НА МАЛѢЙ ВЕЧЕРНИ,
[На Го́споди воззва́хъ..,] стихи́ры на 4, гла́съ 1. Подо́бенъ: Небе́сныхъ чино́въ.
Добродѣ́телію боже́ственною,* преблаже́нне Дими́тріе,* на небе́сныя сла́вныя кру́ги возше́лъ еси́,* не во мра́цѣ заше́дъ невѣ́дѣнія,* но въ благода́ти Боже́ственнѣй яви́лся еси́,* пріе́мля неизрече́нная сія́нія. [Два́жды.]
Умо́мъ просвѣще́ннымъ,* ду́шу твою́, о́тче, просвѣти́въ, освяти́лся* и отъ земны́хъ преста́вился еси́ въ Христо́во Ца́рствіе, Дими́тріе преблаже́нне.* Въ по́стницѣхъ ты́ свѣ́телъ яви́лся еси́,* пи́щи нестарѣ́емыя ны́нѣ насыща́яся,* Боже́ственною сла́вою облиста́емь.
Тро́ица Безнача́льная и Единосу́щная,* яви́ тя́ Себѣ́ селе́ніе, богоно́се Дими́тріе,* и показа́ тя́ пресвѣ́тла свѣти́льника.* Отъ жите́йскихъ мяте́жей уклони́лся еси́ се́рдцемъ* и житіе́ съ небе́сными пріобрѣ́лъ еси́.
Сла́ва, гла́съ 3:
Преподо́бне о́тче Дими́тріе, крѣ́пкимъ поще́ніемъ и жесто́кимъ воздержа́ніемъ, по́томъ и труды́ стезю́ сію́ соверши́лъ еси́ и, я́ко въ сла́достехъ, почива́еши, ра́дуяся, ева́нгельски же моли́твою и посто́мъ полки́ де́монскія прогоня́еши. Тѣ́мже со а́нгелы водворя́ешися во Ца́рствіи небе́снѣмъ и ны́нѣ Христа́ Бо́га моли́ о вѣ́рою хва́лящихъ всечестну́ю па́мять твою́.
И ны́нѣ, богоро́диченъ:
[Богоро́дице, Предста́тельнице всѣ́хъ, моля́щихся Тебѣ́, Тобо́ю дерза́емъ и Тобо́ю хва́лимся, и къ Тебѣ́ все́ упова́ніе на́ше е́сть, моли́ Ро́ждшагося изъ Тебе́ за непотре́бныя рабы́ Твоя́].
На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
Яко преходя́щую жи́знь,* я́же на земли́, презрѣ́лъ еси́, блаже́нне,* тѣ́мъ сподо́бился еси́* улучи́ти жи́зни Боже́ственныя* и Того́ прія́лъ еси́ сія́ніе, богоно́се.
Сти́хъ: Честна́ предъ Го́сподемъ* сме́рть преподо́бныхъ Его́.
Любве́ ра́ди Христо́вы,* преподо́бне Дими́тріе,* пло́ти рачи́тельное умертви́лъ еси́ мудрова́ніе* и ду́шу, отъ страсте́й свобо́дну,* Бо́гови предста́вилъ еси́.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Бо́дренными моли́твами* и сле́зными исто́чники* Це́ркви вѣ́рныхъ* обогати́лъ еси́,* богоблаже́нне.
Сла́ва, и ны́нѣ, богоро́диченъ:
Вы́шніи Тя́ ли́цы,* Богоро́дице Дѣ́во,* пою́тъ съ ни́жними,* сла́вяще непреста́нно* Рождество́ Твое́ Пречестно́е.
Тропа́рь пи́санъ на вели́цѣй вече́рни.
НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ].
На Го́споди воззва́хъ.., поста́вимъ стихо́въ 8 и пое́мъ стихи́ры, гла́съ 2. Подо́бенъ: Егда́ отъ дре́ва.
Свѣти́ло вели́кое яви́ся на́мъ дне́сь, мíръ весь просвѣща́юще богодарова́нными чудесы́, о́тче преподо́бне. Якоже исто́чникъ неисчерпа́емый показа́лся еси́, я́ко струи́ чуде́съ то́чиши исцѣле́нія вѣ́рою приходя́щимъ ти́, блаже́нне, и припа́дающимъ ко гро́бу твоему́ свято́му: да́руеши же душа́мъ и тѣлесе́мъ здра́віе неоску́дно, боля́щимъ вели́кое врачева́ніе, чудотво́рче о́тче на́шъ Дими́тріе, и о на́съ ны́нѣ моли́ся ко Спа́су Христу́, пра́зднующихъ вѣ́рою че́стную па́мять твою́. [Два́жды.]
Сла́вы и че́сти ны́нѣшнія не восхотѣ́въ, того́ ра́ди оста́вилъ еси́ твое́ оте́чество и, о Бо́зѣ вся́чески въ мíрѣ просла́вився, чудотво́рецъ яви́лся еси́. Отту́ду бо отбѣжа́въ, въ пусты́ни при вода́хъ пре́былъ еси́, и па́ки посреди́ мíра по́жилъ еси́, уедини́вся душе́ю, блаже́нне, отъ мірски́хъ и Бо́жіею благода́тію оби́тель соста́вивъ, въ не́йже, потруди́вся, преста́вился еси́, идѣ́же лежа́тъ честны́я мо́щи твоя́. Бо́гу бо тя́ па́че прославля́ющу, ты́ же, исцѣле́нія отъ Него́ прося́ приходя́щимъ ти́ съ вѣ́рою, блаже́нне, и на́съ ны́нѣ не забу́ди въ моли́твахъ ко Христу́, Спаси́телю на́шему.
На земли́, я́ко а́нгелъ, по́жилъ еси́ въ тѣлеси́, души́ пло́ть повину́лъ еси́, поще́ніемъ же и воздержа́ніемъ мно́гимъ свѣтлообра́зенъ всегда́ явля́яся, украси́бося душе́ю, блаже́нне, Святѣ́й Тро́ицѣ оби́тель тебе́ содѣ́лалъ еси́. И дарова́нія чуде́съ сподо́бися, больны́я и прокаже́нныя исцѣля́я и стра́ждущимъ отъ духо́въ нечи́стыхъ проще́ніе подава́я, и на́съ изба́ви отъ вра́гъ ви́димыхъ и неви́димыхъ всегда́, пра́зднующихъ святу́ю па́мять твою́.
Ины стихи́ры, гла́съ 8. Подо́бенъ: О, пресла́внаго чудесе́!
Преподо́бне о́тче Дими́тріе,* ты́ ева́нгельски Го́спода Бо́га возлюби́лъ еси́,* боже́ственное Его́ и́го* на ра́мена своя́ взя́лъ еси́* и Кре́стъ Госпо́день я́ко ле́гкое Его́ бре́мя поне́слъ еси́,* не возвраща́яся на сла́сти вре́менныя,* и бы́лъ еси́ упра́вленъ въ Ца́рствіе Бо́жіе.* Тѣ́мже и ны́нѣ непреста́нно Христа́ моли́* спасти́ся душа́мъ на́шимъ. [Два́жды.]
Преподо́бне о́тче Дими́тріе,* твоему́ Влады́цѣ Христу́ подража́тель бы́лъ еси́,* я́ко бо благода́ть Свята́го Ду́ха прія́лъ еси́,* та́ко и подае́ши исцѣле́ніе неду́гующимъ,* разсла́бленныя моли́твами твои́ми къ Бо́гу* сотворя́еши здра́вы.* И бы́лъ еси́ мона́хомъ похвала́ и утвержде́ніе* и моле́бникъ ко Спа́су* о всѣ́хъ, къ тебѣ́ притека́ющихъ.
Преподо́бне о́тче Дими́тріе,* бу́дущія ра́ди жи́зни* до́блественнѣ моли́твою и посто́мъ* Бо́гу угоди́лъ еси́* и неви́димыхъ вра́гъ шата́нія и ко́зни попра́лъ еси́,* си́лою Креста́ Христо́ва укрѣ́плься,* тѣ́мже и по сме́рти ны́нѣ, ра́дуяся, живе́ши.* Сего́ ра́ди и мы дне́сь вопіе́мъ ти́, блаже́нне:* мо́ли Христа́ Бо́га спасти́ся душа́мъ на́шимъ.
Сла́ва, гла́съ 8:
Укра́шенъ добродѣ́тельми духо́вными, преподо́бне о́тче на́шъ Дими́тріе, просла́ви бо тя́ Госпо́дь Бо́гъ житіе́мъ же и чудесы́, въ преставле́ніи же твое́мъ ду́ши вѣ́рныхъ облагоуха́лъ еси́ и тѣлеса́. И ны́нѣ, блаже́нне, и на́съ моли́твами твои́ми очи́сти отъ вся́кихъ грѣхопаде́ній, пра́зднующихъ святу́ю па́мять твою́ и со стра́хомъ и любо́вію припа́дающихъ къ твоему́ гро́бу чудотво́рному, о́бразъ подо́бія твоего́ любе́зно цѣлу́юще. Не преста́й моля́ся за Благовѣ́рнаго Импера́тора на́шего и за твое́ ста́до богозва́нное, я́ко да ми́лостивый Госпо́дь спасе́тъ ду́ши на́ша.
И ны́нѣ, богоро́диченъ:
Ца́рь Небе́сный [за человѣколю́біе на земли́ яви́ся и съ человѣ́ки поживе́. Отъ Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего. Его́же моли́, Ма́ти Безневѣ́стная, поми́ловатися душа́мъ на́шимъ].
Вхо́дъ. Проки́менъ дне́. Чте́нія три́.
Прему́дрости Соломо́ни чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе. [Глава́ 5.]
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
На литíи, стихи́ры, гла́съ 1:
На не́бо теку́щею, о́тче, стезе́ю ходи́ти изво́лилъ еси́, бу́дущія жи́зни жела́я, того́ ра́ди во вре́меннѣй сей жи́зни, пу́ть у́зкій ше́ствуя, простра́нная же сладостра́стія отрѣва́я, кра́йнее же житіе́ воздержа́ніемъ препроводи́лъ еси́, смиреному́дріемъ ни́жнія сла́вы отбѣже́, вы́шняго гра́да Іерусали́ма смотря́я сла́вы же и красоты́, и вѣ́чнымъ благи́мъ наслѣ́дникъ яви́лся еси́, и по́честь трудо́въ твои́хъ отъ Христа́ прія́тъ. Его́же, Дими́тріе блаже́нне, моли́ о душа́хъ на́шихъ.
По́стникомъ похвалу́, дне́сь Дими́трія почти́мъ, на земли́ бо я́ко а́нгела пожи́вшаго, ревни́теля же Иліи́ Ѳесви́тянина, усугу́бившаго Елиссе́ю благода́ть духо́вную. Се́й же своему́ ста́ду оста́ви сугу́бая благоуха́нія, боже́ственныхъ арома́тъ въ преставле́ніи свое́мъ испо́лни, и по сме́рти бо процвѣте́ чудесы́, я́ко дре́во богосажде́нно при исхо́дищихъ во́дъ, насыща́я дне́сь вѣ́рою творя́щихъ па́мять его́ пи́щею духо́вною и Спа́су Христу́ служа́щихъ преподо́біемъ и пра́вдою.
Лѣ́ствица боже́ственная и честна́я, на высоту́ добродѣ́тели возводя́щая, всѣ́мъ яви́ся богопрія́тное житíе твое́. Тезоимени́тъ бы́въ Селу́нскому Дими́трію, въ ми́лости же рачи́тель того́ милосе́рдію бы́лъ еси́, преподо́бне: онъ у́бо сво́й гра́дъ отъ пога́ныхъ изба́ви, ты́ же, свя́те, иногда́ сво́й гра́дъ отъ междоусо́бныя ра́ти сохрани́лъ еси́; о́нъ нѣ́когда отъ плѣне́нія человѣ́ки износя́ на пра́здникъ сво́й, ты́ же, блаже́нне, всегда́ свобожда́я стра́ждущія отъ нечи́стыхъ бѣсо́въ, и́мя твое́ нарица́ющія то́кмо. Тѣ́мже и мы́ вопіе́мъ ти́: о́тче на́шъ Дими́тріе, со всѣ́ми святы́ми моли́ о на́съ Еди́наго Человѣколю́бца Христа́, спаса́ющаго ду́ши на́ша.
Сла́ва, гла́съ 6:
Ра́дуйся и весели́ся, Россíйская всесвяще́нная Це́рковь Бо́жія, со свяще́нными и съ кня́зи благочести́выми, и́ноки же и просты́я блаже́ннаго Дими́трія дне́сь па́мять почита́юще, духо́внѣ соше́дшеся, пра́зднуемъ и, честны́й гро́бъ его́ обстоя́ще, любе́зно покланя́ющеся, мо́лимся, реку́ще: ра́дуйся, преподо́бне Дими́тріе, свѣти́льниче пресвѣ́тлый и врачу́ боля́щимъ, моли́твенниче ко Спа́су Христу́ Бо́гу на́шему о и́же вѣ́рою и любо́вію притека́ющихъ къ тебѣ́ спасти́ся душа́мъ на́шимъ.
И ны́нѣ, богоро́диченъ:
Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].
На стихо́внѣ стихи́ры, гла́съ 5. Подо́бенъ: Ра́дуйся.
Ра́дуйся, свяще́нная главо́, преподо́бне о́тче на́шъ Дими́тріе, а́нгельскимъ лико́мъ собесѣ́дниче въ вы́шнихъ; на земли́ бо добродѣ́тельно по́жилъ еси́ и яви́лся пречи́сто и нескве́рно зерца́ло, Ду́ха Свята́го заря́ми блиста́яся, пребога́те, и, озаря́емь, зрѣ́лъ еси́ бу́дущая. Тѣ́мже Христа́ Бо́га моли́ пода́ти ду́шамъ на́шимъ ве́лію ми́лость.
Сти́хъ: Честна́ предъ Го́сподемъ сме́рть преподо́бныхъ Его́.
Ра́дуйся, свяще́нная главо́, по́стниковъ непоколеби́мый сто́лпе и непобѣди́мый побо́рниче, страсте́й посѣка́я коре́нія, бѣсо́въ стремле́нія погуби́лъ еси́, кре́стнымъ ору́жіемъ вся кознодѣ́йства отгоня́я, и по преставле́ніи твое́мъ жи́въ Святѣ́й Тро́ицѣ предстои́ши, за ны́ моля́ся, дарова́ти душа́мъ на́шимъ ве́лію ми́лость.
Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.
Ра́дуйся, свяще́нная главо́, преблаже́нне Дими́тріе, моли́твою враги́ устраша́я и неи́стовыя на святы́ню судо́мъ Бо́жіимъ сме́рти предая́й, съ вѣ́рою же приходя́щимъ стра́стныя неду́ги отгоня́я, и ко́рчащіяся ру́цѣ исправля́я, и бѣ́сы отъ человѣ́къ прогоня́я, моли́твою же и свяще́нныя воды́ кропле́ніемъ мно́гимъ исцѣле́нія подая́. Христу́ помоли́ся дарова́ти душа́мъ на́шимъ ве́лію ми́лость.
Сла́ва, гла́съ 8:
Преподо́бне о́тче на́шъ Дими́тріе, твоя́ мо́щи честны́я оби́льно источа́ютъ всегда́ исцѣле́нія вѣ́рою приходя́щимъ къ твоему́ гро́бу, благоуха́нія всѣ́хъ исполня́я духо́внаго и тму́ бѣсо́вскую дале́че отгоня́я, свѣ́томъ благоче́стія вѣ́рныхъ сердца́ озаря́я. Тѣ́мже мо́лимъ тя́, раби́ твои́ вся́каго навѣ́та вра́жія на́съ изба́вити, я́ко да ра́достною душе́ю свято́е твое́ успе́ніе духо́вно пра́зднующе, прославля́емъ Спа́са на́шего, тебе́ просла́вльшаго, еди́наго во святы́хъ Свои́хъ Бо́га на́шего.
И ны́нѣ, богоро́диченъ:
Влады́чице, пріими́ моли́тву ра́бъ Твои́хъ и изба́ви на́съ отъ вся́кія ну́жды и печа́ли.
Тропа́рь, гла́съ 1:
Свы́ше отъ Бо́га, преподо́бне, благода́ть прія́лъ еси́ духо́вную и отъ Него́ у́бо позна́лся еси́, блаже́нне, того́ ра́ди и ты́ ду́хомъ позна́лъ еси́ лу́чшая Его́, бу́дущаго вѣ́ка пребыва́ніе, и по́стнически испыта́вся во свои́хъ оби́телехъ. И ны́нѣ, со а́нгелы ликовству́я, Спа́су всѣ́хъ за ны́ моли́ся, свя́те Дими́тріе, да вси́ вопіе́мъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.
Сла́ва, и ны́нѣ, богоро́диченъ:
Гавріи́лу вѣща́вшу Тебѣ́, Дѣ́во, — [ра́дуйся! — со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́. Сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Твои́мъ].
НА УТРЕНИ,
На Бо́гъ Госпо́дь.., тропа́рь свято́му, два́жды. Сла́ва, и ны́нѣ, богоро́диченъ.
По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.
Яко безпло́тенъ, на земли́, о́тче, по́жилъ еси́, превознося́щагося врага́ смири́лъ еси́, тѣмже и ны́нѣ съ невеще́ственными во́инствы водворя́ешися, блаже́нне, и́же тамо, блаже́нства наслажда́яся, и на́съ помина́й, пра́зднующихъ па́мять твою́ дне́сь, да вси́ ра́достными гла́сы воспѣва́емъ Спа́са на́шего Іису́са Христа́, благода́ть тебѣ́ дарова́вшаго исцѣле́ній. [Два́жды.]
Сла́ва, и ны́нѣ, богоро́диченъ:
Боже́ственная ски́нія была́ еси́ Слова, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.
По 2-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.
Яко со́лнце, возсія́въ, заря́ми блиста́еши всему́ мíру издале́ча чудесы́ твои́ми, чудотво́рче Дими́тріе, свѣтоно́сче блаже́нне, преподо́бнымъ похвала́. [Два́жды.]
Сла́ва, и ны́нѣ, богоро́диченъ:
Въ кро́въ Тво́й, Пречи́стая Дѣ́во, прибѣга́ющихъ, мольбу́ принеси́ о на́съ къ Человѣ́колюбцу Бо́гу, спасти́ся рабо́мъ Твои́мъ.
По поліеле́и сѣда́ленъ, гла́съ 8. Подо́бенъ: Прему́дрости.
Сладостра́стія но́щь посто́мъ, о́тче, утоли́въ, и Бо́гу ду́шу свою́ непоро́чну соблю́лъ еси́, и пріе́мъ отъ Спа́са благода́ть Свята́го Ду́ха исцѣля́ти стра́ждущихъ тѣлесы́ и ду́ши вѣ́рныхъ просвѣща́ти. Сего́ ра́ди благода́рственно вопіе́мъ ти́: Дими́тріе, о́тче на́шъ, моли́ Христа́ Бо́га согрѣше́ній проще́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Воплоще́ннаго Бо́га отъ Твоея́ утро́бы ро́ждши, Пречи́стая, мене́, растлѣ́ннаго грѣхи́, отъ прило́гъ лука́ваго укрѣпи́, Ма́ти Божія, и се́рдце мое́ очи́сти, Богоблагода́тная, ма́терними Тво́ими моли́твами, да и а́зъ благода́рно зову́ Ти́: моли́ Христа́ Бо́га, Сы́на Твоего́, Марíе Богоро́дице, поми́ловати ста́до Твое́, е́же стяжа́ла еси́, Всенепоро́чная.
Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.
По 50-мъ псалмѣ́ стихи́ра, гла́съ 6:
Возлю́бленъ бы́сть Бо́гомъ отъ чре́ва ма́терня, я́коже другíй Се́ргій преподо́бный вели́кій, о́тче Дими́тріе, и съ ни́мъ благоду́шственно Спаси́телю Бо́гу угоди́лъ еси́, и Свята́го Ду́ха сосу́дъ яви́лся еси́ избра́нный, и́нокующимъ же́злъ крѣ́пости и всѣ́мъ тре́бующимъ чудотво́рный пода́тель, испроси́ на́мъ отъ Христа́ Спа́са, чтущи́мъ тя́, ве́лію ми́лость.
Кано́нъ Богоро́дицѣ, гла́съ 2: Нетре́ну, необы́чну.., со ирмосо́мъ, на 6. И свята́го два́ кано́на на 8.
Кано́нъ преподо́бнаго Дими́трія, гла́съ 2.
Пѣ́снь 1.
Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.
Тебѣ́ твоего́, блаже́нне, уче́нія до́лгъ принося́ще, возда́нія простира́емъ, вѣне́цъ похвала́ми плету́ще; ты́ же ми́лостивъ яви́ся, пребога́те, твои́ми мольба́ми благода́ть на́мъ пода́ждь духо́вную.
Всегуби́тельное стремле́ніе страсте́й, о́тче, увяди́лъ еси́, слове́снымъ объя́тъ богому́дріемъ, благопребы́тенъ бо бы́лъ еси́ и благогла́сенъ, кро́токъ же и смире́нъ, сло́вомъ прему́дрости, Дими́тріе, и ра́зума вѣнча́нъ.
Священноукраси́лъ еси́ себе́, о́тче, ра́зумомъ и дѣ́тельнымъ видѣ́ніемъ благода́ти, богоглаго́ливе Дими́тріе, жела́я вѣнца́ сла́вы Христо́вы, и тво́ю наде́жду изря́дно, преблаже́нне, не погрѣши́лъ еси́.
Цѣлому́дріе удержа́лъ еси́ я́вѣ, кра́йнюю же кро́тость и высо́кое, богоно́се, смире́ніе, и́миже возвыша́емь, трудо́въ твои́хъ дѣ́йствомъ и видѣ́ніемъ, ра́дуяся, принесе́ся, вѣне́цъ неувяда́емый пріе́мъ.
Богоро́диченъ: Тва́рей яви́лася еси́, Чи́стая, всѣ́хъ ви́димыхъ и неви́димыхъ превы́шши, Всенепоро́чная: Зижди́теля бо родила́ еси́, я́коже изво́ли воплоти́тися во утро́бѣ Твое́й. Его́же со дерзнове́ніемъ моли́ спасти́ пою́щія Тя́.
Другíй кано́нъ преподо́бнаго, гла́съ 8.
Пѣ́снь 1.
Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.
Да́ждь ми́, Христе́, мо́й Спа́се, проще́ніе мно́гихъ ми́ согрѣше́ній, я́ко да и мы́ почита́емъ па́мять Твоего́ уго́дника, преподо́бнаго Дими́трія. Его́же моли́твами, Бо́же, спаси́ на́съ.
Твои́ми моли́твами же и мольба́ми ми́лостиваго умоля́й Бо́га, преподо́бне о́тче на́шъ Дими́тріе, и грѣхо́вный мра́къ печа́ли нашея разори́, и благоду́шія утѣше́нія на́съ духо́внаго испо́лни.
Отъ младе́нства ты́, блаже́нне Дими́тріе, позна́нъ бы́сть Бо́гомъ и, на Него́ надѣ́яся, наставля́емь на спаси́тельная Его́ повелѣ́нія. Ему́же ны́нѣ предстоя́, со дерзнове́ніемъ о на́съ помоли́ся.
Богоро́диченъ: Еди́наго отъ Святы́я Тро́ицы Сло́ва и Сы́на родила́ еси́, Дѣ́во Пречи́стая, Его́же съ преподо́бными и пра́ведными моли́ о рабѣ́хъ Твои́хъ, вѣ́рою прося́щихъ грѣхо́въ проще́нія.
Катава́сія: Отве́рзу уста́ моя́…
Пѣ́снь 3.
Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая, Це́рковь, прише́ствіемъ Твои́мъ, въ не́йже утверди́ся мое́ се́рдце.
Просія́лъ еси́ въ житіи́ твое́мъ, богоно́се Дими́тріе, я́коже всесвѣ́тлое со́лнце въ мíрѣ, и просвѣти́ и́же къ тебѣ́ вѣ́рою и любо́вію приходя́щія и пою́щія тя́.
Просвѣща́ются концы́ уче́ніи твои́ми, преподо́бне, я́коже бо свѣти́льникъ просвѣти́лъ еси́, богоно́се, Це́рковь Христо́ву, о Не́йже утверди́ся мое́ се́рдце.
Непорабоще́ну соблю́лъ еси́ ду́шу твою́ страстьми́ и сластьми́ тѣле́сными, богоно́се Дими́тріе всече́стне, тѣ́мже ны́нѣ по достоя́нію восхваля́емъ тя́.
Богоро́диченъ: Сказа́ иногда́ сокрове́нное та́инство, Отрокови́це, Тебѣ́ дре́вле Гавріи́лъ зовя́ше: ра́дуйся, Божія пала́то, въ ню́же всели́ся вся человѣ́ки обожи́, я́ко Милосе́рдъ.
Инъ.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.
Ты́ еси́, преподо́бне о́тче Дими́тріе, послу́шатель ева́нгельскихъ слове́съ, Самаго́ Го́спода рече́нію, вся́ любы́ мíра сего́ отве́ргъ и послѣ́довалъ еси́ стопа́мъ Христо́вымъ. Ему́же съ ли́ки а́нгелъ ны́нѣ служа́, и о насъ моли́ся, чту́щихъ тя́.
Въ зако́нѣхъ по́стныхъ поуча́яся, преподо́бный не осла́бися въ нача́льныхъ соверше́нныхъ нача́лѣхъ, хотя́ угоди́ти своему́ Го́споду, Ему́же жела́тельнѣ обѣща́ся усе́рдно да́же и до кончи́ны, до́ндеже сы́нъ Ца́рствія Его́ показа́ся.
Воздержа́ніемъ кра́йнимъ пло́ть твою́ умертви́лъ еси́, Дими́тріе, сего́ ра́ди Ду́хомъ Боже́ственнымъ окрили́вся, дости́глъ еси́ священнонача́льныхъ служи́телей, идѣ́же небе́сныхъ Бо́жіихъ слу́гъ безпло́тныхъ ра́дованія.
Богоро́диченъ: Благослове́нная, Всенепоро́чная Богоро́дице Дѣ́во Марíе, Сло́во Бо́жіе на́мъ ро́ждшая, свобожда́ющаго Свои́хъ преподо́бныхъ отъ тлѣ́ннаго мíра, и́хже ра́ди на́съ спаса́ющаго.
Сѣда́ленъ, гла́съ 3. Подо́бенъ: Красотѣ́ дѣ́вства.
Исправле́ніе житія́ твоего́ всѣ́мъ просвѣща́етъ стопы́, Дими́тріе о́тче, вои́стинну вѣ́рою подо́бящимтися; тѣ́мже, и́же любо́вію блажа́тъ тя́ всегда́, спаса́й моли́твами твои́ми отъ вся́кія тѣсноты́, Христа́ Преблага́го моля́, преподо́бне блаже́нне досточу́дне. [Два́жды.]
Сла́ва, и ны́нѣ, богоро́диченъ:
Яко невоздѣ́ланная, Дѣ́во, Лоза́, краснѣ́йшій Гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.
Пѣ́снь 4.
Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя́, человѣ́ка. Тѣ́мъ зову́ Ти́: сла́ва си́лѣ Твое́й, Го́споди.
Ты́, Дими́тріе, и́нокующимъ бы́сть вѣне́цъ, не ка́меніемъ многоцѣ́ннымъ укра́шенъ, но добродѣ́телію обложе́нъ, яви́лся еси́, блаже́нне, богора́дованное вои́стинну украше́ніе.
Боже́ственную, богому́дре, поче́лъ еси́ Прему́дрость, тѣ́мже дарова́ніи тя́ сія́ одари́, сла́ву вѣ́чную тебѣ́ хода́тайствовавшу, о́тче Дими́тріе всече́стне.
Свѣ́тлостію нра́въ твои́хъ и о́бразы бла́гости, преподо́бне Дими́тріе, подо́бнѣ по́жилъ еси́, тѣ́мже присту́пенъ ты́ всѣ́мъ бы́сть, всеблаже́нне и пречу́дне.
Богоро́диченъ: Умерщвле́нія пло́дъ на́мъ Ева принесе́, Ты́ же, Жи́знь ро́ждши Ѵпоста́сную, а́біе испра́вила еси́ ро́дъ на́шъ, Богоневѣ́сто Пречи́стая.
Инъ.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.
Рачи́тель сы́й ми́лостиваго Спаси́теля Христа́ твоего́, е́же ми́лостивно къ Нему́ наказу́я не ктому́ согрѣша́ти, разсла́бленную жену́ исцѣли́лъ еси́, я́коже при купѣ́ли иногда́.
Яко́же дре́во воздержа́нія, при вода́хъ насажде́нъ былъ еси́, о́тче блаже́нне, и благора́слена лоза́ яви́лся еси́, износя́ благоче́стія гро́зды.
Не восхотѣ́ сла́вы сея́ тлѣ́нныя, па́че кня́зя вся́чески благочести́ваго, Царю́ Небе́сному хотя́ угоди́ти, отъ Него́же по́честь трудо́въ свои́хъ прія́тъ нетлѣ́нную.
Богоро́диченъ: Бы́вшее подъ лѣ́томъ Сло́во, Возсія́вшаго отъ Отца́ безлѣ́тно Богома́ти на́мъ родила́ еси́, Его́же моли́ спасти́ пою́щія Тя́.
Пѣ́снь 5.
Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо, Влады́ко, къ Свѣтонача́льнику, Отцу́ Твоему́, отъ но́щи невѣ́дѣнія приведе́ніе и́мамы.
Стремле́ніе страсте́й безстра́стіемъ удержа́лъ еси́, богоно́се Дими́тріе, видѣ́ніи и дѣя́ніи просвѣти́лъ еси́, о́тче, душе́вное устрое́ніе.
Умо́мъ чи́стымъ и писа́ніи духо́вными бесѣ́довалъ еси́, богоглаго́ливе Дими́тріе, видѣ́нія и дѣя́нія собра́въ бога́тство, о́тче преподо́бне.
Прему́дрости глубину́ испыта́въ, Дими́тріе, дости́глъ еси́ обрѣсти́, ели́ко благопотре́бно, и би́серъ многоцѣ́нный болѣ́зньми стяжа́лъ еси́, преблаже́нне, ра́зума.
Богоро́диченъ: Се́ во чре́вѣ, Богоро́дице Пречиста́я, Христа́ Бо́га па́че сло́ва имѣ́ла еси́, я́коже Иса́ія провозгласи́, и вы́ше естества́ Сего́, Богороди́тельнице, родила́ еси́.
Инъ.
Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.
Аще и земно́е оте́чество, блаже́нне Дими́тріе, оста́вилъ еси́, вся́чески богоимени́тну оби́тель совокупи́лъ еси́: тѣ́мже пе́рвое оте́чество небе́сное прія́тъ, со дерзнове́ніемъ Христу́ за ны́ моли́ся.
Благоче́стія па́ки на стезю́, Дими́тріе, наста́вленъ бы́лъ еси́, о́тче, отъ Бо́га къ неги́блемому наслажде́нію, посто́мъ и моли́твою въ вы́шняя приве́дся.
Зѣло́ ми́лостива и страннопріи́мца показа́ тя́ Спа́съ на́шъ мíрови, о́тче, врача́ боля́щимъ, Дими́тріе, си́рымъ и убо́гимъ засту́пника любе́зна.
Богоро́диченъ: Вои́стинну Тя́, Ма́терь Бо́жію, исповѣ́дуемъ, и́стинную Богоро́дицу, Твои́мъ Рождество́мъ тлѣ́ннаго осужде́нія изба́вльшіися, милосе́рдія ра́ди Человѣколю́бца Бо́га къ жи́зни нетлѣ́ннѣй по́звани бы́хомъ.
Пѣ́снь 6.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.
Вселе́ннѣй свѣти́ло пресвѣ́тлое, о́тче, яви́лся еси́, Дими́тріе, слове́съ свѣ́тлостію просвѣща́я вѣ́рою и любо́вію къ тебѣ́ притека́ющія.
Блаже́нное житіе́ проше́лъ еси́, назда́въ у́бо чу́вства, внѣ́ былъ еси́ мірска́го мяте́жа и Бо́гу прибли́жился еси́, Дими́тріе.
Яко до́бръ, я́ко красе́нъ вѣне́цъ, и́мже ны́нѣ вѣнча́лся еси́, прему́дре Дими́тріе, добродѣ́тельми вѣнча́емъ, и надъ страстьми́ ца́рствовалъ преизря́дне.
Богоро́диченъ: Вы́ше естества́ родила́ еси́, Дѣ́во, и вѣ́чнуеши Дѣ́ва, я́вльши и́стиннаго Божества́ Сы́на и Бо́га Твоего́ о́бразы.
Инъ.
Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.
Въ души́ свое́й Боже́ственная бога́тства Ду́ха Свята́го собра́въ, непоро́чну моли́тву и чистоту́ краснолѣ́пну, бдѣ́ніе и воздержа́ніе, сего́ ра́ди жили́ще Святѣ́й Тро́ицѣ яви́ся.
Ри́зную ху́дость имѣ́лъ еси́, пребога́те, въ зимѣ́ же и лѣ́тѣ не премѣня́я, болѣ́зненно претерпѣ́лъ еси́ Бо́га ра́ди соверше́нно; тѣ́мже небе́снаго прія́тія наслѣ́дникъ бы́ти сподо́бился еси́.
На земли́, я́ко а́нгелъ, Бо́гу послужи́лъ еси́ вся́чески, и ны́нѣ у Него́ со безпло́тными и съ преподо́бными ра́достно лику́еши, преблаженне Дими́тріе, благоуха́нія же чуде́съ на́мъ испусти́лъ еси́.
Богоро́диченъ: Боже́ственное Сло́во въ ложесна́хъ Твои́хъ прія́ла еси́, Богоро́дице Дѣ́во Марíе, и па́че естества́ родила́ еси́. Его́же мо́ли отъ бѣдъ вся́кихъ на́съ изба́вити рабы́ Твоя́, пою́щія Тя́.
Конда́къ, гла́съ 8. Подо́бенъ: Взбра́нной.
Отъ ю́ности, преподо́бне, кре́стъ тво́й взе́мъ, Христу́ послѣ́довалъ еси́, въ моли́твахъ и поще́ніихъ, во бдѣ́ніихъ же и злострада́ніихъ пло́ть твою́ изнуря́я; тѣ́мже и Всеви́дящее Око, твоя́ труды́ ви́дѣвъ, чудесы́ тя́ прославля́етъ и всѣ́хъ зва́ти тебѣ́ науча́етъ: ра́дуйся, преподо́бне о́тче Дими́тріе, по́стниковъ удобре́ніе.
Икосъ:
Боже́ственными добродѣ́тельми твои́ми себе́, му́дре, украси́лъ еси́, Спа́су Христу́ жили́ще со́дѣлавъ, о́тче, му́жественнѣ: я́коже зла́то, искуси́лся еси́ вѣ́рою къ Бо́гу и, наде́ждею и любо́вію обѣ́ты полага́я, воздержа́ніемъ пости́вся, я́ко безпло́тенъ, въ цѣлому́дріи и во смире́ніи возне́слся еси́. Тѣ́мже и мы́, моли́твами твои́ми просвѣ́щшеся, преподо́бне Дими́тріе, вопіе́мъ ти́: ра́дуйся, я́ко изъ мла́да Бо́гу послужи́лъ еси́; ра́дуйся, притека́ющимъ къ тебѣ́ спасе́нія хода́таю; ра́дуйся, Крестоно́сному Импера́тору похвала́ и утвержде́ніе; ра́дуйся, я́ко твои́ми моли́твами сопроти́вніи побѣжда́ются; ра́дуйся, я́ко всѣ́мъ прося́щимъ дае́ши да́ръ, отъ Го́спода дарова́нный ти́, исцѣле́ній; ра́дуйся, я́ко и чудесы́ тя́ Бо́гъ прославля́етъ и всѣ́хъ зва́ти тебѣ́ науча́етъ; ра́дуйся, преподо́бне о́тче Дими́тріе, по́стниковъ удобре́ніе.
Пѣ́снь 7.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть, Христо́съ же простре́ богочести́вымъ отроко́мъ ро́су духо́вную, Сы́й благослове́нъ и препросла́вленъ.
Благоуха́ютъ, преподо́бне, твои́хъ уче́ній словеса́, благода́тію Ду́ха сія́юще, Божество́ бо Еди́но чты́й въ Тре́хъ Ли́цѣхъ, Сло́ва же воплоще́ніе поя́, благоуха́еши на́съ, пребога́те.
Ума́ чистото́ю и по́мысла, богоразу́мія свѣ́тлостію житіе́ преше́лъ еси́, чистото́ю же тѣлесе́ и дѣ́вства сія́ніемъ изря́дно возложе́ніе я́влься Всеви́дцу и Вседержи́телю.
Сло́во твое́, со́лію растворе́но, и житіе́ твое́, благода́тію, преблаже́нне, сія́я, яви́ся, пречу́дне; тѣ́мже въ вы́шнія оби́тели, ра́дуяся, всели́лся еси́, Христу́ со дерзнове́ніемъ ны́нѣ предстоя́.
Богоро́диченъ: Управля́ющи, Пречи́стая, мое́ житіе́, къ Твоему́ всети́хому приста́нищу напра́ви, Бо́га ро́ждши, благи́хъ исто́чника, всѣ́мъ подаю́ща вѣ́рнымъ нетлѣ́нія благода́ти.
Инъ.
Ирмо́съ: Отъ Іуде́и доше́дше о́троцы, въ Вавило́нѣ иногда́ вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.
Иже иногда́ притека́ющихъ, преподо́бне Дими́тріе, къ твоему́ чудотво́рному гро́бу съ вѣ́рою, ка́ющихся къ Бо́гу грѣхо́въ свои́хъ, мольба́ми твои́ми ско́рченыхъ человѣ́къ ру́цѣ испра́вилъ еси́, блаже́нне.
Иже иногда́ злочести́ваго ра́тника Боже́ственною си́лою отри́нулъ еси́ отъ свята́го твоего́ гро́ба, и, не улучи́вшъ поми́лованія, вско́рѣ обою́ животу́ лиши́ся таковы́й.
Иже иногда́ благоче́стно благоговѣ́йніи лю́діе твои́ми, свя́те Дими́тріе, моли́твами, иногда́ же кропле́ніемъ святы́я воды́ свяще́нныя, разли́чная исцѣле́нія пріе́млютъ, припа́дающіи къ чудотво́рному твоему́ гро́бу.
Богоро́диченъ: Изба́вихомся вси́ отъ страсте́й, и бѣ́дъ, и обстоя́ній, и неду́говъ многообра́зныхъ мольба́ми Твои́ми, Пречи́стая Богома́ти, Спа́су Христу́ зову́ще: оте́цъ на́шихъ Бо́же, благослове́нъ еси́.
Пѣ́снь 8.
Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.
Вѣне́цъ благолѣ́пенъ Христо́съ Живода́вецъ на ве́рхъ тво́й положи́, тезоимени́те Дими́тріе, и́бо дѣя́ньми просія́лъ еси́ и видѣ́ніи яви́лся еси́, зовы́й: благослови́те, вся́ дѣла́ Госпо́дня, Го́спода.
Все́ преше́дъ чу́вство, преблаже́нне, Уму́ пе́рвому прибли́жился еси́ души́ твоея́ чистото́ю, житія́ же свѣ́тлостію, вѣнцено́сче Дими́тріе, зовы́й: благослови́те, вся́ дѣла́ Госпо́дня, Го́спода.
Жела́ніемъ зѣ́льнымъ, преблаже́нне, изслѣ́дилъ еси́ богоно́снаго Се́ргія вели́каго житіе́ божественно́е, жи́зни свѣ́тлостію поревнова́лъ еси́, прехва́льне, бы́въ у́бо и собесѣ́дникъ сего́ изря́денъ вои́стинну.
Богоро́диченъ: Умъ безстра́стенъ во утро́бѣ Твое́й соединя́ется человѣ́ческому уму́, Пречи́стая, пло́ти же дебельство́мъ подъ лѣ́томъ бы́въ лѣ́тъ Превы́шшій. Тѣ́мъ Тя́, Богоро́дице, вѣ́рою и любо́вію сла́вимъ.
Инъ.
Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.
Столпъ одушевле́нный, о́тче Димитріе, и исто́чникъ неоску́дный вои́стинну, слѣпы́я просвѣща́я, разсла́бленныя укрѣпля́я и бѣ́сы прогоня́я не то́кмо у гро́ба, но и на мѣ́стѣхъ, идѣ́же и́мя твое́ нарица́ютъ съ любо́вію.
Яко́же другíй Илія́, яви́вся, сугу́бу благода́ть на́мъ да́лъ еси́, твоя́ честны́я мо́щи, точи́ти исцѣле́нія тре́бующимъ, явле́ніемъ же твои́мъ и по сме́рти, преподо́бне о́тче Дими́тріе, ины́хъ злы́хъ устраша́я и па́че ины́мъ исцѣле́нія творя́ вѣ́рнымъ.
Иногда́ проро́ческимъ да́ромъ отъ Бо́га, блаже́нне, почте́нъ былъ еси́, вся́чески же тре́бующимъ ми́лостивъ пока́зовался еси́. И ны́нѣ, о́тче Дими́тріе, ми́лостивому Спа́су за ны́ моли́ся, воспѣва́ющія и превознося́щія Его́ во вѣ́ки.
Богоро́диченъ: Ра́дуйся, престо́ле Госпо́день огнезра́чный, ра́дуйся, две́ре невеще́ственнаго блиста́нія. Ра́дуйся, о́блаче, Со́лнце возсія́вшій Пра́ведное — Христа́ Спа́са на́шего, Его́же превозно́симъ во вѣ́ки.
Пѣ́снь 9.
Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.
Пречестны́й Дими́тріе, ны́нѣ чи́сто услажда́яся и пи́щу пріе́мля па́че у́мныя, идѣ́же собо́ри святы́хъ о́крестъ Го́спода лику́ютъ, блаже́нне, и́же тя́ ны́нѣ чту́щія, хода́тайствуя, къ себѣ́ привлецы́.
Преше́лъ еси́, ра́дуяся, жела́ніемъ въ ра́й, къ еди́ному вои́стинну блаже́нству, къ пребо́льшей добро́тѣ, и къ жи́зни вои́стинну нестарѣ́ющейся, и Свѣ́ту Невече́рнему, богоно́сне о́тче Дими́тріе.
Яко Со́лнце просія́лъ еси́ въ мона́шескихъ собо́рѣхъ, отъ млады́хъ ногте́й освяще́нъ бы́лъ еси́, я́коже зарю́, испуща́я добродѣ́тели твоего́ житія́, пресла́дкій Дими́тріе, богоно́се о́тче преподо́бне.
Богоро́диченъ: Разумѣ́вше издале́ча прозорли́выма очи́ма, проро́цы Тя я́вѣ провозвѣсти́ша, хотя́щую Ма́терь бы́ти Вседѣ́телю, Влады́цѣ всѣ́хъ, тѣ́мъ Тя́, Всепѣ́тая, Богоро́дицу исповѣ́дуемъ.
Инъ.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.
Явле́ніемъ боже́ственнымъ сія́еши, о́тче Дими́тріе преподо́бне, я́коже обѣща́лся еси́, блаже́нне, моли́твою гра́дъ тво́й сохрани́лъ еси́ отъ хотя́щихъ воева́ти безъ вины́ лю́ди твоя́, святе.
Отъ Бо́га показа́лся еси́ на́мъ цѣли́тель, неду́гующимъ въ паде́ніихъ, очи́стникъ же, блаже́нне, и прогони́тель лука́вымъ духо́мъ, тѣ́мъ тя́ вси́ велича́емъ.
Аще и преста́вился еси́ отъ на́съ, о́тче Дими́тріе, въ хра́мѣхъ Боже́ственныхъ Святѣ́й Тро́ицѣ предстоя́, хра́мъ Ду́ху Свято́му бы́лъ еси́: моли́ся за Правовѣ́рнаго Импера́тора на́шего, и за вся́ христіа́ны, и́ноки же и простцы́, тебе́ велича́ющія.
Богоро́диченъ: Вои́стинну, Богоро́дице, Тобо́ю спа́сшіися, исповѣ́дуемъ Тя́, Дѣ́во Влады́чице, я́ко родила́ еси́ намъ Бо́га Спаси́теля, Еди́наго отъ Тро́ицы Сы́на и Сло́ва, Кресто́мъ разо́ршаго сме́рть, Его́же о на́съ съ преподо́бнымъ Дими́тріемъ моли́, Тебе́ велича́ющихъ.
Свѣти́ленъ. Подо́бенъ: Жены́, услы́шите.
Мірска́го пристра́стія я́ко отъ скве́рны уклони́лся еси́, и а́лчбою пло́ть увяди́лъ еси́, о́тче, и небе́сною сла́вою со а́нгелы обогати́лся еси́. Тѣ́мже непреста́нно моли́ о на́съ Христа́ Бо́га, преподо́бне Дими́тріе. [Два́жды.]
Сла́ва, и ны́нѣ, богоро́диченъ:
Тя́ предста́тельницу и́мамы вси́ грѣ́шніи, о Пресвята́я Дѣ́во! Ты́ благопремѣ́нна сотвори́ Сы́на Твоего́ ма́терними Твои́ми моли́твами.
На хвали́техъ стихи́ры, на 4, гла́съ 5. Подо́бенъ: Преподо́бне о́тче.
Преподо́бне о́тче, ду́шу твою́ съ тѣ́ломъ очи́стивъ, и Свято́му Ду́ху прекра́сная оби́тель яви́ся, и сла́вна тя́ конце́мъ, преблаже́нне Дими́тріе, содѣ́ла. Въ чудесѣ́хъ же вели́каго свѣти́льника, просвѣти́вшаго су́щихъ во мра́цѣ, я́ко наста́вника и́нокомъ, соше́дшеся, велему́дренно ублажи́мъ. [Два́жды.]
Яви́лся еси́, богоблаже́нне, му́драя плени́ца, связу́я мно́гая вра́гъ ополче́нія, тѣ́мже и вѣнце́мъ увя́злся еси́ неувяда́ющимъ, весе́ліе, и ра́дость, и сла́ву вѣ́чную воспрія́лъ еси́, богому́дре Дими́тріе. Моли́ Христа́ Бо́га дарова́ти ми́ръ мíрови и душа́мъ на́шимъ ве́лію ми́лость.
Преподо́бне о́тче, тѣле́сныя стра́сти зѣ́льнымъ воздержа́ніемъ и по́стническими моли́твами же и труды́, сле́зными пото́ки и по́ты у́глія сла́дости погаси́лъ еси́, и въ чудесѣ́хъ сла́вна тя́ показа́ Госпо́дь Россíйскимъ лю́демъ, Дими́тріе блаже́нне, и украси́ тя́ вы́шними дарова́ніи, Ему́же слу́жиши съ небе́сными си́лами, Іису́су Человѣколю́бцу и Спа́су ду́шъ на́шихъ.
Сла́ва, гла́съ 6:
Пріиди́те, празднолю́бцы и по́стникъ сосло́віе, вѣ́рою соше́дшеся, и́стиннаго по́стника дне́сь почита́юще: ра́дуйся, ше́ствовавъ по стопа́мъ Влады́ки Христа́ у́зкій пу́ть и безстра́стно житіе́, я́коже дре́вле Авраа́мъ пра́ведный, о́тче Дими́тріе, страннолю́біе притяжа́въ, пресели́лся еси́ отъ оте́чества твоего́ до мѣ́ста, идѣ́же ны́нѣ благоуха́етъ исцѣле́нія честно́е тѣ́ло твое́ всѣ́мъ притека́ющимъ и вопію́щимъ: о всеблаже́нне и преподо́бне! по́стникомъ похвало́ и собесѣ́дниче безпло́тнымъ, Благочести́вому же Импера́тору на́шему на пога́ныя спосо́бниче и наста́вниче и́нокомъ, о на́съ моли́ся Христу́ Бо́гу спасти́ ду́ши на́ша.
И ны́нѣ, богоро́диченъ:
[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].
Славосло́віе вели́кое, [ектеніи́] и отпу́стъ.
НА ЛИТУРГІИ,
Блаже́нна отъ кано́на 1-го пѣ́снь 3-я, и 2-го пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Гала́томъ, зача́ло 213. Аллилу́ія, [гла́съ 6]: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].
Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 101 – 111 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.