[ВЕЧЕРЪ,
На Го́споди воззва́хъ..,] стихи́ры преподо́бнаго Михаи́ла, гла́съ 8. Подо́бенъ: О, пресла́внаго чудесе́!
Отче Михаи́ле богодохнове́нне,* благи́хъ исто́чниче,*жела́ній же коне́чныхъ жела́нія исполне́ніе* и и́стинное блаже́нство,* е́же вся́ко естество́ вои́стинну жела́етъ,* ви́дѣти, блаже́нне, досто́йно сподо́бился еси́.* О, кра́снаго твоего́ удобре́нія, сла́вне!* Си́мъ же Христу́, ра́дуяся, ны́нѣ предстои́ши,* я́ко святи́тель свѣ́телъ.
Отче Михаи́ле богопрія́тне, въ свяще́нія оде́жду обле́кся,*поте́клъ еси́ на му́ченическое суди́ще* и Христу́ приве́лся еси́,*сугу́быми вѣнцы́, блаже́нне, укра́шенъ,* святи́тельскія чи́ны зря́.* О, несказа́ннаго твоего́ весе́лія, прему́дре!* Его́же пріобщи́тися вои́стинну* сподо́бился еси́, богоблаже́нне.
Отче Михаи́ле богому́дре,* искуше́ній тебе́ о́гнь, ороша́емь свы́ше,* боголѣ́пно погаси́лъ еси́* и премину́лъ еси́ неискуше́нъ,* приложи́лся еси́, ра́дуяся, блаже́нне, къ пре́жнимъ святи́телемъ,* священному́чениче, свѣ́тло.* О, неизрече́ннаго твоего́ и свѣ́тлаго селе́нія!* Въ о́ньже тя́ Христо́съ ны́нѣ всели́,* я́ко святи́теля че́стна.
Стихи́ры Богоро́дицы, гла́съ и подо́бенъ то́йже:
Ра́дуйся, ду́шъ просвѣще́ніе,* согрѣша́ющихъ проще́ніе,* неради́выхъ исправле́ніе;* ра́дуйся, утѣше́ніе и ра́дость,* скорбя́щихъ помо́щнице;* ра́дуйся, Блага́я,* немощны́хъ ду́шъ исцѣле́ніе;* ра́дуйся, примире́ніе къ Бо́гу и хода́таице,* серафи́мъ всѣ́хъ я́ко су́щи святѣ́йши, Чи́стая.
Пло́ть отъ крове́й Твои́хъ пріе́мъ,* Превѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныя,* вся́ сла́вящія и покланя́ющіяся Тебѣ́.
Спаси́ мя́, Влады́чице Пречи́стая,* Яже Спа́са Христа́ неизрече́нно ро́ждшая:* Тя́ бо еди́ну стяжа́хъ предста́тельницу,* и необори́мую стѣ́ну,* и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.
Сла́ва, и ны́нѣ, пра́здника или́ богоро́диченъ:
Да гла́сы велича́ю Тя́* ра́достными, Чи́стая,* и сла́влю пучи́ну человѣколю́бія Твоего́,* отъ бѣ́дъ спаси́* и изми́ мя́ душетлѣ́нныхъ стрѣ́лъ* неви́димаго и вселука́ваго врага́,* Тя́ бо предлага́ю на́нь, Богоневѣ́сто,* ору́жіе тве́рдо и непобѣди́мо,* Ма́ти Христа́ Бо́га.
Крестобогоро́диченъ:
Тя́ ви́дящи, пригвожда́ема* на Крестѣ́, Іису́се,* и Стра́сти пріе́млюща во́лею,* Дѣ́ва и Ма́ти Твоя́, Влады́ко,* — увы́ Мнѣ́, — вопія́ше,* — Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?
[НА УТРЕНИ,]
Кано́нъ, гла́съ 2:
Пѣ́снь 1.
Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.
Неизглаго́ланнымъ возсія́ просвѣще́ніемъ, о́тче, воздержа́нія, святи́тель Бо́жій бы́лъ еси́, Михаи́ле чу́дне, ца́рское нося́ свяще́ніе и Христо́ву пасы́й ты́ Це́рковь, преблаже́нне.
Витíйствуя усты́ свѣ́тлыми, всѣ́мъ сказа́лъ еси́ благоче́стно боговѣща́нная уче́нія, Михаи́ле пребога́те, ересе́й облича́я хулы́, и благоче́стія побо́рникъ бы́лъ еси́, преблаже́нне.
Дарова́ній Боже́ственныхъ бы́въ, блаже́нне, сосу́дъ, всѣ́мъ вѣ́рнымъ проявле́нно ты́ пре́далъ еси́, Михаи́ле всехва́льне, богоподо́бно житіе́ стяжа́въ и пра́вдою одѣ́янъ, я́ко ри́зою.
Свяще́нному о́бразу Христо́ву и Бо́жія Ма́тере че́стнѣ покланя́яся, пребы́лъ еси́, Михаи́ле всеосвяще́нне, и ху́льное языкобо́ліе низложи́лъ еси́ ерети́чествующихъ, словесы́ и страда́ніи побѣжда́я.
Богоро́диченъ: Изъ чре́ва Твоего́, Пресвята́я Чи́стая, возсія́въ на́мъ Со́лнце, богодѣ́льными блиста́ніи уясни́, отгна́въ вся́ку де́монскую темнообра́зную молву́, препросла́вленный Госпо́дь, сла́вно бо просла́вися.
Пѣ́снь 3.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Теку́щими притяжа́лъ еси́, богоглаго́ливе, непреходи́мая и пребыва́ющая во вѣ́ки, разли́чно бо пожи́лъ еси́, взыва́я: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Излія́ся во устна́хъ твои́хъ Боже́ственная благода́ть, разшири́въ уста́ твоя́, и прія́лъ еси́ прему́дрости дарова́нія, и вопія́лъ еси́: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Покори́лъ еси́ стра́сти воздержа́ніемъ, просвѣти́лъ еси́ у́мъ тво́й видѣ́ніемъ, бы́лъ еси́ дѣ́теленъ, взыва́я: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Богоро́диченъ: Марíю, Пречи́стую Богоро́дицу, воспое́мъ, я́ко Хода́таицу спасе́нія я́вльшуюся, богому́дріи, и вопіе́мъ: нѣ́сть непоро́чны, я́коже Ты́, Всенепоро́чная, и нѣ́сть пречи́сты, па́че Тебе́, Влады́чице.
Сѣда́ленъ, гла́съ 1. Подо́бенъ: Гро́бъ Тво́й, Спа́се.
Освяти́въ себе́ житіе́мъ соверше́ннымъ, яви́лся еси́ свяще́нникъ Бо́га Вы́шняго, отъ Него́же укрѣпля́емь, ерети́чествующихъ уста́ загради́лъ еси́, на Христо́ву ико́ну отверза́емая, и, гони́мь, о́тче, тече́ніе сконча́лъ еси́.
Сла́ва, и ны́нѣ, пра́здника или́ богоро́диченъ:
Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.
Крестобогоро́диченъ:
Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?
Пѣ́снь 4.
Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.
Жела́я вѣнца́ сла́вы, оста́вилъ еси́ пло́ти угожде́ніе, священнотаи́нниче преизря́дне, все́ же житіе́ твое́, я́ко благово́нну же́ртву, Бо́гу прине́слъ еси́.
Охро́мше отъ пра́выя стези́, впадо́ша въ ро́въ е́реси, и́же ны́нѣ я́вльшеся отчужде́ни, и́хже обличи́лъ еси́, Христо́въ почита́я о́бразъ, преблаже́нне.
Воспрія́лъ еси́ твои́хъ страда́ній бога́тно воздая́нія, Михаи́ле всече́стне, съ небе́сными си́лами ны́нѣ веселя́ся и лику́я со а́нгелы, досточу́дне.
Язы́къ тво́й показа́ся Ду́ха тро́сть, Михаи́ле пресла́вне, смотре́ніе плотско́е писа́ти поучи́вся Вседержи́теля Сло́ва, всехва́льне.
Сія́я свяще́нною и честно́ю оде́ждею свяще́нія твоего́, исповѣ́даніемъ укра́шся, позо́ръ бы́въ а́нгеловъ и человѣ́ковъ, всече́стне.
Богоро́диченъ: Напра́ви, Богоро́дице, жи́знь мою́, повелѣ́ніи Боже́ственными управля́ющи вопло́щшагося Сло́ва изъ Тебе́, и къ свѣ́ту наста́ви, Дѣ́во Ма́ти, Марíе Богоневѣ́сто.
Пѣ́снь 5.
Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.
Отъ ю́ности возложи́вся Сло́ву, священноявле́нне, Боже́ственно бо возложе́ніе я́влься, украси́лся еси́ дѣ́йственнымъ видѣ́ніемъ и, прему́дрости пло́дъ собра́въ, бы́лъ еси́ па́стырь, Михаи́ле, достопрія́тенъ.
Глаго́лъ Бо́жій, бога́тно всели́выйся въ тя́, богому́дре, рѣ́ки источи́ уче́ній, и́миже пита́ющеся, весели́мся, блаже́нне, тя́ хода́тая я́вѣ иму́ще, ми́лостива на́мъ Христа́ содѣва́юща.
Иже Боже́ственною си́лою вся́ украси́въ, тя́ ны́нѣ, богоявле́нне, свяще́нія та́йнаго украси́ мѵ́ромъ, провѣ́дый твою́ свѣ́тлость, яви́лся бо еси́ свяще́нникъ Бо́жій велему́дръ.
Богоро́диченъ: Ра́венъ на́мъ по всему́ бы́ти сподо́бивыйся, въ Тя́ всели́ся, Богома́ти, превѣ́чно отъ Отца́ возсія́вый и роди́ся изъ Тебе́, Всенепоро́чная, Человѣ́къ вку́пѣ и Бо́гъ Всеси́ленъ.
Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.
Въ спаси́тельную оде́жду, прехва́льне, боже́ственнаго весе́лія одѣ́явся, исповѣ́данія вѣне́цъ отъ Бо́га прія́лъ еси́ досто́йно.
Претерпѣ́въ го́рькая заточе́нія, му́дре, въ простра́нную широту́ дости́глъ еси́ рая́, съ му́ченики лику́я, богому́дре пребога́те.
Учени́къ бы́въ Христа́ Бо́га, Сего́ Страсте́мъ, блаже́нне, поревнова́лъ еси́, бѣды́ пріе́мля до́блественнѣ за Це́рковь Его́, богодухнове́нне.
Богоро́диченъ: Умно научи́вшеся несказа́нному вси́ проро́цы Твоему́, Пречи́стая, Рождеству́, духо́вно вообража́юще и предглаго́люще всѣ́мъ бу́дущая.
Конда́къ, гла́съ 8. Подо́бенъ: Яко нача́тки.
Яко архіере́й всече́стенъ и благоче́стія священнострада́лецъ, преще́нія злоимени́таго не убоя́вся, ерети́ческое того́ противле́ніе побѣди́лъ еси́, свобо́днымъ гла́сомъ велегла́сно вопія́: ико́нѣ покланя́юся Христо́вѣ и Пречи́стыя Того́ Ма́тере. Сего́ ра́ди тя́ почита́емъ, Михаи́ле.
Пѣ́снь 7.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.
Не терпя́ше язы́ка твоего́ боже́ственнаго вѣща́нія звѣ́рь злоимени́тый, Михаи́ле свяще́нне, но въ заточе́ніихъ тя́ осужда́етъ да́льнихъ; оба́че стыдя́шеся, твою́, священнопроповѣ́дниче, зря́ тве́рдость.
Направля́ется, прему́дре, уче́ніи твои́ми Христо́въ всесвяще́нный правосла́вный со́нмъ: бы́лъ бо еси́ орга́нъ, священнодѣ́йственниче Михаи́ле, Ду́хомъ бряца́я, вопія́ вели́чія Вседержи́теля.
Му́дрѣ обличи́лъ еси́ злоимени́тыхъ пита́телей, Ма́нента ху́льное нече́стіе, Христо́ву пречи́стую, о́тче, ико́ну я́сно и Богома́тере проповѣ́дуя и святы́хъ, Михаи́ле преподо́бне.
Богоро́диченъ: Воплоще́нія была́ еси́ Бо́жія Сло́ва, Дѣ́во Всенепоро́чная, красе́нъ сосу́дъ: изъ Тебе́ бо воспрія́тъ, за милосе́рдіе мно́гое, всего́ мя́, человѣ́ка, сы́й Благослове́нъ и Препросла́вленъ.
Пѣ́снь 8.
Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.
На суди́щи ста́въ, богопроповѣ́дниче Михаи́ле, не устраши́лся еси́ преще́нія беззако́нныхъ, но свобо́днымъ гла́сомъ вопія́лъ еси́: ико́ну пречи́стую чту́ Спа́са Христа́ и святы́хъ всѣ́хъ.
Нра́вомъ тве́рдымъ и крѣ́пкимъ спле́тся, му́дре, съ богобо́рцы, побѣди́тель яви́лся еси́, дѣ́ломъ и сло́вомъ я́вль, я́коже бя́ше лѣ́по ико́ну пречи́стую чти́ти Спа́са Христа́ и святы́хъ всѣ́хъ.
На первообра́зную вѣ́дый ико́нную че́сть, священноявле́нне, преходя́щу, о́тче, Богодухнове́ннымъ Писа́ніемъ послѣ́дуя, вся́ учи́лъ еси́ чти́ти ико́ну Христо́ву и всѣ́хъ святы́хъ.
Богоро́диченъ: Струю́ исцѣле́ній на́мъ непреста́нно вѣ́рнымъ, Чи́стая, источа́еши, ея́же оби́льную благода́ть почерпа́юще, Твое́ пое́мъ Рождество́ пречи́стое и превозно́симъ во вся́ вѣ́ки.
Пѣ́снь 9.
Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу велича́емъ.
Безмѣ́рнымъ сія́я ны́нѣ просвѣще́ніемъ, пребога́те, Свѣ́ту вели́кому я́ко предстоя́, жела́нный тебѣ́ коне́цъ получи́ти, о́тче, сподо́бился еси́, къ нему́же, тща́ся, те́клъ еси́, благоче́стно пожи́въ, преблаже́нне.
Ви́дѣти сподо́бился еси́ па́че ума́ свѣ́тлость, ю́же на земли́ проявле́нно, о́тче, стяжа́лъ еси́, но, хода́тайствуя, изба́вити твоя́ ученики́ Христа́ умоли́, тя́ ны́нѣ хва́лящія и чту́щія, досточу́дне.
Укрѣ́плься Боже́ственною благода́тію, му́дрости твоея́ сія́ніи богобо́рныхъ на́глость, му́дре, погаси́лъ еси́, заря́ми отону́дными, я́ко исто́чникъ, вну́трь стяжа́въ, Михаи́ле чу́дне, христопроповѣ́дниче свяще́нне.
Богоро́диченъ: Якоже руно́, Пренепоро́чная, До́ждь небе́сный во утро́бѣ пріе́мши, на́мъ родила́ еси́ безсме́ртіе Даю́щаго, благоче́стно Того́ воспѣва́ющимъ и Тя́, Всепѣ́тую Богоро́дицу, проповѣ́дающимъ.
Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́вры, 1893. — Л. 184 – 188.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.