СЛУЖБА ВОСКРЕСНАЯ 8-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ.., стихи́ры воскре́сны 3, повторя́юще пе́рвую, гла́съ 8:

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Вече́рнюю пѣ́снь и слове́сную слу́жбу, Тебѣ́, Христе́, прино́симъ, я́ко благоволи́лъ еси́ поми́ловати на́съ Воскресе́ніемъ.

Го́споди, Го́споди, не отве́ржи насъ отъ Твоего́ лица́, но благоволи́ поми́ловати насъ Воскресе́ніемъ.

Ра́дуйся, Сіо́не святы́й, ма́ти церкве́й, Бо́жіе жили́ще, Ты́ бо прія́лъ еси́ пе́рвый оставле́ніе грѣхо́въ Воскресе́ніемъ.

Сла́ва, и ны́нѣ, богоро́диченъ догма́тикъ, гла́съ 8.
Ка́ко Тя́ ублажи́мъ, Богоро́дице? Ка́ко же воспое́мъ, Преблагослове́нная, непостижи́мое та́инство рожде́нія Твоего́? Вѣко́въ бо Творе́цъ и на́шего Содѣ́тель естества́, Сво́й о́бразъ уще́дривъ, низведе́ Самаго́ Себе́ во истоща́ніе неизслѣ́димое, Сы́й въ невеще́ственныхъ нѣ́дрѣхъ Отчихъ, во утро́бѣ Твое́й, Чи́стая, всели́ся, и пло́ть непрело́жно бы́сть отъ Тебе́, Неискусобра́чная, пребы́въ у́бо е́же бѣ́ естество́мъ Бо́гъ. Тѣ́мже Ему́ покланя́емся, Бо́гу соверше́нну и Человѣ́ку соверше́нну, Тому́ во обое́мъ зра́цѣ, и́бо обое́ естество́ въ Не́мъ е́сть вои́стинну. Сугу́ба же вся́ проповѣ́дуемъ есте́ственная Его́ сво́йства, по сугу́бому существу́, два́ почита́юще дѣ́йства и хотѣ́нія: единосу́щенъ бо сы́й Бо́гу и Отцу́, самовла́стно хо́щетъ и дѣ́йствуетъ, я́ко Богъ; единосу́щенъ же сы́й и на́мъ, самовла́стно хо́щетъ и дѣ́йствуетъ, я́ко Человѣ́къ. Того́ моли́, Чи́стая Всеблаже́нная, спасти́ся душа́мъ на́шимъ.

Та́же: Свѣ́те Ти́хій… Посе́мъ проки́менъ: Госпо́дь воцари́ся, въ лѣ́поту облече́ся.., три́жды. Сти́хъ: Облече́ся Госпо́дь въ си́лу и препоя́сася… Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ.

На стихо́внѣ стихи́ру воскре́сну, гла́съ 8:
Возше́лъ еси́ на Кре́стъ, Іису́се, снизше́дый съ небесе́; прише́лъ еси́ на сме́рть — Животе́ безсме́ртный, къ су́щимъ во тмѣ́ — Свѣ́тъ и́стинный, къ па́дшимъ — всѣ́хъ Воскресе́ніе. Просвѣще́ніе и Спа́се на́шъ, сла́ва Тебѣ́.

Та́же богоро́дичны, подо́бны три, гла́съ 8. О, пресла́внаго чудесе́!

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ра́дуйся, Богоро́дице Всепѣ́тая; ра́дуйся, исто́чниче, живота́ вѣ́рнымъ источа́ющь; ра́дуйся, всѣ́хъ Влады́чице и Госпоже́ тва́ри, Благослове́нная; ра́дуйся, Всенепоро́чная, Препросла́вленная; ра́дуйся, Всепречи́стая; ра́дуйся, пала́то; ра́дуйся, Боже́ственное селе́ніе; ра́дуйся, Чи́стая; ра́дуйся, Ма́ти Дѣ́во; ра́дуйся Богоневѣ́сто.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся, Богома́ти Пречи́стая; ра́дуйся, вѣ́рныхъ наде́жде; ра́дуйся, мíра очище́ніе; ра́дуйся, вся́кія ско́рби избавля́ющи рабы́ Твоя́; ра́дуйся, человѣ́ковъ утѣше́ніе живоно́сное; ра́дуйся, заступле́ніе; ра́дуйся, предсто́лпіе призыва́ющимъ Тя́; ра́дуйся, Бо́жіе Боже́ственное пребыва́ніе и горо́ свята́я.

Сти́хъ: Лицу́ Твоему́ помо́лятся бога́тіи лю́дстіи.

Ра́дуйся, Богоро́дице, Ма́ти Христо́ва; ра́дуйся, еди́на наде́жде, человѣ́ковъ заступле́ніе; ра́дуйся, прибѣ́жище; ра́дуйся, свѣ́щниче Свѣ́та свѣ́тлый; ра́дуйся, свѣще́ освяще́нная; ра́дуйся, пала́то; ра́дуйся, раю́; ра́дуйся, Боже́ственное селе́ніе; ра́дуйся, исто́чниче, источа́ющь во́ды притека́ющимъ къ Тебѣ́.

Сла́ва, и ны́нѣ, богоро́диченъ догма́тикъ:
Его́же не́бо не вмѣсти́, Дѣ́во Богоро́дице, во чре́вѣ Твое́мъ нетѣсномѣ́стно вмѣсти́ся, и пребыла́ еси́, Чи́стая, сло́вомъ неизрече́ннымъ, ничи́мже дѣ́вству оскве́рншуся. Ты́ бо еди́на была́ еси́ въ жена́хъ, и Ма́ти, и Дѣ́ва. И Ты́, еди́на Пречи́стая, воздои́ла еси́ Сы́на Живода́вца и на объя́тіяхъ Твои́хъ носи́ла еси́ недре́млющее Око. Но не оста́ви нѣ́дра Отча, я́коже пре́жде вѣкъ предбы́сть: но горѣ́ ве́сь Бо́гъ со а́нгелы, до́лѣ ве́сь изъ Тебе́ съ человѣ́ки, и вездѣ́ несказа́нно. Того́ моли́, Всесвята́я Влады́чице, спасти́ся правосла́вно Богоро́дицу Чи́стую исповѣ́дающимъ Тя́.

Та́же: Ны́нѣ отпуща́еши… Трисвято́е, и по Отче на́шъ… Тропа́рь воскре́сенъ. Сла́ва, и ны́нѣ, богоро́диченъ его́. И отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
На Го́споди воззва́хъ.., поста́вимъ стихо́въ 10 и пое́мъ стихи́ры воскре́сны, гла́съ 8:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Сти́хъ: Мене́ жду́тъ пра́ведницы, до́ндеже возда́си мнѣ́.

Го́споди, Го́споди, не отве́ржи насъ отъ Твоего́ лица́, но благоволи́ поми́ловати насъ Воскресе́ніемъ.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Ины стихи́ры, восто́чны [анато́ліевы], гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Еже отъ Бо́га Отца́ Сло́во пре́жде вѣ́къ Ро́ждшееся, въ послѣ́дняя же времена́ То́ежде отъ Неискусобра́чныя вопло́щшееся во́лею, распя́тіе сме́ртное претерпѣ́ и дре́вле умерщвле́ннаго человѣ́ка спасе́ Свои́мъ Воскресе́ніемъ.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Еже изъ ме́ртвыхъ Твое́ Воскресе́ніе славосло́вимъ, Христе́, и́мже свободи́лъ еси́ Ада́мскій ро́дъ отъ а́дова мучи́тельства и дарова́лъ еси́ мíрови, я́ко Бо́гъ, жи́знь вѣ́чную и ве́лію ми́лость.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Сла́ва Тебѣ́, Христе́ Спа́се, Сы́не Бо́жій Единоро́дный, пригвозди́выйся на Крестѣ́ и воскресы́й изъ гро́ба тридне́венъ.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Тебе́ сла́вимъ, Го́споди, во́лею на́съ ра́ди Кре́стъ претерпѣ́вшаго, и Тебе́ покланя́емся, Всеси́льне Спа́се. Не отве́ржи на́съ отъ лица́ Твоего́, но услы́ши и спаси́ ны Воскре́сеніемъ Твои́мъ, Человѣколю́бче.

Ины стихи́ры, Богоро́дицѣ, Па́вла Аморре́йскаго, гла́съ 4. Подо́бенъ: Яко до́бля.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Ангельстіи чи́нове Тя́, Богома́ти, сла́вятъ, Бо́га бо, Пречи́стая, родила́ еси́, Иже со Отце́мъ и Ду́хомъ присносу́щнаго, и а́нгельская во́инства отъ не су́щихъ хотѣ́ніемъ соста́вльшаго. Его́же моли́ спасти́ и просвѣти́ти ду́ши, и́же правосла́вно, я́ко Богоро́дицу, воспѣва́ющихъ Тя́.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Яко исто́чникъ освяще́нія, ковче́гъ же всезлаты́й, Боже́ственнымъ Ду́хомъ озаря́емь, молю́ и припа́даю: страсте́мъ пре́данную и окая́нную мою́ ду́шу просвѣти́, Влады́чице, избавля́ющи мя́ го́рькаго мучи́тельства бѣсо́вскаго и пу́ть мнѣ́ спасе́нія подаю́щи непреткнове́ненъ.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Престо́ли егда́ поста́вятся, и кни́ги разгну́тся, и дѣла́ облича́тся, и вся́къ ко́ждо предста́нетъ обремене́нъ и обнаже́нъ, ве́сь трепе́ща негодова́нія Бо́жія и пра́веднаго Того́ отвѣща́нія, тогда́ мя́ пощади́, Влады́чице, и вся́каго суда́ исхити́, вся́ческихъ томле́ній су́щаго вино́вна.

Сла́ва, и ны́нѣ, богоро́диченъ:
Ца́рь Небе́сный за человѣколю́біе на земли́ яви́ся и съ человѣ́ки поживе́. Отъ Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего. Его́же моли́, Ма́ти Безневѣ́стная, поми́ловатися душа́мъ на́шимъ.

Вхо́дъ. Свѣ́те Ти́хій… Проки́менъ дне́: Госпо́дь воцари́ся… И про́чее по обы́чаю.

На стихо́внѣ стихи́ры воскре́сны, гла́съ 8:
Возше́лъ еси́ на Кре́стъ, Іису́се, снизше́дый съ небесе́; прише́лъ еси́ на сме́рть — Животе́ безсме́ртный, къ су́щимъ во тмѣ́ — Свѣ́тъ и́стинный, къ па́дшимъ — всѣ́хъ Воскресе́ніе. Просвѣще́ніе и Спа́се на́шъ, сла́ва Тебѣ́.

Ины стихи́ры, по алфави́ту.

Сти́хъ: Госпо́дь воцари́ся, въ лѣ́поту облече́ся.

Христа́ славосло́вимъ, воскре́сшаго отъ ме́ртвыхъ, ду́шу бо и тѣ́ло пріе́мь, стра́сти отобою́ду отсѣче́. Пречи́стѣй у́бо Души́ во а́дъ соше́дшей, его́же и плѣни́, во гро́бѣ же истлѣ́нія не ви́дѣ свято́е Тѣ́ло Изба́вителя ду́шъ на́шихъ.

Сти́хъ: Ибо утверди́ вселе́нную, я́же не подви́жется.

Псалмы́ и пѣ́сньми славосло́вимъ, Христе́, отъ ме́ртвыхъ Твое́ Воскресе́ніе, и́мже насъ свободи́лъ еси́ мучи́тельства а́дова и, я́ко Богъ, дарова́лъ еси́ жи́знь вѣ́чную и ве́лію ми́лость.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

О, Влады́ко всѣ́хъ непостижи́ме, Тво́рче небесе́ и земли́! Кресто́мъ пострада́вый, мнѣ́ безстра́стіе источи́лъ еси́; погребе́ніе же пріе́мь и воскре́съ во сла́вѣ, совоскреси́лъ еси́ Ада́ма руко́ю всеси́льною. Сла́ва Твоему́ тридне́вному Воста́нію, и́мже дарова́лъ еси́ на́мъ вѣ́чную жи́знь и очище́ніе грѣхо́въ, я́ко еди́нъ Благоутро́бенъ.

Сла́ва, и ны́нѣ, богоро́диченъ:
Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній; ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Та́же: Ны́нѣ отпуща́еши… Трисвято́е, и по Отче на́шъ…

Тропа́рь воскре́сенъ, гла́съ 8:
Съ высоты́ снизше́лъ еси́, Благоутро́бне, погребе́ніе прія́лъ еси́ тридне́вное, да на́съ свободи́ши страсте́й, Животе́ и Воскресе́ніе на́ше, Го́споди, сла́ва Тебѣ́.

Сла́ва, и ны́нѣ, богоро́диченъ:
Иже на́съ ра́ди рожде́йся отъ Дѣ́вы и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й, я́ко Бо́гъ. Не пре́зри, я́же созда́лъ еси́ руко́ю Твое́ю; яви́ человѣколю́біе Твое́, Ми́лостиве; пріими́ ро́ждшую Тя́ Богоро́дицу моля́щуюся за ны́ и спаси́, Спа́се на́шъ, лю́ди отча́янныя.

Та́же и отпу́стъ.

ВЪ СУББОТУ НА ПОВЕЧЕРІИ,
Кано́нъ моле́бный Пресвятѣ́й Богоро́дицѣ, гла́съ 8:

Пѣ́снь 1.
Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Припѣ́въ: Пресвята́я Богоро́дице, спаси́ на́съ.

Пріиди́те та́йно, бра́тіе, я́ко отъ нача́ла Святѣ́й Богоро́дицѣ внесе́мъ, вѣ́рніи, пѣ́снь но́ву, дне́сь похваля́юще вели́чія Ея́.

Дре́вле боговидѣ́ніемъ Моисе́й озари́вся умо́мъ, Твоему́ я́сно науча́шеся, Чи́стая, Боголѣ́пному зача́тію, па́че естества́, Дѣ́во, я́вльшуся ему́ въ купинѣ́ саду́.

Сла́ва: Тебѣ́ предлага́ю серде́чная дѣя́нія и прія́тно подаю́ писа́ніе, бли́зъ су́щій Боже́ственный заступле́нія кро́въ ко Влады́цѣ Христу́ Тебе́ предложи́въ.

И ны́нѣ: Приклони́ ми́ у́хо Твое́, Чи́стая, правосла́вною вѣ́рою, въ сѣ́ни лица́ Твоего́, че́стно любо́вію Ти́ притека́ющему и стра́хомъ покланя́ющуся, моле́бный мо́й гла́съ услы́ши.

Пѣ́снь 3.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Лѣ́ствица дре́вле патріа́рхова Тя́ прообража́ше, Пренепоро́чная, а́нгельско бо явля́ше сни́тіе Бо́жіе къ на́мъ, Боже́ственное соше́ствіе во утро́бѣ Твое́й.

Іу́дово колѣ́но, весели́ся! ю́же Іа́ковъ прорече́, отъ колѣ́на Его́ прорасти́ти избавле́ніе, Іису́са Христа́, Его́же Ты́ ро́ждши, Пречи́стая, просла́вилася еси́.

Сла́ва: Грѣхми́ отча́янъ, обрѣто́хъ Тя́ приста́нище спасе́нія, Пречи́стая Богоро́дице, упова́ніе на́ше и по́моще, тѣ́мже мя́ къ покая́нію наста́ви.

И ны́нѣ: Бли́зъ Тя́ су́щу Влады́ки и́мамъ, Пресла́вная Влады́чице, дѣя́ній мои́хъ кни́гу возложи́хъ на Тя́ вѣ́рою, не премолчи́ уще́дрити мя́.

Пѣ́снь 4.
Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Ты́ я́ко мони́сты златы́ми одѣ́яна Невѣ́ста Отча, благода́ть пріе́мши, укра́шшися добро́тою дѣ́вства, Ма́ти яви́лася еси́ Сы́на Бо́жія.

Тя́ и́стинный Сіо́нъ, Христо́съ Сло́во, изво́ли Себѣ́ въ Боже́ственное селе́ніе, я́ко избра́нну избра́въ, Богоро́дице, на обновле́ніе всего́ мíра.

Сла́ва: Ра́дуйся, кра́сная Пала́то Сло́ва, дѣ́вственный Черто́же Царя́; ра́дуйся, Похвало́ всѣ́хъ безпло́тныхъ; ра́дуйся, человѣ́ковъ По́моще.

И ны́нѣ: Удаля́ются отъ Бо́га, тѣ́мже и погиба́ютъ, отмета́ющіи о́бразы Сы́на Твоего́, Ма́ти Бо́жія Дѣ́во Богоро́дице, и́миже спаса́ются чту́щіи Тя́.

Пѣ́снь 5.
Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Съ боже́ственнымъ соше́дшеся Гавріи́ломъ, возопіи́мъ Богоро́дице вѣ́рно: ра́дуйся, Дѣ́во Свята́я, Благода́тная, Госпо́дь съ Тобо́ю! Иже Тебе́ ра́ди потреби́въ печа́ль, подаде́ ра́дованіе.

Пречи́стое Твое́ чре́во Гедео́нъ ви́дѣ, Дѣ́во Чи́стая, въ не́же, я́ко до́ждь, Сло́во соше́дъ, воплоти́ся Боже́ственнымъ Ду́хомъ, Отча неразлу́ченъ сы́й Божества́.

Сла́ва: Помо́щница мíра и засту́пница еси́ человѣ́ковъ грѣ́шныхъ, Богороди́тельнице Дѣ́во, и вѣ́рою, и любо́вію прибѣга́ющимъ къ Тебѣ́ премѣне́ніе спаси́тельное и рѣши́ло прегрѣше́ній мно́гихъ.

И ны́нѣ: Прорасти́ла еси́ безъ сѣ́мене, Иже пре́жде вся́кія тва́ри, Прозябе́ніе, Сы́на Отча, безлѣ́тно же и безнача́льно, Ду́хомъ Боже́ственнымъ, Богороди́тельнице Чи́стая, Его́же подо́біе ви́да вси́ почита́емъ.

Пѣ́снь 6.
Ирмо́съ: Содержи́ма мя́, пріими́, Человѣколю́бче, грѣхи́ мно́гими, и припа́дающа щедро́тамъ Твои́мъ, я́ко проро́ка, Го́споди, и спаси́ мя.

Дѣ́вства Тя́ зерца́ло су́що и прія́телище чи́сто Божества́ восхваля́емъ, Дѣ́во Неискусобра́чная, пѣ́сньми.

Бо́гъ во утро́бѣ Твое́й воплоти́ся безстра́стно и ужа́сно, Богоневѣ́сто, я́коже въ сви́тцѣ но́вѣ пи́санъ пе́рстомъ Отчимъ.

Сла́ва: Очище́ніе и́мамы покро́въ Тво́й, и извѣ́стную наде́жду, и заступле́ніе, Дѣ́во Чи́стая, не посрами́, Влады́чице, рабы́ Твоя́.

И ны́нѣ: Страсте́й неуста́вное бѣше́ніе предста́ніемъ Твои́мъ, Богоневѣ́сто, уста́ви въ тишину́ и ко приста́нищу наста́ви на́съ тишины́.

Та́же: Го́споди, поми́луй, три́жды. Сла́ва, и ны́нѣ.

Конда́къ, гла́съ 8:
Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице, но, я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто Неневѣ́стная.

Пѣ́снь 7.
Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Ра́дости на́шея хода́таица яви́лася еси́, Дѣ́во, и благода́ти принося́ще вѣне́цъ любо́вію, — ра́дуйся, — вопіе́мъ Ти́, — Благослове́нная Чи́стая, — похваля́юще.

Гора́ свята́я еси́ Бо́жія пріосѣне́нная, гора́ ту́чна, Пренепоро́чная, гора́, усыре́нна Боже́ственными сія́ніи, гора́, въ не́йже Бо́гъ благоволи́ жи́ти.

Сла́ва: Побѣжда́яй благода́ть Твою́ нѣ́сть грѣ́хъ, Ма́терне бо дерзнове́ніе и во́лю и́маши и рѣши́ши прегрѣше́нія моли́твами Твои́ми и прево́диши вся́ стремле́нія.

И ны́нѣ: Отъ Тро́ицы родила́ еси́ Еди́наго, Богоро́дице, бы́вша непрело́жна плотски́мъ соедине́ніемъ, сугу́ба су́ща естество́мъ, Его́же ви́да о́бразъ почита́емъ.

Пѣ́снь 8.
Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Кади́льница яви́лася еси́ проро́ку, Боже́ственнаго Угля су́щи, грѣхи́ отъе́млющаго, Богоро́дице Дѣ́во, Ма́ти Бо́га на́шего.

Даніи́лъ прови́дѣ Тя́ го́ру ве́лію, Богоро́дице Дѣ́во, изъ нея́же честны́й Ка́мень, Христо́съ, пло́тію облече́ся и ле́сти низложи́ и́дольскія хра́мы.

Сла́ва: Вели́кій ки́тъ и́щетъ пожре́ти мя́ лю́таго грѣха́ и страсте́й мои́хъ отча́янія, но предвари́ и спаси́ раба́ Твоего́, Влады́чице.

И ны́нѣ: Иже Тобо́ю бесѣ́довавый къ человѣ́комъ, Бо́гъ сы́й вся́ческихъ, зра́къ человѣ́ка воспрія́тъ, Его́же взо́ръ почита́емъ, Дѣ́во, въ писа́ніихъ.

Пѣ́снь 9.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вертогра́дъ затворе́нъ Тя́, Дѣ́во Богоро́дице, и запеча́танъ исто́чникъ Ду́хомъ Боже́ственнымъ, прему́дрый въ пѣ́снехъ пое́тъ, тѣ́мже, я́ко Са́дъ жи́зни, воплоща́ется Христо́съ.

Твоего́ неска́заннаго Рождества́ пропису́я проро́къ, кни́гу запеча́тану прови́дѣ, ея́же никто́же та́инство разумѣ́ вочеловѣ́ченія Рождества́ Твоего́.

Сла́ва: Тебѣ́ во умиле́ніи души́ мо́лимся вси́: не пре́зри, Влады́чице, на́ша мольбы́, но бу́ди благоувѣ́тливъ на́мъ покро́въ и моли́тву на́шу услы́ши.

И ны́нѣ: Твоему́ и Сы́на Твоего́ припа́даю образо́мъ, и сомня́щихся почита́ти, я́ко Ма́нентовы лжи́ отмѣта́ю, Богоро́дице Дѣ́во, тѣ́мже правосла́вно пѣ́снь скончава́ю.

Та́же: Досто́йно е́сть… Трисвято́е, и по Отче на́шъ… Конда́къ, и про́чее по обы́чаю, и отпу́стъ.

ВЪ НЕДѢЛЮ УТРА, НА ПОЛУНОЩНИЦѢ,
Кано́нъ Пресвятѣ́й и Живонача́льнѣй Тро́ицѣ, его́же краестро́чіе: Тро́ице Еди́нице, спаси́ мя, Твоего́ раба́. Творе́ніе Митрофа́ново, гла́съ 8:

Пѣ́снь 1.
Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Трисо́лнечному Царю́, и Строи́телю, и Промысли́телю вся́ческихъ, и Благо́му еди́ному, есте́ственнѣ Су́щему, и еди́нственную иму́щему Божества́ сла́ву, Бо́гу Единонача́льному припа́даемъ, пѣ́снь трисвяту́ю пою́ще.

Рече́нія Боже́ственная и проро́чествія я́же свы́ше по́мняще я́вѣ, Богонача́льное естество́ Еди́нственное сла́вимъ, присносу́щное, собезнача́льное, въ Тріе́хъ Ли́цѣхъ, Отцѣ́ и Сы́нѣ и Ду́сѣ, содѣ́тельное, всеси́льное.

[Сла́ва:] Священнотаи́нникъ Авраа́мъ бы́въ священнообра́зно дре́вле, Творца́ всѣ́хъ, и Бо́га, и Го́спода, въ Тріе́хъ у́бо Ѵпоста́сехъ прія́тъ ра́дуяся, и Тре́хъ Ѵпоста́сей держа́ву еди́нственную позна́.

[И ны́нѣ,] богоро́диченъ: Неискусобра́чно Христа́ родила́ еси́, е́же по на́мъ, на́съ ра́ди воспріе́мша естество́, Пречи́стая, и непрело́жна по обою́ пребы́вша. Его́же моли́ непреста́нно грѣхо́въ ми́ дарова́ти и искуше́ній избавле́ніе.

Пѣ́снь 3.
Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ [1] утверди́, я́ко нѣ́сть свя́тъ, па́че Тебе́, еди́не Человѣколю́бче.

Тебе́, непристу́пнаго Бо́га и Царя́ сла́вы, на престо́лѣ Иса́ія ви́дѣ высо́цѣ, и херуви́мы и серафи́мы, сла́вящія непреста́нными пѣ́сньми Еди́нственнаго Тріѵпоста́снаго.

Еди́наго отъ Отца́, я́ко отъ Ума́, рожде́наго Сло́ва и Ду́ха происходя́ща неизглаго́ланно, по коему́ждо помышле́ніи и кни́жными уче́ніи пости́гше, Еди́наго Бо́га Трисо́лнечнаго почита́емъ.

[Сла́ва:] Иже сы́й нерожде́нный Оте́цъ, и Своего́ существа́ Сія́ніе роди́въ нетлѣ́нно, Сы́на, Свѣ́тъ отъ Свѣ́та, исхо́днѣ предлага́етъ сра́сленный Свѣ́тъ Ду́ха, вседѣ́тельна и единоче́стна.

[И ны́нѣ,] богоро́диченъ: Хра́мъ яви́лася еси́ чи́стъ, Дѣ́во Ма́ти Марíе, вся́ всеси́льно и прему́дро соста́вльшему Христу́, и въ чи́нѣ поло́жшему, и нося́щему. Его́же ми́лостива ми́ сотвори́ ма́терними Твои́ми моли́твами.

Го́споди, поми́луй, три́жды.

Та́же сѣда́ленъ, гла́съ 8: Подо́бенъ: Повелѣ́нное та́йно.
Трисо́лнечнаго и честна́го Богонача́лія си́лу, вѣ́рніи, ны́нѣ восхва́лимъ, я́ко ма́ніемъ то́кмо вся́ соста́вилъ вы́шняя ликостоя́нія а́нгельская и ни́жняя священнонача́лія церко́вная, е́же взыва́ти: Свя́тъ, Свя́тъ, Свя́тъ еси́, Бо́же Преблагíй. Сла́ва и пѣ́ніе держа́вѣ Твое́й.

Сла́ва, и ны́нѣ, богоро́диченъ:
Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго, утверди́, Блага́я, моли́твами ма́терними Твои́ми, я́ко да и а́зъ благода́рно сла́влю Тя́, Богороди́тельнице Марíе. Поми́луй ста́до Твое́, е́же стяжа́ла еси́, Всенепоро́чная.

Пѣ́снь 4.
Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Восто́къ я́вльшися Божества́ су́щимъ во тмѣ́, всю́ разгна́ несвѣ́тлую но́щь страсте́й и пра́вды Со́лнце возсія́, Про́сто у́бо по существу́, Трисія́нно же ли́цы, Еже пое́мъ при́сно и сла́вимъ.

Серафи́мскими усты́ воспѣва́емаго, бре́нными устна́ми сла́вимъ Еди́нственнаго и Тро́ичнаго Го́спода сла́вы, естество́мъ и ѵпоста́сьми, вопію́ще: о, Всецарю́! Твои́мъ рабо́мъ пода́ждь разли́чныхъ прегрѣше́ній проще́ніе.

[Сла́ва:] Содержи́тельная всѣ́хъ су́щихъ, неви́димая, всеще́драя, благоутро́бная, человѣколюби́вая Тро́ице честна́я и Богонача́льная, не забу́ди мене́, Твоего́ раба́, въ коне́цъ, ниже́ разори́ и́же завѣща́лъ еси́ Твои́мъ рабо́мъ завѣ́тъ за неизрече́нную ми́лость.

[И ны́нѣ,] богоро́диченъ: Кра́сную Тя́, Всечи́стая, еди́ну обрѣ́тъ отъ вѣ́ка добро́ту Іа́ковлю, пребезнача́льное Сло́во, и всели́ся въ Тя́ благоутро́бія ра́ди, обнови́ человѣ́ческое естество́. Его́же моли́ непреста́нно отъ вся́кія мнѣ́ изба́витися ско́рби.

Пѣ́снь 5.
Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Соприсносу́щная Три́ Ли́ца сла́вимъ, Еди́наго же Го́спода, Тя́, Боже́ственное естество́ раздѣля́юще про́сто и совокупля́юще, и вѣ́рно вопіе́мъ: Богонача́льная Тро́ице Свята́я, Твоя́ рабы́ отъ ско́рби изба́ви.

Рыда́ю зѣ́льнѣ за не́мощь мы́сли моея́, ка́ко не хотя́, стражду́ нево́льное вои́стинну измѣне́ніе? Сего́ ра́ди зову́: Живонача́льная Тро́ице Свята́я, до́брыхъ въ стоя́ніи мя́ учини́.

[Сла́ва:] Дрема́ніемъ отягче́на мя́ грѣхо́внымъ и порѣва́ема въ со́нъ сме́ртный, я́ко человѣколюби́вая, и преблага́я, и всеми́лостивая, Богонача́льная Тро́ице Свята́я, уще́дри и возста́ви мя́.

[И ны́нѣ,] богоро́диченъ: Ма́ти Дѣ́во, Отрокови́це пречи́стая, всенепоро́чная, богоблагода́тная, Твои́ми моли́твами Сы́на и Бо́га Твоего́ и Го́спода ми́лостива сотвори́ мнѣ́, и страсте́й, и прегрѣше́ній Твоего́ раба́ изба́ви вско́рѣ.

Пѣ́снь 6.
Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Небе́сныхъ умо́въ чинонача́лія подража́юще, Единонача́льная всѣ́хъ Тро́ице Пресу́щественная, трисвяты́ми пѣ́сньми Тя́ славосло́вимъ бре́нными на́шими усты́.

Иже по о́бразу Твоему́ человѣ́ка созда́вшему и отъ не су́щихъ все́ прему́дро соста́вльшему, Бо́гу Тріѵпоста́сному покланя́юся, и чту́, и пою́, и велича́ю Тя́.

[Сла́ва:] Вседержи́телю Бо́же и Еди́не Неопредѣле́нный, всели́ся въ мя́ за неизрече́нную ми́лость, Трисо́лнечный Влады́ко, и озари́ мя, и вразуми́, я́ко Благоутро́бенъ.

[И ны́нѣ,] богоро́диченъ: Хра́мъ яви́лася еси́ Бо́га Невмѣсти́маго, Пречи́стая, хра́мъ и мене́ Того́ покажи́ Боже́ственныя благода́ти, Пресвята́я Влады́чице, Твои́ми мольба́ми, и соблюди́ невреди́ма.

Го́споди, поми́луй, три́жды.

Сѣда́ленъ, гла́съ 8: Подо́бенъ: Повелѣ́нное та́йно.
Отца́ Безнача́льна, вѣ́рніи, Сы́на Собезнача́льна и Ду́ха Боже́ственнаго вои́стинну пѣсносло́вимъ, неслія́ннѣ, непревра́тнѣ и неизмѣ́ннѣ, Тро́ицу про́сту, и свя́ту, и сра́слену, вопію́ще со а́нгелы: Свя́тъ еси́, Отче, Сы́не, со Ду́хомъ пресвяты́мъ и честны́мъ. Поми́луй, я́же созда́лъ еси́ по о́бразу Твоему́, Влады́ко.

Сла́ва, и ны́нѣ, богоро́диченъ:
Благодари́мъ Тя́ при́сно, Богоро́дице, и велича́емъ, Чи́стая, и покланя́емся, воспѣва́юще Рождество́ Твое́, Благода́тная, вопію́ще непреста́нно: спаси́ на́съ, Дѣ́во Преми́лостивая, я́ко Блага́я, въ ча́съ испыта́нія, да не посра́млени бу́демъ раби́ Твои́.

Прему́дростію неизглаго́ланною Твое́ю и пучи́ною благосты́ни ту́не Твоего́ раба́ поми́лованна покажи́ мя, и ны́нѣ, я́коже дре́вле, изба́ви озлобле́нія, Тро́ице Еди́нице Бо́же, грѣхо́въ и страсте́й. [Два́жды.]

[Сла́ва:] Умъ Нерожде́нный, Оте́цъ, и Сло́во, ро́ждшееся отъ Него́, и Ду́хъ Боже́ственный, непости́жнѣ Исхо́денъ сы́й, — Бо́же Единонача́льне, Трисо́лнечне, пою́ Тебѣ́: благослове́нъ Бо́гъ оте́цъ на́шихъ.

[И ны́нѣ,] богоро́диченъ: Умерщвле́нъ бы́хъ, Пречи́стая, грѣхо́внымъ я́домъ напое́нъ, и притека́ю къ Тебѣ́ вѣ́рою, ро́ждшей Нача́льника живота́: Твои́ми моли́твами раба́ Твоего́ оживи́ и искуше́ній и страсте́й изба́ви, еди́на Чи́стая.

Пѣ́снь 8.
Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свѣ́тъ сы́й незаходи́мъ, трисія́ненъ, и трисо́лнечный, и единонача́ленъ, самодержа́венъ, простѣ́йшій, Бо́гъ непостижи́мый и самодержа́венъ Госпо́дь, ны́нѣ те́мное и омраче́нное мое́ се́рдце озари́, и покажи́ свѣтоза́рно и свѣтоно́сно пѣ́ти Тя́ и сла́вити во вся́ вѣ́ки.

Свяще́ннѣйшими крилы́ серафи́ми боже́ственнѣйшіи ли́ца и но́ги благоговѣ́йно покрыва́ютъ, сла́вы не терпя́ще непостижи́мыя добро́ты Твоея́, благонача́льная, богонача́льная, единонача́льная Тро́ице Пресвята́я; оба́че и мы́ воспѣва́ти Тя́ дерза́емъ и сла́вити вѣ́рно во вѣ́ки.

[Сла́ва:] Господонача́ліе безнача́льное, всеси́льную и пребла́гу, совершеннонача́льну, благодѣ́йственну, неопредѣ́льну, вину́ невино́вну, твори́тельну, присносу́щну, промысли́тельну и спаси́тельную всѣ́мъ Едини́цу по существу́ и Тро́ицу ли́цы, сла́влю Тя́, Бо́же мо́й, вѣ́рно во вѣ́ки.

[И ны́нѣ,] богоро́диченъ: На земли́ возсія́ невече́рнее Со́лнце рождество́мъ е́же изъ Тебе́ дѣ́вственнымъ, Пречи́стая Влады́чице, и человѣ́ки изба́ви отъ и́дольскаго помраче́ннаго мра́ка. Тѣ́мже и ны́нѣ мя́ па́че Того́ Богонача́лія озари́ луча́ми и соблюди́ Твоего́ раба́.

Пѣ́снь 9.
Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Иже всѣ́ми ца́рствующее и вседѣ́тельное пренача́льное Естество́, вышшелѣ́тную, живонача́льную, благоутро́бну, человѣколюби́вую, благу́ю, единонача́льную Тро́ицу Тя́ ны́нѣ славосло́вяще, грѣхо́въ проще́нія про́симъ, мíрови ми́ра и це́рквамъ единомы́слія. [Два́жды.]

[Сла́ва:] Еди́но Госпо́дьство и трисія́нное, еди́нственное Богонача́ліе трисо́лнечное, пѣвцы́ пріими́ Твоя́ боголѣ́пно, и прегрѣше́ній изба́ви, и искуше́ній, и лю́тыхъ, и вско́рѣ ми́ръ пода́ждь человѣколю́бно и це́рквамъ соедине́ніе.

[И ны́нѣ,] богоро́диченъ: Во утро́бу, Христе́ Спа́се мо́й, дѣви́ческую все́лься, яви́лся еси́ мíру Твоему́ Богому́жно, непревра́тенъ, неслія́ненъ вои́стинну, и обѣща́лъ еси́ всегда́ съ Твои́ми рабы́ бы́ти я́вѣ. Тѣ́мже Тебе́ Ро́ждшія моли́твами ми́ръ всему́ ста́ду Твоему́ устро́й.

Посе́мъ припѣ́вы Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

НА УТРЕНИ,
По ексапсалмѣ́хъ, Бо́гъ Госпо́дь, и яви́ся на́мъ.., на гла́съ 8. И глаго́лемъ тропа́рь воскре́сенъ: Съ высоты́ снизше́лъ еси́.., два́жды. Сла́ва, и ны́нѣ, богоро́диченъ: Иже на́съ ра́ди рожде́йся отъ Дѣ́вы… Та́же обы́чное стихосло́віе Псалти́ра.

По 1-мъ стихосло́віи сѣда́льны воскре́сны, гла́съ 8:
Воскре́слъ еси́ изъ ме́ртвыхъ, Животе́ всѣ́хъ, и а́нгелъ свѣ́телъ жена́мъ вопія́ше: преста́ните отъ сле́зъ, апо́столомъ благовѣсти́те, возопíйте пою́ща, я́ко воскре́се Христо́съ Госпо́дь, благоволи́вый спасти́, я́ко Бо́гъ, ро́дъ человѣ́ческій.

Сти́хъ: Воскресни́ Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Воскресы́й изъ гро́ба я́ко вои́стинну, преподо́бнымъ повелѣ́лъ еси́ жена́мъ проповѣ́дати Воста́ніе апо́столомъ, я́коже пи́сано е́сть. И ско́рый Пе́тръ предста́ гро́бу и, свѣ́тъ зря́ во гро́бѣ, ужаса́шеся; тѣ́мже и уви́дѣвъ плащани́цы, кромѣ́ Боже́ственнаго Тѣ́ла, въ не́мъ лежа́щія, со стра́хомъ [2] возопи́: сла́ва Тебѣ́, Христе́ Бо́же, я́ко спаса́еши вся́, Спасе́ на́шъ, Отчее бо еси́ Сія́ніе.

Сла́ва, и ны́нѣ, богоро́диченъ:
Небе́сную две́рь и киво́тъ, всесвяту́ю го́ру, свѣтоза́рный о́блакъ воспои́мъ, небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ти́: моли́ Сы́на Твоего́ и Бо́га прегрѣше́ній оставле́ніе дарова́ти благоче́стно покланя́ющимся Пресвято́му Рождеству́ Твоему́.

По 2-мъ стихосло́віи сѣда́льны воскре́сны, гла́съ 8:
Человѣ́цы, Спа́се, гро́бъ Тво́й запеча́таша, а́нгелъ ка́мень отъ двере́й отвали́. Жены́ ви́дѣша Воста́вша отъ ме́ртвыхъ, и ты́я благовѣсти́ша ученико́мъ Твои́мъ въ Сіо́нѣ, я́ко воскре́слъ еси́, Животе́ всѣ́хъ, и разрѣши́шася у́зы сме́ртныя. Го́споди, сла́ва Тебѣ́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Мѵ́ра погреба́тельная жены́ прине́сша, гла́съ а́нгельскій изъ гро́ба слы́шаху: преста́ните отъ сле́зъ и вмѣ́сто печа́ли ра́дость пріими́те, возопíйте пою́ща, я́ко воскре́се Христо́съ Госпо́дь, благоволи́вый спасти́, я́ко Бо́гъ, ро́дъ человѣ́ческій.

Сла́ва, и ны́нѣ, богоро́диченъ [не сѣдя́ще пое́мъ, но стоя́ще, и со стра́хомъ и благоговѣ́ніемъ]:
О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся и Младе́нецъ бы́сть, пре́жде вѣ́къ Сы́й Бо́гъ на́шъ. Ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Ипакои́, гла́съ 8:
Мѵроно́сицы Жизнода́вца предстоя́ща гро́бу, Влады́ку иска́ху въ ме́ртвыхъ, Безсме́ртнаго, и ра́дость благовѣ́щенія отъ а́нгела пріе́мша, апо́столомъ возвѣща́ху, я́ко воскре́се Христо́съ Бо́гъ, подая́й мíрови ве́лію ми́лость.

Степе́нна, гла́съ 8.

Антифо́нъ 1. Ихже стихи́ повторя́юще пое́мъ:
Отъ ю́ности моея́ вра́гъ мя́ искуша́етъ, сластьми́ пали́тъ мя́; а́зъ же надѣ́яся на Тя́, Го́споди, побѣжда́ю сего́.

Ненави́дящіи Сіо́на, да бу́дутъ у́бо пре́жде исторже́нія я́ко трава́, ссѣче́тъ бо Христо́съ вы́я и́хъ усѣче́ніемъ му́къ.

Сла́ва: Святы́мъ Ду́хомъ, Еже жи́ти вся́ческимъ, Свѣ́тъ отъ Свѣ́та, Бо́гъ вели́къ. Со Отце́мъ пое́мъ Ему́ и съ Сло́вомъ.
И ны́нѣ, то́йже.

Антифо́нъ 2:
Се́рдце мое́ стра́хомъ Твои́мъ да покры́ется смиренному́дрствующее, да не возне́сшееся отпаде́тъ отъ Тебе́, Всеще́дре.

На Го́спода имѣ́вый наде́жду, не устраши́тся тогда́, егда́ огне́мъ вся́ суди́ти и́мать и му́кою.

Сла́ва: Святы́мъ Ду́хомъ вся́къ, кто́ боже́ственный ви́дитъ и предглаго́летъ, чудодѣ́йствуетъ вы́шняя, въ Тріе́хъ Еди́наго Бо́га поя́; аще бо и трисія́етъ, единонача́льствуетъ Божество́.
И ны́нѣ, то́йже.

Антифо́нъ 3:
Воззва́хъ Тебѣ́, Го́споди, вонми́, приклони́ ми́ у́хо Твое́, вопію́щу, и очи́сти, пре́жде да́же не во́змеши мене́ отсю́ду.

Къ ма́тери свое́й земли́ отходя́й вся́къ, па́ки разрѣша́ется, прія́ти му́ки или́ по́чести пожи́вшихъ.

Сла́ва: Святы́мъ Ду́хомъ — богосло́віе; Еди́ница Трисвята́я: Оте́цъ бо безнача́ленъ, отъ Него́же роди́ся Сы́нъ безлѣ́тно, и Ду́хъ сопресто́ленъ, сообра́зенъ, отъ Отца́ спросія́вшій.
И ны́нѣ, то́йже.

Антифо́нъ 4:
Се́ ны́нѣ что́ добро́, или́ что́ красно́, но е́же жи́ти бра́тіи вку́пѣ! Въ се́мъ бо Госпо́дь обѣща́ живо́тъ вѣ́чный.

О ри́зѣ свое́й, Иже кри́ны се́льныя украша́яй, повелѣва́етъ, я́ко не подоба́етъ пещи́ся.

Сла́ва: Святы́мъ Ду́хомъ, единови́дною вино́ю, вся́ содержа́тся миропода́тельнѣ, Бо́гъ бо Се́й е́сть, Отцу́ же и Сы́нови единосу́щенъ госпо́дственнѣ.
И ны́нѣ, то́йже.

Проки́менъ, гла́съ 8: Воцари́тся Госпо́дь во вѣ́къ,* Бо́гъ тво́й, Сіо́не, въ ро́дъ и ро́дъ. Сти́хъ: Хвали́, душе́ моя́, Го́спода, восхвалю́ Го́спода въ животѣ́ мое́мъ. Вся́кое дыха́ніе… И Ева́нгеліе воскре́сно у́треннее. Воскре́сеніе Христо́во… Псало́мъ 50-й. И про́чая поря́ду.

Кано́нъ воскре́сенъ, гла́съ 8:
Пѣ́снь 1.
Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Припѣ́въ: Сла́ва, Го́споди, свято́му Воскре́сенію Твоему́.

Всеси́льну Христо́ву Божеству́ ка́ко не диви́мся? Отъ Страсте́й у́бо всѣ́мъ вѣ́рнымъ безстра́стіе и нетлѣ́ніе точа́щу, отъ ребра́ же свята́го исто́чникъ безсме́ртія иска́пающу, и живо́тъ изъ гро́ба присносу́щный.

Яко благолѣ́пенъ жена́мъ а́нгелъ ны́нѣ яви́ся, свѣ́тлыя нося́ о́бразы есте́ственныя невеще́ственныя чистоты́, зра́комъ же возвѣща́я свѣ́тъ Воскре́сенія, зовы́й: воскре́се Госпо́дь.

Богоро́диченъ: Пресла́вная возглаго́лашася о Тебѣ́ въ родѣ́хъ родо́въ, Бо́га Сло́ва во чре́вѣ вмѣ́щшая, чиста́ же пребы́вши, Богоро́дице Марíе. Тѣ́мже Тя́ вси́ почита́емъ, су́щее по Бо́зѣ заступле́ніе на́ше.

Кано́нъ крестовоскре́сенъ.
Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Взя́шася врата́ болѣ́зненная и ужасо́шася вра́тницы а́довы, зря́ще въ преиспо́днѣйшая Соше́дшаго, Иже на высотѣ́ всѣ́хъ превы́ше естества́.

Удиви́шася чи́ни а́нгельстіи, зря́ще на престо́лѣ посажде́но Отчи отпа́дшее естество́ человѣ́ческое, затворе́ное въ преиспо́днихъ земли́.

[Богоро́диченъ:] Чи́ни Тя́ а́нгельстіи и человѣ́честіи, Безневѣ́стная Ма́ти, хва́лятъ непреста́нно, Зижди́теля бо си́хъ, я́ко Младе́нца, на объя́тіихъ Твои́хъ носи́ла еси́.

Инъ кано́нъ, Пресвятѣ́й Богоро́дицѣ.
Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пречи́стая Богоро́дице, вопло́щшееся Присносу́щное и Пребоже́ственное Сло́во па́че естества́ ро́ждши, пое́мъ Тя́.

Гро́здъ Тя́ живоно́сенъ, всемíрнаго иска́пающь сла́дость спасе́нія, Дѣ́ва, Христе́, роди́.

Ро́дъ Ада́мль, ко е́же па́че ума́ блаже́нству Тобо́ю возведе́нный, Богоро́дице, досто́йно сла́витъ Тя́.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.
Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Осужде́на бы́вша Ада́ма вкуше́ніемъ грѣха́, пло́ти Твоея́ спаси́тельною Стра́стію оправда́лъ еси́, Христе́, Са́мъ бо непови́ненъ сме́ртнаго иску́са бы́лъ еси́, Безгрѣ́шне.

Воскре́сенія свѣ́тъ возсія́ су́щимъ во тмѣ́ и сѣ́ни сме́ртнѣй сѣдя́щимъ, Бо́гъ мо́й Іису́съ, и Свои́мъ Божество́мъ крѣ́пкаго связа́въ, сего́ сосу́ды расхи́тилъ е́сть.

Богоро́диченъ: Херуви́мовъ и серафи́мовъ превы́шши яви́лася еси́, Богоро́дице, Ты́ бо еди́на прія́ла еси́ невмѣсти́маго Бо́га въ Твое́мъ чре́вѣ, Нескве́рная. Тѣ́мже Тя́ вѣ́рніи вси́ пѣ́сньми, Чи́стая, ублажа́емъ.

Инъ.
Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, Еди́не Человѣколю́бче.

Отве́ргшагося пре́жде за́повѣди, Го́споди, изринове́на мя́ отъ Тебе́ сотвори́лъ еси́, въ него́же вообрази́вся, послуша́нію же навы́къ, Себѣ́ па́ки назда́лъ [3] еси́ распя́тіемъ.

Прему́дростію вся́ проувѣ́дѣвый, Го́споди, и ра́зумомъ Твои́мъ водрузи́вый преиспо́дняя, не не сподо́билъ еси́ снизхожде́ніемъ Твои́мъ, Сло́ве Бо́жій, воскреси́ти е́же по о́бразу Твоему́.

Богоро́диченъ: Всели́вся въ Дѣ́ву тѣле́снѣ, Го́споди, яви́лся еси́ человѣ́комъ, я́коже подоба́ше ви́дѣти Тебе́, Юже и показа́лъ еси́ я́ко и́стинную Богоро́дицу и вѣ́рныхъ Помо́щницу, еди́не Человѣколю́бче.

Инъ.
Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Да́ждь на́мъ по́мощь Твои́ми моли́твами, Всечи́стая, прило́ги отража́ющи лю́тыхъ обстоя́ній.

Евѣ прама́тери Ты́ исправле́ніе была́ еси́, Нача́льника жи́зни мíрови, Христа́, Богоро́дице, ро́ждши.

Препоя́ши мя́ си́лою, Всечи́стая, Яже вои́стинну Бо́га ро́ждши пло́тію, Отчую Ѵпоста́сную Си́лу.

Ты́ врага́ су́ща мя́ зѣло́ возлюби́лъ еси́, Ты́ истоща́ніемъ стра́ннымъ соше́лъ еси́ на зе́млю, Благоутро́бне Спа́се, послѣ́дняго моего́ досажде́нія не отве́ргся и, пребы́въ на высотѣ́ пречи́стыя Твоея́ сла́вы, пре́жде безче́ствованнаго просла́вилъ еси́.

Кто́ зря́, Влады́ко, ны́нѣ не ужаса́ется, Стра́стію сме́рть разруша́ему, Кресто́мъ бѣжа́щее тлѣ́ніе и сме́ртію а́дъ бога́тства истощава́емый Боже́ственною си́лою Тебе́, Распя́таго?! Чу́дно дѣ́ло, Человѣколю́бче!

Богоро́диченъ: Ты́ вѣ́рнымъ похвала́ еси́, Безневѣ́стная, Ты́ предста́тельнице, Ты́ и прибѣ́жище христіа́нъ, стѣна́ и приста́нище; къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу чи́стую Тебе́ зна́ющихъ.

Инъ.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

На Крестѣ́ Тя́ пригвозди́ша законопресту́пныхъ дѣ́ти, Христе́ Бо́же, и́мже спа́слъ еси́, я́ко Благоутро́бенъ, сла́вящія Твоя́ Страда́нія.

Воскре́съ отъ гро́ба, вся́ совоскреси́лъ еси́ су́щія во а́дѣ ме́ртвыя и просвѣти́лъ еси́, я́ко Благоутро́бенъ, сла́вящія Твое́ Воскре́сеніе.

Богоро́диченъ: Бо́га, Его́же родила́ еси́, Пречи́стая Марíе, Того́ моли́ дарова́ти рабо́мъ Твои́мъ согрѣше́ній проще́ніе.

Инъ.
Ирмо́съ то́йже. Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Кла́съ возрасти́вшая животво́рный, неора́нная ни́во, Подаю́щаго мíрови жи́знь, Богоро́дице, спаса́й пою́щія Тя́.

Богоро́дицу Тя́, Всечи́стая, просвѣ́щшіися вси́, проповѣ́дуемъ, Со́лнце бо Пра́вды родила́ еси́, Приснодѣ́во.

Очище́ніе да́руй на́шимъ невѣ́дѣніемъ, я́ко Безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Одѣ́ятися претерпѣ́лъ еси́ въ багряни́цу, пре́жде Стра́сти Твоея́, Спа́се, поруга́емь, первозда́ннаго покрыва́я безобра́зное обнаже́ніе, и на́гъ пригвозди́лся еси́ на Крестѣ́ пло́тію, совлача́я, Христе́, ри́зу умерщвле́нія.

Отъ пе́рсти сме́ртныя Ты́ па́дшее мое́ па́ки назда́лъ еси́ существо́, воскре́съ, и нестарѣ́ющееся, Христе́, устро́илъ еси́, яви́въ па́ки я́коже ца́рскій о́бразъ, нетлѣ́нія жи́знь блиста́ющь.

Богоро́диченъ: Ма́тернее дерзнове́ніе е́же къ Сы́ну Твоему́ иму́щи, Всечи́стая, сро́днаго промышле́нія е́же о на́съ не пре́зри, мо́лимся, я́ко Тебе́ и еди́ну христіа́не ко Влады́цѣ очище́ніе ми́лостивно предлага́емъ.

Инъ.
Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Наста́ви на́съ си́лою Креста́ Твоего́, Христе́, — тѣ́мъ бо Тебѣ́ припа́даемъ, — ми́ръ пода́ждь на́мъ, Человѣколю́бче.

Окорми́ живо́тъ на́шъ, я́ко Преблагíй [4], пою́щихъ Твое́ Воста́ніе, и ми́ръ пода́ждь на́мъ, Человѣколю́бче.

Богоро́диченъ: Умоли́, Чи́стая, Сы́на Твоего́ и Бо́га на́шего, Неискусобра́чная Марíе Пречи́стая, е́же низпосла́ти на́мъ, вѣ́рнымъ, ве́лію ми́лость.

Инъ.
Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Утоли́ нестерпи́мую бу́рю страсте́й мои́хъ, Яже Бо́га Ро́ждшая, Окорми́теля и Го́спода.

Слу́жатъ Рождеству́ Твоему́, Пречи́стая Богоро́дице, а́нгельстіи чи́нове и человѣ́ковъ собра́ніе.

Марíе, Богоро́дице Безневѣ́стная, упова́нія враго́въ осуети́ и пою́щія Тя́ возвесели́.

Дре́вомъ крѣ́пко низложи́ мя́ началозло́бный, Ты́ же, Христе́, возне́сся на Крестѣ́, крѣпча́е [5] низложи́лъ еси́, посрами́въ сего́, па́дшаго же воскреси́лъ еси́.

Ты́ уще́дрилъ еси́ Сіо́на, Возсія́вый отъ гро́ба, но́ваго вмѣ́сто ве́тхаго соверши́въ, я́ко Благоутро́бенъ, Боже́ственною Твое́ю Кро́вію, и ны́нѣ ца́рствуеши въ не́мъ во вѣ́ки, Христе́.

Богоро́диченъ: Да изба́вимся отъ лю́тыхъ прегрѣше́ній мольба́ми Твои́ми, Богороди́тельнице Чи́стая, и да улучи́мъ, Пречи́стая, Боже́ственное сія́ніе изъ Тебе́ неизрече́нно воплоще́ннаго Сы́на Бо́жія.

Инъ.
Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Дла́ни на Крестѣ́ распросте́рлъ еси́, исцѣля́яй неудержа́нно просте́ртую во Еде́мѣ ру́ку первозда́ннаго, и Твое́ю во́лею же́лчи вкуси́въ, и спа́слъ еси́, Христе́, я́ко Си́ленъ, сла́вящія Твоя́ Страда́нія.

Сме́рти Изба́витель вкуси́ дре́вняго осужде́нія, я́ко да и тлѣ́нія ца́рство разруши́тъ, и во а́дская сше́дъ, воскре́се Христо́съ и спасе́, я́ко Си́ленъ, пою́щія Его́ Воскре́сеніе.

Богоро́диченъ: Не преста́й за ны́ моля́щи, Пречи́стая Богоро́дице Дѣ́во, я́ко вѣ́рнымъ утвержде́ніе Ты́ еси́, наде́ждою Твое́ю крѣпи́мся и любо́вію Тя́ и изъ Тебе́ Воплоще́ннаго неизрече́нно сла́вимъ.

Инъ.
Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Хра́мъ Тя́ Бо́жій, и ковче́гъ, и черто́гъ одушевле́нный, и две́рь небе́сную, Богоро́дице, вѣ́рніи, возвѣща́емъ.

Тре́бищъ разруши́тель я́ко Бо́гъ, бы́вшее Рождество́ Твое́, Марíе Богоневѣ́сто, покланя́емо е́сть со Отце́мъ и Ду́хомъ.

Сло́во Бо́жіе Тебе́ земны́мъ, Богоро́дице, показа́ небе́сную лѣ́ствицу, Тобо́ю бо къ на́мъ сни́де.

Конда́къ, гла́съ 8: Подо́бенъ: Яко нача́тки.
Воскре́съ изъ гро́ба, уме́ршія воздви́глъ еси́, и Ада́ма воскреси́лъ еси́, и Ева лику́етъ во Твое́мъ Воскре́сеніи, и мірстíи концы́ торжеству́ютъ е́же изъ ме́ртвыхъ Воста́ніемъ Твои́мъ, Многоми́лостиве.

Икосъ:
Адова ца́рствія плѣни́вый и ме́ртвыя воскреси́вый, Долготерпѣли́ве, жены́ мѵроно́сицы срѣ́тилъ еси́, вмѣ́сто печа́ли ра́дость принесы́й, и апо́столомъ Твои́мъ возвѣсти́лъ еси́ побѣди́тельная, Спа́се мо́й, зна́менія, Живода́телю, и тва́рь просвѣща́еши, Человѣколю́бче. Cего́ ра́ди и мíръ сра́дуется е́же изъ ме́ртвыхъ Воста́нію Твоему́, Многоми́лостиве.

Пѣ́снь 7.
Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же оте́цъ на́шихъ.

Сла́вное истоща́ніе, Боже́ственное бога́тство Твоея́ нищеты́, Христе́, удивля́етъ а́нгелы, на Крестѣ́ зря́щія Тя́ пригвожда́ема, за е́же спасти́ вѣ́рою зову́щія: благослове́нъ еси́, Бо́же оте́цъ на́шихъ.

Боже́ственнымъ Твои́мъ соше́ствіемъ свѣ́та испо́лнилъ еси́ преиспо́дняя, и тма́ прогна́на бы́сть пре́жде гоня́щая. Отню́дуже воскресо́ша и́же отъ вѣ́ка ю́зницы, зову́ще: благослове́нъ Бо́гъ оте́цъ на́шихъ.

Тро́иченъ: Всѣ́мъ у́бо Го́спода, Еди́наго же Еди́ному [6] Единоро́дному Сы́ну, правосла́вно, Отца́ богосло́вяще Тя́ возвѣща́емъ, и Еди́наго вѣ́дяще отъ Тебе́ исходя́ща Ду́ха Пра́ваго, Соесте́ственна и Соприсносу́щна.

Инъ.
Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Спасе́ніе содѣ́лалъ еси́ посредѣ́ вселе́нныя проро́чески, Бо́же, на Дре́во бо вознесе́нъ бы́въ, вся́ призва́лъ еси́ вѣ́рою зову́щія: оте́цъ на́шихъ Бо́же, благослове́нъ еси́.

Воскре́съ отъ гро́ба, я́коже отъ сна́, Ще́дре, всѣ́хъ изба́вилъ еси́ отъ тли́, тва́рь же увѣря́ется апо́столы проповѣ́дающими Воста́ніе. Отце́въ Бо́же, благослове́нъ еси́.

Богоро́диченъ: Равнодѣ́тельное Ро́ждшему, Равноси́льное Сло́во и Соприсносу́щное, во утро́бѣ Дѣ́вы, Отца́ благоволе́ніемъ и Ду́ха, созида́ется. Отце́въ на́шихъ Бо́же, благослове́нъ еси́.

Инъ.
Ирмо́съ то́йже. Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отъ дѣ́вственныхъ ложе́снъ вопло́щься, яви́лся еси́ на спасе́ніе на́ше. Тѣ́мже Твою́ Ма́терь вѣ́дяще Богоро́дицу, правосла́вно зове́мъ: отце́въ Бо́же, благослове́нъ еси́.

Же́злъ прорасти́ла еси́, Дѣ́во, отъ ко́рене Іессе́ова, Всеблаже́нная, пло́дъ цвѣтонося́щи спаси́тельный вѣ́рою Сы́ну Твоему́ зову́щимъ: отце́въ Бо́же, благослове́нъ еси́.

Прему́дрости испо́лни всѣ́хъ и си́лы Боже́ственныя, Ѵпоста́сная Прему́дросте Вы́шняго, Богоро́дицею, вѣ́рою Тебѣ́ пою́щихъ: отце́въ на́шихъ Бо́же, благослове́нъ еси́.

Іису́сова Божества́ Пребоже́ственная си́ла въ на́съ боголѣ́пно возсія́ла е́сть, пло́тію бо вку́шь за всѣ́хъ сме́рть кре́стную, разруши́ а́дову крѣ́пость. Его́же непреста́нно, дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Распны́йся воста́; великовы́йный паде́; пады́й и сокруше́нный испра́вися; тля́ отве́ржена бы́сть и нетлѣ́ніе процвѣте́, Жи́знію бо ме́ртвенное поже́рто бы́сть. Дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тро́иченъ: Трисвѣ́тлое Божество́, еди́ну сія́ющее зарю́ отъ Еди́наго Тріѵпоста́снаго естества́, — Роди́теля безнача́льна, единоесте́ственно же Сло́во Отцу́, и сца́рствующаго единосу́щнаго Ду́ха, — дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Инъ.
Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилѣжа́ще, о́троцы вопія́ху: благослови́те, вся́ дѣла́ Госпо́дня, Го́спода.

На Дре́вѣ ру́цѣ мнѣ́ Просте́ршаго обнаже́нному, призыва́юща мя́, Свое́ю благообра́зною согрѣ́яти нагото́ю, — благослови́те, вся́ дѣла́ Госпо́дня, и превозноси́те Его́ во вѣ́ки.

Изъ преиспо́дняго а́да возне́сша мя́, па́дшаго, и высокопресто́льною сла́вою Роди́теля поче́тшаго, — благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Богоро́диченъ: Ада́ма, Дѣ́во, па́дшаго у́бо яви́лася еси́ Дщи́, Бо́га же Ма́ти, обнови́вшаго мое́ существо́, Его́же пое́мъ вся́ дѣла́, я́ко Го́спода, и превозно́симъ во вся́ вѣ́ки.

Инъ.
Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сопроти́вныхъ разжже́нныя и пламенови́дныя на на́съ угаси́ стрѣ́лы, я́ко да пое́мъ Тя́ во вся́ вѣ́ки.

Преесте́ственнѣ Содѣ́теля и Спа́са, Бо́га Сло́ва родила́ еси́, Дѣ́во, тѣ́мже Тя́ пое́мъ и превозно́симъ во вся́ вѣ́ки.

Просвѣти́тельную Тя́ и златоза́рную все́льшійся въ Тя́ Свѣ́тъ непристу́пный, Дѣ́во, показа́ свѣщу́ во вся́ вѣ́ки.

Та́же пое́мъ пѣ́снь Богоро́дицы: Вели́читъ душа́ Моя́ Го́спода.., съ припѣ́вомъ: Честнѣ́йшую херуви́мъ…

Боже́ственнымъ и безнача́льнымъ естество́мъ про́стъ сы́й, сложи́лся еси́ прія́тіемъ пло́ти, въ Тебѣ́ Само́мъ сію́ соста́вивъ, Сло́ве Бо́жій и, пострада́въ я́ко человѣ́къ, пребы́лъ еси́ кромѣ́ страсте́й я́ко Бо́гъ. Тѣ́мже Тя́ во двою́ существу́ нераздѣ́льно и неслія́нно велича́емъ.

Отца́ по существу́ Боже́ственному, я́коже естество́мъ бы́въ человѣ́къ, ре́клъ еси́ Бо́га, Вы́шній, рабо́мъ снизходя́, воскре́съ отъ гро́ба, благода́тію Отца́ земноро́днымъ поло́жь, Иже по естеству́ Бо́га же и Влады́ку, съ Ни́мже Тя́ вси́ велича́емъ.

Богоро́диченъ: Яви́лася еси́, о, Дѣ́во, Ма́ти Бо́жія, па́че естества́ ро́ждши пло́тію Бо́га Сло́ва, Его́же Оте́цъ отры́гну отъ се́рдца Своего́ пре́жде всѣ́хъ вѣ́къ, я́ко Бла́гъ, Его́же ны́нѣ и тѣле́съ превы́шша разумѣ́емъ, а́ще и въ тѣ́ло облече́ся.

Инъ.
Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Бо́жія Тя́ естество́мъ у́бо Сы́на, зача́таго во утро́бѣ свѣ́мы Богома́тере, и бы́вшаго на́съ ра́ди Человѣ́ка, и зря́ще Тя́ на Крестѣ́ естество́мъ у́бо стра́ждуща человѣ́ческимъ, безстра́стна же, я́ко Бо́га, пребыва́юща, велича́емъ.

Разруши́ся тма́ дря́хлая, отъ а́да бо возсія́ Со́лнце Пра́вды, Христо́съ, земли́ просвѣща́я вся́ концы́, сія́я Божества́ свѣ́томъ, небе́сный Человѣ́къ, Бо́гъ земны́й, Его́же во двою́ естеству́ велича́емъ.

Напрязи́, и успѣва́й, и ца́рствуй, Сы́не Богома́тере, исма́ильтескія лю́ди покаря́я, борю́щія ны́, любоблагоче́ствующему ИМПЕРАТОРУ, я́ко ору́жіе непобѣди́мое, находя́щему Ти́[7], съ копіе́мъ Кре́стъ да́руя.

Инъ.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ра́дости и весе́лія испо́лнь е́сть па́мять Твоя́ приступа́ющимъ, исцѣле́нія точа́щи, и благоче́стно Богоро́дицу Тя́ возвѣща́ющимъ.

Псалмы́ Тя́ воспѣва́емъ, Благода́тная, и немо́лчно, — е́же ра́дуйся! — прино́симъ, Ты́ бо источи́ла еси́ всѣ́мъ ра́дость.

Красе́нъ, Богоро́дице, прорасте́ Пло́дъ Тво́й, не тли́ причаща́ющимся хода́тайственъ, но жи́зни, вѣ́рою Тя́ велича́ющимъ.

По катава́сіи ектенія́ ма́лая. Та́же: Свя́тъ Госпо́дь Бо́гъ на́шъ… Посе́мъ ексапостила́рій.

На хвали́техъ стихи́ры воскре́сны, гла́съ 8:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Го́споди, а́ще и суди́лищу предста́лъ еси́ отъ Пила́та суди́мый, но не отступи́лъ еси́ отъ престо́ла, со Отце́мъ сѣдя́, и воскре́съ изъ ме́ртвыхъ, мíръ свободи́лъ еси́ отъ рабо́ты чужда́го, я́ко Ще́дръ и Человѣколю́бецъ.

Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́.

Го́споди, ору́жіе на діа́вола Кре́стъ Тво́й да́лъ еси́ на́мъ, трепе́щетъ бо и трясе́тся, не терпя́ взира́ти на си́лу его́, я́ко ме́ртвыя возставля́етъ и сме́рть упраздни́. Сего́ ра́ди покланя́емся погребе́нію Твоему́ и Воста́нію.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Го́споди, а́ще и я́ко ме́ртва во гро́бѣ іуде́и положи́ша, но я́ко Царя́ спя́ща во́ини Тя́ стрежа́ху; и я́ко живота́ сокро́вище, печа́тію печа́таша, но воскре́слъ еси́ и по́далъ еси́ нетлѣ́ніе душа́мъ на́шимъ.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Ангелъ Тво́й, Го́споди, Воскре́сеніе проповѣ́давый, стра́жи у́бо устраши́, жена́мъ же возгласи́, глаго́ля: что́ и́щете Жива́го съ ме́ртвыми? Воскре́се, Бо́гъ сы́й, и вселе́ннѣй жи́знь дарова́.

Ины стихи́ры, восто́чны [анато́ліевы], гласъ тойже.

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Пострада́лъ еси́ Кресто́мъ, безстра́стный Божество́мъ, погребе́ніе прія́лъ еси́ тридне́вное, да на́съ свободи́ши отъ рабо́ты вра́жія, и обезсме́ртивъ оживотвори́ши на́съ, Христе́ Бо́же, Воскре́сеніемъ Твои́мъ, Человѣколю́бче.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

Покланя́юся, и сла́влю, и воспѣва́ю, Христе́, Твое́ изъ гро́ба Воскре́сеніе, и́мже свободи́лъ еси́ на́съ отъ а́довыхъ нерѣши́мыхъ у́зъ и дарова́лъ еси́ мíрови, я́ко Бо́гъ, жи́знь вѣ́чную и ве́лію ми́лость.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Жизнопріе́мнаго Твоего́ гро́ба стрегу́ще законопресту́пніи, съ кустодíею запеча́таша тогда́; Ты́ же, я́ко безсме́ртенъ Бо́гъ и всеси́ленъ, воскре́слъ еси́ тридне́венъ.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Доше́дшу Ти́ во врата́ а́дова, Го́споди, и сія́ сокруши́вшу, плѣ́нникъ си́це вопія́ше: кто́ Се́й е́сть, я́ко не осужда́ется въ преиспо́днихъ земли́, но и я́ко сѣ́нь разруши́ сме́ртное узи́лище? Прія́хъ Того́, я́ко ме́ртва, и трепе́щу, я́ко Бо́га. Всеси́льне, поми́луй на́съ.

Сла́ва, стихи́ра ева́нгельская. И ны́нѣ, богоро́диченъ: Преблагослове́нна еси́, Богоро́дице Дѣ́во… Славосло́віе вели́кое.

Та́же тропа́рь воскре́сенъ:
Воскре́съ изъ гро́ба и у́зы растерза́лъ еси́ а́да, разруши́лъ еси́ осужде́ніе сме́рти, Го́споди, вся́ отъ сѣте́й врага́ изба́вивый; яви́вый же Себе́ апо́столомъ Твои́мъ, посла́лъ еси́ я́ на про́повѣдь, и тѣ́ми ми́ръ Тво́й по́далъ еси́ все́й вселе́ннѣй, еди́не Многоми́лостиве.

Таже ектеніи́, и отпу́стъ.

НА ЛИТУРГІИ,
Блаже́нны, гла́съ 8:
Помяни́ на́съ, Христе́, Спа́се мíра, я́коже разбо́йника помяну́лъ еси́ на Дре́вѣ, и сподо́би всѣ́хъ, еди́не Ще́дре, небе́сному Ца́рствію Твоему́.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Слы́ши, Ада́ме, и ра́дуйся со Евою, я́ко обнажи́вый пре́жде обоя́ и пре́лестію взе́мъ ва́съ плѣ́нники, Кресто́мъ Христо́вымъ упраздни́ся.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

На Дре́вѣ пригвожде́нъ бы́въ, Спа́се на́шъ, во́лею, я́же отъ дре́ва кля́твы Ада́ма изба́вилъ еси́, воздая́, я́ко Ще́дръ, е́же по о́бразу и ра́йское селе́ніе.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Дне́сь Христо́съ воскре́съ отъ гро́ба, всѣ́мъ вѣ́рнымъ подая́ нетлѣ́ніе, и ра́дость обновля́етъ мѵроно́сицамъ по Стра́сти и Воскре́сеніи.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Ра́дуйтеся, му́дрыя жены́ мѵроно́сицы, пе́рвыя Христо́во Воскре́сеніе ви́дѣвша и Его́ возвѣсти́вша апо́столомъ всего́ мíра воззва́ніе.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Дру́зи Христо́вы апо́столи я́вльшеся, сопресто́льни Его́ сла́вѣ бы́ти иму́ще, со дерзнове́ніемъ Тому́ на́мъ предста́ти, я́ко ученицы́ Его́ моли́теся.

Сла́ва, тро́иченъ: Безнача́льная Тро́ице, нераздѣ́льное существо́, сопресто́льная Еди́нице, единоче́стная сла́вою, пренача́льное естество́ и ца́рство, спаса́й и́же вѣ́рою воспѣва́ющихъ Тя́.

И ны́нѣ, богоро́диченъ: Ра́дуйся, Бо́жіе простра́нное вмѣсти́лище; ра́дуйся, ковче́же Но́ваго Завѣ́та; ра́дуйся, ру́чко, изъ нея́же Ма́нна всѣ́мъ даде́ся небе́сная.

Проки́менъ, гла́съ 8: Помоли́теся и воздади́те* Го́сподеви Бо́гу на́шему. Сти́хъ: Вѣ́домъ во Іуде́и Бо́гъ, во Изра́или ве́ліе и́мя Его́. Аллилу́ія, [гласъ 8]: Пріиди́те, возра́дуемся Го́сподеви, воскли́кнемъ Бо́гу Спаси́телю на́шему. Сти́хъ: Предвари́мъ лице́ Его́ во исповѣ́даніи, и во псалмѣ́хъ воскли́кнемъ Ему́.

Примѣчанія:
[1] Це́ркве.
[2] Съ вѣ́рою.
[3] Научи́въ, къ Себѣ́ всели́лъ.
[4] Бо́же на́шъ.
[5] Крѣ́пльшаго.
[6] Еди́ному же то́чію.
[7] Приходя́щему къ Тебѣ́.

Источникъ: Окто́ихъ, си́рѣчь Осмогла́сникъ, съ 5-го гла́са по 8-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 229 об. – 245.

Свързани