МЕСЯЦА СЕНТЯБРЯ В 22-й ДЕНЬ. Служба преподобнаго и богоноснаго отца нашего Космы новаго чудотворца, иже во священной царской славяноболгарской общежительной обители Зографской просиявшаго.

---

Канон Пресвятей Богородице со ирмосом на 6. Канон преподобнаго на 8, егоже краегранесие, зачала тропарем, сице глашают: Украшение постников Косму святаго любезно пою. Глас 8.

Песнь 1.
Ирмос: Колесницегонителя фараоня:

Уясни ум, и отверзи уста моя, Христе мой, посли Утешителя, да Твоего угодника пети возмогу стихословии высоту добродетелей, на нюже чистотою и смирением взыде.

Красоты Божественный дар прияша тя от Бога твои родителие молитвами и молением, имже прежде зачатия обещан был еси, отче, и от утробы освящен, просвети душу мою твоими молитвами.

Родився от обещания, якоже и великий во отцех Евфимий, того нравы подражая, правою стезею Христу последовал еси, отче, еюже и нас настави ходити, и благоугодно Богу до конца ходити.

Аще и недостойне приношу ти таковое словес похваление, богомудре отче Космо, но приими сие с любовию, и принеси к Богу моление о нас яко чадолюбив, да милость обрящем в день страшнаго испытания.

Богородичен: Широкаго и пространнаго пути в погибель ведушаго уклонитися нам, и шуих части избавитися, и деснаго предстояния Сына Твоего сподобитися моли, Чистая Дево, Тя воистинну Богородицу исповедающих.

---