Благодарим тѧ, господи, боже нашъ, ѡ въсѣх, ихже ѡт вѣка

Благодарим тѧ, господи, боже нашъ, ѡ въсѣх, ихже
ѡт вѣка бывшїихь на нас чюдесь твоих, славимь твое
безчисльное благоѫтрѡбїе и благость, величаемь свѣтломъ
гласом и възпроповѣдꙋемь твоѫ безмѣрнѫѧ благость,
ѧже на въсѣх богатно излїаль еси. Ибо ѡт небытїа въ
бытїе нас приведе, доушеѫ оумноѫ и ѡбразѡмь своимь
бож(ь)стьвнымъ почьт въсе чювестъвное създанїе и
ꙗкоже раба нѣкоего и слꙋгѫ чловѣчьскомꙋ ꙇест(ь)ствꙋ
покори, таже и падша сѧ завистїѫ лютоѫ и прѣльстїѫ
лѫкавааго ѕвѣрѣ въ пръвѣмь достоиньствѣ и царствїи
ꙋстрои и враждѫ раздрꙋши и къ себѣ примири нас
ч(ь)стныимъ единороднаагѡ сына твоегѡ кр(ъ)стомъ и кръвїѧ.
И кто доволень изглаголати силы твоѫ, или кто слышана
благодѣанїа сътворить, ꙗже на наше ест(ь)ство ѡбещнѣ

прострѣтъ? Благодарим тѧ, чловѣколюбче владыко, и ѡ
новыих дарѡванїих, ихже на нас недостойных съдѣлаль
еси, браней междѡсобныих и меча варварскаго и ѡгнынаго
належа и горкаго плѣненїа же и порабѡщенїа вышьшѫ
показавь, паче въсѣкогѡ слова дръжавы твоеѫ.
Познаваемь благодѣанїе, не ѡтмѣтаемь благод(ѣ)ть, дарѡванїй
величьство благоразꙋмно възпроповѣдꙋемъ, нѫ съблюди
нас и въ прочее врѣмѧ ѡт злыих безьстрастны. Молим
ти сѧ, чловѣколюбче, да не грѣх наших мнѡжьство, ꙗкоже
стѣна желѣзна прѣд лицем нашимъ ставши, сѣчеть рѣкѫ
твоеѫ неизреченныѫ благости, ни же иже единоѫ нам
данныѫ помѡщи и покрова ради недостоинꙿства ѡбнажим сѧ,
да не порадоует сѧ врагь ѡ погибѣли нашей, ниже да
бѫдемъ сѫсѣдѡмъ нашимъ, безаконѣйшимь ѫзыком,
поношенїе. Избави, господи, град нашь съй и въсѣкь град
и странѫ, на нейже правѣ и непорѡчнѣ нарече сѧ имѧ
твое свѧтое, ѡт гладѣ, гꙋбительства, ѡгнѣ, меча,
нашествїа иноплеменникь, и ѡт междѡсобныѫ брани и
варварскыѫ и ѡт въсѣкогѡ зла молитвами и
прѣдстательствомь госпождѫ и владычицѫ нашѫ богородицѫ и
приснодѣвы Марїѧ, застѫпницѫ и хранителницѫ
свѧщеннаго твоего сего града, и лика апостолаго начѧлникь,
Петра и Павла, благод(ѣ)тїѧ и чловѣколюбїемь
единорѡднааго сына твоего, съ нимже благословень еси
съ прѣсвѧтыимь и благыимь и живѡтворѧщїим ти доухѡмъ
н(ы)нѣ и присно и въ вѣкы вѣкѡм.

Служба
Автор: Патриарх Евтимий
Дата на ръкописа: XV в.
Правопис: Среднобългарски
Хранилище на ръкописа: Зографски манастир
Издание: Werke des Patriarchen von Bulgarien Euthymius (1375-1393) nach den besten Handschriften herausgegeben von Emil Kałužniacki. Wien 1901
Страници: 344-345