НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры на 8, гла́съ 2:
Пріиди́те, вѣ́рніи, пѣ́сньми почти́мъ пречу́дную Евфроси́нію, при́сную о на́съ къ Бо́гу моли́твенницу, усе́рдно взыва́юще: ра́дуйся, оби́тели сея́ вѣ́рное охране́ніе, гра́да на́шего вѣ́рный покро́ве и всѣ́мъ христіа́номъ ско́рое вспоможе́ніе и заступле́ніе. [Три́жды.]
Пресла́вная Евфроси́ніе, престо́лу предстоя́ Вседержи́теля, при́зри на на́съ, съ любо́вію па́мять твою́ соверша́ющихъ, и ми́лостивно пріи́мши хвале́бная на́ша тебѣ́ пѣснопѣ́нія, ми́лостивнымъ о́комъ всегда́ взира́ти на на́съ сотвори́ Влады́ку на́шего и Го́спода. [Три́жды.]
Ве́сь гра́дъ и вся́ страна́, ны́нѣ сте́кшеся въ хра́мъ тво́й, те́плая къ тебѣ́ обраща́ютъ сердца́, ча́юще твои́ми моли́твами получи́ти грѣхо́въ оставле́ніе, въ добродѣ́телехъ преспѣ́яніе, вре́менное благоде́нствіе и вѣ́чное спасе́ніе. Ты́ же, я́ко ми́лостивая ма́ти, собо́ръ се́й пра́зднственный ра́достно пріе́млющи, ра́дости испо́лни сердца́ на́ша, я́ко ра́дости тезоимени́тая. [Два́жды.]
Сла́ва, гла́съ 8:
Всечестна́я и чудотво́рная ра́ка моще́й твои́хъ, я́ко со́лнце второ́е возсія́ во гра́дѣ на́шемъ, оби́льно источа́я исцѣле́нія и всѣ́хъ привлека́я къ чествова́нію и́мене твоего́. Тѣ́мже и ны́нѣ, собра́вшеся въ хра́мъ се́й, ублажа́емъ тя́, преподо́бная, и моли́ся, мо́лимся, спасти́ся душа́мъ на́шимъ.
И ны́нѣ, богоро́диченъ, [гла́съ то́йже:
Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].
Та́же вхо́дъ. Проки́менъ дне́. Чте́нія три́.
Прему́дрости Соломо́ни чте́ніе.
Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
Прему́дрости Соломо́ни чте́ніе.
Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.
Прему́дрости Соломо́ни чте́ніе.
Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.
На литíи стихи́ры хвали́тны.
На стихо́внѣ стихи́ры, гла́съ 5:
Отъ плотска́го обру́чника свобо́ду пріи́мши, Христу́ Го́споду уневѣ́стилася еси́, преподо́бная, вмѣ́сто бога́тства избра́въ нищету́, вмѣ́сто сласте́й — вся́кое воздержа́ніе, вмѣ́сто поко́я — тру́дъ, моли́тву и бдѣ́ніе. Тѣ́мже и въ черто́гъ Того́ съ му́дрыми дѣ́вами прія́та бы́ти сподо́билася еси́, идѣ́же веселя́щися не преста́й моли́тися и о чту́щихъ па́мять твою́ вѣ́рно.
Сти́хъ: Восхва́лятся преподо́бніи во сла́вѣ [и возра́дуются на ло́жахъ свои́хъ].
Пріиди́те, вси́ люби́тели дѣ́вства и чистоты́ рачи́тели, согла́сно воспои́мъ Евфроси́нію пресла́вную: изъ дѣ́вства бо возлюби́въ чистоту́, чи́стое дѣ́вства сокро́вище до конца́ сохрани́ла е́сть, тѣле́сную красоту́ по́стническими труды́ увяди́въ, ду́шу же украси́въ благообра́зіемъ добродѣ́телей. Тѣ́мже а́нгельски на земли́ пожи́вши, со а́нгелы ны́нѣ лику́етъ въ пресла́вныхъ оби́теляхъ небе́сныхъ.
Сти́хъ: Ди́венъ Бо́гъ во святы́хъ Свои́хъ, [Бо́гъ Изра́илевъ].
Ди́вными по́двигами, внима́ніемъ себѣ́ и трезве́ніемъ, непреста́нною моли́твою и хожде́ніемъ предъ Бо́гомъ се́рдце свое́ очи́стивши, хра́мъ Свята́го Ду́ха была́ еси́, богоблаже́нная. Тѣ́мже Того́ ди́вныхъ даро́въ сподо́билася еси́, моли́твою же твое́ю отъ ага́рянскаго неи́стовства чу́дно оби́тель твою́ изба́вила еси́.
Сла́ва, гла́съ 8:
Тяготу́ вѣ́чныя сла́вы прія́ла еси́ за ле́гкія печа́ли по́стничества, же́ртву себе́ непоро́чну тѣ́ми предста́вивши Го́сподеви. Тѣ́мже имѣ́я дерзнове́ніе ко Всеще́дрому Бо́гу, испроси́ Благовѣ́рному Царю́ на́шему во все́мъ благопоспѣше́ніе, вѣ́ры правосла́вныя утвержде́ніе и душа́мъ на́шимъ ве́лію ми́лость.
И ны́нѣ, богоро́диченъ:
Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].
Тропа́рь, гла́съ 8:
Въ тебѣ́, ма́ти, извѣ́стно спасе́ся е́же по о́бразу, пріи́мши бо кре́стъ, послѣ́довала еси́ Христу́ и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Евфроси́ніе, ду́хъ тво́й.
Инъ тропа́рь, гла́съ 4:
Свята́я твоя́ па́мять Су́ждальскую страну́ весели́тъ, вѣ́рныя же вся́ созыва́етъ во всечестны́й хра́мъ тво́й, идѣ́же ны́нѣ лежи́тъ всечестно́е тѣ́ло твое́, Евфроси́ніе преподо́бная, моли́ Христа́ Бо́га, спасти́ся душа́мъ на́шимъ.
Сла́ва, и ны́нѣ, богоро́диченъ.
НА УТРЕНИ,
На Бо́гъ Госпо́дь: тропа́рь [два́жды. Сла́ва, и ны́нѣ, богоро́диченъ].
По 1-й стихоло́гіи сѣда́ленъ, гла́съ 1:
Бдѣ́ніи всено́щными, моли́твами непреста́нными и до́лгими поще́ніи пло́ть свою́ распе́нши со страстьми́ и похотьми́, и́стинно Христо́вою рабо́ю яви́лася еси́ и на́мъ пу́ть показа́ла еси́, и́мже ше́ствуя во слѣ́дъ Христа́, Ца́рствія небе́снаго сподобля́емся. [Два́жды.]
Сла́ва, и ны́нѣ, богоро́диченъ:
Богоро́дице Дѣ́во, ду́ши на́ша, одолѣва́емыя страстьми́, на бра́нь и труды́ по́стничества укрѣпи́, да тѣ́ми дѣ́вства на́шего обѣ́ты нело́жны сотвори́мъ.
По 2-й стихоло́гіи сѣда́ленъ, гла́съ 2:
Мíръ презрѣ́вши и себе́ отве́ргшися, Христу́ му́жественно послѣ́довала еси́, преподо́бная Евфроси́ніе, ны́нѣ же по труда́хъ въ небе́сныхъ оби́теляхъ упокоева́ешися сла́достно, идѣ́же и на́мъ всели́тися моли́твами твои́ми сотвори́. [Два́жды.]
Сла́ва, и ны́нѣ, богоро́диченъ:
Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́, я́ко при́сно, си́лу Твою́: на Тя́ бо упова́юще, ра́дуйся, вопіе́мъ Ти́, я́ко иногда́ Гавріи́лъ, безпло́тныхъ архистрати́гъ.
По поліеле́и сѣда́ленъ, гла́съ 4:
Невѣ́ста Христо́ва, Евфроси́ніе всеблаже́нная, по́стническими по́двиги свои́ми все́ плотско́е мудрова́ніе умертви́вши, вся́кими добродѣ́тельми украси́ла еси́ житіе́ твое́ и къ Бо́гу дерзнове́ніе стяжа́ла еси́, Ему́же прилѣ́жно моли́ся поми́ловатися душа́мъ на́шимъ. [Два́жды.]
Сла́ва, и ны́нѣ, богоро́диченъ:
Тя́ наде́жду, прибѣ́жище и предста́тельницу обрѣ́тше, вѣ́рніи, къ Тебѣ́ притека́емъ и прилѣ́жно вопіе́мъ: поми́луй, Богоро́дице, на Тя́ упова́ющія и прегрѣше́ній оставле́ніе на́мъ испроси́ моли́твами Твои́ми.
Степе́нна, 1-й антифо́нъ 4-го гла́са. Проки́менъ, [гла́съ 4]: Восхва́лятся преподо́бніи во сла́вѣ* [и возра́дуются на ло́жахъ свои́хъ]. Сти́хъ: Воспо́йте Го́сподеви пѣ́снь но́ву, [я́ко ди́вна сотвори́ Госпо́дь]. Вся́кое дыха́ніе… Ева́нгеліе Матѳе́я, зача́ло 104.
По 50-мъ псалмѣ́ стихи́ра, гла́съ 8:
Сама́ ше́ствующи тѣ́снымъ путе́мъ, къ спо́стницамъ свои́мъ глаго́лала еси́: не устраши́мся по́двиговъ и́ночества: томи́тельно поще́ніе, но сла́достенъ ра́й; притру́дно моли́твенное стоя́ніе, но блаже́нно пребыва́ніе на не́бѣ; го́рько своея́ во́ли отрече́ніе, но утѣ́шительно сожи́тельство святы́мъ. Не облѣни́мся у́бо, сестры́, претерпи́мъ ма́ло, да вѣнцы́ нетлѣ́нными увязе́мся отъ Христа́ Бо́га и Спа́са ду́шъ на́шихъ.
Кано́нъ [молебный Богоро́дицы, со ирмосо́мъ на 6. И преподо́бныя кано́нъ, на 8]. Гла́съ 8.
Пѣ́снь 1.
Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.
Свѣ́томъ моли́твъ твои́хъ озари́ на́съ, съ любо́вію приступа́ющихъ святу́ю па́мять твою́ воспѣ́ти, преподо́бная ма́ти.
Испроше́нна моли́твами и отъ чре́ва ма́терня избра́на бы́вши, всю́ себе́ въ же́ртву Христу́ Бо́гу принесла́ еси́ и сосу́дъ избра́нъ боже́ственныхъ даро́въ яви́лася еси́, блаже́нная.
Сохрани́ти хотя́ дѣ́вство Христу́ Жениху́ и послуша́ніе соблюсти́ роди́телемъ, моли́твенно воззвала́ еси́ къ Богоро́дицѣ и Тоя́ хода́тайствомъ жела́нное устрое́ніе жи́зни улучи́ла еси́, пресла́вная.
Богоро́диченъ: Всего́ мя́ спаса́етъ Сло́во Пребоже́ственное, изъ чре́ва Твоего́ воплоти́тися благоволи́вшее, Чи́стая Ма́ти Дѣ́во.
Пѣ́снь 3.
Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.
Свобо́ду получи́въ отъ бра́ка Бо́жіимъ смотрѣ́ніемъ, кра́сному добро́тою Христу́ обручи́лася еси́ произволе́ніемъ и, Тому́ усе́рдно порабо́тавъ, ны́нѣ въ небе́сныхъ оби́телехъ Того́ утѣша́ешися оби́льно.
Небе́сная возлюби́вши, вся́ кра́сная мíра сего́ оста́вила еси́, преподо́бная, и, во оби́тель все́льшися, нелѣ́ностными труда́ми по́стничества Бо́гу угоди́ла еси́, Его́же моли́ спасти́ся душа́мъ на́шимъ.
Всено́щными стоя́ніи твои́ми безпло́тнымъ а́нгеломъ подо́билася еси́, тѣ́хъ споспѣ́шниками иму́щи въ твои́хъ непреста́нныхъ къ Бо́гу моли́твахъ.
Богоро́диченъ: При́зри на не́мощь рабо́въ Твои́хъ, Всепѣ́тая Богоро́дице, и изба́ви на́съ отъ скры́тыхъ сѣте́й врага́ и губи́теля ду́шъ на́шихъ.
Сѣда́ленъ, гла́съ 3:
Пасо́ма отъ Го́спода, я́ко овча́ кро́ткое, сопроти́вныхъ полки́ побѣди́ла еси́ благода́тію Свята́го Ду́ха и, сконча́въ му́жественно по́двигъ, вѣнцы́ побѣ́дныя прія́ла еси́ въ небе́сныхъ селе́ніихъ, идѣ́же упокоева́яся, Бо́га прилѣ́жно моли́ спасти́ся душа́мъ на́шимъ. [Два́жды.]
Сла́ва, и ны́нѣ, богоро́диченъ:
Мно́гими обдержи́міи напа́стьми, къ Тебѣ́ прибѣга́емъ, Влады́чице Чи́стая: покры́й на́съ покро́вомъ Твои́мъ и моли́твами Твои́ми отъ страсте́й и бѣ́дъ спаси́.
Пѣ́снь 4.
Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.
Бо́дреннымъ о́комъ ума́ твоего́ въ зрѣ́ніи неви́димаго Бо́га вы́ну пребыва́ла еси́, блаже́нная: Его́же лицезрѣ́ніемъ ны́нѣ наслажда́ющися, моли́ уны́нія дрема́нію оттрясти́ся отъ оче́й на́шихъ.
Боже́ственнымъ сло́вомъ и благода́тію Свята́го Ду́ха воспита́вшися, на высоту́ добродѣ́телей востекла́ еси́, преподо́бная ма́ти, и́хже стезе́ю ше́ствовати и на́съ укрѣпи́ моли́твами твои́ми.
Огне́мъ Боже́ственнаго стра́ха попали́въ страсте́й те́рніе и теплото́ю Утѣ́шителя согрѣ́вшися, была́ еси́ безстра́стія зерца́ло, его́же прича́стники и на́съ покажи́ хода́тайствомъ твои́мъ.
Богоро́диченъ: Омраче́нныя грѣха́ми ду́ши на́ша просвѣти́, Пречи́стая, и во свѣ́тѣ за́повѣдей Сы́на Твоего́ и Бо́га ходи́ти научи́ ны.
Пѣ́снь 5.
Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.
Нося́ кре́стъ сво́й, послѣ́довала еси́ позва́вшему тя́ Го́споду бо́дренно, свѣти́льникъ и́нокинямъ бы́вши въ житіи́ твое́мъ, пресла́вная ма́ти.
Въ терпѣ́ніи, послуша́ніи и во́ли свое́й отрече́ніи тѣ́сный пу́ть соверши́вши, ны́нѣ въ простра́нныхъ селе́ніихъ обита́еши, въ ня́же доспѣ́ти и на́съ устро́и.
Вся́ кра́сная мíра сего́ попра́вши, бу́ди на́мъ помо́щница, изнемога́ющимъ въ боре́ніи съ пре́лестями вѣ́ка сего́.
Богоро́диченъ: Приснодѣ́ву пое́мъ Тя́, Богоро́дице: Ты́ бо Бо́га Сло́ва пло́тію мíрови ро́ждши, пребыла́ еси́ Дѣ́ва.
Пѣ́снь 6.
Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.
Мно́гими по́двиги плотска́я умертви́вши стремле́нія, и на́съ, подража́ти тебѣ́ въ по́стничествѣ возжела́вшихъ, тѣ́снымъ путе́мъ твои́мъ ше́ствовати умудри́.
Воздержа́ніе, моли́тву и любо́вь стяжа́вши, преподо́бная, и́ноческаго житія́ о́бразъ яви́лася еси́, въ не́мже преуспѣ́ти и на́мъ посо́бствуй хода́тайствомъ твои́мъ.
Послуша́нія труды́ преше́дши и всѣ́ми добродѣ́тельми украси́вшися, же́злъ настоя́тельства прія́ла еси́ во оби́тели се́й, ны́нѣ же вѣнце́мъ сла́вы увѣнча́на еси́: сего́ ра́ди ублажа́емъ тя́, преподо́бная.
Богоро́диченъ: Яже Бо́га Сло́ва Изба́вителя мíру пло́тію ро́ждшая, изба́ви, мо́лимся, отъ сѣте́й вра́жіихъ ду́ши на́ша, Богороди́тельнице Чи́стая.
Конда́къ, гла́съ 2:
Дѣ́вства чи́стый сосу́дъ еле́емъ моли́твы и любве́ испо́лнивши, неугаси́мый свѣти́льникъ въ се́рдцѣ свое́мъ возжгла́ еси́, преподо́бная, съ ни́мже бо́дренно въ срѣ́теніе Небе́снаго Жениха́ изше́дши, въ черто́гъ Того́ пресвѣ́тлый прія́та была́ еси́, идѣ́же ны́нѣ водворя́яся съ ли́ки а́нгеловъ и святы́хъ, моли́ся, мо́лимся, Христу́ Бо́гу, ча́сти дѣ́въ юро́дивыхъ изба́витися на́мъ.
Икосъ:
Дѣ́вство возлюби́въ, сохране́ніе того́ испроси́ла еси́ у Приснодѣ́вы и, къ земно́му ше́ствуя жениху́, Небе́снаго срѣ́тила еси́, Ему́же уневѣ́стившися, вся́ жите́йская оста́вила еси́ и, притру́дное соверши́вши по́стническое житіе́, въ небе́сный черто́гъ прія́та бы́ти сподо́билася еси́, идѣ́же ны́нѣ съ ли́ки а́нгеловъ и святы́хъ водворя́яся, моли́ Христа́ Бо́га сотвори́ти и на́съ прича́стники блаже́нныя ча́сти твоея́.
Пѣ́снь 7.
Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.
Восте́кши на высоту́ добродѣ́телей и безстра́стнымъ во пло́ти житіе́мъ а́нгеломъ уподо́бльшися, рая́ сла́дости наслѣ́дницею бы́ти сподо́билася еси́, взыва́ющи: благослове́нъ еси́, Го́споди Бо́же, во вѣ́ки.
Сія́я свѣ́томъ безстра́стія, отъ страсте́й моли́твами твои́ми избавля́еши притека́ющихъ къ тебѣ́ моли́твенно, преподо́бная, взыва́ющихъ: благослове́нъ еси́, Го́споди Бо́же, во вѣ́ки.
Престо́лу предстоя́ Вседержи́теля, избавле́ніе отъ бѣ́дъ и скорбе́й моли́твами твои́ми испроси́ на́мъ, чту́щимъ па́мять твою́, да взыва́емъ: благослове́нъ еси́, Го́споди Бо́же, во вѣ́ки.
Богоро́диченъ: Пресвята́я Дѣ́во Богоро́дице, хода́тайствомъ Твои́мъ исцѣли́ на́ша тѣле́сныя не́мощи и душе́вныя неду́ги, да Тебѣ́ ра́достно воспое́мъ: ра́дуйся, Благода́тная.
Пѣ́снь 8.
Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.
За́повѣди Го́спода внима́ющи, трезве́ніемъ и бо́дренностію всѣ́ навѣ́ты и ко́зни врага́ препобѣди́ла еси́, отъ ни́хже и на́мъ изба́витися моли́твами твои́ми сподо́би.
Щито́мъ вѣ́ры и шле́момъ упова́нія вооружи́вшися, по́лчища вра́жеская отрази́ла еси́ моли́твами твои́ми отъ оби́тели, ю́же и ны́нѣ храни́ти не преста́й хода́тайствомъ твои́мъ.
Сра́мныхъ страсте́й совлещи́ся ру́бищъ, въ кра́сныя же добродѣ́тели ри́зы облещи́ся сподо́би на́съ моли́твами твои́ми.
Богоро́диченъ: Влады́чице Чи́стая, на́съ, къ Тебѣ́ усе́рдно прибѣга́ющихъ, отъ страсте́й и бѣ́дъ свободи́ моли́твами Твои́ми.
Пѣ́снь 9.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.
Нечистота́ми грѣхо́вными оскверне́нныхъ на́съ убѣли́, блаже́нная Евфроси́ніе, моли́твами твои́ми, къ покая́нію подви́гши ожестѣ́вшія ду́ши на́ша.
Нестяжа́ніемъ упраздни́вшися, безбѣ́дно преплыла́ еси́ жите́йское мо́ре, преподо́бная, его́же треволне́ній изба́витися сподо́би и на́мъ, чту́щимъ па́мять твою́.
То́ками сле́зъ твои́хъ о́гнь страсте́й угаси́ла еси́, блаже́нная, и́хже жже́нія изба́ви и на́съ моли́твами твои́ми.
Богоро́диченъ: Бу́ди на́мъ прибѣ́жище, стѣна́ и покро́въ, Пречи́стая Дѣ́во, да Тя́ съ безпло́тными ли́ки непреста́нно велича́емъ.
Свѣти́ленъ, гла́съ 5:
Свѣти́льникъ нога́мъ на́шимъ бы́сть житіе́ твое́, преподо́бная, ему́же послѣ́дующе, невече́рняго Свѣ́та безбѣ́дно дости́гнемъ. [Два́жды.]
Сла́ва, и ны́нѣ, богоро́диченъ:
Свѣ́та Твоего́ заря́ми просвѣти́, Дѣ́во, мра́къ невѣ́денія отгоня́ющи, благовѣ́рно Богоро́дицу Тя́ исповѣ́дающихъ.
На хвали́техъ стихи́ры, гла́съ 1:
Пріиди́те, вѣ́рніи, съ вѣ́рою ра́ку моще́й обстоя́ще преподо́бныя, хвале́бныя е́й пѣ́сни вознесе́мъ, веселя́щеся, да моли́твами ея́ отъ страсте́й и бѣ́дъ избавле́ніе пріи́мемъ. [Два́жды.]
Поще́нія тру́дъ воспріи́мши и непреста́нныя моли́твы свѣти́льникъ возже́гши въ се́рдцы свое́мъ, въ свѣ́тлыя оби́тели ра́йскія всели́лася еси́, блаже́нная, въ ня́же и на́мъ доспѣ́ти сподо́би хода́тайствомъ твои́мъ.
Тѣ́снымъ путе́мъ ше́ствовавши, широты́ ра́йскія дости́гла еси́, Евфроси́ніе досточу́дная, идѣ́же ны́нѣ дре́ва живо́тнаго причаща́ющися, моли́ Человѣколю́бца Бо́га десна́го сподо́битися стоя́нія и на́мъ въ де́нь стра́шнаго Суди́ща Христо́ва.
Сла́ва, гла́съ 8:
Изъ мла́да себе́ Христу́ Бо́гу преда́вши, преподо́біемъ и пра́вдою украси́лася еси́, преподо́бная, и, въ мѣ́ру во́зраста исполне́нія его́ дости́гши, вѣне́цъ сла́вы отъ руки́ Вседержи́теля прія́ла еси́, Ему́же моли́ся спасти́ся душа́мъ на́шимъ.
И ны́нѣ, гла́съ то́йже:
Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.
Славосло́віе вели́кое. [Ектеніи́ и отпу́стъ.]
НА ЛИТУРГІИ,
Блаже́нна отъ кано́на, пѣ́снь 3-я и 6-я. Проки́менъ, [гла́съ 7]: Восхва́лятся преподо́бніи во сла́вѣ* [и возра́дуются на ло́жахъ свои́хъ]. Сти́хъ: Воспо́йте Го́сподеви пѣ́снь но́ву, [я́ко ди́вна сотвори́ Госпо́дь]. Апо́столъ къ Кори́нѳяномъ, зача́ло 181. [Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́.] Ева́нгеліе Матѳе́я, зача́ло 104. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].
Источникъ: Слу́жба и ака́ѳистъ свято́й благовѣ́рной княжнѣ́ Евфроси́ніи Су́ждальской. Мѣ́сяца Септе́мврія въ 25-й де́нь. — Изданіе 3-е. — М.: Сѵнода́льная Тѵпогра́фія, 1909. — Л. 1 – 5 об., 17 – 18 об.
История на Православната Църква – ΕΚΚΛΗΣΙΑ Γ.Ο.Χ. ΕΛΛΑΔΟΣ 
Трябва да влезете, за да коментирате.