СЛУЖБА ВО ВТОРНИКЪ ВТОРЫЯ СЕДМИЦЫ ПО ПАСЦѢ.

ВЪ ПОНЕДѢЛЬНИКЪ ВЕЧЕРА,
На Го́споди воззва́хъ… поста́вимъ стихо́въ 6 и пое́мъ стихи́ры подо́бны, гла́съ 4. Подо́бенъ: Яко до́бля.
Воскре́съ изъ гро́ба, заключе́ннымъ две́ремъ предста́лъ еси́ друго́мъ Твои́мъ, Всеси́льне, и Ѳомѣ́ невѣ́ровавшу гвозде́й показа́лъ еси́ я́звы и ре́бра, е́же отъ копія́ прободе́ніе, утвержда́я и увѣря́я того́, Сло́ве, я́ко Ты́ Са́мъ еси́ за милосе́рдіе претерпѣ́вый спаси́тельныя Стра́сти.

За мно́гое снизхожде́ніе и милосе́рдіе безмѣ́рное, Мое́ зря́ истоща́ніе, не усумни́ся, но увѣ́рися, Бли́знче, — Госпо́дь рече́, — я́ко Са́мъ е́смь Азъ пострада́вый и тридне́венъ изъ гро́ба воскресы́й, и а́дова сокро́вища истощи́вый и оживи́вый отъ вѣ́ка уме́ршія.

Удиви́вся, я́ко узрѣ́, Ѳома́ возопи́, егда́ ви́дѣ Тя́, Всеси́льне: Ты́ еси́ Бо́гъ мо́й и Госпо́дь, вѣ́рую, Человѣколю́бче, я́ко Са́мъ еси́ пострада́вый, и стра́сти исцѣля́яй ду́шъ на́шихъ. Кла́няюся Твое́й держа́вѣ и мíрови возвѣща́ю стра́шное Твое́ и всеси́льное воста́ніе.

И мине́и 3. Сла́ва, и ны́нѣ, гла́съ 1:
Ученико́мъ сомня́щимся, во осмы́й де́нь предста́ Спа́съ, идѣ́же бя́ху со́брани, и, ми́ръ да́въ, Ѳомѣ́ возопи́: пріиди́, апо́столе, осяжи́ дла́ни, въ ни́хже гво́здія вонзо́ша. О, до́брое невѣ́ріе Ѳомино́! Вѣ́рныхъ сердца́ въ позна́ніе приведе́, и со стра́хомъ возопи́: Госпо́дь мо́й и Бо́гъ мо́й, сла́ва Тебѣ́!

Свѣ́те Ти́хій…

На стихо́внѣ стихи́ры, гла́съ 1:
Обыди́те, лю́діе, Сіо́нъ и обыми́те его́, и дади́те сла́ву въ не́мъ Воскре́сшему изъ ме́ртвыхъ, я́ко То́й е́сть Бо́гъ на́шъ, избавле́й на́съ отъ беззако́ній на́шихъ.

Сти́хъ: Къ Тебѣ́ возведо́хъ о́чи мо́и, [Живу́щему на небеси́. Се́ я́ко о́чи ра́бъ въ руку́ госпо́дій свои́хъ, я́ко о́чи рабы́ни въ руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дритъ ны́].

Яко помышле́ніи лука́выми и дѣ́лы осуди́хся, Спа́се, мы́сль мнѣ́ да́руй обраще́нія, Бо́же, да зову́: спаси́ мя́, Благодѣ́телю Благíй и поми́луй мя́.

Сти́хъ: Поми́луй на́съ, Го́споди, поми́луй на́съ, [я́ко по мно́гу испо́лнихомся уничиже́нія, наипа́че напо́лнися душа́ на́ша поноше́нія гобзу́ющихъ и уничиже́нія го́рдыхъ].

Му́чениченъ: Еже на суди́щи ва́ше исповѣ́даніе, святíи, де́моновъ оплева́ си́лу и отъ пре́лести человѣ́ки свободи́. Тѣ́мже и глава́мъ усѣка́емымъ, взыва́сте: да бу́детъ, Го́споди, же́ртва ду́шъ на́шихъ благопрія́тна предъ Тобо́ю, я́ко Тебе́ возлюби́вше, неради́хомъ о вре́менной жи́зни, Человѣколю́бче.

Сла́ва, и ны́нѣ, гла́съ 2:
По воста́ніи Твое́мъ, Го́споди, собра́ннымъ ученико́мъ Твои́мъ и две́ремъ заключе́ннымъ, посредѣ́ ста́лъ еси́, ми́ръ подая́ и́мъ. Вѣ́ровавъ же и Ѳома́, зрѣ́ніемъ руку́ и ре́бръ Твои́хъ, Го́спода и Бо́га Тя́ исповѣ́да, спаса́ющаго упова́ющія на Тя́, Человѣколю́бче.

Ны́нѣ отпуща́еши… Тропа́рь пра́здника: Запеча́тану гро́бу… И отпу́стъ.

ВО ВТОРНИКЪ ВТОРЫЯ СЕДМИЦЫ, НА УТРЕНИ,
На Бо́гъ Госпо́дь… Тропа́рь пра́здника, три́жды.

По 1-мъ стихосло́віи, сѣда́ленъ, гла́съ 1. Подо́бенъ: Ка́мени запеча́тану.
Жены́ ко гро́бу пріидо́ша ура́ншія, и а́нгельское явле́ніе ви́дѣвшія, трепета́ху: гро́бъ облиста́ Жи́знь, чу́до удивля́ше я́. Сего́ ра́ди ше́дшія, ученико́мъ проповѣ́даху воста́ніе: а́дъ плѣни́ Христо́съ, я́ко еди́нъ Крѣ́покъ и Си́ленъ, и истлѣ́вшія вся́ совоздви́же, осужде́нія стра́хъ разруши́въ Кресто́мъ.

Сти́хъ: Го́споди, да не я́ростію Твое́ю обличи́ши мене́, ниже́ гнѣ́вомъ Твои́мъ нака́жеши мене́.

Аще пра́ведникъ едва́ спаса́ется, а́зъ, грѣ́шный, гдѣ́ явлю́ся, тяготы́ и ва́ра дневна́го не поне́сшій? Но съ нае́мники единонадеся́таго часа́ причти́ мя́, Бо́же, и спаси́ мя́.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Му́чениченъ: Яко до́бріи во́ини единому́дренно вѣ́ровавше, преще́нія мучи́телей не убоя́вшеся, святíи, пріидо́сте усе́рдно ко Христу́, взе́мше честны́й кре́стъ, и сконча́вше тече́ніе, съ небесе́ побѣ́ду прія́сте. Сла́ва Укрѣ́пльшему вы́, сла́ва Вѣнча́вшему вы́, сла́ва Дѣ́йствующему ва́ми всѣ́мъ исцѣле́нія.

Сла́ва, и ны́нѣ, богоро́диченъ:
Неруши́мую Стѣ́ну иму́ще, вѣ́рніи, Богоро́дицу Марíю, пріиди́те, поклони́мся и припаде́мъ Ей: дерзнове́ніе бо и́мать къ Ро́ждшемуся изъ Нея́, и моли́ти, и спаса́ти отъ гнѣ́ва и сме́рти ду́ши на́ша.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.
Апо́стола вси́ и ученика́ Христо́ва восхва́лимъ пѣ́сньми въ па́мять его́: боголѣ́пно бо на́ша помышле́нія, то́й я́звы гвозде́й осяза́въ, извѣ́стну вѣ́ру изыска́въ, утверди́ въ мíрѣ, и мо́литъ Спа́са поми́ловатися душа́мъ на́шимъ.
Сла́ва, и ны́нѣ, то́йже.

Та́же: Воскресе́ніе Христо́во… Псало́мъ 50-й. Кано́нъ пра́здника [недѣ́ли Антипа́схи] со ирмосы́ на 8 и мине́и на 4. По 3-й пѣ́сни: сѣда́ленъ мине́и. [По 6-й и 9-й:] конда́къ и ексапостила́рій пра́здника.

На хвали́техъ, стихи́ры на 4, гла́съ 1:
Кре́стъ претерпѣ́вый, и сме́рть упраздни́вый, и воскресы́й изъ ме́ртвыхъ, умири́ на́шу жи́знь, Го́споди, я́ко еди́нъ Всеси́ленъ. [Два́жды.]

Не пренебрези́ мене́, Спа́се мо́й, лѣ́ностію грѣхо́вною содержи́ма, воздви́гни мое́ помышле́ніе къ покая́нію и Твоего́ виногра́да дѣ́лателя иску́сна покажи́ мя́, да́руя ми́ единонадеся́таго часа́ мзду́ и ве́лію ми́лость.

Му́чениченъ: Сíи во́ини Царя́ Вели́каго, сопроти́вишася повелѣ́ніемъ мучи́телей до́блественно, небрего́ша о му́кахъ и пре́лесть всю́ попра́вше, досто́йно вѣнча́ни бы́вше, про́сятъ у Спа́са ми́ра и ве́лія ми́лости.

Сла́ва, и ны́нѣ, гла́съ 2:
Две́ремъ заключе́ннымъ, предста́въ Іису́съ ученико́мъ, безстра́шіе и ми́ръ дая́ше, та́же глаго́летъ Ѳомѣ́: что́ Мнѣ́ не вѣ́руеши, я́ко воскресо́хъ изъ ме́ртвыхъ? Принеси́ сѣ́мо ру́ку твою́ и вложи́ въ ре́бра Моя́, и ви́ждь. Тебѣ́ бо невѣ́рующу, вси́ навыко́ша Стра́сти и Воскресе́ніе Мое́ зва́ти съ тобо́ю: Госпо́дь мо́й и Бо́гъ мо́й, сла́ва Тебѣ́!

На стихо́внѣ стихи́ры пра́здника, гла́съ 2. Подо́бенъ: До́ме Евфра́ѳовъ.
Воспои́мъ, вѣ́рніи, непреста́нно со а́нгелы Христа́ воскре́сшаго тридне́вна изъ гро́ба и мíръ совоздви́гшаго.

Сти́хъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

Ѳома́ Твоя́ ре́бра, Благоутро́бне, осяза́въ, къ вѣ́рѣ взы́де. И мы́ тѣ́мъ Тя́ Бо́га про́чее позна́хомъ.

Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.

Подае́ши, о Изба́вителю, ми́ръ лю́демъ Твои́мъ, воскре́съ изъ гро́ба и мíръ совоздви́гнувый отъ а́да, Всеси́льне.

Сла́ва, и ны́нѣ, гла́съ 6. Іоа́нна мона́ха:
Две́ремъ заключе́ннымъ, прише́лъ еси́, Христе́, ко ученико́мъ. Тогда́ Ѳома́ смотри́тельно не обрѣ́теся съ ни́ми. Глаго́лаше бо: не иму́ вѣ́ры, а́ще не уви́жду и а́зъ Влады́ки; уви́жду ребро́, отону́дуже изы́де кровь, вода́, креще́ніе; уви́жду я́зву, отъ нея́же исцѣлѣ́ вели́кій стру́пъ человѣ́ческій; уви́жду, ка́ко не бѣ́, я́коже ду́хъ, но пло́ть и ко́сти. Сме́рть попра́вый и Ѳому́ увѣ́ривый, Го́споди, сла́ва Тебѣ́!

Отпусти́тельный тропа́рь и отпу́стъ.

Источникъ: Пентикоста́ріонъ, е́же е́сть Пятдеся́тница [Тріо́дь Цвѣтна́я]. — Кíевъ: Въ тѵпогра́фіи Кíево-Пече́рской Ла́вры, 1864. — Л. 36 – 38.