъ.

Свѣ́тъ отъ Свѣ́та, Отчее Сія́ніе сла́вы безлѣ́тно осія́вый, я́коже во тмѣ́ человѣ́ческому житію́ Христо́съ возсія́ и гоня́щую прогна́ тму́, Его́же непреста́нно, вѣ́рніи, велича́емъ.

Стра́сти плотскíя и крѣ́пость Божества́ во Христѣ́ ви́дяще, му́дрствующіи еди́но сло́жное естество́ да посра́мятся, То́й бо, я́ко человѣ́къ у́бо, умира́етъ, я́коже всего́ Содѣ́тель, востае́тъ.

Мѵ́ро ме́ртвымъ, Живо́му же пѣ́ніе, сле́зы умира́ющимъ, Животу́ же всѣ́хъ пѣ́снь, жены́, принеси́те, — и́же воста́нія проповѣ́дникъ вопія́ше, благовѣству́я Христо́во Воскре́сеніе.

Богоро́диченъ: Бо́га ра́звѣ Тебе́ ино́го не зна́ю, — Це́рковь вопіе́тъ Ти́, — отъ неве́рныхъ мя́ язы́къ невѣ́сту Свою́ избра́вый. Да́ждь у́бо, Сло́ве, вѣ́рнымъ спасе́ніе, Ро́ждшія Тя́ моли́твами, я́ко Благоутро́бенъ.

Инъ.
Ирмо́съ то́йже. Ма́ти Бо́жія и Дѣ́ва, ро́ждшая и дѣ́вствующая па́ки, не естества́ дѣ́ло, но Бо́жія снизхожде́нія, тѣ́мъ, я́ко Еди́ну, Бо́жіихъ чуде́съ сподо́бльшуюся, Тя́ при́сно велича́емъ.

Ра́дости на́мъ вѣ́чныя хода́таица и весе́лія яви́лася еси́, Приснодѣ́во Отрокови́це, Изба́вителя ро́ждши, и́стиною и Ду́хомъ Боже́ственнымъ Того́ чту́щихъ, я́ко Бо́га избавля́ющаго.

Поя́ Дави́дъ, Тво́й пра́отецъ, Пречи́стая, Тя́ ковче́гъ имену́етъ Святы́ни Боже́ственныя, преесте́ственнѣ Бо́га вмѣсти́вшую, во Оте́ческихъ сѣдя́щаго нѣ́дрѣхъ, Его́же непреста́нно, вѣ́рніи, велича́емъ.

Яко вои́стинну превы́шши еси́ всея́ тва́ри, Отрокови́це, Зижди́теля во всѣ́хъ тѣле́снѣ на́мъ родила́ еси́. Тѣ́мже, я́ко Ма́ти еди́наго Влады́ки, но́сиши проти́ву всѣ́хъ нача́льнѣ побѣжде́ніе.

По катава́сіи ектенія́ ма́лая. Та́же: Свя́тъ Госпо́дь Бо́гъ на́шъ… Посе́мъ ексапостила́рій у́тренній.

На хвали́техъ стихи́ры воскре́сны, гла́съ 7:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Воскре́се Христо́съ изъ ме́ртвыхъ, разру́шь сме́ртныя у́зы. Благовѣсти́, земле́, ра́дость ве́лію; по́йте, небеса́, Бо́жію сла́ву.

Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́.

Воскре́сеніе Христо́во ви́дѣвше, поклони́мся Свято́му Го́споду Іису́су, еди́ному Безгрѣ́шному.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Христо́ву Воскре́сенію кла́няющеся не престае́мъ, То́й бо спа́слъ е́сть на́съ отъ беззако́ній на́шихъ, Святы́й Госпо́дь Іису́съ, явле́й Воскре́сеніе.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Что́ возда́мы Го́сподеви о всѣ́хъ, я́же воздаде́ на́мъ? На́съ ра́ди — Бо́гъ въ человѣ́цѣхъ; за истлѣ́вшее естество́ Сло́во пло́ть бы́сть и всели́ся въ ны́; къ неблагода́рнымъ — Благодѣ́тель, къ плѣ́нникомъ — Свободи́тель, ко и́же во тмѣ́ сѣдя́щимъ — Со́лнце Пра́вды; на Крестѣ́ — Безстра́стный; во а́дѣ — Свѣ́тъ; въ сме́рти — Живо́тъ; Воскре́сеніе — па́дшихъ ра́ди. Къ Нему́же возопіи́мъ: Бо́же на́шъ, сла́ва Тебѣ́.

Ины стихи́ры, восто́чны [анато́ліевы], гласъ тойже.

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Врата́ а́дова сокруши́лъ еси́, Го́споди, и сме́ртную держа́ву упраздни́лъ еси́ крѣ́пкою си́лою Твое́ю, и совоздви́глъ еси́ ме́ртвыя, и́же отъ вѣ́ка во тмѣ́ спя́щія, Боже́ственнымъ и сла́внымъ Воскре́сеніемъ Твои́мъ, я́ко Ца́рь всѣ́хъ и Бо́гъ Всеси́ленъ.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Пріиди́те, возра́дуемся Го́сподеви и возвесели́мся о Воскре́сеніи Его́, я́ко совоздви́же ме́ртвыя отъ а́довыхъ нерѣши́мыхъ у́зъ и дарова́ мíрови, я́ко Бо́гъ, жи́знь вѣ́чную и ве́лію ми́лость.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Блиста́яйся а́нгелъ на ка́мени сѣдя́ше живопріе́мнаго гро́ба и жена́мъ мѵроно́сицамъ благовѣствова́ше, глаго́ля: воскре́се Госпо́дь, я́коже пре́жде рече́ ва́мъ; возвѣсти́те ученико́мъ Его́, я́ко предваря́етъ вы́ въ Галиле́и, мíрови же подае́тъ жи́знь вѣ́чную и ве́лію ми́лость.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Почто́ небрего́ма сотвори́сте Ка́мене Краеуго́льнаго, о пребеззако́нніи Іуде́и? Се́ То́й е́сть, Его́же положи́ Бо́гъ въ Сіо́нѣ, Иже изъ ка́мене источи́вый въ пусты́ни во́ду и на́мъ источа́яй отъ ре́бръ Свои́хъ безсме́ртіе. Се́й е́сть Ка́мень, Иже отъ горы́ дѣви́ческія отсѣ́кся безъ хотѣ́нія му́жеска, Сы́нъ Человѣ́чь, гряды́й на о́блацѣхъ небе́сныхъ къ Ве́тхому Де́ньми, я́коже рече́ Даніи́лъ, и вѣ́чно Его́ Ца́рство.

Сла́ва, стихи́ра ева́нгельская. И ны́нѣ, богоро́диченъ: Преблагослове́нна еси́… Славосло́віе вели́кое.

Та́же тропа́рь воскре́сенъ:
Дне́сь спасе́ніе мíру бы́сть, пое́мъ Воскре́сшему изъ гро́ба и Нача́льнику жи́зни на́шея, разруши́въ бо сме́ртію сме́рть, побѣ́ду даде́ на́мъ и ве́лію ми́лость.

И ектеніи́, и отпу́стъ.

НА ЛИТУРГІИ,
Блаже́нна, гла́съ 7:
Красе́нъ бѣ́ и до́бръ въ снѣ́дь и́же мене́ умертви́вый пло́дъ. Христо́съ е́сть Дре́во Живо́тное, отъ Него́же яды́й не умира́ю, но вопію́ съ разбо́йникомъ: помяни́ мя, Го́споди, во Ца́рствіи Твое́мъ.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

На Кре́стъ возне́сся, Ще́дре, Ада́мово рукописа́ніе дре́вняго грѣха́ загла́дилъ еси́ и спа́слъ еси́ отъ пре́лести ве́сь ро́дъ человѣ́ческій. Тѣ́мже воспѣва́емъ Тя́, Благодѣ́телю Го́споди.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Пригвозди́лъ еси́ на Крестѣ́, Ще́дре, грѣхи́ на́ша, Христе́, и Твое́ю сме́ртію сме́рть умертви́лъ еси́, воздви́гнувый уме́ршія изъ ме́ртвыхъ. Тѣ́мже покланя́емся Твоему́ свято́му Воскре́сенію.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Излія́ я́дъ змíй въ слу́хи Евины иногда́, Христо́съ же на Дре́вѣ Кре́стнѣмъ источи́лъ е́сть мíрови жи́зни сла́дость. Тѣ́мже взыва́емъ: помяни́ на́съ, Го́споди, во Ца́рствіи Твое́мъ.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Во гро́бѣ, я́ко сме́ртенъ, положе́нъ бы́лъ еси́, Животе́ всѣ́хъ Христе́, и вереи́ а́довы сломи́лъ еси́, и воскре́съ во сла́вѣ тридне́венъ, я́ко Си́ленъ, всѣ́хъ просвѣти́лъ еси́. Сла́ва Твоему́ Воста́нію.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Госпо́дь воскре́съ тридне́венъ изъ ме́ртвыхъ, дарова́ ми́ръ Сво́й ученико́мъ, и си́хъ благослови́въ посла́, ре́къ: вся́ приведи́те во Ца́рствіе Мое́.

Сла́ва, тро́иченъ: Свѣ́тъ Оте́цъ, Свѣ́тъ Сы́нъ и Сло́во, Свѣ́тъ Ду́хъ Святы́й, но Еди́нъ Свѣ́тъ Три́, Еди́нъ бо Бо́гъ въ тріе́хъ у́бо Ли́цѣхъ, еди́нѣмъ же естествѣ́ и нача́лѣ, — несѣко́мь и неслія́нъ, сы́й превѣ́чный.

И ны́нѣ, богоро́диченъ: Родила́ еси́ Сы́на и Сло́во Отчее пло́тію на́съ ра́ди, я́коже вѣ́сть, Богоро́дице, Са́мъ. Тѣ́мже, Дѣ́во Ма́ти, обоже́ни бы́вше Тобо́ю, — ра́дуйся, — Тебѣ́ зове́мъ, — христіа́номъ упова́ніе.

Проки́менъ, гла́съ 7: Госпо́дь крѣ́пость лю́демъ Свои́мъ да́стъ,* Госпо́дь благослови́тъ лю́ди Своя́ ми́ромъ. Сти́хъ: Принеси́те Го́сподеви, сы́нове Бо́жіи, принеси́те Го́сподеви сы́ны о́вни. Аллилу́ія, [гласъ 7]: Бла́го е́сть исповѣ́датися Го́сподеви и пѣ́ти и́мени Твоему́, Вы́шній. Сти́хъ: Возвѣща́ти зау́тра ми́лость Твою́ и и́стину Твою́ на вся́ку но́щь.

Примѣчанія:
[1] Пастыренача́льниче.
[2] Пло́ти, я́же изъ Тебе́.
[3] Истязу́ется.
[4] Свѣтоли́тія Твоего́.

Источникъ: Окто́ихъ, си́рѣчь Осмогла́сникъ, съ 5-го гла́са по 8-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 158 – 173 об.

Свързани