Соверша́ется собо́ръ и́хъ въ Му́ромѣ.
[НА ВЕЧЕРНИ,
На Го́споди воззва́хъ..,] стихи́ры, гла́съ 4. Подо́бенъ: Зва́нный свы́ше.
Пріиди́те, вси́ вѣ́рніи,* духо́вно торжеству́емъ,* пріиди́те и услы́шите,* е́же мы́ обрѣто́хомъ пресла́вно* въ гли́нныхъ сосу́дѣхъ благода́ть кипя́щую,* отъ гро́бъ я́вльшуюся,* блаже́ннаго кня́зя Константи́на* съ ча́ды, Михаи́ломъ и Ѳео́доромъ.* Къ ни́мже вку́пѣ си́це возопіи́мъ:* блаже́нніи и треблаже́нніи, Христу́ моли́теся* о гра́дѣ сро́дствія ва́шего,* спасти́ и просвѣти́ти ду́ши на́ша.
Кто́ не почуди́тся,* или́ кто́ не похва́литъ,* слы́шавъ вели́кую сла́ву,* во всѣ́хъ страна́хъ пресла́вную,* богоспаса́емаго гра́да Му́рома,* велича́ющася и вы́сящася па́че инѣ́хъ градо́въ,* имѣ́юща въ себѣ́ бога́тство неоскудѣва́емо* и сокро́вище неги́блемо,* но́выхъ чудотво́рцевъ,* кня́зя Константи́на прехва́льнаго* съ Михаи́ломъ и Ѳео́доромъ?* Къ ни́мже, моля́щеся, глаго́лемъ:* Христу́ моли́теся* спасти́ и просвѣти́ти ду́ши на́ша.
О, вели́кое и несказа́нное та́инство,* е́же на́мъ откры́ся на похвале́ніе,* во всѣ́хъ страна́хъ!* Аще бо гдѣ́ яви́ся еди́нъ свѣти́льникъ,* мы́ же свы́ше обрѣто́хомъ тріе́хъ, вку́пѣ сія́ющихъ, я́ко со́лнце,* и чудеса́ точа́ща де́нь и но́щь.* Того́ ра́ди къ ни́мъ возопіи́мъ,* си́це глаго́люще:* моли́теся Христо́ви, блаже́нніи,* со всѣ́ми святы́ми Его́* спасти́ и просвѣти́ти ду́ши на́ша.
Сла́ва, гла́съ 6:
Вся́ческая дне́сь испо́лнишася ра́дости и весе́лія, слы́шавше но́вое и пресла́вное чу́до, я́ко гра́ду Му́рому обрѣ́теся сво́й просвѣти́тель, и наста́вникъ, и учи́тель, благовѣ́рный кня́зь Константи́нъ и два́ сы́на его́, Михаи́лъ и Ѳео́доръ, изба́вльше на́съ отъ пре́лести и́дольскія, просвѣти́ша святы́мъ креще́ніемъ. Къ ни́мже вку́пѣ рце́мъ, сликовству́юще, си́це: се́ вре́мя благопрія́тно, се́ де́нь спасе́нія, се́ цѣльба́мъ рѣ́ки точа́хуся непреста́нно. Тѣ́мъ, Христу́ моля́щеся, та́ко вопіе́мъ: Го́споди, моли́твами святы́хъ Твои́хъ поми́луй на́съ.
И ны́нѣ, пра́здника.
Вхо́дъ. Проки́менъ дне́. И чте́нія 3 [пи́саны сего́ мѣ́сяца во 8 де́нь.][Собо́рнаго посла́нія Іоа́ннова чте́ніе. [Главы́ 3 и 4.]
Возлю́бленніи, а́ще се́рдце на́ше не за́зритъ на́мъ, дерзнове́ніе и́мамы къ Бо́гу. И его́же, а́ще про́симъ, пріе́млемъ отъ Него́, я́ко за́повѣди Его́ соблюда́емъ и уго́дная предъ Ни́мъ твори́мъ. И сія́ е́сть за́повѣдь Его́, да вѣ́руемъ во и́мя Сы́на Его́ Іису́са Христа́ и лю́бимъ дру́гъ дру́га, я́коже да́лъ е́сть за́повѣдь на́мъ. И соблюда́яй за́повѣди Его́, въ Не́мъ пребыва́етъ, и То́й въ не́мъ, и о се́мъ разумѣ́емъ, я́ко пребыва́етъ въ на́съ, отъ Ду́ха, Его́же да́лъ е́сть на́мъ. Возлю́бленніи, не вся́кому ду́ху вѣ́руйте, но искуша́йте ду́хи, а́ще отъ Бо́га су́ть, я́ко мно́зи лжепроро́цы изыдо́ша въ мíръ. О се́мъ познава́йте Ду́ха Бо́жія и ду́ха ле́стча: вся́къ ду́хъ, и́же исповѣ́дуетъ Іису́са Христа́, во пло́ти прише́дша, отъ Бо́га е́сть. И вся́къ ду́хъ, и́же не исповѣ́дуетъ Іису́са Христа́, во пло́ти прише́дша, отъ Бо́га нѣ́сть, и се́й е́сть анти́христовъ, его́же слы́шасте, я́ко гряде́тъ, и ны́нѣ въ мíрѣ е́сть уже́. Вы́ отъ Бо́га есте́, ча́дца, и побѣди́сте тѣ́хъ, я́ко бо́лій е́сть Иже въ ва́съ, не́жели и́же въ мíрѣ. Они́ отъ мíра су́ть, сего́ ра́ди отъ мíра глаго́лютъ, и мíръ тѣ́хъ послу́шаетъ. Мы́ отъ Бо́га есмы́: и́же зна́етъ Бо́га, послу́шаетъ на́съ, и и́же нѣ́сть отъ Бо́га, не послу́шаетъ на́съ.
Собо́рнаго посла́нія Іоа́ннова чте́ніе. [Глава́ 4.]
Возлю́бленніи, а́ще си́це возлюби́лъ е́сть на́съ Бо́гъ, и мы́ до́лжни есмы́ дру́гъ дру́га люби́ти. Бо́га никто́же нигдѣ́же ви́дѣ. Аще дру́гъ дру́га лю́бимъ, Бо́гъ въ на́съ пребыва́етъ, и любы́ Его́ соверше́нна е́сть въ на́съ. О се́мъ разумѣ́емъ, я́ко въ Не́мъ пребыва́емъ, и То́й въ на́съ, я́ко отъ Ду́ха Своего́ да́лъ е́сть на́мъ. И мы́ ви́дѣхомъ и свидѣ́тельствуемъ, я́ко Оте́цъ посла́ Сы́на Спаси́теля мíру. Иже а́ще исповѣ́сть, я́ко Іису́съ е́сть Сы́нъ Бо́жій, Бо́гъ въ не́мъ пребыва́етъ, и то́й въ Бо́зѣ. И мы́ позна́хомъ, и вѣ́ровахомъ, любо́вь ю́же и́мать Бо́гъ въ на́съ. Бо́гъ Любы́ е́сть, и пребыва́яй въ любви́ въ Бо́зѣ пребыва́етъ, и Бо́гъ въ не́мъ пребыва́етъ.
Собо́рнаго посла́нія Іоа́ннова чте́ніе. [Главы́ 4 и 5.]
Возлю́бленніи, а́ще кто́ рече́тъ, я́ко люблю́ Бо́га, а бра́та своего́ ненави́дитъ, ло́жъ е́сть, и́бо не любя́й бра́та своего́, его́же ви́дѣ, Бо́га, Его́же не ви́дѣ, ка́ко мо́жетъ люби́ти? И сію́ за́повѣдь и́мамы отъ Него́, да любя́й Бо́га лю́битъ и бра́та своего́. Вся́къ вѣ́руяй, я́ко Іису́съ е́сть Христо́съ, отъ Бо́га рожде́нъ е́сть; и вся́къ любя́й Ро́ждшаго лю́битъ и Рожде́ннаго изъ Него́. О се́мъ вѣ́мы, я́ко лю́бимъ ча́да Бо́жія, егда́ Бо́га лю́бимъ и за́повѣди Его́ соблюда́емъ. Сія́ бо е́сть любы́ Бо́жія, да за́повѣди Его́ соблюда́емъ, и за́повѣди Его́ тя́жки не су́ть. Яко вся́къ рожде́нный отъ Бо́га побѣжда́етъ мíръ, и сія́ е́сть побѣ́да, побѣ́ждшая мíръ, вѣ́ра на́ша. Кто́ е́сть побѣжда́яй мíръ? То́кмо вѣ́руяй, я́ко Іису́съ е́сть Сы́нъ Бо́жій.]
На стихо́внѣ стихи́ры, гла́съ 3. Подо́бенъ: Ве́лія Креста́.
Велича́вый паде́ся, и рыда́ютъ вся́ лука́вая его́ во́инства, ви́дяще вѣ́твь су́щую, всели́чною си́лою Боже́ственною благоприсажда́ему, и прославля́ему, и свѣ́тло вѣнчава́ему отъ Бо́га, вели́каго кня́зя Константи́на, нача́льника на́шего.
Сти́хъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.
Жестосе́рдіи Бо́га не разумѣ́ша, и́же вотще́ шата́хуся; отъ лица́ же дне́сь Михаи́ла и Ѳео́дора Це́рковь и́хъ весели́тся и ра́дуется, Христо́съ бо поста́ви и́хъ кня́зи земли́ Свое́й.
Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.
Вторы́й ты́ бы́лъ еси́ Константи́нъ ца́рь, дѣ́ломъ, и сло́вомъ, и и́менемъ, и но́вому уподо́бился еси́ Влади́міру. Та́кожде израсти́лъ еси́ на́мъ двѣ́ о́трасли, Михаи́ла и Ѳео́дора, съ ни́миже моли́ о на́съ Христа́, кня́же Константи́не, Человѣколю́бца.
Сла́ва, гла́съ 8:
Яко Тро́ицѣ побо́рницы, Михаи́лъ и Ѳео́доръ, да похва́лятся со отце́мъ и́хъ, со кня́земъ Константи́номъ вку́пѣ, сицевы́ми глаго́лы: ра́дуйся, Михаи́ле, Му́ромская похвало́; ра́дуйся, вѣ́рныхъ прави́телю, Ѳео́доре блаже́нне; ра́дуйся, кня́же Константи́не, наста́вниче на́шъ, и вѣ́ры на́шея храни́телю, и притека́ющихъ къ тебѣ́ приста́нище ти́хое; ра́дуйся, ко́реню вѣ́ры и моле́бниче моля́щихся тебѣ́ и велича́ющихъ тя́ вѣ́рно.
И ны́нѣ, пра́здника.Тропа́рь, гла́съ 4:
Константи́нъ дне́сь ве́село ликовству́етъ, предстоя́ престо́лу Святы́я Тро́ицы, ви́дя оте́чествіе свое́, ма́стію духо́вною сія́ющее; ему́же послѣ́доваша Михаи́лъ и Ѳео́доръ, сы́нове его́, и мо́лятся вси́ тріе́ вку́пѣ о душа́хъ на́шихъ.
НА УТРЕНИ,
По 1-й стихоло́гіи сѣда́ленъ пра́здника.
По 2-й стихоло́гіи сѣда́ленъ святы́хъ, гла́съ 1. Подо́бенъ: Гро́бъ Тво́й.
Го́рдаго змíя, на не́бо положи́вшаго уста́ и зе́млю потреби́ти хва́лящагося, сла́вный кня́зь Константи́нъ, святы́мъ креще́ніемъ посрами́въ, вѣ́ру утверди́ и це́ркви воздви́же въ сла́ву Христа́ Бо́га на́шего. [Два́жды.]
Сла́ва, и ны́нѣ, пра́здника или́ богоро́диченъ:
Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.
По поліеле́и сѣда́ленъ, гла́съ 2. Подо́бенъ: Боже́ственныя вѣ́ры.
Дне́сь а́нгели Бо́жіи ра́дуются на небесѣ́хъ, въ пресвѣ́тлую па́мять твою́, кня́же Константи́не сла́вне: спа́слъ бо еси́ отъ вся́каго лука́вствія и же́ртвъ де́монскихъ гра́дъ и лю́ди. И ны́нѣ моли́ съ ча́ды Христа́ Бо́га дарова́ти на́мъ ве́лію ми́лость. [Два́жды.]
Сла́ва, и ны́нѣ, богоро́диченъ:
Ра́дуйся, Дѣ́во Ма́ти, горо́ свята́я, Еде́мскій раю́, изъ Нея́же роди́ся Христо́съ Бо́гъ, Безсѣ́менное Сло́во, Имже жи́знь мíрови прозябе́.
Степе́нна, 1-й антифо́нъ 4-го гла́са. Проки́менъ, [гласъ 4]: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Вся́кое дыха́ніе… Ева́нгеліе Іоа́нна, зача́ло 36.
По 50-мъ псалмѣ́ стихи́ра, гла́съ 6:
Ве́тхую пре́лесть бѣсо́вскую прогна́въ, я́ко Христо́въ уго́дникъ, и, обнови́въ, просвѣти́лъ еси́ всѣ́хъ на́съ святы́мъ креще́ніемъ, царю́ Константи́ну и кня́зю Влади́міру поревнова́въ. Сего́ ра́ди немо́лчно вопіе́мъ ти́ си́це: ра́дуйся, кня́же Константи́не пресла́вне Му́ромскій, израсти́вый на́мъ двѣ́ о́трасли прече́стны, кня́зя Михаи́ла и кня́зя Ѳео́дора, съ ни́миже моли́ся ны́нѣ Христу́ Бо́гу о душа́хъ на́шихъ.
Кано́нъ, творе́ніе господи́на мона́ха Михаи́ла Но́ваго, гла́съ 4.
Пѣ́снь 1.
Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.
Воспою́ Ти́, Го́споди Бо́же мо́й, пѣ́снь духо́вную, сла́вя кня́зя Константи́на Му́ромскаго съ ча́ды, Михаи́ломъ и Ѳео́доромъ вку́пѣ.
Иже да́руя сѣ́мена сѣ́ющему, Ты́ мнѣ́ да́руй благода́ти ра́зумъ, и, разрѣши́въ сою́зъ язы́ка, обнови́ мя́, Спа́се, къ славосло́вію блаже́нныхъ Твои́хъ.
Избра́лъ е́сть Влады́ка Своему́ ста́ду Христо́съ кро́ткаго царя́ Изра́илю; То́йже и тебе́ избра́лъ е́сть, вѣ́рнаго кня́зя но́вому Изра́илю.
Богоро́диченъ: Невѣ́стникъ свѣтови́денъ показа́ся чре́во Твое́, Отрокови́це, за милосе́рдіе изъ Тебе́ Вопло́щшагося и всѣ́хъ богоразу́мія заре́ю просвѣти́вшаго.
Пѣ́снь 3.
Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.
Пріиди́те, цѣлому́дрія рачи́тели, честну́ю тро́ицу почти́мъ, Михаи́ла и Ѳео́дора, съ Константи́номъ вку́пѣ, Святу́ю Тро́ицу возлюби́вшія чи́стымъ се́рдцемъ и душе́ю соверше́нною.
Отъ ко́рене че́стна изра́стше, сла́вніи, бра́тія благоро́дніи, Михаи́ле и Ѳео́доре, помоли́теся со отце́мъ ва́шимъ, кня́земъ Константи́номъ, Христу́ Бо́гу о творя́щихъ па́мять ва́шу.
Пріиди́те, новокреще́нніи Россíйстіи собо́ри, цѣлу́йте любе́зно честну́ю ра́ку блаже́ннаго Константи́на кня́зя, пе́рваго просвѣти́теля пресла́внаго гра́да Му́рома.
Богоро́диченъ: Тя́ Предста́тельницу тве́рду, Богороди́тельнице, стяжа́хомъ, и, упова́ніе на Тя́ возло́жше, спаса́емся, и, къ Тебѣ́ прибѣга́юще, огражда́емся.
Сѣда́ленъ, гла́съ 2. Подо́бенъ: Вели́чія Твоя́.
Спаса́я пре́жде Госпо́дь Изра́иля отъ рабо́ты, То́йже и ны́нѣ руко́ю кня́зя Константи́на съ ча́ды всѣ́хъ на́съ отъ пре́лести и́дольскія изба́ви. Тѣ́мже, моля́щеся, вопіе́мъ къ ни́мъ си́це: моли́те, блаже́нніи, спасти́ся на́мъ. [Два́жды.]
Сла́ва, и ны́нѣ, богоро́диченъ:
Ма́ти Свята́я Неизрече́ннаго Свѣ́та, а́нгельскими Тя́ пѣ́сньми почита́юще, благоче́стно велича́емъ.
Пѣ́снь 4.
Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.
Еле́ны ты́ но́выя, и Константи́на правовѣ́рнаго, и Влади́міра прехва́льнаго вожделѣ́въ добродѣ́тели, Константи́не кня́же досточу́дне, ны́нѣ зове́ши съ ча́ды твои́ми: сла́ва си́лѣ Твое́й, Го́споди.
Лю́то двиза́шеся льсте́цъ христіа́ны воева́ти, превели́кій же Госпо́дь показа́ тя́ сла́вна святы́мъ креще́ніемъ, тобо́ю бо оте́чество твое́ просвѣти́вшися отъ Него́, Иже тебѣ́ Ца́рство Свое́ подаде́.
Всеусе́рдно послѣ́дуя оте́ческимъ стопа́мъ, ревни́теля иму́ща до́брому, Михаи́ле сла́вне, Ѳео́дора, при́снаго бра́та твоего́: благоче́стіемъ бо совоку́плени душа́ми и тѣлесы́ яви́стеся.
Богоро́диченъ: Воплоще́нна Тя́, Го́споди, отъ Неискусобра́чныя Отрокови́цы возжелѣ́вше, въ воню́ мѵ́ра Твоего́ потеко́ша оте́цъ съ ча́ды, Твои́мъ снѣда́еми Боже́ственнымъ любле́ніемъ.
Пѣ́снь 5.
Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.
Отъ безбо́жныхъ и́долъ вся́ изба́вилъ еси́ и ко Христу́ Бо́гу приве́лъ еси́, о́тче, вѣ́рныя кня́зи, ча́да твоя́, Михаи́ла и Ѳео́дора, и вся́ лю́ди но́выя гра́да Му́рома, Константи́не.
Яко отца́ благочести́ва любо́вію свя́зани и того́ лю́бяще благоче́стно, свѣ́тлостію въ ва́шемъ оте́чествіи сія́ете, я́ко со́лнце, Михаи́ле вку́пѣ и Ѳео́доре.
Константи́нъ ты́ но́вый яви́лся еси́, Влади́міру подо́бяся, извѣсти́лся еси́ вселе́ннѣй, отъ всѣ́хъ бо родо́въ тя́ Бо́гъ избра́въ пре́жде вѣ́къ въ послѣ́днія дни́, кня́же.
Богоро́диченъ: Тя́ ору́жіе непобѣди́мое на враги́ предлага́емъ, Тя́, основа́ніе и наде́жду на́шего спасе́нія, Богоневѣ́стная, и́мамы.
Пѣ́снь 6.
Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.
Царю́ Вѣ́чному ны́нѣ ты́ предстои́ши, кня́же Константи́не, десни́цею Его́ вѣнча́нъ еси́, помоли́ся Ему́ за ны́, недосто́йныя.
Юношески хра́бровавше, му́жески пре́лесть возненави́дѣсте мра́чныхъ и́доловъ, о́тчее наказа́ніе пріи́мше, веселите́ся ны́нѣ.
Константи́нъ кня́зь пѣ́тъ да бу́детъ съ Михаи́ломъ сла́внымъ и съ Ѳео́доромъ чу́днымъ, яви́шася бо просвѣти́тели и храни́тели гра́ду на́шему.
Богоро́диченъ: Всю́ Тя́, голуби́цу предо́бру, и свѣ́телъ кри́нъ, обрѣ́тъ, и удо́льный цвѣ́тъ, о Богома́ти, Жени́хъ мы́сленный въ Тя́ всели́ся.
Конда́къ, гла́съ 8. Подо́бенъ: Взбра́нной.
Изря́дному воеводѣ́ и правовѣ́рному кня́зю Константи́ну съ сыно́ма его́ вку́пѣ оте́чество его́, хва́лящеся, вопіе́тъ, имѣ́ющее его́ нача́льника и засту́пника, я́ко изба́вльшееся и́мъ отъ пре́лести и скве́рны и́дольскія. Сего́ ра́ди вопіе́мъ ему́ си́це: ра́дуйся, кня́же Константи́не преблаже́нне.
Икосъ:
Ангелъ, пло́тію одѣ́янъ, на земли́ яви́ся, по́сланъ отъ Бо́га угото́вати боже́ственный пра́вый пу́ть, и́же соверши́ си́лою Госпо́днею. Дивля́хуся бо и ра́довахуся небе́сніи чи́нове и вопія́ху съ земны́ми си́це: ра́дуйся, его́же ра́ди вѣ́ра Госпо́дня провозсія́; ра́дуйся, пра́выя вѣ́ры укрѣпи́телю; ра́дуйся, беззако́нныя ле́сти потреби́телю; ра́дуйся, высото́ добродѣ́тели, до небесе́ досяза́ющая; ра́дуйся, позна́вый Святу́ю Богоро́дицу Марíю; ра́дуйся, я́ко еси́ вѣ́рнымъ кня́зь; ра́дуйся, ми́лостынею Бо́га одолжи́вый; ра́дуйся, свѣще́, тму́ просвѣща́ющая; ра́дуйся, со́лнце, осуша́ющо невѣ́ріе; ра́дуйся, я́ко, тобо́ю наставля́еми, покланя́емся своему́ Творцу́; ра́дуйся, кня́же Константи́не преблаже́нне.
Пѣ́снь 7.
Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.
Ясныя звѣ́зды, на тве́рди небе́снѣй водрузи́вшеся, Тро́ицы равночи́сленніи, кня́зь Константи́нъ съ ча́ды, зе́млю чудесы́ неле́стно просвѣща́ютъ.
Яко но́вая вѣ́твь ко́рене богонасажде́нна, кня́зь Константи́нъ но́вый Влади́міръ яви́ся: я́коже бо о́нъ, израсти́ двѣ́ о́трасли, Рома́на и Дави́да, се́й же — Михаи́ла и Ѳео́дора.
Пресла́вно просла́вися Бо́жія благода́ть самобра́тнею любо́вію Михаи́ла и Ѳео́дора, я́ко и по сме́рти неразлу́чни бѣ́ху, но и ду́ши и тѣлеса́ вку́пѣ иму́ща, лежа́тъ.
Богоро́диченъ: Преукра́шена Бо́жіею сла́вою яви́лася еси́, Чи́стая, еди́на отъ вѣ́ка, Сло́во Бо́жіе пріе́мши, Дѣ́во Ма́ти. Тѣ́мже благослове́нна Ты́ въ жена́хъ, Пренепоро́чная Влады́чице.
Пѣ́снь 8.
Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.
Разу́мно житіе́ соверша́я, ца́рскимъ вѣнце́мъ отъ ю́ности укра́шенъ, всесла́вный кня́же Константи́не, ве́лія сла́ва еси́ твоему́ оте́честву и похвала́.
Со́лнца свѣтлѣ́йши яви́ся па́мять ва́ша, блаже́нніи, блиста́ющи благода́тію Свята́го Ду́ха, ва́съ пою́щихъ, Михаи́ле и Ѳео́доре, со отце́мъ Константи́номъ вку́пѣ.
На земли́ у́бо положе́ни бы́сте, я́ко ме́ртви, но на небеси́ ликовству́ете со а́нгелы, вели́кихъ даро́въ отъ Христа́ сподо́бльшеся, ду́хи нечи́стыя и болѣ́зни прогони́ти.
Богоро́диченъ: Изба́ви страсте́й душепа́губныхъ и плени́цы прегрѣше́ній расто́ргни, и́миже соплето́хомся: вси́ бо, согрѣ́шшіи, очище́нія про́симъ, пода́ти, Богоро́дице, мольба́ми Твои́ми свобо́ду.
Пѣ́снь 9.
Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.
Ли́цы люде́й россíйскихъ предстоя́тъ ти́ ны́нѣ съ людьми́ правовѣ́рными, моля́щеся прилѣ́жно, кня́же Константи́не прему́дре, помоли́ся о всѣ́хъ на́съ Вседержи́телю Бо́гу, въ Тро́ицѣ Того́ велича́ющихъ.
Сы́нове Россíйстіи, пріиди́те, стеце́мся къ пречестнѣ́й це́ркви но́выхъ чудотво́рцевъ, кня́зя Константи́на, уго́дника Христо́ва, и сыно́въ его́, Михаи́ла и Ѳео́дора, и похва́льными пѣ́сньми си́хъ возвели́чите.
Возше́дъ ны́нѣ, къ Нему́же возжелѣ́лъ еси́, очи́стивъ лю́ди твоя́ отъ идолослуже́нія и просвѣти́въ святы́мъ креще́ніемъ, хваля́ся, пое́ши, кня́же Константи́не, съ ча́ды, си́це глаго́ля: се́ а́зъ, Го́споди, и дѣ́ти моя́.
Богоро́диченъ: Пло́тію пріити́ восхотѣ́въ, украси́вый сло́вомъ вся́, и Тя́, еди́ну Святѣ́йшу всѣ́хъ обрѣ́тъ, Богоро́дицу показа́ и́стинную, Ма́ти Дѣ́во, Его́же съ Тобо́ю вси́ велича́емъ.
Свѣти́ленъ. Подо́бенъ: Посѣти́лъ ны́ е́сть.
Пріиди́те, вси́ вѣ́рніи, похвала́ми, соше́дшеся, возвели́чимъ кня́зя Константи́на съ Михаи́ломъ и Ѳео́доромъ. Сíи бо яви́шася Тро́ицы равночи́сленніи и а́нгеломъ ссе́льницы, съ ни́миже мо́лятся ны́нѣ Ей о душа́хъ на́шихъ. [Два́жды.]
На хвали́техъ стихи́ры на 4, гла́съ 6. Подо́бенъ: Все́ отло́жше.
Кре́стъ, я́ко ору́жіе,* держа́вно рука́ма нося́,* вѣ́ру, я́ко щи́тъ,* наде́жду, я́ко броня́,* любо́вь, я́ко лу́къ,* вооружи́лся еси́ на пре́лесть му́жески* и вся́ лю́ди твоя́ научи́лъ еси́* покланя́тися Еди́ному Бо́гу въ Тро́ицѣ.* Ему́же со дерзнове́ніемъ,* кня́же Константи́не съ ча́ды,* моли́ся о душа́хъ на́шихъ. [Два́жды.]
Бога́тство оста́вльше земно́е,* оте́ческому послѣ́довасте благоче́стію,* Михаи́ле блаже́нне* съ Ѳео́доромъ сла́внымъ,* и, сла́ву тлѣ́ющую* нивочто́же вмѣни́вше,* Вы́шняго наслѣ́дія сподо́бистеся,* и та́мо со а́нгелы* предстоите́ Святѣ́й Тро́ицѣ,* Ейже со дерзнове́ніемъ моли́теся* о душа́хъ на́шихъ.
Апо́столомъ единоревни́теля,* сего́ кня́зя Константи́на прехва́льнаго,* отца́ и учи́теля* гра́да Му́рома, соше́дшеся, восхва́лимъ,* отъ тмы́ къ свѣ́ту прибли́жившеся,* о́чи и сердца́ очи́стивше,* па́мять его́ воспое́мъ,* обрѣ́тше того́ съ ча́ды* правовѣ́рна вожда́ въ Ца́рство небе́сное.
Сла́ва, гла́съ 6:
Ра́достно вси́ пра́зднующе дне́сь па́мять блаже́нныхъ, пѣ́сньми си́хъ и хвала́ми просла́вимъ и Спа́са Христа́ Бо́га возвели́чимъ, Иже на земли́ удиви́ си́хъ чудесы́ и цѣльба́ми пресла́вными. Къ ни́мже взыва́юще, си́це глаго́лемъ: ра́дуйтеся, блаже́нніи, благода́ть отъ Бо́га пріе́мше вся́ стра́сти и болѣ́зни исцѣля́ти; ра́дуйся, Константи́не чу́дне съ Михаи́ломъ сла́внымъ и Ѳео́доромъ вели́кимъ, Христу́ Бо́гу моля́щеся изба́витися на́мъ отъ вра́гъ ви́димыхъ и неви́димыхъ и спасти́ся душа́мъ на́шимъ.
И ны́нѣ, богоро́диченъ.
НА ЛИТУРГІИ,
Слу́жба, пи́сана царю́ Константи́ну:
[Блаже́нна пра́здника, пѣ́снь рядова́я, и святы́хъ, пѣ́снь 6-я, на 4. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Гала́томъ, зача́ло 200. Аллилу́ія, гла́съ 1: Вознесо́хъ избра́ннаго отъ люде́й Мои́хъ. Сти́хъ: Го́споди, си́лою Твое́ю возвесели́тся ца́рь и о спасе́ніи Твое́мъ возра́дуется зѣло́. Ева́нгеліе Іоа́нна, зача́ло 35, отъ полу́. Прича́стенъ: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ].
Источникъ: Минíа, мѣ́сяцъ Ма́ій. — Кíевъ: Въ тѵпогра́фіи Кíево-Пече́рской Ла́вры, 1893. — Л. 176 – 181.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.