ВЪ НЕДѢЛЮ ВЕЧЕРА,
На Го́споди воззва́хъ… поста́вимъ стихо́въ 6: пра́здника 3 и мине́и 3.[Стихи́ры] пра́зднику, гла́съ 5. Подо́бенъ: Ра́дуйся, по́стниковъ.
Свѣ́тъ всему́ естеству́ человѣ́ческому и Око тѣ́ла мíра сего́, сы́й Бо́же и Сло́ве, и очесе́мъ о́бщее, Содѣ́тель и Зижди́тель познава́емь. И ны́нѣ отъ смѣше́нія бре́нія и плюнове́нія слѣпа́го неизрече́нно вооча́еши, пе́рсты Твои́ми созида́ющими и бре́ніе, и видѣ́ніе. Еже и улучи́въ, пре́жде въ рожде́нныхъ зна́емый, со́лнца отню́дъ не ви́дя, Тебе́, Сла́дкое ви́дитъ Со́лнце, зря́ о́бразъ, на́съ ра́ди за благоутро́біе неизрече́нное Созда́вшаго.
Удо́въ лише́ніемъ и отложе́ніемъ человѣ́ческія плотскíя ору́дійныя ча́сти богатѣ́я, пре́жде слѣпы́й отъ утро́бы ма́терни произше́дый, я́ко не бы́ти созда́ніе помышля́ше, оче́съ лише́ніе, изъ него́же нога́ма мно́жайшая тѣлесе́ преткнове́нія, е́же о ка́меніе быва́ху. Иже Тобо́ю и сіе́ бога́тство стяжа́въ, ви́дитъ свѣ́тъ мíра, и Тебе́ свѣ́товъ Строи́теля Бо́га и Влады́ку тва́ремъ возвѣща́етъ и Содѣ́теля всемíрнаго.
Усты́, и душе́ю, и умо́мъ, отъ пе́рсти Зижди́тельски и плюнове́нія оче́съ зѣ́ницы Да́вшаго, и о́бщее просвѣще́ніе, и́же пре́жде слѣпы́й исповѣ́даше тва́ремъ всемíрнаго Смотри́теля и Строи́теля, за милосе́рдіе то́кмо созда́нія вочеловѣ́чившагося, и проповѣ́даше, я́ко Бо́га Всеси́льнаго. Его́же кни́жницы ре́вностію, и е́же къ ни́мъ бесѣ́дованіе отню́дъ не могу́ще зрѣ́ти, слѣпотству́юще мно́жае, изгна́на отъ собо́рища су́дятъ, иногда́ зѣ́ницы Да́вшаго слѣпо́му душе́вныя и тѣле́сныя.
Сла́ва, и ны́нѣ, гла́съ 2:
Слѣпы́й роди́выйся, въ свое́мъ по́мыслѣ глаго́лаше: еда́ а́зъ грѣ́хъ ра́ди роди́тельныхъ роди́хся безъ о́чію? еда́ а́зъ за невѣ́ріе язы́ковъ роди́хся во обличе́ніе? Не домышля́юся вопроша́ти: когда́ но́щь, когда́ де́нь? Не терпи́та ми́ но́зѣ ка́меннаго претыка́нія, не ви́дѣхъ бо со́лнца сія́юща, ниже́ во о́бразѣ мене́ Созда́вшаго. Но молю́тися, Христе́ Бо́же, при́зри на мя́ и поми́луй мя́!
На стихо́внѣ стихи́ры воскре́сны, гла́съ 5:
Честны́мъ Твои́мъ Кресто́мъ, Христе́, діа́вола посрами́лъ еси́, и Воскресе́ніемъ Твои́мъ жа́ло грѣхо́вное притупи́лъ еси́, и спа́слъ еси́ ны́ отъ вра́тъ сме́ртныхъ. Сла́вимъ Тя́, Единоро́дне!
Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].
Покая́ненъ: Го́споди, согрѣша́я, не престаю́, человѣколю́бія сподобля́емь, не разумѣ́ю. Побѣди́ мое́ омраче́ніе, еди́не Бла́же, и поми́луй мя́.
Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].
Му́чениченъ: О земны́хъ всѣ́хъ небре́гше и на му́ки му́жески дерзну́вше, блаже́нныхъ наде́ждъ не погрѣши́сте, но небе́снаго Ца́рствія наслѣ́дницы бы́сте, прехва́льніи му́ченицы. Иму́ще дерзнове́ніе къ Человѣколю́бцу Бо́гу, мíру ми́ръ проси́те и душа́мъ на́шимъ ве́лію ми́лость.
Сла́ва, и ны́нѣ, гла́съ 8:
Мимоходя́ Іису́съ отъ святи́лища, обрѣ́те человѣ́ка слѣ́па отъ рожде́нія, и умилосе́рдився, положи́ бре́ніе на о́чію его́ и рече́ къ нему́: иди́, умы́йся въ Силоа́мѣ. И умы́вся, прозрѣ́, сла́ву возсыла́я Бо́гу. Сосѣ́ди же его́ глаго́лаху ему́: кто́ твои́ зѣ́ницы отве́рзе, и́хже никто́же отъ зря́щихъ исцѣли́ти возмо́же? Онъ же возопи́въ, рече́: Человѣ́къ, Іису́съ глаго́лемый, Онъ ми́ рече́, — умы́йся въ Силоа́мѣ, — и прозрѣ́хъ. То́й е́сть вои́стинну, Его́же рече́ Моисе́й въ зако́нѣ, Христа́-Мессíю, То́й е́сть Спа́съ ду́шъ на́шихъ!
ВЪ ПОНЕДѢЛЬНИКЪ СЛѢПАГО, НА УТРЕНИ,
По 1-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.
Кре́стъ Госпо́день похва́лимъ, погребе́ніе свято́е пѣ́сньми почти́мъ, и Воскресе́ніе Его́ препросла́вимъ, я́ко совозста́ви ме́ртвыя отъ гро́бъ, я́ко Бо́гъ, плѣни́въ сме́рти держа́ву и крѣ́пость діа́волю, и су́щимъ во а́дѣ Свѣ́тъ возсія́.
Сти́хъ: Го́споди, да не я́ростію Твое́ю [обличи́ши мене́, ниже́ гнѣ́вомъ Твои́мъ нака́жеши мене́].
Вси́ побди́мъ и Христа́ усря́щимъ, вѣ́рніи, со мно́жествомъ еле́я и свѣща́ми свѣ́тлыми, я́ко да черто́га вну́трь сподо́бимся; внѣ́ бо двере́й обрѣта́яйся, бездѣ́льно Бо́гови воззове́тъ: поми́луй мя́.
Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.
Му́чениченъ: Го́споди, ча́ши Стра́сти Твоея́ страстоте́рпцы Твои́ поревнова́вше, оста́виша жите́йскую красоту́ и бы́ша а́нгеломъ соприча́стницы. Тѣ́хъ мольба́ми пода́ждь душа́мъ на́шимъ ми́ръ, Христе́ Бо́же, и ве́лію ми́лость.
Сла́ва, и ны́нѣ:
Со а́нгелы небе́сная, съ человѣ́ки земна́я, во гла́сѣ ра́дованія, Богоро́дице, вопіе́мъ ти́: ра́дуйся, врата́, небе́съ ши́ршая; ра́дуйся, еди́но земноро́дныхъ спасе́ніе; ра́дуйся Честна́я; ра́дуйся Благода́тная, ро́ждшая Бо́га воплоще́ннаго.
По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.
Пре́жде Креста́ Твоего́, Ще́дре, и Воста́нія, иду́щу Ти́, слѣпы́й отъ рожде́нія взыва́ше те́плѣ: Сы́не Дави́довъ, поми́луй, да́ждь ми́ свѣ́тъ очесе́мъ, да узрю́ Тя́ и а́зъ! Его́же зѣ́ницы пома́завъ бре́ніемъ отъ плюнове́нія, Сло́ве, тому́ свѣ́тъ свѣ́тло да́лъ еси́.
Сла́ва, и ны́нѣ, то́йже.
Воскресе́ніе Христо́во… Псало́мъ 50-й. И посе́мъ кано́нъ пра́здника, со ирмосо́мъ недѣ́ли слѣпа́го], на 8 и мине́и на 4. Конда́къ и ексапостила́рій пра́здника.
На хвали́техъ поста́вимъ стихи́ 4 и пое́мъ стихи́ры осмогла́сника, гла́съ 5:
Го́споди, запеча́тану гро́бу отъ беззако́нниковъ, проше́лъ еси́ изъ гро́ба, я́коже роди́лся еси́ отъ Богоро́дицы: не уразумѣ́ша, ка́ко воплоти́лся еси́, безпло́тніи Твои́ а́нгели; не чу́вствоваша, когда́ воскре́слъ еси́, стрегу́щіи Тя́ во́ини. Обоя́ бо запечатлѣ́шася испыту́ющимъ, яви́шася же чудеса́ кла́няющимся вѣ́рою та́инству, е́же воспѣва́ющимъ, возда́ждь на́мъ ра́дость и ве́лію ми́лость. [Два́жды.]
Увы́ мнѣ́, кому́ уподо́бихся а́зъ? — непло́днѣй смоко́вницѣ, и бою́ся прокля́тія съ посѣче́ніемъ. Но, Небе́сный Дѣ́лателю, Христе́ Бо́же, оляденѣ́вшую мою́ ду́шу плодоно́сну покажи́, и я́ко блу́днаго сы́на, пріими́ мя́ и поми́луй мя́.
Му́чениченъ: Благослове́но во́инство Царя́ Небе́снаго: а́ще бо и земноро́дни бы́ша страстоте́рпцы, но а́нгельское досто́инство потща́шася дости́гнути; тѣлеса́ презрѣ́вше и страда́ньми безпло́тныхъ сподо́бльшеся че́сти. Моли́твами тѣ́хъ, Го́споди, низпосли́ на́мъ ве́лію ми́лость.
Сла́ва, и ны́нѣ, гла́съ 2:
Все́ житіе́ слѣпы́й но́щь помышля́я, возопи́ къ Тебѣ́: Го́споди, отве́рзи ми́ зѣ́ницы, Сы́не Дави́довъ, Спа́се на́шъ, да со всѣ́ми и а́зъ воспою́ Твою́ си́лу.
На стихо́внѣ стихи́ры пра́здника, гла́съ 5. Подо́бенъ: Преподо́бне о́тче.
Ослѣпле́ніе яви́ся слѣпы́й не́гли ви́дящимъ, омрача́я и ра́зумы, и ду́ши, и у́мъ, зря́щимъ его́ безго́дное прозрѣ́ніе, и пригласи́вше, вопроша́ху съ лю́тостію: ка́ко ны́нѣ зри́ши, я́ко еди́нъ отъ свѣ́тъ ви́дящихъ, слѣ́пъ сы́й отъ рожде́нія, и присѣдя́й стезя́мъ и прося́й? Тѣ́мже, показа́ свѣ́тъ Подава́ющаго и Созда́вшаго свѣти́ла въ мíрѣ, отъ ни́хже проповѣ́дается Сы́нъ Бо́жій Пребезнача́льный, въ послѣ́дняя изъ Дѣ́вы Человѣ́къ явле́йся за милосе́рдіе, отъ Боже́ственнаго Ду́ха.
Сти́хъ: При́зри на мя́ и поми́луй мя́.
Якоже бре́мя и земно́е тяжконо́сіе зря́шеся, въ мíрѣ ходя́ слѣпы́й и по сто́гнахъ но́ги сокруша́яй, не́гли, я́коже зрѣ́ніемъ, жезло́мъ богатѣ́я. Тѣ́мже прибѣга́етъ къ Свѣтода́телю, отъ Него́же пріе́млетъ свѣ́тъ зрѣ́ти и очи́ма свои́ма ви́дѣти Творца́, по подо́бію Своему́ и по о́бразу созда́вшаго естество́ человѣ́ческое отъ земли́ пе́рвѣе, и ны́нѣ пе́рстію и плюнове́ніемъ Просвѣти́вшаго его́ зѣ́ницы и Да́вшаго человѣколю́бно ви́дѣти со́лнце.
Сти́хъ: Стопы́ моя́ напра́ви по словеси́ Твоему́.
Сообра́зна узрѣ́ человѣ́ческому о́бразу Сло́ва Отча, свѣ́тъ ви́дѣвъ слѣпы́й, отъ него́же свѣтоно́сное и дненача́льное ви́дѣ со́лнце, я́коже и про́чіи человѣ́цы, ра́дуяся зрѣ́нію новолѣ́пнѣйшему, и́мже украся́шеся пра́во иды́й и безтру́днѣ проходя́ стези́, и просвѣти́вшаго Сы́на Бо́жія познава́я, вочеловѣ́чшася кра́йняго ра́ди благоутро́бія, и е́же бѣ́ пребы́вша Бо́га, Человѣ́ка бы́вша, и пріи́мша е́же не бѣ́, неслія́нное же соблю́дающа си́хъ соедине́ніе.
Сла́ва, и ны́нѣ, гла́съ 5:
Го́споди, мимоходя́ путе́мъ, обрѣ́лъ еси́ человѣ́ка слѣ́па отъ рожде́нія, и удивле́ни бы́вше ученицы́, вопроша́ху Тя́, глаго́люще: Учи́телю, кто́ согрѣши́? се́й ли, или́ роди́тели его́, да слѣ́пъ роди́ся? Ты́ же, Спа́се мо́й, возопи́лъ еси́ къ ни́мъ: ни се́й согрѣши́, ни роди́тели его́, но да явя́тся дѣла́ Бо́жія на не́мъ. Мнѣ́ подоба́етъ дѣ́лати дѣла́ Посла́вшаго Мя́, я́же никто́же мо́жетъ дѣ́лати. И сія́ ре́къ, плю́нувъ до́лу и бре́ніе сотво́рь, пома́залъ еси́ о́чи его́, ре́къ къ нему́: иди́, умы́йся въ Силоа́мстѣй купѣ́ли. Онъ же умы́вся, здра́въ бы́сть и вопія́ше къ Тебѣ́, — вѣ́рую, Го́споди! — и поклони́ся Тебѣ́. Тѣ́мже вопіе́мъ и мы́: поми́луй на́съ!
Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 136 – 138 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 