ВЪ ПЯТОКЪ ВЕЧЕРА,
Нача́ло суббо́тнѣй слу́жбѣ и все́ послѣ́дованіе Вече́рни и Утрени, пи́санъ ука́зъ о то́мъ въ пе́рвомъ гла́сѣ.
На Го́споди воззва́хъ.., стихи́ры святы́мъ му́ченикомъ, и святи́телемъ, и преподо́бнымъ, гла́съ 2. Подо́бенъ: Егда́ отъ Дре́ва Тя́.
Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.
Пло́ть предаю́ще ра́намъ, и горча́йшія му́ки терпя́ще, и ну́жную сме́рть, му́ченицы всехва́льніи, и мучи́телей посрами́сте, и че́сти и́дольскія вои́стинну потреби́ли есте́, Христа́ проповѣ́дающе, еди́наго Бо́га и Влады́ку, Ему́же со а́нгельскими ли́ки, вѣнцено́сцы сла́вніи, предстоите́.
Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.
И па́ки глаго́лемъ ту́же стихи́ру: Пло́ть предаю́ще ра́намъ…
Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.
Сло́ва, я́вльшагося на земли́, проповѣ́дницы яви́стеся боже́ственніи, и благоче́стію всѣ́хъ научи́сте, и правосла́вное Боже́ственныхъ слове́съ изло́жше, и́миже е́ресь дале́че отгна́сте отъ Це́ркве Христо́вы. Тѣ́мже во оби́тели при́сно живу́щія, я́ко священнодѣ́йственницы Тро́ицы, всѣ́хъ введи́те, блаже́нніи.
Ины стихи́ры, му́ченичны, гла́съ то́йже:
Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.
Иже земны́я сла́сти не возлюби́вше, страстоте́рпцы, небе́снымъ благи́мъ сподо́бишася и а́нгеломъ согра́ждане бы́ша. Го́споди, моли́твами и́хъ поми́луй и спаси́ на́съ.
Сти́хъ: Хвали́те Го́спода, вси́ язы́цы, похвали́те Его́, вси́ лю́діе.
Святы́мъ му́ченикомъ, моля́щимся о на́съ и Христа́ пою́щимъ, вся́ка пре́лесть преста́ и человѣ́ческій ро́дъ вѣ́рою спаса́ется.
Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.
Ли́цы му́ченичестіи проти́вишася мучи́телемъ, глаго́люще: мы́ во́инствуемъ Царю́ си́ламъ, а́ще и огню́ и му́камъ предадите́ на́съ, не отмета́емся Тро́ическія си́лы.
Сла́ва, и ны́нѣ, богоро́диченъ:
Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго Пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.
Та́же: Свѣ́те Ти́хій… Проки́менъ дне́: Бо́же, Засту́пникъ мо́й еси́ Ты́* и ми́лость Твоя́ предвари́тъ мя́. Сти́хъ: Изми́ мя́ отъ вра́гъ мои́хъ, Бо́же, и отъ востаю́щихъ на мя́ изба́ви мя́. Та́же: Сподо́би, Го́споди, въ ве́черъ се́й…
На стихо́внѣ стихи́ры, гла́съ 2:
Ве́лія сла́ва, ю́же стяжа́сте, святíи, вѣ́рою, не то́кмо бо въ страда́ніихъ врага́ побѣди́ли есте́, но и по сме́рти ду́хи прого́ните, неду́жныя исцѣля́ете, ду́шъ и тѣле́съ вра́чеве, моли́теся ко Го́споду поми́ловатися душа́мъ на́шимъ.
Сти́хъ: Блаже́ни, я́же избра́лъ и прія́лъ еси́, Го́споди.
Ме́ртвенъ: Яко цвѣ́тъ увяда́етъ, и я́ко сѣ́нь ми́мо гряде́тъ, и разруша́ется вся́къ человѣ́къ; па́ки же глася́щей трубѣ́, ме́ртвіи я́ко въ тру́сѣ вси́ воста́нутъ ко Твоему́ срѣ́тенію, Христе́ Бо́же. Тогда́, Влады́ко, и́хже преста́вилъ еси́ отъ на́съ, во святы́хъ Твои́хъ учини́ кро́вѣхъ ду́хи ра́бъ Твои́хъ.
Сти́хъ: Ду́ши и́хъ во благи́хъ водворя́тся.
Ме́ртвенъ: Увы́ мнѣ́, коли́къ по́двигъ и́мать душа́ разлуча́ющися отъ тѣлесе́! Увы́ мнѣ́, тогда́ коли́ко слези́тъ и нѣ́сть и́же поми́луетъ ю́! Ко а́нгеломъ о́чи возводя́щи, бездѣ́льно мо́лится, къ человѣ́комъ ру́цѣ простира́ющи и не и́мать помога́ющаго. Тѣ́мже, возлю́бленная моя́ бра́тіе, разумѣ́вше кра́ткую на́шу жи́знь, преста́вленнымъ поко́я отъ Христа́ про́симъ и душа́мъ на́шимъ ве́лію ми́лость.
Сла́ва, и ны́нѣ, богоро́диченъ:
Спаси́ отъ бѣ́дъ рабы́ Твоя́, Богоро́дице Дѣ́во, я́ко вси́ по Бо́зѣ къ Тебѣ́ прибѣга́емъ, я́ко къ неруши́мѣй стѣнѣ́ и предста́тельству.
Та́же: Ны́нѣ отпуща́еши… Трисвято́е, по Отче на́шъ… Тропа́рь и отпу́стъ.
ВЪ ПЯТОКЪ НА ПОВЕЧЕРІИ,
Кано́нъ моле́бный Пресвятѣ́й Богоро́дицѣ, гла́съ 2.
Пѣ́снь 1.
Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.
[Припѣ́въ: Пресвята́я Богоро́дице, спаси́ на́съ.]
Жи́зни исто́чникъ еси́, Дѣ́во Ма́ти Чи́стая, Нача́льника и Го́спода ро́ждши, Жи́знь вся́ческихъ, ороша́ющи вѣ́рою славосло́вящія Тя́.
Тя́ утвержде́ніе и предста́тельницу обога́щшеся и́мамы, и́же Богоро́дицу, Пречи́стая, исповѣ́дающіи Тя́, отъ треволне́нія житія́, Всенепоро́чная Дѣ́во, спаса́емся.
Сла́ва: Яже Исто́чникъ безсме́ртія ро́ждши, уя́звленаго мя́ страстьми́, Отрокови́це, исцѣли́ и огня́ вѣ́чнаго исхити́, еди́на Богоблагода́тная.
И ны́нѣ: Яже вѣ́рнымъ прибѣ́жище, Приснодѣ́во, держа́вная по́мощь притека́ющимъ Ти́, отъ вся́кія ну́жды и вре́да сопроти́внаго на́съ спаси́.
Пѣ́снь 3.
Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.
Злату́ю я́ко вои́стинну кади́льницу, и ста́мну ма́нны, и Боже́ственную го́ру, и пала́ту прекра́сну Бо́жію, Тя́, Дѣ́во, имену́емъ.
Це́рковь и свяще́нное жили́ще Сло́ва су́щи, Богоро́дице, прегрѣше́ній очище́ніе бу́ди мнѣ́ при́сно, Пресвята́я Дѣ́во.
Сла́ва: Ни язы́къ зе́мленъ, ни у́мъ безпло́тныхъ, возмо́жетъ Рождество́ Твое́ сказа́ти, па́че естества́ бо и смы́сла, Богоро́дице, Зижди́теля родила́ еси́.
И ны́нѣ: Утвержде́ніе бу́ди, и прибѣ́жище, и покро́въ, Дѣ́во Богороди́тельнице, вѣ́рою къ Тебѣ́ прибѣга́ющимъ и Бо́жію Тя́ Ма́терь исповѣ́дающимъ.
Пѣ́снь 4.
Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.
Тя́, Богоро́дице, стяжа́хомъ христіа́не по́мощь ве́лію, отъ лю́тыхъ бѣ́дъ на́съ исхити́.
Неискусобра́чная Влады́чице, Яже Бо́га во утро́бѣ заче́нши, напа́стей и печа́лей всѣ́хъ на́съ изба́ви.
Сла́ва: Непобѣди́мую стѣ́ну Тя́ и держа́вную наде́жду, Богоро́дице, вѣ́рніи стяжа́хомъ въ напа́стехъ, Чи́стая.
И ны́нѣ: Моли́тву Твою́, Влады́чице, я́ко тве́рдъ степе́нь стяжа́вше, разли́чныхъ скорбе́й избавля́емся.
Пѣ́снь 5.
Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.
Воплоще́нна изъ Тебе́, Богороди́тельнице, вѣ́рніи позна́хомъ безъ сѣ́мене Сы́на рожде́нна, Бо́га и́стинна и Человѣ́ка естество́мъ, тѣ́мже Тя́ сла́вимъ.
Подъ кро́въ Тво́й и заступле́ніе, Пречи́стая, вѣ́рніи всегда́ прибѣга́юще вѣ́рою, избавля́емся Тобо́ю, Богоро́дице, вся́каго тя́жкаго наше́ствія.
Сла́ва: Изба́ви на́съ отъ напа́стей и бу́ри помышле́ній, Пречи́стая, вся́каго гнѣ́ва, вся́каго грѣха́, гла́да же, и губи́тельства, и вѣ́чнаго, Дѣ́во, муче́нія.
И ны́нѣ: Засту́пница на́ша, и спасе́ніе, и наде́жда, Влады́чице, христіа́нъ су́щи, спаси́ любо́вію Тя́ при́сно вѣ́рно воспѣва́ющихъ, Дѣ́во Всепѣ́тая.
Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.
Иже во́лею вся́ содѣва́яй, въ ложесна́ Неискусобра́чныя во́лею всели́вся, тле́ю боля́щія нетлѣ́ніемъ обогати́въ, я́ко Милосе́рдъ.
Вы́шша вы́шнихъ си́лъ и святѣ́йша еси́, Всенепоро́чная, па́че естества́ вмѣ́щши невмѣсти́мое Сло́во въ ложесна́ Твоя́.
Сла́ва: На пути́ житія́ заблужде́ннаго мя́ и безпу́тіемъ ча́сто па́дающа во грѣсѣ́хъ, Влады́чице, къ покая́нія стезя́мъ наста́ви.
И ны́нѣ: Не пре́зри, Чи́стая, мольбы́ на́ша, на Тя́ поло́жшихъ наде́жду ра́бъ Твои́хъ, прибѣ́жище бо, Влады́чице, и душа́мъ очище́ніе еси́.
Та́же: Го́споди, поми́луй, три́жды. Сла́ва, и ны́нѣ.
Сѣда́ленъ, гла́съ 2:
Сло́во безъ сѣ́мене зачала́ еси́, Сы́на же, Еди́наго Христа́ родила́ еси́, Ты́ бо роди́ но́во Отроча́, Зижди́теля Твоего́. Тѣ́мъ Тя́, Богоро́дице, велича́емъ.
Пѣ́снь 7.
Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.
Отцу́ соесте́ственна разу́мнаго Сы́на, си́лою Ду́ха Пресвята́го воплоти́ла еси́, Богоблагода́тная Влады́чице. Сего́ у́бо непреста́нно моли́ уще́дрити пою́щія: Благослове́нная, Яже Бо́га пло́тію ро́ждшая.
Дѣ́во Чи́стая, Неискусобра́чная, Свята́я, Благослове́нная, па́дающихъ исправле́ніе, согрѣша́ющихъ избавле́ніе, спаси́ мя́ блу́днаго, спаси́, Сы́ну Твоему́ зову́ща: Благослове́нная, Яже Бо́га пло́тію ро́ждшая.
Сла́ва: Приста́нище тве́рдо, предста́тельница стра́шна и стѣна́ необори́ма въ ну́ждахъ бѣ́дствующимъ и обурева́емымъ въ печа́ли, и я́же къ Сы́ну Твоему́ моли́твами, Богоро́дице су́щи, отъ многообра́зныхъ искуше́ній спаси́ рабы́ Твоя́.
И ны́нѣ: Яже еди́но упова́ніе и по́мощь вѣ́рныхъ, Богороди́тельнице, потщи́ся помощи́ рабо́мъ Твои́мъ, погружа́емымъ скорбьми́, отвсю́ду недоумѣ́емымъ, и въ болѣ́знехъ су́щимъ, и прибѣга́ющимъ къ Тебе́ любо́вію души́.
Пѣ́снь 8.
Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.
Живы́й су́щій исто́чникъ, я́ко Во́ду жи́зни ро́ждши, ду́шу мою́ иста́явшую грѣха́ пла́менемъ, Дѣ́во Богоро́дице, ороси́, да Тя́ сла́влю во вся́ вѣ́ки.
Умерщвле́нныхъ и къ пе́рсти сме́ртнѣй и тлѣ́ннѣй сведе́нныхъ возста́вила еси́, Еди́на, Нача́льника жи́зни ро́ждши, Христа́ Бо́га на́шего, Влады́чице, Дѣ́во Чи́стая и Благослове́нная.
Сла́ва: Изба́ви мя́, Влады́чице Чи́стая, вѣ́чнаго огня́ и осужде́нія, и изми́ мя́ отъ человѣ́къ злотворя́щихъ и и́щущихъ запя́ти мнѣ́, я́ко да ублажа́ю Тя́ при́сно, Юже вся́ тва́рь боже́ственнѣ ублажа́етъ.
И ны́нѣ: Въ подо́біи пло́ти Пребоже́ственный изъ Тебе́ ви́дѣнъ бы́сть, Чи́стая Дѣ́во. Его́же непреста́нно моли́ поми́ловати на́съ, въ зло́бѣ живу́щихъ и трепе́щущихъ вѣ́чнующаго муче́нія.
Пѣ́снь 9.
Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.
Человѣколю́бія Боже́ственнаго сподо́би мя́, Отрокови́це, Яже Еди́на Человѣколю́бца Бо́га пло́ть отъ Тебе́ взаимова́вша и неизглаго́ланно ро́ждшая, изба́ви мя́ бу́дущаго пла́мене и му́ки вся́кія, любо́вію Тя́ сла́вящаго.
Яко крѣ́пкую засту́пницу, я́ко наде́жду, и стѣ́ну, и основа́ніе, и покро́въ тве́рдъ, и непобѣди́мо утвержде́ніе, и небу́рно приста́нище, и единодержа́вное прибѣ́жище стяжа́вше Тя́, вси́ спаса́емся, Препѣ́тая.
Сла́ва: Свѣтороди́тельнице Дѣ́во, души́ моея́ о́блаки отжени́ и пода́й чи́сто узрѣ́ти, Влады́чице, спаси́тельную Добро́ту, возсія́вшую неизглаго́ланно изъ Твоея́ Пресвяты́я утро́бы во свѣ́тъ язы́ковъ, Препѣ́тая.
И ны́нѣ: Свѣ́тъ ро́ждшая Боже́ственный, мно́гими страстьми́ наведе́нія помраче́нное се́рдце мое́ и по́мыслъ очужда́ющихъ, просвѣти́, Отрокови́це, ка́плю ми́ подаю́щи при́сно сле́зъ, скве́рны грѣха́, Дѣ́во, очища́ющую ми́.
Та́же: Досто́йно е́сть.., и покло́нъ. Трисвято́е, по Отче на́шъ… Тропа́рь, и про́чее обы́чное, и отпу́стъ.
ВЪ СУББОТУ УТРА,
По 1-мъ стихосло́віи сѣда́льны му́ченичны, гла́съ 2:
Тебе́, Одѣва́ющаго не́бо о́блаки, иму́ще святíи одѣя́ніе въ мíрѣ, му́ки отъ беззако́нникъ претерпѣ́ша и пре́лесть и́дольскую упраздни́ша. Тѣ́хъ моли́твами и на́съ свободи́, Спа́се, отъ неви́димаго врага́, и спаси́ на́съ.
Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.
Апо́столи, му́ченицы и проро́цы, святи́теліе, преподо́бніи и пра́ведніи, до́брѣ по́двигъ соверши́вшіи и вѣ́ру соблю́дшіи, дерзнове́ніе иму́ще ко Спа́су, о на́съ Того́, я́ко Бла́га, моли́те спасти́ся, мо́лимся, душа́мъ на́шимъ.
Подо́бенъ: Милосе́рдія су́щи.
[Сти́хъ: Ду́ши и́хъ во благи́хъ водворя́тся.]
Иже ме́ртвыми и живы́ми, я́ко Бо́гъ, облада́яй всѣ́ми, вла́стію, Животода́вче, пріими́ моле́ніе ра́бъ Твои́хъ, покажи́ Твое́ милосе́рдіе, Человѣколю́бче, и пода́ждь оставле́ніе душа́мъ, я́же преста́вилъ еси́ наде́ждею въ Тя́, благоутро́бія ра́ди, я́ко Бла́гъ.
Сла́ва, и ны́нѣ, богоро́диченъ:
Вся́, па́че смы́сла, вся́ пресла́вная Твоя́, Богоро́дице, та́инства, чистотѣ́ запеча́танной и дѣ́вству храни́му, Ма́ти позна́лася еси́ нело́жна, Бо́га ро́ждши Истиннаго. Того́ моли́ спасти́ся душа́мъ на́шимъ.
По 2-мъ стихосло́віи сѣда́льны, гла́съ 2:
Иже просвѣти́вый святы́я Твоя́ па́че зла́та и просла́вивый преподо́бныя Твоя́, я́ко Бла́гъ, отъ ни́хже умоле́нъ быва́я, Христе́ Бо́же, жи́знь на́шу умири́, я́ко Человѣколю́бецъ, и моли́тву испра́ви я́ко кади́ло, еди́не во святы́хъ Почива́яй.
Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.
Страстоте́рпцы Госпо́дни, блаже́нна земля́, напи́вшаяся крове́й ва́шихъ, и свя́ти хра́мы, пріе́мшіи тѣлеса́ ва́ша, на суди́щи бо врага́ обличи́сте и Христа́ со дерзнове́ніемъ проповѣ́дасте. Того́, я́ко Бла́га, моли́те спасти́, мо́лимся, ду́ши на́ша.
Сти́хъ: Блаже́ни, я́же избра́лъ и прія́лъ еси́, Го́споди.
Помяни́, Го́споди, я́ко Бла́гъ, ду́ши ра́бъ Твои́хъ, и ели́ка въ житіи́ согрѣши́ша, прости́, никто́же бо безгрѣ́шенъ, то́кмо Ты́, могíй и преста́вленнымъ да́ти поко́й.
Сла́ва, и ны́нѣ, богоро́диченъ:
Богоро́дице Дѣ́во Марíе, ро́ждшая Христа́, Изба́вителя и Спа́са, моли́ся Того́ благосты́ни со апо́столы, и му́ченики, и проро́ки, съ преподо́бными же и священному́ченики очище́ніе грѣхо́въ дарова́ти на́мъ и ве́лію ми́лость.
Кано́нъ святы́мъ му́ченикомъ, святи́телемъ, преподо́бнымъ и усо́пшимъ, его́же краегране́сіе: Рабо́мъ Бо́жіимъ бли́жнимъ хвалу́ нося́. Творе́ніе Іо́сифово, гла́съ 2.
Пѣ́снь 1.
Ирмо́съ: Моисе́йскую пѣ́снь воспріи́мши, возопíй, душе́: Помо́щникъ и Покрови́тель бы́сть мнѣ́ во спасе́ніе, се́й мо́й Богъ, и просла́влю Его́.
Му́чениченъ: Изгна́нія лю́тая и уране́нія зѣ́льная, терпѣли́вно подъя́сте, страда́льцы, вся́кую пре́лесть отъ коне́цъ си́лою Боже́ственною отгна́сте.
Святи́телемъ: Бо́жіи служи́теліе и святи́теліе, свѣ́томъ мы́сленнымъ облиста́юще я́вѣ, къ свѣ́ту благоче́стія наста́виша всѣ́хъ благочести́выхъ исполне́нія.
Преподо́бнымъ: Го́рдый у́мъ смири́вше, преподо́бніи, къ до́брѣй земли́ преидо́сте, возне́сшеся же Боже́ственными о́бразы, и всѣ́мъ смире́ннымъ помога́ете при́сно.
Сла́ва, поко́инъ: Свѣтлѣ́йшаго свѣ́та и вѣ́чнаго весе́лія яви́ прича́стники, я́ко Бо́гъ, я́же преста́вилъ еси́ отъ привре́менныхъ рабы́ Твоя́ вѣ́рныя, Преблагíй Бо́же на́шъ.
[И ны́нѣ,] богоро́диченъ: Поще́ніемъ крѣ́пко подви́гшеся и терпѣли́вно низложи́ша врага́, честны́я жены́ Тебѣ́, Богороди́тельнице, предстоя́тъ ра́дующеся.
Другíй кано́нъ, усо́пшимъ, [пое́тся на ряду́, идѣ́же нѣ́сть Мине́и], его́же краегране́сіе: Уме́ршимъ второ́е соплета́ю пѣ́ніе. Гла́съ 2.
Пѣ́снь 1.
Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозѣ́ е́ изра́ильтескія лю́ди наста́вльшему, Го́сподеви пои́мъ: сла́вно бо просла́вися.
Припѣ́въ: Ди́венъ Бо́гъ во святы́хъ Свои́хъ, Бо́гъ Изра́илевъ.
Сме́ртію Твое́ю попра́въ сме́рть, Боже́ственныя жи́зни источи́лъ еси́ присносу́щіе, е́же пода́ждь, Бла́же, душа́мъ усо́пшихъ, му́ченикъ Твои́хъ мольба́ми, оставле́ніе прегрѣше́ній да́руя.
Припѣ́въ: Упоко́й, Го́споди, ду́ши усо́пшихъ ра́бъ Твои́хъ.
Иже бога́тую ми́лость при́сно источа́я, благоче́стно при́сно пріе́млющимъ Тя́, въ дому́ Твое́мъ, Христе́, въ ди́внѣй Твое́й ски́ніи, мѣ́сто ослабле́нія пода́ждь, Влады́ко, рабо́мъ Твои́мъ, я́ко Благоутро́бенъ.
Сла́ва: Крѣпча́йшій на сме́рть бы́лъ еси́, Христе́, тѣ́мже ту́ связа́въ, на́съ изба́вилъ еси́, и ны́нѣ изба́ви отъ сея́ тлѣ́нія[1] усо́пшія, я́ко Бла́гъ, и Твоего́ сія́нія прича́стіе да́руй.
И ны́нѣ, [богоро́диченъ:] Утве́рждши коле́блемый у́мъ мо́й, Ма́ти Бо́жія, укрѣпи́ Боже́ственными повелѣ́ньми Ро́ждшагося изъ Твоего́ освяще́ннаго чре́ва и Упраздни́вшаго, Влады́чице, а́дово мра́чное ца́рство.
Пѣ́снь 3.
Ирмо́съ: Непло́дствовашій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.
Разже́гшеся огне́мъ любве́ Христо́вы, о страстоте́рпцы, му́къ разжже́нія угаси́сте, ороше́ніемъ Вседѣ́теля Ду́ха.
Святѣ́йшіи Христо́вы святи́теліе и честнíи преподо́бныхъ собо́ри, о всѣ́хъ на́съ Человѣколю́бца Бо́га умоли́те.
Свяще́ннѣйшій ли́къ боже́ственныхъ проро́къ возвели́чися и же́нъ мно́жество пострада́вшихъ крѣ́пко сла́ву улучи́ша.
Сла́ва: Умертви́вся, Христе́, на Крестѣ́, дарова́лъ еси́ уме́ршимъ безсме́ртіе, его́же улучи́ти сподо́би къ Тебѣ́ отше́дшія вѣ́рою.
И ны́нѣ, [богоро́диченъ:] Со всѣ́ми проро́ки и жена́ми свяще́нными ны́нѣ прилѣ́жно Бо́га моли́, Дѣ́во, Ро́ждшагося изъ Тебе́, уще́дрити на́съ.
Инъ.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ па́че Тебе́, Го́споди.
Твоея́ красоты́ сія́ніемъ озари́тися въ вѣ́рѣ усо́пшимъ благоволи́ съ му́ченики Твои́ми, Иже бога́тый въ ми́лости, Ты́ бо еси́ Бо́гъ на́шъ, и нѣ́сть пра́веденъ па́че Тебе́, Го́споди.
На мѣ́стѣ прохлажде́нія, въ нѣ́дрѣхъ Авраа́мовыхъ, избра́ннаго Твоего́, сподо́би водворя́тися рабо́мъ Твои́мъ, я́ко Ще́дръ, Тебѣ́ вопію́щимъ: Ты́ бо еси́ Бо́гъ на́шъ, и нѣ́сть пра́веденъ па́че Тебе́, Го́споди.
Сла́ва: Въ черто́зѣхъ небе́сныхъ водворя́тися съ му́дрыми дѣ́вами совше́дшими, Влады́ко, пріими́ рабы́ Твоя́ свѣщено́сцы, и́хже преста́вилъ еси́ Твое́ю во́лею отъ вре́менныхъ, еди́не Человѣколю́бче.
И ны́нѣ, [богоро́диченъ:] Умерщвле́на мя́ и къ земли́ возвраще́на воздви́гнула еси́, ро́ждши Жизнода́вца, и возвела́ еси́ мя́ изъ а́да преиспо́днѣйшаго, Богоро́дицу Тя́ вѣ́рою сла́вящаго и почита́ющаго, Пречи́стая, Тебе́, Всепѣ́тую.
Пѣ́снь 4.
Ирмо́съ: Еже отъ Дѣ́вы Твое́ рождество́ проро́къ предзря́, возпроповѣ́даше, вопія́: слу́хъ Твой услы́шахъ и убоя́хся, я́ко отъ ю́га и изъ горы́ святы́я приосѣне́нныя прише́лъ еси́, Христе́.
Иже Христо́вымъ Страсте́мъ, богосла́вніи страстоте́рпцы, уподо́бльшеся до́брѣ, распростира́еми ра́довахуся мно́гими му́ками, на вѣ́чная воздая́нія взира́юще, и́хже получи́вше, ублажа́ются при́сно.
Зако́ны соблюда́юще Ду́ха, первосвяще́нницы, прему́дренно упасо́сте лю́ди, я́ко ко́рмчіи преизря́дніи на Боже́ственнѣ приста́нищи, и преложи́вшеся отъ жите́йскихъ мо́лвъ, къ тишинѣ́ преидо́сте живота́.
На земли́ прише́льцы яви́стеся, преложи́вше, отцы́, жи́знь ва́шу на небеса́, я́коже пи́шетъ, благочестному́дреннѣ, и плотскíя стра́сти обузда́вше болѣ́зньми воздержа́нія, си́лою Христо́вою.
Ихже преве́лъ еси́, Влады́ко, отъ вре́меннаго житія́ многочи́сленное мно́жество, въ правосла́внѣй послужи́вшія Тебе́, Сло́ве, вѣ́рѣ, всѣ́хъ спаса́емыхъ мно́жествомъ сочета́въ, вѣ́чнаго сподо́би живота́.
Сла́ва: Ме́ртвости боже́ственныя жела́юще, жи́знь безконе́чную хода́тайствующе вои́стинну, Тобо́ю, Пречи́стая Влады́чице Богороди́тельнице, честны́я жены́ сподо́бишася тоя́, моля́ще Сы́на Твоего́ и Бо́га о на́съ.
[И ны́нѣ,] богоро́диченъ: Го́ру присѣ́нную зри́тъ Тя́ добродѣ́тельми проро́къ Авваку́мъ, Богоро́дице, изъ нея́же яви́ся Бо́гъ неизрече́нно, добродѣ́телію покры́въ небеса́ и ро́дъ человѣ́ческій изъ истлѣ́нія спасы́й.
Инъ.
Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.
Упова́ніемъ, и любо́вію пожи́вшія, и умо́мъ правосла́внымъ, я́же па́че ума́ сла́вы Твоея́ сподо́би рабы́ Твоя́, Христе́, мно́гимъ Твои́мъ человѣколю́біемъ и избра́нныхъ му́ченикъ мольба́ми.
Яко имы́й сла́дости приснотеку́щій пото́къ, при́сно напоя́еши избра́нныя, Го́споди, съ ни́миже и ны́нѣ преста́вленныя, Христе́, къ Тебѣ́ неизрече́ннымъ Твои́мъ милосе́рдіемъ пита́еши при вода́хъ оставле́нія.
Сла́ва: Ты́ живы́ми госпо́дьствуеши, Влады́ко, и ме́ртвыми владѣ́еши. Ты́ въ земли́ пе́рсть су́щую си́лою Твое́ю воскреси́ши. Тѣ́мже къ Тебѣ́ преше́дшія во дво́рѣхъ Твои́хъ, Спа́се, всели́.
И ны́нѣ, [богоро́диченъ:] Исцѣли́ла еси́ Евино сокруше́ніе и дре́внее окая́нство, Зижди́теля бо родила́ еси́, могу́щаго испра́вити на́съ, прегрѣше́ньми пове́рженыхъ, Богороди́тельнице, еди́на Ма́ти Дѣ́во.
Пѣ́снь 5.
Ирмо́съ: Мглу́ души́ моея́, Спа́се мо́й, разгна́въ свѣ́томъ за́повѣдей Твои́хъ, озари́ мя, я́ко еди́нъ Ца́рь ми́ра.
Тебе́ возлюби́вше, Ще́дре, возненави́дѣша вся́ мірска́я до́бліи страстоте́рпцы, примѣси́вшеся му́камъ отверже́ніемъ пло́ти.
Святи́теліе, проро́цы, преподо́бніи богоно́сцы, духо́вными луча́ми просвѣща́ете мíръ, тму́ разоря́юще страсте́й.
Преподо́бніи отцы́, проро́цы и первосвяще́нницы, и присносла́вныя жены́ о на́съ Тебѣ́, Влады́цѣ всѣ́хъ, мо́лятся прилѣ́жно.
Сла́ва: Мо́лимъ Тя́, Сло́ве, и́хже отъ на́съ прія́лъ еси́, ли́ку избра́нныхъ Твои́хъ сопричта́въ, прича́стники покажи́ лу́чшаго живота́.
И ны́нѣ, [богоро́диченъ:] Пречи́стая Дѣ́во Ма́ти, похвало́ му́чениковъ, и преподо́бныхъ, и пра́ведныхъ, отъ вся́каго изми́ на́съ мучи́тельства лука́ваго.
Инъ.
Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.
Умерщвле́ныхъ на́съ и положе́ныхъ во тли́, возве́лъ еси́ отъ мра́чныхъ а́довыхъ сокро́вищъ и восхи́тилъ еси́, Бла́же, и сочета́въ святы́хъ а́нгелъ во́инствомъ.
За е́же спасти́ на́съ я́ко прише́лъ еси́, Христе́, пріими́ ны́нѣ и́же благоче́стно къ Тебѣ́ преста́вленныя, я́ко еди́нъ Бла́гъ, на ло́нѣхъ Авраа́ма и съ Ла́заремъ тѣ́хъ всели́.
Сла́ва: Разрѣши́лъ еси́, Влады́ко, лѣ́тную мою́ и до́лгую бра́нь, Тебѣ́ пре́жде Хода́таю и Моли́твеннику примире́нія бы́вшу, и ны́нѣ Твоя́ рабы́ уще́дривъ, упоко́й.
И ны́нѣ, [богоро́диченъ:] Подъ кро́вомъ Твои́мъ, Ма́ти Бо́жія, и́же надѣ́ющіися на Тя́ спаса́ются, Жизнода́вца бо родила́ еси́ на́мъ, животворя́щаго вся́ во́лею.
Пѣ́снь 6.
Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.
Крѣ́постію се́рдца страда́льцы проти́ву врагу́ ополчи́вшеся, того́ низложи́ша и прія́ша побѣ́ды вѣнцы́ отъ Бо́га, и ны́нѣ прилѣ́жно мо́лятся о всѣ́хъ земноро́дныхъ.
Бо́жія святи́тели почти́мъ вѣ́рно и преподо́бныя Его́ ублажи́мъ, спаса́еми мольба́ми и́хъ отъ вся́каго гнѣ́ва, и ско́рби, и вра́жія навѣ́та.
Пострада́ же́нъ боже́ственный ли́къ, и въ постѣ́ Бо́гу угоди́, и получи́ Ца́рство небе́сное. Тѣ́хъ моли́твами уще́дри, Бо́же, Тво́й мíръ.
Сла́ва: Иже созда́вый, Жизнода́вче Христе́, человѣ́ка отъ земли́, и́хже отъ на́съ преста́вилъ еси́, упоко́й, оставле́ніе подая́ и́мъ злы́хъ, я́ко Милосе́рдъ и Человѣколю́бецъ.
И ны́нѣ, [богоро́диченъ:] Свята́я Богоро́дице, освяти́ на́ша помышле́нія, и у́мъ укрѣпи́, и спаси́ на́съ отъ стрѣ́лъ лука́ваго неуя́звленныхъ, сла́вящихъ, Всепѣ́тая, Твоя́ вели́чія.
Инъ.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.
Неизрече́нныя и Боже́ственныя свѣ́тлости, идѣ́же му́ченичестіи ли́цы, сподо́би, я́же отъ земли́ преста́вилъ еси́, вседѣ́тельною Твое́ю во́лею, Человѣколю́бче. [Два́жды.]
Сла́ва: Озари́тися добро́тою сла́вы Твоея́ сподо́би оста́вльшія житіе́, и къ свѣ́ту Твоему́ неизрече́нному, Влады́ко, преше́дшія упоко́й.
И ны́нѣ, [богоро́диченъ:] Избавля́ющи усе́рдно яви́ся призыва́ющія Тя́, Пречи́стая Влады́чице, Яже Бо́га ро́ждшая, живото́мъ и сме́ртію Облада́юща.
Пѣ́снь 7.
Ирмо́съ: Херуви́мы подража́юще, о́троцы въ пещи́ ликовствова́ху, вопію́ще: благослове́нъ еси́, Бо́же, я́ко и́стиною и судо́мъ наве́лъ еси́ сія́ вся́ грѣ́хъ ра́ди на́шихъ, препѣ́тый, и препросла́вленный во вся́ вѣ́ки.
Терпѣ́ніемъ низложи́ша святíи врага́, терпя́ще вся́ко искуше́ніе лю́тыхъ муче́ній, я́ко вои́стинну Бо́га возлюби́ша, Пострада́вшаго за грѣхи́ на́ша. Тѣ́хъ моли́твами спаси́ всѣ́хъ на́съ, Сло́ве, отъ напа́стей и бѣ́дъ, Тебе́ сла́вящихъ.
Свѣтозра́чніи святи́теліе, и преподо́бніи, и проро́цы, и священному́ченикъ достосла́вное мно́жество, и же́нъ святы́хъ свяще́нное сосло́віе, во страда́ніи и въ постѣ́ возсія́вшее му́жески, при́сно о на́съ моле́нія твори́те къ Бо́гу, я́ко да поми́луетъ на́съ.
Му́ченикъ мно́жество мо́литъ Тя́, Христе́ Благода́телю, отъ всѣ́хъ печа́лей, и скорбе́й, и лю́тыхъ напа́стей, и всѣ́хъ прегрѣше́ній, и отъ вре́да спаси́ мя, Сло́ве, поги́бшаго.
Сла́ва: Отню́дуже болѣ́знь отбѣже́, и воздыха́ніе, и печа́ль, идѣ́же свѣ́тъ сія́етъ Твоего́ лица́, Христе́, и идѣ́же святы́хъ собо́ры ны́нѣ лику́ютъ, учини́ всѣ́хъ преста́вльшихся ду́ши къ Тебѣ́, Человѣколю́бче, прегрѣше́нія и́хъ вся́ презрѣ́въ, я́ко еди́нъ Ми́лостивъ.
И ны́нѣ, [богоро́диченъ:] Съ му́ченики, Пречи́стая, и съ преподо́бными отцы́ и проро́ки всѣ́ми, со святы́ми жена́ми во святы́хъ Еди́наго Почива́ющаго умоли́ всѣ́хъ освяти́ти на́съ, святы́ми гла́сы Тя́ славосло́вящихъ, Чи́стая, во вся́ вѣ́ки.
Инъ.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.
Иже вездѣ́ Сы́й, низше́лъ еси́, Го́споди, е́же спасти́ и́же дре́вле прельща́емый человѣ́чь ро́дъ. Тѣ́мже Тя́ му́ченицы мо́лятъ: си́хъ, я́же преста́вилъ еси́ отъ земли́, въ земли́ кро́ткихъ, Спа́се, упоко́й.
Ме́ртвости умерщвле́ніе оттря́слъ еси́, въ ме́ртвыхъ свобо́дь бы́въ, Са́мъ еди́нъ, Христе́. И ны́нѣ умерщвле́нія грѣхо́внаго, Влады́ко, изба́ви рабы́ Твоя́, явля́я и́хъ наслѣ́дники Ца́рствія Твоего́.
Сла́ва: Мно́гимъ Твои́мъ и неизрече́ннымъ милосе́рдіемъ и неизмѣ́рною бе́здною человѣколю́бія Твоего́, Христе́, прегрѣше́ній у́бо оставле́ніе преста́вленнымъ да́ждь, и благода́тію Твое́ю очище́ны си́хъ яви́.
И ны́нѣ, [богоро́диченъ:] Свѣти́льникъ была́ еси́ Боже́ственныя сла́вы, Сія́ніе нося́щи, Дѣ́во, Ду́хомъ, и пло́тію на́мъ Явльшагося, и а́дову мглу́ свѣ́тлостію Божества́ Своего́ Потре́бльша, Богора́дованная.
Пѣ́снь 8.
Ирмо́съ: Въ купинѣ́ Моисе́ю Дѣ́вы чу́до на Сина́йстѣй горѣ́ Прообрази́вшаго иногда́, по́йте, благослови́те и превозноси́те во вся́ вѣ́ки.
Тече́ніе кро́ве ва́шея, страстоте́рпцы Госпо́дни, освяти́ всю́ тва́рь, и изсуши́ я́вѣ излія́ніе пре́лести, и вѣ́рныхъ ду́ши напои́ бога́тно.
Яви́ся ли́къ по́стническій, святи́телей же собо́ръ, и же́нъ святы́хъ, и проро́къ сла́вныхъ, единоче́стенъ а́нгеломъ, а́нгельски на земли́ ду́хомъ пожи́вше.
Изба́вите всѣ́хъ на́съ, страстоно́сцы Госпо́дни, первосвяще́нницы, и проро́цы, и преподо́бныхъ мно́жество и же́нъ святы́хъ, отъ стрѣ́лъ вра́жіихъ, ва́съ восхваля́ющихъ.
Сла́ва: Ихже отъ на́съ, Спа́се, прія́лъ еси́, въ нѣ́дрѣхъ Авраа́мовыхъ учини́ и со всѣ́ми избра́нными упоко́й, подая́ грѣхо́въ и́хъ всѣ́мъ разрѣше́ніе, я́ко Всеще́дръ.
И ны́нѣ, [богоро́диченъ:] Богороди́тельнице Чи́стая, со всѣ́ми святы́ми проро́ки, и му́ченики, и преподо́бными, и святы́ми жена́ми, и священному́ченики, уще́дрити на́съ Спа́са моли́.
Инъ.
Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.
Показа́лъ еси́ на́мъ враго́въ сме́рть схожде́ніемъ Твои́мъ, я́ко Безсме́ртенъ, Боже́ственною же си́лою Твое́ю вхо́ды яви́лъ еси́ живота́, Безсме́ртне, его́же му́ченицы Твои́ ны́нѣ досто́йно получи́ша.
Добро́ты у́мныя Твоея́ наслади́тися преста́вленнымъ сподо́би, сту́дъ грѣха́ злообра́знаго очища́я, я́ко Человѣколю́бецъ, Еди́нъ бо Ты́, Влады́ко, яви́лся еси́ грѣха́ отчужде́нъ.
Сла́ва: Испра́вилъ еси́ на́съ, Христе́, па́дшія въ пе́рсть сме́ртную, сме́ртію Твое́ю живо́тъ да́руя, и пи́щу безконе́чную, и ра́дость присносу́щную, ея́же ны́нѣ преста́вленныя сподо́би, я́ко Ми́лостивъ.
И ны́нѣ, [богоро́диченъ:] Ве́лія и стра́шна е́сть та́йна, Богома́ти, Твоего́ рождества́, Бо́га бо родила́ еси́, Его́же сме́рть не претерпѣ́ и гро́бъ не растли́. Тѣ́мже Тя́, Пречи́стая, вси́ язы́цы сла́вимъ.
Пѣ́снь 9.
Ирмо́съ: Преесте́ственно пло́тію заче́ншую во чре́вѣ, отъ Отца́ безлѣ́тно предвозсія́вшее Сло́во, въ пѣ́снехъ немо́лчныхъ велича́емъ, вѣ́рніи.
Крѣ́пцы на стра́сти, си́льни на враги́ я́вльшеся, страстоте́рпцы, взя́сте побѣ́ду, пострада́вше зако́нно, и вѣнча́стеся отъ Бо́га.
Яко Бо́жіи священнодѣ́лателіе и Па́стыря До́браго подо́бницы бы́вше, упасо́сте Того́ о́вцы преподо́бнѣ, первосвяще́нницы богосла́вніи.
Съ преподо́бными по́стники и проро́ки свяще́нными, почти́мъ же́нъ пострада́вшихъ мно́жество и посто́мъ низложи́вшихъ врага́.
Сла́ва: Пресла́вное мно́жество святы́хъ Твои́хъ, Христе́, непреста́нно мо́лятъ Тя́: и́хже преста́вилъ еси́ въ вѣ́рѣ, Го́споди, прича́стники яви́ вѣ́чнаго живота́.
И ны́нѣ, [богоро́диченъ:] Щедролюби́ваго Бо́га ро́ждшая пло́тію, со святы́ми всѣ́ми моли́ Того́ при́сно отъ бѣ́дъ на́съ спасти́, Ма́ти Дѣ́во Чи́стая.
Инъ.
Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.
Имѣ́яй вла́сть живы́ми и ме́ртвыми, живота́ Нача́льниче, отъ земли́ къ Тебѣ́ преше́дшимъ наслѣ́діе небе́сное пода́ждь, Влады́ко, и свѣ́тлость святы́хъ и пресла́вныхъ страстоте́рпецъ Твои́хъ.
Сло́во Сы́й, е́же дре́вле бы́ти ми́ подая́, живонача́льнѣйшее, и е́же до́брѣ бы́ти па́ки да́руя, въ нѣ́дрѣхъ жела́нныхъ Авраа́ма пра́отца преста́вльшіяся рабы́ Твоя́, я́ко Ми́лостивъ, всели́.
Сла́ва: Ве́сь еси́, Спа́се мо́й, Сла́дость свѣтови́днѣйшая, ве́сь еси́ Жела́ніе ненасыща́емое, пото́ки Твоея́ пи́щи и водо́ю оставле́нія усо́пшія напо́й, непреста́нно Тебе́ сла́вящія.
И ны́нѣ, [богоро́диченъ:] Тя́, Богоро́дице, досто́йно вѣ́рніи ны́нѣ ублажа́емъ, богодохнове́ннымъ словесе́мъ Твои́мъ послѣ́дующе, Ты́ бо Еди́на земны́мъ Бо́га родила́ еси́, сме́рти разо́ршаго си́лу, Ма́ти Дѣ́во.
Та́же: Досто́йно е́сть… Ектенія́, и свѣти́ленъ дне́, и псалмы́ обы́чны.
На хвали́техъ стихи́ры му́ченичны, гла́съ 2:
По Христѣ́ пострада́вше да́же до сме́рти, о страстоте́рпцы му́ченицы, ду́ши у́бо и́мате на небесѣ́хъ въ руцѣ́ Бо́жіей, и по мíру всему́ почита́еми су́ть мо́щи ва́ша: святи́теліе и ца́ріе покланя́ются, и лю́діе вси́, ра́дующеся, согла́сно вопіе́мъ: со́нъ че́стенъ предъ Го́сподемъ сме́рть преподо́бныхъ Его́.
Вся́къ гра́дъ и страна́ чту́тъ мо́щи ва́ша, о страстоно́сцы му́ченицы, вы́ бо зако́нно пострада́вше, вѣнцы́ небе́сныя прія́сте, и сего́ ра́ди святи́телемъ есте́ похвала́, царе́мъ побѣ́да и це́рквамъ благолѣ́піе.
Кре́стъ Христо́въ взе́мше, святíи му́ченицы, ору́жіе непобѣди́мое, всю́ діа́волю си́лу упраздни́ша и прія́ша венцы́ небе́сныя, стѣна́ на́мъ бы́ша, о на́съ при́сно моля́щеся.
Ме́ртвенъ: Увы́ мнѣ́, коли́къ по́двигъ и́мать душа́ разлуча́ющися отъ тѣлесе́! Увы́ мнѣ́, тогда́ коли́ко слези́тъ, и нѣ́сть и́же поми́луетъ ю́! Ко а́нгеломъ о́чи возводя́щи, бездѣ́льно мо́лится, къ человѣ́комъ ру́цѣ простира́ющи и не и́мать помога́ющаго. Тѣ́мже, возлю́бленная моя́ бра́тіе, разумѣ́вше кра́ткую на́шу жи́знь, преста́вленымъ поко́я отъ Христа́ про́симъ и душа́мъ на́шимъ ве́лія ми́лости.
Сла́ва, и ны́нѣ, богоро́диченъ:
Пріиди́те, Ма́терь Свѣ́та, пѣ́сньми немо́лчными зову́ще, вси́ просла́вимъ, Та́ бо ро́ди Спасе́ніе на́ше, и — ра́дуйся! — принесе́мъ, я́ко Еди́ной, ро́ждшей всѣ́хъ Нача́льнѣйшаго, Иже пре́жде вѣ́къ Бо́га; ра́дуйся, Яже Еву па́дшую па́ки назда́вшая; ра́дуйся, Пречи́стая Дѣ́во, Неискусобра́чная.
На стихо́внѣ стихи́ры поко́йны, гла́съ 2. Подо́бенъ: Егда́ отъ Дре́ва Тя́.
Стремле́ніе сме́ртное и тлю́ Твое́ю живоно́сною сме́ртію низложи́лъ еси́, Влады́ко, всѣ́мъ же источи́лъ еси́ живо́тъ вѣ́чный и земны́мъ уме́ршимъ воста́ніе дарова́. Тѣ́мже мо́лимся Тебѣ́, Спа́се: и́же вѣ́рою къ Тебѣ́ преста́вльшіяся, упоко́й и нетлѣ́ннѣй Твое́й сла́вѣ си́хъ сподо́би, Человѣколю́бче.
Сти́хъ: Блаже́ни, я́же избра́лъ и прія́лъ еси́, Го́споди.
Да человѣ́ки о́бщники Боже́ственнаго твоего́ Ца́рствія содѣ́лаеши, Христе́, распя́тіе претерпѣ́лъ еси́ и сме́рть во́льную прія́тъ. Сего́ ра́ди мо́лимся: Твои́мъ милосе́рдіемъ прича́стники яви́ Ца́рствія Твоего́ вѣ́рою къ Тебѣ́ преста́вльшіяся, и сла́дкія добро́ты Твоея́ си́хъ сподо́би, Человѣколю́бче.
Сти́хъ: Ду́ши и́хъ во благи́хъ водворя́тся.
Спасти́ Твое́ созда́ніе восхотѣ́въ, смотре́нія же вои́стинну стра́шное та́инство, ра́дуяся соверши́лъ еси́, я́ко Преблагíй, и цѣно́ю искупи́лъ еси́ ве́сь мíръ, честно́ю Твое́ю Кро́вію. Тѣ́мже мо́лимся: и́же вѣ́рою къ Тебѣ́ преста́вльшіяся, со всѣ́ми святы́ми избавле́нія сподо́би.
Сти́хъ: И па́мять и́хъ въ ро́дъ и ро́дъ.
Гро́зному, тре́петному и стра́шному престо́лу Твоему́, Христе́, предстоя́ще, я́же отъ вѣ́ка уме́ршіи ожида́ютъ пра́веднаго изрече́нія Твоего́ и Боже́ственное пріе́млютъ правосу́діе. Тогда́ у́бо упоко́й, Спа́се, рабы́ Твоя́, вѣ́рою къ Тебѣ́ преста́вльшіяся, идѣ́же святы́хъ ли́цы и ра́дость е́сть неизглаго́ланная.
Сла́ва, и ны́нѣ, богоро́диченъ:
Егда́ плотска́го соу́за хо́щетъ душа́ моя́ отъ житія́ разлучи́тися, тогда́ ми́ предста́ни, Влады́чице, и безпло́тныхъ враго́въ совѣ́ты разори́ и си́хъ че́люсти сокруши́, и́щущихъ пожре́ти мя́ неща́дно, я́ко да невозбра́нно пройду́ на возду́сѣ стоя́щія кня́зи тмы́, Богоневѣ́стная.
Та́же: Бла́го е́сть исповѣ́датися Го́сподеви… И про́чее, и ча́съ 1-й, и отпу́стъ.
ВЪ СУББОТУ, [НА ЛИТУРГІИ,]
Блаже́нна, гла́съ 2:
Гла́съ Ти́ прино́симъ разбо́йничь и мо́лимся: помяни́ на́съ, Го́споди, во Ца́рствіи Твое́мъ.
Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.
Христо́вымъ Страсте́мъ уподо́бльшеся, му́ченицы, стра́сти человѣ́ческія разли́чныя при́сно исцѣля́ете.
Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.
Со проро́ки, апо́столы, со преподо́бными учи́тели, Содѣ́телю всѣ́хъ до́брѣ угоди́ша.
Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.
Со всѣ́ми святы́ми Твои́ми, я́ко Человѣколю́бецъ Го́споди, вся́ и́же вѣ́рою преста́вльшіяся, учини́ рабы́ Твоя́, мо́лимся.
Сла́ва, [тро́иченъ]: О, Тро́ице Пресу́щная, чту́щихъ Тя́ уще́дри, отъ пре́лести вра́жія и сѣ́тей всѣ́хъ избавля́ющи при́сно.
И ны́нѣ, [богоро́диченъ]: Мольбы́ ра́бъ Твои́хъ не пре́зри, Всенепоро́чная, спаса́ющи на́съ отъ вся́кихъ бѣ́дъ и скорбе́й.
Коне́цъ второ́му гла́су.
Примѣчаніе:
[1] Темни́цы.
Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 163 об. – 173 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 