СЛУЖБА ВОСКРЕСНАЯ 1-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ… поста́вимъ стихо́въ 4 и пое́мъ стихи́ры Осмогла́сника 3, повторя́юще 1-й сти́хъ, гла́съ 1. Творе́ніе преподо́бнаго отца́ на́шего Іоа́нна Дамаски́на.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Вече́рнія на́ша моли́твы пріими́, Святы́й Го́споди, и пода́ждь на́мъ оставле́ніе грѣхо́въ, я́ко Еди́нъ еси́, явле́й въ мíрѣ Воскресе́ніе.

Обыди́те, лю́діе, Сіо́нъ и обыми́те его́, и дади́те сла́ву въ не́мъ Воскре́сшему изъ ме́ртвыхъ, я́ко То́й е́сть Бо́гъ на́шъ, избавле́й на́съ отъ беззако́ній на́шихъ.

Пріиди́те, лю́діе, воспои́мъ и поклони́мся Христу́, сла́вяще Его́ изъ ме́ртвыхъ Воскресе́ніе, я́ко То́й е́сть Бо́гъ на́шъ, отъ ле́сти вра́жія мíръ избавле́й.

Сла́ва, и ны́нѣ, богоро́диченъ догма́тикъ:
Дѣ́вственное торжество́ дне́сь, бра́тіе, да взыгра́ется тва́рь, да ликовству́етъ человѣ́чество: созва́ бо на́съ Свята́я Богоро́дица, нескве́рное сокро́вище дѣ́вства; слове́сный втора́го Ада́ма ра́й; храни́лище соедине́нія дву́ естеству́; торжество́ спаси́тельнаго примире́нія; черто́гъ, въ не́мже Сло́во уневѣ́стивый пло́ть вои́стинну; ле́гкій о́блакъ, Иже надъ херуви́мы Су́щаго, съ тѣ́ломъ носи́вшій. Тоя́ моли́твами, Христе́ Бо́же, спаси́ ду́ши на́ша.

Та́же: Свѣ́те Ти́хій… Проки́менъ: Госпо́дь воцари́ся.., со стихи́ его́. И по Сподо́би, Го́споди, въ ве́черъ се́й.., іере́й ектеніи́ не глаго́летъ, но пое́мъ

На стихо́внѣ стихи́ру воскре́сну:
Стра́стію Твое́ю, Христе́, отъ страсте́й свободи́хомся, и Воскресе́ніемъ Твои́мъ изъ истлѣ́нія изба́вихомся, Го́споди, сла́ва Тебѣ́!

И и́ны стихи́ры Пресвяты́я Богоро́дицы. Подо́бенъ: Небе́сныхъ чино́въ.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Препросла́влена еси́ въ ро́дѣ родо́въ, Дѣ́во Ма́ти, Отрокови́це, Богоро́дице Марíе, мíра предста́тельство, ро́ждши пло́тію Сы́на Безнача́льнаго Отца́, Соприсносу́щна же Ду́ху вои́стинну, Его́же моли́ спасти́ся на́мъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Содержи́міи скорбьми́ ненача́емыми, Чи́стая, Тя́ предста́тельство еди́но иму́ще, Дѣ́во, вопіе́мъ благода́рно: спаси́ ны́, Всесвята́я Богоневѣ́стная, Ты́ бо еси́ мíра прибѣ́жище и заступле́ніе ро́да на́шего.

Сти́хъ: Лицу́ Твоему́ помо́лятся бога́тіи лю́дстіи.

Обнови́ся мíръ въ Рождествѣ́ Твое́мъ, Богороди́тельнице Отрокови́це, вѣ́рныхъ спасе́ніе и неусыпа́емая предста́тельнице благоче́стно моля́щихъ Тя́, Пречи́стая, не преста́й моля́щи прилѣ́жно о всѣ́хъ пою́щихъ Тя́.

Сла́ва, и ны́нѣ, догма́тикъ, гла́съ то́йже:
Облакъ Тя́ Свѣ́та Присносу́щнаго, Дѣ́во, проро́къ именова́: изъ Тебе́ бо, я́ко до́ждь на руно́, сше́дъ Сло́во Отчее, и изъ Тебе́ возсія́вый, мíръ просвѣти́, пре́лесть упраздни́ Христо́съ Бо́гъ на́шъ. Того́ моля́щи прилѣ́жно, Пресвята́я, мо́лимся, не преста́й о на́съ, и́же и́стинную Богоро́дицу исповѣ́дающихъ Тя́.

Та́же: Ны́нѣ отпуща́еши… Трисвято́е, по Отче на́шъ… Тропа́рь воскре́сный. Сла́ва, и ны́нѣ, богоро́диченъ его́. Ектенія́ ма́лая и отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
По предначина́тельномъ псалмѣ́ обы́чное стихосло́віе псалти́ря. На Го́споди воззва́хъ… поста́вимъ стихо́въ 10 и пое́мъ стихи́ры воскре́сны Осмогла́сника 3, и анато́ліевы 4, и Мине́и 3 или́ 6, а́ще пра́зднуемый святы́й. Сла́ва, мине́и. И ны́нѣ, богоро́диченъ 1-й, гла́са.

Стихи́ры воскре́сны осмогла́сника, гла́съ 1:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Сти́хъ: Мене́ жду́тъ пра́ведницы, до́ндеже возда́си мнѣ́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Пріиди́те, лю́діе, воспои́мъ и поклони́мся Христу́, сла́вяще Его́ изъ ме́ртвыхъ Воскресе́ніе, я́ко То́й е́сть Бо́гъ на́шъ, отъ преле́сти вра́жія мíръ избавле́й.

Ины стихи́ры, анато́ліевы, гла́съ 1-й:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Весели́теся небеса́, воструби́те основа́нія земли́, возопíйте, го́ры, весе́ліе: се́ бо Емману́илъ грѣхи́ на́ша на Крестѣ́ пригвозди́, и живо́тъ дая́й, сме́рть умертви́, Ада́ма воскреси́вый, я́ко Человѣколю́бецъ.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Пло́тію во́лею Распе́ншагося на́съ ра́ди, Пострада́вша, и Погребе́нна, и Воскре́сша изъ ме́ртвыхъ, воспои́мъ глаго́люще: утверди́ правосла́віемъ Це́рковь Твою́, Христе́, и умири́ жи́знь на́шу, я́ко Бла́гъ и Человѣколю́бецъ.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Живопріе́мному Твоему́ гро́бу предстоя́ще, недосто́йніи, славосло́віе прино́симъ неизрече́нному Твоему́ благоутро́бію, Христе́ Бо́же на́шъ, я́ко кре́стъ и сме́рть прія́лъ еси́, Безгрѣ́шне, да мíрови да́руеши Воскресе́ніе, я́ко Человѣколю́бецъ.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Иже Отцу́ Собезнача́льна и Соприсносу́щна Сло́ва, отъ Дѣви́ческаго чре́ва Произше́дшаго неизрече́нно, и кре́стъ, и сме́рть на́съ ра́ди во́лею Пріе́мшаго, и Воскре́сша во сла́вѣ, воспои́мъ глаго́люще: Живода́вче Го́споди, сла́ва Тебѣ́, Спа́се ду́шъ на́шихъ!

Ины стихи́ры Пресвятѣ́й Богоро́дицѣ, творе́ніе Па́вла Аморре́йскаго, пое́мыя идѣ́же нѣ́сть Мине́и, или́ на литíи. [Вѣ́домо у́бо бу́ди, я́ко въ гре́ческихъ прево́дѣхъ си́хъ стихи́ръ на ряду́ нѣ́сть.]

Стихи́ры, гла́съ 1. Подо́бенъ: Небе́сныхъ чино́въ.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Святѣ́йшая святы́хъ всѣ́хъ си́лъ, Честнѣ́йшая вся́кія тва́ри, Богоро́дице, Влады́чице мíра, спаси́ на́съ, я́же Спа́са Ро́ждшая, отъ всѣ́хъ прегрѣше́ній, и болѣ́зней, и бѣ́дъ моли́твами Твои́ми.

Сти́хъ: Хвали́те Го́спода, вси́ язы́цы, похвали́те Его́, вси́ лю́діе.

Яже благоутро́бія две́ре, смире́нную мою́ ду́шу да не пре́зриши, вѣ́рно молю́ Тя́, Отрокови́це, но уще́дри вско́рѣ и спаси́ ю́ отъ пучи́ны согрѣше́ній мои́хъ, и обно́вльши благода́ть Твою́ на мнѣ́, просвѣти́, Дѣ́во Чи́стая.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Ты́ Бо́га человѣ́комъ соедини́ла еси́, Влады́чице, Ты́ ме́ртвеное существо́ возвела́ еси́ еди́на къ Боже́ственному нетлѣ́нію, Ты́ земны́мъ Спасе́ніе источи́ла еси́, Ты́, Богоро́дице, свободи́ на́съ отъ всѣ́хъ муче́ній.

Сла́ва, Мине́и. И ны́нѣ, богоро́диченъ:
Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе. Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Вхо́дъ. Свѣ́те Ти́хій…

По вхо́дѣ же, положи́въ учине́нный мона́хъ обы́чный покло́нъ предстоя́телю, пое́тъ дневны́й проки́менъ: Госпо́дь воцари́ся, въ лѣ́поту облече́ся. Сти́хъ: Облече́ся Госпо́дь въ си́лу и препоя́сася. Сти́хъ: Ибо утверди́ вселе́нную, я́же не подви́жится. Сти́хъ: До́му Твоему́ подоба́етъ святы́ня, Го́споди, въ долготу́ днíй.

Та́же обы́чная ектенія́. Сподо́би, Го́споди… Испо́лнимъ вече́рнюю… И про́чая. И по возгла́сѣ пое́мъ самогла́сну стихи́ру свята́го оби́тели, литíю творя́ще въ притво́рѣ, на не́йже пое́мъ стихи́ры Па́вла Аморре́йскаго или́ что́ настоя́тель изво́литъ.

По обы́чныхъ же моли́твахъ вхо́димъ во хра́мъ, пою́ще стихи́ру, гла́съ 1:
Стра́стію Твое́ю, Христе́, отъ страсте́й свободи́хомся, и Воскресе́ніемъ Твои́мъ изъ истлѣ́нія изба́вихомся, Го́споди, сла́ва Тебѣ́!

Ины стихи́ры, по алфави́ту.

Сти́хъ: Госпо́дь воцари́ся, въ лѣ́поту облече́ся.

Да ра́дуется тва́рь, небеса́ да веселя́тся, рука́ми да воспле́щутъ язы́цы съ весе́ліемъ: Христо́съ бо, Спа́съ на́шъ, на Крестѣ́ пригвозди́ грѣхи́ на́ша и, сме́рть умертви́въ, живо́тъ на́мъ дарова́, па́дшаго Ада́ма всеро́днаго воскреси́вый, я́ко Человѣколю́бецъ.

Сти́хъ: Ибо утверди́ вселе́нную, я́же не подви́жится.

Ца́рь сы́й небесе́ и земли́, Непостижи́ме, во́лею распя́лся еси́ за человѣколю́біе. Его́же а́дъ срѣ́тъ до́лѣ, огорчи́ся, и пра́ведныхъ ду́ши пріе́мша, возра́довашася. Ада́мъ же, ви́дѣвъ Тя́, Зижди́теля, въ преиспо́днихъ, воскре́се. О, чудесе́! Ка́ко сме́рти вкуси́ всѣ́хъ Жи́знь? Но я́коже восхотѣ́ міръ просвѣти́ти зову́щій и глаго́лющій: Воскресы́й изъ ме́ртвыхъ, Го́споди, сла́ва Тебѣ́!

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Жены́ мѵроно́сицы, мѵ́ра нося́ща, со тща́ніемъ и рыда́ніемъ гро́ба Твоего́ достиго́ша, и не обрѣ́тша Пречи́стаго Тѣ́ла Твоего́, отъ а́нгела же увѣ́дѣвша но́вое и пресла́вное чу́до, апо́столомъ глаго́лаху: воскре́се Госпо́дь, подая́ мíрови ве́лію ми́лость!

Сла́ва, Мине́и, а́ще и́мать. Аще ли нѣ́сть:

Сла́ва, и ны́нѣ, богоро́диченъ:
Се́ испо́лнися Иса́іино прорече́ніе: Дѣ́ва бо родила́ еси́ и по рождествѣ́, я́ко пре́жде рождества́, пребыла́ еси́, Бо́гъ бо бѣ́ Рожде́йся, тѣ́мже и естества́ новопресѣче́[1]. Но, о Богома́ти, моле́нія Твои́хъ рабо́въ, въ Твое́мъ хра́мѣ приноси́мая Тебѣ́, не пре́зри, но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́мъ на́шимъ.

Та́же: Ны́нѣ отпуща́еши… Трисвято́е, по Отче на́шъ…

Тропа́рь воскре́сный, гла́съ 1:
Ка́мени запеча́тану отъ іуде́й и во́иномъ стрегу́щимъ Пречи́стое Тѣ́ло Твое́, воскре́слъ еси́ тридне́вный, Спа́се, да́руяй мíрови жи́знь. Сего́ ра́ди си́лы небе́сныя вопія́ху Ти́, Жизнода́вче: сла́ва Воскресе́нію Твоему́, Христе́; сла́ва Ца́рствію Твоему́; сла́ва смотре́нію Твоему́, еди́не Человѣколю́бче.

Богоро́диченъ:
Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.

То́йже тропа́рь и на Бо́гъ Госпо́дь… И про́чее послѣ́дованіе.

ВЪ СУББОТУ НА ПОВЕЧЕРІИ,
Глаго́летъ іере́й: Благослове́нъ Бо́гъ на́шъ… И мы́: Сла́ва Тебѣ́, Бо́же на́шъ, сла́ва Тебѣ́. Царю́ Небе́сный… Трисвято́е, и по Отче на́шъ… Го́споди, поми́луй, 12. Сла́ва, и ны́нѣ. Пріиди́те, поклони́мся.., три́жды. Псало́мъ 50-й: Поми́луй мя́, Бо́же… Псало́мъ 69-й: Бо́же, въ по́мощь мою́ вонми́… Псало́мъ 142-й: Го́споди, услы́ши моли́тву мою́… Посе́мъ: Сла́ва въ вы́шнихъ Бо́гу… Го́споди, прибѣ́жище бы́лъ еси́ на́мъ… Сподо́би, Го́споди, въ но́щь сію́… Та́же: Вѣ́рую во Еди́наго Бо́га…

Посе́мъ кано́нъ Пресвятѣ́й Богоро́дицѣ, гла́съ 1:

Пѣ́снь 1.
Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Припѣ́въ: Пресвята́я Богоро́дице, спаси́ на́съ.

Ужасо́шася стра́хомъ, Всецари́це, а́нгельская чинонача́лія, хва́ляще Тя́, пое́тъ же бла́гости ра́ди вся́къ у́мъ, я́ко Ма́терь Зижди́теля: похвалы́ бо вся́кія превозшла́ еси́ чи́нъ, Христа́ ро́ждши.

Лю́тыми напа́стьми томи́мь и отъ вра́гъ стужа́емь, окая́нный, съ пла́чемъ приглаша́ю: свы́ше мнѣ́ простри́, Пребога́тая, ру́ку Твою́, избавля́ющи мя́, и безбѣ́дно пожи́ти сподо́би моли́твами Твои́ми.

Сла́ва: Души́ та́йная прегрѣше́нія лѣчбо́ю милосе́рдія исцѣли́ и ути́ши плотско́е стремле́ніе, Богоро́дице, и враго́въ ко́пія и стрѣ́лы возвра́щши, крѣ́пко въ сердца́ и́хъ вонзи́.

И ны́нѣ: Па́жить дре́внюю потреби́ человѣкоубíйственную утро́ба Дѣви́ча, Христа́ ро́ждши, тѣ́мже вся́ тва́рь ра́дуется ны́нѣ, Пречи́стая, я́ко ожи́вльшися, и согла́сно воспѣва́етъ Твоего́ Сы́на и Бо́га.

Пѣ́снь 3.
Ирмо́съ: Не му́дростію и бога́тствомъ да хва́лится сме́ртный свои́мъ, но вѣ́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́хъ за́повѣдей утверди́ мя, Влады́ко.

Іа́ковъ вели́кій на пути́ спя́ иногда́, низходя́щія свы́ше лѣ́ствицею, Дѣ́во, на зе́млю а́нгелы ви́дя, дивля́шеся и, возбну́въ, прописа́ я́вѣ две́рь Тя́ небе́сную.

Вре́меннымъ удержа́ніемъ, въ напа́сти вве́рженъ окая́нный а́зъ, и бу́рями напа́стными томи́мь, — увы́ мнѣ́! — вопію́: Яже Бо́га ро́ждшая и возне́сшая ро́гъ на́шъ, спаси́ мя́ моли́твами Твои́ми.

Сла́ва: Съ небесе́ ру́ку крѣ́пкую просте́ръ, о, всѣ́хъ Царю́ Христе́! чу́вственныхъ и мы́сленныхъ, Іисусе́ мо́й, главы́ враго́въ подъ но́зѣ положи́, Богоро́дицу Ма́терь Твою́ вѣ́рно проповѣ́дающихъ.

И ны́нѣ: Иса́ія дре́вле, очи́щся у́глемъ Ду́ха, отъ Твоея́ утро́бы я́вѣ, Пребога́тая Дѣ́во, Сы́ну взыва́ше роди́тися. Его́же въ послѣ́дняя времена́, мене́ ра́ди, безъ му́жа родила́ еси́.

Пѣ́снь 4.
Ирмо́съ: Слы́ша дре́вле Авваку́мъ, Христе́, чу́дный Тво́й слу́хъ и стра́хомъ взыва́ше: отъ ю́га Бо́гъ пріи́детъ и Святы́й отъ горы́ приосѣне́нныя ча́щи спасти́ пома́занныя. Сла́ва си́лѣ Твое́й, Го́споди.

Тебе́, я́ко су́щую въ жена́хъ красну́ и прече́стну, я́ко изъ пусты́ни восходя́щу и Отрасль, Христа́, на руку́ нося́щу, Ма́ти Бо́жія, прообража́ше міронача́льникъ, вопія́: сла́ва си́лѣ Твое́й, Го́споди!

Приклони́ ми́ у́хо Твое́, Блага́я, и ви́ждь мое́ озлобле́ніе и бѣ́дъ умноже́ніе; къ Тебѣ́ бо, Влады́чице, душе́вное о́ко просте́ръ и съ пла́чемъ колѣ́на прикло́нь, ны́нѣ молю́, вопія́: уста́ви ми́ напа́стей смуще́ніе.

Сла́ва: Стѣ́ну Тя́ необори́мую вѣ́дый, привлече́нъ мольбо́ю, Тво́й ра́бъ ны́нѣ къ Тебѣ́ прибѣга́ю и стрѣ́лы вра́жія, я́ко младе́нческія, вмѣня́ю недѣ́йственны, о Пребога́тая! Тѣ́мже и ра́дуяся вопію́: сла́ва, Богома́ти, Рождеству́ Твоему́!

И ны́нѣ: Си́ла Вы́шняго Тя́, Дѣ́во, осѣни́ наи́тіемъ Боже́ственнаго Ду́ха, и тогда́ па́че естества́ вся́ческихъ Госпо́дь, пло́ть и ду́шу оживотвори́въ, приедини́ Себѣ́, пребы́въ въ то́мжде естествѣ́.

Пѣ́снь 5.
Ирмо́съ: Свѣ́тъ Тво́й незаходи́мый возсія́й, Христе́, въ сердца́ вѣ́рно пою́щихъ Тя́, ми́ръ подава́яй на́мъ па́че ума́; тѣ́мъ, отъ но́щи невѣ́дѣнія ко дню́ свѣ́томъ Твои́мъ теку́ще, славосло́вимъ Тя́, Человѣколю́бче.

Боже́ственную Тя́ прови́дѣвъ иногда́ Даніи́лъ несѣко́мую го́ру, Препѣ́тая, вопія́ше проявле́ннѣ усѣщи́ся отъ Тебе́ Ка́меню богоро́дія, Христу́ Спа́су мíра. Его́же вѣ́рніи ны́нѣ чту́ще, восхваля́емъ Тя́, Богоневѣ́сто.

Напа́стьми окая́нный мно́гими па́дся, съ болѣ́знію и пла́чемъ се́рдца моля́ся, безсту́дно служи́тель Тво́й, вопію́: изба́ви, Богороди́тельнице, отъ бѣ́дъ, одержа́щихъ мое́ смире́ніе, и весе́лія мя́ испо́лни.

Сла́ва: Страсте́й мои́хъ свирѣ́пую пучи́ну ути́ши крѣ́пкою Твое́ю моли́твою, Блага́я, Яже страсте́й кромѣ́ ро́ждшая Христа́, я́ко да въ тишинѣ́ души́ ны́нѣ живы́й, про́чее жи́зни моея́ въ пѣ́снехъ воспѣва́ю Тя́.

И ны́нѣ: Бо́га ка́ко на руку́ но́сиши, рцы́? И ка́ко дои́ши, вся́ческая руко́ю Содержа́щаго, о Дѣ́во Всеблаже́нная? Азъ, — рече́, — чиста́ пребыва́ю и по Рождествѣ́, Христа́ Бо́га ро́ждши, Ада́мовъ до́лгъ и прама́терній отъе́мши.

Пѣ́снь 6.
Ирмо́съ: Ве́сь отъ страсте́й безмѣ́рныхъ содержу́ся и ки́томъ зо́лъ снизпадо́хъ, но возведи́ изъ истлѣ́нія мя́, Бо́же, я́коже пре́жде Іо́ну, и вѣ́рою безстра́стіе ми́ да́руй, я́ко да во гла́сѣ хвале́нія и спасе́нія ду́хомъ пожру́ Ти.

Сѣдѣ́нія не отсту́пль нѣ́дръ Роди́теля, въ нѣ́дрѣхъ Ма́тернихъ — Сы́нъ Предлѣ́тный; напослѣ́докъ же, Иже пре́жде вѣ́къ Сы́й со Отце́мъ, изъ утро́бы Дѣ́вы произы́де, вся́ къ жи́зни безсме́ртнѣй возводя́ неизрече́нною бла́гостію.

Вери́гами свя́занъ вра́жіими отъ озлобле́нія, во а́дскія вереи́, — увы́ мнѣ́! — низверго́хся. Но предста́ни, съ небесе́ я́вльшися, Богоотрокови́це Чи́стая, возставля́ющи мя́ Твои́ми моли́твами, служи́теля Твоего́, и ру́ку по́мощи да́ждь пою́щему Боже́ственное Твое́ Рождество́.

Сла́ва: Въ ро́въ поги́белей окая́нный впадо́хъ, и звѣ́ріе мно́зи окроча́ютъ мя́, но, Влады́чице, моли́твами Твои́ми ка́менія отврати́ и невреди́ма Твоего́ раба́ соблюди́, Ка́мень бо краеуго́льный, Христа́, въ ложесна́хъ Твои́хъ носи́ла еси́.

И ны́нѣ: Дре́вле проро́къ Боже́ственныхъ ли́къ провозгласи́, Дѣ́во, Рождества́ Твоего́ о́бразы: свѣ́телъ о́блакъ Тя́, и свѣ́щникъ, и ста́мну, и трапе́зу, и небе́сную ро́су, хлѣ́бъ, ма́нну же и две́рь, престо́лъ и пала́ту, же́злъ, ра́й, я́ко Христа́ ро́ждшую.

Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 1:
Ма́терь Тя́ Бо́жію свѣ́мы вси́, Дѣ́ву вои́стинну, и по рождествѣ́ я́вльшуюся, любо́вію прибѣга́юще къ Твое́й бла́гости: Тебе́ бо и́мамы грѣ́шніи предста́тельницу и Тебе́ стяжа́хомъ въ напа́стехъ спасе́ніе, еди́ну Всенепоро́чную.

Пѣ́снь 7.
Ирмо́съ: Проидо́ша, я́ко черто́гъ, пе́щный пла́мень нестерпи́мый и́же за благоче́стіе иногда́ о́троцы святíи, показа́вшеся я́вѣ, и, согла́сно воспѣва́юще, пѣ́снь поя́ху: отце́въ Бо́же, благослове́нъ еси́.

Ше́ствуя Превѣ́чный две́рьми непрохо́дными Твои́ми, Всецари́це, чи́ста Твоя́ зна́менія и цѣ́ла сохрани́, чи́ста и по Рождествѣ́. Тѣ́мже вопіе́мъ: оте́цъ на́шихъ Бо́же, благослове́нъ еси́.

Въ пе́щь вве́рженъ, седмочи́сленными пла́меньми опаля́юся отъ душеубíйственныхъ бѣ́дъ, но Сама́ ро́су ми́ одожди́, Влады́чице Блага́я, Твои́ми мольба́ми, да вопію́: благослове́нъ Бо́гъ оте́цъ на́шихъ.

Сла́ва: Страстьми́ престарѣ́вся и неосла́бными напа́стьми и скорбьми́, и доспѣ́въ къ за́падомъ житія́ моего́, добродѣ́телемъ неприча́стенъ, лѣ́ностію снѣде́нъ бы́въ, вопію́ Ти́, Влады́чице: Утѣше́ніе земны́мъ, поми́луй мя́.

И ны́нѣ: Тро́ицѣ во Еди́нствѣ правосла́вно служа́ще, Тя́, Ма́ти Дѣ́во Чи́стая, я́ко Бо́га пло́тію ро́ждшую проповѣ́дающе земнíи, боже́ственнѣ пое́мъ: оте́цъ на́шихъ Бо́же, благослове́нъ еси́.

Пѣ́снь 8.
Ирмо́съ: Чу́да преесте́ственнаго показа́ о́бразъ огнеро́сная пе́щь дре́вле: о́гнь бо не опали́ ю́ныя дѣ́ти, Христо́во явля́я безсѣ́менное отъ Дѣ́вы Боже́ственное рождество́. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Сло́во всеи́стинное свяще́нника вообрази́ Рождество́ Твое́, Дѣ́во, вои́стинну бо родила́ еси́ Сло́во Бо́жіе, и ложесна́ не разве́рзе, Дѣ́во, и́миже про́йде Бо́гъ. Тѣ́мъ ра́дующеся, Богоро́дицу Тя́ по до́лгу согла́сно воспѣва́емъ и превозно́симъ, Чи́стую, во вся́ вѣ́ки.

Те́рніе возра́стшее въ души́ мое́й недѣ́йственно, Боже́ственнымъ огне́мъ попали́, Пречи́стая, и Твои́ми моли́твами на добродѣ́тели возста́ви мя́, твори́ти плодоно́сіе Христу́, изъ Тебе́ бо Цвѣ́тъ при́сно живы́й прора́стши, тва́рь всю́ украси́. Тѣ́мъ Тя́ Богороди́тельницу Чи́стую почита́емъ во вся́ вѣ́ки.

Сла́ва: Исцѣле́ніе въ лю́тыхъ, Богороди́тельнице, неболѣ́зненно пода́ждь ми́ вско́рѣ, впа́дъ бо въ ско́рби и бѣды́, Твою́ ско́рость въ заступле́ніе, окая́нный, призыва́ю рыда́я. Тѣ́мже, Пречи́стая, ускори́ изъя́ти мя́ и спаси́ отъ вся́кія му́ки, я́ко да благословя́, воспѣва́ю Твое́ Рождество́.

И ны́нѣ: Дре́вле Тя́ прозя́бшій Ааро́новъ же́злъ вообрази́, Дѣ́во, Ты́ бо Еди́на родила́ еси́ прозябе́ніемъ безъ му́жа, Небе́сный ны́нѣ До́ждь пріе́мши во чре́вѣ. Тѣ́мъ веселя́щеся, Тя́ Богоро́дицу по до́лгу согла́сно вси́ пое́мъ и превозно́симъ во вся́ вѣ́ки.

Пѣ́снь 9.
Ирмо́съ: Неизглаго́ланное Дѣ́вы та́инство: не́бо бо Сія́, и престо́лъ херуви́мскій, и свѣтоно́сный черто́гъ показа́ся Христа́ Бо́га Вседержи́теля, Сію́ благоче́стно я́ко Богоро́дицу велича́емъ.

Пресла́вно Дѣ́вы та́инство: Его́же бо не вмѣсти́ша вы́ше небе́сная вели́чія, вмѣсти́ во чре́вѣ. Тѣ́мже соше́дшеся, ублажа́емъ Ю, и вѣ́рно веселя́щеся, велича́емъ.

Ви́дяще Тя́ Еди́ну, я́ко вы́шшую небе́съ, Бо́жію зарю́, Нескве́рная, престо́лъ херуви́мскій, и черто́гъ, и о́дръ свя́тъ, земнíи восхваля́юще, Христа́ Бо́га на́шего велича́емъ, Его́же отъ чре́слъ чи́стыхъ родила́ еси́.

Сла́ва: Окрестъ мене́ ско́рби мно́ги и злы́ напа́сти ны́нѣ напа́дающе, болѣ́зни же и лю́тыя грѣхи́ въ ро́въ вверго́ша. Тѣ́мже Тя́ молю́ въ го́рести души́ моея́, Пресвята́я Богоро́дице, избавле́ніе обрѣсти́ ми́.

И ны́нѣ: Умири́ мíръ, Христе́, мольба́ми Чи́стыя Богоотрокови́цы, низлага́я вра́жію си́лу подъ но́ги царе́й вѣ́рныхъ и тишину́ неизглаго́ланную тѣ́мъ устроя́я, во вѣ́ки сохрани́.

Та́же: Досто́йно е́сть… Трисвято́е, и по Отче на́шъ. Конда́къ гла́са. Го́споди, поми́луй, 40. И моли́тва: Иже на вся́кое вре́мя… Го́споди, поми́луй, три́жды. Сла́ва, и ны́нѣ. Честнѣ́йшую херуви́мъ… Именемъ Госпо́днимъ благослови́, о́тче. Та́же моли́тва: Нескве́рная, Небла́зная… и про́чее обы́чно. И отпу́стъ и проще́ніе.

ВЪ НЕДѢЛЮ УТРА, НАЧАЛО ПОЛУНОЩНИЦЫ.
Іере́й: Благослове́нъ Бо́гъ на́шъ… И мы́ глаго́лемъ: Ами́нь. Сла́ва Тебѣ́, Бо́же на́шъ, сла́ва Тебѣ́! Царю́ Небе́сный… Трисвято́е. Пресвята́я Тро́ице… Отче на́шъ… Іере́й: Яко Твое́ е́сть Ца́рство… Го́споди, поми́луй, 12. Сла́ва, и ны́нѣ. Пріиди́те, поклони́мся.., три́жды. Псало́мъ 50-й: Поми́луй мя́, Бо́же… Та́же:

Кано́нъ ко Святѣ́й и Живонача́льнѣй Тро́ицѣ, его́же краестро́чіе: Еди́но Тя́ пою́ Тричи́сленное естество́. Творе́ніе Митрофа́ново.

Пѣ́снь 1.
Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Еди́но Тріѵпоста́сное Нача́ло серафи́ми немо́лчно сла́вятъ, Безнача́льное, Присносу́щное, Твори́тельное всѣ́хъ, Непостижи́мое, е́же и вся́къ язы́къ вѣ́рно почита́етъ пѣ́сньми.

Да человѣ́комъ Еди́нственное, Трисія́тельное Твое́ яви́ши Божество́, созда́вый пре́жде человѣ́ка, по Твоему́ о́бразу вообрази́лъ еси́, у́мъ ему́, и сло́во, и ду́хъ да́въ, я́ко Человѣколю́бецъ.

Сла́ва: Свы́ше показу́я Еди́нственную Богонача́льныхъ въ Тріе́хъ Ѵпоста́сѣхъ держа́ву, Отче, ре́клъ еси́ Равнодѣ́тельному Твоему́ Сы́ну и Ду́ху: пріиди́те, соше́дше, язы́ки и́хъ слія́имъ.

И ны́нѣ, богоро́диченъ: Умъ у́бо е́сть Нерожде́нный Оте́цъ, обра́зно прему́дрыми предрече́ся; Сло́во же Собезнача́льно, Соесте́ственный Сы́нъ; и Ду́хъ Святы́й, Иже въ Дѣ́вѣ Сло́ва созда́вшій воплоще́ніе.

Пѣ́снь 3.
Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме[2] неизрече́нныя сла́вы Твоея́, Человѣколю́бче.

Ты́ дре́вле я́вѣ Авраа́му я́ко яви́лся еси́ Тріѵпоста́сный, Еди́нственъ же естество́мъ Божества́, богосло́вія и́стиннѣйшее обра́зно яви́лъ еси́, и вѣ́рно пое́мъ Тя́, Единонача́льнаго Бо́га и Трисо́лнечнаго.

Изъ Тебе́ роди́выйся боголѣ́пно нетлѣ́нно, Отче, возсія́ Свѣ́тъ отъ Свѣ́та, Сы́нъ Непремѣ́ненъ, и Ду́хъ Боже́ственный, Свѣ́тъ, изы́де; Еди́наго Божества́ Свѣ́тлости Тріѵпоста́снѣй покланя́емся вѣ́рно и сла́вимъ.

Сла́ва: Еди́ница Тро́ица преесте́ственнѣ, неизрече́нно па́че смы́сла, у́мными существы́ сла́вится, трисвяты́ми гла́сы немо́лчную вопію́щими хвалу́. Имиже согла́сно пое́тся и на́ми Тріѵпоста́сный Госпо́дь.

[И ны́нѣ,] богоро́диченъ: Изъ Тебе́ вре́меннѣ безъ сѣ́мене произы́де Вышшелѣ́тный, уподо́бивыйся на́мъ Неви́димый, и еди́ному естеству́ и госпо́дьству Отчу научи́въ, и Сыно́вню, и Ду́хову, Богоро́дице, тѣ́мже Тя́ сла́вимъ.

Го́споди, поми́луй, три́жды.

Сѣда́ленъ, гла́съ 1. Подо́бенъ: Гро́бъ Тво́й, Спа́се.
Отцу́ и Сы́ну поклони́мся вси́ и Ду́ху Пра́вому и Равноче́стну. Сла́ва Тро́ицѣ Несозда́ннѣй и Пребоже́ственнѣй Си́лѣ, Юже сла́вятъ безпло́тныхъ чи́нове. Сію́ дне́сь и земноро́дніи со стра́хомъ вѣ́рно восхва́лимъ.

Сла́ва, и ны́нѣ, богоро́диченъ:
Наста́ви ны́ на пу́ть покая́нія, уклоня́ющіяся при́сно къ безпу́тіемъ зо́лъ и Преблага́го прогнѣ́вающія Го́спода, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе пребыва́ніе.

Пѣ́снь 4.
Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Возсія́й ми́, Богонача́ліе Трисо́лнечное, сія́ньми Твои́хъ богодѣ́тельныхъ озаре́ній въ серде́чныхъ очесѣ́хъ добро́тѣ мечта́тися, е́же па́че ума́ богонача́льныя Твоея́ свѣ́тлости и свѣтодѣ́тельнаго и сла́дкаго прича́стія.

Пе́рвѣе небеса́ утверди́лъ еси́, Го́споди, и всю́ си́лу и́хъ Сло́вомъ Твои́мъ Вседѣ́тельнымъ и Ду́хомъ у́стъ Соесте́ственнымъ, съ Ни́миже влады́чествуеши вся́ческими въ Трисія́тельнѣ Единонача́ліи Божества́.

Сла́ва: Яко созда́лъ еси́ мя́ по о́бразу Твоему́ и по подо́бію, Богонача́льная и Вседѣ́тельная Тро́ице, Неслія́нная Еди́нице, вразуми́, просвѣти́, во е́же твори́ти во́лю Твою́ святу́ю, благу́ю въ крѣ́пости и соверше́нную.

[И ны́нѣ,] богоро́диченъ: Родила́ еси́ отъ Тро́ицы Еди́наго, Пречи́стая, Богонача́льнѣйша Сы́на, вопло́щшася на́съ ра́ди изъ Тебе́, озаря́юща земноро́дныхъ Трисо́лнечнаго Божества́ невече́рнимъ свѣ́томъ и сія́нми.

Пѣ́снь 5.
Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Яже пе́рвой а́нгельской непосре́дственнѣ у́твари, непристу́пными Твоея́ добро́ты луча́ми осіява́емой бы́ти баговоли́вши, Твои́ми свѣ́тлостьми просвѣти́, Тро́ице Единонача́льственнѣйшая, правосла́вно Тебе́ пою́щихъ.

Ны́нѣ естество́, Еди́нственное Богонача́лія Трисо́лнечное, воспѣва́етъ Тя́, е́же осуществова́ла еси́ за бла́гость, прегрѣше́ній избавле́ніе и напа́стей испроша́ющи, и бѣ́дъ, и скорбе́й.

Сла́ва: Отца́ и Сы́на и Ду́ха Свята́го, Еди́но Естество́ и Божество́ вѣ́рою сла́вимъ, дѣли́тельное, нераздѣ́льное, Еди́наго Бо́га неви́димыя и ви́димыя же тва́ри.

[И ны́нѣ,] богоро́диченъ: Рече́нія вся́ проро́ческая преднаписа́ша, Пречи́стая, Твое́ Рождество́, неизрече́нное и неудо́бь сказу́емое, е́же мы́ позна́хомъ, тайноводи́тельное Еди́нственнаго и Трисо́лнечнаго Божества́.

Пѣ́снь 6.
Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Равноста́тную си́лу, я́ко иму́щи, Тро́ице Пресу́щественная, въ то́ждествѣ хотѣ́нія — Еди́ница еси́ проста́ и нераздѣ́льна. Ты́ у́бо на́съ си́лою Твое́ю соблюди́. [Два́жды.]

Сла́ва: Ты́ вся́ вѣ́ки хотѣ́ніемъ Твои́мъ, я́ко Бла́га, соста́вила еси́ отъ не су́щихъ, Непостижи́мая Тро́ице, та́же и человѣ́ка создала́ еси́. Но и ны́нѣ отъ вся́каго изба́ви мя́ обстоя́нія.

[И ны́нѣ,] богоро́диченъ: Со́лнца Незаходи́маго до́мъ была́ еси́, Созда́вшаго и въ чину́ Поста́вльшаго свѣти́ла вели́кая всеси́льнѣ, Пречи́стая Дѣ́во Богоневѣ́стная. Но и ны́нѣ страсте́й мя́ изба́ви помраче́нія.

Го́споди, поми́луй, три́жды.

Сѣда́ленъ, гла́съ 1. Подо́бенъ: Гро́бъ Тво́й, Спа́се.
Тро́ицѣ Святѣ́й и Нераздѣ́льному Естеству́, — въ Тре́хъ Ли́цѣхъ сѣко́мѣй несѣ́чено и пребыва́ющей нераздѣ́льней по существу́ Божества́, — поклони́мся, земноро́дніи, со стра́хомъ и сла́вимъ, я́ко Творца́ и Влады́ку, Бо́га Преблага́го.

Сла́ва и ны́нѣ, богоро́диченъ:
Упра́ви, Чи́стая, окая́нную мою́ ду́шу, и уще́дри ю́, отъ мно́жества прегрѣше́ній во глубину́ попо́лзшуюся поги́бели, Всенепоро́чная, и въ ча́съ мя́ стра́шный сме́ртный Ты́ исхити́ оглаго́лующихъ де́моновъ и вся́кія му́ки.

Пѣ́снь 7.
Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Сло́ве Бо́жій, Соесте́ственное Сія́ніе Вседержи́теля Бо́га, я́коже обѣща́лъ еси́, е́же у Тебе́, богодѣ́тельное вселе́ніе сотвори́, я́ко Благоутро́бенъ, со Отце́мъ Твои́мъ и Ду́хомъ, и стра́шна бѣсо́мъ мя́ покажи́ и страсте́мъ. [Два́жды.]

Сла́ва: Да Твоего́ благоутро́бія, Влады́ко, пока́жеши пучи́ну на́мъ, Сы́на Твоего́ посла́въ къ на́шему смире́нію, па́ки вообрази́лъ еси́ на пе́рвую свѣ́тлость. Но и ны́нѣ Боже́ственнымъ мя́ вразуми́ Ду́хомъ.

[И ны́нѣ,] богоро́диченъ: Иже на херуви́мстѣмъ престо́лѣ Носи́мый и всѣ́хъ Ца́рь, во чре́вѣ Твое́мъ дѣ́вственнѣмъ всели́ся, Пречи́стая, всѣ́хъ избавля́я отъ истлѣ́нія, я́ко Человѣколю́бецъ. Но и ны́нѣ Твои́ми мя́ моли́твами сохрани́.

Ма́ніемъ богодѣ́тельнымъ, Го́споди всѣ́хъ, Тріѵпоста́сне и Вседержи́телю, небеса́ просте́рлъ еси́, я́ко ко́жу, та́же и земли́ повѣ́силъ еси́ глубину́ всемогу́щею Твое́ю дла́нію. Тѣ́мже и рабы́ Твоя́ укрѣпи́ любо́вію и вѣ́рою Твое́ю, Человѣколю́бче, да Тя́ сла́вимъ жела́ніемъ во вѣ́ки. [Два́жды.]

Сла́ва: Просвѣти́ Богонача́льнымъ свѣ́томъ пою́щихъ Тя́, Трисо́лнечный Свѣ́те Ли́цы, Еди́нственный же па́ки Существо́мъ, и къ Твои́мъ свѣтода́тельнымъ луча́мъ взира́ти при́сно, и́миже насы́щуся сла́вы Твоея́ сла́дкія, и свѣтода́тельныя, и пребога́тыя, и превозношу́ Тя́ вѣ́рно во вѣ́ки.

[И ны́нѣ,] богоро́диченъ: Вознесе́ на небеса́, человѣ́ческое пріе́мъ естество́ непрело́жнѣ Сы́нъ Тво́й, Пречи́стая Богоро́дице, превосхожде́ніемъ бла́гости изба́вль дре́внія тли́. Ему́же благода́рственно воспѣва́емъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.
Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Спаси́, Спаси́телю тва́ри, чу́вственныя же и у́мныя рабы́ Твоя́ отъ вра́жія навѣ́та и озлобле́нія, Пресвята́я Тро́ице Единосу́щная, и соблюда́й ста́до Твое́ вы́ну ненавѣ́тно. [Два́жды.]

Сла́ва: Да глубину́ неизче́тную су́щественныя пока́жеши Твоея́ бла́гости, да́лъ еси́ на́мъ обѣ́ты, Трисо́лнечный и Единонача́льный Бо́же Всеси́льный, спаси́тельныя Твои́мъ рабо́мъ, и́хже соверши́ти сподо́би.

[И ны́нѣ,] богоро́диченъ: При́зри на на́ша моле́нія, Иже въ Тріе́хъ Богонача́льныхъ Ѵпоста́сѣхъ, Еди́нъ сы́й Бо́гъ во и́стинѣ вѣ́руемый, и пода́ждь Твои́мъ рабо́мъ утѣше́ніе моли́твами Пречи́стыя и Препѣ́тыя Богома́тере.

Посе́мъ припѣ́вы Григо́рія Синаи́та, глаго́лемы по Тро́ичныхъ кано́нѣхъ по вся́ недѣ́ли: Досто́йно е́сть, я́ко вои́стинну… [Пи́саны въ концѣ́ кни́ги сея́.] И про́чее полу́нощницы. И отпу́стъ.

ВЪ НЕДѢЛЮ НА УТРЕНИ,
По шестопса́лміи: Бо́гъ Госпо́дь.., на гла́съ 1. И глаго́лемъ тропа́рь воскре́сный, два́жды, и богоро́диченъ еди́ножды [пи́саны на вели́цѣй вече́рни]. Та́же обы́чное стихосло́віе псалти́ря.

По 1-мъ стихосло́віи сѣда́льны воскре́сны, гла́съ 1:
Гро́бъ Тво́й, Спа́се, во́ини стрегу́щіи, ме́ртвіи отъ облиста́нія я́вльшагося а́нгела бы́ша, проповѣ́дающа жена́мъ Воскресе́ніе. Тебе́ сла́вимъ, тли́ Потреби́теля, Тебѣ́ припа́даемъ, Воскре́сшему изъ гро́ба и Еди́ному Бо́гу на́шему.

Сти́хъ: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть.

Ко Кресту́ пригво́ждься во́лею, Ще́дре, во гро́бѣ положе́нъ бы́въ, я́ко ме́ртвъ, Животода́вче, держа́ву сте́рлъ еси́, Си́льне, сме́ртію Твое́ю; Тебе́ бо вострепета́ша вра́тницы а́довы, Ты́ совоздви́глъ еси́ отъ вѣ́ка уме́ршія, я́ко Еди́нъ Человѣколю́бецъ.

Сла́ва, и ны́нѣ, богоро́диченъ:
Ма́терь Тя́ Бо́жію свѣ́мы вси́, Дѣ́ву вои́стинну, и по рождествѣ́ я́вльшуюся, и́же любо́вію прибѣга́ющіи къ Твое́й бла́гости: Тебе́ бо и́мамы грѣ́шніи предста́тельство, Тебе́ стяжа́хомъ въ напа́стехъ спасе́ніе, еди́ну Всенепоро́чную.

По 2-мъ стихосло́віи сѣда́льны, гла́съ 1 Подо́бенъ: Ка́мени запеча́тану.
Жены́ ко гро́бу пріидо́ша ура́нша, и а́нгельское явле́ніе ви́дѣвша, трепета́ху: гро́бъ облиста́ Жи́знь, чу́до удивля́ше я́. Сего́ ра́ди ше́дша, ученико́мъ проповѣ́даху Воста́ніе: а́дъ плѣни́ Христо́съ, я́ко еди́нъ Крѣ́покъ и Си́ленъ, и истлѣ́вшія вся́ совоздви́же, осужде́нія стра́хъ разруши́въ Кресто́мъ.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

На Крестѣ́ пригвозди́лся еси́, Животе́ всѣ́хъ, и въ ме́ртвыхъ вмѣни́лся еси́, Безсме́ртный Го́споди, воскре́слъ еси́ тридне́венъ, Спа́се, совоздви́гъ Ада́ма отъ тлѣ́нія. Сего́ ра́ди си́лы небе́сныя вопія́ху Тебѣ́, Жизнода́вче Христе́: сла́ва Воскресе́нію Твоему́, сла́ва снизхожде́нію Твоему́, еди́не Человѣколю́бче.

Сла́ва, и ны́нѣ, богоро́диченъ:
Марíе, честно́е Влады́ки прія́телище, воскреси́ ны́, па́дшія въ про́пасть лю́таго отча́янія, и прегрѣше́ній, и скорбе́й. Ты́ бо еси́ грѣ́шнымъ спасе́ніе, и по́мощь, и крѣ́пкое предста́тельство и спаса́еши рабы́ Твоя́.

Та́же: Блаже́ни непоро́чніи… Посе́мъ тропари́: Ангельскій собо́ръ… [Пи́саны въ концѣ́ кни́ги сея́.] Та́же ектенія́ ма́лая и

Ипакои́, гла́съ 1:
Разбо́йничо покая́ніе ра́й окра́де, пла́чь же мѵроно́сицъ ра́дость возвести́, я́ко воскре́слъ еси́, Христе́ Бо́же, подая́й мíрови ве́лію ми́лость.

Степе́нны: антифо́нъ 1, гла́съ 1, стихи́ повторя́юще:
Внегда́ скорбѣ́ти ми́, услы́ши моя́ болѣ́зни, Го́споди, Тебѣ́ зову́.

Пусты́ннымъ непреста́нное Боже́ственное жела́ніе быва́етъ, мíра су́щимъ су́етнаго кромѣ́[3].

Сла́ва: Свято́му Ду́ху че́сть и сла́ва, я́коже Отцу́ подоба́етъ, ку́пно же и Сы́ну, сего́ ра́ди да пое́мъ Тро́ицѣ Единодержа́віе.
И ны́нѣ, то́йже.

Антифо́нъ 2:
На го́ры Твои́хъ возне́слъ еси́ мя́ зако́новъ, добродѣ́тельми просвѣти́, Бо́же, да пою́ Тя́.

Десно́ю Твое́ю руко́ю пріи́мъ Ты́, Сло́ве, сохрани́ мя́, соблюди́, да не о́гнь мене́ опали́тъ грѣхо́вный.

Сла́ва: Святы́мъ Ду́хомъ вся́кая тва́рь обновля́ется, па́ки теку́щи на пе́рвое, равномо́щенъ бо е́сть Отцу́ и Сло́ву.
И ны́нѣ, то́йже.

Антифо́нъ 3:
О ре́кшихъ мнѣ́, — вни́демъ во дворы́ Госпо́дни, — возвесели́ся мо́й ду́хъ, сра́дуется се́рдце.

Въ дому́ Дави́довѣ стра́хъ вели́къ, та́мо бо престо́ломъ поста́вленнымъ, су́дятся вся́ племена́ земна́я и язы́цы.

Сла́ва: Свято́му Ду́ху че́сть, поклоне́ніе, сла́ву и держа́ву, я́коже Отцу́ досто́итъ и Сы́нови подоба́етъ приноси́ти, Еди́ница бо е́сть Тро́ица Естество́мъ, но не Ли́цы.
И ны́нѣ, то́йже.

Проки́менъ, гла́съ 1: Ны́нѣ воскресну́, глаго́летъ Госпо́дь,* положу́ся во спасе́ніе, не обиню́ся о не́мъ. Сти́хъ: Словеса́ Госпо́дня, словеса́ чи́ста. Вся́кое дыха́ніе… Ева́нгеліе у́треннее рядово́е.

Воскресе́ніе Христо́во ви́дѣвше, поклони́мся Свято́му Го́споду Іису́су, еди́ному Безгрѣ́шному. Кресту́ Твоему́ покланя́емся, Христе́, и свято́е Воскресе́ніе Твое́ пое́мъ и сла́вимъ: Ты́ бо еси́ Бо́гъ на́шъ, ра́звѣ Тебе́ ино́го не зна́емъ, и́мя Твое́ имену́емъ. Пріиди́те, вси́ вѣ́рніи, поклони́мся Свято́му Христо́ву Воскресе́нію: се́ бо пріи́де Кресто́мъ ра́дость всему́ мíру. Всегда́ благословя́ще Го́спода, пое́мъ Воскресе́ніе Его́: распя́тіе бо претерпѣ́въ, сме́ртію сме́рть разруши́.

Псало́мъ 50-й: Поми́луй мя́, Бо́же… Сла́ва: Моли́твами апо́столовъ, Ми́лостиве, очи́сти мно́жества согрѣше́ній на́шихъ. И ны́нѣ: Моли́твами Богоро́дицы, Ми́лостиве, очи́сти мно́жества согрѣше́ній на́шихъ. Та́же, гла́съ 6: Поми́луй мя́, Бо́же, по вели́цѣй ми́лости Твое́й и по мно́жеству щедро́тъ Твои́хъ очи́сти беззако́ніе мое́. Посе́мъ стихи́ра: Воскре́съ Іису́съ отъ гро́ба, я́коже прорече́, даде́ на́мъ живо́тъ вѣ́чный и ве́лію ми́лость.

Спаси́, Бо́же, лю́ди Твоя́… И возгла́съ: Ми́лостію и щедро́тами и человѣколю́біемъ…

Кано́ны: воскре́сный на 4, крестовоскре́сный на 3, и Богоро́диченъ на 3, мине́и на 4. Аще же пра́зднуется святы́й на 6: крестовоскре́сный на 2 и Богоро́дицы на 2.

Кано́нъ воскре́сный, гла́съ 1:

Пѣ́снь 1.
Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Припѣ́въ: Сла́ва, Го́споди, свято́му Воскресе́нію Твоему́.

Тропа́рь: Иже рука́ма пречи́стыма отъ пе́рсти богодѣ́тельнѣ испе́рва созда́въ мя́, ру́цѣ распросте́рлъ еси́ на крестѣ́, отъ земли́ взыва́я тлѣ́нное мое́ тѣ́ло, е́же отъ Дѣ́вы прія́лъ еси́.

Умерщвле́ніе подъя́лъ еси́ мене́ ра́ди, и ду́шу сме́рти пре́далъ еси́, Иже вдохнове́ніемъ боже́ственнымъ ду́шу ми́ вложи́вый, и отрѣши́въ вѣ́чныхъ у́зъ, и совоскреси́въ нетлѣ́ніемъ просла́вилъ еси́.

Богоро́диченъ: Ра́дуйся, благода́ти исто́чниче; ра́дуйся лѣ́ствице и две́ре небе́сная; ра́дуйся свѣ́щнице, и ру́чко злата́я, и горо́ несѣко́мая, Яже Жизнода́вца Христа́ мíрови ро́ждшая.

Инъ кано́нъ, крестовоскре́сный.

Пѣ́снь 1, гла́съ то́йже.
Подо́бенъ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Христо́съ обожа́етъ мя́ воплоща́яся, Христо́съ мя́ возно́ситъ смиря́яся, Христо́съ безстра́стна мя́ содѣ́ловаетъ, стражда́ Жизнода́вецъ естество́мъ пло́ти. Тѣ́мже воспѣва́ю благода́рственную пѣ́снь, я́ко просла́вися.

Христо́съ возно́ситъ мя́ распина́емь, Христо́съ совоскреша́етъ мя́ умерщвля́емь, Христо́съ жи́знь мнѣ́ да́руетъ. Тѣ́мже съ весе́ліемъ рука́ма плеща́я, пою́ спаси́телю побѣ́дную пѣ́снь, я́ко просла́вися.

Богоро́диченъ: Бо́га, Дѣ́во, зачала́ еси́, Христа́ же въ де́вствѣ родила́ еси́ изъ Тебе́ Вопло́щшася, Пречи́стая, еди́наго ѵпоста́сію Единоро́днаго, во двою́ же существу́ познава́емаго Сы́на, я́ко просла́вися.

Инъ кано́нъ, Пресвятѣ́й Богоро́дицѣ.

Пѣ́снь 1, гла́съ то́йже.
Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Ку́ю Ти́ досто́йную пѣ́снь на́ше принесе́тъ неможе́ніе? То́чію обра́довательную, е́йже на́съ Гавріи́лъ та́йно научи́лъ е́сть: ра́дуйся, Богоро́дице Дѣ́во, Ма́ти Неневѣ́стная.

Приснодѣ́вѣ и Ма́тери Царя́ вы́шнихъ си́лъ отъ чистѣ́йша се́рдца, вѣ́рніи, духо́внѣ возопіи́мъ: ра́дуйся, Богоро́дице Дѣ́во, Ма́ти Неневѣ́стная.

Безмѣ́рная бе́здна Твоего́ непостижи́маго Рождества́, Всечи́стая! Вѣ́рою несумне́нною у́бо чи́стѣ прино́симъ Ти́, глаго́люще: ра́дуйся, Богоро́дице Дѣ́во, Ма́ти Неневѣ́стная.

Та́же Мине́и. Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.
Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Бо́гъ сы́й мнѣ́, Бла́же, па́дшаго уще́дрилъ еси́, и сни́ти ко мнѣ́ благоволи́въ, возне́слъ мя́ еси́ распя́тіемъ, е́же вопи́ти Тебѣ́, Святы́й: хра́ме одушевле́нный неизрече́нныя Твоея́ сла́вы, Человѣколю́бче [4].

Живо́тъ ѵпоста́сный, Христе́, сы́й, въ истлѣ́вша мя́, я́ко Милосе́рдый Бо́гъ, обо́лкся, въ пе́рсть сме́ртную соше́дъ, Влады́ко, сме́ртную держа́ву разруши́лъ еси́, и ме́ртвъ тридне́венъ, воскре́съ, въ нетлѣ́ніе мя́ обле́клъ еси́.

Богоро́диченъ: Бо́га заче́нши во чре́вѣ, Дѣ́во, Ду́хомъ Пресвяты́мъ, пребыла́ еси́ неопали́ма, поне́же Тя́ купина́ законополо́жнику Моисе́ю, пали́мую нежего́мо, я́вѣ предвозвѣсти́, Огнь нестерпи́мый пріе́мшую.

Инъ.
Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Иже на Свое́ ра́мо заблужда́емое овча́ взе́мшему и низложи́вшему Дре́вомъ его́ грѣ́хъ, Христу́ Бо́гу возопіи́мъ: воздви́гнувый ро́гъ на́шъ, Свя́тъ еси́, Го́споди.

Возве́дшему Па́стыря Вели́каго изъ а́да, Христа́, и священнонача́ліемъ Его́ апо́столы я́вѣ язы́ки упа́сшему, и́стиною и Боже́ственнымъ, вѣ́рніи, Ду́хомъ да послу́жимъ.

Иже отъ Дѣ́вы воплоти́вшемуся безъ сѣ́мене во́лею Сы́ну, и ро́ждшую по рождествѣ́ Боже́ственною си́лою Чи́стую Дѣ́ву сохра́ншему, Иже надъ всѣ́ми Бо́гу возопіи́мъ: Свя́тъ еси́, Го́споди.

Инъ.
Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Облакъ Тя́ ле́гкій нело́жно, Дѣ́во, имену́емъ, проро́ческимъ возслѣ́дующе рече́ніемъ: пріи́де бо на Тебѣ́ Госпо́дь низложи́ти Еги́петскія пре́лести рукотворе́нія и просвѣти́ти си́мъ служа́щія.

Тя́ запеча́танный вои́стинну, ли́къ проро́ческій, исто́чникъ и заключе́нную две́рь именова́, дѣ́вства Твоего́, Всепѣ́тая, я́вственнѣ зна́менія на́мъ пи́шуще: е́же сохрани́ла еси́ и по рождествѣ́.

Ума́ пресу́щественна ви́дѣти, я́коже мо́щно, сподо́блься Гавріи́лъ, Дѣ́во Всенепоро́чная, ра́достный Тебѣ́ гла́съ принесе́, Сло́ва зача́тіе я́вственнѣ возвѣща́ющій и неизрече́нное рождество́ проповѣ́дающій.

Кто́ се́й Спа́съ, Иже изъ Едо́ма исходя́, вѣне́цъ нося́ терно́венъ, очервле́нну ри́зу имы́й, на Дре́вѣ ви́ся? — Изра́илевъ е́сть Се́й Святы́й во спасе́ніе на́ше и обновле́ніе.

Ви́дите, лю́діе непокори́віи, и устыди́теся, Его́же бо, я́ко злодѣ́я, вы́ вознести́ на кре́стъ у Пила́та испроси́сте умовре́днѣ, сме́рти разруши́въ си́лу, боголѣ́пно воскре́съ изъ гро́ба.

Богоро́диченъ: Дре́во Тя́, Дѣ́во, жи́зни вѣ́мы: не бо́ снѣ́ди пло́дъ смертоно́сный человѣ́комъ изъ Тебе́ прозябе́, но живота́ присносу́щнаго наслажде́ніе во спасе́ніе на́съ, пою́щихъ Тя́.

Инъ.
Ирмо́съ: Же́злъ изъ ко́рене Іессе́ова и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Кто́ Се́й красе́нъ изъ Едо́ма, и Сего́ очервле́ніе ри́зное отъ виногра́да Восо́рска? — Красе́нъ, я́ко Бо́гъ, я́ко человѣ́къ же, кро́вію пло́ти ри́зу очервле́ну нося́. Ему́же пое́мъ, вѣ́рніи: сла́ва си́лѣ Твое́й, Го́споди.

Христо́съ бу́дущихъ бла́гъ я́влься Архіере́й, грѣ́хъ на́шъ разори́лъ е́сть, и показа́въ стра́ненъ пу́ть Свое́ю Кро́вію, въ лу́чшую и соверше́ннѣйшую вни́де ски́нію, Предте́ча на́шъ во свята́я.

Богоро́диченъ: Евинъ дре́вній до́лгъ испроси́ла еси́, Всепѣ́тая, у Иже на́съ ра́ди Явльшагося но́ваго Ада́ма. Соедини́въ бо Себѣ́ чи́стымъ зача́тіемъ пло́ть у́мную, одушевле́нную, изъ Тебе́ произы́де Христо́съ, еди́нъ во обою́ Госпо́дь.

Инъ.
Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Слы́ши чуде́съ, не́бо, и внуша́й, земле́, я́ко Дщи́ пе́рстнаго у́бо па́дшаго Ада́ма, Бо́гу нарече́на бы́сть и Своему́ Содѣ́телю Роди́тельница на спасе́ніе на́ше и обновле́ніе.

Пое́мъ вели́кое и стра́шное Твое́ та́инство, премíрныхъ бо утаи́вся чинонача́лій, на Тя́ Иже Сы́й сни́де, я́ко до́ждь на руно́, Всепѣ́тая, на спасе́ніе на́съ, пою́щихъ Тя́.

Святы́хъ Свята́я, Богоро́дице Всепѣ́тая, ча́яніе язы́ковъ и спасе́ніе вѣ́рныхъ, изъ Тебе́ возсія́ Изба́витель, и Жизнода́вецъ, и Госпо́дь, Его́же моли́ спасти́ся рабо́мъ Твои́мъ.

Пѣ́снь 5.
Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Па́стыря овца́мъ Вели́каго и Го́спода іуде́и дре́вомъ Кре́стнымъ умертви́ша, но То́й, я́ко о́вцы, ме́ртвыя во а́дѣ погребе́нныя, держа́вы сме́ртныя изба́ви.

Кресто́мъ Твои́мъ ми́ръ благовѣсти́въ и проповѣ́давъ плѣ́ннымъ, Спа́се мо́й, оставле́ніе, держа́ву иму́щаго посрами́лъ еси́, Христе́, на́га, обнища́вша показа́вый Боже́ственнымъ Воста́ніемъ Твои́мъ.

Богоро́диченъ: Проше́нія вѣ́рно прося́щихъ, Всепѣ́тая, не пре́зри, но пріими́ и сія́ доноша́й Сы́ну Твоему́, Пречи́стая, Бо́гу Еди́ному Благодѣ́телю, Тебе́ бо Предста́тельницу стяжа́хомъ.

Инъ.
Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

О, бога́тство и глубино́ прему́дрости Бо́жія! Прему́дрыя объе́мляй Госпо́дь, отъ си́хъ кова́рства изба́вилъ е́сть на́съ, пострада́въ бо во́лею не́мощію плотско́ю, Свое́ю крѣ́постію животворя́й ме́ртвыя, воскреси́лъ е́сть.

Бо́гъ сы́й соединя́ется пло́ти на́съ ра́ди, и распина́ется, и умира́етъ, погреба́ется и па́ки воскреса́етъ, и восхо́дитъ свѣ́тло съ пло́тію Свое́ю Христо́съ ко Отцу́, съ не́юже пріи́детъ и спасе́тъ благоче́стно Тому́ служа́щія.

Богоро́диченъ: Святы́хъ Свята́я, Дѣ́во Чи́стая, святы́хъ Свята́го родила́ еси́, всѣ́хъ освяща́ющаго Христа́ Изба́вителя. Тѣ́мже Тя́, Цари́цу и Влады́чицу всѣ́хъ, я́ко Ма́терь Зижди́теля тва́рей проповѣ́дуемъ.

Инъ.
Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Веселя́тся небе́сныя си́лы, зря́ще Тя́, ра́дуются съ ни́ми человѣ́ковъ собра́нія, Рождество́мъ бо Твои́мъ совокупи́шася, Дѣ́во Богоро́дице, е́же досто́йно сла́вимъ.

Да дви́жатся вси́ язы́цы человѣ́честіи и мы́сли къ похвалѣ́ человѣ́ческаго, вои́стинну, удобре́нія, Дѣ́ва предстои́тъ я́вѣ, сла́вящи вѣ́рою Тоя́ пою́щихъ чудеса́.

Сла́вится пѣ́ніе всепрему́дрыхъ и похвала́, Дѣ́вѣ и Ма́тери Бо́жіи приноси́мая. Сла́вы бо бы́сть Сія́ хра́мъ Пребоже́ственныя, Юже досто́йно сла́вимъ.

Согрѣше́ніемъ первозда́ннаго, Го́споди, лю́тѣ уязви́хомся, ра́ною же исцѣли́хомся Твое́ю, е́юже за ны́ уязви́лся еси́, Христе́, Ты́ бо крѣ́пость немощству́ющихъ и исправле́ніе.

Возве́лъ ны́ еси́ изъ а́да, Го́споди, ки́та уби́въ всея́дца, Всеси́льне, Твое́ю держа́вою низложи́въ того́ си́лу, Ты́ бо Живо́тъ, и Свѣ́тъ еси́, и Воскре́сеніе.

Богоро́диченъ: Веселя́тся о Тебѣ́, Дѣ́во Пречи́стая, ро́да на́шего пра́отцы, Еде́мъ воспріе́мше Тобо́ю, его́же преступле́ніемъ погуби́ша. Ты́ бо, Чи́стая, и пре́жде Рождества́, и по Рождествѣ́ еси́.

Инъ.
Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Умъ сы́й безстра́стенъ и невеще́ственъ, примѣша́ется Христо́съ Бо́гъ человѣ́ческому уму́, хода́тайствующему Боже́ственнымъ естество́мъ, пло́ти же дебельство́мъ, и всему́ мнѣ́ непрело́женъ весьма́ соедини́ся, да спасе́ніе всему́ мнѣ́ па́дшему пода́стъ распина́емь.

Па́даетъ прельсти́вся Ада́мъ и запя́выйся сокруша́ется [5], наде́ждою обо́лганъ сы́й дре́вле обоже́нія, но востае́тъ соедине́ніемъ Сло́ва обожа́емь, и Стра́стію безстра́стіе пріе́млетъ, на престо́лѣ я́ко Сы́нъ сла́вится, сѣдя́й со Отце́мъ же и Ду́хомъ.

Богоро́диченъ: Нѣ́дръ не отсту́пль Безнача́льна Роди́теля, въ нѣ́дрѣхъ Чи́стыя Отрокови́цы водворя́ется и быва́етъ, Иже пре́жде безма́теренъ, безъ отца́ воплоща́емый, Иже пра́вдою Ца́рствуяй Бо́гъ. Сего́ неродосло́венъ стра́шный ро́дъ и неизрече́ненъ.

Инъ.
Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Предстоя́тъ раболѣ́пнѣ Рождеству́ Твоему́ чи́ни небе́сніи, дивя́щеся досто́йно Твоему́ безсѣ́менному Рождеству́, Приснодѣ́во, Ты́ бо, Чи́стая, и пре́жде Рождества́, и по Рождествѣ́ еси́.

Воплоти́ся пре́жде сы́й Безпло́тѣнъ, Сло́во изъ Тебе́, Пречи́стая, вся́ческая во́лею творя́й, безтѣле́сныхъ во́инства приведы́й отъ небытія́, я́ко Всеси́ленъ.

Умерщвле́нъ бы́сть вра́гъ живоно́снымъ Твои́мъ Плодо́мъ, Богоблагода́тная, и попра́нъ бы́сть а́дъ проявле́ннѣ, и и́же во у́захъ свободи́хомся. Тѣ́мже вопію́: стра́сти разруши́ се́рдца моего́.

Конда́къ, гла́съ 1. Подо́бенъ: Егда́ пріи́деши.
Воскре́слъ еси́, я́ко Бо́гъ, изъ гро́ба во сла́вѣ и мíръ совоскреси́лъ еси́; и естество́ человѣ́ческое, я́ко Бо́га, воспѣва́етъ Тя́ и сме́рть исчезе́; Ада́мъ же лику́етъ, Влады́ко; Ева, ны́нѣ отъ у́зъ избавля́ема, ра́дуется, зову́щи: Ты́ еси́, Иже всѣ́мъ подая́, Христе́, воскресе́ніе.

Икосъ:
Воскре́сшаго тридне́вно воспои́мъ, я́ко Бо́га Всеси́льна, и врата́ а́дова сте́ршаго и я́же отъ вѣ́ка изъ гро́ба воздви́гшаго, мѵроно́сицамъ я́вльшагося, я́коже благоизво́лилъ е́сть, пре́жде си́мъ е́же — ра́дуйтеся! — рекíй и апо́столомъ ра́дость возвѣща́я, я́ко еди́нъ Жизнода́вецъ. Тѣ́мже вѣ́рою жены́ ученико́мъ зна́менія побѣ́ды благовѣству́ютъ, и а́дъ стене́тъ, и сме́рть рыда́етъ, мíръ же весели́тся и вси́ съ ни́мъ ра́дуются. Ты́ бо по́далъ еси́, Христе́, всѣ́мъ Воскресе́ніе.

Пѣ́снь 7.
Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Убоя́ся земля́, сокры́ся со́лнце и поме́рче свѣ́тъ, раздра́ся церко́вная боже́ственная завѣ́са, ка́меніе же разсѣ́деся, на Крестѣ́ бо ви́ситъ Пра́ведный, хва́льный отце́въ Бо́гъ и препросла́вленъ.

Ты́ бы́въ а́ки безпомо́щенъ и уя́звенъ въ ме́ртвыхъ во́лею на́съ ра́ди, Превозноси́мый, вся́ свободи́лъ еси́ и держа́вною руко́ю совоскреси́лъ еси́, хва́льный отце́въ Бо́гъ и препросла́вленъ.

Богоро́диченъ: Ра́дуйся, исто́чниче присноживы́я воды́; ра́дуйся, раю́ пи́щный; ра́дуйся, стѣно́ вѣ́рныхъ; ра́дуйся, Неискусобра́чная; ра́дуйся, всемíрная ра́досте, Еюже на́мъ возсія́ хва́льный отце́въ Бо́гъ и препросла́вленъ.

Инъ.
Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Дре́вле у́бо проклята́ бы́сть земля́ Авелевою очервлени́вшися кро́вію братоубíйственною руко́ю; богото́чною же Твое́ю кро́вію благослови́ся окропле́на и, взыгра́ющи, вопіе́тъ: отце́въ Бо́же, благослове́нъ еси́.

Да рыда́ютъ іуде́йстіи богопроти́вніи лю́діе де́рзости убіе́нія Христо́ва; язы́цы же да веселя́тся, и рука́ми да воспле́щутъ, и вопію́тъ: отце́въ Бо́же, благослове́нъ еси́.

Се́ мѵроно́сицамъ облиста́яй, вопія́ше а́нгелъ: Воскресе́нія Христо́ва пріиди́те и ви́дите зна́менія — плащани́цу и гро́бъ, — и возопíйте: отце́въ Бо́же, благослове́нъ еси́.

Инъ.
Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Тя́, Богоро́дице, лѣ́ствицу Іа́ковъ проро́чески разумѣва́етъ, Тобо́ю бо Превозноси́мый на земли́ яви́ся и съ человѣ́ки поживе́, я́ко благоволи́, хва́льный отце́въ Бо́гъ и препросла́вленъ.

Ра́дуйся, Чи́стая, изъ Тебе́ про́йде Па́стырь, Иже во Ада́мову ко́жу обо́лкся вои́стинну, Превозноси́мый, во всего́ мя́ человѣ́ка за благоутро́біе непости́жное, хва́льный отце́въ Бо́гъ и препросла́вленъ.

Но́вый Ада́мъ отъ чи́стыхъ крове́й Твои́хъ Превѣ́чный Бо́гъ бы́сть вои́стинну. Его́же ны́нѣ моли́ обетша́вшаго мя́ обнови́ти, зову́ща: хва́льный отце́въ Бо́гъ и препросла́вленъ.

Пѣ́снь 8.
Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Иже во́лею вся́ творя́й и претворя́яй, обраща́яй сѣ́нь сме́ртную въ вѣ́чную жи́знь Стра́стію Твое́ю, Сло́ве Бо́жій, Тебе́ непреста́нно вся́ дѣла́ Госпо́дня, Го́спода, пои́мъ и превозно́симъ во вся́ вѣ́ки.

Ты́ разори́лъ еси́ сокруше́ніе, Христе́, и окая́нство во вратѣ́хъ и тверды́няхъ а́довыхъ, воскре́съ изъ гро́ба тридне́венъ. Тебе́ непреста́нно вся́ дѣла́, я́ко Го́спода, пою́тъ и превозно́сятъ во вся́ вѣ́ки.

Богоро́диченъ: Яже безъ сѣ́мене и преесте́ственнѣ отъ облиста́нія Боже́ственнаго Ро́ждшую Би́сѣра многоцѣ́ннаго, Христа́, воспои́мъ глаго́люще: благослови́те, вся́ дѣла́ Госпо́дня, Го́спода, по́йте и превозноси́те Его́ во вся́ вѣ́ки.

Инъ.
Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пріиди́те, лю́діе, поклони́мся мѣ́сту, на не́мже стоя́стѣ пречи́стѣи но́зѣ, и на Дре́вѣ боже́ственнѣи Христо́вѣ дла́ни животворя́щіи простро́стеся на спасе́ніе всѣ́хъ человѣ́ковъ, и Гро́бъ живо́тный обстоя́ще, пои́мъ: да благослови́тъ тва́рь вся́кая Го́спода и превозно́ситъ во вся́ вѣ́ки.

Обличи́ся богоубíйцъ іуде́овъ пребеззако́нное оклевета́ніе: Его́же бо лестца́ нареко́ша, воста́, я́ко Си́ленъ, наруга́вся безу́мнымъ печа́темъ. Тѣ́мже ра́дующеся, воспои́мъ: да благослови́тъ тва́рь вся́кая Го́спода и превозно́ситъ во вся́ вѣ́ки.

Тро́иченъ: Въ тріе́хъ свяще́ніихъ богосло́вяще и еди́номъ Госпо́дьствѣ сла́ву, серафи́ми пречи́стіи со стра́хомъ раболѣ́пно Тріѵпоста́сное сла́вятъ Божество́. Съ ни́миже и мы́ благоче́ствующе, воспои́мъ: да благослови́тъ тва́рь вся́кая Го́спода и превозно́ситъ во вся́ вѣ́ки.

Инъ.
Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Черто́гъ свѣтови́дный, изъ него́же всѣ́хъ Влады́ка, я́ко Жени́хъ произы́де, Христо́съ, воспои́мъ вси́, вопію́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Ра́дуйся, престо́ле сла́вный Бо́жій; ра́дуйся, вѣ́рныхъ стѣно́, Еюже су́щимъ во тмѣ́ возсія́ Свѣ́тъ, Христо́съ, Тебе́ блажа́щимъ и вопію́щимъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Спасе́нію вино́внаго на́мъ Го́спода ро́ждши, моли́ о всѣ́хъ вопію́щихъ прилѣ́жно, Дѣ́во Всепѣ́тая: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Та́же пое́мъ пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ., съ припѣ́вомъ: Честнѣ́йшую херуви́мъ…

О ка́ко, лю́діе беззако́нніи и непокори́віи, лука́вая совѣща́вше, го́рдаго и нечести́ваго оправди́ша, Пра́веднаго же на Дре́вѣ осуди́ша Го́спода Сла́вы, Его́же досто́йно велича́емъ!

Спа́се, Агнче Непоро́чне, Иже мíра грѣхи́ взе́мый, Тебе́ сла́вимъ Воскре́сшаго тридне́вно, со Отце́мъ и Боже́ственнымъ Твои́мъ Ду́хомъ, и Го́спода Сла́вы, Его́же богосло́вяще, велича́емъ.

Богоро́диченъ: Спаси́ лю́ди Твоя́, Го́споди, и́хже стяжа́лъ еси́ честно́ю Твое́ю Кро́вію, на враги́ крѣ́пость ИМПЕРАТОРУ да́руй и це́рквамъ Твои́мъ подая́ ми́ръ, Человѣколю́бче, Богоро́дицы моли́твами.

Инъ.
Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Просла́вися неизрече́нною си́лою Твое́ю Кре́стъ Тво́й, Го́споди, немощно́е бо Твое́ па́че си́лы всѣ́мъ яви́ся, и́мже си́льніи у́бо низложе́ни бы́ша на зе́млю и ни́щіи къ небеси́ возводи́ми быва́ютъ.

Умертви́ся ме́рзкая на́ша сме́рть изъ ме́ртвыхъ Воскре́сеніемъ: Ты́ бо яви́вся су́щимъ во а́дѣ, Христе́, живо́тъ дарова́лъ еси́[6]. Тѣ́мже Тя́, я́ко Жи́знь, и Воскре́сеніе, и Свѣ́тъ Ѵпоста́сный, пою́ще велича́емъ.

Тро́иченъ: Безнача́льное естество́ и Непредѣ́льное въ Тріе́хъ познава́ется Еди́нствѣхъ, Богонача́льныхъ Ѵпоста́сехъ Еди́но Божество́, во Отцѣ́ и Сы́нѣ и Ду́хѣ, на Не́же богому́дрый ИМПЕРАТОРЪ упова́я, спаса́ется.

Инъ.
Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Изъ ко́рене Дави́дова прозябла́ еси́ проро́ческаго, Дѣ́во, и богооте́ческаго, но и Дави́да, я́ко вои́стинну, Ты́ просла́вила еси́, я́ко ро́ждши проро́чествованнаго Го́спода сла́вы, Его́же досто́йно велича́емъ.

Вся́къ похва́льный, Пречи́стая, зако́нъ побѣжда́ется вели́чествомъ сла́вы Твоея́. Но, о Влады́чице, отъ ра́бъ Твои́хъ недосто́йныхъ, отъ любве́ Тебѣ́ приноси́мое пріими́, Богоро́дице, со усе́рдіемъ пѣ́ніе похва́льное.

О, па́че ума́ чуде́съ Твои́хъ! Ты́ бо, Дѣ́во, еди́на па́че со́лнца всѣ́мъ дала́ еси́ разумѣ́ти новѣ́йшее чу́до, Всечи́стая, Твоего́ Рождества́ непостижи́маго. Тѣ́мже Тя́ вси́ велича́емъ.

По катава́сіи ектенія́ ма́лая. Та́же: Свя́тъ Госпо́дь Бо́гъ на́шъ.., три́жды. Ексапостила́рій у́тренній.

На хвали́техъ стихи́ры воскре́сны, гла́съ 1:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Пое́мъ Твою́, Христе́, спаси́тельную Стра́сть и сла́вимъ Твое́ Воскресе́ніе.

Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́.

Кре́стъ претерпѣ́вый, и сме́рть упраздни́вый, и воскресы́й изъ ме́ртвыхъ, умири́ на́шу жи́знь, Го́споди, я́ко еди́нъ Всеси́ленъ.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Ада плѣни́вый и человѣ́ка воскреси́вый Воскресе́ніемъ Твои́мъ, Христе́, сподо́би на́съ чи́стымъ се́рдцемъ Тебе́ пѣ́ти и сла́вити.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Боголѣ́пное Твое́ снизхожде́ніе сла́вяще, пое́мъ Тя́, Христе́: роди́лся еси́ отъ Дѣ́вы и неразлу́ченъ бы́лъ еси́ отъ Отца́; пострада́лъ еси́, я́ко человѣ́къ, и во́лею претерпѣ́лъ еси́ кре́стъ; воскре́слъ еси́ отъ гро́ба, я́ко отъ черто́га произше́дъ, да спасе́ши мíръ, Го́споди, сла́ва Тебѣ́.

Ины стихи́ры, анато́ліевы, гла́съ то́йже:

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Егда́ пригвозди́лся еси́ на дре́вѣ Кре́стнѣмъ, тогда́ умертви́ся держа́ва вра́жія, тва́рь поколеба́ся стра́хомъ Твои́мъ и а́дъ плѣне́нъ бы́сть держа́вою Твое́ю, ме́ртвыя отъ гро́бъ воскреси́лъ еси́ и разбо́йнику ра́й отве́рзлъ еси́, Христе́ Бо́же на́шъ, сла́ва Тебѣ́.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Рыда́юща со тща́ніемъ гро́ба Твоего́ доше́дша честны́я жены́, обрѣ́тша же гро́бъ отве́рстъ и увѣ́дѣвше отъ а́нгела но́вое и пресла́вное чу́до, возвѣсти́ша апо́столомъ, я́ко воскре́се Госпо́дь, да́руяй мíрови ве́лію ми́лость.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Страсте́й Твои́хъ Боже́ственнымъ я́звамъ покланя́емся, Христе́ Бо́же, и е́же въ Сіо́нѣ Влады́чнему священнодѣ́йствію, на коне́цъ вѣко́въ богоявле́ннѣ бы́вшему, и́бо во тмѣ́ спя́щія Со́лнце просвѣти́ Пра́вды, къ невече́рнему наставля́я сія́нію, Го́споди, сла́ва Тебѣ́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Любомяте́жный ро́де евре́йскій, внуши́те, гдѣ́ су́ть, и́же къ Пила́ту прише́дшіи? Да реку́тъ стрегу́щіи во́ини: гдѣ́ су́ть печа́ти гро́бныя? Гдѣ́ преложе́нъ бы́сть Погребе́нный? Гдѣ́ про́данъ бы́сть Непрода́нный? Ка́ко укра́дено бы́сть Сокро́вище? Что́ оклевету́ете Спа́сово Воста́ніе, пребеззако́ніи іуде́и? Воскре́се, Иже въ ме́ртвыхъ свобо́дь, и подае́тъ мíрови ве́лію ми́лость.

Сла́ва, стихи́ра ева́нгельская у́тренняя. И ны́нѣ, [гла́съ 2]:
Преблагослове́нна еси́, Богоро́дице Дѣ́во, Вопло́щшимбося изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́.

Славосло́віе вели́кое. Та́же тропа́рь воскре́сенъ:
Дне́сь спасе́ніе мíру бы́сть, пое́мъ Воскре́сшему изъ гро́ба и Нача́льнику жи́зни на́шея, разруши́въ бо сме́ртію сме́рть, побѣ́ду даде́ на́мъ и ве́лію ми́лость.

И отпу́стъ.

НА ЛИТУРГІИ,
Изобрази́тельная. Блаженна, гласъ 1:
Снѣ́дію изведе́ изъ рая́ вра́гъ Ада́ма, Кресто́мъ же разбо́йника введе́ Христо́съ въ о́нь, — помяни́ мя́, — зову́ща, — егда́ пріи́деши во Ца́рствіи Твое́мъ!

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Покланя́юся Страсте́мъ Твои́мъ, славосло́влю и Воскресе́ніе со Ада́момъ и разбо́йникомъ, со гла́сомъ свѣ́тлымъ вопію́ Ти́: помяни́ мя́, Го́споди, егда́ пріи́деши во Ца́рствіи Твое́мъ!

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Распя́лся еси́, Безгрѣ́шне, и во гро́бѣ положи́лся еси́ во́лею, но Воскре́слъ еси́, я́ко Бо́гъ, совоздви́гнувый Себѣ́ Ада́ма, — помяни́ мя́, — зову́ща, — егда́ пріи́деши во Ца́рствіи Твое́мъ!

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Хра́мъ Тво́й тѣле́сный тридне́внымъ Воскреси́вый погребе́ніемъ, со Ада́момъ и и́же отъ Ада́ма воскреси́лъ еси́, Христе́ Бо́же, — помяни́ на́съ, — зову́щихъ, — егда́ пріи́деши во Ца́рствіи Твое́мъ!

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Мѵроно́сицы пріидо́ша, пла́чуще, на гро́бъ Тво́й, Христе́ Бо́же, зѣло́ ра́но и въ бѣ́лыхъ ри́захъ обрѣто́ша а́нгела сѣдя́ща, — что и́щете? — зову́ща. — Воскре́се Христо́съ, не рыда́йте про́чее!

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Апосто́ли Твои́, Го́споди, на го́ру, а́може повелѣ́лъ еси́ и́мъ, прише́дше, Спа́се, и Тя́ ви́дѣвше, поклони́шася. Ихже и посла́лъ еси́ во язы́ки учи́ти и крести́ти я́.

Сла́ва, тро́иченъ: Отцу́ поклони́мся, и Сы́на славосло́вимъ, и Пресвята́го Ду́ха вку́пѣ воспои́мъ, зову́ще и глаго́люще: Всесвята́я Тро́ице, спаси́ всѣ́хъ на́съ!

И ны́нѣ, [богоро́диченъ]: Ма́терь Твою́ приво́дятъ Ти́ въ моли́тву лю́діе Твои́, Христе́, мольба́ми Ея́ щедро́ты Твоя́ да́ждь на́мъ, Благíй, да Тя́ прославля́емъ, изъ гро́ба на́мъ возсія́вшаго.

Проки́менъ, гла́съ 1: Бу́ди, Го́споди, ми́лость Твоя́ на на́съ,* я́коже упова́хомъ на Тя́. Сти́хъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́. Аллилу́ія, [гла́съ 1]: Бо́гъ дая́й отмще́ніе мнѣ́, и покори́вый лю́ди подъ мя́. Сти́хъ: Велича́яй спасе́нія царе́ва, и творя́й ми́лость христу́ своему́ Дави́ду, и сѣ́мени Его́ до вѣ́ка.

Примѣчанія:
[1] Естество́ новопремѣни́ся.
[2] Свя́тъ одушевле́нный хра́мъ.
[3] Су́щимъ внѣ́ су́етнаго мíра.
[4] Свя́тъ Иже сла́вы Госпо́дь неизмѣ́нный бла́гостію.
[5] Запя́вся Ада́мъ и сокруша́ется.
[6] Изъ ме́ртвыхъ во Воскресе́ніе Ты́, яви́вся су́щимъ во а́дѣ, Христе́, дарова́лъ еси́.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 12 – 29 об.

Свързани