СЛУЖБА ВОСКРЕСНАЯ 6-ГО ГЛАСА.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ.., поста́вимъ стихо́въ 4 и пое́мъ 3 воскре́сны гла́са, повторя́юще пе́рвую, гла́съ 6:

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Побѣ́ду имѣ́яй, Христе́, ю́же на а́да, на Кре́стъ возше́лъ еси́, да во тмѣ́ сме́рти сѣдя́щія воскреси́ши съ Собо́ю, Иже въ ме́ртвыхъ Свобо́дь, Источа́яй живо́тъ отъ Своего́ свѣ́та, Всеси́льне Спа́се, поми́луй на́съ.

Дне́сь Христо́съ, сме́рть попра́въ, я́коже рече́, воскре́се, и ра́дованіе мíру дарова́, да вси́ взыва́юще пѣ́снь, та́ко рце́мъ: Исто́чниче жи́зни, Непристу́пный Свѣ́те, Всеси́льне Спа́се, поми́луй на́съ.

Тебе́, Го́споди, Су́щаго по все́й тва́ри, грѣ́шніи ка́мо бѣжи́мъ? На небеси́ Са́мъ живе́ши, во а́дѣ попра́лъ еси́ сме́рть. Во глубины́ морскíя? — Та́мо рука́ Твоя́, Влады́ко. Къ Тебѣ́ прибѣга́емъ, Тебѣ́ припа́дающе, мо́лимся: Воскресы́й изъ ме́ртвыхъ, поми́луй на́съ.

Сла́ва, и ны́нѣ, богоро́диченъ:
Досто́йно е́сть, я́ко вои́стинну блажи́ти Тя́, Богоро́дицу, въ Твое́ бо пречи́стое вше́дъ чре́во всѣ́хъ Содѣ́тель, пло́ть бы́сть, не преложи́вся естество́мъ, ниже́ мечта́вся о смотре́ніи, но воспрія́тѣй изъ Тебе́ слове́сно одушевле́ннѣй пло́ти соедини́вся по ѵпоста́си. Отону́дуже благоче́стно во обои́хъ естества́хъ явля́ющихся ра́знство твори́мъ. Того́ моли́, Честна́я Пресвята́я, низпосла́ти на́мъ ми́ръ и ве́лію ми́лость.

Та́же: Свѣ́те Ти́хій… Посе́мъ проки́менъ: Госпо́дь воцари́ся.., три́жды. Сти́хъ: Облече́ся Госпо́дь въ си́лу и препоя́сася… Та́же: Сподо́би, Го́споди, въ ве́черъ се́й… Іере́й же ектеніи́ не глаго́летъ, но пое́мъ

На стихо́внѣ стихи́ру воскре́сну, гла́съ 6:
Воскресе́ніе Твое́, Христе́ Спа́се, а́нгели пою́тъ на небесѣ́хъ, и на́съ на земли́ сподо́би чи́стымъ се́рдцемъ Тебе́ сла́вити.

И ины́я стихи́ры, Пресвяты́я Богоро́дицы. Подо́бенъ: Всю́ отложи́вше.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Кля́твою, я́ко обѣща́ Твоему́ пра́отцу дре́вле Бо́гъ Прелѣ́тный, въ послѣ́дняя времена́ соверши́, произше́дъ, Пречи́стая, отъ чре́ва Твоего́ боже́ственнаго. Ибо вои́стинну возсія́ отъ Тебе́ Госпо́дь, дла́нію содержа́й концы́. Его́же и мнѣ́ благоувѣ́тлива сотвори́ въ ча́съ су́дный, Дѣ́во Марíе, Того́ Ца́рствія мя́ получи́ти добродѣ́телей возвыше́ніемъ и страсте́й умерщвле́ніемъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Ума́ чистото́ю Иса́ія, Дѣ́во, издале́ча прорече́, роди́ти иму́щую Созда́теля всея́ тва́ри Тя́, Честна́я Пречи́стая, Ты́ бо яви́лася еси́ еди́на во вѣ́ки Всенепоро́чная. Тѣ́мже Тя́ молю́: оскверне́ную мою́ ду́шу очи́сти, и свѣ́тлости Боже́ственныя о́бщника мя́ покажи́, и Боже́ственнаго Твоего́ Сы́на стоя́нія десна́го, егда́ ся́детъ, я́коже пи́сано е́сть, суди́ти мíру всему́.

Сти́хъ: Лицу́ Твоему́ помо́лятся бога́тіи лю́дстіи.

Сме́рти разруше́ніе Рождество́мъ Твои́мъ яви́ся, Ты́ бо Отрокови́ца еси́ Живота́ Нетлѣ́ннаго пребыва́ніе. Тѣ́мже Тя́ молю́: во гробѣ́хъ а́довыхъ страсте́й мои́хъ слежа́ща Ты́ воскреси́, и къ весе́лію и оживле́нію, Дѣ́во, руководи́, ко блаже́нному воздая́нію, и неги́блемыя и боже́ственныя сподо́би ра́дости, идѣ́же сла́дость присносу́щная, идѣ́же свѣ́тъ невече́рній.

Сла́ва, и ны́нѣ, богоро́диченъ:
Пріиди́те, вси́ язы́цы, во гла́сѣ ра́дованія Пресвяту́ю Дѣ́ву и Богоро́дицу восхва́лимъ, человѣ́ческаго существа́ горни́ло, неизрече́нныхъ чуде́съ дѣ́лателище, о То́й бо бы́ша но́вая: Безнача́льный начина́ется, Сло́во одебелѣва́етъ, Бо́гъ Человѣ́къ быва́етъ, да бо́га человѣ́ка содѣ́лаетъ, не премѣне́ніемъ есте́ствъ, но соедине́ніемъ по ѵпоста́си. Происхо́дитъ бо Еди́нъ отъ двою́ сопроти́вныхъ, во двои́хъ соверше́нныхъ естества́хъ нераздѣ́льнѣ познава́емый, хотѣ́тельнѣ же и дѣ́тельнѣ по обою́ существу́. То́йже, по исто́тному вѣ́руемь быва́я, ра́ди спаси́тельнаго смотре́нія Христо́съ Бо́гъ на́шъ, мíру подая́ очище́ніе, ми́ръ и ве́лію ми́лость.

Та́же: Ны́нѣ отпуща́еши… Трисвято́е, по Отче на́шъ… Тропа́рь воскре́сенъ. Сла́ва, и ны́нѣ, богоро́диченъ его́. И отпу́стъ.

ВЪ СУББОТУ НА ВЕЛИЦѢЙ ВЕЧЕРНИ,
На Го́споди воззва́хъ.., поста́вимъ стихо́въ 10 и пое́мъ настоя́щія стихи́ры воскре́сны, гла́съ 6:

Сти́хъ: Изведи́ изъ темни́цы ду́шу мою́, исповѣ́датися и́мени Твоему́.

Побѣ́ду имѣ́яй, Христе́, ю́же на а́да, на Кре́стъ возше́лъ еси́, да во тмѣ́ сме́рти сѣдя́щія воскреси́ши съ собо́ю, Иже въ ме́ртвыхъ Свобо́дь, Источа́яй живо́тъ отъ Своего́ свѣ́та, Всеси́льне Спа́се, поми́луй на́съ.

Сти́хъ: Мене́ жду́тъ пра́ведницы, до́ндеже возда́си мнѣ́.

Сти́хъ: Изъ глубины́ воззва́хъ къ Тебѣ́, Го́споди, Го́споди, услы́ши гла́съ мо́й.

Ины стихи́ры, восто́чны [анато́ліевы], гла́съ то́йже:

Сти́хъ: Да бу́дутъ у́ши Твои́ вне́млющѣ гла́су моле́нія моего́.

Кресто́мъ Твои́мъ, Христе́, хва́лимся, и Воскресе́ніе Твое́ пое́мъ и сла́вимъ, Ты́ бо еси Бо́гъ на́шъ, ра́звѣ Тебе́ ино́го не вѣ́мы.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Вы́ну благословя́ще Го́спода, пое́мъ Воскресе́ніе Его́, Кре́стъ бо претерпѣ́въ, сме́ртію сме́рть погуби́.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Сла́ва си́лѣ Твое́й, Го́споди, я́ко упраздни́лъ еси́ держа́ву иму́щаго сме́рти, обнови́лъ еси́ на́съ Кресто́мъ Твои́мъ, да́руяй на́мъ живо́тъ и нетлѣ́ніе.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Погребе́ніе Твое́, Го́споди, у́зы а́довы сокруши́вшее растерза́; е́же изъ ме́ртвыхъ воскре́сеніемъ [1] мíръ просвѣти́. Го́споди, сла́ва Тебѣ́.

Ины стихи́ры, Богоро́дицѣ, творе́ніе Па́вла Аморре́йскаго, гла́съ 3:

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Ви́дящи не́мощь мою́ тѣле́сную, и душе́вное страда́ніе, и серде́чное озлобле́ніе, посѣще́нія сподо́би мя́ Боже́ственнаго, Всенепоро́чная Дѣ́во, спаси́ мя, молю́ся, те́плыми Твои́ми моли́твами.

Сти́хъ: Хвали́те Го́спода вси́ язы́цы, похвали́те Его́ вси́ лю́діе.

Всѣ́хъ преидо́хъ, Влады́чице, согрѣше́ньми, но мно́жества си́хъ, Дѣ́во, очи́щши, ми́лостей получи́ти ми́, Чи́стая, сподо́би въ бу́дущемъ судѣ́ Сы́на и Бо́га Твоего́.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Мно́жество согрѣше́ній мои́хъ, зову́щаго, очи́сти, Чи́стая, и чу́вствій мои́хъ неуста́вная движе́нія моли́твеннымъ мече́мъ ссѣцы́, я́ко да вѣ́рою и любо́вію пою́ Твое́ безсѣ́менное Рождество́.

Сла́ва, и ны́нѣ, богоро́диченъ:
Кто́ Тебе́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Та́же: Свѣ́те Ти́хій… Проки́менъ дне́: Госпо́дь воцари́ся… И про́чее по обы́чаю.

На стихо́внѣ стихи́ры, гла́съ 6:
Воскресе́ніе Твое́, Христе́ Спа́се, а́нгели пою́тъ на небесѣ́хъ, и на́съ на земли́ сподо́би чи́стымъ се́рдцемъ Тебе́ сла́вити.

По алфави́ту:

Сти́хъ: Госпо́дь воцари́ся, въ лѣ́поту облече́ся.

Врата́ сокруши́въ мѣ́дная и вереи́ а́довы сотры́й, я́ко Бо́гъ Всеси́ленъ, ро́дъ человѣ́ческій па́дшій воскреси́лъ еси́. Сего́ ра́ди и мы́ согла́сно вопіе́мъ: Воскресы́й изъ ме́ртвыхъ, Го́споди, сла́ва Тебѣ́.

Сти́хъ: Ибо утверди́ вселе́нную, я́же не подви́жится.

Тлѣ́нія на́съ дре́вняго Христо́съ испра́вити хотя́, на Крестѣ́ пригвожда́ется и во гро́бѣ полага́ется, Его́же мѵроно́сицы жены́ со слеза́ми иска́ху, пла́чуща глаго́лаху: увы́ на́мъ, Спа́се всѣ́хъ, ка́ко изво́лилъ еси́ во гро́бѣ всели́тися? Всели́выйся же хотя́, ка́ко укра́денъ бы́лъ еси́? Ка́ко преложи́лся еси́? Ко́е же мѣ́сто Твое́ Живоно́сное сокры́ Тѣ́ло? Но, Влады́ко, я́ко обѣща́лся еси́, на́мъ яви́ся, и утоли отъ на́съ рыда́ніе сле́зъ. Пла́чущимся же и́мъ, а́нгелъ къ ни́мъ возопи́: отъ пла́ча преста́вша, апо́столомъ рцы́те, я́ко воскре́се Госпо́дь, мíрови да́руяй очище́ніе и ве́лію ми́лость.

Сти́хъ: До́му Твоему́ подоба́етъ святы́ня, Го́споди, въ долготу́ днíй.

Распны́йся, я́ко восхотѣ́лъ еси́, Христе́, и сме́рть погребе́ніемъ Твои́мъ плѣни́вый, тридне́венъ воскре́слъ еси́, я́ко Бо́гъ, со сла́вою, мíрови да́руя безконе́чную жи́знь и ве́лію ми́лость.

Сла́ва, и ны́нѣ, богоро́диченъ:
Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

Та́же: Ны́нѣ отпуща́еши… Трисвято́е, и по Отче на́шъ…

Тропа́рь воскре́сенъ, гла́съ 6:
Ангельскія си́лы на гро́бѣ Твое́мъ, и стрегу́щіи омертвѣ́ша; и стоя́ше Марíя во гро́бѣ, и́щущи Пречи́стаго Тѣ́ла Твоего́. Плѣни́лъ еси́ а́дъ, не искуси́вся отъ него́; срѣ́тилъ еси́ Дѣ́ву, да́руяй живо́тъ. Воскресы́й изъ ме́ртвыхъ, Го́споди, сла́ва Тебѣ́.

Сла́ва, и ны́нѣ, богоро́диченъ:
Благослове́нную нарекíй Твою́ Ма́терь, прише́лъ еси́ на Стра́сть во́льнымъ хотѣ́ніемъ, возсія́въ на Крестѣ́, взыска́ти хотя́ Ада́ма, глаго́ля а́нгеломъ: сра́дуйтеся Мнѣ́, я́ко обрѣ́теся поги́бшая дра́хма. Вся́ му́дрѣ устро́ивый, Бо́же на́шъ, сла́ва Тебѣ́.

Посе́мъ отпу́стъ.

ВЪ СУББОТУ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 6:

Пѣ́снь 1.
Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Припѣ́въ: Пресвята́я Богоро́дице, спаси́ на́съ.

Неоску́дну благода́ть иму́щи я́ко Боже́ственную, Ма́ти Безневѣ́стная, къ Тебѣ́ прибѣга́ющихъ не пре́зри, отъ бѣ́дъ и скорбе́й при́сно спаса́ющи.

Се́ вре́мя наста́ моего́ уны́нія, воста́ни, Пречи́стая Влады́чице, и по́мощи да́ждь ми́ ру́ку, Ты́ бо мíръ боже́ственнаго весе́лія испо́лнила еси́.

Сла́ва: Держа́вный Тво́й покро́въ, Богороди́тельнице, я́ко засту́пница су́щи, да́ждь ми́ вско́рѣ, напа́стьми одержи́му, и невре́дна отъ си́хъ сохрани́ мя́.

И ны́нѣ: Души́ мое́й сме́рть притека́етъ, искуше́нія же ненави́дящихъ, я́ко а́спиды, обыдо́ша погуби́ти мя́, но Сама́ мя, Богоро́дице, спаси́.

Пѣ́снь 3.
Ирмо́съ: Разшири́шася на враги́ моя́ уста́ моя́, я́ко утверди́ся о Го́сподѣ се́рдце мое́.

Умерщвле́нную ду́шу мою́ прегрѣше́ньми, Живо́тъ я́ко ро́ждшая, Богоро́дице, оживи́.

Отъ вся́каго искуше́нія соблюди́ къ Тебѣ́ прибѣга́ющихъ, Богоро́дице, упова́ніе на́ше.

Сла́ва: Отъ востаю́щихъ на мя́ напа́стей го́рько, спаси́ мя, Ма́ти Го́спода моего́ Пренепоро́чная.

И ны́нѣ: Яже мíрови спасе́ніе подаю́щи Боже́ственнымъ Рождество́мъ Твои́мъ, отъ бѣ́дъ мя́ премѣни́.

Пѣ́снь 4.
Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Изнемо́же нището́ю крѣ́пость души́ моея́, Богороди́тельнице, и лю́тое на мя́ омраче́ніе нападе́, отъ прегрѣше́ній иму́щее нахо́дъ; при́зри, я́ко свѣтоно́сный о́блакъ Бо́жій, и просвѣти́ мя, молю́ся.

Бу́ри зо́лъ мои́хъ и смуще́ніе прегрѣше́ній преложи́ въ тишину́ спасе́нія, я́ко су́щи приста́нище, Всенепоро́чная, рыка́юще и́щутъ мя́, я́ко льво́ве, пожре́ти. Па́губы тѣ́хъ изба́ви мя́, молю́ся.

Сла́ва: Въ нощи́ и во дни́, на земли́ же, и въ мо́ри, и на вся́комъ мѣ́стѣ спасе́ніе тве́рдо су́щи, Богоро́дице, Покро́ве непобѣди́мый, спаса́й мя́, по Бо́зѣ бо на Тя́ вои́стинну христіа́не упова́емъ.

И ны́нѣ: Отъ вели́кихъ и разли́чныхъ прегрѣше́ній же и напа́стей всегда́ спаса́еши мя́, тѣ́мже, я́ко ро́ждшую Тя́ Го́спода, молю́ и къ Тебѣ́ прибѣга́ю, непобѣди́мѣй По́мощи скорбя́щимъ: отъ бѣ́дъ изведи́ мольба́ми Твои́ми.

Пѣ́снь 5.
Ирмо́съ: Свѣ́тъ возсія́й мíру, Христе́, просвѣти́ се́рдце мое́, отъ но́щи Тебѣ́ зову́ща, и спаси́ мя.

Спасе́нія Тя́ покро́въ сла́вимъ, Сло́ва Ма́ти, Всенепоро́чная, навѣ́тъ не боя́щеся человѣ́ческихъ.

Иму́ще Тя́ стѣ́ну необори́му, искуше́ній же и печа́ли воста́нія избавля́емся, Пречи́стая.

Сла́ва: Изми́ мя́ отъ злы́хъ человѣ́къ язы́ка, Чи́стая, я́коже бо бри́тва изостри́ся, погуби́ти искíй ду́шу мою́ го́рько.

И ны́нѣ: Прилѣ́жно Ти́ припа́даю, моля́ся, я́ко Ма́ти Зижди́теля моего́, одержа́щихъ мя́ бѣ́дъ свободи́.

Пѣ́снь 6.
Ирмо́съ: Ки́томъ пожре́нъ грѣхо́внымъ, вопію́ Тебѣ́, Христе́: я́ко проро́ка, изъ истлѣ́нія мя́ свободи́.

Го́рести вку́съ пріе́мъ, Боже́ственныя сла́дости отчужди́хся, Пречи́стая. Тѣ́мже вопію́ Ти: да́руй ми́ по́мощь.

Омраче́ніе страсте́й раба́ мя́ тли́ содѣ́ла, тѣ́мже Свѣ́тъ ро́ждшая, свободи́ мя, Влады́чице.

Сла́ва: Согла́сно Тебѣ́ и вѣ́рно исповѣ́даюся, Пречи́стая, и пожру́ Ти́ же́ртву, Тобо́ю изба́влься ско́рби.

И ны́нѣ: Отверзо́шася на мя́ непра́вды уста́, Влады́чице, тѣ́мже мя́, я́ко Засту́пница, си́хъ вско́рѣ свободи́.

Та́же: Го́споди, поми́луй, три́жды. Сла́ва, и ны́нѣ.

Конда́къ, гла́съ 6:
Предста́тельство христіа́нъ непосты́дное, хода́тайство ко Творцу́ непрело́жное, не пре́зри грѣ́шныхъ моле́ній гла́сы, но предвари́, я́ко Блага́я, на по́мощь на́съ, вѣ́рно зову́щихъ Ти́: ускори́ на моли́тву и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

Пѣ́снь 7.
Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Искуше́нія души́ моея́, ю́же ту́чніи юнцы́ ны́нѣ обыдо́ша, Пресвята́я Дѣ́во, Сама́ мя́ си́хъ свободи́.

Защища́ющи то́щно въ бѣдѣ́ су́щихъ и въ печа́ли, ра́дость, Богоро́дице, подае́ши всегда́.

Сла́ва: Побѣжде́на мя́ всего́ отча́яніемъ дѣ́лъ и печа́ли, огради́ мя, Дѣ́во, я́ко покро́въ всѣ́мъ неруши́мый.

И ны́нѣ: Предста́тельствомъ Твои́мъ избавля́емся бѣ́дъ и скорбе́й, и обрѣта́емъ бога́тство ве́ліе неистоща́емо.

Пѣ́снь 8.
Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Отъ человѣ́ческихъ снѣда́юся озлобле́ній и молю́ся, Богоро́дице: изба́ви мя́ су́етнаго совѣ́та и́хъ.

Побѣди́хся въ печа́лехъ искуше́ніи мои́ми и молю́ся, Влады́чице: отъ си́хъ мя́ спаси́ невреди́ма.

Сла́ва: Спаси́ мя, Чи́стая, отъ человѣ́ка льсти́ва, и язы́ка, и у́стъ, и мучи́тельства, и вся́кія ну́жды.

И ны́нѣ: Иже нра́вомъ прельща́емь е́смь, безъ отвѣ́та сы́й, къ Богоро́дицѣ зову́: вся́ческихъ мя́ изба́ви зо́лъ.

Пѣ́снь 9.
Ирмо́съ: Еже ра́дуйся отъ а́нгела пріи́мшая и ро́ждшая Созда́теля Своего́, Дѣ́во, спаси́ Тя́ велича́ющія.

Ми́лостива ми́ въ печа́лехъ житія́, Богоро́дице, бу́ди и спаси́ отъ бѣ́дъ ны́нѣ прибѣга́ющаго къ Тебѣ́.

Вои́стинну еди́на на земли́ и въ мо́ри яви́лася еси́, Чи́стая, кро́въ неразори́мь прибѣга́ющимъ Ти́ несумнѣ́нною душе́ю.

Сла́ва: Безъ ума́ себе́ вся́ческими порабо́тившу лю́тыми паде́ньми, мольба́ми Твои́ми свобо́ду пода́ждь ми́, Всепѣ́тая.

И ны́нѣ: Тя́ наде́жду и заступле́ніе тве́рдо стяжа́въ, Чи́стая, велича́я Тя́, я́ко Богоро́дицу, пѣ́снь вѣ́рою скончава́ю.

Та́же: Досто́йно е́сть… И Трисвято́е, и по Отче на́шъ… Конда́къ гла́са. И про́чее по обы́чаю, и отпу́стъ.

ВЪ НЕДѢЛЮ УТРА, НА ПОЛУНОЩНИЦѢ,
Кано́нъ Пресвятѣ́й и Живонача́льнѣй Тро́ицѣ, его́же краестро́чіе: Шесто́е пѣ́ніе приноша́ю Тебѣ,́ Божество́. Творе́ніе Митрофа́ново, гла́съ 6.

Пѣ́снь 1.
Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Три́ Ѵпоста́си пое́мъ Богонача́льныя, Еди́нственнаго Естества́ неизмѣ́нный зра́къ, Блага́го Человѣколю́бца Бо́га, прегрѣше́ній очище́ніе на́мъ да́рующа.

Пресу́щный Еди́не и Трисія́нный начерта́ньми Го́споди, въ Божествѣ́ еди́номъ Сы́й, вразуми́ на́съ и сподо́би Твоего́ Боже́ственнаго сія́нія.

Сла́ва: Невѣстоукраси́въ Па́велъ, ю́же отъ язы́къ Це́рковь, еди́ному Тебѣ́ Тріѵпоста́сному Бо́гу покланя́тися научи́, отъ Него́же и Имже и въ Не́мже вся́ бы́ша.

И ны́нѣ, богоро́диченъ: Изъ чре́ва Твоего́ про́йде у́мное, Богоро́дице, Со́лнце, и осія́ на́съ трисвѣ́тлаго Божества́ заря́ми. Его́же пою́ще, благоче́стно Тя́ ублажа́емъ.

Пѣ́снь 3.
Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Украси́въ, Трисвѣ́тлый Бо́же, чи́ны небе́сныя, устро́илъ еси́ пѣ́ти Тя́ трисвяты́ми гла́сы. Съ ни́миже пріими́ и на́съ, воспѣва́ющихъ Твою́ бла́гость.

Еди́но непрело́жное, Тро́ичное, сообра́зное, Еди́нственное Богонача́ліе пою́ще, мо́лимъ Тя́ те́плѣ, грѣхо́въ мно́гихъ низпосла́ти ны́нѣ на́мъ проще́ніе.

Сла́ва: Уме Безнача́льный, Отче, сообра́зный Бо́жій Сло́ве и Ду́ше Боже́ственный, благíй и пра́вый, воспѣва́ющія вѣ́рно Твою́ держа́ву соблюди́, я́ко Благоутро́бенъ.

И ны́нѣ, богоро́диченъ: Па́жить потреби́ тли́, человѣ́къ по существу́ бы́въ Бо́гъ мо́й во утро́бѣ Твое́й, Чи́стая, и родонача́льники пре́ждняго осужде́нія Еди́нъ свободи́.

Го́споди, поми́луй, три́жды.

Сѣда́ленъ, гла́съ 6. Подо́бенъ: Еже о на́съ…
Влады́ко Бо́же, при́зри съ небесе́ и ви́ждь на́ше смире́ніе, я́ко Ще́дръ, и умилосе́рдися, Человѣколю́бче Преблагíй, ни отку́ду бо надѣ́емся проще́ніе получи́ти злы́хъ, и́миже согрѣши́хомъ. Тѣ́мже бу́ди съ на́ми, и никто́же на ны́.

Сла́ва, и ны́нѣ, богоро́диченъ:
Влады́чице Чи́стая, при́зри, Богоро́дице, ви́ждь на́шихъ я́звъ болѣ́зни, и умилосе́рдися, Пречи́стая, и исцѣли́ со́вѣстное жже́ніе, Твое́ю ми́лостію ороша́ющи и вопію́щи рабо́мъ Твои́мъ: Азъ е́смь съ ва́ми, и никто́же на вы́.

Пѣ́снь 4.
Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Возвыша́яй мы́сль, Еди́нице Трисвѣ́тлая, и ду́шу и се́рдце Твои́хъ пѣве́цъ ско́ро возведи́ и сія́нія Твоего́ и свѣ́тлости сподо́би.

Претвори́ и преобрази́ отъ зло́бы мя́ вся́кія къ добродѣ́тели, Еди́на неизображе́нная и неизмѣ́нная Тро́ице, и Твои́ми заря́ми просвѣти́.

Сла́ва: Помы́сливъ пре́жде, му́дрѣ соста́вилъ еси́ а́нгеловъ чи́ны служи́тельныя Твоея́ бла́гости, Тріѵпоста́сная Еди́нице, съ ни́миже пріими́ мою́ хвалу́.

И ны́нѣ, богоро́диченъ: Иже естество́мъ несозда́нный Бо́гъ присносу́щный, созда́нное воспріе́мъ человѣ́ческое естество́, возобрази́ во святѣ́й Твое́й утро́бѣ, Богоро́дице Приснодѣ́во.

Пѣ́снь 5.
Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Помышля́юще естество́ Богонача́льное, промысли́тельное и спаси́тельное всѣ́хъ су́щее, Владыко, трисвѣ́тлое же еди́но, къ Тебѣ́ у́тренюемъ, проще́нія прося́ще грѣхопаде́ній.

Отче, Безнача́льный Бо́же, и Соприсносу́щный Сы́не, и Ду́ше Святы́й, утверди́, Единонача́льная Тро́ице, Твоя́ пѣвцы́ и отъ вся́кія напа́сти изба́ви и ско́рби.

Сла́ва: Управля́яй сія́ньми Богодѣ́тельными, и къ благоугожде́нію Твоего́ Тріѵпоста́снаго Божества́, Со́лнце сла́вы, наставля́я мя́ при́сно, и Боже́ственнаго Ца́рствія сотвори́ прича́стника.

И ны́нѣ, богоро́диченъ: Иже вся́ нося́й и соблюда́яй всеси́льною Твое́ю руко́ю, Сло́ве Бо́жій Неизмѣ́нне, сохрани́ и соблюди́ Тя́ сла́вящія моли́твами Ро́ждшія Тя́ Богома́тере.

Пѣ́снь 6.
Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Прему́дрость и ра́зумъ, Богонача́ліе Трисвѣ́тлое, пѣвце́мъ Твои́мъ да́руй, и добро́ты луча́ми свѣтодѣ́тельныя Твоея́ бла́гости осіява́тися всѣ́хъ сподо́би. [Два́жды.]

Сла́ва: Свѣ́те Нераздѣ́льный по существу́, Трисія́нне, Вседержи́тельне, Непристу́пне, сердца́ озари́ вѣ́рно хва́лящихъ держа́ву Твою́ и къ Боже́ственнѣй любви́ впери́.

И ны́нѣ, богоро́диченъ: Въ Тя́ всели́ся, Приснодѣ́во, я́вѣ Вседержи́тель и Госпо́дь всѣ́хъ и Еди́ному Трисія́нному зра́ку Божества́ человѣ́ки покланя́тися научи́.

Го́споди, поми́луй, три́жды.

Сѣда́ленъ, гла́съ 6. Подо́бенъ: Еже о на́съ…
Отче и Сы́не со Ду́хомъ Святы́мъ! При́зри на ны́, вѣ́рою Тебѣ́ покланя́ющіяся и сла́вящія держа́ву Твою́, Благоутро́бне, со о́гненными бре́нніи, ино́го бо ра́звѣ Тебе́ не вѣ́мы, и возопíй пою́щимъ Тя́: Азъ е́смь съ ва́ми, и никто́же на вы́.

Сла́ва, и ны́нѣ, богоро́диченъ:
При́зри на ны́, Всепѣ́тая Богоро́дице, возсія́й просвѣще́ніе сердца́мъ омраче́ннымъ и озари́ ста́до Твое́, Пречи́стая, ели́ко бо хо́щеши и мо́жеши, я́ко Ма́ти су́щи Зижди́теля Твоего́, и возопíй моля́щимъ Тя́: Азъ е́смь съ ва́ми, и никто́же на вы́.

Крѣ́пкую мнѣ́ мы́сль устро́й, Трисвѣ́тлая начерта́ньми Еди́нице, е́же храни́ти и соблюда́ти Боже́ственныя за́повѣди Твоя́ и всегда́ пѣ́ти Тебѣ́ вѣ́рно: благослове́нъ еси́, Бо́же оте́цъ на́шихъ.

Яко то́ждествомъ естества́ пое́мый, неизрече́нно еди́нственный Бо́же, ли́цы же Тро́ицы нося́ число́, соблюди́ всѣ́хъ на́съ отъ разли́чныхъ искуше́ній и обстоя́ній.

Сла́ва: Соесте́ственна и соприсносу́щна сла́вимъ еди́наго Тя́ по существу́ Бо́га, сво́йствы неслія́ннѣ ѵпоста́сными, Тро́ице, разли́чное про́сто предлага́юще во зра́цѣ непремѣ́ннѣмъ я́вѣ.

И ны́нѣ, богоро́диченъ: Бо́гъ Пресу́щный прія́тъ, Пречи́стая, отъ чре́ва Твоего́ чи́стаго на́ше человѣколюбе́знѣ смѣше́ніе я́вѣ и всѣ́хъ научи́ вопи́ти: благослове́нъ еси́, Бо́же оте́цъ на́шихъ.

Очище́ніе прегрѣше́ній ско́ро пода́ждь ми́ и страсте́й многообра́зныхъ избавле́ніе, Сообра́зная Тро́ице, Еди́нице Тріѵпоста́сная, да Тя́ сла́влю во вся́ вѣ́ки.

Воли́тель ми́лости извѣ́ствованъ, я́ко Бо́гъ ми́лостивъ, всѣ́хъ поми́луй, трисвѣ́тлая Еди́нице и Тро́ице преблага́я, славосло́вящихъ Твое́ вели́чествіе.

Сла́ва: Отъ Свѣ́та присносу́щнаго Отца́ Свѣ́та соприсносу́щна ро́ждшася Сло́ва, со Ду́хомъ, исхо́днымъ Свѣ́томъ, вѣ́рою сла́вимъ и превозно́симъ во вся́ вѣ́ки.

И ны́нѣ, богоро́диченъ: Врача́ человѣ́комъ, Пречи́стая, родила́ еси́ всеси́льнаго Сло́ва, Христа́ Го́спода, прароди́тельныя я́звы всѣ́хъ исцѣля́юща, превознося́щихъ Его́ во вѣ́ки.

Пѣ́снь 9.
Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Зрѣ́ти чи́нове херуви́мстіи, Влады́ко, добро́ты Твоея́ сла́вы не могу́ще, кри́лы покрыва́ющеся, непреста́нно тро́ичную пѣ́снь вопію́тъ, тріѵпоста́сную Твоего́ Богонача́лія еди́нственнаго держа́ву сла́вяще.

Твоя́ сія́нія, Со́лнце незаходи́мое, Твои́хъ рабо́въ пода́ждь сердца́мъ, и просвѣти́ ду́ши, и изба́ви отъ мно́гихъ прегрѣше́ній, Еди́не Всеми́лостиве и Тріѵпоста́сне, и нетлѣ́нныя Твоея́ жи́зни на́съ сподо́би.

Сла́ва: Еже Свѣ́тъ единоче́стный, и трисо́лнечный, и свѣтодѣ́тельный, Божество́ су́щее, озари́ вѣ́рою Тя́ пою́щихъ, и отъ мра́чнаго изба́ви злодѣ́йства, и сподо́би свѣтлѣ́йшихъ Твои́хъ селе́ній, я́ко Преблагíй.

И ны́нѣ, богоро́диченъ: Прему́дрѣ человѣ́ка пре́жде созда́ Сы́нъ Тво́й, Дѣ́во, и истлѣ́вшаго обнови́ Тобо́ю, Всепѣ́тая, и Боже́ственнаго Свѣ́та зари́ невече́рнія всѣ́хъ испо́лни, Тя́ Богоро́дицу и́стинную вѣ́рою сла́вящихъ.

Посе́мъ припѣ́вы Григо́рія Синаи́та: Досто́йно е́сть… И про́чее Полу́нощницы, пи́сано въ концѣ́ кни́ги сея́.

ВЪ НЕДѢЛЮ НА УТРЕНИ,
По екса́ псалмѣ́хъ, Бо́гъ Госпо́дь, и яви́ся.., на гла́съ 6. И глаго́лемъ тропа́рь: Ангельскія си́лы на гро́бѣ Твое́мъ.., два́жды. Сла́ва, и ны́нѣ: Благослове́нную нарекíй Твою́ Ма́терь… И обы́чное стихосло́віе Псалти́ра.

По 1-мъ стихосло́віи сѣда́льны воскре́сны, гла́съ 6:
Гро́бу отве́рсту, а́ду пла́чущуся, Марíя вопія́ше ко скры́вшимся апо́столомъ: изыди́те, виногра́да дѣ́лателіе, проповѣ́дите воскресе́нія сло́во: воскре́се Госпо́дь, подая́ мíрови ве́лію ми́лость.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Го́споди, предстоя́ше гро́бу Твоему́ Марíя Магдали́на и пла́каше вопію́щи, вертогра́даря Тя́ мня́щи, глаго́лаше: гдѣ́ сокры́лъ еси́ вѣ́чный Живо́тъ? гдѣ́ положи́лъ еси́, Иже на престо́лѣ херуви́мстѣмъ [2]? Стрегу́щіи бо Сего́ отъ стра́ха омертвѣ́ша. Или́ Го́спода моего́ дади́те ми́, или́ со мно́ю возопíйте: Иже въ ме́ртвыхъ бы́въ и ме́ртвыя воскреси́въ, сла́ва Тебѣ́.

Сла́ва, и ны́нѣ, богоро́диченъ:
Преднапису́етъ Гедео́нъ зача́тіе, и сказу́етъ Дави́дъ рождество́ Твое́, Богоро́дице, сни́де бо, я́ко до́ждь на руно́, Сло́во во чре́во Твое́, и прозябла́ еси́ безъ сѣ́мене, земле́ свята́я, мíрови спасе́ніе, Христа́ Бо́га на́шего, Благода́тная.

По 2-мъ стихосло́віи сѣда́льны воскре́сны, гла́съ 6:
Живо́тъ во гро́бѣ возлежа́ше, и печа́ть на ка́мени надлежа́ше, я́ко Царя́ спя́ща, во́ини стрежа́ху Христа́; и враги́ Своя́ неви́димо порази́вый, воскре́се Госпо́дь.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Преднапису́етъ Іо́на гро́бъ Тво́й, и сказу́етъ Симео́нъ воста́ніе Боже́ственное, безсме́ртне Го́споди, соше́лъ бо еси́ я́ко ме́ртвъ во гро́бъ, разруши́вый а́дова врата́. Воскре́слъ же еси́ кромѣ́ тлѣ́нія я́ко Влады́ка, во спасе́ніе мíра, Христе́ Бо́же на́шъ, просвѣти́вый су́щія во тмѣ́.

Сла́ва, и ны́нѣ, богоро́диченъ:
Богоро́дице Дѣ́во, моли́ Сы́на Твоего́, во́лею пригвожде́ннаго на Крестѣ́ и воскре́сшаго изъ ме́ртвыхъ, Христа́ Бо́га на́шего, спасти́ся душа́мъ на́шимъ.

По непоро́чныхъ, ипакои́, гла́съ 6:
Во́льною и животворя́щею Твое́ю сме́ртію, Христе́, врата́ а́дова сокруши́въ, я́ко Бо́гъ, отве́рзлъ еси́ на́мъ дре́вній ра́й, и воскре́съ изъ ме́ртвыхъ, изба́вилъ еси́ отъ истлѣ́нія живо́тъ на́шъ.

Та́же степе́нна, гла́съ 6.

Антифо́нъ 1, и́хже повторя́юще пое́мъ:
На не́бо о́чи мои́ возвожу́ къ Тебѣ́, Сло́ве: уще́дри мя́, да живу́ Тебѣ́.

Поми́луй на́съ, уничиже́нныхъ, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху вся́кая всеспаси́тельная вина́: а́ще ко́ему Се́й по достоя́нію дхне́тъ, ско́ро взе́млетъ отъ земны́хъ, восперя́етъ, возраща́етъ, устроя́етъ горѣ́.
И ны́нѣ, то́йже.

Антифо́нъ 2:
Аще не Госпо́дь бы бы́лъ въ на́съ, никто́же отъ на́съ проти́ву возмо́глъ бы вра́жіимъ бра́немъ одолѣ́ти: побѣжда́ющіи бо отъ здѣ́ возно́сятся.

Зубы́ и́хъ да не я́та бу́детъ душа́ моя́, я́ко птене́цъ, Сло́ве. Увы́ мнѣ́! ка́ко и́мамъ отъ врага́ избы́ти, грѣхолюби́въ сы́й?

Сла́ва: Святы́мъ Ду́хомъ обоже́ніе всѣ́мъ, благоволе́ніе, ра́зумъ, ми́ръ и благослове́ніе: Равнодѣ́тельный бо е́сть Отцу́ и Сло́ву.
И ны́нѣ, то́йже.

Антифо́нъ 3:
Надѣ́ющіися на Го́спода враго́мъ стра́шни и всѣ́мъ ди́вни: горѣ́ бо зря́тъ.

Въ беззако́нія ру́къ свои́хъ пра́ведныхъ жре́бій, помо́щника Тя́ имѣ́я, Спа́се, не простира́етъ.

Сла́ва: Свята́го Ду́ха держа́ва на всѣ́хъ, Ему́же вы́шняя во́инства покланя́ются со вся́кимъ дыха́ніемъ до́льнимъ.
И ны́нѣ, то́йже.

Проки́менъ, гла́съ 6: Го́споди, воздви́гни си́лу Твою́* и пріиди́, во е́же спасти́ на́съ. Сти́хъ: Пасы́й Изра́иля, вонми́, наставля́яй, я́ко овча́, Іо́сифа. Вся́кое дыха́ніе… Сти́хъ: Хвали́те Бо́га во святы́хъ Его́… Ева́нгеліе воскре́сно. Воскре́сеніе Христо́во… Псало́мъ пятидеся́тый. И про́чая по ря́ду.

Кано́нъ воскре́сенъ, гла́съ 6:

Пѣ́снь 1.
Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Припѣ́въ: Сла́ва, Го́споди, свято́му Воскресе́нію Твоему́.

Распросте́ртыма дла́ньма на Крестѣ́ Оте́ческаго испо́лнилъ еси́ благоволе́нія, благíй Іису́се, вся́ческая. Тѣ́мже побѣ́дную пѣ́снь Тебѣ́ вси́ пои́мъ.

Стра́хомъ къ Тебѣ́, я́ко рабы́ня, сме́рть повелѣ́на приступи́, Влады́цѣ живота́, то́ю подаю́щему на́мъ безконе́чный живо́тъ и воскре́сеніе.

Богоро́диченъ: Своего́ пріе́мши Содѣ́теля, я́ко Са́мъ восхотѣ́, отъ безсѣ́меннаго Твоего́ чре́ва па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

Инъ кано́нъ, кре́стовоскре́сенъ.

Пѣ́снь 1.
Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Суди́лищу Пила́тову предстои́тъ хотя́, беззако́нному суду́, я́ко суди́мь Судія́, и отъ руки́ непра́вды по лицу́ зауша́ется Бо́гъ, Его́же трепе́щутъ земля́ и небе́сная.

Просте́рлъ еси́ Боже́ственнѣи дла́ни Твои́, Спа́се, на пречи́стѣмъ Твое́мъ и живоно́снѣмъ Крестѣ́, и собра́лъ еси́ язы́ки въ позна́ніе Твое́, Влады́ко, покланя́ющіяся, Го́споди, сла́вному Твоему́ распя́тію.

Крестобогоро́диченъ: Стоя́ше, сле́зъ исто́чники испуща́ющи, Пренепоро́чная при Крестѣ́ Твое́мъ, Спа́се, я́же отъ ребра́ Твоего́ ка́пли крове́й зря́щи, Христе́, и Твою́ безприкла́дную ми́лость сла́вящи.

Инъ кано́нъ, Пресвятѣ́й Богоро́дицѣ, его́же краестро́чіе: Ма́ти Бо́жія, незави́стную ми́ да́ждь благода́ть.

Пѣ́снь 1.
Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Прича́щшися Ева саду́ преслуша́ннаго бра́шна [3], кля́тву введе́; но сію́ разрѣ́шила еси́, Чи́стая, благослове́нія Нача́токъ, Христа́, ро́ждши.

Яже Би́сѣра отъ Боже́ственныя мо́лніи, Христа́, ро́ждши, страсте́й мои́хъ мглу́ и прегрѣше́ній смуще́ніе, Чи́стая, разжени́ свѣ́томъ Твоея́ свѣ́тлости.

Язы́ковъ Ча́яніе, Іа́ковъ изъ Тебе́ воплоща́емаго предзря́ше та́йно у́мныма очи́ма Бо́га, изба́вльшаго на́съ хода́тайствомъ Твои́мъ.

Оскудѣ́вшимъ князе́мъ отъ колѣ́на Іу́дова, Пречи́стая, Сы́нъ Тво́й и Бо́гъ, проше́дъ Во́ждь, надъ концы́ земны́ми ны́нѣ вои́стинну воцари́ся.

Катава́сія: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Бо́га распина́ема пло́тію зря́щи тва́рь, растаява́шеся стра́хомъ; но содержи́тельною дла́нію на́съ ра́ди Распя́таго крѣ́пко держи́ма бѣ́.

Сме́ртію сме́рть разоре́на лежи́тъ окая́нная безъ дыха́нія, Живота́ бо не терпя́щи Боже́ственнаго прираже́нія, умерщвля́ется крѣ́пкій [4], и да́руется всѣ́мъ воскре́сеніе.

Богоро́диченъ: Боже́ственнаго рождества́ Твоего́, Чи́стая, вся́кій естества́ чи́нъ превосхо́дитъ чу́до, Бо́га бо преесте́ственнѣ зачала́ еси́ во чре́вѣ и, ро́ждши, пребыва́еши при́сно Дѣ́ва.

Инъ.
Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Во гро́бѣ тридне́вствовавый воскреси́лъ еси́ животворя́щимъ Воста́ніемъ Твои́мъ пре́жде умерщвле́нныя, и осужде́нія разрѣши́вшеся ра́достно веселя́хуся, — се́ Избавле́ніе прише́лъ еси́, Го́споди, — взыва́юще.

Сла́ва Твоему́ Воста́нію, Спа́се на́шъ, я́ко на́съ отъ а́да тлѣ́нія и сме́рти изба́вилъ еси́, я́ко Всеси́ленъ, и пою́ще глаго́лемъ: нѣ́сть свя́тъ ра́звѣ Тебе́, Го́споди Человѣколю́бче.

Богоро́диченъ: Ты́ отъ Тебе́ Ро́ждшагося я́ко ви́дѣла еси́ уя́звлена копіе́мъ, уязви́лася еси́ се́рдцемъ, Пресвята́я Всенепоро́чная, и ужаса́ющися глаго́лала еси́: что́ Тебѣ́ воздаде́, Ча́до, наро́дъ пребеззако́нный!

Инъ.
Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тлѣ́нную мою́ пло́ть и сме́ртную, Всечи́стая Богома́ти, изъ чре́ва Твоего́ несказа́нно пріе́мь Благíй и обезтлѣ́нивъ сію́, вѣ́чнѣ Себѣ́ связа́лъ е́сть.

Бо́га воплоща́ема изъ Тебе́ зря́ще, Дѣ́во, ужаса́хуся стра́хомъ ли́цы а́нгельстіи и я́ко Ма́терь Бо́жію немо́лчными пѣ́сньми Тя́ почита́ютъ.

Ужасе́ся, го́ру у́мную ви́дѣвъ Тя́ проро́къ Даніи́лъ, изъ нея́же Ка́мень отсѣче́ся кромѣ́ ру́къ, и де́монская ка́пища, Богома́ти, крѣ́пко сокруши́.

Не мо́жетъ сло́во Тя́ человѣ́ческое, ниже́ язы́къ, Дѣ́во, похвали́ти досто́йно, изъ Тебе́ бо безъ сѣ́мене Жизнода́вецъ Христо́съ воплоти́тися, Пречи́стая, благоволи́.

Дре́во процвѣло́ е́сть, Христе́, и́стинныя жи́зни, Кре́стъ бо водрузи́ся, и напое́нъ бы́въ кро́вію и водо́ю отъ нетлѣ́ннаго Твоего́ ребра́, живо́тъ на́мъ прозябе́.

Не ктому́ змíй мнѣ́ ло́жнѣ обоже́ніе подлага́етъ, Христо́съ бо, Богодѣ́латель человѣ́ческаго естества́, ны́нѣ невозбра́нно стезю́ живота́ мнѣ́ отве́рзе.

Богоро́диченъ: Яко вои́стинну неизвѣща́нна и непостижи́ма, я́же Твоего́ боголѣ́пнаго, Богоро́дице, су́ть Рождества́, су́щимъ на земли́ и на небеси́, Приснодѣ́во, та́инства.

Инъ.
Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Честны́й Кре́стъ Тво́й почита́емъ и гво́зди, Христе́, и свято́е копіе́ съ тро́стію, вѣне́цъ и́же отъ те́рній, и́миже отъ а́дова истлѣ́нія изба́вихомся.

Гро́бъ, Cпа́се, Тя́ подъя́тъ во́лею ме́ртва о на́съ я́вльшагося, но ника́коже возмо́же, Сло́ве, удержа́ти, я́ко Бо́гъ бо воскре́слъ еси́, спаса́я ро́дъ на́шъ.

Крестобогоро́диченъ: Богороди́тельнице Приснодѣ́во, Спа́са Христа́ человѣ́комъ ро́ждшая, отъ бѣ́дъ и му́къ изба́ви на́съ, прибѣга́ющихъ вѣ́рою къ боже́ственному покро́ву Твоему́.

Инъ.
Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Пое́мъ, Пречи́стая, Тебе́ Всенепоро́чную, и́же Тобо́ю спа́сшіися, и благоче́стно пою́ще взыва́емъ: благослове́нна, Яже Бо́га, Приснодѣ́во, ро́ждшая.

Свѣ́тъ незаходи́мый, Дѣ́во, родила́ еси́, су́щимъ во тмѣ́ житія́ пло́тію свѣтя́щь, Всеблаже́нная, и пою́щимъ Тя́, ра́дость, Приснодѣ́во, источи́ла еси́.

Благода́ть процвѣте́, зако́нъ преста́ Тобо́ю, Всесвята́я, Ты́ бо, Чи́стая, родила́ еси́ Го́спода, подаю́щаго на́мъ, Приснодѣ́во, оставле́ніе.

Ме́ртва мя́ показа́ сада́ вкуше́ніе, Жи́зни же Дре́во изъ Тебе́ я́вльшееся, Пречи́стая, воскреси́ и ра́йскія сла́дости наслѣ́дника мя́ устро́и.

Уступа́ютъ мнѣ́ херуви́ми ны́нѣ, и пла́менное ору́жіе, Влады́ко, плещи́ мнѣ́ дае́тъ, Тя́ ви́дѣвше, Сло́ве Бо́жій, и́стиннаго Бо́га, разбо́йнику пу́ть сотво́ршаго въ ра́й.

Не ктому́ бою́ся е́же въ зе́млю, Влады́ко Христе́, возвраще́нія, Ты́ бо отъ земли́ мя́ возве́лъ еси́ забве́нна, благоутро́бія ра́ди мно́гаго, къ высотѣ́ нетлѣ́нія Воскре́сеніемъ Твои́мъ.

Богоро́диченъ: Иже Богоро́дицу Тя́ отъ души́, Влады́чице мíра Блага́я, исповѣ́дающихъ спаси́, Тебе́ бо предста́тельство непобори́мое и́мамы, и́стинную Богороди́тельницу.

Инъ.
Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Снѣ́дію дре́ва во Еде́мѣ прельсти́выйся въ тлю́ поползе́ родонача́льникъ, преслу́шавый, Го́споди, за́повѣди Твоя́, Преблагíй, но сего́ Кресто́мъ па́ки возве́лъ еси́ въ пе́рвую добро́ту, послушли́въ Отцу́, Спа́се, бы́вый.

Твое́ю сме́ртію, Бла́же, сме́рти потреби́ся держа́ва, исто́чникъ жи́зни на́мъ источи́, и безсме́ртіе дарова́ся. Сего́ ра́ди погребе́нію Твоему́ и Воскре́сенію вѣ́рою покланя́емся, и́мже, я́ко Бо́гъ, мíръ ве́сь просвѣти́лъ еси́.

Крестобогоро́диченъ: Живы́й на небесѣ́хъ и Творе́цъ всѣ́хъ Госпо́дь во Твою́, Всенепоро́чная, всели́ся неизрече́нно утро́бу, просла́вивый Тя́ превы́шшую небе́съ и святѣ́йшую чино́въ невеще́ственныхъ. Тѣ́мже ны́нѣ и́же на земли́ Тя́ ублажа́емъ.

Инъ.
Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Чистото́ю возсія́вши свѣ́тло, Боже́ственное пребыва́ніе Влады́ки, Всепѣ́тая, была́ еси́. Ты́ бо еди́на Ма́ти Бо́жія яви́лася еси́, во объя́тіихъ, я́ко Младе́нца, Сего́ носи́вши.

Нося́щи добро́ту у́мную краснѣ́йшія Твоея́ души́, Невѣ́ста Бо́жія была́ еси́, запеча́тствована дѣ́вствомъ, Чи́стая, и свѣ́томъ чистоты́ мíръ просвѣща́ющи.

Да рыда́етъ собра́ніе злочести́выхъ, не проповѣ́дающихъ Тя́ я́вѣ Чи́стую Богома́терь, Ты́ бо врата́ Бо́жія свѣ́та яви́лася еси́ на́мъ, мра́къ прегрѣше́ній разгоня́ющи.

Распина́емь, Влады́ко, гвоздьми́ у́бо кля́тву ю́же на на́съ потреби́лъ еси́; копіе́мъ же пробода́емь въ ребро́, Ада́мово рукописа́ніе растерза́въ, мíръ свободи́лъ еси́.

Ада́мъ низведе́ся, ле́стію запя́тъ бы́въ, ко а́довѣ про́пасти; но Иже естество́мъ Бо́гъ же и ми́лостивъ, сше́лъ еси́ на взыска́ніе и, на ра́му поне́съ, совоскреси́лъ еси́.

Богоро́диченъ: Пречи́стая Влады́чице, ро́ждшая человѣ́комъ Ко́рмчію, Го́спода, страсте́й мои́хъ непостоя́нное и лю́тое утоли́ смуще́ніе и тишину́ пода́ждь се́рдцу моему́.

Инъ.
Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Христоубíйца и пророкоубíйца бы́сть евре́йское мно́жество: я́ко бо проро́ки дре́вле, Истины су́щія та́йныя лучи́, уби́ти не убоя́ся, си́це и ны́нѣ Го́спода, Его́же проповѣ́даху они́ тогда́, за́вистію влеко́ми уби́ша. Но на́мъ бы́сть живо́тъ умерщвле́ніе Его́.

Ятъ бы́лъ еси́, но не удержа́нъ, Спа́се, во гро́бѣ, а́ще бо и во́лею вкуси́лъ еси́ сме́рти, Сло́ве, но воскре́слъ еси́ я́ко Бо́гъ безсме́ртенъ, совоздви́гнувый у́зники, су́щія во а́дѣ, и ра́дость жена́мъ вмѣ́сто печа́ли пре́жнія па́ки премѣни́вый.

Богоро́диченъ: Безче́стенъ Тво́й и ску́денъ яви́ся ви́дъ плотскíй па́че человѣ́ковъ во вре́мя Стра́сти, и́бо Божества́ существо́мъ, Красе́нъ добро́тою Дави́ду показа́ся. Но жезло́мъ Твоего́ Ца́рствія враго́въ сотры́й крѣ́пость, — глаго́лаше, Чи́стая, — о Сы́не мо́й и Бо́же, отъ гро́ба воста́ни!

Инъ.
Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Вели́кій преднаписа́ во проро́цѣхъ Моисе́й Тя́, ковче́гъ, и трапе́зу, и свѣ́щникъ, и ру́чку, обра́зно назна́менуя воплоще́ніе е́же изъ Тебе́ Вы́шняго, Ма́ти Дѣ́во.

Умерщвля́ется сме́рть, и тлѣ́ніе упражня́ется Ада́мова осужде́нія, о Влады́чице, Плоду́ Твоему́ прирази́вшееся, Жи́знь бо родила́ еси́, отъ истлѣ́нія избавля́ющую пою́щихъ Тя́.

Зако́нъ изнемо́же и сѣ́нь ми́мо и́де, па́че ума́ и смы́сла я́вльшейся ми́ благода́ти, е́же отъ Тебе́, Дѣ́во, рождества́ Бо́га и Спа́са, Многопѣ́тая.

Конда́къ, гла́съ 6:
Живонача́льною дла́нію уме́ршія отъ мра́чныхъ удо́лій Жизнода́вецъ воскреси́въ всѣ́хъ, Христо́съ Бо́гъ, воскре́сеніе подаде́ человѣ́ческому ро́ду, е́сть бо всѣ́хъ Спаси́тель, Воскре́сеніе и Живо́тъ, и Бо́гъ всѣ́хъ.

Икосъ:
Кре́стъ и погребе́ніе Твое́, Жизнода́вче, воспѣва́емъ вѣ́рніи и покланя́емся, я́ко а́дъ связа́лъ еси́, Безсме́ртне, я́ко Бо́гъ Всеси́льный, и ме́ртвыя совоскреси́лъ еси́, и врата́ сме́ртная сокруши́лъ еси́, и держа́ву а́дову низложи́лъ еси́, я́ко Бо́гъ. Тѣ́мже земноро́дніи славосло́вимъ Тя́ любо́вію, воскре́сшаго, и низложи́вшаго вра́жію держа́ву всепа́губную, и всѣ́хъ воскреси́вшаго въ Тя́ вѣ́ровавшихъ, и мíръ изба́вльшаго отъ стрѣ́лъ зміи́ныхъ и отъ пре́лести вра́жія, я́ко Бо́гъ всѣ́хъ.

Рыда́ющее во Стра́сти Твое́й со́лнце во мра́къ облече́ся, и во дни́ по все́й, Влады́ко, земли́ свѣ́тъ поме́рче, вопія́: благослове́нъ еси́, Бо́же оте́цъ на́шихъ.

Облеко́шася, Христе́, схожде́ніемъ Твои́мъ во свѣ́тъ преиспо́дняя, пра́отецъ же весе́лія испо́лнь яви́ся ликовству́я, взыгра́ся вопія́: благослове́нъ еси́, Бо́же оте́цъ на́шихъ.

Богоро́диченъ: Тобо́ю, Ма́ти Дѣ́во, свѣ́тъ возсія́ все́й вселе́ннѣй свѣ́тлый, Зижди́теля бо Ты́ всѣ́хъ родила́ еси́ Бо́га. Его́же проси́, Всечи́стая, на́мъ низпосла́ти, вѣ́рнымъ, ве́лію ми́лость.

Инъ.
Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

О, стра́ннаго о́браза! Изра́иля Избавле́й отъ рабо́ты фарао́нскія, распина́ется во́лею отъ него́ и разрѣша́етъ вери́ги согрѣше́ній. Ему́же вѣ́рою пое́мъ: Изба́вителю Бо́же, благослове́нъ еси́.

Тебе́, Спа́са, на Ло́бнѣмъ распя́ша пребеззако́нныхъ о́троцы нечести́віи, врата́ мѣ́дная и вереи́ сломи́вшаго во спасе́ніе на́съ, пою́щихъ: Изба́вителю Бо́же, благослове́нъ еси́.

Богоро́диченъ: Евы дре́внія Свобожде́ніе ро́ждшая, отъ кля́твы разрѣша́еши Ада́ма, Дѣ́во Чи́стая. Тѣ́мже со а́нгелы Тя́ съ Сы́номъ Твои́мъ пое́мъ и вопіе́мъ: Изба́вителю Бо́же, благослове́нъ еси́.

Инъ.
Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Юношъ тріе́хъ пе́щь не опали́, рождество́ прообразу́ющихъ Твое́, Боже́ственный бо Огнь Тебе́ не опали́въ, всели́ся въ Тя́ и вся́ научи́ вопи́ти: благослове́нъ еси́, Бо́же оте́цъ на́шихъ.

Блажа́тъ концы́ Тя, Всечи́стая Ма́ти, я́коже прорекла́ еси́, просвѣща́еми свѣтолу́чными сія́ньми Твои́ми, и благода́тію пою́ще, вопію́тъ: благослове́нъ еси́, Бо́же оте́цъ на́шихъ.

Па́губныя у́бо зу́бы въ мя́ вонзе́ змíй лука́внѣйшій, но Са́мъ [5] Тво́й, Богома́ти, сокруши́ Сы́нъ, крѣ́пость же мнѣ́ даде́ вопи́ти: благослове́нъ еси́, Бо́же оте́цъ на́шихъ.

Очисти́лище естества́ Ты́ еси́ еди́на Богоблаже́нная, на ра́му бо херуви́мску сѣдя́щаго Бо́га во объя́тіихъ нося́щи, вопіе́ши: благослове́нъ еси́, Бо́же оте́цъ на́шихъ.

Іуде́йскія дре́вле пророкоубíйцы лю́ди, богоубíйцы за́висть ны́нѣ содѣ́ла, Тебе́ на Кре́стъ возне́сшія, Сло́ве Бо́жій, Его́же превозно́симъ во вся́ вѣ́ки.

Небе́снаго кру́га не оста́вилъ еси́, и во а́дъ соше́дъ, всего́ совоздви́глъ еси́ лежа́щаго во гно́ищи, Христе́, человѣ́ка, Тя́ превознося́ща во вся́ вѣ́ки.

Богоро́диченъ: Отъ Свѣ́та Свѣтода́вца Сло́ва зачала́ еси́, и ро́ждши неизрече́нно Сего́, просла́вилася еси́, Ду́хъ бо въ Тя́, Отрокови́це, Бо́жій всели́ся. Тѣ́мже Тя́ пое́мъ во вся́ вѣ́ки.

Инъ.
Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Ужасе́ся вся́къ слу́хъ, ка́ко Вы́шній во́лею пріи́де на зе́млю, а́дову крѣ́пость разруши́ти кресто́мъ и погребе́ніемъ, и вся́ воздви́гнути зва́ти: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Преста́ а́дово мучи́тельство, и ца́рство уничижи́ся про́чее, на Крестѣ́ бо на земли́ водру́зився Иже надъ всѣ́ми Бо́гъ, сего́ могу́тство низложи́. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

О, неизрече́ннаго Твоего́, Христе́, человѣколю́бія и неизглаго́ланныхъ бла́гъ! Мене́ бо ви́дя погиба́юща во а́довѣ темни́цѣ, Стра́сти претерпѣ́вый изба́вилъ еси́. Тѣ́мже Тя́ благослови́мъ, всѣ́хъ Влады́ку, и превозно́симъ во вся́ вѣ́ки.

Инъ.
Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Позлаще́ною ри́зою, я́коже Цари́цу, Сы́нъ Тво́й просвѣти́въ заре́ю Ду́ха, Тебе́ одесну́ю Себе́ поста́ви, Пречи́стая, Его́же превозно́симъ во вся́ вѣ́ки.

Иже хотѣ́ніемъ еди́нымъ мíръ водрузи́вый, отъ пречи́стыя Твоея́ утро́бы пло́ть взе́млетъ, свы́ше сію́ назда́ти хотя́, Его́же превозно́симъ во вся́ вѣ́ки.

Счета́ніемъ Сло́ва ко мнѣ́, человѣ́ку, Боже́ственное жили́ще была́ еси́, Пречи́стая, просія́вши я́вѣ дѣ́вства свѣ́тлостію, тѣ́мже Тя́ пое́мъ во вся́ вѣ́ки.

Златоза́рный Тя́ свѣ́щникъ предвообрази́, пріе́мшую несказа́нно Свѣ́тъ непристу́пный, ра́зумомъ Свои́мъ озаря́ющь вся́ческая. Тѣ́мже Тя́ пое́мъ, Чи́стая, во вѣ́ки.

Та́же пое́мъ пѣ́снь Богоро́дицы: Вели́читъ душа́ Моя́ Го́спода.., съ припѣ́вомъ: Честнѣ́йшую херуви́мъ…

Страсте́й неприча́стенъ Ты́ пребы́лъ еси́, Сло́ве Бо́жій, пло́тію пріобщи́вся Страсте́мъ; но рѣши́ши отъ страсте́й человѣ́ка, страсте́мъ бы́въ стра́сть, Спа́се на́шъ, еди́нъ бо еси́ безстра́стенъ и всеси́ленъ.

Тлю́ сме́ртную пріе́мь, тлѣ́нія соблю́лъ еси́ Тѣ́ло Твое́ невку́сно, Твоя́ же животворя́щая и Боже́ственная, Влады́ко, Душа́, во а́дѣ не оста́влена бы́сть, но я́коже отъ сна́ воскре́съ, на́съ совоздви́глъ еси́.

Тро́иченъ: Бо́га Отца́, Сы́на собезнача́льна, вси́ человѣ́цы устна́ми у́бо чи́стыми сла́вимъ, неизрече́нную же и пресла́вную Ду́ха Всесвята́го си́лу чти́мъ, Еди́на бо еси́ всеси́льная Тро́ица неразлу́чная.

Инъ.
Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Аще и во гро́бъ соше́лъ еси́, я́ко ме́ртвъ, Жизнода́вче, но а́дову крѣ́пость разруши́лъ еси́, Христе́, совоздви́гнувъ ме́ртвыя, я́же и поглоти́, и воскре́сеніе всѣ́мъ по́далъ еси́, я́ко Бо́гъ, вѣ́рою и любо́вію Тя́ велича́ющимъ.

Да ра́дуется тва́рь и да процвѣте́тъ, я́ко кри́нъ, Христо́съ бо отъ ме́ртвыхъ воста́, я́ко Бо́гъ. Гдѣ́ твое́, сме́рте, ны́нѣ жа́ло? — воззове́мъ. — Гдѣ́ Твоя́, а́де, побѣ́да? Низложи́ тя́ въ зе́млю Возвы́сивый ро́гъ на́шъ, я́ко Благоутро́бенъ.

Крестобогоро́диченъ: Но́сиши Нося́щаго вся́ и держи́ши, я́ко Младе́нца, въ рука́хъ изъ руки́ Избавля́ющаго на́съ бори́теля врага́, Пречи́стая Влады́чице, и ви́диши на Кре́стъ дре́ва Возвыша́ема отъ ро́ва зло́бы на́съ Возвы́сивша.

Инъ.
Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Звѣзда́, сія́ющи заря́ми Божества́, отъ Іа́кова, отъ мра́ка содержи́мымъ возсія́, Тобо́ю бо, Всечи́стая, Христо́съ Бо́гъ, Сло́во воплоще́нно, Имже просвѣща́еми, съ небе́сными во́и Тя́ ублажа́емъ.

Укрѣ́плься си́лою Твое́ю и благода́тію, Тебѣ́ пѣ́снь усе́рдно отъ се́рдца возложи́хъ; но сію́ пріими́, Дѣ́во Чи́стая, благода́ть воздаю́щи Твою́ многосвѣ́тлую отъ нетлѣ́нныхъ сокро́вищъ, Богоблаже́нная.

Поста́въ показа́лася еси́ я́вѣ Божества́, въ не́мже ри́зу тѣлесе́ Сло́во истка́, богосодѣ́лавъ мо́й, Дѣ́во, зра́къ, въ него́же обле́кся, всѣ́хъ спасе́, отъ смы́сла чи́ста Тебе́ велича́ющихъ.

Ме́ртвымъ воскре́сеніе ны́нѣ дарова́ся Твои́мъ несказа́ннымъ и неизрече́ннымъ Рождество́мъ, Богоро́дице Всечи́стая, Жи́знь бо, изъ Тебе́ пло́тію обле́кшися, всѣ́мъ возсія́ и сме́ртную дря́хлость я́вѣ разруши́.

По катава́сіи ектенія́ ма́лая. Та́же: Свя́тъ Госпо́дь Бо́гъ на́шъ… Ексапостила́рій у́тренній.

На хвали́техъ стихи́ры воскре́сны, гла́съ 6:

Сти́хъ: Сотвори́ти въ ни́хъ су́дъ напи́санъ, сла́ва сія́ бу́детъ всѣ́мъ преподо́бнымъ Его́.

Кре́стъ Тво́й, Го́споди, жи́знь и воскресе́ніе лю́демъ Твои́мъ е́сть; и надѣ́ющеся на́нь, Тебе́, воскре́сшаго Бо́га на́шего пое́мъ, поми́луй на́съ.

Сти́хъ: Хвали́те Бо́га во святы́хъ Его́, хвали́те Его́ во утвержде́ніи си́лы Его́.

Погребе́ніе Твое́, Влады́ко, ра́й отве́рзе ро́ду человѣ́ческому; и отъ истлѣ́нія изба́вльшеся, Тебе́, воскре́сшаго Бо́га на́шего пое́мъ, поми́луй на́съ.

Сти́хъ: Хвали́те Его́ на си́лахъ Его́, хвали́те Его́ по мно́жеству вели́чествія Его́.

Со Отце́мъ и Ду́хомъ Христа́ воспои́мъ, воскре́сшаго изъ ме́ртвыхъ, и къ Нему́ возопіи́мъ: Ты́ Живо́тъ еси́ на́шъ и Воскресе́ніе, поми́луй на́съ.

Сти́хъ: Хвали́те Его́ во гла́сѣ тру́бнѣмъ, хвали́те Его́ во псалти́ри и гу́слехъ.

Тридне́венъ воскре́слъ еси́, Христе́, отъ гро́ба, я́коже пи́сано е́сть, совоздви́гнувый пра́отца на́шего. Тѣ́мже Тя́ и сла́витъ ро́дъ человѣ́ческій и воспѣва́етъ Твое́ воскресе́ніе.

Ины стихи́ры, восто́чны [анато́ліевы]:

Сти́хъ: Хвали́те Его́ въ тимпа́нѣ и ли́цѣ, хвали́те Его́ во стру́нахъ и орга́нѣ.

Го́споди, ве́ліе и стра́шно е́сть Твоего́ воскре́сенія та́инство! Та́ко бо произше́лъ еси́ отъ гро́ба, я́ко жени́хъ отъ черто́га, сме́ртію сме́рть разруши́вый, да Ада́ма свободи́ши. Тѣ́мже на небесѣ́хъ а́нгели ликовству́ютъ и на земли́ человѣ́цы сла́вятъ е́же на на́съ бы́вшее благоутро́біе Твое́, Человѣколю́бче.

Сти́хъ: Хвали́те Его́ въ кимва́лѣхъ доброгла́сныхъ, хвали́те Его́ въ кимва́лѣхъ восклица́нія. Вся́кое дыха́ніе да хва́литъ Го́спода.

О, пребеззако́нніи іуде́е! Гдѣ́ су́ть печа́ти и сре́бреницы, я́же да́сте во́иномъ? Не укра́дено бы́сть Сокро́вище, но воскре́се, я́ко Си́ленъ. Са́ми же посрами́стеся отве́ргшіися Христа́, Го́спода сла́вы, пострада́вша, и погребе́нна, и воскре́сша изъ ме́ртвыхъ. Тому́ поклони́мся.

Сти́хъ: Воскресни́, Го́споди Бо́же мой, да вознесе́тся рука́ Твоя́, не забу́ди убо́гихъ Твои́хъ до конца́.

Запеча́тану гро́бу, ка́ко окра́дени бы́сте, іуде́е, стра́жы поста́вльше, и зна́менія поло́жше? Две́ремъ заключе́ннымъ про́йде Ца́рь. Или́ я́ко ме́ртва предста́вите, или́ я́ко Бо́гу поклони́теся, съ на́ми пою́ще: сла́ва, Го́споди, Кресту́ Твоему́ и Воскре́сенію Твоему́.

Сти́хъ: Исповѣ́мся Тебѣ́, Го́споди, всѣ́мъ се́рдцемъ мои́мъ, повѣ́мъ вся́ чудеса́ Твоя́.

Живопрія́тнаго Твоего́ гро́ба мѵроно́сицы жены́ рыда́юща достиго́ша, Го́споди, и мѵ́ра нося́ща, Тѣ́ло Твое́ пречи́стое пома́зати иска́ху. Обрѣто́ша же свѣтоно́сна а́нгела, на ка́мени сѣдя́ща и къ ни́мъ вѣща́юща и глаго́люща: что́ слезите́ изъ ре́бръ Источи́вшаго жи́знь мíрови? Что́ и́щете я́ко ме́ртва во гро́бѣ Безсме́ртнаго? Те́кша же па́че возвѣсти́те Того́ ученико́мъ сла́внаго Его́ Воскре́сенія всемíрное ра́дованіе. Имже и на́съ, Спа́се, просвѣти́вый, да́руй очище́ніе и ве́лію ми́лость.

Сла́ва, стихи́ра у́тренняя ева́нгельская. И ны́нѣ: Преблагослове́нна еси́… Славосло́віе вели́кое.

Та́же тропа́рь воскре́сенъ:
Воскре́съ изъ гро́ба и у́зы растерза́лъ еси́ а́да, разруши́лъ еси́ осужде́ніе сме́рти, Го́споди, вся́ отъ сѣте́й врага́ изба́вивый; яви́вый же Себе́ апо́столомъ Твои́мъ, посла́лъ еси́ я́ на про́повѣдь, и тѣ́ми ми́ръ Тво́й по́далъ еси́ все́й вселе́ннѣй, еди́не Многоми́лостиве.

Та́же, ектеніи́. И отпу́стъ.

НА ЛИТУРГІИ,

Блаже́нна, гла́съ 6:
Помяни́ мя́, Бо́же, Спа́се мо́й, егда́ пріи́деши во Ца́рствіи Твое́мъ, и спаси́ мя́, я́ко еди́нъ Человѣколю́бецъ.

Сти́хъ: Блаже́ни чи́стіи се́рдцемъ, я́ко тíи Бо́га у́зрятъ.

Дре́вомъ Ада́ма прельсти́вшагося, Дре́вомъ Кре́стнымъ па́ки спа́слъ еси́, и разбо́йника, вопію́ща: помяни́ мя́, Го́споди, во Ца́рствіи Твое́мъ.

Сти́хъ: Блаже́ни миротво́рцы, я́ко тíи сы́нове Бо́жіи нареку́тся.

Адова врата́ и вереи́ сокруши́вый, Жизнода́вче, воскреси́лъ еси́ вся́, Спа́се, вопію́щія: сла́ва Воста́нію Твоему́.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Помяни́ мя́, Иже сме́рть Плѣни́вый погребе́ніемъ Твои́мъ, и Воскресе́ніемъ Твои́мъ ра́дости вся́ испо́лнивый, я́ко Благоутро́бенъ.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Мѵроно́сицы, ко гро́бу прише́дша, а́нгела зову́ща слы́шаху: Христо́съ воскре́се, просвѣти́вый вся́ческая.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

На Дре́вѣ Кре́стнѣмъ пригвозди́вшагося и мíръ отъ пре́лести изба́вльшаго, согла́сно вси́ Христа́ воспои́мъ.

Сла́ва, тро́иченъ: Отца́ и Сы́на славосло́вимъ и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́нѣ, богоро́диченъ: Неизрече́нно въ послѣ́дняя заче́нши и ро́ждши Созда́теля Твоего́, Дѣ́во, спаса́й Тя́ велича́ющія.

Проки́менъ, гла́съ 6: Спаси́, Го́споди, лю́ди Твоя́* и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, да не премолчи́ши отъ мене́. Аллилу́ія, [гла́съ 6]: Живы́й въ по́мощи Вы́шняго въ кро́вѣ Бо́га небе́снаго водвори́тся. Сти́хъ: Рече́тъ Го́сподеви: Засту́пникъ мо́й еси́ и Прибѣ́жище мое́, Бо́гъ мо́й и упова́ю на Него́.

Примѣчанія:

[1] Воскресе́ніе.
[2] Херуви́мстѣмъ сѣдя́щаго.
[3] Еже са́да преслуша́ннаго бра́шна.
[4] Крѣ́пкая.
[5] Сія́.

Источникъ: Окто́ихъ, си́рѣчь Осмогла́сникъ, съ 5-го гла́са по 8-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 85 об. – 101.

Свързани