НА МАЛѢЙ ВЕЧЕРНИ,
На Го́споди воззва́хъ: поста́вимъ стихо́въ 4, и пое́мъ стихи́ры, гла́съ 1. Подо́бенъ: Небе́сныхъ чино́въ.
Святы́я горы́ вели́кихъ отце́въ,* о́тче Анто́ніе, стопа́мъ послѣ́довалъ еси́* и, я́ко безпло́тенъ, въ пло́ти подвиза́вся,* о́бразъ мно́гимъ добродѣ́телію бы́лъ еси́.* Отону́дуже и даро́въ чуде́съ отъ Христа́ сподо́бился еси́,* исцѣля́ти человѣ́ковъ разли́чныя неду́ги,*моли́ спасти́ся душа́мъ на́шимъ. [Два́жды.]
Нача́льникъ мона́шествующихъ, о́тче Анто́ніе, бы́лъ еси́,* себе́ первонача́токъ безъ кро́ве Бо́гу принося́* воздержа́ніемъ любому́дрія;* смире́ніемъ, высо́кими нра́вы* и безмѣ́рнымъ поще́ніемъ врага́ посрами́лъ еси́, преподо́бне,* моли́ спасти́ся душа́мъ на́шимъ.
Свѣтоно́сная па́мять твоя́,* о́тче преподо́бне Анто́ніе,* испо́лнена ра́дости и весе́лія яви́ся,* отону́дуже свяще́нная твоя́ ча́да, соше́дшеся,* духо́вно пра́зднующе, прославля́емъ Го́спода,* тебе́ и́скренно просла́вльшаго.
Сла́ва, гла́съ 6:
Дне́сь гора́ Аѳо́нская, я́коже но́ваго Авраа́ма пресе́льника, тя́ пресла́вно, о́тче, пріе́мши, ра́дуется, оте́чество же твое́, блаже́нне, па́ки сожи́теля тя́ иму́щи, зѣло́ весели́тся, и пеще́ра, въ не́йже подвиза́лся еси́, о тебѣ́ красу́ется. Пресвѣ́тлый гра́дъ Кíевъ, па́мять твою́ пра́зднуя, торже́ственная Го́споду воспѣва́етъ, тя́ стѣ́ну неразоре́нну сему́ дарова́вшаго. Мы́ же, ча́да твоя́, твои́мъ науче́ніемъ наставля́еми, ны́нѣ пресла́вное твое́ успе́ніе пра́зднующе, мо́лимся: моли́ спасти́ся душа́мъ на́шимъ.
И ны́нѣ, богоро́диченъ:
Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].
На стихо́внѣ стихи́ры, гла́съ 2. Подо́бенъ: До́ме Евфра́ѳовъ.
Отъ земны́хъ къ небе́снымъ оби́телемъ* пресла́вно, о́тче, преше́лъ еси́* и та́мо преподо́бныхъ че́сти сподо́бился еси́:* съ ни́миже моли́* спасти́ся душа́мъ на́шимъ.
Сти́хъ: Честна́ предъ Го́сподемъ* сме́рть преподо́бныхъ Его́.
Тѣле́сная чу́вства воздержа́ніемъ,* о́тче, умертви́лъ еси́,* тѣ́мъ и въ те́мную пеще́ру,* я́ко въ пресвѣ́тлый черто́гъ, всели́лся еси́,* идѣ́же и учени́къ мно́жество Христу́ приве́лъ еси́.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Ста́до твое́,* тебе́ почита́ющее, преподо́бне,* и твое́ успе́ніе пра́зднующее,* ва́рварскаго наше́ствія избавля́я,* моли́ спасти́ся душа́мъ на́шимъ.
Сла́ва, и ны́нѣ, гла́съ 2:
Хра́мъ прече́стенъ Бо́жія Ма́тере, я́коже Сама́ Та́ восхотѣ́, воздви́глъ еси́ и та́мо мно́жество учени́къ собра́лъ еси́ въ не́мъ воспѣва́ти Влады́чицу и Богоро́дицу, Юже моли́, мо́лимъ ти ся, преподо́бне Анто́ніе, не оста́вити, я́коже обѣща́лся еси́, свяще́нное твое́ ста́до, избавля́я и спаса́я отъ проти́вныхъ наше́ствія, да тебе́ вси́, я́ко чадолюби́ваго отца́, пѣ́сньми непреста́нно почита́емъ, прося́ще отъ Христа́ прія́ти тобо́ю ве́лію ми́лость.
Тропа́рь, гла́съ 4:
Отъ мірска́го мяте́жа изше́дъ, отверже́ніемъ же мíра ева́нгельски Христу́ послѣ́довалъ еси́ и, равноа́нгельное житіе́ пожи́въ, въ ти́хое приста́нище Святы́я горы́ Аѳо́на дости́глъ еси́, отону́дуже благослове́ніемъ отце́въ въ го́ру Кíева прише́дъ и та́мо трудолю́бно жи́знь соверши́въ, оте́чество твое́ просвѣти́лъ еси́ и, мно́жеству мона́шествующихъ стезю́, веду́щую къ небе́сному Ца́рствію, показа́въ, Христу́ сія́ приве́лъ еси́, Его́же моли́, Анто́ніе преподо́бне, да спасе́тъ ду́ши на́ша.
НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.
На Го́споди воззва́хъ: поста́вимъ стихо́въ 8. И пое́мъ стихи́ры, гла́съ 4. Подо́бенъ: Зва́нный свы́ше.
Егда́ Боже́ственное раче́ніе* на́йде на тя́, преподо́бне,* тогда́ мірско́е пристра́стіе,* я́ко ху́до, вмѣни́лъ еси́,*тѣ́мже и пресе́льникъ* отъ твоего́ оте́чества* Святы́я горы́ бы́лъ еси́* и та́мо, посредѣ́ о́нѣхъ оте́цъ,* я́ко свѣти́ло, возсія́лъ еси́* добродѣ́телію, Анто́ніе.* Христа́, Ему́же отъ ю́ности послужи́лъ еси́,* моли́ спасти́ и просвѣти́ти ду́ши на́ша. [Два́жды.]
Егда́ Христо́вою любо́вію* распали́лся еси́, преподо́бне,* тогда́ мíра сего́* мудрова́ніе и сла́ву,* я́ко преходя́щую, возненави́дѣлъ еси́.* Тѣ́мже и пеще́ру себѣ́ содѣ́лалъ еси́* и въ не́й подвиза́лся, я́ко безпло́тенъ,*тѣ́мже и свы́ше безпло́тныхъ* по́чести сподо́бился еси́,* съ ни́миже Христу́ предстоя́,* моли́ спасти́ и просвѣти́ти ду́ши на́ша.
Егда́ Боже́ственную любо́вь* прія́лъ еси́ въ се́рдцы, о́тче,* тогда́ въ те́мную пеще́ру,* я́ко въ пресвѣ́тлый черто́гъ, вше́лъ еси́,* и та́мо неизрече́нныхъ ра́зума обогати́лся,* зрѣ́ти бу́дущая, я́ко настоя́щая,* и всѣ́мъ я́сно глаго́лати:* Христа́, Ему́же отъ ю́ности порабо́тился еси́,* Того́ моли́, преподо́бне,* спасти́ и просвѣти́ти ду́ши на́ша.
Ины стихи́ры преподо́бнаго, гла́съ 5. Подо́бенъ: Преподо́бне о́тче.
Преподо́бне о́тче Анто́ніе,* благода́тію Пресвята́го Ду́ха у́мъ тво́й озари́въ,* тѣ́мъ, я́ко прозорли́въ, проро́чески проре́клъ еси́* хотя́щь гнѣ́въ Бо́жій пріити́ на Правосла́віе.* Отню́дуже и Си́мону спасе́ніе отъ ра́тныхъ обручи́лъ еси́* и пре́жде церко́внаго зда́нія* тому́ въ не́й положе́ну бы́ти предре́клъ еси́.* Тѣ́мъ я́ко хода́тая тя́ вы́ну* всѣ́мъ благи́мъ воспѣва́емъ,* прося́ще тобо́ю отъ Христа́ прія́ти ве́лію ми́лость. [Два́жды.]
Преподо́бне о́тче Анто́ніе,* ты́, и́стиннаго Па́стыря и Учи́теля Христа́* за́повѣди исполня́я,* любо́вное и по преставле́ніи твое́мъ показа́въ,* Ера́зма о раска́яніи имѣ́нія,* лѣ́ностно пожи́вшаго,* моли́твами твои́ми и явле́ніемъ* сме́ртнаго неду́га премѣни́лъ еси́* и, вре́мя покая́нія тому́ дарова́въ,* ины́хъ къ цѣлому́дрію наста́вилъ еси́,* тѣ́мже Христа́ моли́* спасти́ся душа́мъ на́шимъ.
Преподо́бне о́тче Анто́ніе,* ты́ съ Бо́гомъ цѣлому́дренно* кора́бль ума́ твоего́ напра́вилъ еси́* и страстну́ю пучи́ну мо́ря мíра сего́ немяте́жно преплы́лъ еси́,* Ду́ха Пресвята́го вѣ́триломъ направля́емь,* въ ти́хое приста́нище поро́ды дости́глъ еси́,* идѣ́же святы́хъ жили́ще и поко́й пра́ведныхъ.* Съ ни́миже моли́ся* и на́мъ та́мо вхо́дъ получи́ти, мо́лимся.
Сла́ва, гла́съ 6:
Жесто́кое твое́ житіе́ и труды́, я́же по Бо́зѣ, я́ко позна́но бы́сть отца́ми Святы́я горы́, тогда́ Боже́ственнымъ промышле́ніемъ па́ки ко оте́честву твоему́ посыла́емь быва́еши: иди́, ча́до, глаго́ля, я́ко да и та́мо тобо́ю невѣ́дущими Бо́гъ позна́ется. Отону́дуже прише́дъ, преподо́бне, оте́чество твое́ просвѣти́лъ еси́ и чинонача́льникъ мона́ховъ бы́лъ еси́, тѣ́хъ мно́жества ко Христу́ приве́дъ. Тѣ́мже и на́съ, пресвѣ́тлое твое́ успе́ніе пра́зднующихъ, моли́ сохрани́ти отъ вра́гъ нера́тованныхъ и спасти́ся душа́мъ на́шимъ.
И ны́нѣ, богоро́диченъ:
Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].
Вхо́дъ. Проки́менъ дне́. Чте́нія три́.
Прему́дрости Соломо́ни чте́ніе.
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе.
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
Прему́дрости Соломо́ни чте́ніе.
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На литíи стихи́ры самогла́сны, гла́съ 1:
Тезоимени́таго ра́ди твоего́ житія́ Боже́ственнымъ про́мысломъ, Анто́ніе, нарече́нъ бы́лъ еси́, именова́ніе отъ дѣ́лъ воспріе́мъ: учени́къ бо мно́жества собра́въ, твои́мъ уче́ніемъ послѣ́дующихъ, си́хъ Бо́гу приве́лъ еси́. Но я́ко преподо́бнымъ сожи́тель и пра́веднымъ, съ ни́миже Тро́ицѣ предстоя́й, моли́ о всѣ́хъ, пресла́вное твое́ успе́ніе пѣ́сньми сла́вящихъ.
Яко стра́стнаго мра́ка мíра сего́ избѣжа́въ, Анто́ніе преподо́бне, тогда́ въ пеще́ру всели́лся еси́, пречу́дне, и та́мо прини́клъ еси́ въ глубину́ Боже́ственнаго ра́зума. Тѣ́мже и сподо́бился еси́, я́ко прозорли́въ, да́льняя проразумѣва́ти и, я́ко бли́зъ су́щая, я́сно глаго́лати, и о согрѣше́ніихъ людски́хъ поболѣ́въ, и хотя́щая бы́ти за грѣхи́ человѣ́ческія ва́рварское наше́ствіе проро́чески предре́клъ еси́. Но моли́ся, о́тче, мо́лимся, изба́витися на́мъ такова́го преще́нія и спасти́ся душа́мъ на́шимъ.
Гла́съ 2:
Кíй ра́зумъ человѣ́ческій или́ язы́къ возмо́жетъ изрещи́ или́ похвали́ти по досто́инству житіе́ твое́? И са́ми бо а́нгели житію́ твоему́, е́же на земли́ въ тѣлеси́, удиви́шася и похвали́ша Христа́, толи́кую побѣ́ду, преподо́бне, тебѣ́ на стра́сти дарова́вшаго, Его́же моли́, прехва́льне, спасти́ся похвале́ніе, ели́ко мо́щно, тебѣ́ плету́щу, Анто́ніе пречу́дне.
Блаже́нна пеще́ра, иму́щая въ себѣ́ честны́я мо́щи твоя́, преподо́бне, отъ ни́хже истека́ютъ вѣ́рнымъ исцѣле́нія; блаже́нни же ученицы́ твои́, такова́го учи́теля тебе́ стяжа́вшіи и такова́ отца́ ча́да наре́кшіися, Анто́ніе пречу́дне, моли́твенниче о душа́хъ на́шихъ.
Гла́съ 4:
Ны́нѣ всечестно́е и свяще́нное тѣ́ло твое́, преподо́бне Анто́ніе, въ пеще́рѣ лежа́щее, въ не́йже еще́ въ жи́зни се́й мно́го потруди́ся, исцѣле́нія оби́льно источа́етъ вѣ́рою приходя́щимъ. Тѣ́мже мо́лимъ тя́: и душе́вное здра́віе моли́твами твои́ми при́сно подава́й тебе́ ублажа́ющимъ.
Сла́ва, и ны́нѣ, гла́съ 8:
Вели́ко дерзнове́ніе и вѣ́ра, ю́же къ Бо́гу, стяжа́лъ еси́, преподо́бне Анто́ніе: проро́ку бо Гедео́ну подо́бяся, руно́мъ искуша́ющу побѣ́ду, та́кожде и ты́, о́тче, росо́ю хотѣ́лъ еси́ увѣ́дѣти, гдѣ́ мѣ́сто уго́дно е́сть Влады́чицѣ и Цари́цѣ. Тѣ́мже и ре́клъ еси́: а́ще обрѣто́хъ благода́ть предъ Тобо́ю, да бу́детъ по все́й земли́ роса́, на мѣ́стѣ, на не́мже изво́лиши хра́му бы́ти, су́ша да бу́детъ. И па́ки, да бу́детъ на мѣ́стѣ роса́. И сія́ обоя́, о́тче, получи́лъ еси́, тѣ́мже и прече́стенъ хра́мъ Ма́тери Бо́жіи воздви́глъ еси́, съ Не́юже моли́ся Христу́, мо́лимъ, спасти́ся душа́мъ на́шимъ.
На стихо́внѣ стихи́ры, гла́съ 1. Подо́бенъ: Прехва́льніи му́ченицы.
Стопа́мъ вели́каго Анто́нія послѣ́довалъ еси́, преподо́бне,* о́нъ бо въ пусты́ню безмо́лвія ра́ди всели́ся* и а́нгеломъ собесѣ́дникъ бы́ти сподо́бися,* ты́ же въ подзе́мная мѣ́ста пеще́ры затвори́лся еси́,* Свѣ́тъ неизрече́нный сподо́бился еси́ зрѣ́ти.* Тѣ́мже о́наго житію́ поревнова́въ,* именова́ніе отъ дѣ́йства пріе́мъ,* съ ни́мже Тро́ицѣ Святѣ́й предстоя́,* моли́ спасти́ся душа́мъ на́шимъ.
Сти́хъ: Честна́ предъ Го́сподемъ* сме́рть преподо́бныхъ Его́.
Яко пресвѣ́тлый свѣти́льникъ,* въ те́мнѣ мѣ́стѣ просія́лъ еси́,* и, я́ко фи́никсъ въ дому́ Бо́жіи,* проро́чески процвѣ́лъ еси́* и пло́дъ пресвя́тъ — са́мъ себе́ Влады́цѣ,* жи́ву же́ртву безъ кро́ве,* прине́слъ еси́, о́тче.* Тѣ́мже тя́ вси́, любо́вію соше́дшеся,* по достоя́нію при́сно ублажа́емъ.
Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.
Пеще́ра, въ не́йже лежи́тъ* свяще́нное тѣ́ло твое́,* преподо́бне Анто́ніе,* Ду́ха Пресвята́го си́лою* неду́ги разли́чныя исцѣля́етъ вѣ́рою приходя́щихъ,* бѣ́си отъ человѣ́къ отгони́ми быва́ютъ,* и разсла́бленніи, здра́віе пріе́млюще, отхо́дятъ.* Мы́ же, похваля́юще Го́спода, глаго́лемъ:* честна́ предъ Го́сподемъ сме́рть святы́хъ Его́.
Сла́ва, гла́съ 6:
Ди́вно проше́ніе, и вѣ́ра превели́ка, ю́же стяжа́лъ еси́, преподо́бне Анто́ніе, проро́ку бо Иліи́ подо́бяся. Онъ бо о́гнь съ небесе́ сведе́ въ пояде́ніе же́ртвы, та́кожде и ты́ моли́твою о́гнь съ небесе́ сво́диши въ пояде́ніе и очище́ніе мѣ́ста, идѣ́же пресла́вный хра́мъ Влады́чицы и Богоро́дицы хотя́ше воздви́гнутися. Тѣ́мже тя́, я́ко сожи́теля преподо́бнымъ и проро́комъ ревни́теля, ублажа́юще, мо́лимъ: моли́ся Христу́ спасти́ся душа́мъ на́шимъ.
И ны́нѣ, богоро́диченъ:
Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].
На благослове́ніи хлѣ́бовъ: тропа́рь, гла́съ 4: Отъ мірска́го мяте́жа изше́дъ… [пи́санъ на ма́лѣй вече́рни], два́жды, и Богоро́дице, Дѣ́во.., еди́ножды.
НА УТРЕНИ,
[На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ: Еже отъ вѣ́ка утае́нное…]
По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.
Пресвѣ́тлый и свѣтоно́сный, богому́дре Анто́ніе, тво́й приспѣ́ пра́здникъ, созыва́ющій мона́ховъ мно́жества просла́вити и пѣ́ти твое́ честно́е успе́ніе, прося́ще отъ Христа́ хода́тайствомъ твои́мъ прія́ти ве́лію ми́лость. [Два́жды.]
Сла́ва, и ны́нѣ, богоро́диченъ:
Яви́лася еси́ вы́шши го́рнихъ си́лъ, Влады́ку ро́ждши, Богоро́дице, и земны́хъ естество́ вознесла́ еси́, Богоневѣ́стная, тѣ́мже Тя́, и́стинную Богороди́тельницу, душе́ю и язы́комъ, вѣ́рніи, сла́вимъ.
По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.
Собесѣ́дникъ и сослужи́тель отце́мъ Святы́я горы́, о́тче, бы́лъ еси́, и тѣ́хъ стопа́мъ послѣ́довавъ, я́ко безпло́тенъ, на земли́ пожи́лъ еси́. Тѣ́мже преподо́бнымъ яви́лся еси́ единожи́тель, съ ни́миже и въ вы́шнихъ ликовству́я, моли́ спасти́ся душа́мъ на́шимъ, тебе́ непреста́нно сла́вящимъ. [Два́жды.]
Сла́ва, и ны́нѣ, богоро́диченъ:
Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.
По поліеле́и сѣда́ленъ, гла́съ 8. Подо́бенъ: Прему́дрости.
Въ подзе́мныя пеще́ры вше́лъ еси́, преподо́бне, и отту́ду я́ко побѣди́тель страсте́й, на колесни́цу добродѣ́телей возше́дъ, я́коже другíй Илія́, къ небесе́мъ возлетѣ́въ, та́мо пра́ведно пресвѣ́тлымъ вѣнце́мъ вѣнча́лся еси́, блаже́нне. Но я́ко егда́ съ на́ми бы́лъ еси́ въ жи́зни се́й, печа́ся и промышля́я на́мъ поле́зная, та́ко и ны́нѣ, о́тче Анто́ніе, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]
Сла́ва, и ны́нѣ, богоро́диченъ:
Яко Всенепоро́чная Невѣ́сто Творцу́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, свѣтоно́сная, нетлѣ́нная. Отжени́ о́блакъ страсте́й и вы́шняго прича́стія сподо́би и свѣ́та невече́рняго, моли́твами Твои́ми.
Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе… Ева́нгеліе Матѳе́я, зача́ло 43.
По 50-мъ псалмѣ́ стихи́ра, гла́съ 6:
Жесто́кое твое́ житіе́ [и труды́, я́же по Бо́зѣ, я́ко позна́но бы́сть отца́ми Святы́я горы́, тогда́ Боже́ственнымъ промышле́ніемъ па́ки ко оте́честву твоему́ посыла́емь быва́еши: иди́, ча́до, глаго́ля, я́ко да и та́мо тобо́ю невѣ́дущими Бо́гъ позна́ется. Отону́дуже прише́дъ, преподо́бне, оте́чество твое́ просвѣти́лъ еси́ и чинонача́льникъ мона́ховъ бы́лъ еси́, тѣ́хъ мно́жества ко Христу́ приве́дъ. Тѣ́мже и на́съ, пресвѣ́тлое твое́ успе́ніе пра́зднующихъ, моли́ сохрани́ти отъ вра́гъ нера́тованныхъ и спасти́ся душа́мъ на́шимъ].
Кано́нъ Богоро́дицы со ирмосо́мъ на 6, гла́са 8-го. И преподо́бнаго два́ кано́на на 8.
[Кано́нъ преподо́бнаго Анто́нія], гла́съ 4.
Пѣ́снь 1.
Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.
Зѣ́льнымъ воздержа́ніемъ, и труды́, о́тче Анто́ніе, и всено́щнымъ стоя́ніемъ ду́шу твою́ царя́ надъ страстьми́ тѣле́сными поста́вилъ еси́. Тѣ́мже, со святы́ми веселя́щеся, Христа́ пое́мъ, тебе́ такову́ побѣ́ду на стра́сти дарова́вшаго.
Приспѣ́ дне́сь всечестны́й де́нь успе́нія твоего́, о́тче Анто́ніе, бога́тно веселя́ ча́да твоя́, всече́стне. Тѣ́мже, помина́юще твое́ дре́внее житіе́ и а́нгельскую жи́знь, свѣ́тло пра́зднующе, тебе́ воспѣва́емъ, о́тче.
Отъ те́мныхъ мѣ́стъ восхи́тився, къ превы́шнимъ свѣ́тлостемъ пресла́вно преше́лъ еси́, преподо́бне, и та́мо со святы́ми, я́ко побѣди́тель страсте́й, о́тче, вѣнча́лся еси́.
Богоро́диченъ: Лю́тѣ погружа́емую ду́шу мою́ въ пучи́нѣ страсте́й бу́рею безмѣ́рныхъ обстоя́ній, спасе́нія просте́рши ми́ ру́ку, возведи́, Влады́чице, изъ глубины́ зо́лъ мои́хъ.
Другíй кано́нъ преподо́бнаго, гла́съ 2.
Пѣ́снь 1.
Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.
Еще́ отъ ма́лыя версты́, преподо́бне Анто́ніе, вели́ку любо́вь стяжа́лъ еси́ къ Бо́гу, и сего́ ра́ди плотска́я взыгра́нія и стра́сти до конца́ умертви́лъ еси́, и чистото́ю, я́коже кри́лы, впери́вся пресла́вно, къ небесе́мъ возлетѣ́лъ еси́, о́тче.
Влады́чнему любостра́нству, преподо́бне, подо́бяся, са́мъ стра́нствовати изво́лилъ еси́, Анто́ніе, тѣ́мже Всеви́дящее Око, ви́дя твое́ благо́е произволе́ніе, да́ромъ чуде́съ обогати́ тя, я́ко пресла́вна.
Душе́вную ти́хость и любо́вь, я́же къ Бо́гу, нра́вы и обы́чаи благи́ми укра́шена тя́ ви́дѣвъ, тво́й духо́вный настоя́тель, преподо́бне, проро́чески всѣ́мъ проповѣ́дуетъ хотя́щая напослѣ́докъ тобо́ю бы́ти пресла́вная, Анто́ніе.
Богоро́диченъ: Мои́хъ прегрѣше́ній, Влады́чице, плени́цы расто́ргни, Твоего́ Сы́на и Бо́га моля́щи, и томя́щій мя́ грѣ́хъ, Приснодѣ́во, низложи́, я́ко да воспѣва́ю Тя́, всегда́, Пренепоро́чная, Тобо́ю спаса́емь.
Катава́сія: Отве́рзу уста́ моя́…
Пѣ́снь 3.
Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.
Проповѣ́дуетъ пресла́вно и па́че трубы́ вопіе́тъ свяще́нная твоя́, о́тче, вели́кая Ла́вра, я́же тобо́ю нача́ло пріе́мшая, до́мъ же Бо́жія Ма́тере, а́ще и не гла́сомъ, вещьми́ же хва́лится, глаго́ля: утверди́хся Тобо́ю, Го́споди.
Еди́наго Го́спода возлюби́лъ еси́ и, Сего́ Кре́стъ на ра́мо взе́мъ, преподо́бне Анто́ніе, страннолѣ́пно пожи́лъ еси́, въ постѣ́хъ, и бдѣ́ніихъ, и моли́твахъ о́бразъ бы́въ твои́мъ ученико́мъ. Тѣ́мже и отъ Христа́ просла́вился еси́.
Плотска́го жела́нія, преподо́бне, отве́ргся, го́рдость возненави́дѣлъ еси́, смире́ніемъ же и нището́ю обогати́вся, превысо́кая дости́глъ еси́ святы́хъ жили́ща.
Богоро́диченъ: Поми́луй, еди́на Богома́ти, поми́луй и уще́дри ду́шу мою́ окая́нную, потопля́емую бѣ́сы и страстьми́ лука́выми, и пре́жде вре́мене исхо́да моего́ сію́ очи́стити умилосе́рдися.
Инъ.
Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.
Прозрѣ́въ бу́дущая воздая́нія, здѣ́ маловре́менная, я́ко не су́щая, о́тче, оста́вилъ еси́ и сего́ ра́ди сугу́бая воздая́нія прія́лъ еси́, преподо́бне. Тѣ́мже со а́нгелы непреста́нно пое́ши Влады́ку твоего́.
Моли́тися, о́тче, не преста́й о ста́дѣ твое́мъ, е́же мно́гими по́ты и труды́ стяжа́лъ еси́, изба́вити всѣ́хъ обстоя́ній, бѣ́дъ же и скорбе́й, да вси́ тебе́, я́ко чадолюби́ва отца́, воспѣва́емъ.
Весе́ліемъ, преподо́бне, съ чи́нми святы́хъ Бо́гу предстои́ши, я́же та́мо весе́лія и ра́дости насыща́яся, сподо́би и на́съ та́мошняя ра́дованія получи́ти, да, веселя́щеся, тебе́ велича́емъ, о́тче Анто́ніе.
Богоро́диченъ: Просте́рши ру́ку благоутро́бія, Богороди́тельнице, вся́каго мя́ изми́ осужде́нія, къ Тебѣ́ прибѣга́ющаго, и Тебѣ́ припа́дающа, и призыва́юща Твою́ по́мощь.
Сѣда́ленъ, гла́съ 4. Подо́бенъ: Удиви́ся Іо́сифъ.
Удиви́ся тво́й духо́вный настоя́тель, въ тебѣ́ вели́ко воздержа́ніе зря́, и внима́ше мы́слію хотя́щая о тебѣ́ напослѣ́докъ бы́ти, Анто́ніе, ви́дѣвъ бо по Бо́зѣ твое́ вели́кое житіе́ и вра́жіими прило́ги ника́коже поколеби́ма. Тѣ́мже и свидѣ́тельствуетъ, я́ко оте́цъ и храни́тель твоего́ житія́, отце́мъ Святы́я горы́ вопія́ше: се́й, и́же посредѣ́ на́съ ви́дится ме́ньшій, но послѣди́ въ Россíи вели́кій свѣти́льникъ бу́детъ. [Два́жды.]
Сла́ва, и ны́нѣ, богоро́диченъ:
Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.
Пѣ́снь 4.
Ирмо́съ: Неизслѣ́дный Бо́жій совѣ́тъ, е́же отъ Дѣ́вы, воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.
Мѣ́сто, въ не́мже лежи́тъ честно́е и свяще́нное тѣ́ло твое́, преподо́бне Анто́ніе о́тче, мно́га исцѣле́нія отту́ду пріе́млютъ вѣ́рніи, Христу́ отъ души́ вопію́ще: сла́ва си́лѣ Твое́й, Го́споди.
Не устраши́ тебе́, преподо́бне, долгота́ жесто́каго пути́, ниже́ та́мо разбо́йническое наше́ствіе. Тѣ́мже Святу́ю го́ру доше́дъ, съ су́щими та́мо отцы́ воспѣва́лъ еси́: сла́ва си́лѣ Твое́й, Го́споди.
Ви́дѣвъ Всеблагíй Бо́гъ тве́рдое твое́ и до́брое изволе́ніе, та́мо во святы́хъ мѣ́стѣхъ посредѣ́ оте́цъ, сла́вна тя́ сотворя́етъ, съ ни́миже сподо́би взыва́ти: сла́ва си́лѣ Твое́й, Го́споди.
Богоро́диченъ: Ко́рень изъ чре́слъ Тя́ ца́рскихъ, всѣ́хъ Ца́рь, я́ко су́щу, вожделѣ́въ и вы́шшу херуви́мъ и серафи́мъ содѣ́лавъ, Богоро́дице, всели́ся въ Тя́.
Инъ.
Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.
Про́мысломъ Бо́жіимъ па́ки ко оте́честву твоему́, блаже́нне, посыла́емь быва́еши, я́ко да и та́мо мно́гихъ ко спаси́тельному пути́ наста́виши, Творцу́ воспѣва́ти: сла́ва си́лѣ Твое́й, Го́споди.
Упова́ніемъ бу́дущихъ бла́гъ, Анто́ніе, укрѣпля́емь, плотско́е стремле́ніе обузда́лъ еси́ и твое́й пло́ти вра́гъ неми́лостивъ, о́тче, бы́лъ еси́, сего́ ра́ди и по́мощь свы́ше стяжа́лъ еси́.
Въ цѣлому́дріи жи́знь твою́ препроводи́въ, преподо́бне, земна́я небе́сными измѣни́лъ еси́ и нетлѣ́нная тлѣ́нными искупи́лъ еси́. Тѣ́мже Христу́ пое́ши: сла́ва си́лѣ Твое́й, Го́споди.
Богоро́диченъ: До́брыхъ всѣ́хъ обнажи́хся и лежу́ въ зло́бѣ: оболкíй всѣ́хъ, дре́вле па́дшихъ, и ны́нѣ мя́ пре́ждними украси́, и вторы́хъ изба́ви, Богоневѣ́сто.
Пѣ́снь 5.
Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.
Мона́шествующихъ о́бразъ, о́тче, и наказа́тель бы́лъ еси́, тѣ́мже и си́льнымъ запреща́еши на восхище́ніе не жела́ти, но па́че маломо́щныя ми́ловати. И отъ сего́ просла́вился еси́, Анто́ніе, и вели́къ нарече́нъ учи́тель яви́лся еси́.
Вы́шше человѣ́ка, Анто́ніе, стяжа́лъ еси́ житіе́, равноа́нгельно пожи́въ на земли́, тѣ́мже ра́вну я́же а́нгеломъ по́честь сподо́бился еси́ получи́ти и пое́ши съ ни́ми Влады́ку твоего́.
Богодарова́нныя твоя́ благода́ти, о́тче Анто́ніе, вся́къ слу́хъ человѣ́ческій удиви́ша и научи́ша, я́же здѣ́ мня́щаяся вели́кая, я́ко ма́ла и ху́да, презрѣ́ти вся́ и послѣ́довати стопа́мъ твои́мъ, отону́дуже моли́, преподо́бне, спасти́ся на́мъ.
Богоро́диченъ: Упова́ніе еси́ мое́, Пречи́стая, и спасе́ніе, и похвала́. Тѣ́мже прибѣга́ю къ покро́ву Твоему́: не гнуша́йся мене́, грѣхи́ мно́гими, и болѣ́зньми, и скорбьми́ ны́нѣ поглоще́ннаго, но, предвари́вши, спаси́ мя.
Инъ.
Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.
Стра́нно твое́ житіе́, преподо́бне, ку́пно же и смире́ніе, е́же стяжа́лъ еси́, Анто́ніе, я́ко ни сама́го свѣ́та того́, и́же въ мíрѣ, ниже́ со́лнечного сія́нія, досто́йна тебе́ того́ вмѣни́лъ еси́ зрѣ́нія, но въ те́мнѣ мѣ́стѣ еди́нъ тебе́ затвори́лъ еси́.
Це́рковь и до́мъ Пресвята́го Ду́ха, о́тче Анто́ніе, бы́лъ еси́, разли́чными добродѣ́тельми укра́шенъ бы́въ, смире́ніемъ го́рнюю высоту́ наслѣ́дивъ, нището́ю небе́сное бога́тство прія́лъ еси́, преподо́бне.
Па́мять твою́ творя́щихъ свяще́нную отъ вся́кихъ спаси́ прегрѣше́ній, и печа́лей, и напа́стей, твое́ боже́ственное да́руй заступле́ніе, всѣ́хъ Царю́ предстоя́й, о́тче Анто́ніе.
Богоро́диченъ: Яко невече́рній Свѣ́тъ, отъ чре́ва Твоего́ су́щій возсія́вшій, отемне́нную ду́шу мою́ озари́, Влады́чице Чи́стая, и отжени́ вся́ку мглу́ се́рдца моего́.
Пѣ́снь 6.
Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.
Всегда́шнимъ къ Бо́гу раче́ніемъ внѣ́ пло́ти и мíра, о́тче Анто́ніе, бы́лъ еси́. Тѣ́мже и жили́ще досто́йно Ду́ха Пресвята́го показа́лся еси́, я́коже и Са́мъ Христо́съ рече́: прише́дъ со Отце́мъ и Ду́хомъ, та́мо вселю́ся.
Яко пресла́дкій нѣ́кій виногра́дъ, Свята́я гора́ тебе́, о́тче, израсти́вши, пресла́вно тобо́ю красу́ется и, ра́дующися, Христа́ прославля́етъ, тебе́ си́мъ дарова́вшаго.
Но́щь, я́ко де́нь, и де́нь, я́ко но́щь, тебѣ́ вмѣня́шеся, Анто́ніе: не да́лъ бо еси́, по проро́ку, сна́ очи́ма твои́ма, ни вѣ́ждома дрема́нія, ниже́ поко́я тѣлеси́ твоему́, до́ндеже сіе́ чи́сто съ душе́ю Бо́гу предста́вилъ еси́.
Богоро́диченъ: Твою́ пода́ждь ми́ по́мощь и изба́ви мя́ бѣ́дъ, и скорбе́й, и прегрѣше́ній мои́хъ, я́же всѣ́хъ ро́ждшая при́сное Избавле́ніе.
Инъ.
Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.
Яко свобожде́на бы́вши блаже́нная твоя́ душа́ отъ тя́жести плотскíя и отъ го́рькаго фарао́на мучи́теля, мíра сего́ изше́дши, въ зе́млю обѣтова́нія ра́йскаго пре́йде немяте́жно, со святы́ми пребыва́етъ, веселя́щися.
Ны́нѣ свяще́нное тѣ́ло твое́, преподо́бне, въ пеще́рѣ лежа́щее, исцѣле́нія мно́гая источа́етъ вѣ́рою приходя́щимъ. Тѣ́мже мо́лимъ тя́: и душе́вная здра́вія мольба́ми твои́ми пода́ждь тебе́ сла́вящимъ.
Свѣтлѣ́йши со́лнца возсія́ пречестна́я па́мять твоя́, Анто́ніе, въ ню́же соше́дшеся, прославля́емъ твое́ успе́ніе и труды́, я́же претерпѣ́лъ еси́ въ жи́зни се́й, прося́ще отъ Христа́ тобо́ю прія́ти грѣхо́въ оставле́ніе.
Богоро́диченъ: Красоты́ мя́ ви́дѣти сла́вы Твоея́ сподо́би, егда́ отъ пло́ти моея́ хощу́ разлучи́тися, я́ко утвержде́ніе мое́ еси́, Влады́чице: да отсю́ду пріиму́ избавле́ніе.
Конда́къ, гла́съ 8. Подо́бенъ: Взбра́нной.
Возложи́въ себе́ Бо́гу, па́че всѣ́хъ возлю́бленному отъ ю́ности, преподо́бне, Тому́ отъ всея́ души́ любо́вію послѣ́довалъ еси́, мíра же тлѣ́нная нивочто́же вмѣни́въ, въ земли́ пеще́ру содѣ́лалъ еси́ и, въ не́й до́брѣ проти́ву неви́димаго врага́ ко́зней подвиза́вся, я́ко свѣтоза́рное со́лнце, во вся́ концы́ земли́ возсія́лъ еси́, отону́дуже, веселя́ся, преше́лъ еси́ къ небе́снымъ черто́гомъ. И ны́нѣ со а́нгелы Влады́чню престо́лу предстоя́, помина́й на́съ, чту́щихъ па́мять твою́, да зове́мъ ти́: ра́дуйся, Анто́ніе, о́тче на́шъ.
Икосъ:
Присносу́щнаго немерца́ющаго свѣ́та Святы́я Тро́ицы наслади́тися жела́я и сего́ ра́ди четыредесятолѣ́тное вре́мя въ еди́ной пеще́рѣ те́мнѣ тебе́ затвори́въ, отту́ду неисхо́денъ, о́тче, пребы́лъ еси́, до́ндеже тѣ́ло твое́ чи́сто съ душе́ю Бо́гу предста́вилъ еси́. Отону́дуже и по преставле́ніи, я́ко жи́въ, отъ Го́спода дарова́нія чуде́съ прія́лъ еси́, исцѣля́ти разли́чныя болѣ́зни злѣ́ стра́ждущихъ и бѣ́сы отъ человѣ́къ приходя́щихъ изгони́ти. Тѣ́мже мо́лимъ тя́: моли́ся, о́тче, сохрани́ти безъ вре́да оте́чество твое́, гра́дъ же и лю́ди, да зове́мъ ти́: ра́дуйся, Анто́ніе, о́тче на́шъ.
Пѣ́снь 7.
Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.
Повелѣ́ніемъ духо́внаго твоего́ настоя́теля, блаже́нне Анто́ніе, па́ки ко оте́честву твоему́ посыла́емь быва́еши. Тѣ́мже рече́нная тебѣ́ отце́мъ, я́ко отъ Бо́га повелѣ́нная, сотвори́лъ еси́, идѣ́же прише́дъ, о́тче, мно́гихъ ду́ши Го́споду приве́лъ еси́.
Святѣ́йшаго мѣ́ста, преподо́бне Анто́ніе, я́ко дости́глъ, мно́гихъ житіе́мъ твои́мъ удиви́лъ еси́: вы́ше бо человѣ́ка воспріе́мъ житіе́, и́мже мно́гихъ мірска́я презира́ти сотвори́лъ еси́.
Архіепи́скопа Иларіо́на пеще́ру я́ко обрѣ́тъ, трудолю́бнѣ въ не́й пожи́лъ еси́, преподо́бне, въ моли́твахъ и поще́ніихъ, до́ндеже и́ную пеще́ру себѣ́ содѣ́лалъ еси́, въ не́йже сподо́бился еси́ го́рняго зва́нія.
Богоро́диченъ: Человѣ́ческія напа́сти и совѣ́ты, Чи́стая, разори́ боже́ственными моли́твами Твои́ми и рабы́ Твоя́ изба́ви болѣ́зненныхъ прегрѣше́ній, я́ко да Приснодѣ́ву Тя́ ублажа́емъ.
Инъ.
Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.
Вели́каго трудополо́жника и ревни́теля твоему́ житію́, преподо́бне Анто́ніе, Ѳеодо́сія блаже́ннаго, стяжа́лъ еси́, а́нгельскому твоему́ житію́ послѣ́дующа, съ ни́мже въ вы́шнихъ водворя́яся, на́съ помина́й.
Но́ваго тя́ Моисе́я, о́тче, позна́хомъ, страсте́й побѣди́теля: я́коже бо о́нъ, дре́вле Амали́ка побѣди́въ, лю́ди изведе́, ты́ же, о́тче, мно́жество мона́шествующихъ въ зе́млю обѣтова́нія ра́йскаго приве́лъ еси́.
Гра́да и оте́чества твоего́ пресе́льникъ, о́тче, бы́лъ еси́, но па́ки Бо́жіимъ промышле́ніемъ ко оте́честву твоему́ сла́вно свидѣ́тельствованъ возвраща́ешися, идѣ́же благода́ть отъ Го́спода, о́тче, прія́лъ еси́.
Богоро́диченъ: Пе́щь прообразова́ше Твое́ рождество́, Пренепоро́чная: о́троки бо не опали́, я́коже ни ложесна́ Твоя́ Огнь нестерпи́мый. Тѣ́мже мо́лимъ Тя́: огня́ вѣ́чнаго изба́ви рабы́ Твоя́.
Пѣ́снь 8.
Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.
Влады́ки твоего́ Христа́, преподо́бне Анто́ніе, смире́нію поревнова́лъ еси́ и сего́ ра́ди смире́нное и жесто́кое житіе́ возлюби́лъ еси́, земна́го пристра́стія отрѣва́яся. Тѣ́мже по́чести святы́хъ сподо́бился еси́ и съ ни́ми пое́ши Го́спода во вѣ́ки.
Твое́ пресла́вное успе́ніе пра́зднующимъ, блаже́нне, моли́ся изба́витися всѣ́мъ отъ разли́чныхъ напа́стей, да вси́ тебе́ прославля́емъ, Анто́ніе, и превозно́симъ Го́спода во вѣ́ки.
О на́съ ми́лостивно о́ко, Анто́ніе, простира́й ко Влады́цѣ, чадолю́бное показу́я, и неотлу́чно отъ на́съ ду́хомъ пребыва́й, преподо́бне, я́коже обѣща́лся еси́, егда́ бы́лъ еси́ съ на́ми, да вси́ съ тобо́ю Христу́ воспое́мъ: благослови́те, вся́ дѣла́ Госпо́дня, Го́спода.
Богоро́диченъ: На моле́ніе мое́ умилосе́рдися ны́нѣ и ра́дость ми́ въ печа́ли мѣ́сто да́руй, да пою́ Тя, Влады́чице, Сы́ну Твоему́ воспѣва́я: Го́спода по́йте, дѣла́, и превозноси́те Его́ во вѣ́ки.
Инъ.
Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.
Исцѣле́нія оби́льна, преподо́бне, вѣ́рою приходя́щимъ ко хра́му твоему́ и су́щимъ въ ско́рбѣхъ утѣше́ніе подава́й, да вси́ съ тобо́ю Христу́ вопіе́мъ: благослови́те, вся́ дѣла́ Госпо́дня, Го́спода.
Благода́рное сіе́ пѣ́ніе принося́щія ти́, о́тче, свы́ше ми́лостивно назира́й и моли́ Христа́ Изба́вителя спасти́ всѣ́хъ, вопію́щихъ Ему́: благослови́те, вся́ дѣла́ Госпо́дня, Го́спода.
Принесе́ся да́ръ Вседержи́телю — тобо́ю мно́жество спаса́емыхъ, твоему́ житію́ послѣ́дующихъ, Анто́ніе. Тѣ́мже моли́ спасти́ся всѣ́мъ, съ тобо́ю Христу́ вопію́щимъ: благослови́те, вся́ дѣла́ Госпо́дня, Го́спода.
Богоро́диченъ: Вели́кому та́инству рождества́ Твоего́ кто́ не удиви́тся, Богоро́дице? Или́ кíй язы́къ зе́менъ или́ у́мъ безпло́тенъ изрещи́ возмо́жетъ? Па́че естества́ бо и смы́сла, Богоро́дице, Зижди́теля родила́ еси́.
Пѣ́снь 9.
Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.
Анто́нія, дре́вле просія́вшаго, того́ житію́ вся́чески поревнова́ти потща́лся еси́: о́нъ бо въ пусты́ню еди́нъ всели́ся, ты́ же въ пеще́рѣ еди́наго себе́ затвори́лъ еси́ и мно́гими лѣ́ты, о́тче, неисхо́денъ пребы́лъ еси́.
Пече́рскому житію́ первонача́льникъ и наста́вникъ, о́тче, бы́лъ еси́ и та́мо подвиза́лся еси́, я́ко безпло́тенъ. Тѣ́мже и Христо́съ дарова́ніемъ чуде́съ обогати́ тя, преподо́бне.
Мое́ю руку́ воздѣя́ніе пріими́, преподо́бне, Влады́чнѣй подо́бяся бла́гости, презира́я прегрѣше́нія: ты́ бо ду́шу уязви́лъ еси́ Христо́вою любо́вію и Его́ Пречи́стыя Богома́тере, Юже умоли́ спасти́ ду́ши на́ша.
Богоро́диченъ: Руко́ю твое́ю, преподо́бне Анто́ніе, е́же къ Бо́гу воздѣя́ніемъ, пресла́вно чудодѣ́йствовася: моли́твами бо твои́ми о́гнь съ небесе́ сво́диши, во очище́ніе мѣ́ста хра́ма Пречи́стыя, Юже вси́ съ тобо́ю велича́емъ.
Инъ.
Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.
Пахо́мія Вели́каго, а́нгельскаго видѣ́нія сподо́бльшагося, житію́, о́тче, подража́въ, равноа́нгельно въ пеще́рѣ пожи́лъ еси́. Тѣ́мже и равноа́нгельную по́честь сподо́бился еси́ прія́ти, Анто́ніе. [Два́жды.]
Иже отъ Святы́я горы́ путе́мъ веду́щимъ, о́тче, мѣ́ста Кíевскаго дости́глъ еси́, идѣ́же бя́ше уго́дно Влады́чицы Ма́тере Бо́жія хра́му воздви́гнутися, и та́мо хра́мъ прече́стенъ въ сла́ву Богома́тере, ку́пно со блаже́ннымъ Ѳеодо́сіемъ, воздви́глъ еси́. Тѣ́мже тя́ вси́ съ ни́мъ велича́емъ.
Богоро́диченъ: Свѣтороди́тельнице Дѣ́во, души́ моея́ о́блакъ отжени́ и дава́й чи́сто зрѣ́ти, Влады́чице, спаси́тельную добро́ту, возсія́вшую неизглаго́ланно изъ Твоея́ пречи́стыя утро́бы, во свѣ́тъ язы́ковъ, Препѣ́тая.
Свѣти́ленъ:
Жите́йское сладостра́стіе умертви́лъ еси́, Анто́ніе, сла́ву же маловре́менную позна́въ, сея́ вско́рѣ отступи́лъ еси́, тѣ́снымъ путе́мъ изво́ливъ ходи́ти, веду́щимъ къ ра́йскому простра́нству. Тѣ́мже моли́ся, Анто́ніе, спасти́ся тебе́ почита́ющимъ. [Два́жды.]
Сла́ва, и ны́нѣ, богоро́диченъ:
Богоро́дицу Тя́ вои́стинну исповѣ́дающе, Влады́чице, и́же Тобо́ю спаса́еміи: Ты́ бо Бо́га родила́ еси́, разо́ршаго Кресто́мъ сме́рть и къ Себѣ́ привле́кша преподо́бныхъ собо́ры, съ ни́миже Тя́ восхваля́емъ, Дѣ́во.
На хвали́техъ стихи́ры на 4, гла́съ 2. Подо́бенъ: Егда́ отъ дре́ва.
Жела́я ви́дѣти* неизрече́нную ра́дость святы́хъ* и весе́лія пра́ведныхъ,* Бо́гу угоди́вшихъ,* вся́кое весе́ліе, е́же въ мíрѣ,* возненави́дѣлъ еси́,* но въ постѣ́хъ и слеза́хъ* проводи́въ дни́ твоя́,* до́ндеже и стра́сти тѣле́сныя*умертви́лъ еси́.* Тѣ́мже и сподо́бился еси́* пра́ведныхъ ра́дованія,* съ ни́миже моли́ся* спасти́ся душа́мъ на́шимъ. [Два́жды.]
Дне́сь похва́льную пѣ́снь* въ па́мяти твое́й, Анто́ніе,* тебѣ́ принося́щихъ пріими́,* и предвари́ къ Бо́гу*моли́твами твои́ми,* и изба́ви на́съ отъ шу́яго стоя́нія,* и избра́нныхъ ча́сти сочета́ти моли́,* да тебе́ вси́, я́ко те́плаго предста́теля,* досто́йно ублажа́емъ.
Въ те́мномъ мѣ́стѣ, я́ко звѣзда́,* возсія́лъ еси́, преподо́бне,* и мра́чная ли́ца бѣсо́въ* посрами́лъ еси́, прему́дре.* Отню́дуже возше́дъ къ небесе́мъ,* со дерзнове́ніемъ престо́лу Христо́ву предстоя́,* помина́й пра́зднующихъ па́мять твою́, преподо́бне,* ми́лость обрѣсти́ на́мъ въ де́нь Су́дный.
Сла́ва, гла́съ 8:
Оте́чество твое́, преподо́бне о́тче Анто́ніе, оста́вивъ и во́льное стра́нство Го́спода ра́ди пріе́мь, труды́ до́лгаго пути́ ше́ствія, жа́жду и гла́дъ, сту́день же и зно́й Христа́ ра́ди претерпѣ́лъ еси́. Тѣ́мже и слы́шиши: благíй ра́бе и вѣ́рный, вни́ди въ ра́дость Го́спода твоего́. Сего́ же гла́са и на́мъ услы́шати, о́тче, моли́ся, да всегда́ твою́ па́мять любо́вію ублажа́емъ.
И ны́нѣ, богоро́диченъ:
Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].
Славосло́віе вели́кое. [Ектеніи́] и отпу́стъ.
НА ЛИТУРГІИ,
[Блаже́нна, пе́рваго кано́на свята́го, пѣ́снь 3-я, и втора́го, пѣ́снь 6-я.] Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]
Источникъ: Минíа, мѣ́сяцъ Іу́лій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 99 – 109 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.