НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.
На Го́споди воззва́хъ: стихи́ры на 8, гла́съ 1, самогла́сны.
Отче Гавріи́ле преподо́бне,* житіе́ твое́ въ мíрѣ се́мъ* яви́ся па́че естества́,* и́бо на земли́ живя́,* безстра́стенъ пребы́лъ еси́,* ми́ръ и безмо́лвіе возлюби́лъ еси́,* Христу́ послѣ́дуя* путе́мъ тѣ́снымъ и приско́рбнымъ,* къ небе́снымъ оби́телемъ возше́лъ еси́,* идѣ́же мо́лишися непреста́нно* о спасе́ніи всѣ́хъ на́съ. [Два́жды.]
Отче Гавріи́ле преблаже́нне,* досто́йно получи́лъ еси́* че́сть равноа́нгельную,* и предстоя́ Бо́гу со безпло́тными,* не забу́ди и на́съ,* честну́ю твою́ па́мять сла́вящія,* но при́зри съ небесе́* и возсія́й свѣ́тъ тво́й,* я́ко да ра́достно просла́вимъ* твоя́ чудеса́.
Отче Гавріи́ле чудотво́рче,* ви́дя Бо́гъ мно́гія по́двиги и труды́ твоя́,* и́миже просія́лъ еси́* на свѣ́щницѣ Христо́ва сія́нія,* да́ромъ чуде́съ обогати́ тя,* и яви́ тя всѣ́мъ зна́ема,* ра́ди чуде́съ исцѣле́нія,* сего́ ра́ди и мы́ вопіе́мъ ти́:* моли́ Христа́ Бо́га о всѣ́хъ,* чту́щихъ святу́ю па́мять твою́,* и отъ грѣхо́вныхъ страсте́й* изба́ви на́съ.
Ины стихи́ры, гла́съ 6:
Дне́сь торжеству́ютъ* мона́ховъ мно́жества,* въ па́мять преставле́нія* преподо́бнаго отца́ на́шего Гавріи́ла,* Лѣ́сновскую похвалу́* и на́ше удобре́ніе,* и́же земны́й естество́мъ,* ра́венъ бы́сть мы́сленнымъ существо́мъ.* Тѣ́мже и моли́твенникъ на́мъ быва́етъ* предъ престо́ломъ Всевы́шняго,* я́ко да улучи́мъ вѣ́чныхъ бла́гъ* въ де́нь су́дный. [Два́жды.]
Дне́сь па́че со́лнца* возсія́ на тве́рди вѣ́ры,* па́мять богоно́снаго отца́ на́шего Гавріи́ла,* и́же вѣ́рныхъ собра́ніе* къ добродѣ́тели наста́ви:* о́во у́бо богодухнове́нными уче́ніи* и равноа́нгельнымъ житіе́мъ,* и обоя́ пресла́вно,* я́коже во́ждь изря́денъ* богоподо́бно показу́я.* Того́ моли́твами, Христе́ Бо́же на́шъ,* поми́луй и спаси́ на́съ.
Дне́сь собира́ются* вси́ концы́ православные земли́,* и благоче́стно воспѣва́ютъ* псалмы́ и пѣ́сньми,* преблаже́ннаго отца́ на́шего Гавріи́ла,* и́же оста́ви мірску́ю пре́лесть,* яре́мъ же Христо́въ на ра́мо взя́тъ,* и полки́ бѣсо́въ му́жески побѣди́,* и дѣ́тельно показа́ на́мъ* изря́дный пу́ть Боже́ственныя любве́,* и мо́лится непреста́нно* во е́же спасти́ ду́ши на́ша.
Сла́ва, гла́съ 6:
Кто́ тебе́ не ублажи́тъ, преподо́бне о́тче? Кто́ ли не воспое́тъ равноа́нгельное житіе́ твое́? Свя́тостію на земли́ возсія́вый я́ко учени́къ Христо́въ, То́йже и тебе́ пріи́мъ въ Ца́рствіе, со всѣ́ми святы́ми тя́ вчини́, естество́мъ человѣ́ка и земна́го существа́, показа́ тя дру́га а́нгеловъ отъ всѣ́хъ родо́въ познава́ема. Того́ моли́, Гавріи́ле преблаже́нне, поми́ловатися душа́мъ на́шимъ.
И ны́нѣ, богоро́диченъ, гла́съ то́йже:
Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].
Вхо́дъ. Проки́менъ дне́. Чте́нія три́, преподо́бному.
Прему́дрости Соломо́ни чте́ніе. [Глава́ 3.]
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе. [Глава́ 5 и 6.]
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
Прему́дрости Соломо́ни чте́ніе. [Глава́ 4.]
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На литíи стихи́ра хра́ма и преподо́бнаго, гла́съ 1:
Наста́ дне́сь па́мять преставле́нія твоего́, приснопа́мятне о́тче Гавріи́ле, и се́ честно́е ста́до твое́, пое́тъ тебе́ благоче́стно, ублажа́юще болѣ́зни и труды́ твоя́, я́же подъя́лъ еси́, я́ко гра́дъ въ пусты́ни прекра́сенъ.
Дне́сь торжеству́етъ Се́рбія и вся́ страна́ правосла́вныхъ, изря́днѣе же хра́мъ свята́го архистра́тига Михаи́ла въ Лѣ́сновѣ, его́же ты́ устро́илъ еси́, благодаря́ще Бо́га, Иже дарова́ на́мъ тебе́, крѣ́пкаго предста́теля и те́пла моли́твенника ко Святѣ́й Тро́ицѣ, Юже непреста́нно моли́ о душа́хъ на́шихъ.
Сла́ва, гла́съ 4:
Весели́теся, небеса́, торжеству́йте, лю́бящіи благоче́стіе, Лѣ́сновскія го́ры, взыгра́йте, се́ бо предстои́тъ Христу́ непобѣди́мъ побо́рникъ и те́плый предста́тель ро́да на́шего, и́же страсте́й ко́рень отсѣче́ и бѣсо́въ стремле́нія, и яви́ на́мъ непобѣди́мую си́лу и дѣ́йство Креста́ Спа́сова, ему́же кла́няяся, мо́лится Христу́, душа́мъ на́шимъ пода́ти ве́лію ми́лость.
И ны́нѣ, богоро́диченъ, гла́съ то́йже:
Пресвята́я Дѣ́во Богоро́дице, Ма́ти ми́лостивая, се́ прибѣга́емъ къ Твое́й бла́гости, воздвиза́юще о́чи серде́цъ на́шихъ къ Тебѣ́, и колѣ́на преклоня́юще съ пла́чемъ мо́лимъ Тя́: не пре́зри на́шего воздыха́нія, и бу́ди на́мъ покро́въ и помо́щница въ де́нь су́дный.
На стихо́внѣ стихи́ры, гла́съ 2. [Подо́бенъ: До́ме Евфа́ѳовъ.]
На высоту́ добродѣ́телей* восте́клъ еси́,* попра́въ ко́зни вра́жія,* преподо́бне о́тче Гавріи́ле,* побѣ́ды вѣне́цъ* воспрія́лъ еси́.
Сти́хъ: Честна́ предъ Го́сподемъ* сме́рть преподо́бныхъ Его́.
Ца́рства ра́ди небе́снаго* подвиза́лся еси́ на земли́,* богоблаже́нне Гавріи́ле,* Христу́ послѣ́довавъ,* дарова́ній Свята́го Ду́ха* сподо́бился еси́.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Имѣ́я въ души́ свое́й* сокрове́нно бога́тство,* до́мъ Ду́ха Свята́го бы́лъ еси́,* моли́ спасти́ся* душа́мъ на́шимъ.
Сла́ва, гла́съ 6:
Прино́симъ дне́сь похва́льную пѣ́снь въ па́мяти твое́й, о́тче Гавріи́ле, пріими́ и предвари́ къ Бо́гу твои́ми моли́твами, и изба́ви на́съ шу́іяго стоя́нія и сподо́би десна́го предстоя́нія, да тя́ вси́ я́ко те́пла засту́пника досто́йно ублажа́емъ.
И ны́нѣ, богоро́диченъ, гла́съ то́йже:
Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.
На благослове́ніи хлѣ́бовъ: Тропа́рь преподо́бнаго, два́жды и Богоро́дице Дѣ́во.., еди́ножды.
Тропа́рь [преподо́бнаго], гла́съ 8:
Возлюби́въ Христа́ усе́рдно па́че всѣ́хъ, и украси́вся кро́тостію, смире́ніемъ и терпѣ́ніемъ, все́ житіе́ свое́ на земли́ предложи́лъ еси́ Ему́. Тѣ́мъ бо небе́сныя оби́тели наслѣ́довавъ, пра́ведныхъ ча́сти сподо́бился еси́, съ ни́ми же моли́ся спасти́ся душа́мъ на́шимъ.
НА УТРЕНИ,
По шестопса́лміи ектенія́ и посе́мъ Бо́гъ Госпо́дь… Тропа́рь преподо́бнаго, два́жды. Сла́ва, и ны́нѣ, богоро́диченъ.
По 1-мъ стихосло́віи сѣда́ленъ, гла́съ 1:
Возлюби́въ измла́да мона́шеское житіе́, Христу́ отъ души́ послѣ́довалъ еси́, богоблаже́нне Гавріи́ле, просія́въ добродѣ́тельнымъ житіе́мъ твои́мъ, въ моли́твахъ, поще́ніихъ и бдѣ́ніихъ, о́бразъ бы́лъ еси́ мона́ховъ. Тѣ́мже вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дарова́вшему тобо́ю всѣ́мъ исцѣле́ніе. [Два́жды.]
Сла́ва, и ны́нѣ, богоро́диченъ, гла́съ то́йже:
Упова́ніе христіа́нъ, Пресвята́я Дѣ́во, Бо́га, Его́же родила́ еси́ па́че ума́ же и сло́ва, моли́ непреста́нно съ вы́шними си́лами, дарова́ти на́мъ оставле́ніе грѣхо́въ на́шихъ всѣ́хъ и исправле́ніе житія́, вѣ́рою и любо́вію при́сно Тя́ сла́вящимъ.
По 2-мъ стихосло́віи сѣда́ленъ, гла́съ 4:
Житіе́ твое́, преблаже́нне о́тче Гавріи́ле, мона́шествующимъ яви́ся пра́вило извѣ́стно, ему́же ны́нѣ ревну́юще, спаса́емся, послѣ́дующе твои́мъ Боже́ственнымъ уче́ніемъ. [Два́жды.]
Сла́ва, и ны́нѣ, богоро́диченъ, гла́съ то́йже:
Жела́я ви́дѣти неизрече́нную сла́ву Сы́на Твоего́ и Бо́га, всеблаже́нный Гавріи́лъ, Богоро́дице, взе́мъ на ра́мо честны́й Кре́стъ Его́, живоно́снымъ Его́ стопа́мъ послѣ́дова.
Поліеле́й.
Велича́ніе: [Ублажа́емъ тя́, преподо́бне о́тче Гавріи́ле, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ].
Псало́мъ избра́нный преподо́бному: [Терпя́ потерпѣ́хъ Го́спода, и вня́тъ ми́ и услы́ша моли́тву мою́…]
По поліеле́и сѣда́ленъ, гла́съ 8:
Простира́я дла́ни твоя́ къ небеси́, преподо́бне о́тче на́шъ Гавріи́ле прему́дре, и возсыла́я моли́твы твоя́ Вы́шнему, зрѣ́лъ еси́ явле́но Царя́ сла́вы Христа́ со а́нгелы, и въ пусты́няхъ непрохо́дныхъ водворя́яся, сла́вилъ еси́ Го́спода, Боже́ственною благода́тію тя́ соблюда́юща.
Сла́ва, то́йже.
И ны́нѣ, богоро́диченъ, гла́съ 8:
Прино́симъ Ти́ Гавріи́ловъ гла́съ, Богоблагода́тная, ра́дующеся и глаго́люще: ра́дуйся, мѣ́сто свяще́нія; ра́дуйся, преподо́бныхъ сла́во и всѣ́хъ вѣ́рныхъ спасе́ніе; ра́дуйся, Ея́же ра́ди обожи́хомся, Богоро́дице Приснодѣ́во.
Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Та́же: Вся́кое дыха́ніе… Ева́нгеліе отъ Матѳе́я, зача́ло 43.
По 50-мъ псалмѣ́ стихи́ра, гла́съ 6:
Преподо́бне о́тче Гавріи́ле, во всю́ зе́млю изы́де вѣща́ніе исправле́ній твои́хъ. Тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.
Кано́нъ Богоро́дицы со ирмосо́мъ на 6 и преподо́бнаго на 8.
Кано́нъ преподо́бнаго, гла́съ 3.
Пѣ́снь 1.
Ирмо́съ: Ди́вно, сла́вно творя́й чудеса́ Ты́ еси́, Бо́же, бе́здну оземлени́вый, и колесни́цы потопи́вый, и лю́ди спасы́й, пою́щія Тебѣ́, я́ко Царю́ на́шему и Бо́гу.
Го́спода усе́рдно возлюби́вый и подвиза́яся жела́тельно дости́гнути Ца́рства небе́снаго, просвѣти́лся еси́ Боже́ственною благода́тію, озари́ ми́ у́мъ воспѣ́ти житіе́ твое́.
Никто́же мо́жетъ изчести́ по́двиги и труды́ твоя́, всено́щная бдѣ́нія и къ си́мъ ины́хъ мно́жества добродѣ́телей, и́мже возме́здіе отъ Бо́га прія́лъ еси́.
Ди́вное на земли́ житіе́ пожи́лъ еси́, бдя́, моля́ся и тружда́яся, сего́ ра́ди всели́лся еси́ во оби́тели небе́сныя.
Богоро́диченъ: Изба́ви ду́шу мою́ отъ сѣ́ти діа́воли, Пречи́стая Богоро́дице, Ты́ бо еси́ всѣ́хъ земны́хъ крѣ́пкое поможе́ніе и те́плое заступле́ніе.
Пѣ́снь 3.
Ирмо́съ: Утверди́, Го́споди, сердца́ на́ша и просвѣти́ къ Твоему́ пѣснопѣ́нію, е́же сла́вити Тя́, Спа́се, во вѣ́къ вѣ́ка.
Благода́тію Бо́жія про́мысла озари́вся, стра́ненъ яви́лся еси́ отъ всѣ́хъ сро́дникъ и зна́емыхъ, прилѣпи́вся къ сро́дству небе́сному, и ны́нѣ живе́ши жи́знь безконе́чную.
Уме́тіе вмѣни́лъ еси́ вся́ кра́сная мíра сего́, ничто́же бо па́че Христо́вы любве́ изво́лилъ еси́, жела́я насы́титися Сего́ сла́вы и весе́лія присносу́щнаго, въ ня́же и а́нгели жела́ютъ прини́кнути.
Имѣ́я въ души́ вѣ́ру неоску́дну, да́нный тебѣ́ тала́нтъ трудолю́бно воздѣ́лалъ еси́ и прія́лъ еси́ вла́сть на ду́сѣхъ нечи́стыхъ: не забу́ди на́съ, творя́щихъ святу́ю па́мять твою́.
Богоро́диченъ: Влады́чице, Ма́ти Бо́жія, Благослове́нная и Пренепоро́чная, души́ моея́ стру́пы исцѣли́ и стра́сти плотскíя умертви́, у́мъ мо́й отъ вся́каго вре́да вра́жія и напа́стей изми́, молю́ Тя́.
Сѣда́ленъ, гла́съ 2:
Смире́ніемъ и жесто́кимъ подвиза́ніемъ сы́нъ свѣ́та показа́лся еси́, и ны́нѣ въ Ца́рствіи небе́снѣмъ я́сно зри́ши Святу́ю Тро́ицу, преблаже́нне Гавріи́ле, Юже моли́ согрѣше́ній оставле́ніе дарова́ти, пра́зднующимъ любо́вію святу́ю па́мять твою́.
Сла́ва, и ны́нѣ, богоро́диченъ, гла́съ то́йже:
Красотѣ́ Твое́й, Богора́дованная, арха́нгелъ Гавріи́лъ предстоя́ дивля́шеся, и вопія́ше Ти́: о, Невѣ́сто Неискусобра́чная, Отрокови́це Небла́зненная! Ка́ко Ти́ изреку́ пре́жде вѣ́къ сокрове́нную та́йну? Ты́ бо еси́ небе́снымъ и земны́мъ соедине́ніе. Ра́дуйся, Обра́дованная, Госпо́дь съ Тобо́ю!
Пѣ́снь 4.
Ирмо́съ: Стра́нна и неизрече́нна Рождества́ Твоего́ та́йна! Услы́шахъ слу́хъ Тво́й, и убоя́хся, и, веселя́ся, вопію́ Ти: си́лѣ Твое́й сла́ва, Человѣколю́бче.
Бы́лъ еси́ сы́нъ послуша́нія, и страстны́я по́мыслы покори́въ уму́-влады́цѣ, вопія́лъ еси́ Христу́: си́лѣ Твое́й сла́ва, Человѣколю́бче.
Въ пусты́ни живы́й, я́ко во гра́дѣ, преподо́бне о́тче Гавріи́ле, ни отъ чего́же смуща́яся, но ра́ди трудо́въ твои́хъ вѣнча́лся еси́ отъ Христа́ Бо́га, Ему́же пое́ши немо́лчно: си́лѣ Твое́й сла́ва, Человѣколю́бче.
Грѣхо́вное омраче́ніе возненави́дѣвъ и свѣ́тъ а́нгельскія чистоты́ возлюби́въ, возлетѣ́лъ еси́ я́ко златы́ми крила́ми на небеса́, непреста́нно поя́: си́лѣ Твое́й сла́ва, Человѣколю́бче.
Богоро́диченъ: Кро́въ, и заступле́ніе, и прибѣ́жище, бу́ди ми́, рабу́ Твоему́, Богоро́дице, и отъ безмѣ́рныхъ зо́лъ исцѣли́ мя́, да пою́ Ти́, Пречи́стая: сла́ва Рождеству́ Твоему́.
Пѣ́снь 5.
Ирмо́съ: Свѣ́томъ Твои́мъ невече́рнимъ, Христе́, озари́, Бо́же, смире́нную мою́ ду́шу и наста́ви на стра́хъ Тво́й, зане́ свѣ́тъ — повелѣ́нія Твоя́.
На горѣ́ Лѣ́сновстѣй процвѣ́лъ еси́ я́ко кипари́съ, преподо́бне о́тче Гавріи́ле, и плоды́ ду́ха прине́слъ еси́ во мно́зѣ терпѣ́ніи: тѣле́сное удруче́ніе, и отъ бѣсо́въ и злы́хъ человѣ́къ озлобле́ніе, сего́ ра́ди прія́лъ еси́ вѣ́чное утѣше́ніе.
Не отъ человѣ́къ бы́сть твое́ зва́ніе, но отъ Бо́га, прему́дре Гавріи́ле, и, я́ко еле́нь жажда́я, на исто́чники воды́ живы́я поте́клъ еси́, напитава́я ду́шу Христо́вою любо́вію. Укрѣпи́ бо тя́ на сіе́ Ца́рь ми́ра.
Просвѣще́нъ бы́въ Бо́жіею прему́дростію, веще́ственный о́гнь невеще́ственнымъ угаси́лъ еси́, и чистото́ю житія́ твоего́ безтѣле́снаго во́инства ли́ку сподо́бился еси́.
Богоро́диченъ: Источа́еши исцѣле́ній струи́ боля́щимъ всю́ду. Тя́ бо показа́ ми́лости Госпо́дь, рожде́йся изъ Тебе́ па́че ума́, исто́чника милосе́рдія, Влады́чице.
Пѣ́снь 6.
Ирмо́съ: Глубина́ страсте́й воста́ на мя́ и бу́ря проти́вныхъ вѣ́тровъ, но́, предвари́въ, мя Ты́ спаси́, Спа́се, и изба́ви отъ тли́, я́ко спа́слъ еси́ отъ звѣ́ря проро́ка.
Ду́хомъ Бо́жіимъ наставля́емь, богоблаже́нне, соблю́лъ еси́ чистоту́ естества́ твоего́, ангелоподо́бное житіе́ имѣ́лъ еси́. Тѣ́мже моли́ спасти́ся на́мъ отъ вра́гъ на́шихъ.
Умъ сво́й всегда́ къ Бо́гу имѣ́въ, ко всѣ́мъ жите́йскимъ бы́лъ еси́ нечу́вственъ, вся́ же кова́рства лука́ваго, я́ко сѣ́ть, расто́ргнулъ еси́, и ны́нѣ мо́лишися непреста́нно о всѣ́хъ на́съ.
Мо́лимъ тя́, богоблаже́нне о́тче Гавріи́ле, моли́ Христа́ Бо́га на́шего за оте́чество на́ше правосла́вное, и всѣ́мъ вѣ́рнымъ испроси́ отъ грѣ́хъ свобожде́ніе, и спасе́ніе, и ми́ръ мíрови.
Богоро́диченъ: Ру́ки Твоя́ пречи́стыя просте́рши, покры́й на Тя́ надѣ́ющіяся, и Сы́ну Твоему́, Богоро́дице, зову́щія: пода́ждь, Христе́, всѣ́мъ ми́лости Твоя́.
Конда́къ, гла́съ 6:
Ангельски на земли́ пожи́лъ еси́, житіе́мъ же Ева́нгеліе уясни́лъ еси́, у́мъ тво́й къ небеси́ впери́лъ еси́, лю́ди же благоче́стію учи́лъ еси́, сего́ ра́ди ублажа́емъ тя́: ра́дуйся, преподо́бне Гавріи́ле, Лѣ́сновская похвало́.
Икосъ:
Увы́ мнѣ́, скве́рному и всегрѣ́шному, я́ко дерзну́хъ пѣ́ти тебѣ́, чи́стому и свято́му, преподо́бне о́тче Гавріи́ле, но, надѣ́яся на милосе́рдіе и по́мощь твою́, оба́че дерза́ю воспѣва́ти: ты́ бо земны́й а́нгелъ и небе́сный человѣ́къ бы́лъ еси́, Христу́ отъ души́ послѣ́довалъ еси́, на земли́ бо о тлѣ́нныхъ небре́глъ еси́, болѣ́зньми, и труды́, и зѣ́льнымъ воздержа́ніемъ, злострада́ніемъ, и на земли́ лега́ніемъ, посто́мъ, бдѣ́ніемъ и моли́твами о́бразъ бы́лъ еси́ твои́мъ ученико́мъ, хра́мъ же тѣ́ла твоего́ непоро́ченъ соблю́лъ еси́, бы́въ до́мъ Бо́жій и жили́ще Свята́го Ду́ха, сего́ ра́ди прише́дъ, всели́ся въ тя́ Оте́цъ и Сы́нъ и Святы́й Ду́хъ, и дарова́ тебѣ́ наслѣ́діе небе́сное, тѣ́мъ тя́ чти́мъ: ра́дуйся, преподо́бне Гавріи́ле, Лѣ́сновская похвало́.
Пѣ́снь 7.
Ирмо́съ: Въ пещи́ пла́мень угаси́ша о́троцы и небе́сную ро́су прія́ша вѣ́рою: благослове́нъ еси́, Бо́же оте́цъ на́шихъ.
Зря́ всегда́ предъ очи́ма де́нь Госпо́день, послужи́лъ еси́ Влады́цѣ твоему́ во мно́зѣ терпѣ́ніи, воспѣва́я: благослове́нъ еси́, Бо́же оте́цъ на́шихъ.
Ничто́же отъ кра́сныхъ мíра сего́ разлучи́ тя́ отъ любве́ Христо́вы, и́бо па́че всѣ́хъ возлюби́лъ еси́ Іису́са сла́дкаго, Ему́же и вопіе́ши: благослове́нъ еси́, Бо́же оте́цъ на́шихъ.
Безстра́стенъ пребыва́я, богоблаже́нне, показа́лся еси́ душе́ю тве́рдый адама́нтъ, и ны́нѣ, предстоя́ Христу́, взыва́еши: благослове́нъ еси́, Бо́же оте́цъ на́шихъ.
Богоро́диченъ: Смире́нныя моея́ души́ не пре́зри, Всечи́стая, но вско́рѣ уще́дри, и отъ мно́жества содѣ́янныхъ мно́ю лю́тыхъ спаси́ мя́ и, обно́вльши благода́ть Твою́, просвѣти́ мя́, Дѣ́во Чи́стая.
Пѣ́снь 8.
Ирмо́съ: На престо́лѣ херуви́мстѣ Носи́маго, свяще́нницы, по́йте, лю́діе, превозноси́те во вся́ вѣ́ки.
Просія́лъ еси́ на свѣ́щницѣ Христо́ва сія́нія, и Госпо́дь Христо́съ чуде́съ да́ромъ обогати́ тя́, и яви́ тя́ вселе́ннѣй зна́ема. И ны́нѣ съ тобо́ю вси́ вопію́тъ: благослови́те, вся́ дѣла́ Госпо́дня, Го́спода, и превозноси́те во вся́ вѣ́ки.
Изря́денъ яви́лся еси́ мно́гими труды́ и по́двиги, и та́йными къ Бо́гу моли́твами, а́ще человѣ́комъ и невѣ́домы, но Бо́гомъ вся́ зри́мы и вѣ́домы, Ему́же вопіе́ши: благослови́те, вся́ дѣла́ Госпо́дня, Го́спода, и превозноси́те во вся́ вѣ́ки.
Земны́хъ ничто́же возлюби́лъ еси́, у́мъ сво́й во глубину́ смире́нія погрузи́лъ еси́, жела́я всели́тися въ Ца́рство небе́сное, е́же и получи́въ, вопіе́ши: благослови́те, вся́ дѣла́ Госпо́дня, Го́спода, и превозноси́те во вся́ вѣ́ки.
Богоро́диченъ: Благослови́те, вся́ дѣла́ Госпо́дня, Го́спода, ро́ждшагося отъ Дѣ́вы Марíи и возне́сшаго па́ки человѣ́чество на высоту́ небе́сную, Ему́же вопію́тъ вси́ а́нгели: да благослови́тъ вся́ тва́рь Го́спода, и превозно́ситъ во вся́ вѣ́ки.
Пѣ́снь 9.
Ирмо́съ: Тебе́, Неопали́мую Купину́ и Святу́ю Дѣ́ву, Ма́терь Свѣ́та и Богоро́дицу, Наде́жду всѣ́хъ на́съ, велича́емъ.
Бы́лъ еси́ сы́нъ и наслѣ́дникъ Ца́рствія Бо́жія, е́же скры́лъ еси́ вну́трь себе́ добродѣ́тели, сего́ ра́ди ублажа́емъ тя́, Христа́ велича́юще.
Вси́ собо́ри вѣ́рніи, ю́ноши и дѣ́вы, ста́рцы и ста́рицы, не́мощни и крѣ́пцы, покланя́ются честны́мъ моще́мъ твои́мъ и ублажа́ютъ тя́, Христа́ велича́юще.
Па́мять твою́ свѣтоно́сную похваля́юще, мо́лимъ тя́, преподо́бне о́тче, испо́лни и на́съ ра́дости и весе́лія духо́внаго.
Богоро́диченъ: Возвели́чимъ Ма́терь Бо́га на́шего, Юже пою́тъ вся́ небе́сныя си́лы святы́хъ а́нгелъ и арха́нгелъ, и вси́ ро́ди и колѣ́на покланя́ются и блажа́тъ, вопію́ще: ра́дуйся, Благода́тная, Госпо́дь съ Тобо́ю.
Свѣти́ленъ.
Свѣ́томъ Христо́вымъ просвѣти́вся, показа́лся еси́ свѣти́льникъ всему́ ро́ду на́шему, и́бо горя́ ду́хомъ по за́повѣди Христо́вѣ, всѣ́хъ просвѣща́лъ еси́ Ева́нгеліемъ, и ны́нѣ, предстоя́ во свѣ́тѣ Святы́я Тро́ицы, моли́ о е́же спасти́ся на́мъ. [Два́жды.]
[Сла́ва, и ны́нѣ,] богоро́диченъ:
Свѣ́тъ ро́ждши ду́шъ на́шихъ, Богоро́дице, Христа́ отъ Отца́ возсія́вшаго, просвѣти́вшаго вся́ вѣ́рныя и отгна́вшаго тму́ идолобѣ́сія, на́мъ же дарова́вшаго благода́тію бы́ти ча́домъ Бо́жіимъ, водворя́тися во свѣ́тѣ присносу́щнѣмъ, и Ду́хомъ Бо́жіимъ освяща́тися, Тя́ воспѣва́ющимъ.
На хвали́техъ стихи́ры на 4, гла́съ 6:
Усе́рдно рабо́тая Христу́ Бо́гу на́шему,* прине́слъ еси́ Ему́ по́двиги и труды́ твоя́,* и по́льзу мно́гимъ сотвори́лъ еси́,* ри́зу же твою́ душе́вную* снѣ́га бѣлѣ́йши убѣли́лъ еси́,* нело́жно послушли́въ бы́въ Христу́,* Его́же со дерзнове́ніемъ моли́* о душа́хъ на́шихъ.
Презрѣ́въ навсегда́ плотска́я мудрова́нія,* вся́ блага́я въ мíрѣ се́мъ оста́вилъ еси́,* и бы́лъ еси́ изря́дный послу́шникъ Христо́въ,* терпѣ́ніемъ, посто́мъ и смире́ніемъ* яви́лся еси́ всѣ́мъ вѣ́рнымъ свѣти́льникъ неугаса́емый,* себѣ́ же стяжа́лъ еси́ Ца́рство небе́сное.* Моли́ о спасе́ніи ду́шъ на́шихъ.
Кто́ мо́жетъ изчести́* вся́ труды́ и по́двиги твоя́,* я́же за Христа́ подъя́лъ еси́?* Ибо ты́ дѣ́лы испо́лнилъ еси́ вся́ уче́нія Христо́ва,* и по преставле́ніи просія́ свѣ́тлость житія́ твоего́,* и ны́нѣ во свѣ́тѣ пребыва́еши со святы́ми а́нгелы.* Тѣ́мже ны́нѣ мо́лимъ тя́:* моли́ спасти́ся душа́мъ на́шимъ.
Воздержа́нія брозда́ми* побѣди́лъ еси́ вся́ стра́сти чу́вственныя,* и во Христа́ обле́клся еси́,* и ре́вность къ безпло́тнымъ на земли́ показа́лъ еси́,* тѣ́мъ и мно́гая враго́въ ополче́нія обличи́лъ еси́,* преподо́бне о́тче Гавріи́ле,* моли́ спасти́ся душа́мъ на́шимъ.
Сла́ва, гла́съ 4:
Да лику́етъ дне́сь гора́ Лѣ́сновская, да торжеству́ютъ вси́ лю́бящіи благоче́стіе, и да восхва́лятъ богоно́снаго отца́ на́шего Гавріи́ла, и́же еще́ на земли́ просія́ свѣ́тлостію житія́ своего́, и воспрія́ бога́тство благода́тное, и ны́нѣ на небесѣ́хъ мо́лится о спасе́ніи ду́шъ на́шихъ.
И ны́нѣ, богоро́диченъ, гла́съ то́йже:
На́шихъ прегрѣше́ній плени́цу расто́ргни, Дѣ́во Влады́чице, моля́щи Сы́на Твоего́ и Го́спода, и томя́щій на́съ грѣ́хъ, Приснодѣ́во, низложи́, я́ко да воспѣва́емъ Тя́ всегда́, Всенепоро́чная, Тобо́ю спаса́еми.
Славосло́віе вели́кое. Тропа́рь преподо́бнаго. Сла́ва, и ны́нѣ, богоро́диченъ: Иже на́съ ра́ди… Ектеніи́ и отпу́стъ.
НА ЛИТУРГІИ,
Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Кори́нѳяномъ, зача́ло 176: Бо́гъ, рекíй изъ тмы́ свѣ́ту возсія́ти… Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе отъ Луки́, зача́ло 77: Идя́ху съ Ни́мъ наро́ди мно́зи… Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].
Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 260-269.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.