Творе́ніе Ники́фора, іеромона́ха изъ Хіо́са.
НА ВЕЛИЦѢЙ ВЕЧЕРНИ,
Блаже́нъ му́жъ..,
На Го́споди воззва́хъ: поста́вимъ стихо́въ 6 и пое́мъ пре́жде проро́ку Авваку́му.
Та́же свято́й, гла́съ 1. Подо́бенъ: Всехва́льніи му́ченицы.
Яко мѵ́ро, принесе́ ко Христу́ дѣ́вство безъ поро́ка и по́тъ тружда́ній свои́хъ, боже́ственно пожи́вши, пречестна́я Мѵропíе, та́коже и кро́вь свою́ и ду́шу непоро́чну, тѣ́мже сла́вы тя́ сподо́би съ пра́ведникъ и му́ченикъ чи́нми.
Ты́ спасе́на еси́ пои́стинѣ, Мѵропíе всехва́льная, по о́бразу, неврежде́нну боже́ственными дѣ́лы, и Бо́гу подража́тельно, по подо́бію показа́ добродѣ́тели явле́ніе, та́коже и кро́вію му́ченическою обагри́ оде́жду свою́ и ко Христу́ притекла́ еси́.
Стра́сти ви́дящи сла́вныя Иси́дора, потща́ся и́мъ, Мѵропíе, подража́ти, тѣ́мже, тѣ́ло его́ взя́вши, прія́ жела́нное, пострада́вши свѣ́тло, дѣ́во, и въ червле́ныхъ оде́ждахъ отъ кро́ви свое́я вошла́ еси́, такова́я невѣ́ста, къ Христу́, Жениху́ своему́.
Сла́ва, гла́съ 2:
Въ благоуха́ніи мѵ́ра своего́, Христе́, поте́кши, Мѵропíя пречу́дная смра́дныя стра́сти пло́ти воздержа́ніемъ трезви́ и моли́твою умертви́, слеза́ми ду́шу очи́стивши, на по́прище изгна́ стра́сть, и, свое́ю кро́вію обагри́вшися, невѣ́сто кра́сная, дѣ́вствомъ и му́ченичествомъ украше́нная, къ Нетлѣ́нному и Безсме́ртному Жениху́ притече́, и, у Того́, Нача́льника жи́зни, двойны́мъ вѣнце́мъ увѣнча́вшися, испроси́ла еси́ по дерзнове́нію за ны́ ве́лію ми́лость.
И ны́нѣ, богоро́диченъ:
[Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.]
Вхо́дъ. Свѣ́те ти́хій.., проки́менъ и пареміи́:
Проро́чества Иса́іина чте́ніе. [Глава́ 43.]
Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.
Прему́дрости Соломо́новы чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́новы чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На литíи стихи́ры, гла́съ 1:
Посто́мъ тѣ́ло, Мѵропíе, истощи́вши и ду́шу добродѣ́тель крѣ́постію укрѣпи́вши, вше́дши на му́ченикъ по́прище и му́жески подвиза́вшися, мучи́телей разруши́ го́рдость благодерзнове́ніемъ слове́съ твои́хъ, и, Христа́ Бо́га всѣ́мъ проповѣ́давши, сме́рть, безсме́ртію подо́бну, поя́ за Него́, Ему́же непреста́нно моля́щися за ду́ши на́ша.
Сла́ва, гла́съ 5:
Непоро́чно пожи́вши и страстоте́рпчески, Мѵропíе всехва́льная, досто́йно прія́ у Бо́га нетлѣ́нія вѣне́цъ, и ны́нѣ съ му́ченики Боже́ственному престолу́ предстоя́щи, и отъ вѣ́ка со избра́нными зря́щи, и та́мо сла́вы исполня́ющися, помяни́ и ны́, я́же въ вѣ́рѣ и любви́ соверша́ющія присночестну́ю па́мять твою́.
И ны́нѣ, богоро́диченъ:
Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и Прибѣ́жище ду́шъ на́шихъ.
На стихо́внѣ стихи́ры, гла́съ 2. Подо́бенъ: Егда́ отъ дре́ва.
Мѵ́ро взя́вши благоче́стія, вѣ́рнымъ ты́ дая́ше незави́стно, всечестна́я, отъ боже́ственнаго гро́ба Ерміо́ніи иногда́, и отъ него́ и́мя получи́ — Мѵропíя, но и кро́вь твою́, мѵ́ра алава́стръ, Го́споду принесе́ честны́мъ му́ченичествомъ, му́ченице страстоте́рпице, Жениху́ своему́.
Сти́хъ: Терпя́ потерпѣ́хъ Го́спода, и вня́тъ ми́, и услы́ша моли́тву мою́.
Ты́ очи́сти себе́ дѣ́лы боже́ственными и дѣя́ніи отъ всея́ пло́ти скве́рны, и ду́ху, всечестна́я, при́сно прилѣжа́ прему́дростію, и, приве́дши все́ свое́ жела́ніе на не́бо отъ земли́, тѣ́мъ и житія́ вре́менное ты́ отве́ргла еси́ вельми́, Мѵропíе, но сме́рть изво́лиши во́льную.
Сти́хъ: Поста́ви на ка́мени но́зѣ мои́ и испра́ви стопы́ моя́.
Тѣ́ло Иси́дора честно́е ты́ утаи́, Мѵропíе, взя́вши отъ стра́жъ, и, любо́вію ума́стивши, погребе́, и́щущимъ же отыну́ду глаго́ла а́біе, тѣ́мъ, я́ко ви́нная, посра́мленная судіе́ю, приведе́на бы́сть и обличи́ словесы́ дерзнове́нными, богому́драя, окая́нствіе и безче́стіе.
Сла́ва, гла́съ 3:
Благо́ю му́дростію и неустраши́мымъ се́рдцемъ предстоя́вши мучи́телю, такова́я отвѣща́, не радѣ́ющи и плева́ющи, я́ко сотвори́ли е́сть сіе́ окая́нствіе и безбо́жствіе, сего́ ра́ди біе́на бы́сть непоща́дно дреко́ліемъ и по всему́ гра́ду влеко́ма бы́сть, веселя́щися крѣпкоду́шнѣ, хотя́ше на небесѣ́хъ блаже́нство, его́же и получи́вши и наслади́вшися уже́, помяни́ и ны́, я́же съ любо́вію стра́сти воспѣва́ющія твоя́.
И ны́нѣ, богоро́диченъ:
[Безъ сѣ́мене отъ Боже́ственнаго Ду́ха во́лею же Отчею зачала́ еси́ Сы́на Бо́жія, отъ Отца́ безъ ма́тере пре́жде вѣ́къ су́ща, на́съ же ра́ди, изъ Тебе́ безъ отца́ бы́вша, пло́тію родила́ еси́ и Младе́нца млеко́мъ пита́ла еси́. Тѣ́мже не преста́й моли́ти изба́витися отъ бѣ́дъ душа́мъ на́шимъ.]
Тропа́рь, гла́съ 1:
Доброму́ченице Мѵропíе и Христа́ невѣ́сто нетлѣ́нная, ны́нѣ Ему́же предстои́ши, прекра́сная, ра́ны нося́щи пло́ти, я́ко ка́мни свѣ́тлы и свѣтообра́зны, и въ крова́вую порфи́ру, я́ко цари́ца, облече́нная, пресла́вная, умоли́ Его́ за ны́, я́же съ любо́вію восхваля́ющія хвалы́ побѣ́дными и пѣ́сньми твою́ боже́ственную стра́сть.
НА УТРЕНИ,
По 1-мъ стихосло́віи сѣда́ленъ, гла́съ 3:
Прекра́сну дѣ́ву Мѵропíю и доброму́ченицу восхва́лимъ, избра́нную невѣ́сту Христа́, Нетлѣ́ннаго Жениха́, ю́же прія́ въ черто́зѣхъ небе́сныхъ и ликостоя́ніемъ введе́ держа́вшую дѣ́вства свѣ́тлую лампа́ду въ черто́гъ нетлѣ́нный. [Два́жды.]
Сла́ва, и ны́нѣ, богоро́диченъ:
Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже я́ко повелѣ́нъ бы́хъ, вопію́ Ти́: ра́дуйся, Благода́тная.
По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.
Дѣви́ца избра́нная, нетлѣ́нная отрокови́ца, дѣ́ва и́стинная и непоро́чная невѣ́ста, Мѵропíя всехва́льная, добродѣ́тельми свѣтлѣ́йшая и страсте́й украше́нная многоразли́чно боже́ственными ра́нами, къ Царю́ всѣ́хъ, Христу́, притекла́ е́сть. [Два́жды.]
Сла́ва, и ны́нѣ, богоро́диченъ:
Марíе, честно́е Влады́ки прія́телище, воскреси́ ны па́дшія въ про́пасть лю́таго отча́янія, и прегрѣше́ній и скорбе́й, Ты́ бо еси́ грѣ́шнымъ спасе́ніе и по́мощь, и крѣ́пкое предста́тельство, и спаса́еши рабы́ Твоя́.
[Велича́ніе:
Велича́емъ тя́, страстоте́рпице Христо́ва Мѵропíе, и чте́мъ честно́е страда́ніе твое́, е́же за Христа́ претерпѣ́ла еси́.
Псало́мъ избра́нный: Бо́гъ на́мъ прибѣ́жище и си́ла, Помо́щникъ въ ско́рбехъ, обрѣ́тшихъ ны́ зѣло́…]
По поліеле́и сѣда́ленъ, гла́съ 4. Подо́бенъ: Вознесы́йся.
Нестерпи́мыя ра́ны, я́же претерпѣ́ла еси́, и главы́ болѣ́зни, влачи́ма бо бы́сть по гра́ду за власы́ безми́лостивно, Мѵропíе, сему́ ра́дующися, пренесла́ еси́, сла́вная, темни́цу и сме́рть, Христу́ въ моли́твѣ за ны́ предста́тельствуй. [Два́жды.]
Сла́ва, и ны́нѣ, богоро́диченъ:
Тя́ заступле́ніе вси́ и́мамы, грѣ́шніи, о Пречи́стая Дѣ́во, Ты́ благоувѣ́тлива на́мъ сотвори́ Сы́на Твоего́ ма́терними Твои́ми моли́твами.
Степе́нна 1-й антифо́нъ 4-го гла́са. Проки́менъ, гла́съ 4: Терпя́ потерпѣ́хъ Го́спода, и вня́тъ ми́, и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́. [Вся́кое дыха́ніе… Ева́нгеліе Матѳе́я, зача́ло 62.]
Кано́нъ, гла́съ 1.
Пѣ́снь 1.
Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.
Смра́денъ и ме́рзокъ а́зъ сы́й, Мѵропíе имени́тая, чи́стую и непоро́чную тя́, благоуха́ніе Христо́во, прославля́ти дерза́ю, но ты́ мя́ прости́.
Возлю́бленными пѣ́сньми твою́ воспѣва́ти стра́сть, по́двиги благода́ть мнѣ́ отъ высо́тъ святы́хъ ниспосли́ твои́ми моли́твами, благода́тная.
Храня́щи непоро́чность по о́бразу Бо́жію и подо́бію, отъ о́трочества сподо́бися о́бщница страсте́мъ Христо́вымъ ста́ти, сла́вная.
Богоро́диченъ: Свѣ́тъ носи́вшая во чре́вѣ, Изба́вителя моего́, тмы́ мя́ изба́ви и му́къ, Пречи́стая, вѣ́чныхъ, та́ко, спасе́нный, воспою́ вели́чествіе Твое́.
Пѣ́снь 3.
Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.
Къ боже́ственному гро́бу приступи́вши Ерміо́ніи, Мѵропíе честна́я, источи́ отъ него́ Боже́ственное мѵ́ро и отъ того́ и́мя взя́, е́же су́ще имени́тое.
Гоне́нію одержа́вшу всю́ Асíю, ты́, ну́ждена бы́вши неми́лостивно оста́вити Ефе́съ, ма́терне оте́чество обрѣла́ еси́, Хіо́съ, прибѣ́жище.
Моли́твѣ при́сно прилѣжа́щи воздержа́ніемъ, и трезве́ніемъ велему́дрымъ омраче́ніе страсте́й умертви́, и Христу́ бы́сть мѵ́ро житія́ чи́ста.
Боже́ственною любо́вію и рачи́тельствомъ, о страстоте́рпице Мѵропíе честна́я, погуби́ стра́хъ и оста́нки Иси́дора исхи́ти.
Богоро́диченъ: Безпло́днаго помышле́нія моего́ безпло́діе вся́чески изгони́ и плодови́тое добродѣ́тельми души́ мое́й яви́, Всесвята́я Богоро́дице, вѣ́рныхъ Помо́щнице.
Сѣда́ленъ, гла́съ 4. Подо́бенъ: Яви́лся еси́ дне́сь.
Ра́нъ я́звами украше́нная и кро́вію свое́ю очервле́нная, разу́мно въ сла́вѣ предста́ла еси́ Боже́ственному Христа́ престо́лу, Мѵропíе сла́вная. [Два́жды.]
Сла́ва, и ны́нѣ, богоро́диченъ:
Ра́дуйся, Престо́ле о́гненный Царя́ и Свѣти́льниче златы́й Свѣ́та Бо́жіяго, ду́ши и помышле́нія освѣща́ющи воспѣва́ющихъ Тя́, Дѣ́во Всепѣ́тая.
Пѣ́снь 4.
Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди!
Ве́ліе твое́ дѣя́ніе и зѣло́ ди́вное: ка́ко, посредѣ́ стра́жъ дости́гнувши тѣ́ла, взяла́ еси́ сіе́, Мѵропíе крѣпкоду́шная, и не зна́ша бы́вшее храня́щіи.
Въ любви́ пребы́вши, Мѵропíе чу́дная, боже́ственное тѣ́ло прія́ рука́ма, пѣ́сньми благослови́, просла́ви Бо́жій да́ръ, Иси́дора тѣ́ло, и, съ вѣ́рою обнима́ющи сіе́, ума́сти.
Погре́бши съ че́стію тѣ́ло честно́е, ра́довашеся, я́ко иму́щи Боже́ственное сокро́вище, но, увѣ́давши иска́ніе мучи́теля, хотя́щаго изнури́ти тя́, вѣща́ла еси́ испыта́ющимъ, не убоя́вшися сме́рти.
Богоро́диченъ: Дѣ́во Пресвята́я, Неоскверне́нная Ски́ніе, оскверне́нна грѣхи́ очи́сти мя́ ны́нѣ щедро́тъ Твои́хъ ка́плями чистѣ́йшими и да́ждь ми́ ру́ку по́мощи, да воспою́ сла́ву Тебѣ́, Чи́стая, Благослове́нная.
Пѣ́снь 5.
Ирмо́съ: Тво́й ми́ръ да́ждь на́мъ, Сы́не Бо́жій: ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.
Му́жескимъ смы́сломъ, благо́ю душе́ю ста́ла еси́, Мѵропíе всечу́дная, предъ мучи́телемъ го́рдымъ и рекла́ еси́, я́ко тѣ́ло хотя́щи укра́сти.
О, чудесе́, ка́ко не устраши́ся вельми́ го́рдаго и безми́лостиваго мучи́теля, и посрамле́нія, и лю́тости, и я́рости, чу́дная Мѵропíе, но избра́ла еси́ благодерзнове́ніе.
Ка́ко дерзну́вшая решти́ о злы́хъ, глаго́лала еси́ му́жески о окая́нствіи и безче́стіи, Мѵропíе, твои́ми словесы́ дерзнове́нія.
Богоро́диченъ: Умоли́, Его́же родила́ еси́, Дѣ́во, спасти́ вѣ́рою Тебѣ́ вопію́щихъ: ра́дуйся, Дѣ́во Всеблаже́нная, ра́дуйся, Благослове́нная, всему́ мíру заступле́ніе.
Пѣ́снь 6.
Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.
Дерзнове́ніе твое́ мно́гое преступи́ пои́стинѣ и превзы́де вся́ческая словесы́ хи́трыми, Мѵропíе достохва́льная.
Ка́ко возмогла́ еси́ изглаго́лати и проповѣ́дати мно́го и извѣща́ти чу́дно любо́вь твою́ ко Христу́, всехва́льная, ея́же ра́ди сме́рть прія́вши.
Хра́брость, Мѵропíе достохва́льная, души́ твоея́, словеса́ мно́зи, дерзнове́ніе лука́вое разруши́, мучи́теля, му́ченице, уничижи́.
Богоро́диченъ: Благоволе́ніемъ Отца́ воплоти́ся Сы́нъ Ду́хомъ Бо́жіимъ во чре́вѣ Твое́мъ, Чи́стая, спаси́ на́съ, Бо́га Ро́ждшая.
Конда́къ, гла́съ 3. Подо́бенъ: Дѣ́ва дне́сь.
По и́мени, о страстоте́рпице Мѵропíе, мѵ́ро источа́еши благода́ти чуде́съ и пасе́ши всѣ́хъ, подоба́ющихъ и взыска́ющихъ и вѣ́рою и добродѣ́телію прибѣга́ющихъ къ ра́цѣ твое́й пречестнѣ́й, я́же держи́тъ пра́хъ тво́й.
Икосъ:
Яко невѣ́ста Христу́ житія́ ра́ди чистѣ́йшая и стра́сти ра́ди свѣтлѣ́йшая, прекраснодѣ́во Мѵропíе достосла́вная, чуде́съ благода́ть источа́еши, я́ко мѵ́ро, и пасе́ши всѣ́хъ, съ вѣ́рою и любо́вію къ пречестнѣ́й ра́цѣ твое́й приходя́щихъ, пребыва́етъ бо въ не́й Свята́го Ду́ха благода́ть, я́ко держи́тъ свяще́нный пра́хъ тво́й.
Пѣ́снь 7.
Ирмо́съ: Пе́щь, Спа́се, ороша́шеся, о́троцы же, лику́юще, поя́ху: отце́въ Бо́же, благослове́нъ еси́.
Повелѣ́вшу дреко́льми му́чити посрамле́ну мучи́телю тѣ́ло твое́, прія́ го́рькія и болѣ́зненныя ра́ны.
Тѣ́ло твое́ я́звами похвали́ся, струя́ми кро́ви пора́довася, но любо́вію Христо́вою претерпѣ́ла еси́ вся́ му́жески.
Кро́вію очерви́ оде́жду дѣви́ческу, всехва́льная, и невѣ́стою приведе́ся ко Христу́, Царю́ всего́ мíра.
Богоро́диченъ: Тя́ вѣ́даю, Богоневѣ́сто, Со́лнце сла́вы ро́ждшую, просвѣти́вшее но́чь мои́хъ согрѣше́ній.
Пѣ́снь 8.
Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.
Посрами́ла еси́ у́мъ звѣ́ря лю́таго, повелѣ́вшаго тя́ на сту́дъ за власы́ влещи́ по гра́ду.
Уязви́вше тѣ́ло твое́ неми́лостивно и повле́кше тя́ за власы́, дѣ́во, сме́рти бли́зъ оста́виша Мѵропíю въ темни́цѣ.
Но́щію моли́вшуся тебѣ́ те́плѣ въ темни́цѣ, свѣ́тъ ве́лій возсія́, и а́нгели свѣ́тліи предста́ша внеза́пу, и возлю́бленный Иси́доръ рече́: ми́ръ тебѣ́, Мѵропíе.
Богоро́диченъ: Воздви́гше лежа́щаго мя́ въ глубинѣ́ зо́лъ, ны́нѣ борю́щихъ мя́ вра́гъ побори́, изыми́ отъ нечи́стыхъ сласте́й ду́шу, Чи́стая, не оста́ви, но уще́дри и спаси́.
Пѣ́снь 9.
Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.
Свѣтлѣ́йшую ду́шу твою́ а́нгельстіи ли́ки ку́пно съ Иси́доромъ сла́внымъ въ ми́рѣ взя́вше, вознесо́ша тя́ на небеса́ я́ко блаже́нну ко Христу́ Жениху́, Иже повелѣ́лъ сіе́ дѣ́вамъ въ черто́зѣ разу́мнѣмъ.
Истиннаго нетлѣ́нія свѣтлѣ́йшую лампа́ду иму́щи въ руцѣ́ и вѣне́цъ кра́сенъ, въ багря́ную оде́жду та́йную, окра́шенную кро́вію твое́ю, страстоте́рпице, свѣ́тло облече́нная, ца́рствуеши со Христо́мъ.
Язвъ болѣ́зни, и держа́ніе вла́съ, и вре́дъ главѣ́, и кро́ви проли́тіе, и тѣлесе́ всего́ свяще́нныя ра́ны принесе́ ко Христу́ въ моли́твѣ за вся́, чту́щихъ тя́ вѣ́рно.
Богоро́диченъ: Грѣхолю́бецъ сы́й, въ небреже́ніи пребыва́ю, и су́да, Чи́стая, безме́зднаго страшу́ся, на не́мже сохрани́ Твои́ми святы́ми моли́твами, Богоневѣ́сто, и ублажи́ неосужде́нну предста́ти.
Ексапостила́рій. Подо́бенъ: Не́бо звѣзда́ми.
Претерпѣ́ла еси́ муче́нія пу́ть богому́дрый вельми́ горя́щею душе́ю и ны́нѣ всели́лася на небеса́, въ нетлѣ́нныя черто́зи, дѣ́во му́ченице Мѵропíе. [Два́жды.]
Сла́ва, и ны́нѣ, богоро́диченъ:
Сла́дость а́нгелъ, скорбя́щихъ ра́дость, христіа́нъ предста́тельство, Дѣ́во, Ма́ти Бо́га, заступи́ на́съ, изба́ви вѣ́чныхъ му́къ.
На хвали́техъ стихи́ры, гла́съ 4. Подо́бенъ: Яко до́бля.
Ко Христу́ Боже́ственной любо́вію боде́на бы́вши, всепѣ́тая, ра́дующися, взы́де на по́прище му́ченическое, и прія́ ра́ны и я́звы, и разруши́ вра́гъ го́рдость и шата́ніе прѣ́ю твое́ю, Мѵропíе, и вѣне́цъ взя́ и че́сть, твои́хъ по́двигъ досто́йну. [Два́жды.]
Всесвято́е тѣ́ло Иси́дора, всечу́дная, му́жески взя́вши и погре́бши, и, я́ко обогати́вшися, неосра́мленно, свѣ́тлая, въ страсте́хъ вошла́ еси́ въ ро́въ стра́сти, прекрасному́ченице Мѵропíе, Иси́доръ же предста́ тебѣ́ въ темни́цѣ ме́рзцѣй, Боже́ственный ми́ръ дарова́.
Соверша́ющихъ па́мять твою́ и стра́сти хва́лящихъ защити́, сохрани́ моли́твами твои́ми благопрія́тными ко Го́споду, Мѵропíе всехва́льная, прекрасному́ченица Христа́, страстоте́рпице непобѣди́мая и пресла́вная, отъ вся́каго зла́, напа́стей, губи́тельства, вра́гъ наше́ствія изба́ви.
Сла́ва, гла́съ 8:
Яко звѣзда́ приведе́ волхвы́, несу́щія да́ры Тебѣ́, мы́сленному пра́ведному Со́лнцу, Христе́ Бо́же, ра́ди на́съ рожде́нному, та́ко и свѣ́тъ Боже́ственнаго зако́на дѣ́ву Мѵропíю приведе́, да́ры прине́сшу: лива́нъ — свѣ́тлость дѣ́вства, мѵ́ро — добродѣ́тели, смѵ́рну — во́льную сме́рть ко Влады́цѣ, одесну́ю сѣдя́щему Отца́, ея́же благопрія́тными моли́твами и на́съ сподо́би сохрани́ти спаси́тельныя Твоя́ за́повѣди и спаси́ на́съ, я́ко Бла́гъ и Человѣколю́бецъ.
И ны́нѣ, богоро́диченъ:
[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]
НА ЛИТУРГІИ,
Слу́жба жена́мъ му́ченицамъ: [Блаже́нна отъ кано́на, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ.Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́ потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́. Ева́нгеліе Ма́рка, зача́ло 21. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.]
Источникъ: Мине́я Дека́брь. Ча́сть пе́рвая. — М.: Издательскій совѣтъ Русской Православной Церкви, 2002. — С. 77 – 86.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 