Іерей начинаетъ: Благословенъ Богъ нашъ…
Ликъ: Царю небесный…
Чтецъ: Трисвятое, и Пріидите поклонимся… (трижды).
И псаломъ (37): Господи! да не яростію Твоею обличиши мене, ниже гнѣвомъ Твоимъ накажеши мене: яко стрѣлы Твоя унзоша во мнѣ и утвердилъ еси на мнѣ руку Твою. Нѣсть исцѣленія въ плоти моей отъ лица гнѣва Твоего, нѣсть мира въ костехъ моихъ отъ лица грѣхъ моихъ: яко беззаконія моя превзыдоша главу мою, яко бремя тяжкое отяготѣша на мнѣ. Возсмердѣша и согниша раны моя отъ лица безумія моего. Пострадахъ и слякохся до конца; весь день сѣтуя хождахъ, яко лядвія моя наполнишася поруганій, и нѣсть исцѣленія въ плоти моей. Озлобленъ быхъ, и смирихся до зѣла: рыкахъ отъ воздыханія сердца моего. Господи! предъ Тобою все желаніе мое, и воздыханіе мое отъ Тебе не утаися; сердце мое смятеся, остави мя сила моя, и свѣтъ очію моею, и той нѣсть со мною. Друзи мои и искренній мои прямо мнѣ приближишася и сташа; и ближніи мои отдалече мене сташа, и нуждахуся ищущіи душу мою; и ищущіи злая мнѣ – глаголаху суетная, и льстивнымъ весь день поучахуся. Азъ же, яко глухъ, не слышахъ, и яко нѣмъ – не отверзаяй устъ своихъ; и быхъ яко человѣкъ не слышай и не имый во устѣхъ своихъ обличенія. Яко на Тя, Господи, уповахъ: Ты услышиши, Господи, Боже мой. Яко рѣхъ: да не когда порадуютъ ми ся врази мои, и внегда подвижатися ногамъ моимъ, на мя велерѣчеваша; яко азъ на раны готовъ, и болѣзнь моя предо мною есть выну. Яко беззаконіе мое азъ возвѣщу, и попекуся о грѣсѣ моемъ. Врази же мои – живутъ, и укрѣпишася паче мене, и умножишася ненавидящіи мя безъ правды. Воздающіи ми злая воз благая оболгаху мя, зане гоняхъ благостыню. Не остави мене, Господи, Боже мой, не отступи отъ мене. Вонми въ помощь мою, Господи спасенія моего!
Или, псаломъ (90): Живый въ помощи Вышняго, въ кровѣ Бога небеснаго водворится. Речетъ Господеви: заступникъ мой еси и прибѣжище мое, Богъ мой, и уповаю на Него. Яко Той избавитъ тя отъ сѣти ловчи и отъ словесе мятежна. Плещма Своима осѣнитъ тя и подъ крилѣ Его надѣешися. Оружіемъ обыдетъ тя истина Его, не убоишися отъ страха нощнаго, отъ стрѣлы летящія во дни, отъ вещи во тмѣ преходящія, отъ сряща и бѣса полуденнаго. Падетъ отъ страны твоея тысяща и тма одесную тебе, къ тебѣ же не приближится. Обаче очима твоима смотриши, и воздаяніе грѣшниковъ узриши. Яко Ты, Господи, упованіе мое; Вышняго положилъ еси прибѣжище Твое. Не пріидетъ къ тебѣ зло, и рана не приближится тѣлеси твоему. Яко ангеломъ Своимъ заповѣсть о тебѣ, сохранити тя во всѣхъ путехъ твоихъ. На рукахъ возмутъ тя, да не когда преткнеши о камень ногу твою. На аспида и василиска наступиши и попереши льва и змія. Яко на Мя упова, и избавлю и: покрыю и, яко позна имя Мое. Воззоветъ ко Мнѣ, и услышу его: съ нимъ есмь въ скорби, изму его и прославлю его, долготою дней исполню его и явлю ему спасеніе Мое!
По концѣ:
Слава… и нынѣ…
Аллилуіа, аллилуіа, аллилуіа, слава Тебѣ Боже [трижды.]
Діаконъ: Миромъ Господу помолимся.
Ликъ: Господи помилуй. [Тоже поется по каждомъ прошеніи.]
Діаконъ: О свышнемъ мирѣ, и спасеніи душъ нашихъ, Господу помолимся.
О мирѣ всего міра, благостояніи святыхъ Божіихъ церквей, и соединеніи всѣхъ, Господу помолимся.
О святѣмъ храмѣ семъ, и съ вѣрою, благоговѣніемъ и страхомъ Божіимъ входящихъ въ онь, Господу помолимся.
О Святѣйшемъ Сѵнодѣ и о Блаженнѣйшемъ Архіепископѣ нашемъ [или Высокопреосвященнѣйшемъ Митрополитѣ или Преосвященнѣйшемъ Епископѣ нашемъ, его же область] [имярекъ] честнѣмъ пресвитерствѣ, во Христѣ діаконствѣ, о всемъ причтѣ и людѣхъ, Господу помолимся.
О Благочестивѣйшемъ, Императорѣ нашемъ [имярекъ], о всей палатѣ, и воинствѣ Его, Господу помолимся.
О Наслѣдникѣ Его Князѣ [имярекъ] и о всемъ Царствующемъ Домѣ, Господу помолимся.
О пособити и покорити подъ нозѣ Его всякаго врага и супостата, Господу помолимся.
О царствующемъ градѣ нашемъ, всякомъ градѣ и странѣ, и вѣрою живущихъ въ нихъ, Господу помолимся.
О благораствореніи воздуховъ, о изобиліи плодовъ земныхъ, и временѣхъ мирныхъ, Господу помолимся.
И прилагаются сія:
– О еже не помянути беззаконій и соблазновъ насъ, грѣшныхъ и недостойныхъ рабовъ Твоихъ, но милостивно очистити грѣхи наша, и отвратити гнѣвъ Свой, праведно движимый на ны, Господу помолимся!
– О еже не яростію обличити, ниже гнѣвомъ наказати насъ, но помянути, яко плоть есмы, духъ ходяй и не обращаяйся, и милостивно пощадити отъ смерти души наша, Господу помолимся!
– О еже не внити въ судъ съ рабы Своими, и не назрити беззаконія наша, но очистити я, и милоствну быти, и пощадити люди согрѣшшія, Господу помолимся!
– О еже помянути щедроты и милости Своя, яко отъ вѣка суть, грѣховъ же юности и невѣдѣнія нашего не помянути, и помиловати насъ, Господу помолимся!
– О еже услышати отъ храма святаго Своего гласъ нашъ, и исцѣлити болѣзни смертныя одержащія насъ, и потоки беззаконія смутившія насъ изсушити, Господу помолимся!
– О еже вскорѣ изъяти насъ отъ сѣтей смертныхъ, и отъ болѣзней адовыхъ избавити, Господу помолимся!
– О еже милостивно продолжити рабомъ Своимъ покаянія время, и не безгодно, яко неплодную смоковницу, посѣщи, но благосердіемъ окопати, и милосердія росою напоити, плодовъ покаянія и обращенія нашего человѣколюбно еще ожидая, Господу помолимся!
– О еже вознести насъ отъ вратъ смертныхъ, и мечь изъятый, и лукъ Свой напряженный, и въ немъ сосуды смертныя на ны праведно уготованная со стрѣлами горящими, милостивно отъ насъ отвратити, Господу помолимся!
– О еже услышати молитву нашу, и моленіе наше внушити, и слезъ нашихъ не премолчати; но ослабити намъ, да почіемъ прежде даже не отъидемъ, и ктому не будемъ, Господу помолимся!
– О избавитися намъ отъ всякія скорби, гнѣва, бѣды и нужды, Господу помолимся.
Заступи, спаси, помилуй и сохрани насъ, Боже, Твоею благодатію.
Пресвятую, Пречистую, Преблагословенную, Славную Владычицу нашу Богородицу и Приснодѣву Марію, со всѣми святыми помянувше, сами себе и другъ друга, и весь животъ нашъ Христу Богу предадимъ.
Ликъ: Тебѣ, Господи.
Іерей: Яко подобаетъ Тебѣ всякая слава, честь и поклоненіе, Отцу и Сыну и Святому Духу, нынѣ и присно и во вѣки вѣковъ.
Ликъ: Аминь.
Гласъ 2:
Діаконъ: Богъ Господь, и явися намъ, благословенъ грядый во имя Господне.
[И повторяетъ тоже послѣ этого и каждаго послѣдующаго стиха, произнесеннаго діакономъ.]
Діаконъ: Исповѣдайтеся Господеви, яко Благъ, яко въ вѣкъ милость Его.
Обышедше обыдоша мя, и именемъ Господнимъ противляхся имъ.
Не умру, но живъ буду, и повѣмъ дѣла Господня.
Камень, егоже небрегоша зиждущіи, сей бысть во главу угла: отъ Господа бысть сей, и есть дивенъ во очесѣхъ нашихъ.
Тропарь: Во гнѣвѣ Твоемъ, Боже, помяни щедроты Твоя, прахъ бо и пепелъ есмы, духъ ходяй и не обращаяйся; и не яростію Твоею обличиши насъ, да не погибнемъ до конца: но пощади души наша, яко единъ Милосердъ! [дважды.]
Слава и нынѣ.
Богородиченъ: Заступнице усердная, Мати Господа Вышняго, за всѣхъ молиши Сына Твоего Христа Бога нашего и всѣмъ твориши спастися, въ державный Твой покровъ прибѣгающимъ. Всѣхъ насъ заступи, о Госпоже Царице и Владычице, иже въ напастехъ и скорбехъ, и въ болѣзнехъ, обремененныхъ грѣхи многими, предстоящихъ и молящихся Тебѣ умиленною душею и сокрушеннымъ сердцемъ, предъ пречистымъ Твоимъ образомъ со слезами, и невозвратно надежду имущихъ на Тя избавленія всѣхъ золъ. Всѣмъ полезная даруй и вся спаси, Богородице Дѣво: Ты бо еси божественный покровъ рабомъ Твоимъ.
Псаломъ (50): Помилуй мя, Боже, по велицѣй милости Твоей, и по множеству щедротъ Твоихъ очисти беззаконіе мое! Наипаче омый мя отъ беззаконія моего, и отъ грѣха моего очисти мя. Яко беззаконіе мое азъ знаю и грѣхъ мой предо мною есть выну. Тебѣ Единому согрѣшихъ, и лукавое предъ Тобою сотворихъ, яко да оправдишися во словесѣхъ Твоихъ, и побѣдиши внегда судити Ти. Се бо въ беззаконіихъ зачатъ есмь, и во грѣсѣхъ роди мя мати моя. Се бо истину возлюбилъ еси: безвѣстная и тайная премудрости Твоея явилъ ми еси. Окропиши мя ѵссопомъ, и очищуся: омыеши мя, и паче снѣга убѣлюся. Слуху моему даси радость и веселіе, возрадуются кости смиренныя. Отврати лице Твое отъ грѣхъ моихъ, и вся беззаконія моя очисти. Сердце чисто созижди во мнѣ, Боже, и духъ правъ обнови во утробѣ моей. Не отвержи мене отъ лица Твоего, и Духа Твоего Святаго не отъими отъ мене. Воздаждь ми радость спасенія Твоего, и Духомъ Владычнимъ утверди мя. Научу беззаконныя путемъ Твоимъ, и нечестивіи къ Тебѣ обратятся. Избави мя отъ кровей, Боже, Боже спасенія моего: возрадуется языкъ мой правдѣ Твоей. Господи, устнѣ мои отверзеши, и уста моя возвѣстятъ хвалу Твою. Яко аще бы восхотѣлъ еси жертвы, далъ быхъ убо: всесожженія не благоволиши. Жертва Богу – духъ сокрушенъ; сердце сокрушенно и смиренно Богъ не уничижитъ. Ублажи Господи благоволеніемъ Твоимъ Сіона, и да созиждутся стѣны Іерусалимскія. Тогда благоволиши жертву правды, возношеніе и всесожегаемая: тогда возложатъ на олтарь Твой тельцы!
Канонъ Пресвятѣй и Единосущнѣй и Животворящей, Нераздѣлимѣй Троицѣ.
Пѣснь 1 (гласъ 8).
Ирмосъ: Колесницегонителя Фараоня погрузи чудотворяй иногда Моисейскій жезлъ, крестообразно поразивъ и раздѣливъ море: Израиля же бѣглеца, пѣшеходца спасе, пѣснь Богови воспѣвающа!
Господи, да не яростию Твоею обличиши нас, ниже гневом Твоим накажеши нас.
Вседѣтельная и срасленая, и сопрестольная, и трисвѣтлая Славо, Отче непостижиме, Сыне и Душе Святый, лютыя болѣзни рабы Твоя свободи, яко да бладарственно Тя славимъ!
Господи, да не яростию Твоею обличиши нас, ниже гневом Твоим накажеши нас.
Грѣховъ буря изрину мя въ глубину немощи, и частыя болѣзни, якоже треволненіе мя обуреваютъ окаяннаго: единосильная державо, Троице святая, умилосердися, спаси мя лютѣ погибающа!
Слава…
Отъ содержащаго грѣха избави Троице нераздѣльная, насъ Твоя рабы, росою милости Твоея угашающи зной лютыхъ моихъ болѣзней, и здравіе подающи, яко да православно воспѣваемъ Тя!
И нынѣ…
Богородиченъ: Избавителя и Вседѣтеля и Господа во чревѣ носившая, наша недуги, Всечистая, понесшаго: Того убо моли, лютыя немощи Твоя рабы избавити, едина человѣковъ помоще!
Пѣснь 3.
Ирмосъ: Небеснаго круга Верхотворче, Господи, и церкве Зиждителю, Ты мене утверди въ любви Твоей желаній краю, вѣрныхъ утвержденіе, Едине Человѣколюбче!
Господи, да не яростию Твоею обличиши нас, ниже гневом Твоим накажеши нас.
Небесніи умове, Ангельстіи Чинове, Престоли, и Начала, и Силы, и Господства, молятъ Тя благого и Спаса: губительнаго свободи недуга рабы Твоя!
Господи, да не яростию Твоею обличиши нас, ниже гневом Твоим накажеши нас.
Да человѣколюбія на мнозѣ, Владыко, Твоего покажеши бездну, Всесильне, недуга свободи смертоноснаго, и болѣзней лютыхъ рабы Твоя, Едине долготерпѣливе!
Слава…
Яко Божіи предстоятели, служебніи дуси, Ангели и Архангели, Сего молите, утолити недугъ, разорите печаль, смертоносныя же части избавите!
Н нынѣ…
Богородиченъ: Исцѣленій источника(ъ) Тя благихъ показа, бездна изъ Тебе прошедшая, Христосъ Господь, Отроковице пренепорочная: тѣмъ же рабы Твоя избави, немощи бурею потопляемыхъ!
Сія глаголи, по 2 и по 6 пѣсни токмо:
Избави отъ бѣдъ рабы Твоя, Многомилостиве, яко мы усердно къ Тебѣ прибѣгаемъ, къ милостивому Избавителю, всѣхъ Владыцѣ, въ Троицѣ славному Богу!
Посемъ ектенія сугубая.
Таже сѣдаленъ, (гласъ 2).
Не отрини до конца согрѣшшія люди Твоя, Владыко, ниже отстави милости и щедроты Твоя отъ насъ; но яко бездна Сый щедротъ, и милосердія пучина, пріими мольбы наша, и избави насъ отъ належащія бѣды и нужды, единъ бо еси Благоувѣтливый!
Пѣснь 4.
Ирмосъ: Ты моя крѣпость, Господи, Ты моя и сила, Ты мой Богъ, Ты мое радованіе, не оставль нѣдра Отча, и нашу нищету посѣтивъ. Тѣмъ съ Пророкомъ Аввакумомъ зову Ти: «силѣ Твоей слава, Человѣколюбче!».
Господи, да не яростию Твоею обличиши нас, ниже гневом Твоим накажеши нас.
Нынѣ сѣнь воистинну смертная обыде, и ко адовымъ вратомъ приближи; но Ты Спасе, яко силенъ, насъ возставивый, удиви милости Твоя, спасаяй въ вѣрѣ несумнѣнной вопіющихъ: силѣ Твоей слава, Человѣколюбче!
Господи, да не яростию Твоею обличиши нас, ниже гневом Твоим накажеши нас.
Христовы таинницы, самовидцы и проповѣдницы, пріимшіи даръ исцѣленія и врачеве суще душевніи, отъ нуждъ мя Апостоли, изведите содержащаго недуга, Іисуса моляще Владыку, и Избавителя, и Господа!
Слава…
Грѣховъ буря нынѣ насъ постиже, немощи волны обуреваютъ, болѣзни погружаютъ частыя; скорби бо и болѣзни насъ окаянныхъ обрѣтоша. Апостоли Господни, вашими мольбами, помощи руку подайте!
И нынѣ…
Богородтенъ: Болѣзньми лютыми и частыми ударяеми, Дѣво, вси Тебѣ припадаемъ, державнымъ покровомъ Твоимъ, Чистая, спаси насъ всѣхъ: ущедри, Богоневѣстная, избави мора, и лютыя немощи, и болѣзни исцѣли, Владычице!
Пѣснь 5.
Ирмосъ: Вскую мя отринулъ еси отъ лица Твоего, Свѣте незаходимый, и покрыла мя есть чуждая тма окаяннаго? но обрати мя, и къ свѣту заповѣдей Твоихъ, пути моя направи, молюся!
Господи, да не яростию Твоею обличиши нас, ниже гневом Твоим накажеши нас.
Моря прелести, медоточными вашими моленми, священніи Пророцы потопивше, нынѣ преложите горесть всю губительныя нынѣшнія немощи, на Божественную благомощія сладость!
Господи, да не яростию Твоею обличиши нас, ниже гневом Твоим накажеши нас.
Пронзени быхомъ стрѣлами немощи, повелѣніемъ Твоимъ, Господи, и утвердися на насъ рука Твоя Всесильне, яко Богъ щедрый, ущедри всѣхъ Твоею милостію, молитвами святыхъ Мучениковъ Твоихъ!
Слава…
Сына якоже древле вдовича возставилъ еси Твоимъ повелѣніемъ, умерщвлена, Слове, лютыя немощи рабы Твоя, яко единъ благъ и милостивъ избавивый, оживотвори, Едине Человѣколюбче!
И нынѣ…
Богородиченъ: Въ нощи житейстѣй буря постиже всякаго озлобленія, покрыла мя, Дѣво, немощи омраченіе; но возсіяй ми прохлажденія, Пречистая, свѣтъ и къ свѣту благомощія востави!
Пѣснь 6.
Ирмосъ: Очисти мя, Спасе, многа бо беззаконія моя, и изъ глубины золъ возведи, молюся: къ Тебѣ бо возопихъ, и услыши мя, Боже спасенія моего!
Господи, да не яростию Твоею обличиши нас, ниже гневом Твоим накажеши нас.
Въ пучинѣ пропасти и немощей облежимъ, и губительныя напасти обуреваютъ волны, Правителю Господи, помощи руку простеръ нынѣ спаси!
Господи, да не яростию Твоею обличиши нас, ниже гневом Твоим накажеши нас.
Разслабленнаго якоже древле стягнулъ еси, Божественнымъ маніемъ отъ недуга болѣзненнаго, и одра озлобленія, и недуга тяжчайшаго, ущедривъ даждь здравіе, Многомилостиве!
Слава…
Пророческій ликъ, Апостоловъ собраніе, полкъ страдальцевъ нынѣ молитъ Тя, Едине Многомилостиве, о людѣхъ Твоихъ, Блаже, сихъ ущедри!
И нынѣ…
Богородтенъ: Маріе, чистое дѣвства сокровище, Ты очисти насъ, и недуговъ и скорбей, и содержащія нынѣ немощи избави, да вѣрою Тя прославимъ!
Таже: Избави отъ бѣдъ рабы Твоя, Многомилостиве, яко мы усердно къ Тебѣ прибѣгаемъ, къ милостивому Избавителю, всѣхъ Владыцѣ, въ Троицѣ славному Богу!
Ектенія малая, и по возгласѣ абіе кондакъ, (гласъ 6):
Болѣзни адовы обыдоша насъ, и прикры ны сѣнь смертная, и яко воскъ отъ огня, дніе наши таютъ отъ лица гнѣва Твоего, Господи; но яко щедръ, во гнѣвѣ – милости помяни, и пощади люди Твоя да живи суще, въ покаяніи славимъ Тя, единаго Человѣколюбца!
Вонмемъ!
Премудрость!
Вонмемъ!
Прокименъ (гласъ 4): Господи, да не яростію Твоею обличиши мене, ниже гнѣвомъ Твоимъ накажеши мене!
Стихъ: Яко стрѣлы Твоя унзаша во мнѣ, и утвердилъ еси на мнѣ руку Твою!
Апостолъ ко Евреемъ (зач. 331 отъ полу):
Братіе, егоже любитъ Господь, наказуетъ, біетъ же всякаго сына, егоже пріемлетъ (Притч. 3, 12). Аще наказаніе терпите, яко-же сыновомъ обрѣтается вамъ Богъ. Который бо есть сынъ, его же не наказуетъ отецъ? Аще же безъ наказанія есте, ему же причастницы быша вси: убо прелюбодѣйчищи есте, а не сынове. Къ симъ, плоти нашей отцы имѣхомъ наказатели, и срамляхомся: не много ли паче повинемся Отцу духовомъ, и живи будемъ? Они бо въ мало дней, якоже годѣ имъ бѣ, наказоваху насъ; а Сей на пользу, да причастимся святыни Его. Всякое бо наказаніе въ настоящее время не мнится радость быти, но печаль: послѣди же плодъ миренъ наученымъ тѣмъ воздаетъ правды. Тѣмъ же ослабленныя руки и ослабленная колѣна исправите (Исаіи XXХV, 3): и стези правы сотворите ногами вашими, да не хромое совратится, но паче да исцѣлѣетъ!
Ликъ: Аллилуія, [трижды] гласа.
Стихъ 1: Одержаша мя болѣзни смертныя, и потоцы беззаконія смятоша мя!
Стихъ 2: Болѣзни адовы обыдоша мя, предвариша мя сѣни смертныя!
И о сподобитися намъ слышанія святаго Евангелія, Господа Бога молимъ!
И прочее Евангеліе отъ Луки (зач. 16):
Во время оно вниде Іисусъ въ домъ Симоновъ, теща же Симонова бѣ одержима огнемъ веліимъ: и молиша Его о ней. И ставъ надъ нею, запрети огню, и остави ю: абіе же возставши, служаше имъ. Заходящу же солнцу, вси, елицы имѣяху болящія недуги различными, привождаху ихъ къ Нему: Онъ же на единаго коегождо ихъ руцѣ возложь, изцѣляше ихъ. Исхождаху же и бѣси отъ многихъ, вопіюще и глаголюще: яко Ты еси Христосъ Сынъ Божій. И запрещая не даяше имъ глаголати, яко вѣдяху Христа самаго суща. Бывшу же дни, исшедъ иде въ пусто мѣсто: и народи искаху Его, дабы не отшелъ отъ нихъ. Онъ же рече къ нимъ, яко и другимъ градовомъ благовѣстити Ми подобаетъ царствіе Божіе: яко на се посланъ есмь. И бѣ проповѣдая на сонмищахъ Галилейскихъ.
Ликъ: Слава Тебѣ, Господи, слава Тебѣ!
Пѣснь 7.
Ирмосъ: Божія снизхожденія огнь устыдеся въ Вавилонѣ иногда, сего ради отроцы въ пещи, радованною ногою, яко во цвѣтницѣ, ликующе, пояху: «благословенъ еси, Боже отецъ нашихъ!».
Господи, да не яростию Твоею обличиши нас, ниже гневом Твоим накажеши нас.
Опаляетъ пещь безмѣрныхъ болѣзней, и сжигаетъ мя огневицы губительныя пламень непрестанно безстуднѣйшій; но росою милости Твоея, Спасе, прохлади поюща: благословенъ Богъ отецъ нашихъ!
Господи, да не яростию Твоею обличиши нас, ниже гневом Твоим накажеши нас.
Пророцы, апостоли, мучениковъ собори, Божественніи учителіе, болѣзни недугующихъ насъ мольбами укротите, и здравіе даруйте поющимъ: благословенъ Богъ отецъ нашихъ!
Слава…
Словомъ Лазаря воскресивый, нынѣ яко изъ гроба насъ лютыя немощи возставивый, оживи, Господи, да вопіемъ пѣснь благодарственную: благословенъ Богъ отецъ нашихъ!
И нынѣ…
Богородицею: Щедра сущая, и Мати Всещедраго, ущедривши избави Твоя люди, призывающія милости Твоя, Дѣво, и поющія: благословенъ Богъ отецъ нашихъ!
Птьснъ 8
Ирмосъ: Седмерицею пещь Халдейскій мучитель богочестивымъ неистовно разжже, силою же лучшею спасены сія видѣвъ, Творцу и Избавителю вопіяше: отроцы благословите, священницы воспойте, людіе превозносите во вся вѣки!
Господи, да не яростию Твоею обличиши нас, ниже гневом Твоим накажеши нас.
Болѣзненно стенемъ, отъ одра болѣзни нашея, и отъ губительныя немощи вопіемъ къ Тебѣ Человѣколюбцу, сердечныя очи нынѣ простирающе, здравія просимъ; посѣти насъ, Спасе, и возстави пѣти: «людіе превозносите во вся вѣки!».
Господи, да не яростию Твоею обличиши нас, ниже гневом Твоим накажеши нас.
Въ нашу немощь милостивнѣ облекійся, и уподобитися человѣкомъ изволивый, молитвами Преподобныхъ Твоихъ, отчаянныхъ спаси насъ, воздвигни изъ гроба отчаянія пѣти: «отроцы благословите, священницы пойте, людіе превозносите во вся вѣки!».
Слава…
Содѣтелю естества, подателю исцѣленія, утробы щедротъ, и благоутробія пучину, яко имѣяй, Долготерпѣливе, посѣщеніемъ посѣти отъ губительныя немощи люди Твоя, и оживи вопити: «священшщы благословите, людіе превозносите во вся вѣки!».
И нынѣ…
Богородиченъ: Крѣпкая помоще, и извѣстное заступленіе, отчаявшихся надежде, Пренепорочная, посѣти страждущія болѣзненно рабы Твоя; облегчи тяжесть горькія немощи; отжени недугъ губительныя нужди, и спаси рабы Твоя, Дѣво Богородице!
Пѣснь 9.
Ирмосъ: Ужасеся о семъ небо, и земли удивишася концы, яко Богъ явися человѣкомъ плотски, и чрево Твое бысть пространнѣйшее небесъ: тѣмъ Тя Богородицу, ангеловъ и человѣкъ чиноначалія величаютъ!
Господи, да не яростию Твоею обличиши нас, ниже гневом Твоим накажеши нас.
Чудеса велія, ихъже нѣсть числа, сотворивый, Безсмертне, на рабы Твоя милости Твоя, Боже, яко милостивъ покажи и содержащія насъ нынѣ свободи болѣзни, моленьми Рождшія Тя, и лика Страстотерпцевъ Твоихъ!
Господи, да не яростию Твоею обличиши нас, ниже гневом Твоим накажеши нас.
Ангеловъ, Архангеловъ и Пророковъ, Апостоловъ, Мучениковъ, Преподобныхъ же, Іерарховъ, Священномученниковъ Твоихъ молитвами, плачь рабовъ Твоихъ обрати, Всесильне, въ радость: исцѣли болѣзнь, облегчи недуги, и здравіе намъ даруй!
Слава…
Душъ же и тѣлесъ врача, въ милости богатаго Господа, Тебе молю: исцѣли страсти моя многія, болѣзней измѣни, и скорбныхъ мя, яко благъ и единъ благодѣтель, и спасай вѣрою чистою Тя величающихъ!
И нынѣ…
Богородиченъ: Щедраго рождшая и Милостиваго, и Владыку, и Создателя и Господа, нынѣ на мнѣ покажи Твоя обычно щедроты, и лютаго мя избави недуга, изнуряющаго душу мою, Дѣво Богородице, и подаждь ми здравіе, яко да непрестанно величаю Тя!
По окончаніи: Достойно есть яко воистинну…
Трисвятое и по Отче нашъ: возгласъ.
И по возгласѣ, тропари:
Помилуй насъ, Господи, помилуй насъ; всякаго бо отвѣта недоумѣюще, сію Ти молитву яко Владыцѣ грѣшніи приносимъ: помилуй насъ.
Слава…
Господи, помилуй насъ, на Тя бо уповахомъ; не прогнѣвайся на ны зѣло, ниже помяни беззаконій нашихъ, но призри и нынѣ яко благоутробенъ, и избави ны отъ врагъ нашихъ; Ты бо еси Богъ нашъ, и мы людіе Твои, вси дѣла руку Твоею, и имя Твое призываемъ.
И нынѣ…
Милоcердія двери отверзи намъ, благословенная Богородице, надѣющіися на Тя да не погибнемъ, но да избавимся Тобою отъ бѣдъ: Ты бо еси спасніе рода христіанскаго.
Діаконъ: Помилуй насъ, Боже, по велицѣй милости Твоей, молимтися, услыши и помилуй.
Ликъ: Господи помилуй. [Трижды.]
[Тоже повторяется послѣ каждаго прошенія.]
Діаконъ: Еще молимся о Святѣйшемъ Сѵнодѣ и о Блаженнѣйшемъ Архіепископѣ нашемъ [или Высокопреосвященнѣйшемъ Митрополитѣ или Преосвященнѣйшемъ Епископѣ нашемъ, его же область] [имярекъ] и всей во Христѣ братіи нашей.
Ликъ: Господи помилуй. [Трижды.]
Еще молимся о Благочестивѣйшемъ, Императорѣ нашемъ [имярекъ]: о державѣ, побѣдѣ, пребываніи, мирѣ, здравіи, спасеніи Его, и Господу Богу нашему наипаче поспѣшити и пособити Ему во всѣхъ, и покорити подъ нозѣ Его всякаго врага и супостата.
Ликъ: Господи помилуй. [Трижды.]
Еще молимся о Супругѣ Его, Благочестивѣйшей Императрицѣ [имярекъ], о Наслѣдникѣ Его, Князѣ [имярекъ] и о всемъ Царствующемъ Домѣ.
Сугубая ектенія до: Еще молимся о всемъ Ихъ христолюбивомъ воинствѣ!
Ликъ: Господи помилуй. [Трижды.]
– Согрѣшихомъ и беззаконовахомъ, и сего ради праведный Твой гнѣвъ постиже насъ, Господи Боже нашъ, и сѣнь смертная обыде насъ, и ко адовымъ вратомъ приближихомся, но къ Тебѣ Богу нашему въ болѣзни нашей умильно вопіемъ: пощади, пощади люди Твоя, и не погуби до конца, смиренно молимтися, услыши и помилуй!
Ликъ: Господи помилуй. [Трижды.]
– Животомъ и смертію владычествуяй, Господи, не затвори въ смерти души рабовъ Твоихъ, но престани отъ гнѣва, и остави ярость; зане исчезаютъ яко дымъ дніе наши, и изсше крѣпость наша, и погибаемъ до конца грѣхъ ради нашихъ. Милостивъ буди рабомъ Твоимъ, въ покаяніи со слезами молимтися, услыши и помилуй!
Ликъ: Господи помилуй. [Трижды.]
– Помяни, яко плоть есмы, Господи, духъ ходяй, и не обращаяйся, и милостивно отврати гнѣвъ Твой, праведно на ны движимый, имъже яко мечемъ безгодно посѣцаеши насъ; устави болѣзнь, и утоли язву напрасно губящую насъ: не мертвіи бо восхвалятъ Тя, ниже вси нисходящій во адъ, но мы живіи хвалимъ Тя и, въ болѣзни сердца стеняще, молимтися, услыши и помилуй!
Ликъ: Господи помилуй. [Трижды.]
– Паче всѣхъ согрѣшихомъ Тебѣ, и беззаконовахомъ, Владыко: и аще покаянія не стяжахомъ, предложеніе наше вмѣсто покаянія пріими, и на милость приложися, смертоноснаго недуга и болѣзней лютыхъ, яко всесиленъ, свобода рабы Твоя, болѣзненно стеняще молимтися, скоро услыши и помилуй!
Ликъ: Господи помилуй. [Трижды.]
– Не помяни беззаконій и неправдъ людей Твоихъ, и не вниди въ судъ съ рабы Твоими, ниже уклонися гнѣвомъ отъ рабовъ Твоихъ: аще беззаконія назриши, Господи, кто постоитъ? прахъ бо и пепелъ есмы, и составъ нашъ яко ничтоже предъ Тобою; но яко Щедръ и Человѣколюбецъ умилосердися и не погуби насъ во гнѣвѣ Твоемъ со беззаконми нашими, молимтися, Боже ІІреблагій, услыши и помилуй!
Ликъ: Господи помилуй. [Трижды.]
– Не хотяй смерти грѣшныхъ, но еже обратитися и живымъ быти имъ, яко живота источникъ, оживотвори насъ праведнымъ Твоимъ судомъ смерти достойныхъ; Богъ бо еси живыми и мертвыми обладаяй, и не погуби насъ во гнѣвѣ прещенія Твоего, воплемъ крѣпкимъ въ горести сердца со слезами молимтися, услыши и помилуй!
Ликъ: Господи помилуй. [Трижды.]
– Милостивно призри, Господи, на озлобленіе людей Твоихъ, и умилосердися, и повели Ангелу простершему руку свою, еже погубити всѣхъ насъ, яко же иногда при Давидѣ повелѣлъ еси, еже довлѣти нынѣ и удержати руку свою, да не до конца насъ погубитъ, и мы бо въ покаяніи Тебѣ исповѣдающеся, яко Давидъ вопіемъ: согрѣшихомъ, беззаконовахомъ, нѣсмы достойни Твоего милосердія, но Ты Самъ яко щедръ, единаго ради благосердія Твоего умоленъ бывъ, покажи милости Твоя древнія и пощади люди и овцы пажити Твоя, молимтися: скоро услыши и помилуй!
Іерей: Услыши ны, Боже Спасителю нашъ, упованіе всѣхъ концевъ земли и сущихъ въ мори далече, и милостивъ, милостивъ буди, Владыко, о грѣсѣхъ нашихъ, и помилуй насъ. Милостивъ бо и человѣколюбецъ Богъ еси, и Тебѣ славу возсылаемъ, Отцу и Сыну и Святому Духу, нынѣ и присно и во вѣки вѣковъ.
Ликъ: Аминь.
Іерей: Миръ всѣмъ.
Ликъ: И духови твоему.
Діаконъ: Паки и паки, преклоньше колѣна, Господу помолимся!
Ликъ: Господи помилуй. [Трижды.]
Господи Боже нашъ, призри съ высоты святыя Твоея на молитву насъ грѣшныхъ и недостойныхъ рабъ Твоихъ, беззаконии нашими Твою благость прогнѣвающихъ и благоутробіе Твое раздражившихъ, и не вниди въ судъ съ рабы Твоими; но отврати страшный гнѣвъ Твой, праведно на ны движимый; утоли губительное прещеніе, устави грозный Твой мечь, невидимо безгодно сѣкущій насъ, и пощади нищихъ и убогихъ рабъ Твоихъ, и не затвори въ смерти души наша, въ покаяніи съ сокрушеннымъ сердцемъ и со слезами къ Тебѣ, милосердому, благоувѣтливому и благопремѣнительному Богу нашему припадающихъ! Твое бо есть, еже миловати и спасати ны Боже нашъ, и Тебѣ славу возсылаемъ Отцу, и Сыну и Святому Духу, нынѣ и присно, и во вѣки вѣковъ! Аминь.
Книга молебныхъ пѣній Православной Каѳолической Восточной Церкви. Нѣмецкій переводъ съ параллельнымъ славянскимъ текстомъ, провѣреннымъ по греческимъ оригиналамъ, протоіерея Алексѣя Мальцева, mag. theol., Настоятеля церкви при Императорскомъ Россійскомъ Посольствѣ въ Берлинѣ. Берлинъ 1897. С. 375-412.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.